TSAW KANAU

TSAW KANAU

Gareng Gun Awng

"Ngai... N tsawra ai shayi hte ngai rau nga ra kaning ndi, moi moi na tsaw ganau hpe dum ai..." 2016 ning Mangshi mare kaw Jinghpaw Wunpawng sha ni galaw ai, mungkan manau hte Jinghpaw laili laika lu ai 120 hpring masat poi shani, Mangshi mare na lu sha seng kaba langai kaw, palawng lawnghpraw hpun nna nsam ahtoi re Hka hku bunghkaw hkaw da, achyang re sumpan labu htawnglawng kaba hpe pai di bu kau rai, hkumngau gaw galu kaba, hpraw nsam maw hkye re Zau Myu hte Naw Lat shat sha nga yang, ngoi pru wa ai mahkawn a majaw, mahkawn madat let, mau nga ai asak 40 jan re Zau Myu hpe Naw Lat mu nna: "Hkau Zau, gara hku ta? Grai mau nga ai le, moi na lam ni hpe mahkawn hte rau bai hkam sha nga ai i?" "Re, hkau Naw, ngai malap kau na gade myit tim, n mai malap hkraw ai." Ndai lang mung Naw Lat hte Zau Myu yan jahkrum la nna sa ai poi rai nga malu ai. Naw Lat shat mai hpe hkoize hte lakap sha let: "Um, na lam mung malap kau mai na zawn mung n rai nga ai, goi, nang pyi hkum tsun, ngai pyi dai mahkawn na shagu nan a lam hpe chyu dum wa wa re."

Zau Myu lu nga ai sabyi tsa hpe .lu shakre kau let: "Hkau Naw, na dinghku lam gaw pyaw nga mani? "Zeng sha re, nan lahkawng gaw taw?" "Um, An yan mung zeng gaw e." "Zeng hkum nga, ya hte ndai poi de lung wa na shawng shani sha ngai Seng Lu hpe san yu sai, nang maga hku na Seng Lu a ntsa, tsawra myit loi mi hkalut ai zawn nga ai na ai re lu." "Hkau Naw e, nang mara shagun tim ngai hkam la ra sai ga rai nga ai. Nye masin salum hta galang sha prut pru wa ai tsawra myit hpe gam maka e mayut jahkrat kau ya sai, um... Raitim, Seng Lu gaw nye ntsa nau wa hpyau hkra chye myit ya ai majaw, shi ntsa matsan dum ai hte sha tsawra nga ai re." Naw Lat lama mi sawn dum ai nsam hte: "Gai gai ga shaga taw ai pyi grai na sai, hpaw poi lamang pyi du na hkyem sai, wa saga, manang ni la jin na, manau wang tsan ai hte hkawm saga." Poi wang de sa wa ai lam hta Naw Lat gaw: "Hkau Zau, na nu hte na ganau gaw gara kaw bai nga ma ai da i?" "Ngai hpang jahtum wa lu jahkrum da ai gaw Myitkyina Shata pru kaw nga ma ai, raitim ya gaw gara kaw nga ma ai n chye mat sai." Zau Myu hte Naw Lat yan poi hpaw hpawng lamang hta shang lawm nna, shan yan yup ai shara de bai nhtang du wa ai hpang, Zau Myu gaw yupku hta galeng let dai shani na shi na kau da ai mahkawn hpe, myit dum ai hte shi a myit shingran ni hta lai wa sai 20 ning na shi a mabyin ni hpe adum sha matsing nga lu ai. Dai lam ni gaw: 1996 ning, Myen mung a lawu maga Mandale kaw galaw ai Jinghpaw Wunpawng sha ni laili laika lu ai 100 ning hpring jaw poi hta ap nawng ramma hku nna, Zau Myu hte Naw Lat mung sa ap nawng nga lu ai, dai poi hta mungdan shagu na Jinghpaw Wunpawng myu sha ni hte ramma ni grai law ai hte sa du shang lawm nga ma ai.

