NUM NAU LATA KAU NNA
MARIP HKAWN SHAWNG
"He, Hkawn Tsin, nang Du Shan Lum ni a laning mi hpring myitdum ai kyu hpyi hpawng saw shaga laika yi lu la ai rai?" "Lu la ai le, Aji nang sa na i taw?" "Sa ra gaw e, ngai mung nsa nmai nan re, hpa majaw nga yang shi gaw nye a gamoi shawng a dingla a myit dum yawnhkyen laning mi re majaw, sa nan sa ra ai. " Bat hpang mali ya shani, Hkawn Tsin yan Ji Bu gaw tinang hkum hpe nmai shagrit la ai ngu grai shakya la nna kyu hpyi poi de du hkrat wa masai. Shan hpe gaw sara ma re nga nna grai hkungga let shat bai dam dat ya ai ten hte, Hkawn Tsin jawng lung yang grai hkau hkat ai jawngma manang Bawk Ra hpe mu dat nna jawm shakram let shaga hkat bang wa masai. "Ning Hkawn nang dinghku de sai i? an lahkawng nhkrum ai shi ning daram na mat sai. " "Ngai mung tsang shi jawng pru nna ndai buga kaw jawng bungli masum ning galaw ai hpang she, Lahpai Naw ngu ai la hpe tsam mari she lu tam la ai yaw, ngai na Lahpai Naw gaw na htu brang re, ma ni gaw nlaw la ai, la sha masum hte num sha langai sha re." "Ning Hkawn nang ma shangai jak grai hkrak ai she rai nga ndai. " "Ngai pyi grai law ra ai re gaw, la sha shi lahkawng rai jang bawlung htawng tim shan wa ni hkrai masha ni hte mai shingjawng na re ngu grai myit da we ai yaw.
Bawk Ra nang dinghku de sai i?" "Nye manang tai na la gaw garai pyi nshangai shi sam ai. " Bawk Ra loi mi yawn yawn re zawn rai tsun jang, Hkawn Tsin bai rai jang nang teng sha htingra rai nmu tam jang gaw nye kanau jan wa tai mat ga le ngu u ai. Hkawn Tsin shing nga nna, Bawk Ra loi mi na sharawng let mai ai le ngu htan u ai. Shi bai matut tsun ai: "Ya ngai pyi kanau shatai na num yaw nna myi pyi ntai mat wa sai, myi jat lang ra mat sai. Naimam hkra du ai gaw mu, masha hkra du ai gaw nmu ai da yaw, nau lata jang du bawng gatut ai da, hpung sara ni tsun yang, la kaja lu na matu akyu grai hpyi ra ai da, nang akyu gaw hpyi nga ndai kun? Nga sha mayu yang nga nawng de sa. ra, lauban jan tai mayu yang lauban ni nga ai de nsa yang lauban jan ganang na lu tai na. Anhte num ni mung grai zen ra mat sai yaw." "Nang na garat ngai hpe myi nra na gaw e." Bawk Ra loi ana ai hku tsun jang, Hkawn Tsin bai tsun ai gaw: "An gaw grai hkau ai manang re, na a lam ni, na a atsam ni, na a kyang lailen ni yawng gaw ngai chye ai re majaw, nang hpa nmyit tsang ra ai, nye kanau she wa tai mat saga. Hkawn Tsin nlu nlawt ngu ai hku shadut bang wa nu ai.
Bawk Ra nau myit nhkawn nhkawn re zawn rai jang she, Hkawn Tsin bai tsun ai; "Nye garat a lam hpe naw tsun dan de ga, shi hpe num manga daram gaw matut ya yu sai, langai hpe gaw labawp nau kaba ai nga, langai hpe gaw nau gadun ai nga, langai hpe gaw nau lasi ai nga, langai hpe gaw nau hpum ai nga, langai hpe gaw manam sa jang hpun lum chye ru jaw na zawn mung nre nga nna nla hkraw u ai. Dai ning sak pyi mali shi jan ning du mat wa tim ma shangai shangun na jak rai nlu mari ya nga ga ai." Nga nna tsun jang, Bawk Ra e ning shawng e, na rat dai daram num lata ai, ngai hpe mu jang hpa baw myi bai tsun kau na ngu dat jang she, Hkawn Tsin bai tsun ai gaw, nra ai, ya prat gaw num ni mung manu nau manat jang chye jan ai da, tinang mung gwi ra ai, nga nna naw tsun bang wa yang, si mai jat jaw ai ni hkru hkru sha ga nga nna si mai sa jat ya ai shaloi she aga gan jahkring kau manu ai. Hkawn Tsin garat a num hpyi na nmalap ai sha, du kaba Shan Lum jan hte shakram la nna wa hkyen let, moi shawng na ganam Bawk Ra hpe nye garat hpe jaw yang nmai na kun ngu dan u ai, gamoi gaw bum de woi nga na kun pa de woi nga na kun ngu san u ai. Bum de she woi nga le, bum de she yi kaba lu ai, shangu yi, hpalap yi ni nga ai, bum de she namlaw namlap sawng nna hpa myit npu ra ai, pa ga de gaw chye tam ai ni a matu sha re, ngu nna tsun jang, Du jan Ji Bu hpe kaga de shaga la nna Hkawn Tsin ni a dinghku lam san yu u ai.
