SHAT JAW AI KAW SHAT SHA, NUM JAW AI KAW NUM LA, WAN MU AI KAW WAN KRA

Moi Wunpawng sha ni hta du magam, durat duroi, hte mayam ngu nna nga lai wa sai. Ndai zawn masha tsang hpan masum garan nna nga lai wa ai shaloi pru ai ga malai law law hta na “Shat jaw ai kaw shat sha, num ya ai kaw num la, wan mu ai kaw wan kra” ngu ai mung lawm ai. Ndai ga malai kadai tsun shapraw ai kun ngu sawn yu yang myit matu ding dum ai ni tsun shapraw ai rai nna myit matu n ding ai ni hpe shading tsun ai lam mai byin nga ai. Ndai ga malai a mabyin masum gaw lachyum langai mi hpe gintau tsun shangang nga ai.

1.Shat jaw ai kaw shat sha

Shinggyim masha gaw lu na sha na hpe shawng machyu nna nga pra ra ai lam hpe tsun nga ai. Raitim ‘shat jaw ai kaw shat sha’ ngu ai gaw kring mading rai nga pra n ngut ai hte daru magam n lu ai masha a prat hpe madi madun nga ai. Kade kawsi hpang gara kyet tim lu sha jaw ai shara (masha) n nga yang n lu sha ai, jaw lu jaw sha ai shara (masha) hpe manem ra ai lam rai nga ai. Dai rai nna, shat jaw ai ni gaw du magam ni hte durat duroi ni mai byin ai; shat jaw ai shaloi shat la sha ai ni gaw mayam rai na re. Shingrai masha a ngasat ngasa lam hte myit yu yang shat jaw ai kaw shat sha ngu ai ga gaw mayam myit jasat hpe madi madun nga ai. Daini Wunpawng hpan ni ndai madang kaw nga pra ai grai law wa nga ga ai.

2.Num ya ai kaw num la

Wunpawng hpan ni gaw num wawn num la ai lam hpe grai manu shadan chye ma ai. Ndai ‘num jaw ai kaw num la’ ngu ai ga gaw mayu majing n lu ai rai nna htung n nga ai dauma shang ai lai hpe tsun dan ai ga manawng rai nga ai. Kadun dawk tsun ga nga yang mayu ni a ga hpe madat mara ai dauma la wa tsun ai zawn nga tim num wawn num la htung hpe manu n shadan n shareng ai jasat jasa laida hpe tsun madi nga ai. Shingnrai galoi mung kamhpa na jinghku jing yu kaja n lu ai n tai n mai re ai, ladi n chying ai hte kraw n ngang ai masha a laida hpe pra pra mu shangun nga ai.

3.Wan mu ai kaw wan kra (jan pru yang jan kra)

Ga ndai mung tinang hta rawng ai atsam hpe n jai lang ai lagawn lamawn re ai lai a ninghkan e matsan chyaren re ai lam hpe tsun nga ai.

Ga hpungdim

Shat jaw ai kaw shat sha, num jaw ai kaw num la, wan mu ai kaw wan kra ngu ai ga malai gaw masha a nga pra lam hta hpun kri tawng re ai ga n re. Ndai myit jasat gaw gumrawng gumtsa myit jasat mung n mai byin ai. Hpa majaw nga yang, gumrawng gumtsa myit jasat gaw ndai ga malai zawn sha nga nna masha a ladi hku kaw nna nsa sa ai, lu sut lu su ngamu ngamai ai, ahkaw ahkang lu ai ni tsun ai ga hpe chyu madat mara; shanhte hta chyu manem nna nga ai myit jasat n rai nga ai. Ndai zawn re ai laikyang shingnrai myit jasat gaw grit nem dik nna myit matu n ding ai lam rai nga ai. Daini na Wunpawng sha ni law malawng a ngasat ngasa asak hkrung ai lam ni gaw lahta e tsun ai ga malai hte bung ai ni grai law nga ai kun. Wunpawng sha ni a prat maka hta tinang hta rawng ai atsam ningja hte kraw dung myit hta n manoi ai sha chyalu chyaga chyu myit nna ‘num jaw ai kaw num la,shat jaw ai kaw shat sha,wan mu ai kaw wan kra (jan pru yang jan kra) ngu ai myit masa laikyang de kap chyam bra nang nga sai kun.

Raitim ndai matsun maroi ga malai gaw anhte hpe galoi mung (moi, ya, yat) gumrawng gumtsa shatai mayu nga ai majaw ndai matsun maroi ga malai hta asak hkrung yang Gumrawng Gumtsa tai mai nga ga law.

Nmaw Hpung Kam Nawng