"NGAI CHYENAN SHA SHANG GAYAT AI"

"NGAI CHYENAN SHA SHANG GAYAT AI"

Ka ai: Ma E Hke Si

Marang shasha nga htu ai htingra ta na lana de mi hta, Ma Li Ya • Dela Lusi • Saiwan Htisi madu hkrai, shap la ai mawdaw gawt let Pasailawna de sa wa u ai, Maw-nwigelawsi zaibru zinlawng hku lai wa ai shaloi mawdaw ruk byin mat sai. Shi gaw sak 27 ning re Mawsihkaw na sek lasau re hkawn tsawm shayi rai u ai, lahkawng masum ning a shawng e mying pyi loi brawng ai zat pya masha rai nga ai. Shi a ningrum ningtau wa gaw shara shagu myawkle pya hkawm ai masha re, dai shani shi Salagasa ginwang kaba de jinghku sa gawan da rai, laulau nhtang wa nna madu wa hte rau zat pya sa ra nga ai. Marang prang kaw nayi hkying hkum mi ting abri nga lai wa ai mawdaw gaji hte rai garawt ai mawdaw ni hpe ta she tsu hkra garum hpyi yu tim, kadai mung n hkring ya ai majaw, myit she htum mat wa nu ai. Dai ten hta, manam mawdaw kaba gawt ai dareba langai shi hpe yu matsan dum nna mawdaw jahkring ya sai. Raitim, dareba wa shi hpe grai tsan hkra n lu htaw ai ngu shadum nu ai. "Hpa n ra ai, chyenan langai sha ra nga nngai." Ma Li Ya tsun ai. Teng ai, shi chyenan gayat nna tsun na lam gaw, madu wa hpe daina de hkying sanit a shawng e nta n lu du wa sai ngu shana na sha re. Jawngma ni a zawn re ntsa palawng langai hpun da, zaibru jang hkan hkawm ai baw zauhkai hkai tawn re Ma Li Ya hpe htingra marang e, u shu ganu zawn hkum ting madi apup mat sai.

Bai nna, mawdaw manghkang a majaw, masin nji n gu nga ai ngu yang, zawsi mung mawdaw gata kaw malap bang kau da nu ai. Mawdaw kaba kaw hkan ai num langai lawm nga ai, buhpun sumli ai hpe yu yang hpyenla zawn rai tim, ga shaga lailen ni gaw grai nan si mani bai rai nga ai. Shi Ma Li Ya hpe hpajet langai hte nba kasha langai ya let, shi a makau kaw dung shara sit yen ya rai u ai. Hkum ting loi hkraw hkra gatsut kau ai htawm, nba gayawp lawai hpun la rai, Ma Li Ya dung bang wa let malut pak na matu wanhkret shaw hkret dat yang, madi mat ma sai. Makau na num jan shi hpe wanhkret ladawn let shi kaw malut zinghkat mi hpyi lu nga ai, shi a malut n madi ai zinghkat lahkawng sha ngam mat sai. Malut marawp dat ai hpang Ma Li Ya a masin loi zim nga wa nu ai, ga shaga ai nsen ni marang htu kashaw ai hte mawdaw gadu ai nsen ni she n na hkra kaba wa jang, makau na num jan yungdawn hpe nten kaw madi tawn let: "Shanhte yawng yup sai." Nga tsun shadum dan u ai. Ma Li Ya mawdaw gata de gayin yu dat yang, mawdaw gata kaw sak n bung ai, hkumhkrang man nsam amyu myu re num sumpum mi, shi hpun ai zawn re nba gayawp hpun let yup pyaw nga ma ai. Mawdaw ting agatsi zim nga ai gata hta, Ma Li Ya mung lahkum kaw hkintum dung let yup pyaw mat wa nu ai. Shi hprang wa yang ningsin sin nga la sai sha hrai, marang mung hpawng mat sai, matut nna grupyin grau gatsi zim nga ai. Gade na hkra yup kau sai hpe n chye mat ai hta n-ga, ya ten hta gara yang kaw rai taw nga ai mung n chye mat nu ai. Makau na num jan grai maja ai zawn rai nga ai.

"Anhte ya ganang kaw rai nga ta?" Ma Li Ya san ai. "Anhte du sai." Num dai jan htan ai. Manam mawdaw nlung nyep tawn ai wang langai a gata de gawt bang wa sai, gata kaw galaw da ai dum nta ni tsaw ai hta n- ga, agatsi agatsang nga nga ai, yu dat yang maling mala gata na nawku jawng dingsa zawn mung rai nga ai. Wang gata na mapmap nga ai wanpu gaw mawdaw gata na masha ni hpe dan ndan di nan da nga ai, mawdaw dung ai masha dai ni shamu shamawt pyi n rai nga ma ai, hpyenla zawn re num dai jan gaw ma bau rung na sara ma ni zawn rai ta amying hte shanhte hpe mawdaw yu na hku dingsi nga ai. Yawng gaw sak kaba ai ni hkrai rai taw ai majaw, sat lawat ali ahti rai grai lanyan nga ma ai, wang na mapmap nga ai wanpu gata hta yawng gaw yupdam dam ai masha wuhpung ni zawn rai taw nga ai. Ma Li Ya yawng a hpang e she mawdaw yu u ai. Ma Li Ya gaw masha dai ni hpe Mama ni re ngu shadu u ai, rai yang, mawdaw yu ai shaloi, rung hking hpun ai masha kau mi manam mawdaw chyinghka lam kaw hkap tau la ai hpe yu yang gaw Mama ni zawn n rai nga ai. Marang n hkra na matu rung hking hpun ai num dai ni shanhte a baw kaw nba hte magap ya nhtawm, shanhte hpe hpalen lam mi tsap len shangun nga ma ai, raitim, ga n tsun ra ai, loi lawan ai la-hpawk nsen hte sha shanhte hpe tsap dingren nga shangun sai.

Ma Li Ya shi makau kaw dung ai num jan hte hka bra na shaloi, nba nhtang ya kau u yang, num dai jan gaw shi hpe hpun da u, wang kawn nhku de shang wa ai lam lapran hta marang shinggang ra ai, chyinghka sin ai ni hpe ap ya jang rai sai nga matsun u ai. "Chyenan nga a ni?" Ma Li Ya san u ai. "She nga law." Num dai: "Waw de du jang, shanhte nang hpe madun na ra ai." Ngu tsun dan sai. Num dai Ma Li Ya kaw malut bai hpyi u ai, Ma Li Ya gaw bambam nga ai malut kawp gata na ngam nga ai malut ma hkra hpe jaw kau dat sai. "Lam kaw gun saup shakang kau sai yi." Sha nga nhtawm, num dai mawdaw chyinghka lam kaw tsap let: "Hpawang kaja u ga yaw!" Nga ta dingsi let marawn nga u ai, mawdaw hkawm hkyem sai majaw, kaga hpa tsun na ten n lu sai. Ma Li Ya nta kaba chyinghka lam de kagat shang wa ai shaloi, chyinghka lam sin ai num langai shi hpe ta lahkawng hte aja wa ahpuk jahkring dat ai re gaw, Ma Li Ya dingyang hkawm shang wa ai majaw, hpang jahtum e aja awa nga ai nsen hte "Tsap u!" Ngu marawn dat jang she, Ma Li Ya dagup hpun tawn ai nba gata kawn shinggan de galap mada dat u yang, hkrit na zawn re myisha hte ta layung madi tawn nna, shi hpe hpalen len ai wuhpung de lau wa tsap na hku amying jahkrat nga ai.

