DU KRUNG HPUNG NI A NINGBAW

DU KRUNG HPUNG NI A NINGBAW

HPAN JA

Gai Da ginjaw de nna du wa ai hpang jahpawt, rung gawk kaw du ai hte, shi manang jan Pung Gyi gaw, asut asat re kara punggyi hpe ta latsang hte masit shara let, asat gaw gatun tun sha law nna kagat hkrat wa nhtawm: " Gai Da e, n rai sai lu, nang n nga ai ndai laman hta, anhte rung na masa grai lak lai mat sai, du nnan kaga sa nna, da hpawt mung zuphpng hpaw na re da, nang mung masa yu nna she shaga nu re lu." Ngu sa gahte dan nu ai. "Zuphpawng ten shawoi na hku naw re ni? Myi na du wa gaw rang?" Gai Da mau mau rai san nu ai. "Shawng na du wa du yu ten du sai majaw, shayu kau sai, ya sa ai wa gaw, hkai mu gawnhkang dap na re da." Pung Gyi baw mahkyit let, grai n ji la ai zawn tsun ai majaw, Gai Da loi mau mat nu ai. Shi mau ai gaw masha dai hpe n rai, kunghpan hpaji magam dap de hkai sun dap na masha hpe sa up hkang shangun ai majaw, masha dai hpaji gade kung ai wa rai nga ai kun ngu, zuphpawng hpaw ten n du hkraw ai zawn she ngu wa nu ai. Shawoi lahtin tsaw zauhkai htem she nga hkawm hkawm te Gup Hkang chyinghka kaw nna le re hte, Gai Da hpe mu dat nna, shinglet shaw n-gup mahka nna ta wak let, zuphpawng gawk de sa wa saga ngu ai hku, ta bai ningwut dat nna, kagyin gabye sat na tsang ai zawn lanyau mat wa sai. Gai Da hkan yu dat yang, shi a lagaw hta zauhkai maka ka ai ahpa lep re matep tawn da nu ai. Gai Da galoi mung manang ni hpe woi sagoi goi re man nna, Ma Soi hpang de gawai shang wa nhtawm: " Sumtsaw wa, nang sumla grai bai soi shapraw sai rai nga ai le." Sa ngu dat nu al. "Sumtsaw jan, cha e, mana n-gup ndai man sai yaw, ya kaw nna an dai zawn ngu n mai shaga hkat sai lu yaw, ya nang galoi du wa sata? Shawoi na hku n mai shaga sai."

Ma Soi sumla soi ai ningmun pawngtin dawm la kau hkra, Gai Da hpang de sit hkrat wa nna, shinggan de masha ni na kau na tsang ai hku, lawan chyan mada yu, n-gup hte ladi hpe shabyi pai maga de htu shanyin kau dat let, shinglet shaw lang nna, grai gajawng hkrit mat ai hku, mani gashi let n-gup mahka nna shinglet daw kaba mi bai shaw lalam dat rai, shingdu de nga mat wa nu ai. Gai Da du shawn di chyinghka lam de hkan chyan mada dat yang, hkawm sharat gaw n na re mi, masha langai lai ral mat wa ai shingma sha hkan mu dat nu ai. "Du nnan wa re ni?" "Re." Ma Soi du she ari kau hkra, yat sha tsun dan nu ai. Gai Da yu nga ninglen, zuphpawng gawk de zuphpawng sa wa ai masha ni yawng, nsa kaba shaw dat yang masha ni na kau na hkrit la ai zawn zawn, lahtin tsaw zauhkai hkai ai langai pyi n lawm mat sai, manam dap hkan na maisau gyepdin din ai gaw din, htingnai hkalep lep ai ni gaw lep rai, hkawm yang, n dum shami kaw samyit langai jahkrat dat tim, numla kailang pyi galawk mat na daram she zim nga ai. Yawng lai mat wa ai hpang, Gai Da shi hkrai sha: Kaning rai nme lagut zawn rai lahkyum mat ma ai hkrai rai sa, kaning ngan re du hkawhkam wa re hka ngu, kraw gata e anyam let, Ma Soi a mu htam gawk kaw nna, hkum galaw tsap shading la hkra, lahtin tsaw zauhkai hpe dingsang sang "Htem" she ngu hkawm let zuphpawng gawk de shang wa yang, yawng gaw baw dagup tawn let, shi hpe myiman nhkrem tawn nna, myi sen hte grai tsang ai hku hkap yu nga ma ai. Gai Da du nnan wa kaw di di sa wa nhtawm, hkra ta ladawn let: "Du wa, nang du sa ai shiga gaw na sai, mana hkying shi jan hta she nta du wa nna, nang hpe rai nsa shakram lu nga nngai," Ngu dat nu ai.

"AWh, yahte Bekyin de zuphpawng hpaw sa mat ai Gai Da ngu ai gaw nang rai i? Dung ga!" Du wa Gai Da hpe shakram let shaga dat ai nsen gaw, ji grawng sai lam tam kyin nna pyen gachyawn ai zawn sha nga nna, Gai Da na nna ngu let, manang ni hpe yu dat yang, yawng mayawng gaw ta gye nan gahtawk shala masu rai, mani mayu sharang nga ma ai Gai Da gaw du wa hpa majaw ga shaga nsen shade de kya ai rai kun, jahkraw ana lu ai nhten ngu myit let, shi a myiman de bai sharawt mada dat yang she, du wa a loi mi deng deng re gahtan kaw, hpaumaw n gang lahkawng shakap tawn ai zawn re myimun nhkrem hku tu nga, wuman na langa pawng zawn hpraw ai wa lahkawng gaw, lapa nnan pa bang wa ai zawn nten kaw gamyet taw nga a mu dat ai ja, Gai Da gaw du wa ai makau na man a la- hkum (shawng de shi tut nawng dung ai) kaw dung bang wa nu ai. "Zuphpawng hpaw saga, lai wa sai ten nanhte laban bat mi hta zuphpung galang lang hpaw ai nga ai, ya hpang de mung dingyang hpaw na re!" Nga nna, rung laika hti bang wa nu ai. Mangai ten du wa sai re majaw, shi hti ai rung laika gaw ma kaji ni hpe ma kaji jawng de sa bang na hte seng ai laika rai nga ai, laika hti ngut ndawt, Yu Sa wa tsun ai: "Ngai sha wa gaw jawng lung yang laika grai chye kraw ai, ya gaw dakkasu jawng lung nga sai, htaning gaw pru wa na sha rai sai, ma sharin yang, nau hkyem sa yang mung nmai, nhkyem sa yang mung nmai ai!" Du wa a zuphpawng gaw rung na mu hte nseng ai ma sha- rin lam tsun ai majaw, Pung Gyi du wa hpang de gayin mada dat ai shaloi, Gup Hkang a namdum mahka hta sa tsap hkrup ai zawn nga hkra manam ai nsa, shi a kraw gata de shalut bang mat wa ai majaw, sa dik she dik kau hkra, myiman pe yat sha lawu maga de manai gayin kau dat ai hpe, du wa mu dat nu ai.

Adu wa mada dat ai shaloi, Pung Gyi du gayin kau dat ai hkan mu nna, masin lau ngu let, na nna nga ai nsen hte: "Masha nkau mi yaw, ngai hpe myit n pyaw yang man pa ngu tsun, ngai n kam yu ai rawn lai hkum shapraw, ngai gaw manang hpe majoi n pawt ai, pawt sai kaw nna gaw nanhte hpe myiprwi si chye hkrat shangun ai re lu!" Nga nna tsun ai ga gaw, shi aja wa makan nna tsun sai majaw, zuphpawng gawk na masha ni a na lashing lup rai sai. Du krung nga ai ni gaw hpa majaw du wa ga dai tsun ai re n chye, Gai Da chyu sha Pung Gyi du gayin mat wa ai gaw, Gup Hkang a nsa manam ai n dang hang nna re chye nna, ta gyenan hta: Du wa nang Gup Hkang a nsa manam ai yan ai re n chye ai majaw, nang hpe myit n pyaw sai lu, ngu ka shalai dat ya nu ai. Yawng gaw du wa nhpa tsun mayu ai, kadai hpe tsun ai re n chye madat hpaga ya rai, du grau n sharawt gwi ai, ta gyenan hpe aga saw shaja nna, lagu gahtawk chyai, salik lu ai ni gaw wan hkut kaw jahpai nna madu kam ai hku sumru dung nga manu ai. Chyahkring mi na laman hta, gawk ting tsim hte tsam nga zim mat wa magang sai "Zuphpawng ngut sai!" Du wa zuphpawng jahkring kau dat ai hpang, masha ni yawng gaw hpa majaw du wa ma sharin na lam zuphpawng hta sa tsun ai kun, anhte hpe jawng de ma ni a matu zuphpawng sa ya ai zawn wa mi angu ai gaw, ngu shada da mada hkat ai ten, Gai Da yawng a gaang kaw hkan tsap nna: "Sadi mu lu, hpang de anhte yawng gaw shi a kasha hku rai mat sai, shi tsun ai hku n rai jang shingna pyi gatut sha na lu." Nga tsun kau da nna, yawng a shawng de lahtin tsaw zauhkai hte tem ngu shi a mu htam gawk de wa mat nu ai Pung Gyi mung chyahkyawn ju ai hku lai wa ai zawn, hkyum hkyum rai bai hkan nang ra ai: "Nhpa ngu ai ga rai kun yi?" "Ngai yu sai, hpa n chye tsun nna gahte ai she re, kunghpan hpaji rung gaw hka sung ai shara re, shi n dang hkang, kaning di hkang na n chye ai majaw, shi tsun ai ga mung jaw yang jaw, n jaw yang n jaw, shi gaw tsun yu sai, ngu nna manang a jela tam na hpunggam tam tawn ai she rai mut nga nu ai.