Dai law la ai myu sha ni hta Ja Seng Ing mung Myitkyina ramma ni hku nna sa du shang lawm nga lu ai. Zau Myu gaw dai shani sa du ai manam ni hpe hkap tau la ai shara hta, manam tau nga yang, gawng shingyan galu kaba, kara galu yang yang rai madat da ai tsun shara n nga hkra tsawm htap la ai Wunpawng shayi sha langai hpe mu nna, Zau Myu gagat sa wa let: "Ah, Hkri gaw gara buga na rai kun?" Ngu sa shachyan dat nu ai. Dai shani law la ai masha ni hpe yu mau nga yang, Ja Seng Ing hpe akaw alaw nga sa shaga hkap tau la ai, tsawm shadang hta jan hkra tsawm htap la ai Wunpawng la sha langai sa du shaga wa ai majaw: "AWh... Seng ni gaw Jinghpaw mung Myitkyina de na sa wa ai re atsa." Ngu hkap htan nu ai Zau Myu lata shakram let: "Gara hku shaga ai baw re kun? Shaga mying gaw Zau Myu re, bawsang gaw Lahpai, Zi Lahpai rai nga ai." "Ngai na shaga mying gaw Ja Seng Ing nga ma ai, bawsang gaw Labang kasha re, htinggaw mying gaw Dumhpau ni re, daw ang ai hku shaga la rit." "Um Labang ni nga yang gaw gahkri gatsa ni she ang na re, tsa ba ngu gaw yaw."

Ja Seng Ing gaw Myitkyina kaw na manang ni kau da ai majaw, shi hkrai sa wa ai rai nga lu ai, dai majaw Ja Seng Ing mung shawng nnan du ai shani nan hkuhkau manang lu sai re majaw grai kabu ai hte: "Tsa ba gaw ndai buga na i?" "Nre, lawu Myen mung Yanggung de na she re, gai gai hpawt de hkan she bai hkrum chyai ga." Ngu tsun let Ja Seng Ing ni kringsa na shara de wa sa tawn nhtawm, manam tau shara de bai nhtang mat wa sanu ai. Jahpawt manap jau jau manam tau nga ai Zau Myu hpang de Ja Seng Ing sa wa ra ai. "Tsa ba." "AWh... Seng gara de law?" "Seng ndai Mandale de n du ga shi ai majaw, wam hkawm na kun ngu raitim Seng gara de mung n chye sa hkawm ai." "Seng ahkang jaw na nga yang tsa ba hkan sa ya na le... "She mai le tsa ba, Seng pyi naw tsa ba hpe n wam tsun nna chyum taw nga ai." "N ra ai gaw e Seng... Raitim ya gaw tsa ba rai n rau shi ai, daina maga de gaw rau sai, daina maga Seng hkyem da u le, tsa ba sa woi la na." Ja Seng Ing grai myit pyaw ai nsam hte: "Tsa ba, Seng la nga na yaw." Nga tsun kau da nna hkawm mat wa sai. Dai hku hte sha lani hte lani lai mat wa nna, bat mi ngu na lani mi hta, Zau Myu hka shin gawk e hka shin nga yang, shinggan na Naw Lat a nsen: "Hkau Zau, e...Hkau Zau!" Nga shaga pru ra ai. Hka shin gawk na Zau Myu gaw: "Dai ram ram marawn hkra hkra gaw hpa ahkyak wa sata?" "Nang na manang du nna gaw e." "AWh..., e e, Ja Seng Ing rai na re, jahkring mi naw ngu tsun ya rit." Zau Myu hka shin ngut ndawt labu palawng lawan ladan galai la nna, gawk nna pru wa nu ai.