Kaning n chye di, tsap u nga ai shara kaw sa tsap nang nu ai. Nta chyinghka lam kaba kaw re shaloi, shi wuhpung hka nna chyinghka lam sin ai shara de gara kaw chyenan nga a ngu sa san jang, chyinghka lam sin ai num langai shi a shingma kaw gumhpuk nna, shi hpe masha wuhpung de hkan na matu lam madun let, grai kya ai manawng nsen hte: "Nang de, hkawn tsawm, ndai kaw chyenan nga ai." Nga tsun u ai. Ma Li Ya kaga num hpung ni kaw hkan nang let asin nyipnyip nga ai nta htingwung hku lai wa ai hpang, shawa yupra langai nga ai shara kaw du sai. Masha yu sin ai num ni, yawng hpun dagup tawn ai nba hkan la kau ngut ai hte, yupra hparan bang wa masai. Num langai kaga ni hte loi n bung nga ai, Ma Li Ya yu dat yang, grau myitsu ai zawn re hta n-ga, aya mung grau tsaw na zawn re ai num jan, hpalen len ai masha wuhpung ni hpe yu jep let, ya nnan shang wa ai masha ni a gata palawng kaw chywi shakap tawn ai maisau pa na mying hte shi a ta kaw ka tawn ai jahpan hpe langai hte langai jep shabung yu u ai. Ma Li Ya a makau kaw du ai hte shi grai kajawng mat nga ai, hpa majaw nga yang, Ma Li Ya a hkum kaw hpa sakse lakmat n nga nga ai. "Ngai chyenan shang gayat ai sha re." Ma Li Ya shi hpe tsun dan sai. Ma Li Ya matut nna tsun dan ai, shi a mawdaw lam kaw ruk byin mat ai, shi madu wa gaw myawkle pya sara re, ya yang Pasailawna kaw shi hpe la taw nga ai, chyenan hte shi hpe daina yuptung shawng e pya hkyem ai ginsup lamang masum hta n wa lu lawm sai ngu shana mayu ai, ya hkying sanit lau du wa sai, manit shi lai ai hte shi nta kawn pru wa ra sai, shi n du wa nna ginsup dai ni n mai pya mat na hpe shi tsang nga u ai. Aya loi tsaw ai yu sin masha dai Ma Li Ya tsun ai ga hpe atsawm madat ya ai zawn gaw rai nga ai.

"Na mying kaning ngu ai re?" Nga san sai. Ma Li Ya madu a shingteng amying tsun dan ai htawm, nsa loi hpoi ngu nu ai. Raitim, num dai mying ka matsing da ai jahpan hta gade tam yu tim, shi a mying n mu tam nga ai. Num dai loi mau kajawng ai nsam hte makau na kaga yu sin masha hpe bai san yu ai shaloi mung. gahpa ladu sha sharawt dan nhtawm, n chye ai ngu ai kumla madun dat sai. "Ngai teng sha chyenan shang gayat ai sha re. " Ma Li Ya bai tsun sai. "Ngai chye sai, hkawn tsawm e." Num dai Ma Li Ya hpe shi a matu san ya ai ku makau de madun nga sai. "Lama nang shaga madat jang, chyenan kadai hpe mung mai gayat ya ai, raitim, ya n mai ai, hpawtni yaw." Shi a manawng lai nsam ni nkaw nlaw rai nna, majoi galaw masu ai hpe Ma Li Ya yu shapraw nga ai. Ndai ten hta, Ma Li Ya a bawnu kaw lama mi akajawng sha galam pru ai zawn nga sai, hpa majaw manam mawdaw gata na num dai ni shamu shamawt rai yang, hka yam htumpa zawn ali ahti re lam hpe chye nu ai. Teng sha tsun ga, dai gaw hpam tsi a majaw hkrai rai nga ai. Bai nna ndai ahtat awat rai tsaw kaba ai nlung shakum hte gatsi gatsang nga ai htingnu ni mung myit masin kraw ana lu ai, sai hten mat sai masha ni rawng ai tsirung langai she rai nga ai. Ma Li Ya kajawng let chyinghka lam maga de rawt hprawng kagat mat wa sai, rai yang chyinghka lam kaba kaw pyi rai n kagat du ai shaloi, labu gaw lagaw kawn hkum ting raw di bu dagraw tawn ai, hkumngau galu kaba ahkawp ahkap re num langai mi e, galang ta magra tawn ai hte, aloi sha di shi hpe ga kaw dip gale tawn da sai, Ma Li Ya hkrit kajawng ai majaw kya gari let, myiman n gyem hku nna shi hpe magra da ai num dai hpe mada nga u ai.

"Garai e, nye n nga mat sai chyinghkai nu a mying ningsang hte dagam ngai, ndai de chyenan shang gayat na ngu nna shang ai sha rai nngai." Ma Li Ya tsun u ai. Shi a myiman mu ai hte chye yu shapraw sai, hkum kawn lagaw du ai labu bu tawn ai num dai a man hta, hpyi shawn ai lam ni yawng gaman lila sha rai nga ai. N-gun ja dik ai majaw, shi hpe gun ja jan ngu shamying da ma ai, chyahkring chyahkra kajawng kaja re mu pru ai shaloi, shi hpe hkrai lajang shangun nga ai. Masha lahkawng gaw shi a dingdung dan ga na tsap lahpan zawn re ta gata kaw si hkrum yu sai. Shi a ta gaw "Shut lai masha sat" shaman yu sai zawn rai nga ai. Bunglat langai gaw hkala nba mu re ngu, n gawn nsawn majoi shangut kau, bai langai hpe gaw pyada ni e, ya na lang shing re mu bai pru jang n hkyem sa sai ngu sadi sha jaw ma ai. Yawng grai tsun kam ai mu gaw, gun ja num ndai gaw du ahki nta na masha re hta n-ga, Saping sai hten tsirung shara hkan mu htam hkawm ai shaloi, ntsen na zawn re bunglat manghkang amyu myu grai shapraw yu sai ngu ai lam ni rai nga ai. Nnan shana, Ma Li Ya hpe yup shangun na matu, shanhte shi hpe yup pyaw tsi htu ya masai. Nhtoi mahka e, malut kut nna prang mat nu ai, hprang wa yang, ta hte lagaw lahtaw ni gaw ku shadaw kaw gyit dun da nga la ai, shi hkrai gade jahtau yu tim, gatsi gatsang kadai mung n sa yu nga ai.

Lahkawng ya jahpawt, Pasailawna kaw nga nga ai madu wa gaw shi ganang kaw kaning rai nga ai lam gachyi mi pyi n chye ai ten hta, shi gaw jamjau jamhkaw re jangbrawk nhkun kaw ndum ndam rai nga ai majaw, shanhte shi hpe tsi mawan mu gawk de sa bang da sai. Gade na mat wa sai mung n chye, Ma Li Ya bai dum wa ai ten hta, mungkan ting tsawra myit shingwang ni hpring tsup ai zawn rai nga la sai. Shi a ku makau kaw hkumhkrang galu kaba re dingla langai tsap nga ai, lam hkawm atsang awang, mani sumsum rai, sat lawat ni mung masha hpe myit n-gun atsam jaw lu nga ai. Shi gaw ndai sai hten tsirung na ningbaw kaba wa rai nga ai. Ga lahkun mi n shaga, shakram ai lam mung rai n galaw ai, Ma Li Ya gaw dingla dai kaw malut zinghkat mi shawng hpyi u ai. Shi malut shachyi la rai ya ai hta n-ga, rai pyi n hpaw lu yu ai ngu na daram re malut makai mi hpe Ma Li Ya e kumhpa dat ai hte Ma Li Ya sharang n lu aja awa jahtau hkrap dat nu ai. "Ya aja wa hkrap la u." Tsi sara a yup ngak atsam rawng ai zawn nga ai nsen hte "Myiprwi si hta grau nna ningma shamai lu ai hpa n nga sai." Nga tsun u ai. Ma Li Ya hkrap mayu ai hte hkrap la, hkrap hkru hkru re hpang, asan nga nu ai. Shinggan la ni hte gan se sha la ai htawm raitim, ndai daram n nga pyaw yu nga u ai. Tsi sara gaw Ma Li Ya tsun ai lam madat let, ta latsang hte kara masit ya rai ai sha n rai, nsa sa pyaw na matu shi a bunghkum ni galaw sharai ya rai u ai, nyan hpaji hte Ma Li Ya yupmang hta pyi n mu yu ai daram pyaw ai manawng ni hte shi a dam wam nga ai n tsen myit shingwang ni hpe maitau ru maling kawn woi pru wa nu ai.

