NU HKUM HKRAP SA!

Kahtet la ai Jan gaw, asak 45 ning rai sai Nang Hkawn a baw hpe lata nna , shing te tawn da ai zawn, ladu lai kang kahtet la nga ai. Nang Hkawn kumshu sun kaw kumshu pawm shakut nga ai. Nang Hkawn shi hkrai myit hta ga shaga let myi prwi si hte salat lwi hkrat ai gaw ginghka pi n lu ai lagaw ndung kaw she gahte hkra nga sai. Shi tsawra dik ai kasha num sha shingtai Ah Ling hpe myit dum shingran let yawn hkrap nga ai.

Ah Ling gaw kaji ten hta kanu yan kawa hpe grai chye tsawra ai, ma ngai mung grai chye tai ai, Jawng ma prat hta gin sup mung grai ram ai galoi mung 1st kumhpa lu nna nta shat gawk hta Ah Ling la wa ai shagrau kumhpa arung arai mung grai law nga sai, Kanu yan kawa mung numsha shingtai re nga yang, shan nau ni yawng marai manga hta na Ah Ling hpe grau mi man lata na awn ai. Tsawra ai zawn n dum shami galaw hkrup ma ai.

Raitim, yawn hpa langai mi gaw Ah Ling a myit jasat gaw, manang jan, wa ni a arung rai hpe shi ra ai lawm jang lagu la mayu ai myit rawng nga ai. Ah Ling masha ni na rai lagu ai law law lang rai sai , Rai tim, manang ni mara dat ya n tsun shapraw ai lai mat mat re, ndai kalang mung jawngma manang a laika n hpye na gumhpraw lagu shaw la kau ya ai majaw, gumhpraw madu gaw saranum hpe shawk tsun dan kau ai majaw, Ah Ling gaya hkrum sai.

Ah Ling gaya ai majaw hpaji jawng lam de lagaw ndung n yawng hkraw mat sai , kanu kawa jawng sa na matu gade tsun tim, Ah Ling jawng n sa hkraw mat sai. Nta kaw ra ai bungli galaw nna nga mat sai, Ah Ling a matu, sum machyi dik ai aten ladaw nan rai taw sai.

Ah Ling nta kaw nga taw ai ten n dum shami shaning lam rai wa sai, asak 18 ning hpring sai. Lani mi hta Ah Ling kanu hpe shinggan de gumhprw pru tam lam tsun ai, “ Nu e… Nu sha mung kaba wa sai Nu jaw ai gumhpraw chyu jai yang…. Nu sha… myit n pyaw ai lam… dai majaw mare kaba hkan bunglli sa tam galaw na ahkang jaw rit yaw nu…”

“Um… rai gaw rai nga ai nu kasha kaba wa sai tinang lagaw ting nan tsap ra wa sai… mai ai le…. Nu ma byin ai hku nga na, nu n-gun naw rawng ai ten gumhpraw tam shakut yu u… chyam yu u… mai ai…. mai ai…”

Ah Ling Shwi Li mare kaba de sa mat wa sai. Aten shata 5 jan mat wa sai. Kanu yan kawa hpe gaw, lu sha seng kaw, bungli galaw ai nga tsun dan shana ai, shata shabrai mung kalang marang gaw wa jaw ai, kanu yan kawa mung kasha tsun ai hpe grai kam ai hte tinang kasha kaning re shara kaw nga ai mung n sagawn ma ai. Lani mi hta hting bu ni na gun wa ai, shi ga gaw Ah Ling… hkum shan dut sha nna ka-ni hpraw lu mat sai da.. dai ga na dat ai kanu Nang Hkawn..a baw kaw lamu de na mu achye jung dat ai zawn, Nang Hkawn hpa n chye ai ma zawn, mau dung mat sai.