"Gai Jinghpaw mung na tsawm shayi Ja Seng Ing daini gaw gara de bai sa mayu ai rai?" "Um... Tsa ba woi sa ai de hkan na." Dung punghkum e dung nna shi laika galam let Naw Lat gaw: "Um... Tsa ba, tsa ba nga shingran gaw mu nga nngai." "Hpa wa mi shingran mu nta Naw Lat e? " Naw Lat myi jut kabai masu su let: "Um n chye yang gaw yak sai, kam pyi n kam tsun ai, tsa ba nga na byin mat ai maumwi law she law." Naw Lat a malawng mala nga ai ga a majaw, Ja Seng Ing man ahkye rai mat salu ai hpe Zau Myu mu hkrup kau dat nna: "Mak tek, nang hpa mi sa tsun taw a? Seng hte agam hpa she rai sai, An yan gaw gahkri gatsa she re yaw." Naw Lat mani sha sum rai: "Um law, um law, Ngai tsun ai ga sha hkum malap kau, gahkri gatsa nga yang she u wa dusat yamnga mayat ai da. Ha ha..." Zau Myu gaw Naw Lat a akyang chye da ai majaw Seng hpe woi pru mat wa salu ai. "Tsa ba a manang gu bawk le, grai chye shala ai i?" "Re, Naw Lat mi gaw shi yu nna gaya ja ai ni hpe grau shala ai, Seng pyi pawt mayu mat na sai, tsa ba grai tawngban ai yaw." "Nra ai gaw e, dai mi gaw pawt ai baw mung n re wa mi, tsa ba mung shabrang, Seng mung mahkawn, masha ni gaw she shala mayu le." Zau Myu hte Ja Seng Ing shaga let hkawm mat wa ai gara de du ai pyi she n dum hkra myit lawm hkum lawm jahta chyai nga yang, agajawng sha "Aka law!" Nga shawng lam de ahtu gataw mat wa nna, Zau Myu hkan jum shadaw dat ai ngu yang, Ja Seng Ing a sinda kaw magra hkrup kau dat ai majaw, grai ana ai nsam hte Ja Seng Ing hpe yu ai shaloi, shan lahkawng shada yu hkat ai hkrum rai, jahkring mi na laman gan mu hkrup kau dat ai Ja Seng Ing a myitum gata na ga si ni hpe Zau Myu mu hti la kau ai zawn, Ja Seng Ing mung shi tsa ba a myit kraw lawang na ga ngau ni hpe hkam sha lu sanu ai.

"Gaja wa Seng n pawt ai i?" Gajawng gaja Zau Myu a ga san hpe htai yak mat ai majaw npawt ai ngu ai lachyum hte, du hpe loi mi sha- nyem kau rai, baw hte gahpa hpe loi mi gayep nna, baw ga-nga dat nu ai. Dai shani gaw shawoi shani hkan wam hkawm ai hta nna grau pyaw nga manu ai, hpa majaw ta nga yang, laika hti ai nu wa myitsu ji nban ni yawng mung chye na na hpe kam ai. "Aga, gara hku, daini wam ai i gaw myit lawm nga mani?" Zau Myu hte Ja Seng Ing dai shani tup poi hkan wam hkawm la nna, Zau Myu yan Naw Lat hkring ai yup gawk de du ai hte nan Naw Lat a ga a majaw: "Naw Lat nang nau hkum shala yaw, ya chyahkring gaw an a hpraw tsawm ai ganawn mazum lam hten mat na ra ai." "Dai rai yang mung kaga masa hku bai ganawn yu u le." "Aga, bai n chye masu su sai, yup masu su ai wa hpe gaw jasu la yak ai da, um, gara hku hkuhkau ra na i nga yang, hpraw tsawm ai tsawra myit sumri ni hte she rai ra le, goi i..." "Um nang tsun ai mung teng na zawn nga nga ai, ngai le shi hpe nnan mu ai kaw na nchye nkaw nga ai hte gari kawa nga wa ai le." Naw Lat gaw mani mayu ai nsam shapraw let: "Hkau Zau e dan nga yang hka-li wa n rai kun? Tsirung de naw wa jep kau su!" "Naw Lat ngai gaja wa tsun taw nga ai yaw, hkum shala nga." "Hkau Zau e, ngai gaw nang hpe yu in shala mayu wa nna gaw e, ngai tsun na hkau Zau dai gaw tsawra myit a npawt rai sai." "Gara hku da awh, tsawra myit a npawt da awh?" Naw Lat galang bai manang wa hpe shala mayu wa nu ai. "Re, re dai gaw tsawra myit a npawt sha naw re, sumtsaw sumra nga jang je grau lam pyi n mai hkawm mat hkra rai mat na lu, ha ha."

