KARAI JAW YA AI SUMTSAW

Sumtsaw ngu ai gaw prat tup hkum shan langai tai ga shaka la hkungran ai lam garai n galaw yang mahkawn shabrang prat hta myit masin salum ap jaram shawng jaw ai myit pyaw simsa lam lu ai prat shawng na daw rai nga ai.

Prat tup na matu ga shaka jaw hkat sen htu hkungran sai nga jang gaw sumtsaw n rai sai, myit masin hkumhkrang sut gan ma hkra ap ya kau hkat ai dinghku shang ai prat rai mat sai. Yak ai jam jau ai pyaw ai yawng hkam la hkrum kadup yu ra sai. Kadai n mu hkra kyem rem makoi da ai Karai jaw da ai hkum shan yan hpe mung ahkaw ahkang jaw kanawn mazum ra mat sai.

Rai yang lahta e jaw da ai ga baw hpe aran sanglang yu ga, shawng nna Karai shawng hpan da ai Adam gaw shi hkrai nga na n mai ai shi hte ram ai ning-rum ningtau shi a matu ngai galaw ya na we ai nga shi a karep nra shaw la nna grai tsawm ai shayi sha Ewa hpe hpan nna ap ya wu ai. Shaloi shan gaw sumtsaw sumra prat hku sha naw re majaw labu palawng n bu n hpun timung n gaya hkat ma ai. Ra marit kasit kayut ai lam n nga ai sha kanawn mazum ma ai. Hkumshan kanawn ai lam n nga ai hte maren na um na sin hkum mung n byin wa malu ai.

Dai hte maren Mari yan Yaw Sep mung mahtan ja hte mahtan da hkat nna sumtsaw sumra prat hku nga ai ram ram na ai raitim na um na sin n byin wa ai. Lamu Kasa hku nna Mari e nang na um na sin byin nna shangdang sha shangai na rin dai nga jang dai gaw kaning rai mai byin na ata! Ngai la n chye nngai. Lamu kasa gaw nang la rai n chye ai, n kanawn ai teng nga lit dai na a na um na sin chyawm gaw dai chyoi pra ai Wenyi kaw na byin wa na ra ai.

Dai hte maren Yaw Sep mung shan a sumtsaw prat hta hkum shan n kanawn da ai re majaw Mari na um na sin rai wa jang hkyet rung mat wu ai, Lamu Kasa bai sa tsun jang she bai la wu ai.

Ndai teng teng byin lai wa sai Theology Karai hpaji masa hpe chye hkap la ai shadang sha Maran Brang Ja hte mayu shayi Nhkum Hkawn San yan a byin lai wa ai Karai jaw ai sumtsaw prat lam hpe ka shaleng tang madun dat nngai.

Brang ja gaw htinggaw (20) daram sha nga ai Kawng Ra kahtawng na rai nhtawm, Hkawn San chyawm gaw htingaw 600 daram nga ai hpung up sara hte hpaji chye ramma hpa.awn ni kring mading rai lam shagu sharin achyin ai lam, grak lagra re ai, Lung Jung mare na rai nga ai. Shan shanu nga ai mare lapran e gaw deng 6 daram sha tsan malu ai.

Brang Ja gaw, Maran Singgawng hte Nhkum Htu Bwi a kasha alat rai nna Hkawn San gaw Hpungtau Nhkum La Nu hte Lashi Kai Seng yan a shayi sha alat rai nga ai.

Shan gaw, jawng rau sha lung kaba wa ai raitim Brang ja gaw laika tsang (8) sha sharin la rai yi sun hkau-na galaw sha nna nga mat wu ai, kanau Maran Naw Seng gaw tsang (10) sharin la nna hpyen du jawng lung la nna myu hte mungdan bungli kangka gun hpai ai.

Hkawn San gaw tsang (10) awng nna shan hte mare na Amyu sha jawng hta na sara num rai nga ai. Tsun ga nga yang Brang Ja hte Hkawn San yan a nta ni gaw moi kaw nna num jaw num ya ding yang re ai mayu da ma rai ma ai.