Taw shi gaw hpa nan n chye tsun ai hku nan rai mat nga ai le, zuphpawng hta me wa shakap shai nga ai ga sa tsun ai, madu a madang nyem ai lam sa shadan dan ai ga rai nga nu ai." Gai Da gaw lahkum kaw shamyet nna, lamu ntsa de mada let, lagaw hpe saboi jut mi de hta mara dat nna tsun u ai. Gai Dai gaw shi myit nau pyaw jang, lagaw hpe saboi matu mi de hta mara dat dat re gaw mara rai nu ai. "Jaw nga ai law. Cha e rang, shi gaw hkai sun dap kaw nna sa ai re nga, si mai kaning di hkai sha na lama tsun yang gaw, anhte naw kam madat na wa yi." Pung Gyi mau n ma nga nu ai. Mau n ma ai gaw shan sha n rai, rung masha ni yawng mau ai krai. Isawmra ya a pang, du ningsa wa a sak poi lai ai nga, rung masha yawng hpe shat sa woi sha nna nhtang wa ai shaloi, du ningnan wa mung Gai Da a hpang kaw achyan rai hkan nang let: "Gai Da nang ya rung de n shang wa sana kun?" Nga hkan san dat nu ai, Gai Da ningshung si she rawt hkra gajawng kau let: "Naw shang wa na du wa, yahte hkawm mat nna, bungli grai hprai mat, laika naw wa yu na tai nga ai." Ngu htan dat nu ai. "Laika hpawtni yu na di u, ngai nang hte lama ma naw jahta yu na." Nga tsun jang she, Gai Da a myit hta nyem nga mat let: "Mai gaw e du wa, ngai n chye hkan jahta na sha tsang ai." "Ngai chye ai hku rai yang, nang gaw ndai rung hta hpaji kung ai, myit sam ai, laika ka byin ai re nga nna, ngai grai na shagrau ai, sa, ngai a mu htam gawk de rai ga." Nga, Gai Da a shawng de lai gayin shaga nu ai.

Dai shana de, Gai Da gaw rung masha ni kadai gaw nhpa chye galaw ai, rung bungli kaning di hkang na du hkra tsun dan nu ai. Gai Da ra mi ra tsun dan ai shaloi myit ai, du wa kaga rung de nna sa wa ai re, ndai zawn re hpaji rung hkan nnan sa yang, n lawm n pawt re lam n nga u ga ngu nna chyahtum chyalai du hkra tsun dan ai re. Gai Da du wa hpe rung hkang sha hpaji grai jaw sai, du wa shi hpe grai kam sham sam nga ai ngu, kraw hta loi myit pyaw si nga ai ten, laban manga bai du nna, rung zuphpawng bai hpaw masai. Dai jahpawt du wa Ma Soi yan Hkrang Hpraw a lapran kaw hit di sa dung sumprat kau ya manu ai. Dai jahpawt Gai Da a lahkum kaw Hkrang Hpraw sit dung mat sai. Gai Da laika hti n ngut nna ta e lang let hti shang wa u yang, shi dung ai lahkum n man mat sai majaw, yawng hpe yu dat nna, du wa kaga de htawt dung mat rai jang she, shi gaw du lahkum kaw nan n dung n lawt rai mat nna, amanu sha hit rai dung nga let, laika dingyang naw yu du krung nga nu ai. Raitim shi a myit hta gaw du ndai hpa majaw du lahkum kaw ndung ai, kaga de htawt dung mat ai rai kun, masha ni she sa mu yang, ngai hpe mahtang du shadu kau na mung n tsang sam ai, ngu myit let, lai sai ten na du wa dung dung re, shan hpyi tingnyang kaba hta dung nga let, shi a hkra maga e dung ai ningtau du Wu Hka wa hpe myi jut hku yu dat yang, Wu Hka wa shi hpe yu dat ai myisai hte hkrum rai sai. Shaloi she Gai Da mani sum rai let, shi a lahkum kaw masha dung mat sai, ngai dung shara n lu sai, du wa yan kau ai shara she re ngu ai hku, shi a myisha hpe Wu Hka wa a man kaw nna shi a lahkum maga de shachyai dan nu ai.

Yu Sa wa shara htawt mat ai gaw shi a man ang de Gwi Wung dung ai majaw rai nga ai, dai lam hpe kadai n chye, Gai Da chyau me gaw du wa shi hpe shanan shatai let, ginwang daw de sa hkawm ai shaloi, lam hkan shan a tsawra marit myisai gat bun hkat ai lam n sim n sa re hpe mu kau sai majaw, du lahkum de dung nga yang gaw Gwi Wung a myiman Ma Soi yan Hkrang Hpraw hpang de yawng ai hpe n dang hkam sha nna htawt dung mat ai rai nga nu ai. Sumtsaw balen jung wa jang gaw, masha a baw nu ma hkra chye ge mat ai, baw nu ge mat ai ten hta, mungkan ma hkra kaji mat wa, makau mayang na masha ni mung hpun kawa tai mat ma sai. Du wa ga n shaga ai, shi a man ang kaw dung ai hpawmi kasha Gwi Wung hpe marit maroi myi hte yu sha- ti, Pung Gyi gaw shi a hkra maga dung ai jan a nsa manam ai nrawn nna, Gwi Wung hpang maga de baw shadap tawn let, ta e manat tawn ai pawngtin hpe manat hkrai manat gayin taw nga nu ai. Du wa yu dat yang, kaga ni gaw shi hpe hkrit ai zawn rai, yawng mayawng du krung kau nna, nsa kaba pyi n shaw ai, kadai mung kadai a ta gyenan sha gahtawk gajam taw nga, zuphpawng gawk ting bai zim mat sai. Gai Da gaw hpa rai bai gatsi mat ai wa rai kun ngu du krung nga ai du sharawt dat nna, du wa hpe mada dat ai shaloi, du wa mani sha sai sai rai, Gwi Wung hpe yu azi nga nu ai, Gwi Wung mung Gai Da e du wa hte shan sumtsaw sumri rit hkat bang wa ai lam hpe mu kau ya shadu nna, n dum ai myiman hkye wa let, du ngu rai dung mat nu ai.

Du wa bai rai jang mung Gwi Wung hte yu hkat nna mani nsam shaw ai majaw mayen she hkun mat sai awa hpe n-gup chyum rai gan shachyim la nna, Gai Da hpe shan a myisai gan dan di kau ya ai hpe ma- sin sha mi lun she ngu mat nu ai. Gai Da gaw du wa ya yang Gwi Wung hpe tsawra nna, dung n ngang, tsap n ding re ten du wa ang sai ngu, du gan sharawt dat ai pyi grai hpuk dum kau let, shi mung hti mayu ai laika baw tam lata la hkra bai matut yu mat wa nu ai Yu Sa wa Gwi Wung hpe yu hkru hkru re hpang she: "Zuphpawng hpaw saga, daihpawt gaw rung laika loi mi naw hti hka-ja ga, Hkrang Hpraw, nang mahtang hti dan u." Du wa Hkrang Hpraw hpe rung laika hta ya jang, Hkrang Hpraw gaw shi pyi mahkawn shabrang ni zawn, ta gyenan gajam na mung n chye, du wa hte rau bai dung ang rai, hkum she machyi wa nga yang, shi hpe laika hti na lit ap ya ai majaw, myit mu let, shingkyit kaw shachya tawn ai myijat yep na myijat sha shaw shachya la hkra, hti bang wa nu ai: 2013 ning shata 2 praw 3 ya shani, Mangshi Sam amyu ni gaw asuya ni lang ra ai nga nna, manu paw paw pe pe, mu mi mun masum mali hte sha dip mari la ai lamu ga hpe, nta galaw lauban ni hpe mu mi sen shi hkun hte dut ya ai hpe n ju ai ni gaw, seng ang ai asuya rung de mahtai sa hpyi lai wa masai. Mu ndai hpe ya asuya kaw nna lajang na hkyem nga ma ai. 2013 ning shata 3 nhtoi 16 ya shani, Lenghaw Hawsi Miwa ni gaw, nta galaw lauban langai mi shanhte gahtawng ni a hkauna pa hku nta galaw kau na re majaw, htinggaw mi hpe gumhpraw mun masum ya nna, hkauna grau hkrak ai bai galai ya na nga rai, hkauna pyi ma galau gale jahten kau ya nhtawm, yinam bai du wa tim hkauna n madun ai majaw, asuya ni hpe mahtai wa san lai wa masai. Mu ndai gaw Lenghaw ginwang seng ang rung dap ni hpe lawan lajang na hku hparan dat sai. 2013 ning shata 3 nhtoi 24 ya shani, Sen kang pa na hkai sun dap masha ni gaw, shanhte hkai shalat tawn ai noikrat hpun gawt kabai kau nna, noi- krat hpun mi gumhpraw hkying hkying jaw na nga ai ya du hkra n jaw ai majaw, asuya ni hpe mahtai wa hpyi ai. nga ai rung bungli hte mung n seng ai asuya rung kawn shayu ai shiga laika dai ni hti ngut ai hpang, Yu Sa wa bai shaga gahte bang wa nu ai. Shi a man ang de dung ai ma- sha gaw num gaman, Gup Hkang a lawu kaw gaw Pung Gyi dung, Pung Gyi a lawu kaw Pung Hpraw dung, Pung Hpraw a lawu e Gup Chyip dung, Gup Chyip a lawu kaw Gwi Wung dung, Gwi Wung a lawu kaw Hte Le dung.