"N re law, Naw Lat atsawm tsun yu, gaja wa nan ngai Seng hpe tsawra mat ai ga rai sam ai i?" "Nau she rai, pyi lai hkra she rai." "Dai rai yang gaw mahkoi n mai tsawra hkat?" Naw Lat gaw Zau Myu a ga hte nsam hpe yu nna, myit n gut wa ai majaw: "Nau hkum anya nga u hkau Zau, um, ngai pyi nang hte shara she galai mayu wa sai." "Aga dai gaw hkum mai u ga le, he he, dai sha gaw naw hkyem sa ya rit yaw, tsawra myit ninghkring kaba wa e." "Majoi she tsun ai gaw i, dai ram ram gaw n byin dan ra na re, nang yu hkau Zau, poi ngut wa hkyem sai lawan tsun kau sanu." "I gaw byin na ta Naw Lat?" "Hpa baw wa mi?" "AWh... An a sumtsaw sumra lam wa le." "Hkau Zau ndai prat gaw gwi ai ni a mungkan re da, gwi gwi tsun u, shabyi bye ya wa hkra gaw n rai na re." Naw Lat a ga na nna shi shabyi hpe masawp yu let: "Raitim Naw Lat nang mung loi li gaw tsun garum ya rit le." "Um, dai lam hte seng nna gaw nang chye dik." Lani mi, gat yang hta Naw Lat hkrai laika mari hkawm ai shaloi, lu sha seng yang kaw na Naw Lat hpe shaga ai nsen na dat nna, myi sha shachyai dat yu yang, shat seng kaw shat sha nga ai Ja Seng Ing hpe mu dat nu ai. "Ataw Seng hkrai sha i?" "Re agu bawk" "Htaw ra rai mi nsan re wa gaw taw?" "Kadai wa ta? Arai mi nsan re nga ai gaw?" "Na ningtsa ba wa le." "Agu bawk yaw, Seng a tsa ba hpe arai nkai she ngu taw nga u le." "E law, e law, na ningtsa ba wa ngu saga."

"Tsa ba hpa re ta?" "Hpa n re law san yu ai ga le, shawoi gaw hka kau pyi n lu hkra yep yep rai nna san yu ai re." "Agu bawk shat sha ga le, maw maw Seng shat bang ya na, shat mai mung htet ga." "He he, Seng n saw tim sha na ngu nga ai." "Agu bawk le, grai chye pyaw ai i." "Um, masha gaw pyaw pyaw chye nga yang she asak galu ai da." "Re, re, re." Naw Lat shat mai lakap la let Ja Seng Ing a nsam hpe yu nna, ya lang chyawm gaw ngu myit la nna: "Seng na tsa ba hte hkuhkau lam masa gaw gade ram masan sa wa sa?" Ngu san dat sai. "Agu bawk yaw hpa mi san taw ai kun?" "N re le, nan lahkawng a tsawra myit hkrun lam le." Naw Lat a malawng mala nga san dat ai ga san a majaw, Ja Seng Ing gaya ai nsam hte: "Yu, agu bawk gaw galang lata nan wa mi, an tsa ba gaw hpraw san ai madang sha naw re rai nna, an gaw gahkri gatsa le." Ya gaw Naw Lat tsun na ginlam mu sai re majaw: "Nang yu ngai nam agu tsun dan na, nang mung myit yu u le, jaw ai kun? N jaw ai kun? Kagu ngu ai wa gaw gana ni a madu wa hpe she kagu, bai nna garat ngu ai gaw tinang a ganau a madu wa hpe she bai nga, dai majaw na matu gaw gara hpa n nga sai gaw, dai majaw tinang a matu gaw gatsa nan rai sai, ngai mung nan hpe myit hkrum ai."

