Gahti Galai #4: N HKRIT AI SHA KARAI WA HPE KAM HPA AI LAM (Shakawn 27:1-14) — Kachin Responsive Reading

N HKRIT AI SHA KARAI WA HPE KAM HPA AI LAM

(Shakawn 27:1-14)

Woi awn ai wa · Leader (1)

Yehowa gaw nye a nhtoi hte hkye hkrang la ai lam rai nga ai, Kadai wa hpe ngai hkrit nga n ta? Yehowa gaw nye a asak shingbyi shara rai nga ai, Ngai kadai wa hpe hkrit kajawng na rai nga a ta?

Hpung masha ni · Congregation (2)

Nye a hkum shan sha na, n hkru ai ni sa wa nna, Ngai hpe zingri ai ni hte gumlau ni, ni wa ma jang, Shanhte ahtu kataw nna hkrat mat ma ai.

Woi awn ai wa · Leader (3)

Luksuk ni nye a man e dap jung nga ma timung, Nye a myit hpa n hkrit li ai; Majan pru wa nga ti mung, Dai hta she nye a myit grin nga na ra ai.

Hpung masha ni · Congregation (4)

Lam langai mi ngai Yehowa hpe hpyi se ai: Ngai ahkrung nga ai nhtoi hte ting, Yehowa a nta hta nga nga lu nna, Yehowa a tsawm pra ai mu lu na hte, Shi a Htingnu e myit htang nga na, ngai ra nga nngai.

Woi awn ai wa · Leader (5)

Shi gaw ruyak ai nhtoi hta shi a npan e ngai hpe makoi da ni ai; Shi sum a shingbyi shara hta ngai hpe magap da nngai: Lunghkrung ntsa e, shi ngai hpe shadun da ni ai.

Hpung masha ni · Congregation (6)

Ya shi gaw, grup yin e nga ai, ngai hpe gumlau ai ni a ntsa e, Nye a baw hpe, sharawt ya ni ai. Shi a sum hta pahtau dum let ngai hkungga jaw na nngai. Ngai Yehowa hpe mahkawn mangoi nna, tingse dum na nngai.

Woi awn ai wa · Leader (7)

Yehowa e, ngai jahtau yang, madat mara ya e, Ngai hpe matsan dum nna htan ya e.

Hpung masha ni · Congregation (8)

”Nye a myi man hpe tam mu," nga nna, nye a myit masin hpe tsun ndai majaw, Yehowa e, na a myi man hpe ngai tam nga nngai.

Woi awn ai wa · Leader (9)

Na a myi man ngai kaw na hkum makoi kau u; Masin pawt ai hte na a mayam wa hpe hkum kau da et: Ngai hpe karum ai wa nang rai nga nit dai; Ngai hpe hkye hkrang la ai Karai Kasang e, Ngai hpe hkum gang kau et, ngai hpe hkum jahti da et.

Hpung masha ni · Congregation (10)

Nye nu wa ni ngai hpe jahka kau rai ti mung,Yehowa ngai hpe pawn la na nngai.

Woi awn ai wa · Leader (11)

Yehowa e, na a lam ngai hpe madun ya e, Ngai hpe gyam yu ai ni a majaw, malang ai hku hta ngai hpe woi wa e.

Hpung masha ni · Congregation (12)

Kashun kashe maw ai ni hte, N teng n man ai sakse ni nye a man e rawt nga ma ai majaw, Gumlau ni ra ai lam hta ngai hpe hkum ap kau da et.

Woi awn ai wa · Leader (13)

Hkrung nga ai ni a shara hta e, Yehowa a kaja htum ai hpe ngai naw mu lu na nngai, ngai n kam taw gaw, myit htum ni ai.

Hpung masha ni · Congregation (14)

Yehowa hpe myit mada nga u; Dakan nga nna, na a myit dakring nga u: Rai sa, Yehowa hpe myit mada nga u ga law.

Complete Gahti Galai Directory — All 53 Kachin Responsive Readings

Gahti Galai comprises 53 liturgical scripture readings used in Jinghpaw (Kachin) Christian worship services, structured for alternating proclamation between the worship leader (Woi awn ai wa) and congregation (Hpung masha ni). Select any reading below to open its full text.