Hte Le a lawu kaw dung ai Gun Ja wa, Gun Ja wa a hkra maga de dung ai gaw Wa Sau rai nga ai. Dai kaw nna she Myi Wak kaw du, Myi Wak a lahta e Hkrang Hpraw, Hkrang Hpraw a lahta e Ma Soi, Ma Soi a lanta e Gai Da, Gai Da a lahta e gaw du wa dung ai shara rai nga ai. Ndai zawn dung lahkum kaw mying ka shakap ai hta grau tsun n ra, zuphpawng shagu madu lahkum kaw hkrawn sa dung dung re shi ning lam rai mat wa sai. "Masha nkau mi, ngai hpe myit n pyaw la jang gaw, man pa nan tsun dan, gwi hkyi gabye hkrup ai myiman man tawn nna n mai dung nga ai. Bai nha masha nkau gaw manang ni nhpa na ra, mani ra yang, nhpa sha hkan tsun rai, manang hkrai shakre ai, rung ma- sha ngu ai ni gaw, sari sadang hte htep rai yang she, manang wa hkungga ai." Nga nna tsun ai shaloi, Gai Da yan Pung Gyi a myisha yu hkrum rai, shan law sha, ya tsun ai ga gaw an hpe nan ngu jaw ai rai sai ngu myit tau la let, Pung Gyi gaw ta lahpan hte ladi magum tawn nna dung mat, Gai Da bai rai jang, shi pyi ya hte tup Bekyin ga sa nna, mani hpa grai na gun wa ai, manang ni hpe langai hte langai tsun dan nna naw mani kre shangun na mylt nga yang, du wa e hka la- gyi hkap ru bun dat sai majaw, kaning rai yang she du wa yu ra na lam bai sumru bang wa nu ai. Gup Hkang a n-gup gaw hkyi tawng makrang tawn ai zawn nan hkang ai re, dai hpe Pung Gyi yan kau na ngu yang mung, 2005 ning e rung htawt ai shani kaw nna, n myit madawm ai, shan rau dung mat ang nna, gup hkang dai hkrai koi ai majaw, du maga mi de hkrai yawng ai lam gaw, sharai la n lu she rai mat nu ai. Pung Gyi a myisai du wa hpang de n mai mada ra ai myit hpe, shi nan gang gayin kau ya na myit sai hte maren, du wa gaw Pung Gyi hpe zuphpawng hpawng yang lamu de n mada hkra shakrip na hkinjang sha gadaw nga nu ai.

Du wa myit yu magang zawn n nawn wa magang, shi sa wa ai shani kaw nna, shi hte ga n shaga yu ai gaw Pung Gyi sha rai sai, shi ngai hte hpa gatsu rawng ai mi nrai yang me, ngai hpe nshaga kam jang yau sai, hpa majaw zuphpawng shagu myiman kaga de shadap tawn nna dung nga nga re hpe, shi nan nan nju mat nu ai. Dai majaw, Pung Gyi hpe shakrip na ginjang tam tik tik rai nga nu ai. Kaning re hpaila wa tam sana kun ngu mau let, shi a chyare wa hpe, zuphpawng gawk na saboi lahkum gara hku tawn kau yang she, ngai dung dat yang shawa masha ni hte n di n hka re kumla pru na kun ngu san masu jang, chyare wa Pyek La gaw du wa a kan gata kaw kaju jai gade rawng ai pyi chye ya ai wa rai nna: "Du kaba, shaloi gaw lahkum ni hpe mi na zawn din din re hku n tawn ai sha, pa pa di tawn kau jang, nang du lahkum kaw nna lawu de na ni hpe yu dat yang galang ta mu mada na ra ai." Ngu tsun shapraw ai hpe, shi pyi grai na ra mat nna, Myi Wak hte shan lahkawng hpe lahkum saboi ni sa htawt sit shadun kau shangun nu ai. Mangai shang wa magang, Gai Da sumtsan lam hkawm na hkinjang gaman man rai nga sai. Lana de mi hta, Gai Da gaw saw shaga laika langai lang nna du wa kaw shang wa nu ai. "Du kaba e, Tibyet ga de zuphpawng shaga nga ma ai, ndai saw shaga laika naw yu dat u." Gai Da lai- ka shun re hte, du wa saw shaga laika dai hpe la manat tawn nna, myi kaw mun pyi hka n-goi goi wa ai zawn rai hkra dingdung tawn nhtawm: "Ngai ndai rung de nnan htawt sa wa ai shani nang n nga nga la ai, ya ngai sa ai laning chyen mi pyi rai n du yang, nang shinggan de hkrai sa, ngai madat yu yang, shaning tup tup ndai rung kaw shinggan hkrai hkawm ai gaw nang sha re da, nau wa gahkrang hkawm yang mung, lam jahpu pyi n dang hpai na hku re, ndai lang gaw hkum sa sa." Nga nna, saw shaga laika hpe saboi e hkra di tawn kau dat nu ai. "Du kaba, re, ngai ayan hkawm ai lam gaw teng ai, raitim, ngai a bungli hte seng nna hkawm ai lam shabrai gaw, ngai rung na ni hpe myit n shapu yu ai, bai na ndai lang na mung masha ni lam shabrai shaw ya na hku she re, nang saw shaga laika dai atsawm she naw yu dat u." Gai Da masin shin ngu nna, saw shaga laika de ta layung madi tawn hkra tsun dat nu ai.

Du wa saw shaga laika dai atsawm shapyan yu dat yang she, Tibyet ga du na lam shabrai hte lu na sha na, yup na gumhpraw ma hkra shan hte hpai na hku rai nna, sharawt marawng tawn ai myimun bai shayu la rai: "Rung bungli sha n hprai jang gaw sa su gaw e, Tibyet ga tsan la ai, gahtet gatsi anhte hte n bung ai, grai sadi let sa su yaw rang." Nga nna tsun shapyaw kau dat nu ai. Gup Pyet gaw Sakhkung mungdaw hta ga shagawp ka bakka rai nga ai, dai majaw Gai Da gaw shi a ga shagawp ka gaja ai lam hte seng nna, dung jahta zuphpawng langai hpaw na sawn tawn chyalu, shi hkawm na shana nan ang ai majaw, Pung Gyi hpe ap kau da nu ai. Gai Da hkawm mat wa ai shana, Pung Gyi dung jahta zuphpawng woi hpaw nu ai, shanhte zuphpawng hpawng yang datbung dem manu na matu, saboi hpe shawoi na zawn di bai hpai tawn nna, zuphpawng dai gaw shana hpaw ai bai rai nga yang she, zuphpawng hta laika ka lam tsun alun ya na hpe n ra ai Gup Pyet gaw, wuisin hta: Shi jan ning a shawng e ngai hpa mung rai n chye ai shaloi gaw ngai ka ai laika hti alun na mung n tsun, ya ngai laika chye ka mat sayang me hti alun na nga ai gaw, lachyum n pru ai ngu ai shiga shabra dat ai bai mu ma nna, zuphpawng sa lawm ai masha ni yawng, hkyi n chyan mata hkrup ai zawn nga mat rai, shana tup Gup Pyet a masha tai sari sadang nyem ai sha jawm tsun garu nna, shana zuphpawng bra nsin nau sin mat ai majaw, saboi lahkum ni rai n lu hta sit tawn nga ai kaw, hpang jahpawt jang rung masha yawng pati a shawa lam yan hkawm sharin hpawng bai hpaw na re nga, saboi htawt tawt na ten nan nan n lu mat sai majaw, Pung Gyi pyi kraw hta nau n rai dum let sa dung bang wa ai hte, du wa ta la- yung she madi tawn hkra: "Masha nkau mi du ni hpe nhtung n dat ai, tara n shang ai mu galaw ai, kaning rai nme lahkum ndai ni bai sit shabya kau ai re hka? Gumlu gum- lang re rawn lai hkum lang mu, manang nga n mu ai, rung na htung tara n chye ai, ndai zawn re masha hpe ngai n ra ai, ngai gaw ga shaga madat ai rung masha hpe she tsaw ai ai, ngai hte ninghtan shai ai masha hpe gaw, ngai n ju ai.