"Agu bawk le grai chye tsun ai." Ngu ai hta lai nna, Ja Seng Ing hpa n chye tsun mat salu ai. Ja Seng Ing mung Zau Myu a ntsa hpraw tsawm ai nsam ni kaw nna, nsam galai shai mayu taw nga salu ai. Dai hpe Naw Lat myi grip mi laman mu kau sanu ai. Naw Lat nta de du ai hte yup-ra e yup nga ai Zau Myu hpe: "Hkau Zau, hkau Zau, rawt yu, ngai kabu hpa shiga lawm wa ai." "Sa-wa nang ngai yup nga yang hkum gun jang jang rai law." "Hikau Zau nang gaja wa n rawt sai ga re i? Um le. Nang n rawt jang mung Ja Seng Ing a lam n tsun ra sai ga rai nga ai." Ngu tsun dat ai shaloi she gajawng gaja gumtsat rawt wa let: "Aga hkum pawt mat le tsawra manang wa mung." Dai shaloi she daini Ja Seng Ing hte sa hkrum nna tsun shaga ai lam ni hte Ja Seng Ing a myit kraw gata na myit masa ni hpe azin ayang tsun dan sanu ai. "Naw Lat nang gaja wa tsun taw ai re i?" "Nang shala ai wa shadu ai ngu?" "Nang chyau nau shala ja ai gaw." "Gai, gai ngai tsun ai hku sha galaw u, byin nan byin ai." Zau Myu kabu gara hte Naw Lat hpe: "Kam hpa dik nngai law, sara kaba e." Nga ta lahkawng hpe manat gahkyin la nna ganga taw nga nu ai. "He he... Dai hku she rai ra le." "Gwi daw, loi mi shakawn ai hte loi mi latsawn mayu wa sai."

"Dai hku le, nang pyi dai lam ni hpe n chye lajang la ai nre i? Ha... Ha... Ha..." Naw Lat gaw Zau Myu hte Ja Seng Ing a sumtsaw hkrun lam hpe htinglu htinglai galaw ya na matu myit sawn sumru hkut da ai hte: "Ha, rai sai." Ngu tsun la nna, Ja Seng Ing hpe poi gata hta tam ningwan hkawm nga salu ai. Shara mi na shakya rai seng kaw Ja Seng Ing hpe mu dat nu ai. "Seng, Zau Myu nang hpe ga htet ai, ahkyak ai lam tsun ra ai da." Ngu tsun let, sa wa nna aten hte sa wa ra na shara hpe htet kau da nhtawm, Zau Myu hpang de galang bai nhtang wa nu ai. "Hkau Zau, Ja Seng Ing tsun ai... Dai shara kaw la nga na da yaw, alu sha sa wa na da." Ngu bai tsun da nna, shan hpe jahkrum ya ai, shara hte loi mi tsan ai shara kaw sa lagu la nga nu ai. Zau Myu sa wa yu yang gaja wa nan Ja Seng Ing tsap taw nga ai majaw kabu gara ai myiman hte: "Seng du taw ai na sai i?" "Rai n na shi ai tsa ba, Seng mung ya sha naw du ai, tsa ba, Seng hpe tsun ra ai nga tsun u le." Ja Seng Ing a ga na nna Zau Myu a myit hta sha, AWh, Naw Lat a mahkam she rai sai, hpa mi rai rai, daini gaw tsun nan tsun ra sai ngu gan myit nga nu ai. Mau tsap nga ai Zau Myu hpe Ja Seng Ing lata hte ahtawk nna: "Hpa mi sumru mat ai ta? Tsa ba tsun ra ai lam nga ai nga tsun u le." "E le tsun na ngu ai wa gara kaw nna gara hku hpang na re ngu myit taw nga nngai." "Hpa lam ni wa re majaw dai ram wa myit ra nta? Tsa ba e, gwi gwi tsun u le." Ngu nna num sha ni a lai htung hte maren tsun na yak nga ai Zau Myu hpe hka sa na matu hka hkawng mase ya ai hpa, ga hpaw dat ya sanu ai. Zau Myu mung n gwi dik ai sha gari kawa rai nga salu ai. "Seng hpe tsa ba sung htum ai salum na jet ai tsawra myit hte ningnan mu ai shani kaw nna tsawra hkrup mat sai le."