Shaloi she, nyi lum e, ngai na ningmu hku nga yang grai hkrak sai, dai la kasha gaw lu sha chyajan mung nsha ai, mare hkan, hpung lam hkan grai shakut ai grai myit su ai la kaja langai re, mu galaw grai shakut ai, hpa tsun shara nnga ai, shi a loi ningra ai lam gaw shawng na wa loi ran ai sha re, nyi lum nanhte atsawm sha myit yu mu gaw e. Ji Bu shing nga jang du jan bai tsun ai gaw, ngai nam Bawk Ra mung kaga hpa tsun shara gaw nnga ai, ya shi nta ting hpe bau ai, kanau ni hpe jawng htuk ai, kaji kaw nna dut lu dut sha grai byin ai, shi a ningra lam gaw kaji kaw nna lit nau gun nna na maga myi loi nna ai sha re. Hkawn Tsin hkrit hkrit ngu let madu wa hpe Bawk Ra hpe garat a matu ra ai ngu tsun jang, madu wa gaw Ma La dingla si wa nga yang num nmai lata nga sai, num sha hkraw jang la sana re ngu nna jawm dawdan manu ai. Hkawn Tsin yan Ji Bu gat sa nna Bawk Ra hpe bai sa galaw ningdat la manu ai. Bawk Ra shatu let ngai hpe hkum la gawm kau shangun ngu jang, Ji Bu bai tsun ai, anhte hpe hkum sa hpyi gaya kau shangun lu ngu nna ningdat hkat wa masai. Gat shani Bawk Ra yan moi gaw gat lam let Ma La hpe mu mayu nna la taw nga, Hkawn Tsin yan Ji Bu gaw Ma La lawan ndu hkraw nna mau nga ma yang› shani shingtung du sayang she Ma La bum de nna yu hkrat wa ra ai.
Hkawn Tsin garat hpe hkap mu ai hte, aga, rat nang hpe num madun na ngu she htet yang, dai daramram jan du ai gaw, Bawk Ra yan moi pyi yawn mat sadawng ngu hkap hta ai laman, Bawk Ra yanmoi gaw Ma La hpe mu mayu nna nta yu wa na mawdaw ndep kau dat rai, myit npyaw let mawdaw tam hkawm nga ai laman, shanhte hkrum hkat na matu kashai mat manu ai. Dai hpang e, Bawk Ra a gamoi bai htet dat nna, Hkawn Tsin yan rat ni num hpyi sa na matu htunghking hte tup shawa nang gun ga ngu, shawa nang dai jawm la yu ai kaw bai di run mat nna, Ma La shana tup matut tim nlu matut ai, hpang jahtum gahpu bawk she lu matut ya nu ai. Shing rai Ma La gaw shawa nang gun nna kanu dim Nang Seng hte Lashu de hkan nang yu wa nu ai. Lashu du ai hte rau, nmu yu ai Bawk Ra hpe sa mu na re majaw masin grai htuk htak nga nu ai. Bawk Ra gaw prat tup mu nga na nga nna myit da ai Ma La hpe sa mu na matu Nang Seng ni a nta de sa wa sai. Shan hpe shachyan ya ai shaloi shakram hkat nna, Bawk Ra gaw masin gahtuk let Ma La hpe shanhte nta de woi wa nu ai. Hpang jahpawt Bawk Ra a kawa Ma La hpe tsun ai, nan rau nmai nga ai, mana yupmang de dumsi mu nngai ngu nna hkai dan nu ai. Shingrai Bawk Ra gaw Ma La hpe kanu dim ni nta de bai sa sa kau nu ai. Kanu dim san jang, Ma La grai kabu ai ku tsun ai, na maga mi ra ai nga ai, kawa a yupmang mu ai hpe chyeju dum ra sai, ngai nta de wa mat na ni ai ngu dat nu ai.