Dai gaw shi sak prat hta nambat langai lang ngu na, la langai mi shi a krawwang hpe htai ya chye, hkap garum nhtawm, hkum shan hte chyeju n htang ra ai rai nga ai. Tsi sara myit alawm sha hkying hkum mi madat mara ya ai hpang, Ma Li Ya tsun shali ngut ai hte, tsi sara wa hpe chyenan langai gayat shangun na hku hpyi shawn dat nu ai. Tsi sara shingkang shingwang rawt ngoi rai: "Ya n mai ai, ngai a hkawhkam jan e." Nga tsun shapyaw let, yat sha shi a shingyaw myiman masawp ya u ai, Ma Li Ya galoi mung ndai daram si mani hte masawp ai n hkam sha yu nga u ai. "Hpa mung shi a aten ngu ai nga ai." Nga tsun da nhtawm, chyinghka lam makau kaw tsap let, kyu hpyi ai hpung up wa zawn rai ta lalam kau nhtawm, pru mat wa sai. "Ngai hpe kam rit." Nga sha tsun da ai. Dai shana, ndai sai hten tsirung na ni Ma Li Ya hpe mying hta bang la ai sha n rai, matsing nambat langai mung ya masai, shi kaning rai ndai shara hta du bang wa ai lam hte shi a lam hpe aloi sha ka shadan da let, makau kaw na rungdu ningbaw wa nan: "Myit kraw lawang gahtet gamawt lawan ai." Ngu dawdan ka matsing da sai. Ma Li Ya tak ai hte maren, madu wa gaw nayi hkying hkum chyen hpang hkrat nna she, shan nga ai Auehta byak shalak re gat lawk shara kawn myawkle pya madun sa wa nu ai. Ndai gaw lahkawng ning ngu na laman hta shi nambat langai lang ten man man n du pru wa ai rai sai.

Tsun gadi da ai lam n nga tim, shan shada garum shingtau hkat ai lam hta galoi mung nshut nshai yu nga ai, shing rai, madu wa gaw laban shani na mungdaw kaba ting htu kaba nga ai marang a majaw, hpang hkrat mat ai rai jaw sai ngu myit la u ai. Shi nta na pru wa na shawng e, chyinghka lam kaw maisau pa langai kaw dai shana pya madun na zat hte ahkying aten ni hpe ka shakap da nu ai. Nambat langai pya madun na ginsup lamang ni gaw, ma kasha ni yawng buri hkaduhka(Daishu) tai rai, shi "Hkrang makau nga" tai rai pya na hku re, Ma Li Ya n lawm ai majaw, shi hkrai sha n mai pya in tawn kau sai. Nambat lahkawng sa pya na shara gaw, sak 93 ning du sai, lahkum kaw dung ai gumgai langai a nta kaw rai nga ai, shi shaning shanang na shi a daidaw nhtoi hta n bung ai myawkle pya sara ni hpe shaga la rai, madu a daidaw poi hpe kungdawn lai let arawng satang la u ai. Nambat masum ngu na gaw shana shanang pya ai rai nga ai, Lanbu hkyi gat lam langai kaw na ga-hpri seng kaw, myit n lawm let Faransik bu hkawm masha ni hpe pya madun dan nga u ai, shanhte madu mu mada nga ai myawkle hpe n kam nga ma ai, hpa majaw nga yang, shanhte myawkle hpe n kam kam ai ni rai nga ma ai. Lamang mi pya ngut shagu nta de chyenan gayat dat dat rai u ai, myit mada lam n nga tim Ma Li Ya hta madat na hpe ala nga u ai. Hpang jahtum pya ngut ai hte gaju galim nga gahtet wa ai myit hpe n dang dip da wa sai, kaning nga tim Ma Li Ya mu lama mi gaw pru jaw sai ngu myit nga nu ai.

Pyin gram galai yu sai zat pya mawdaw gawt let nta wa lam kaw hkawm nga ai shaloi, Gela siya gat lam kaba makau hkan na laisi hpun lap ni htingra ladaw a marang gata e ningtsing nga ai hpe yu nga ninglen, Ma Li Ya n nga mat ai hpang, myu kaba ndai kaning rai mat na lam hpe gan myit dum dat ai majaw, nhung si hte hprwi nga nga nu ai. Shi shakap da ai maisau pa mi na hku chyinghka lam kaw naw kap nga la ai hpe wa mu dat ai hte, hpang jahtum na myit mada lam ni du hkra gawm mat sai. Shi nta na lanyau hpe shat jaw na she malap kau hkra myit chyat shanut taw nga sai. Laika ndai ka hpang wa ai kawn, ya du ngai shi a mying hpa ngu ai re hpe n chye nga nngai, hpa majaw nga yang. Pasailawna ginra hta, anhte yawng shi a ningka mying Myawkle sara Sa Htu Anaw ngu ai sha chye ga ai. Shi ga nau n law nu ai, manaw manang law law hte mung nau n kam garu chyai hkawm ai brang up rai nga ai, shi a hkum hta yawm nga ai zen let, hpung shingkang shingwang ni yawng gaw Ma Li Ya bai gapa kau ya lu nga ai. Ma Li Ya shi a ta kaw dun let ndai mau na zawn re wuhpung de dun bang da ai rai u ai. Ndai wuhpung hta, shana yuptung yuphka e kadai mung manang wa hpe chyenan gayat nna, ngaisha ganu ganang rai nga a nga kadai n chye tam san hkawm ai. Nnan shang ai ten hta, Sa Htu Anaw mung dai zawn re mana mu galaw yu ai, shi ya she n kam shalai u ai. Shing rai dai shana, shi Sa La Ka Sa hpe sha chyenan gayat u ai, yupsu yupma nga ai gumgai jan hpa tsun ai pyi atsawm ndum ai, Ma Li Ya shat sha la nna hkawm mat wa sai ngu sha htan nu ai. Nhoi htoi sayang she myet ngu nayi hkying hkum mi dang lu yup yang, yupmang hkrai bai mu, yupmang hta Ma Li Ya ashep alap sai hkrai re hkungran palawng hpun tawn ai mu nna, dum wa ai hte masin gahpra htukhtak nga sai, kaning nga tim Ma Li Ya galang bai shi hpe kabai kau tawn da sai ngu myit la nu ai, ndai lang gaw prat tup, ndai dam lada ai, shi n nga ai mungkan hta kau da sai.