Nang Hkawn kasha hpe woi la na matu tsun yang kasha Ah Ling gaw, nta nkam wa na Phone pat kau, Nang Hkawn dai zawn Shwili mare kaba kaw kaning di tam la na grai myit htum ai rai tim myit hpe shaja la let, makau grup yin hpe san sagawn tik tik rai tsam mari kasha Ah Ling hpe lu woi la sai. Lu woi wa nna nta kaw, kanu gaw tinang a kasha hpe tsawra ai majaw, Dawn dabang n sa ai sha, ntsa htap gawk kaw la sharawng da nna, tsi mawan hte hkrak rai rawng da ai masum ya nga yang kanu gaw “ma e.. shat sha u.. Nu Ma sha ra ai si mai U shan shapyaw re yaw” ngu na, shaga let chying hka zaw hpaw dat yang, kasha n rawng taw nga sai, dai daram tsaw ai hkuwawt hku gumhtawn lu ai kasha hpe kanu n chye tsun hkra mau mat sai.

Ah Ling mare kaw kanu a manang ni kaw gumhpraw sa hkoi la di kani bai mari lu hkawm mat wa sai. Kanu tsam mari sha bai abawk woi la n-na, dawn dabang de sa da na myit dawdan sai. Kanu grai myit yak ai kasha mahkawn naw re sari n rawng mat na gaw hkrit, manaw manang ni hpe gaw gaya htingbu htingpyen ni hpe gaw gaya rai tim kaning n chye di ka-ni dawn dabang kaw rai yang she nye kasha hpe hkye la lu na sai lam hpe myit dum wu ai.

Aten gaw grai lawan , n dum shani Ah Ling dawn dabang kaw nga ai shata masum hpring sai, Nang Hkawn hpe Balik ni Phone shaga wa sai, “Nanhte a kasha Kaw Ling hpe sa woi manu! Aten du sai……” Ah Ling a kawa hpe hpa mung nau n mai kam ai… gara de mung kanu grau shakut sa ra ai rai nga ai zawn Nang Hkawn kasha Ah Ling hpe lu woi la sana re majaw grai kabu ai myi man hte lawan ladan shajin la nna, dawn dabang de gat mat wa sai, dawn dabang hte nta nau n tsan hkat ai re majaw kanu galaw lam hkawm sa wa nu ai.

Dawn dabang chyinghka sa hpaw dat sai,”Hkawn Ling pru wa rit, Nang hpe sa tau ai masha du sai, lawan ai hku shajin na pru wa rit.” Kanu grai myit pyaw ai myi man nsam hte manang ni hpe shakram ga tsun da nna, tin tin rai pru wa ra ai.

Kanu mung kasha pru wa na hpe myi she n grip hkra hkra la tsap nga ai hpe mu yang , Ah Ling a myit hta “aw…. Ngai shut dik sai…. nu hpe matsan dum dik sai, ngai myit n su ai majaw nu myi man kaji hkrum sai, hpang de myit su sana yaw….” Myit kata tsun nga tim, n-gup de gaw n sen n pru hkraw ai.

Nang Hkawn kasha hpe mu yang “wa rit…. wa rit….. nu sha e… nga ahpum la nna, shabyi kaw apup let dun nna nta lam de yawng mat wa masai.

Ah Ling a kawa mung kasha hkan nu hpe chyinghka lam kaw sa tau la let kasha hpe hkap apup la nu ai.

Shan nu wa ni grai myit pyaw simsa ai ten kadun mi rai mali ai, dai ten hta, nta kaw n nga taw nga ai la kasha marai mali hpe mung kanu yan kawa myit dum nga ai, Ya yang ma hkan nau ni yawng she nga taw gaw , an nu wa ni gade she pyaw na wa…. Kawa mung n-gup kaw n tsun tim myit kraw kata ga shaga nga sai.

Ah Ling a kanu yan kawa kasha hpe nta de woi wa sai majaw ka-ni mung dawn kau sai Ah Ling hpe yu yang akam asham, myi man hpe yu yang mung amyin ahkyeng, kanu yan kawa n-gup kaw n-tsun shapraw tim, myit pyaw ai nsam gaw myi man kaw dan dawng taw nga sai.

Kaw Ling nta kaw kanu yan kawa hpe ra ai bungli galaw nna grai myit simsa ai hte shan nu wa ni ......

NUM RI