Ja Seng Ing Zau Myu hpe yu nna mani mayu wa sanu ai. Hpa majaw ta nga yang, Zau Myu shi tsun nga ai shaloi baw hpe gum nna myidi hkra rai tsun taw nga ai majaw rai nga lu ai. "Tsa ba tsun na yak taw sam ai she shadu yang me bai tsun wa yang gaw galu galang nga na wa mi, hpa rai myidi kau ai ta?" Ja Seng Ing gwi gwi tsun nga lu ai hpa majaw ta nga yang, lani mi dai ga tsun hkrum na hpe shawng tau nna chye taw sai majaw rai nga lu ai. "Seng, tsa ba hpe pawt mat sai i?" "Sumtsaw ga she tsun ai wa mi n pawt ai gaw e." "Ha... Re i? Seng, tsa ba hpe n pawt ai nga yang gaw..." Ja Seng Ing ningdang n lu sharang da n lu mat hkra, Zau Myu a aga pyi n htum shi yang mani sum rai baw hpe gum let: "Tsa ba, Seng le tinang a masin salum hpe n wam masu ai, Seng mung tsa ba hpe galoi ten kawn gara hku tsaw hkrup ai re n chye mat hkra tsawra ai." Ngu tsun shadan dan sai. Dai shaloi she Zau Myu nsa kaba hpawng nga kra shaw la nna, Ja Seng Ing a gahpa lahkawng maga pe shi lata hte jum la nhtawm, Zau Myu a shingwang hta gang ahpum tawn da sanu ai. Dai ten hta shan a makau na nsen langai mi gaw: "He... Hе... Не... Ram sai, ram sai, dai ram rai jang ram sai hpawtni hpawtdin na matu naw ngam da ra ai. Ya mung tsa ba naw nga ai i? Seng?" Nga shaga pru wa ra ai. "Naw Lat nang gara hku du wa ai re taw? Ahkyak rai jang she, Nang chyu..." Ja Seng Ing gaw gaya taw nga lu ai. "AWh... AWh dai wa mi ngai n lawm yang ganang mai na. He he... Daina nan ngai hpe lama ma gaw daw ra sai lu, nan sumtsaw byin ai masat masa le he." Naw Lat a matu laksan Zau Myu hte Ja Seng Ing lajang ya manu ai. Dai shana na aten hpe Zau Myu hte Ja Seng Ing yan gaw malap n lu na sai. Grai pyaw ai aten ladaw ni hpe shan yan arau hkam la nga ai aten ladaw ni hpe gayat jahkrat kau ya lu na prat a mawru ni hpe gaw kadai wa sawn dum lu na ta? Zau Myu hte Ja Seng Ing yan grai pyaw nga ai aten gaw lani hte lani lai magang wa sai.

Poi mung ngut wa mahka rai wa sai majaw Mandale mare kaba na nampan sun hta Ja Seng Ing hte Zau Myu galang bai sa chyai nga ma ai. "Seng, poi mung ngut wa hkyem sai i?" "Re, tsa ba, Seng le, tsa ba hte n kam hka ai hka na lam hpe mung gachyi mi mung n wam myit ai." "Tsa ba mung Seng hte maren sha re." "Tsa ba, Seng le masha ni na zawn hprawng nang ai baw gachyi mi mung n sharawng ai." "Tsa ba mung Seng hte maren sha re, tsa ba le Seng hpe manu grai shadan mayu ai yaw, dai majaw poi ngut nna tsa ba mung tsa ba a nta de naw wa na, Seng mung Seng a nta de naw wa u, tsa ba nta du jang she wa hpe tsun nna, Seng ni nga ai Myitkyina de hkan lung wa rai, htunghking salang ni hte Seng hpe sa hpyi la nna, hkungran la na yaw." "Seng mung tsa ba myit ai hku sha re yaw." Dai yang Naw Lat du pru wa nna: "Aga ngai gaw nan hpe tam ai wa, ndai mare kaba pyi ganoi she gun nna tam kau, nan gaw nang kaw she wa gaswi sha taw nga ma i." "Hpa majaw an hpe tam ai wa mi, Naw Lat ba shara nga na wa mi?" "Hkau Zau an hpawt de wa na hku ngai wanleng lakmat mari da sai." Naw Lat a ga na nna, Zau Myu hte Ja Seng Ing a masin salum ni hpa- hka lu shalai kau yang na zawn nga, masin gahprap let gari kawa hkam sha nga malu ai. Hpang jahpawt manam bra nna, Zau Myu hte Ja Seng Ing yan wanleng daru e nja hka nga masai. "Seng, tsa ba le Seng kaw du hkra lung wa na yaw." "Um law, tsa ba lung wa na hpe Seng la nga na yaw." "Seng, Myitkyina kaw tsa ba a kanu hte ganau naw nga ai. Seng kaw lung wa let she naw wa sagawn la ra sai." "Re i ? Tsa ba a kanu hte ganau Myitkyina kaw nga ai re i?" "Re, Seng." "Rai yang gaw Seng hpe tsun dan rit le, Seng sagawn da ya na."