Lai wa sai manga ning laman, Ma Li Ya la masum kabai kau yu sai, dai kaw Sa Htu Anaw mung lawm nga ai. Shan chye hkat ai shata kru du ai hpang, Ma Li Ya shi hpe Mawsigaw myu kaw kabai kau da ai hkrum yu ai. Dai shaloi, shan Ansulwisi shara na rai marai tawn ai gawk kaw tsawra marit tun let ndum ndam, gumpyi gumpai nga hkra yup sha ma ai. Lahpawt mi hta, kadai hpe n mai tsun dan ai baw shana na mu lagu galaw sha la ai hpang e, Ma Li Ya nta kawn rai mat wa sai, shi a rai ma hkra tawn da ai hta n-ga, shawng la hte na hkungran ta chyawp du hkra tawn kau da u ai, shakram langai ka da ai, wanglu wanglang re sumtsaw la-ing kaw shi kaning di n lu hkam sha nga sai da. Sa Htu Anaw gaw shi hpe shi a shawng la wa kaw wa mat ai shadu u ai, la dai gaw Ma Li Ya a lapran tsang jawng na jawngma manang re, shan sak naw gaji ai kawn lagu hkungran mat ma ai. Lahkawng ning daram jawm nga yu ai hpang Ma Li Ya la kaga a nhkan e jawngma manang wa hpe kabai kau da sai. Rai yang, Sa Htu Anaw myit shut nu ai, dai shaloi mung Ma Li Ya ganu gawa ni a nta de wa mat ai she re. Shi ja gumhpraw hte hkying ten ma ai hpe n tsun hkra hkan mu tam ai htawm, grai shagrit shanyem ai myit hte hpyi nyem u ai hta lai nna, shi pyi n lu hkan galaw shatup ai ga sadi ni du hkra jaw yu nu ai, raitim, Ma Li Ya galang mi myit dawdan kau sai majaw: "Sumtsaw sumra langai ngai gaw ngangkang galu ai, langai ngai gaw gadun ai." Ngu tsun ai sha n rai, "An a sumtsaw sumra gaw gadun ai." Nga ga ja ja hte tsun shakre kau ai gata hta Sa Htu Anaw htingnut mat sai. Shing rai laning mi jan zim mat ai hpang na hkrisamat jahpawt, brang la ni hkrai nga ai shi a shara de wa ai shaloi, Ma Li Ya dawdap na lahkum hta yup nga la sai, baw kaw ahtoi re nampan shanghkawng dagraw da, ahpraw wawp wawp galu law ai hkrungran palawng mung hpun da rai u ai.

Ma Li Ya shi a tengman ai lam ni hpe Sa Htu Anaw e tsun dan nu ai. Shi a la nhan wa gaw kasha n lu ai shingkra rai u ai, nawku jawng kaw hkungran poi galaw nna prat tup jau lup rau nga na hku myit da ai re, Ma Li Ya hkungran buhpun palawng mawn sumli la rai nawku jawng kaw du ai shaloi, shingkra la dai hpe n mu mada sai. Ganu gawa yan hkungran poi galaw shakre ra ai nga ai majaw, sharang let la nhan n lawm tim shi hkrai manaw manang ni hpe hkap shaga tau la rai, ginsup ka, htunghking mahkawn hkawn rai, tsa mung agying na nu ai, myit malai yawn n ra taw ai majaw, shana yuptung e Sa Htu Anaw hpang de sa wa ai re da. Sa Htu Anaw nta n nga ai raitim, chyinghka lam makau hku na nampan kawk gata na zawsi mu tam la nna hpaw shang wa u ai, shawng de shan galoi mung zawsi hpe dai kaw tawn da ma ai. Ndai lang gaw Ma Li Ya madu kawn hpa n tsun ai nhtang shang wa ai rai lu ai. "Ndai lang gade na hkra bai tsaw lu na kun?" Sa Htu Anaw san ai. "Sumtsaw sumra dingyang byin taw ai ten hta gaw tani htana mai ngu ai." Ma Li Ya gaw Wwi Ni Si Su • De Maw Lai Si a ga shagawp hte htan u ai. Lahkawng ning lai mat wa sai, shan a sumtsaw sumra dingyang ngangkang taw nga ai. Ma Li Ya myitsu mat ai zawn rai sai. Shi datshin pya sha na n myit mat nu ai, myit lawm lawm hte magam bungli gunhpai ai hta n-ga, yup ku na mu kawn hpawn, madu hpe Sa Htu Anaw e ap kau nu ai.

Maning na shaning htum wa de, shan Hpwihpyi ni-ang kaw myawkle pya poi sa lawm la nna nhtang wa ai shaloi, Pasailawna myu hku lai wa hkrup ai majaw, myu dai hpe yu sharawng mat nu ai. Shing rai, shan Auahta gat lawk kaw nta langai mari la rai, grai ngwi pyaw ai hte shata 8 nga lai wa sai. Myu lawk garu gara nga ai hta lai nna, chyinghka lam kaba mung n rawng ai raitim, ma marai manga gaw lu rawng na tai ai. Shan a matu nga yang, ndai mung ngwi pyaw gabu hpa lam rai nga malu ai, dai laban shani Ma Li Ya mawdaw langai shap gawt rai Salagasa de jinghku sa gawan na nga rai mat wa u ai, laban langai ya shana de hkying sanit a shawng e nta de bai nhtang du wa na nga tsun da ai. Laban bat mali ya jahpawt hkying mali du tim, Ma Li Ya a shiga gachyi mi pyi n lu nga ai. Matut nna dai laban langai ya hta, shap la ai mawdaw dai a ama hkam rung ni nta de chyenan gayat dat nna Ma Li Ya hpe san pru ma ai. "Ngai hpa mung n chye ai." Sa Htu Anaw gaw: "Salagasa de sa tam mu." Ngu chyenan tawn kau nu ai. Laban bat mi a hpang, balik la langai nta de tam pru wa ra ai, shi hpe mawdaw mu tam sai, raitim masha ni e lagu hpya kau nna, Kyadisi myu hte loi ni ai hka kau kaw kabai da ma ai nga sa tsun dan u ai, dai shara gaw Ma Li Ya mawdaw ruk byin mat nhtawm, tawn kau da ai shara hte deng jahku gang ai shara kaw rai nga ai.

Balik wa ndai mawdaw lagu ai amu lamang a lam hpe Ma Li Ya gade wa chye ai kun nga san mayu nu ai re gaw, Sa Htu Anaw nyau shat jaw let baw pyi n sharawt ai, ndai kaw ten hkum shama nga sa, ngai a madu jan nta kawn pru mat wa sai, kadai hte gara hkan nga hkawm nga ai hpe shi mung n chye ai, ya ganang kaw rai nga ai mung n chye ai ngu tsun gama jaw nu ai. Sa Htu Anaw a laikyang manawng nsam a majaw, balik wa mahtang gade n yawng ai zawn nga yak mat u ai, shi a ga san a matu tawngban kau da nhtawm hkawm mat wa sai, amu lamang dai a lam hpe n shakre ai dai hku tawn kau masai. Ma Li Ya galang bai shi hpe kabai kau da na zawn nawn ai myit gaw Hkada kesi myu kaw hkrisamat shawng shana na prawn poi na masa hpe dum dat nna akajawng sha gan myit tak ai rai nga ai. Dai shaloi, Lawsa • Lwi Kya Si shanhte hpe sanghpaw gawt nna panglai de sa woi chyai ai. Anhte "Panglai lam hkawm ai ni" ngu ai tsa seng kaw dung chyai let tsa lu ga ai, dai shara gaw Hpulangge nnan uphkang ai ten hta kunghpan pai maga hpung ni hte hpaji maka masha ni zup ai shara rai nga ai, shara matsut matsat re hta n-ga, matsat shabat rai nga ai. Saboi lahkum ma hkra gaw hpri hte shachyaw galaw ai hkrai re, marai kru dung law sha re shara kaw, anhte marai hkun ting jawm shachyat dung nga saga ai. Dai shani na malut htuk lahkawng lu ma ai htawm, Ma Li Ya wanhkrat ma mat sai hpe mu nu ai. Dai ten hta, ta langai mi garu gara gaming gamawng re saboi ntsa hku nna wanhkrat ladawn dat ya sai. Lasi grawmgrawm woimun tsungtsung re ta kaw magri lahkawn langai naw hkawn da nga ai. Ma Li Ya yu pyi n yu ai wanhkrat hkap la let chyeju kaba sai sha nga tsun u ai, rai yang Sa Htu Anaw atsawm sha yu la nu ai. La dai gaw nhka mun pyi rai n tu ai brangji kasha rai nga ai, lasi grawmgrawm rai, myiman nsam asit baba raitim, kara gaw grai chyang u ai, shingdu de gyit majaw tawn ai kara gaw nshang she du nga ai.