Alaga kaw myiprwi pru na yaw!" Shaloi Pung Gyi grai na pawt let, tawngban nna mana na lam naw tsun dan hkyem nga yang she, mung masa sharin shapan lam hkan hka-ja ya ai rung du ni bai du nna, du wa yan Pung Gyi a pawt shamai tsi gan tai mat sai. Dai jahpawt Pung Gyi wan yam she gapaw na zawn ngu sharang let, Pung Hpraw hpe sha saw la rai, saboi lahkum ni htawt tawn kau nna, hpa majaw saboi sha hta sit yang me, mara kaba shut ai zawn, tara lam du hkra tsun bun ai rai wa sai kun ngu mau n ma si nga nu ai. Raitim shi krai sha sharang lu ai she tsi re da ngu, madu hpe masin shakawp ya let, hpang de gaw sadi let galaw sana re ngu tawn kau nu ai. Gai Da bai du wa ai ten hta, Pung Gyi hkrap bat she mawng hkra, nang rai nga ai, ngai he la-hka jat jaw ai gaw n rai re chyare du galaw shangun nna, ya gaw du wa e saboi sha sit shamawt tim mara jaw ai ga she tsun mat sai, hpang de na bungli kaning di galaw sha shakre na rai sai pyi n chye sai. Nga nna ashi hkap tsun magang nu ai. Gai Da mung grai na mau let, sa-wa Yu Sa dai gaw rang, saboi lahkum sha gan sit dung yang me, kaji dwi a lupba sa krawk ya ai zawn mi anga ai gaw, ngai naw sa san yu na nga, lahkum kawn ngoi rai rawt pru mat wa nu ai. Shaloi Pung Gyi Gai Da hpe hkan gang shingdang tawn nna: "Yau sai, shi hte htek hkat na hpunggam mi nga na ra ai, ngai mung shi hpe tsun jaw na hkinjang naw tam na, nang sa tsun yang ngai hpe ashi tsun ai she bai nnga na kun." Pung Gyi shing nga jang, Gai Da mung masin pyi htu wa ai sharang let: "Anhte Jinghpaw ni hpe n ju ai ga kun, shing n rai kaga masha ni zawn shi a myi hpyi gata e du krung tawn nna sha nnga nga ai hpe nju ai rai kun, nang hpe pawt mayu ai gaw nre, ngai shi myit grai n pyaw ai gata, lam shabrai npru ra hkra hkawm mat wa ai majaw, shi hpe dip wa ai zawn nawn nhten, hpa mi nga tim, shi gaw rung du, anhte mung hpung du ni hkrai rai nga ga ai le, ra ai hkan tsun yang gaw rai na, n tsun ging ai hkan tsun hkra wa jang gaw, shi hte ashem ngu dang rang hkat na re." Ngu nna masin shaja ya jang she, Pung Gyi pawt ai myiman san wa sai.

Du galai ai shani kaw nna, rung ting gatsi zim, shawoi gaw Gai Da yan Ma Soi bungli galaw ba wa jang, Gai Da a mu htam gawk, shing n rai Ma Soi sumla soi gawk hkan jawm tsap nga nna, Gai Da gaw mani hpa jahta, Ma Soi gaw shana mahkawn hkawn sa ai hkan kaning ning re mahkawn ni hte hkrum jahta ai lam ni tsun chyai rai nna, mani hte hkaw, mani garu ai nsen na jang, du wa mung hka hta marang jat nga ai mani hpa ni bai sa tsun jahta jat rai nna, rung ting du hte rung masha ni yawng hka hte nga zawn rai ganawn ma ai. Ya du galai ai kaw nna she, si ai jan a dangkang zawn, gatsi gatsang nga mat masai. Raitim, Gai Da gaw ginjaw Bekyin hkan mungdan asuya ningbaw kaba ni hte zuphpawng pyi rau shang shang re jan rai nna, du wa lahtin tsaw zauhka ngoi ai nga tim, dingyang hkai, kara hpe mung lamu de masit sharawt tawn, labu palawng mung madang shachyut ai hku gahti galai di bu hpun tawn rai, zuphpawng gawk de sa wa let, Pung Gyi hpang de gawai shang wa nhtawm, zuphpawng gade lang woi hpaw tim, rung bungli gara hku shakut ga nga ai ga lahkun mi gaw n tsun, rung bungli hte nseng ai rung laika sha hkrai woi hti, ngai gaw she jin wa re ni ai law, la ga galang dat, gumra lagaw galang hkat re bungli mung n chye woi galaw, ngu sa angun nga nu ai. "Dai she ngu sai, laika ka ai ni hpe laika kaning di ka shakut na mi gaw n tsun, rung masha ni hpe myisai n htuk dum jang anyam na sha chye, ya daihpawt na zuphpawng hta kadai hpe bai jahpoi asang na kun n chye sai lu" Pung Gyi dat nu na mahkawn sat kau rai, sa lu sa lu nga let rawt wa nu ai. Shan hkrai naw jahta nga yang, Hkrang Hpraw mung bai shang wa ra ai, Hkrang Hpraw gaw hkum gaw sha n ma rai kaba nna, masin gaw gate sha law ai mi rai nu, du galai ai shani kaw nna, hpung ningbaw n kam galaw sai, hkring sa mat mai taw, atsawm sha hkring sa mat sana nga ai ga lahkun mi sha tsun ai shaloi pyi gaw, shinggan de gade lang gayin yu yang she lu tsun shakre nu ai.

Zuphpawng gawk de sa wa ai masha ni lai tawm ma wa jang she, shanhte masum hkan nang mat wa ai shaloi, Gai Da Pung Gyi a saboi na Miwa hpung ni shapraw ai hkumhpa laika buk mi hta lang let pru wa nu ai. Zuphpawng hpaw saga gaw nga, lachyum hpa re mung rai n tsun ai ten, Gai Da laika galam yu dat ai shaloi, gahtan hpyi shanu dat let: "Ndai laika man lahkawng na datbung kadai lajang bang ai re ta? Hpa majaw datbung na masha ni hpe atsawm n shachyan bang ai rai? Ndai zawn di shabra dat yang, datawung madu ni mu jang pawt mayu na rai nga ai Hka, gara ga de nna sa ai, nhpa galaw ai masha re mung n tsun shadan ai wa mi." Nga tsun let, Miwa laika hpung na laika gram lajang mu madu wa hpang de mada dat nna, ningtau mu madu hpang de bai yu dat ai shaloi, shan lahkawng du wa hpang de galang praw rai mada dat nna bai du krung mat masai. Du wa rung laika sha alata nga jang, Gai Da ga hpaw lam hta bai gale la nna yu dat u yang, jahtum daw hta: Ndai zawn re, ga sau namhpun rawng ai, sin mak ai lamu ga hta, laika ka masha ni grai shakut ra sai. Nga ai bai mu hti dat nu ai. "Hka, sin mak ai lamu ga ngu ai gaw ndai zawn re shara hta n mai lang ai, Miwa mung hta ya yang kadai mung dip rip n hkrum sha sai, kaning rai sin mak ai ngu mai na rai, nanhte Miwa ni grau chye ai, kaning re ga kaning re shara hta lang na gaw, shi a masa nga ai re." Bai ngu dat nu ai. Mi yat sha datbung bang ai shachyan dan ai lam n nga ai nga nna tsun ai hpe kaning ngu nna shi a myiman shatsawm la na rai wa sai kun ngu mylt ru si nga yang, ya ga hpaw kaw mung mang hkang bai hti shapraw dat nna, du wa Gai Da hpe grai chyeju lagu dum kau dat nu ai. Dai jahpawt na zuphpawng ngut ai shaloi, Gai Da nsa kaba shaw let, laika dai hta lang nna rawt mat wa nu ai.