Brang Ja asak (24) ning num la ten du wa ai hte, kanu kawa ni gaw mayu kasha rai nga ai. Hkawn San hpe la yang mai ai lam shadut ma ai, rai yang Hkawn San gaw hpungtau kasha rai makam kri dung ai sari kaba ai num sha re majaw ram ram la ni n wam bawk hte nna jan taw ai zawn byin nga ai. Asak mung num wa ram (22) ning rai nga lu ai, ya mung sumtsaw n lu ai, kalang lang sumtsaw grai marit ai ten ni mung gaw nga da nu ai. Ya prat gaw moi na hpan n rai sai, num sha ni kaw nna Hkawn San ramma hpawng pyi n lu sa ai nawku jawng wang shing jut na, Nwai Pan sum wum shingnip kaw jawng kata e lang jan nna sa tawn da ai hpun pyen pung hkum galu hta dung bang wa masai. Brang Ja shawng kaning ngu ga hpaw dat na, katu karu n shu n shang nga shawng dung dat nu ai. Hkawn San gaw shi dung ai kaw na pe 3 daram gang ai kaw sa dung dat nu ai, lata masawp n dep lu lu rai nga ai. Brang Ja ga hpaw shaga let loi bai nawt sit dung let, nang hte hkum tut hkrum dung jahta na shaman tawn ai lam n nga ai majaw grai gawng machyi n ngai, nga ai hte rau sha mani sum rai nga ma ai. Kalang bai Hkawn San a myi man hku loi mi magap taw nga ai kara ni hpe Brang Ja a hkra lata hte masawp shara ya na matu loi jum hkra rai ladawn sa wa ai shaloi she, Hkawn San shi hpe masawp n hkra hkra shigdu de kayin kau dat ai hte gu Brang nang ngai hpe prat tup na matu teng sha tsawra ai nga jang gaw Hkawn hpe na a lata hte hkum hkra, hkum masawp, ngu dat nu ai. Brang Ja gaw mau mau rai myi kata e num sha ndai gaw ngai hpe kaja wa tsawra ai gaw teng ai kun? ngai nau n shadu sai. Kaja wa nga yang sumtsaw ngu ai gaw hkawm tim lata gindun hkawm, dung tim lata lahpa ntsa e mara da, gang kahtep nna shabyi pup mayu yang pup rai nga ai hpan she re, Brang Ja mung Hkawn San hpe shi lata hte sha ladawn hpang dat ai lachyum rai nga lu ai.

Hkawn San gaw kanu kawa sharin hkut ai ramma wun kat ni kaw hkut hkut nai nai sharin tawn sai re majaw Karai hpe hkrit hkungga ai myit san seng ding hpring ai shayi sha re majaw sumtsaw wa hpe masawp hkra shangun ai hte rau kaga daw ni gaw tsun shara pyi n nga sai, Karai a man e yu bak mara hta galwi rawng mat na, Karai a man e matsat shabat awu asin hte dinghku de yang ngwi pyaw dinghku de nna shaman chyeju hkam la na lam nnga mat sai ngu myit ai.

Daini na Wunpawng sha ni yak la ai, moi na Nat jaw jau ai prat na Nat jaw htunghking num wawn num la lam hpe n chye sharai la ai lang nan taw nga ai majaw, Karai a man e san seng ai hku n lu hkungran ai, ma dap grup jang she hkungran la masu ai gaw tsa shadang 90 ngu yang pyi n shut na re.

Gu Brang an gaw chyoi pra sanseng ai Karai a man e mara n kap ai chyoi pra sanseng ai Nawku Jawng kaw chyoi pra san seng ai hkungran poi shang nna Karai kaw na ra n rawng ai shaman chyeju hkamla lu u ga myit mada nngai.

Ga shaka la, hkungran ngut jang gaw nye hkumhkrang, nye myit masin, sut gan yawng nang hpe ap ya sana, shaloi gaw nye lahtan na kara masawp ai sha n rai, hkum ting shara mi mung ngam da ai lam n nga ai sha masawp na mung na myit rai sai. Na a matu rai mat sai. Na hkum ting mung Hkawn a matu rai na sai. Karai a man e rai n hkungran ai re majaw Hkawn hpe hkra na, jum na ahkang n jaw gwi nngai. Hkawn a matu Karai Kasang jaw ai jet ai sumtsaw rai nga u yaw Gu Brang, Hkawn mung Gu Brang a matu Karai jaw ai jet ai sumtsaw, sadi dung ai sumtsaw tai na hkrak sha kam nga rit yaw.

Dai kaw nna Brang Ja mung shan a sumtsaw prat ting hta lata hte shakram ai hta jan nna san seng ai sumtsaw prat hpe myit dinglik nga wu ai. Mungga hta na sharin la lu ai Yosep yan Mari gaw mahtan da ai hpang sumtsaw prat hku kade na hkra nga tim hkum shan hkra hkat ai lam hpe koi sadi let nga ai majaw she yu bak n kap ai chyeju hpring ai Karai a man e san seng ai hkum hkam la nna madu a kasha shangai paw pru wa ai dinghku hkam la ma ai n rai i?

Kalang mi sha hkam la lu ai tsawm htap la ai hkristan ramma jet yang gaw shaman chyeju hpring tsup ai, Karai jaw ai sumtsaw hte shu mashi shu masha chyeju hpring tsup ai ni hkrai tai u ga ngu;…..

Maru Brang Kum