Htingra bungga tsa seng na pat ni hpe ganyi ganga rai hkra bung ahpawt da ai ten hta, la sha dai hkum ting wang wang re buhpun palawng hte mazut mazat rai na zawn re gyepdin sha din da u ai. Shanhte galang bai hkrum ai shaloi gaw htingra ta htum wa de rai nga ai, Pasailawna myu mare na panglai lu sha seng kaw rai nga ai, la sha dai dingyang shawng de na zawn awung awang re buhpun palawng sumraw da u ai, ndai lang kara hpe galu law hkri dumpyang da nu ai. Shi gaw galoi mung chye hkat ai manaw manang shada zawn shan hpe shaga u ai. La kasha dai Ma Li Ya hpe pup ai kumla masa hte Ma Li Ya shi hpe htang ai lai kumla ni, Sa Htu Anaw akajawng sha shan hpe dingyang na lagu pran ntsen shadu na zawn rai nga ai. Hpang e, Sa Htu Anaw gaw Ma Li Ya nta na chyenan matsing buk kaw ka da ai masha mying ningnan hte chyenan nambat hpe mu nu ai, manawn masham matsan mayan n chye dum ai n tsen myit e shi hpe dai gaw kadai re hpe chye la shangun nu ai. Shan a lapran hta sumprat tai nga dum ai masha dai a hpawng shingra masa grau nna shi hpe pawt jahtau hkindit na zawn ngu nga sai: sak 22, lu su nta na la sha shingtai, dum nta hkalap satsawm jahtap sama hpaji sara, yawng chye ai masha chyahkraw naw re hta n-ga, dinghku num ni hpe hkrai tam gasup ai "Wa hkyem" bai naw rai nga ai.

Raitim, shi dingyang hkam sharang nga u ai, Ma Li Ya kawn saw shaga ai dai shana du hkra sharang sai. Shi shani shagu chyenan dai gayat bang wa nu ai, nnan daw e hkying hkum masum dang kaw galang gayat, jahpawt hkying kru kawn hpang jahpawt du hkra gayat, jahtum e gaw makau kaw chyenan taw ai sha mu jang, nhkring nsa htim gayat yat rai nu ai. Chyenan hta ai masha n nga magang, salum wan hkru magang rai nga nu ai. Mali ya ngu na shani, nsen kaga nga ai num langai chyenan hta madat sai, shi gaw dun sa ye ai sha re nga tsun let, "Shauye shinggan pru wa sai." Nga u ai. Num dai a maum maa nga ai ga hpe na nna, grau mana bu na zawn ngu nga ai. Sa Htu Anaw ndang sharang wa ai majaw, Ma Li Ya mung n nga taw ai n rai, ngu san dat nu ai. "Ndai kaw hpa baw Ma Li Ya ngu ai num mung n nga ai." Num dai htan let, "Shauye gaw shabrang she naw re." Nga htan u ai. "Ngai chye ai" ngu let, "Shi dai kaw n yup tim, galang lang sa wa wa re n re ni?" Ngu bai san dat sai. Num dai grang marawn let: "Lasa si na, nang kadai re?" Nga hta wa sai. Sa Htu Anaw chyenan tawn kau sai. Num dai a ningdang ga kawn grau shi ntsen ai lam ni ma hkra gaw teng man ai mabyin masa hku she shadu la nga nu ai.

Shi kaning di nan n lu sharang mat nu ai. Shing rai, matut nna lahkawng masum ya ting, chyenan hpe laika ganu npawt sharawt la hkra rai, Pasailawna kaw na chye ai masha ni yawng hpe Ma Li Ya nang kaw n nga a ni ngu langai hte langai hpe chyenan gayat san ya u ai. Kadai mung shi myit ai hku n myit nga ai, shingrai chyenan gayat shagu shi hpe grau nna nga yak shangun nga ai. Ndai nsin nhtoi n ginhka ai pyaw chyai chye ai kunghpan pai hpung ni gaw Sa Htu Anaw galoi mung masha hpe n tsen ai kyang rawng ai hpe chye da ai majaw, chyenan mu hta ai ni yawng gaw shi hpe mahtang nhtang de bai shala asang chyai ai hkrum hkrum rai, shi grau nna nga yak u ai. Ya she, ndai tsawmhtap ai, wanglu wanglang re, kadai kaning ngu nan n chye tsun ai myu hta, shi gaw gade daram matsan mayan, garen gari hkrum nga ai hpe myit dum nna, ndai kaw shi prat tup raitim simsa nga pyaw lu na lam n nga ai hpe chye nu ai. Shing rai, jahpawt jau jau, nta na nyau hpe shat jaw kau ai hpang, chyat machyi nga ai sinda kaw ta hte dip da rai, Ma Li Ya hpe malap kau na hku myit da-ting kau nu ai. Sai hten tsirung kaw du shang mat wa ai aten shata lahkawng rai wa tim, Ma Li Ya dai shara hta nga rai n man nga nu ai. Shani shagu na lu sha mung hkyuk htawng na zawn yawm la nga ai, shat sha lang ai bagan zun ni yawng hpe hpun hte shachyaw ai saboi galu kaw hpri sinyu hte gyit dun kau nga ai. Shat sha ai shaloi Fulang Ge hpyendu wa a sumla hpe sha mai azi yu ai, shi gaw ndai agatsi nyip nyip nga ai shat sha shara na madu rai nga ai.

Nnan daw e shani shanang na mana mu zawn re makam masham kyu hpyi lamang hpe Ma Li Ya grai n kam lawm nga ai: Manap kyu hpyi, shakawn kungdawn, shana de na kyu hpyi re ni hte kaga makam masham lamang ndai ni, lani mi na aten hpe ganoi shama kau nga ai. Bawlung pa kaw bawlung n kam gasup nang ai hta n- ga, nampan atu galaw ai mu mung n kam galaw nang u ai, kaga myit ana lu ai num manang ni gaw grai myit lawm kyetshawp ai hte galaw shajang ma ai. Raitim, laban bat masum ngu na hpang kawn, Ma Li Ya gaungwi ngwi rai, sai hten ana rung kaw nga man wa nu ai. Tsi sara ni tsun ai hte maren, yawng mayawng gaw shing rai hpang wa ai hkrai re, galoi mi rai rai, jahtum e ndai pung kaw shang na chyalu sha rai nga ai. Malut a lam hta, nan e Ma Li Ya gaw shanhte hpe yu sin ai num langai kaw manu grai grai hpu ai mari lu u ai, rai yang hkum kaw gun tawn ai gumhpraw gachyi mi dai jai lang ma ai kawn, malut kut nna bai chyum nga sanu ai. Myit ana lu ai machyi masha kau mi maza mala bum hkan na malut daw ni hta la rai, madu hkrai shi laika maisau hte gayawm lu ai hpe yu la nhtawm, hpang e madu mung shingdi n- gup masu u ai, pa majaw nga yang, shi malut lu mayu ai myit hte chyenan hpe shani shana myit marit mada ai lam maren sha rai nga ai. Hpang e, nampan atu galaw nna lu ai gumhpraw gaji kajaw mung chyahkring chyahkra malut kut ai tanglawt mai shalai nga lu ai. Grau nna n lu hkam sha ai gaw garen gari nga ai shana rai sai. Masha law malaw shi hte maren, asin amun nga ai ningsin gata kaw hprang nga ma ai raitim, kadai mung shamu shamawt n rai gwi nga ai, hpa majaw nga yang, hpri zawsi hte sinyu gyit la tawn ai chyinghka lam kaw, shana mung masha sin nga ai.