Gai Da mu htam gawk chyinghka hpawng di dat ai hte, Yu Sa wa hkan dep ra ai. "Du kaba, shang wa rit, dai kaw dung dat u." Gai Da a kraw hta, ya chyau gatshang tsip achyaw hkra ang sai ngu, shi nhpa san yang htan na ga hkaw pyi baw nu hta masawm gahkyin bang wa nu ai "Gai Da, miyat nang tsun ai laika hta sin mak ai ga sau rawng ai lamu ga ngu ai ga gaw, njaw nan njaw nga ai re, dai hku nga jang gaw asuya hpe nju ai zawn nga ai she rai sai." Datbung hte seng ai lam gaw du wa shi nan maw shut ai rai nga nu ai. Kaga ten hta nsen gasa la, ya manghkang bai shapraw tawn rai jang chyahtam, gahte let sha shaga mat rai, Gai Da du wa hpa tsun ai n na kau dat na tsang rai, na hku hpe shi hpang de shayawn hkra madat nga nu ai. "Du wa e, laika ka yang gaw, masha hpe myit sharawt ya ai ga she mai tsun ai, dai mu madu Nam La laika gram na ladat garai n chye sam nga ai, bai nna datbung dai ni hpe gaw, gara buga kawn sa ai, nhpa rung na nhpa du re ni du hkra asan sha tsun shachyan dan ra ai." Ngu dat nu ai. "Nang ngu yang ya laika ndai ni naw mai shabra na re ni?" Du wa nten hkraw hkraw rai san dat ai hpe, Gai Da mung hka hta marang jat hku: "Hkum sa mai shabra nu ga le, ya gaw maisau kaga hta atsawm sha galaw dip la nna shakap kau yang mai nhten, lama asan sha di nna shabra mayu jang gaw, nhtang dip la nna shabra yang grau mai na re. Nang galaw shut ai lam gaw nie ai, raitim nang ya she nnan sa ai re majaw, masha ni nang hpe she atsam nrawng ai tam shadu kau na." Ngu dat jang she, du wa du shawn rai hkra: "Rai nga ai law, masha ndai ni gaw galoi mung galaw ai mu hpe atsawm ndi ai galaw kau nga ma ai.

Shaloi gaw galaw nhtang dip la na hku she di saga rang, hka, dai sin mak ai lamu ga ngu ai gaw, grai niaw ai ga si she rai nga ai." Nga nna pru mat wa ai hpang, Miwa laika galaw ai mu jum masha ni Gai Da hpe gyenan gayat dat rau masai. "Sara ma e, anhte gaw du wa dai hku bang ya nga nna bang ai she re, anhte galaw shut ai nre law. Bai nna sin mak lamu ga hta ngu ai mung, hpa gaw nra na re le." Nga nna bai ndang si wa sai. "Nam La e, sin mak ai ngu ai gaw, myit n pyaw ai, dip da hkrum ai zawn re ni ka lang ai ga si she re, nang gaw hpa dip hkrum ai mung nai, bai nna nang mu madu wa nan shing nga jang gaw, laika ka masha ni hpe njaw ai de numshe woi shang wa na hku she rai nga ndai." Gai Da gaw galoi mung n jaw ai lam hpe n lu hkyem sa, langai rai yang langai, lahkawng rai yang lahkawng re masha rai nna, kadai wa n jaw ai galaw tawn yang yu n lu rai hkan tsun tsun re rai nga nu ai. Ga si dai hte datbung lam a majaw, rung ting tsun garu nga masai. Du wa gaw laika nhtang dip na hku sawn kau sai majaw, hpang jahpawt jang zuphpawng bai woi hpaw nna, Nam La hpe shade de n hkrak ai ga ka bang ai nga, Nam La gaw ga mi gaw kaning ngu nha mung mai tsun ai, ngai tsun shadan mayu ai lam gaw, anhte Sakhkung ga gaw ga sau nam hpun rawng ai, ngwi pyaw ai lam hpe she re, n gaja ai lam de na hku n re nga nna, hkyi tawng pyi gumdun mi shaw na daram ningdang taw nga sai.

Du wa gaw Gai Da hpe sha mada yu taw nga, lachyum gaw: Nang kaw nna she chye na hkra tsun dan u ngu ai hku rai nga nu ai. Shaloi she Gai Da masin brawng ngu wa ai ja: "Nam La, nang na zawn nga nna ga ndai lang ai gaw, ya ten hta nang hpe dip gamyet ai masha nga ai hku yi?" Ngu san dat jang she, Nam La ja maji nga nna: "Nanhte nre ai hku myit la ai she re, ngai tsun mayu ai gaw dai hku nre!" Bai nga sai. Shaloi she ningtau du Wu Hka mung: "Nam La, nang gaw, aga dai shut nan shut sayang, nhpa wa naw makan nga nu ta, anhte gade mana tim, ga si dai lang niaw ai sha gaw chye na nga ga ai le, shut jang gaw gram sharai kau jang asan sha rai sai!" Ngu ahkrim dat jang, Nam La n kam madat si wa sam ai, gyenan gayat masu let, shinggan de pru mat wa nu ai. Jahtum e du wa tsun ai: "Ya ga si dai lang shut sai re gaw, laika ndai bai nhtang dip la ra sai ga re." Nga nna zuphpawng shangut kau hkyem wa jang she, Gai Da bai tsun ai: "Sin mak ai lamu ga ngu ai hpe gaw, ga sau nam hpum rawng ai, tsit lali tsawm ai Sakhkung ga ngu nha galai kau jang rai sai. Bai nna dai datbung shachyan ga ni hpe mung, ga shadawn: Bekyin nhpa rung na nhpa du, nhpa mying, ndai ga de nhpa bungli hte seng nna sa ai ni ma hkra ka bang nha sharai la jang rai sai." Ngu kau dat jang, zuphpawng mung ngut mat sai. Zuphpawng gawk kawn pru wa nna, Gai Da gaw Pung Gyi a mu htam gawk e Jinghpaw ga hku ya sha byin ai mu naw jawm tsun nga ma yang, Gup Hkang bai hkan shang wa ra ai. "Mana law, anhte rung ni ya gaw masha ni mani kau na zawn zawn she rai mat sai." Nga let, Pung Gyi a laika sumpu hkan sha hpa tam ai ajam rai let: "Du wa gaw anhte hpe pungding sai ra rai nhkoi ai ma kaji shadu sam nga ai, ngai yu yang, shi chyau me gaw lachyum npru nna, anhte rung ni gaw hpaji masha re, masin kya ai ni hkrai re ngu, ntsa de na ni ndai de dat shalam dat ai she rai sam nga ai re." "Dai yang aja ja marawn sha u yaw, nbung n hkawn ai shakum n nga ai dã re lu."

Gai Da nsen loi shanyem let shadum dat nu ai. "Kadai na yang na, ngai n gawn ai, shi sa ai shani kaw nna, shi a lahprang kaw matep ai zawn she nga mat sai." Gup Hkang a nsen sam la nga yang she, myit bai n pyaw rai jang grau nna tsaw wa nu ai. Shi gaw ga tsun ai hte ta e galaw ai mu dingyang aman rai, nga chyu hpalap shadung matep mi shaw la nna, ta lahkawng hte gang tawn hkra gawa baw la let, gawm kaw ahpu bang dat nu ai. "Sa-wa e, matep mi ting ting naw yang gaw jum hka ai re law, ngai pyi matep mi hpe masum lang sha ai re." Pung Gyi Gup Hkang hpe sha hkan je dat nu ai. Gup Hkang gaw: "Maji si u law. Masha ni matep mi galang lang sha na hku masing jahkrat nna matep da nga yang me, hpa di garan sha na rai, ntsin law law bang nna gayau sha jang jum nhka sai, ngai gaw ma hkra nan sha mayu ai." Nga tsut da nna pru mat wa sai. Gara ten hta raitim, du nnan rawt ai ni gaw, rung masha ni shi a shaga madat nna rung bungli atsawm sha galaw shakut na matu, madu a tsam marai madun na matu, shawa ra bungli woi galaw, nnan ai yaw shada lam ni tsun shapraw, sadi ra ai lam ni shawng matsun madun tawn re lam hpe, du nnan ni a wan shanan numhtan masum ngu shamying hkra masat tawn ai rai yang, Yu Sa hpaji rung kaw du ai shani kaw nna, rung ting u n goi gahtawng zawn, utu a mung lu n na rai nga nga manu ai Gai Da sha n shaga hkawm yang, kadai mung madu a mu htam gawk hta mu ra ai ni mu galaw, mu rau ai ni gaw dat nu hpaw tawn nna, dat nu hkan masha ni hte jahta chyai, madu ra ai laika ni hpaw hti yu, dat nu hkan na gatraw gatrai ni hpaw mada yu, rai nna ten shama ai masha nkau nga, Gai Da yan Pung Gyi gaw rung ting hta mu kyin dik ai yan rai nna, shani shana nsin nhtoi rung de sa ai sha amu nga, rung de hkrai sa ai majaw, Pung Gyi a madu wa gaw, madu jan hpe rung de sa ai nga jahpai nna, shinggan la tam sha hkawm ai re, nga nna bai ntsen.