Kanu dim gaw Hkawn Tsin hpe chyenan gayat nna num hpyi ai lam nmai byin sai ngu jang, Hkawn Tsin bai tsun ai gaw, ya mare na ni Ma La num hpyi sa ai lam ma hkra chye mat sai, anhte num hpyi sa ai lam shabrai grai ma sai, Bawk Ra hpe nlu la tim kaga num sha langai matut ya marit nga nna tsun u ai majaw, num langai bai matut ya manu ai. Shing rai Ma La a kanu dim num mahkawn kasha langai bai matut ya sai, Ma La gaw num sha dai hpe grai myit shang sha nu ai. Rai tim Bawk Ra gaw Ma La hpe yu ra mat nna, Ma La hte dinghku de na matu shakut nu ai, shi hpe Lashu nampan sun sa hkawm ga ngu tsun nu ai, Ma La gaw Bawk Ra hpe myit nshang sha mat nu ai, shi a kawa tsun ai ga ni hpe bai dum dat rai, machyi masusu kau dat nu ai. Hpang bat mi din jang bai shakut hkrat wa ra ai, dai lang gaw Ma La hpe sa tawngban ai, masha kaba ni hpaji njaw ai majaw byin mat ai lam re, ya anhte nta de bai wa saga ngu sa tawngban nu ai, rai tim Ma La gaw num kasha kaga bai tsun dan sai majaw, dai num sha kaw myit jung mat nna, Bawk Ra saw ai de nhkan nang nu ai. Rai tim Bawk Ra myit ndaw ai sha Ma La hpe galang bai sa tawngban yang, Ma La Bawk Ra hpe ahkyak nla nu ai.
Dai hpang kanu dim gaw Ma La hpe ya hte tsun ai numsha hte sa shaga yu su ngu nna, kasha Naw La hte dat dat nu ai. Dai shani num sha gaw Ma La hpe gaya nna makoi mat nu ai. Masin nsi nna Ma La yan Naw La galang bai sa wa yang, dai shani gaw num sha gaw masha ni hpaji grai jaw da sai majaw, Ma La hpe atsawm nmu shangun ai, Ma La yu jang bai gum mat mat rai, Ma La mung man na wa lahkawng ran ai majaw num sha hpe atsawm nwam yu nna, shan lahkawng shada atsawm nmu hkat ai, manit shi dang sha shaga hkat la nna, shada da gaw ra hkat mat rai bra mat wa masai. Ndai zawn re lam hpe Ma La a kanu dim Hkawn Tsin hpe chyenan hte bai shana dat nna, Hkawn Tsin kabu gara hte manang saw la na num sa hpyi na matu mawdaw shap la, rai ni mari jahkum la, num hpyi woi lang na kanu gana ni hpe shat woi sha, kyu hpyi la nhtawm, mawdaw boi la kra rai num hpyi rawt mat wa masai. Mayu dama lahkawng maga myit hkrum nna hunghking hte tup hpu ja mung bang ngut rai, hkungran poi shaga laika hte seng nna mung bawngban da sai. Hkungran ngut ai hpang shata mi daram gaw Lahpai ni a nta shani shana rau lu rau sha nga ai ten, Hkawn Tsin gaw ganau Htoi Bu shadu lu shadu sha lam hta ra nrawng rai tim, mani ai lam hta ningra rawng ai hpe mu mada nu ai. Shata mi hpring ai hpang Hkawn Tsin garat yan ganau hpe bum ga de wa sa ai gade ya nrai yang, nta e rem da ai lagat woi manaw sha nna, n-gup maga mi mung shakap ja wa, myi maga mi mung shani shana hpaw taw nga sai.
Dai ten hta Hkawn Tsin gaw ganau jan hpe ja gumhpraw grai ma nna la da ai majaw, grai kabu ai ten naw rai nga yang, ning re ana bai awk ai majaw, grai nju, pawt mayu mat nu ai. Ma La grai myit npyaw mat nu ai majaw garat hpe Htoi Bu hpe mayu ga de wa sa kau nna shi gara de rai tim hprawng kau da na ngu bawngban nu ai, Hkawn Tsin gaw : Rat e, nmai ai, hpa majaw nga yang, Karai Kasang a man hta ga shaka la ai shaloi, gaja tim nkaja tim, pyaw tim yak tim, lu su tim matsan tim, hkam ja tim machyi makaw hkrum tim na a madu jan shatai na kun ngu san yang, shatai na nga yin la sai majaw, nmai ai, na ta kaw she byin sai gaw, na a gam rai sai ngu jang, Ma La myit htum nna nsa kaba sha shaw mat sai. Ma La a garat yan gahpu gaw num nnan hpe tsi lajang la na matu hkau na mung dut kau rai, Htoi Bu hpe shawng de ning re ana byin yu nbyin yu lam san jang, Htoi Bu gaw naw kaji yang galang gaw byin yu ai nga nna tsun dan manu ai. Grai htap htuk ai, hkum ngau tsawm la ai, layang ga na tsang shi jawng pru ai hpaji num gaw n-gup nhkyeng ai rai nna, shawa hpawng hkan mung nwam woi hkawm, lu sha sadi ra, ntsin lagyi ni nmai hkra re num la shut sai Ma La gaw, shi hkrai adawt si mat na zawn ngu let, Bawk Ra hpe she la ai rai yang ningre lam nbyin na, num lata ai wa du bawng hkrup, yi lata ai wa shingnawm hkrup ngu myit malai hpang hkrat taw nga nu ai.