Rai yang. lani mi na lana mi hta, Ma Li Ya krawdung salum na dip da n lu ai ayawn a majaw, makau na jan hpe yat sha: "Anhte ganang kaw nga nga a?" Ngu gahte san u ai. Ku makau na jan ali wuwu nga ai sinlai yuhku hte: "Grai sung ai ngarai di gata kaw rai nga ai." Ngu htan sai. "Tsun ma yang ndai kaw gaw Mawa masha ni a shara re da." (Labau hta Saping a dingdung Ahprigga dan de nyen shang wa ai Yisilan jau hpung ni) Tsan tsan de nna shaga pru wa ai nsen langai, nhku ting hpungtang kashaw nga ai, "Dai gaw teng na re, yinam ta shata jan mai ai shana, panglai makau hkan gwi wau ai nsen na ai." Chyinghka lam de hpri sin- yu chyinghka na zaw kaw ahtu ai nsen gaw, sumpan li kaba rawt hkyem ai shaloi na zawn nga ai hte, chyinghka akajawng sha hpawng rai sai. Yu sin ai num jan yup gawk ting yu hkawm nga nu ai, nbang kawn npan hkren azi hkawm nga sai. Agatsi zim nga wa ai ai ten hta, Ma Li Ya gaw mungkan hta shi hkrai sak hkrung nga ai zawn ngu hkrit gari taw nga ai, hpa majaw hkrit ai gaw shi hkrai sha chye nga lu ai. Myit ana tsirung kaw du shang wa ai laban bat kawn, shana shanhte hpe sin ai num dai amying hku nna Ma Li Ya hpe mu htam gawk kaw yup saw u ai. Nnan e gaw galai gachyai ai lam naw nga nga ai: Ma Li Ya sha shi a tsawra myit hpe hkap la nga yang, malut, hkyau hkeli htang, hpa rai tim mai lu sha ai. "Nang hpa mung lu na ra ai," gari gawa nga ai nsen hte: "Nang hkawhkam jan zawn rai na ra ai." Nga tsun ai ga hpe Ma Li Ya e htawnglawng ladi ntawn pyi n sharat ya ai majaw, yu sin num dai ladat bai galai nu ai.

Ma Li Ya a bunghkum gata, shana yup yang hpun ai palawng sumbu gata hkan, kadai mung ndum nmi ai shara hkan maisau pa hta laika ka nna, shi a tsawra myit hpe tsun shadan nga u ai. Sumtsaw laika hta tsun ai ga ni akrin akru nshung si hte prwi hprwi nga ai ga ni hkrai rai nga ai. Dai shana yup gawk hta manghkang mu pru ai ten du hkra, shata mi jan gaw, num dai sumtsaw mahtai n lu nha sum hkam ai zawn rai nu ai. Yawng yup mat sai hpang, yu sin num dai Ma Li Ya a yup ku makau de sa wa nhtawm, yat sha Ma Li Ya a na makau kaw anya shala nga ai ga amyu myu tsun gahte let, hkrit nna ja preng nga ai du, shabyi, lahpum, labawp hkan apup ya nga sai. Jahtum e, num dai gaw Ma Li Ya hkrit nna shamu shamawt n wam ai hpe, pyaw sham taw nga ai shadu jaw ai, grau ladu lanang lai wa ai majaw, Ma Li Ya e rawt ahtwi dat ai hkrum in, num dai yup ku makau yang kaw agrawp mat wa nu ai. Rawt gabrawng mawng shinggrup jawng nga ai machyi masha ni a gaang kaw, num dai gaya pawt pawt let rawt wa ra ai. "Hpaze num e rem kaba ai jan!" Nga makan let: "Anhte yawng ndai wa lawng kaw yat si rawng nga na rai nga ai, nang ngai a majaw sai hten hkra." Nga hpawt pru mat wa sai. Shata kru na nambat langai laban shani, lanam ta agatsi sha du ra ai.

Sai hten tsirung kaw kajawng kaja re mu gan pru nga sai. Myit ana lu ai masha ni gahtet sa-ut ai hpe n dang hkam sharang wa nna, kyu hpyi nga ai shaloi, langai hte langai rai hkum kawn lagaw lahtaw du galu ai palawng raw kabai kau bang wa masai. Myit ana lu ai masha ni hpe yu sin gawnhkang masha ni e hkan gawt shachyut ai majaw, myi n mu ai uhkai kasha ni zawn gawk shagu mawng ganawng hkawm jawng nga masai. Ma Li Ya yu mau nga nu ai, shi hpe ahtu ahta rai ganawng gumpye n hkra na matu, le yen waw yen rai shingjut shingnaw hkan htawt hprawng makoi gyem hkawm nga nu ai. Kaning rai nna mi re, madu hkrai n lang mat sai rung gawk langai kaw nga nga la sai, makau na chyenan langai dingyang ngoi taw nga ai, chyenan nsen dai mung hpyi shawn ai zawn nga hkra ngoi dingyang rai nga ai. Ma Li Ya myit pyi n gadawn ai galang ta hta madat dat nu ai, tsem tsem nga ai nsen langai mi gaw mani sharang let ahkying aten hti shana dan ai zawn: "Ya gaw hkying 45 e manit 92 e sengkan 107 rai sai." Nga nga ai. "Sai hten!" Ma Li Ya grang dat nu ai. Chyenan tawn kau ai hpang she gasup chyai ai zawn nawn nga nu ai. Hkawm mat wa hkyem ai shaloi, akajawng sha madu chyenan gayat na ginjang kaja ganoi lahpawt kau ai hpe gan myit dum dat ai hte, tin shapun ma ma ngu let chyenan nambat kru dip shapraw kau dat nu ai, nambat dai ni madu a nta na re n re pyi n dang chye nu ai.