Gai Da yan Pung Gyi gaw rung bungli galaw kau nna, madu a laika ka ra ai lam mi, laika ka hpung ni a ningbaw ningla bai tai ai majaw, laika ka sara ni hte matut mahkai lam, laika ka ga saw lam, mungdaw kaba de na ni a shiga htawn shana, laika ka sara ni hpe ten shaw nna woi dung jahta re bungli ma hkra shan hkrai galaw rai, nsa nshawn kyin nga ma ai. Mu dai ni galaw yang, yi-ngam gaw nmu mada, ten gaw shama re hpe, n chye ai ni gaw hpa galaw ai re n chye nna, myi n gyeng hku yu let, ntsen wa ai rai nga ai. Nshung ta na lahpawt mi hta, Yu Sa zuphpawng bai woi hpaw u ai. Gai Da gaw du ndai nde sa ai ten mung na wa sai, ya gaw mankoi rung hte seng ai zuphpawng woi hpaw hkyem sai nhten ngu, myit hta la la ngu let, shanhte rung ni shapraw ai Miwa laika langai hpaw hti let, zuphpawng gawk de shang wa nu ai. Chyinghka kadun kaw lai re shaloi, shi hti du ai laika yan hta: Sakhkung ga na laika ka ai masha ni gaw, laika mung n chye ka, sumrai laika ka ai ni chyahtam, sumtsaw sumra sha jahta, nmachyi ai kaw madai, madu hkum hpe ka jahpraw la, ja gumhpraw lam sha jahta re hkrai rai nga ai. Ndai ni hpe gaw agying naw shakrip kau ra ai.. nga ai kaw hti du nna, lahkum e dung bang wa let: "Eh, gamung ndai ka ai wa gaw masha ni ka ai sumrai laika atsawm gaw hti yu nna tsun ai wa rai kun?" gu tsun let, laika buk tawn kau dat nu ai. Dai shaloi du wa myi tum pyi le le rai hkra shi hpang de mada dat nna, zuphpawng woi hpawng bang wa nu ai. Dai jahpawt tsun ai lachyum gaw, ya ten hta rung dap shagu na ni galaw ai, shawa masha ni a sharin shaga lam madat mara la nna, shawa masha ni yu ra ai asuya masha tai na lam ni hpe, lahkam hte lahkam hkan galaw hkaja na re, grau nna pati shang masha ni n hkan galaw shatup n mai re nga nna, ntsa de na ni tsun ai hku, madu rung na du gyi salang tai ai ni kawn shawng, madu a myiman de jamna yu la nna, gara kaw maza kap yang gara kaw re ngu tsun shapraw na hku re, du gyi salang ni yawng madu galaw ndu ai, mawp lu mawp sha ai, galaw ra ai mu atsawm n galaw ai re ni atsai awai ka shapraw na hku, n ka shapraw ai ni, ntsa de na ni jep shapraw dat jang grau manghkang ai nga ai lam hpe gaw, myit mi alawm sha tsun dat nu ai.

Dai zawn re zuphpawng gaw rung masha ni n kam madat dik ai hta n ga, shanhte hte mung nseng, seng ai ni rai jang mung madu nan ra ai mu galaw nna ka ai nre ai sha, dat nu hkan na rep shakap la nna, madu zawn nawn ai ga loi li gayat bang rai, ntsa de na ni a ga shangap ai bungli galaw ai hkrai. Du ni mung madu gade ra tim, ra ai lam hpe kam tsun shapraw ai n rai, gaya ai kaw mahkyit n du ai zawn nga ai lam sha tsun lapau bang masu nna tanglawt shalai ai bungli hkrai galaw nga ma ai. Zuphpawng ngut n dawt, Yu Sa gaw Gai Da kaw bai hkan lahkyum nang nna, lahkum kaw htit re hte: "Gai Da rang, nang yu ai laika dai gaw kaning nga ai lachyum re? Ngai ma garai n hti yu ai majaw hpa tsun ai re n chye ai" "Gamung ngu ai laika ka yang gaw, laika ka ai ni a gaja ai lam ni shawng tsun shakawn ya ai hpang she, shatang ndu ai lam ni tsun, dai hpang she kaning di ka yang grau mai na lam tsun shadan ai baw rai yang me, shi a na gaw masha yawng hpe mak kahtak, mana a lapu sat hku adup sat kau yang, laika ka masha ni myit lagawn mat chye ai. Bai nna ningtau du wa shi shade chye ka ai rai yang gaw, mungkan ting gari ai laika ka kabai tawn nna, Sakhkung ga na laika ka masha ni hpe ndai zawn di ka mu ngu matsun madun lu yang gaw mai nga ai." Gai Da shing nga jang, Yu Sa wa grai myit yak let, shakap she kashai tawn hkra, gapa ladu bai manai la rai: "Nang ngu yang laika ndai ni gaw mai shabra na re ni?" "Dai laika buk hta laika ngau rawng ai ni hpe gaw ya mu, laika ngau rawng ai mung, htaw Hkunmyin de na sara kaba lahkawng a laika hpe mung, yawng a shingdu de sa bang tawn, laika dai ni gaw anhte htet nna ka ya ai she rai yang me, jahtum de bang kau re. Sara dai yan hpe gaw laika ka jahpu sha jaw nna, laika hkum shagun mu. Masha ni hpe nhkungga ai tai ai."

Gai Da shing ngu jang, du wa hka yawng ai kaw hkan hkye la hkrum ai masha zawn, gahpa lahkawng maga gashing kashawng di manai jahtuk la hkra: "Shaloi gaw zim sha naw tawn kau saga, Gai Da e, rung hkan masa n htuk ai lam mu jang ngai hpe tsun dan dan rai yaw, nang naw n garum la yang nmai sai." Ngu tsun let rawt mat wa nu ai. Dai shani, Gai Da gaw shanhte rung ni a shiga ginra hta: Sakhkung ga na laika ka ai ni, Wu Hka tsun ai hku hpa ntai ai ni hkrai rai yang gaw, mungdan ginjaw kaw nna jaw ai kumhpa lu yu ai ka sara ni mung hpa n tai ai ni hkrai re hku yi? Myi nhpaw ai ga shaga ai zawn nga ai lam nmai tsun ajawp ai ngu ka bang dat jang, masha yawng mayawng Gai Da kaw hkan tsun nang ai hkrai rai jang she, Wu Hka n dang hkam sha si wa nna, Gai Da hpe masha ga saw la nna, shi hpe mara jaw, jawm jeyang ai nga bai ka bang dất nu ai. Gai Da gaw shi tsun mayu ai lam tsun ngut jang ga laban ntsun apup jat ai jan rai nna, kaning nga yang nga, shanhte hte n garu hkat mat nu ai. Myit la de nna chyau ningtau du wa shi hpang de pawt sa wa rai jang na matu, shi ka ai laika ma hkra yu nna, ningra ai, htawt ka bang n jaw ai, gara hkan na ni kaning re shara hta tsun yu ai ga si ga ngau re lam hpe, pawngtin hkye hte mahkret tawn nna la taw nga nu ai Shi a myit hta, la du dum yang gaw lawan sa wa, gamung ngu ai ka yang kaning di ka na ladat hpaji ai sha hkap matsun madun na ngu la taw nga yang, tsim hte tsam, uhku a masa si la hku she la kau nu ai. Gai Da gaw marung gung gung rai pru mat wa ai Yu Sa hpe hkan yu dat let: Eh, hkai sun dap kaw lama ding- yang nga yang gaw, shi a matu gade mai na, kunghpan hpaji laika myi tsi na pyi n ka yu, shatu shakra saw kinle ga lahkun mi n lu tsun, laika ka laye gaw u la wa u kanu ni hpe shalen nna ga kaw ahpre mahkret tawn ai zawn di ka nna, shi a laika gayat ya ai ma ni laika lang nna Gai Da hpang de sa san, Gai Da chyawm gaw laika gram ten na sai majaw, kaning di mahkret tawn ai laye mung lu yu shapraw ai rai nna, manang ni hpe lit grai shatsang ya lu nga nu ai. Hkrak nga yang, Wu Hka ka ai gamung gaw, masha ni ka tawn ai gamung hkan na le kap waw kap di, di shakap gahkyin tawn ai rai nga nu ai.

