KACHIN NI HPA YAK

Yak ai ngu ai hta; marai langai hkrai a ayak, kun dinghku langai a ayak, wuhpung wuhpawng ayak, mare kahtawng, ninghtawn, mungdaw mungdan hte mungkan ayak hku nna nga ai. Yak ai lam langai the langai mung n bung ai. Hparan jasan la mai ai ayak, mala la hparan la nan n mai ai ayak ni nga ai.

Matsan mayan n byin n tai re ai wa a ayak hpe lusu sahti kummyi arawng aya kaba n’gun kaba ai wa e ayak hku n mu ai, kaba ai wa a matu mung kaba ai ayak nga ai, kaji ai wa a matu mung kaji ai hku nna ayak nga ai.

Tinang a ayak hpe tinang sha grau chye ai zawn anhte Wunpawng ting a ayak hpe anhte chye na ga ai.

Wunpawng amyu ni a yak hkak lam law law nga ai hta na nkau mi hpe jawm yu yu ga. Mi moi kaw nna ngasat ngasa madang nem, hpaji machye machyang ningmu n law ai kata kaw British mung maden ni e dip gamyet sha nna yak lai wa sai lam mi, Jahpan fetsit gumshem lailen hte dang sha hkrum nna kajun mat nna yak hkak lai wa sai gaw lam mi, Myen amyu ni hte rau nga rau pra wa ai hpang Panglung gasadi hte maren mungdan gawgap n mai wa ai ayak, Awmdawm Shanglawt mungdan gaw sharawt shagrin la na ngu ai lam yan hpe hkrang shapraw n mai wa ai mayak, Federal madang hte myit shadik la na ngu ai kata kaw; 1994 ning hta simsa lam la nna Buga gaw sharawt bungli galaw ai aten, Myen asuya wa e jarit sin hpyen hpung hkap la ra ai ngu maja shaggyeng hkrum ai mayak, 2011 ning June 9 ya shani kaw nna Myen hpyendap n’gun laba hte bai numdaw mi htim gasat hkrum ai mayak, NCA lakmat htu ra ai ngu nna shgyip shagyeng hkrum ai mayak ni hkrum mana sha ra nga ga ai.

Bai lam mi hku nna gaw anhte hkrai anhte n byin n tai nna mung, makau grup yin sat lawat hta hkan nna mung yak jamjau hkrum ai.

Wunpawng ni aten galu gat dut seng dut sha n chye ai, n kam ai, hkinghtawng mung n lu ai, lagawn ai majaw matsan ai ayak.

Moi shawng de bum yi hkarang yi hkyen sha nna kan bau ai, ya na aten hta Nam maling gawn hkang tara hte bum yi galaw sha ai ladat hpe gaungwi ngwi shayawm wa, shagyip shagyeng nna dawm kau magang wa sai, shanang nna galaw ai ni hpe tara upade the ahkyak la wa yang, hpawthpra hpa baw galaw sha na? Wunpawng ni hkau na n kam galaw ai. Sha na yak wa sana.

Moi shawng de nam na ashu ashan hte nta masha ni a shatmai shatai ai, ya prat nam maling gawnhkang tara upade the pat hkum mara ari jaw wa ai. Wunpawng ni rem sha n kam ai. Rem na ladat mung n chye ai ayak.

Anhte a kaji kawoi prat kaw nna hkashi hkawam, hkanu hkagam ni hkan ja hkailau sha lang sa nna lani mi hkamhpu ja loili htu gawat la, lu dut ai hte hpe tsi mawan manu shatai jai lang nga lai wa ai, ya daini na apart hta tara n shang ja n mai htu ai, tara n shang lungseng hkum htu, pat hkum htu nga nna pat wa ai, rim ahkyak la wa ai, ja gumhpraw n’gun kaba jak rung jakrai ni hte htu sha kau ai, Wunpawng ni a kaji kawoi hkinghtawng (rd&dk;zvm) hku sha gaw n mai galaw sha sai. Ja gumhpraw jai lang na yak wa ai.

Anhte Wunpawng ni wut n chye ju ai, hpri n chye shadu ai, Dum nta gaw gap laksama wuthtung sara, gawgap Engineer n nga ai, kadai gawgap ya na? Yak sai.

Moi gaw nta htinggaw shagu pasi hkai, gawng ri ri, kabang ri ri, lai latung rem nna buswi buchyung bu ai, anhte Wunpawng ni ri da maka ka ai n nga wa ai, dalang jak kaba lu ai n nga ai. Wunpawng maka kadai ka shatsawm ya na? Dai mung yak sai.

Ji woi ji wa ni gaw laili laika n chye hkra rai timung lanyi joiwa dap hkun gamung jahta nna tinang a labau lara hpe hkai ginlen hkrat wa, ya daini gaw labau hkai ai mung n nga, ahtik ka ai mung gata, shacyen shaga mung Adaw, uncle, kagu hkrai kanam hkrai, hpawthpra gara hku matut shachyen shaga na?

Hpushawng hpuba ni gaw mungdan n lu n mai, Myen amyu kaba lailen hte dip up sai chyup ai kaw na lawt ra sai ngu ruyak jamjau hkam, prat tup jaw lup, kawsi hpang gara hkam nna shakut tiktik rai nga yang, daini na ramma ni gaw online n tsa e sha majan gasat, nbung sha gawut shaja, tsun ai gaw akyu hpyi ya na yaw nga, nga kaba gaw ra, ga gun, ru htu gaw n kam ai hkrai, Shanglawt lu hkra kadai matut shakut na? Hpushawng hpuba ni a lahpa kadai matut galai la na? Myu tsaw mung tsaw n nga wa ai ayak.

Ala ala ni gaw ka-ni nanghpam lu, htu nna si, majan pa hta si, ana ahkya hte si, mawdaw cycle adawt galau la nna si, si hkrai si, ka-ni manghkang hte mungmasa ga baw rau htawng de rim hkrai rim rawng kau, lani hte lani yawm she rai, shangai chyinghkai ai mung ala gaw nau n law hkraw ai. Amyu shayi ni gaw lu mayu su mayu, tsawm mayu pyaw mayu ai nga yang, tinang amyu la ni hta loi tsamai dum ai de num wa mat, dinghku de sha hkawm mat, masha jahpan gaw yawm she rai, tawm she rai wa, kaga amyu ni gaw mayat magang, brat magang anhte a lamu ga kata de matsut htim bang wa ai, gawt kau mung yak shachyut kau mung yak ai.

John