La dingda taw ai masin salum gaw jahkraw kaw du hkra gumlawt pru wa ai zawn nga nga sai, loi lawan lawan nga nha yawn yawn nga ai chyenan nsen ni galang, lahkawng, masum lang bat nha ngoi ai hpang, shi a sak hkrung ten hta na la wa a nsen hpe na lu sai, shi hkrai garen gari hte shi n nga ai dum nta kaw nga nga ai. "Hkam ja nga nni?" Chyahkring na lapran matsut pru wa ai myiprwi si ni a majaw, jahkraw ja mat rai, gan hkring la ra mat sai. "Tsawra ai, brangtai kasha." Nga nsa galang bai shaw la nhtawm shaga matut dat nu ai. Myiprwi si raw she rai hkrat wa sai. Chyenan hta madat ai Sa Htu Anaw kajawng nna loi hkring re hpang, nhprang wan gapaw ai zawn nga ga lahkun mi makan shapraw dat nu ai. "Gwi ganu!" Chyenan hkrawk nga hkra tawn kau nu ai. Dai shana. Ma Li Ya sai hten ai zawn mana galang bu la nu ai. Shat gawk kaw kap ai hkawhkam wa a sumla hpe amya di la nhtawm, rawng marawng n-gun ma hkra hte nampan sun maga de na hkalap pat de kabai agrawp kau dat ai hpang, hkum ting sai hkrai hkrai rai ga kaw hpum hkalwi shanawng taw nga nu ai. Pawt mayu ai myit rai n kawp ai majaw, shi hpe dip gamu rim ai ni e lagaw hte htawng, lata hte ahtwi rai tim, shanhte hte naw htek ganawng hkat nga ai, Hehkyu Li chyinghka lam kaw ta lahpum lahkawng sha ahpum ginsu kau rai shi hpe sa tsap yu nga ai mu dat jang she, shi kawn sum hkam mat nu ai. Raitim shanhte gaw Ma Li Ya hpe myit gatu lak ai machyi masha gawk de garawt dun hkrat wa nna, pyun hte hkum hkan hka lagyi jaw bun rai, jaw lagyaw mana tawn nhtawm, labawp kaw marau sau htu bang ya ma ai, marau sau htu ai ningma hka hpye yat rai Ma Li Ya hpe lam n mai hkawm shangun nga sai. Ma Li Ya myit hprang sai, ngarai ginra ndai kawn sha lawt lu na rai yang, n galaw gwi na lam hpa n nga nga ai.

Matut nna dai laban kawn, Ma Li Ya shawa yup gawk de nhtang wa ai hpang, yat yat sha shana shanhte hpe sin ai Hehkyu Li a chyinghka dinggrang hpe gang malaw kau nna hpaw shang wa wa rai nu ai. Ma Li Ya gaw shanhte hpe yu sin ai num dai jan hpe madu wa Sa Htu Anaw hpe ga lahkun mi shana ya na hku tsun gadi tawn sai. Gun ja num mung wawm htan ya nu ai, ahkyak madung gaw mu dai grai shim ra ai nga, Ma Li Ya ta layung hte Hehkyu Li gun ja jan hpe madi tawn let: "Masha ni sha naw chye kau yu u ga, shaloi nang gaw si chyalu sha re." Ngu sadi jaw u ai. Laban bat kru ya shani, Sa Htu Anaw myit ana sirung de du pru ra ai. Ginsup pya mawdaw hpe aningnan di satsawm kau rai, Ma Li Ya hpe hkap tau la na myit nga ai.Tsirung sara wun ningbaw wa shi a rung gawk kaw Sa Htu Anaw hpe hkap woi dung u ai. Rung gawk dai grai sanseng ai hta n- ga hpyen sanghpaw daram dam kaba nga ai. Sara wun Sa Htu Anaw hpe Ma Li Ya a lam tsun dan nga u ai. Kadai mung shi ganang nha sa wa ai, kaning rai sa wa ai, galoi sa wa ai hpe n chye ai. Shi hte seng ai rai ni pyi tsirung kaw shang ai hpang shi hpe nan san jahkrup nna ka matsing da ai hkrai re. Dai shani jep sagawn yu tim, hpa matu n mu sagawn shapraw nga ai.

Rung ningbaw wa gaw Sa Htu Anaw hpe kadai e madu jan ndai kaw nga ai lam tsun dan ai kun ngu mau nga nu ai. Sa Htu Anaw mung tengman ai lam n tsun dan u ai. "Mawdaw dai a ama hkam rung na ni ngai hpe tsun dan ai re." Sha ngu htan masu sai. Rung ningbaw wa kam tim n kam tim ga htan dai hpe hkap la nu ai majaw, "Ama hkam rung ni n chye ai hpa n nga nga ai." Nga tsun let, asan awan re rung gawk saboi ntsa kaw mara taw ai rung laika ni hpe yu nhtawm, tsun u ai: "Shi ana grai nan laja nga ai." Rung ningbaw wa gaw Sa Htu Anaw hpe shi sha kam yang, tsirung de Ma Li Ya hpe galoi mung sa mai gawan ai, raitim, Ma Li Ya asai bai hten wa na hpe hpang maja ra ai, grau nna Ma Li Ya a hkamja lam hta myit tau ya ra ai majaw, rung du wa matsun ai hku hkan shatup ra ai nga tsun u ai, ndai lapran grau nna ru nga ai, shing rai, grai maja ra ai nga u ai. "Mau hpa she rai sai, " Sa Htu Anaw matut nna tsun ai: "Shi kyang gade htat ai nga tim, masat masa gaw chye ai, madu a masin hpe shi madu lu dip da ai." "Lai kyang nkau gaw shaning na na makoi up taw nhtawm, lani mi na nhtoi hta akajawng sha chye awk ai." Rung du wa tsi sara wun kaba ni a lai nsam lang kau hkra rai tsun ai, "Kaning rai tim, shi a matu nga yang, n myit madawm ai ndai tsirung de du shang wa ai gaw akam she rai taw nga sai, hpa majaw nga yang, ladat ja ja hte yu gawn tsi lajang na gaw anhte a laksan hpaji rai nga ai." hpang jahtum, rung du wa Sa Htu Anaw hpe Ma Li Ya mau na zawn rai chyenan hpe myit grai jung kap ai nga tsun shadum nu ai. "Mai byin ai daram shi ra ai hku hkan ya gaw e." "Hpa n tsang ra ai, sara." Sa Htu Anaw mung myit asan nga ai manawng hte, "Dai gaw ngai a laksak hpaji re." Ngu htan nu ai.

Gawan gatsan hkrum shaga gawk shawng de gaw jau hpung ni a dawdap rai nga ai, hkyuk htawng zawn rai ai hta n- ga, myit shakru malai shara zawn mung rai nga ai. Sa Htu Anaw hkawm shang wa nu ai, shan lahkawng kadai mung shan myit da ai daram n gabu awlaw nga ai. Ma Li Ya nhku gaang kaw tsap taw nga u ai, makau kaw saboi langai hte lahkum lahkawng tawn da nna, saboi ntsa kaw nampan bu gaman langai ma dung nga ai. Yu yang Ma Li Ya ndai shara kawn rai mat wa na hpe hkyem da nu ai, hkum kaw hpun da ai nsam tsit mang re palawng kaba chyaje hte abyak shalak matsat shabat re zauhkai pyi gaw manaw manang ni tsawra myit hte jaw ai rai nga ai. Mu nmu re shingjut kaw Hehkyu Li ta lahpum ahpum kau rai tsap nga ai. Ma Li Ya gaw madu wa shang wa ai mu tim, shamu shamawt n rai ai hta n- ga, gabu myiman nsam gachyi mi pyi n rawng u ai, myiman hkan ma ni na pat chyen hte mahkret jahpye la ai hka ni hkrai naw rai nga ai. Shan lahkawng ana shaprai rai majoi sha shabyi jawm gahtep let ahpum pup hkat la manu ai. "Nang madat yu yang kaning nga wa sa?" Sa Htu Anaw san ai. "Nang lu du sa wa ai majaw grai gabu ai, brangtai kasha." Ma Li Ya bai tsun ai, "Ndai kaw nga nga na matu gaw si mat tim grau kaja ai."