Dai re majaw, shi gade pawt mayu tim, Gai Da a mu htam gawk de sa na atsam n rawng ai majaw, gamung hte seng ai mu dai gaw, ningtau du Wu Hka Gai Da hpe du pyi sa manat ya na daram pawt dangam, shi hpe tsun garum ai kadai nnga, n bung shiga prat rai mat nna, shinggan de mung mawng mat wa sai. Dai sha nrai, Nam La a myit hta Wu Hka hpe hpa zawn nnawn nga yang she, mu dai bai pru rai, laika dai lagu gun nna, aga grau chye tsun ai laika ka sara ni hpe tam sa ya rai nna, Wu Hka a mying gaw hten mat wa nu ai. Lachyum npru ai laban manga na zuphpawng hpaw ten bai du sai. Rung masha ni yawng shawoi na hku, du krung tawn gajang let, kadai mung kadai a kraw gata hta, daihpawt nhpa rung laika wa bai hti dan na kun ngu jawm tak taw nga masai. Masha ndu hkum nna, du wa Gwi Wung hpe yu chyai na ten gaja langai rai nga ai ten hta, du wa hpe yu dat yang, shi myiman hta myit ngwi myit pyaw dik ai nsam gaw, dip da n lu dan dawng pru wa nga nu ai. "Ma Soi, nang gaw sumla soi ai wa re, anhte rung du ni hpe langai ngai soi ya marit le." Wu Hka shing nga rawt tsun gapaw dat ai ga hpe n kam madat dik ai Ma Soi a myiman hta, gwi hkyi gabye hkrup myiman man wa sai. Shi hpa n tsun tim, nten ni hpe ladi ndaw de htu shanyin kau dat nna, mut dung nga nu ai. "Ma Soi a sumla kadai hpe mung manu ndaw ai nsoi ya yu ai, ngai shi hte asuya magam bungli rau shang ai, gade ganawn ai rai tim, sumla lap mi gumhpraw hkying mali manga hte mari la la re re, ta hpaji masha ni hpe manu shadan ra ai, ra jang gaw gumhpraw loi shaw nna soi shangun ra na re." Gai Da shan a lapran hta tsap nna tsun dat nu ai. "Anhte du ni hpe soi ya ai gaw, du re majaw she re, yawng hpe soi ya ngu ai nre."

Wu Hka grau na yak na zawn nga ai ga bai tsun dat nna, Ma Soi a masin ram ram achyaw hkra ya nu ai. Wu Hka nnan du ai shani kawn, Ma Soi hpe mying gra ngu shaga ai n kam madat taw nga yang, du re majaw sumla soi ya na bai gazik dat nna, Ma Soi grau pawt mayu nga nu ai. Shi Gai Da hpe tsun dan yu sai, ngai gaw shi hta sak kaba sai, shi ngai hpe sara nkam ngu jang gaw, ngai a baw sang mying sha pyi gang yang mai ai, mying gaw nan nan nga nna shaga ai, shi a du aya gaw gade kaba ai shadu nu ai kun? Nga nna pawt angun yu sai. Sumla soi ya hpyi ai Wu Hka gaw, Ma Soi agatsi sha nga jang, manang wa a myiman hten bya mat ai gaw nmu ai: "Na madu jan hte an gaw jawngma manang rai ga ai, nhpa wa mi n ngu tim, an na jawngma manang masa hku nna soi kumhpa na hku di u yaw." Nga nna bai gahtap tsun dat ai ga hpe, Ma Soi n kam ma- dat dat ai, mali dam ai nga la zawn re myiman hpe ntsa de na wan bap sha mada mat nu ai. Yu Sa mung Ma Soi a sumla grai ra mayu ai re, Wu Hka e tsun hpaw dat jang she, alu tsu sha lawm na rai re sai ngu myit la nna: "Mai nga ai le, anhte gaw n chye soi ai, nang sha nsoi kumhpa yang nai sai." Ngu hkan tsun para dat nu ai. "Ndai lapran ngai grai naw kyin ai, ya ten rau jang soi ya na re." Ma Soi grai n kam tsun ai sha, nambat langai du wa bai hkan tsun ai majaw, ana gan shaprai kau dat nu ai. "Ntin ra ai, nang rau jang soi kumhpa mani gaw e." Yu Sa shing nga tsun ai shaloi, Ma Soi a myiman hta la sha si mu, ngu ai nsam dan pra pru wa nu ai. Dai zawn re nsam hpe gaw, Gai Da sha chye yu shapraw nga nu ai. Hpa majaw nga yang, Ma Soi gaw loi maji ai masha re, shi a rai hpe manang ni hpe aloi sha jaw na nkam ai wa re hpe, du yan n chye nga ma ai.

Dai jahpawt na rung laika gaw, law hpa myit a majaw asuya a gumhpraw mawp lu mawp sha re masha ni hpe je yang ai sumla hkrung sa yu na lam tsun ai re. Kunghpan hpaji rung hta ja gumhpraw gade nnga ai ngu tim, shawng na du wa gaw gam maka mi arawng rai, byin mai ai made mi rep sha la nna hkring sa mat nu ai. Ya bai sa matut ai yan a lam hpe, rung masha ni rai n chye ya ai re majaw, shanhte rung hte hpa nseng ai hku, madu a gyenan na rai sha maja let, zuphpawng ngut na sha la nga manu ai. zuphpawng ngut ndawt, masha law malawng ni gaw Gai Da a mu htam gawk de hkan mahtawng ru nang nna, madu mahkrawn tsun chyai ai ja, ya na du yan kunghpan hpaji bungli n dang ai lam ni tsun jahta wa ai shaloi, shawa n gup gaw chyawraw lawm ai hkrai rai sai, kadai mung hkan shatan ai hkrai rai nna, sai bung ai ni hte sai n bung ai ni shada da n maja kau manu ai. Lahpawt mi, Yu Sa zuphpawng hpaw bai shaga shangun sai. Yawng gaw zuphpawng gawk e bai sa du krung dung nga ai ten, Yu Sa tsun ai: "Masha nkau mi gaw, hpa n chye galaw nna, du ni nawyin ai nga ai tam tsun re, rung langai mi na masha gaw, shada da makawp maga hkat ra ai re." Nga nna, myiman she mang mat hkra tsun dat ai shaloi, shawng na laban hta du yan hpe shatan yu ai ni shada da mada hkat la nna bai du krung mat ma masai. Zuphpawng ngut ndawt, Pung Gyi a mu htam gawk de hkrai bai hkyawm rai masai. "Kadai a u chyahkye hte jahtawng htu ai amang n gup rai kun, madu mung tsun lawm nna ashi bai sa tsun re, hkrit hpa she rai nga myit dai re." Pung Gyi grai myit npyaw ai hku tsun dat jang, Gup Hkang gaw shi hpe shadu ai zawn nawn sam ai, ja maji nga ai ga nsen hte: "Ngai gaw ntsun ai, ngai lama she tsun yang gaw, mawdaw hte adawt sat kau ai hkrum nu ga!" Nga nna ningdang bang wa sai. "Dagam dala ga nau hkum tsun mu law, dawng galang gayin jang hkrup sha na mu ai." Gai Da gaw Gup Hkang mawdaw hte adawt hkra hkat ai shaloi, shi e sha tsi rung de ba sa ai dum dat rai, bai hkan tsun dat nu ai.

"Sa-wa hkrang chyup ndai ni, shanhte shatan sha ai lam hpe gaw magap kau, amyu lapran hta wa- hkali latup bang ai she rai sai." Pung Gyi Jinghpaw ga hku shaga bang wa jang, kaga ni langai hpang langai rai kadai mung kadai a mu htam gawk de rai mat wa kajang masai. "Yu Sa hpe ashi sa htawn dan ai shi sha nai yang kadai rai na, shi she galoi mung n-gup chyau chyau lahka nga ai re. manang madat tim kram kram nga hkra bai dagam gwi i." "Nmai sai nmai sai, manang re ngu yang ndang she rai nga ai, ya hpang de gaw nshaga hkat yang she matu si sai. nhpa re nga tim, shanhte gaw sai bung ai majaw, shada da makawp maga hkat ai ni rai nga ma ai." Pung Gyi baw mahkyit let tsun ai ga hpe, Gai Da mung jaw dum nna, Gup Hkang a man hte nhpa mung n mai tsun sai, ana ahkya gaw n-gup hku sha bang la ai re, ahka gaw n-gup kaw nna tsun shapraw ai re da, nga let rawt mat wa nu ai. Laban bat mi lai re hpang, Gup Hkang mye rai sai, kadai hpe san yang mung n chye ai nga ai hkrai, shi hkawm mat ai masum ya ngu na shani she, shi a ganau wa mawdaw hte adawt si mat sai nga ai shiga hpe rung masha ni na masai. Dai majaw shi a dagam dala ga gaw, anga laban ganau kaw hkra machyi mat sai ngu jawm tsun let, shi mahtang kadai hpe lahpu mung nhpu re majaw, yawng n chye masu su nna shalai kau manu ai. Ga lai ai ndum ai, jum majap lai ai she na ai nga ai hpa, Gup Hkang gaw manang ni hpe gan dut sha kau ai majaw, shi re ai ngu kadai n shadu na matu dagam dat ai rai yang, n myit madawm ai manghkang pru nu ai. Ginhtawng htawng wa sai hte maren, rung pati salang galai ten bai du sai. Nhpa bungli galaw ra tim shada da nbawng hkat ai Yu Sa hte Wu Hka gaw, myit mi alawm rai pati salang lata na lam jawm jahta bang wa masai Yu Sa gaw Gwi Wung hpe bang la mayu nna, kaning di yang she sak naw ram ai ni hpe lata bang la lu na kun ngu san dat nu ai. Wu Hka gaw Gai Da shi a gamung hpe bai tsun alun ya ai lam nra rai, kaga lai pyi n myit yu ai sha: "Gai Da yan yan hpe hkum lata mu ngu, pati masha yawng hpe shawng tsun kau jang rai sai gaw e." Ngu dat nu ai.

Yu Sa myit yu yang nau gaw nhtuk ai re, shi a Gwi Wung hpe bang la mayu ai myit grau gaun mat sai majaw: "Shaloi gaw nang naw hkan shana tawn su, sha nrai yang, Gai Da zawn re hpaji masha hpe shaw kau na yak ai" Ngu dat nu ai. Wu Hka gaw matai htang la mayu ai myit alun ngu nga ai majaw, pati masha yawng hpe gyenan gayat nna daina de pati salang lata zuphpawng hpaw na re, rai yang, Gai Da yan Ya Sai hpe gaw hkum lata masa, shan hpe nla- ta yang she kaga ni lu shang na hku re, du wa tsun ai majaw shana ai re." Ngu shana ngut ai htawm, Gai Da kaw bai sa nna: "Gai Da, dai na e pati salang lata zuphpawng hpaw na re, du wa da nga yang, Ya Sai hpe hkum lata sana da yaw." Nga sa tsun kau da nna, tin tin bai pru mat wa nu ai. Gai Da gaw hpa majaw shawa ra lata hku she galaw ai mu hpe, du ni kaw nna amying sa jahkrat ai re ni ngu naw san yu hkyem nga yang, Wu Hka ten n jaw nu ai Gai Da gaw shi hpe mung hkum lata ngu ai lam rai naw n chye nga nu ai. Shana de, pati hpung salang lata na matu, hkring sa mat sai gumgai dingla ni hpe mung saw shaga dat manu ai. Zuphpawng ten e, shawoi grai grai kam shaga ai ni mung, hkrit hkrit lahkyum lahkyum rai, shanhte hpe sha nshaga la yang, ga lahkun mi mung nshaga ai dung taw nga masai. Zuphpawng hpaw hpang wa ai hte, Yu Sa a gahpa ladu gashi kashai nhkyeng nhkang rai shamawt la nna tsun ai: "Daina de na pati rapdaw salang lata zuphpung gaw, yawng chye sai hte maren, marai sanit na marai manga hpe sha lata na, Gwi Wung, dai salang lata amat bang maisau gam ya nu." Ngu dat sai, Gwi Wung mung gwi ga- sha zawn amat rai hkan gam ya kau nu ai. Hkring n rai yang, pati masha yawng gaw jahpawt Wu Hka matsun ai hku mahkret kau ngut nna, Yu Sa Gwi Wung hpe maisau daini bai hkan lahkawn la kau shangun nna, kadai dai ang sai bai hti shapraw dat shangun manu ai.

Gai Da yan la Sai gaw gaida mat sai hte maren, n-gun kya ai re, kaning di roi rip hkrum tim kadai n hkan tsun lu na re ngu ai hku nna, pati salang hpung kaw nna jahkrat kau dat manu ai. Shaloi she, shawng de ndai rung kaw nambat langai du galaw nna hkringsa mat sai, Hkawn Rawng nsa kaba galang shaw la hkra rai, Yu Sa hpe: "Du wa, anhte aga n mai shaga na kun yi?" Ngu san dat nu ai. "Mai shaga gaw e, nang nhpa tsun mayu yang tsun u le." Yu Sa gahpa bai manai dat nna matsun dat nu ai. "Gai Da gaw ndai rung na myit su ai, laika hpaji rawng ai, pati mu lam hta htep lahti hkan lu ai, ndai masum mali ning rung na kyet shawp ai masha hte kyet shawp ai pati masha mung shi hpe hkrai lata hkra, mungdan gata hta mying pru ai masha re, shi hpe jahkrat kau yang nmai nhten?" Hkawn Rawng grai hkrit kamyin ai hku san dat nu ai. "AWh, dai lam gaw ndai hku re, pati salang hpung kaw mung sak kaji ai ramma ni hpe lit la shangun ra ai, Gai Da gaw gade ning nrai yang hkringsa mat sana she re, ya kaw nna yan mat yang grau mai ai ngu nshalawm sai hku re." Nga jang she, Hkawn Rawng "AWh" nga ai nsen grai na hkra garawt let, Gai Da a matu grai myit n gut ai hku yu taw nga nu ai. Yu Sa gaw Hkawn Rawng Gai Da kung gat ai lam tsun du magang, shi madu gaw nmai ntai rai, asuya kaw na ni shi hpe gade htawt dat ngu yang mung, na kya, mara lama lu taw akya sha du aya jahkrat kau ya na wa, mara gaw bai n lu rai, kaning n chye di nna kunghpan hpaji rung de htawt sit dat ai rai yang, kunghpan hpaji rung e nga ai masha ni gaw, du nrai tim, hpawng shingra na mying gumhkawng ai lam shi hta gade htang jan taw nga la nna, shi pyi shani shana yup shat nshang ngu let, dai ni she tsawm mari Gai Da hpe pati hpung salang kaw nna lu shachyat shapraw kau sai majaw, gwi zawn ningmai tu taw angat di la na zawn ngu lagu kabu nga nu ai.

"Daina de na zuphpawng ngut sai, bra saga." Yu Sa zuphpawng ngut ga hpe aloi sha tsun kau ai lam hpe, du ningsa Hkawn Rawng grai mau mat nu ai. Hkringsa mat ai masha rai tim, shi mung ndai rung kawn pru wa ai du kaba re, Yu Sa myit su ai rai yang, du gaw du nnan re, du ningsa ni hpe zuphpawng ten hta gan woi jahta chyai rai na htung gaw nga chyalu re, Yu Sa ji magu shabawn kau dat nna, hkringsa mat sai pati masha marai masum hte gaw, mau mau rai, nsa kaba shaw let lakang kaw yu mat wa masai. Yinam ta kaw nna n dum ai zawn nga yang ginhtawng bai du mat sai. Rung masha ni hpe galoi na shani she Yu Sa sheng mareng rai mu woi galaw bang wa na kun ngu la nga dangam kaw, shaning nnan bai galai wa sai, Shaning htum de gaw ntsa de na ni rung shagu na ni hpe magam bungli galaw gaja n galaw gaja ai lam sa jep san shapraw ai ten rai nga ai lana de mi hta, Wu Hka wa gaw gawk shagu hkan shang wa nna, hpawt ni gaw du ni a woi awn hpaji ladat gade daram byin ai lam ni ma hkra, shawa masha ni hpe amat mahkret shangun ai ten rai nga ai, dai sha n rai, du ni gaw laning mi na laman hta galaw ai bungli mung ma hkra rung masha hte ntsa de na ni hpe tang shawn shana ra nga ai. Dai majaw, Yu Sa gaw shi galaw ai mu hpa n nga ai rai nna, shi ka da ai tang shana laika lachyum ni gaw, hpung hte hpung rai galaw ai, grau nna Gai Dai gawn hkang ai, shali laika ka hpung ni a yi-ngam hpe, gwi a wa hka shamat di ka bang la kau nna, ntsa de na du ni a man hta gaya pyi n chye ai hkap hti dan dung nga nu ai.

Shi a rawn lai dai hpe n kam yu ai rung masha ni gaw, Yu Sa yan Wu Hka shan a tang shawn shana laika hti ngut ai hte, shan lahkawng laning mi laman hta galaw ai mu gaw, teng nteng, shan galaw ai magam bungli shawa ni yu ra ai hku rai kun, mawp lu mawp sha re lam nga nnga, rung mawdaw hpe madu a mawdaw hku nna gawt lang ai lam nga n nga re kaw hkan nna she, shan lahkawng hpe, "Lit hkam lu ai, nau nhkam lu ai, nhkam lu ai" ngu ai ga lahkun masum kaw na lata mahkret ya na hku, rung masha yawng hpe maisau pa bai gam ya masai. Mahkret ngut ai hte rung na masha ni bai du krung jawng nga ai laman, ntsa de nna sa ai ni gaw mahkret tawn ai laika ni hpe galang ta hkan lahkawn la nna, za-ik kaw lup di hpai wa kau manu ai. Ntsa de nna sa ai du salang ni rung kaw du wa nna, kunghpan hpaji rung nã du yan a amat masa wa hpaw yu yang she, shan lahkawng galaw ai mu gaw yawng e "Nau nhkam ai" ngu ai hkrai mahkret tawn ya nna, mau ga- jawng dung mat masai.