Shan dung nga let jawm shaga na ten n lu nga ai. Ma Li Ya myiprwi si hte pya rai hkrap let, sai hten tsirung kaw nni nkri hkam sha ai lam hpe tsun shali nga nu ai: Yu sin masha ni a dusat lai kyang masa, gwi shat daram pyi n mu ai malu masha, myit ru hkrit tsang nna shana ting ting n gwi yup ai. "Ngai ndai kaw gade na hkra nga wa sai hpe n chye mat ni ai, shata gade, shing nai gade ning, raitim shani shagu gaw shawng shani na hta grau nha nga yak, hkam sha yak ai hpe chye da nngai." Ma Li Ya nsa kaba shaw la nhtawm bai tsun ai, "Ngai ngu yang, ngai gaw prat tup shawng de na ngai n mai tai lu na ni ai." "Ya gaw hpa mung lai mat wa sai." Sa Htu Anaw layung nchyen hte Ma Li Ya a man na ningma ni hpe yat yat sha masawp ya let, "Hpang de ngai laban kru ya shagu, nang hpe sa gawan wan rai na ngai, rung du wa sha ahkang jaw yang, shani shanang tim sa mai ai. Hpa mung mai kaja wa na ra ai, ntsang ra ai." Nga myit shapyaw ya u ai. Ma Li Ya kajawng kaja rai shi hpe yu azi taw nga sai. Sa Htu Anaw myawkle pya ladat lang let, hpa n chye ai ma gaji ni hpe masu chyai ai zawn nga ai ga manawng hte Ma Li Ya hpe masu hkalem in, tsi sara ni jep shapraw ai ana htawn tsun dan rai u ai. "Hpa mi nga tim," Nga tsun let jahtum e, "Nang loi ya mi naw rawng ra ai, shaloi she mai tsai hkamja na ra ai." Nga tsun ai hte, Ma Li Ya hpa mung ma chye na kau sai. "Garai e, brangtai kasha!" Ma Li Ya myi shagan tawn nha: "Nang mung ngai hpe sai hten ai hkum shadu!" Ngu rawt jahtau dat nu ai. "N rai law." Sa Htu Anaw mani sum rai, "Lama nang ndai kaw loiya mi naw rawng lu yang, yawng a matu akyu nga ai. Bai nna, ra mara ya na hta grau mai " na re. "Nang hpe tsun dan sangai le, ngai ndai kaw chyenan shang gayat ngu nha shang wa ai sha re!" Nga Ma Li Ya tsun u ai.

Ma Li Ya tik tik nga tsun shati nga jang, Sa Htu Anaw kaning n chye ngu mat ai majaw, Hehkyu Li hpang de mada dat jang, yu sin masha Hehkyu Li gaw ta lahpum na nayi madi dan let, shi hpe aten du sai ngu kumla madun dat masu nu ai. Sa Htu Anaw a myisai hpe yu shapraw dat ai Ma Li Ya gaw, shingdu de gayin yu dat yang, Hehkyu Li htim hkyem hkyem rai nga ai hpe mu dat ai hte, galang ta madu wa a lawngdu kaw magra tawn nna, teng sha mana sai hten ai masha zawn jahtau marawn matsa bu bang wa nu ai. Sa Htu Anaw yat sha Ma Li Ya hpe ganawng di kau dat ai hte, Hehkyu Li e shingdu de nna kam ai hku ga kaw gamu dip tawn da sai, Ma Li Ya dum dat ai shawng e shi a pai ta hta lahtik shachya nga la ai hta n-ga, hpri zawn re ta lahpum langai mung shi a du kaw gawai ahkyen tawn nga la sai. Matut nna Hehkyu Li: "Lawan hprawng u!" Nga marawn dat sai. Sa Htu Anaw kajawng kaja rai let hprawng mat wa sanu ai. Bai du ai laban bat kru hta, ma ni na lang sa jahkrum ai shaloi kajawng hkrum ai kawn, bai bran wa ai Sa Htu Anaw gaw galang bai myit ana tsirung de sa wa nu ai. Ndai lang shi nta na lanyau hpe mung woi hkrat wa u ai, lanyau dai hpun ai palawng mung shi hte maren, ahkye ahtoi nsam gayau gaya re palawng hpun shachyat tawn nhtawm, bawchyawp tsaw tsaw rawng rawng re chyawp da rai, hpyen rawt hkyem ai zawn rai nga ai. Sa Htu Anaw zat pya mawdaw hpe galang ta tsirung wang gata de gawt bang wa nhtawm, nayi hkying hkum masum dang wang gata kaw myawkle pya madun dan u ai.

Ma Li Ya hta lai nna, machyi masha ni yawng gaw punra de kagat pru hkrat wa nna sa yu ai hkrai rai nga ai, ya n ya gachyaw gachya nga marawn dat dat re hta lai nna, ten n tam ai galoi kam yang galoi la-hpawk dum marawn gabu awlaw nga ma ai. Ma Li Ya shi hpe n kam hkrum ai sha nrai, shinggan punra kawn myisai hku hte pyi n kam sa yu nu ai majaw, Sa Htu Anaw a masin kaw nshi hte galun ya ai zawn ngu machyi nga nu ai. "Ndai gaw grai laklai ai kumla rai nga ai." Rung du wa Sa Htu Anaw hpe, " Lai mat wa chye ai." Nga myit shapyaw ya u ai. Rai yang, n mai byin nga ai, gade lang sa gawan yu yang, Ma Li Ya madu wa hpe n kam sa pru jahkrum mat nu ai, kaning n chye di hpang e Sa Htu Anaw shakram bai ka ya yu tim gaman lila sha arai nga sai. Mali lang ngu na shagun yu, shagu lang, ga lahkun mi pyi nhtang ai, shakram laika mi na raw raw bai nhang pru wa wa rai nga ai. Sa Htu Anaw rap di tawn kau nu ai, raitim, aten man man myit ana tsirung chyinghka lam kaba kaw malut sa tawn da ya ya rai u ai, Ma Li Ya lu la n lu la gaw shi mung n chye sai. Mabyin masa man na lam a majaw shi asum hkam mat nu ai. Hpang e, Sa Htu Anaw kaning rai sai hpe kadai mung n chye nga ai, num bai la nha, shi a mungdan de nhang wa mat sai nga tsun ma ai.

Pasailawna kawn rai mat wa na shawng e, nsa pyi lau hti sai zawn re lanyau hpe shi a chyahkring chyahkra na sumtsaw jan hpe tawn da ya nu ai, num dai lanyau rem ya ai hta lai nha, Ma Li Ya hpe dingyang malut sa sa ya ya rai na matu mung wawm la u ai, rai yang, jahtum e num dai du hkra mat mat sai. Lawsa • Lwi Kya Si gaw 12 ning a shawng e Ingelesi gat seng kaba kaw num dai hpe galang mi hkrum yu ai nga, shaloi num dai baw kara adum kau rai, sinpraw de na makam masham masha ni hpun ai baw ahtoi re palawng galu hpun tawn u ai, ma hkum rai ai majaw kan loi lum lum rai kaba nga ai. Num dai Lwi Kya Si hpe tsun dan ai, rau ai ten hta dingyang malut sa sa ya ya rai u ai, chyahkring chyahkra kajawng kaja rai pru ai mu du hkra, shi mai byin ai daram Ma Li Ya hpe garum la u ai nga, pang e myit ana tsirung htinghput htingra dingsa tai mat ai shani, sin nyip hkrit na zawn re prat hta na htingra chyahten chyabyak zawn di gawt kabai kau manu ai da. Shan hpang jahtum hkrum ai shaloi, Ma Li Ya azet atsang asan awan rai ai hta n- ga, ahpum asau rai, myit ana tsirung kaw azim sha rai nga lu ai hpe myit dik ai zawn rai nga ai. Dai shani shi lanyau woi hkrat wa nu ai, hpa majaw nga yang, Sa Htu Anaw tawn da ya ai lanyau shat gumhpraw lang ma kau sai. 1987 ning shata 4 Gale ai: Bawk Tawng