"Rai nga ai le i." "Um, tsa ba a ganau na mying gaw..." Zau Myu ga pyi garai n htum shi yang, Naw Lat aba shara nga du wa nna: "Gai gai dai ram ram wa nja nhpra hkum rai nga masa, Seng ni jawn na wanleng shawng rawt na re da, ngut jang she an yan na bai rawt na re da." Zau Myu gaw Naw Lat a ga hpe bai gahtap san nga lu ai. "Hpa wa ta? An yan na bai rawt na nga ai gaw?" "Mak tek law, ahkyak hkyak hta she nang wa wa mung, wanleng, an jawn na wanleng atsawm sha na sai i?" Naw Lat wa shama taw nga ai majaw, Zau Myu yan tsun shaga nga ai ga numdaw di mat nna, Zau Myu a ganau hte kanu a mying n tsun dat lu nu ai. Nja nhpra rai n kam hka tim grai tsawra hkat ai sumtsaw yan, Ja Seng Ing hpe gaw dingda Myitkyina maga de sa ai wanleng e htaw sha mat wa nhtawm, Zau Myu hpe gaw dingdung maga Yanggung de htaw mat wa rai, myiprwi si ni hte jahkring mi hka ra mat manu ai. Wanleng ntsa hta Zau Myu kanu yan ganau hpe dum shingran mu nna mau nga nu ai. "Goi e, dai ram ram wa gaw n byin dan ra na re." "N re, Naw Lat ya ngai dum nga ai gaw htaw Myitkyina kaw ngai ngam kau da ai nye nu hte nye ganau hpe myit dum nna gaw e." Wanleng ntsa e Zau Myu hte Naw Lat yan gaw laksan gawk shara mi kaw re majaw, wanglu wanglang mai jahta nga malu ai, bai nna yup ku mung Zau Myu langai Naw Lat langai rai, Naw Lat gaw galeng, Zau Myu gaw wanleng shakum e shanat nna, dung let jahta hkrat wa nga malu ai.

"Gara hku daw awh? Seng ni mare kaba de na nu hte na ganau naw nga ai da aw?" "Re, nye ganau ngai hte hka ai shaloi, manga ning dang sha naw re." "Nang kanu hte ganau lu ai nga ai mung n na hkrup yu ga nga ai le. Ngai gaw nan wa hpe shingkra yanwa She shadu yang wa mi." "N re, nye nu hte nye wa hka mat ai she re, nye ganau mung nye nu na hpang la na kasha she re." "Aga nannu wa ni a manghkang wa mung i, na mau na zawn nga ai wa, ngai hpe chyawm nang dum ai made asan ngu tsun dan yu rit le, ngai mung hkam sha lawm mayu ai." Zau Myu ya daini du hkra shingran dan ndan ngu naw mu nga lu ai. Dai lam ni hpe Naw Lat hpe yu let tsun dan na matu, myit hpe sharang da let, wanleng hkuwawt hku lai di nga ai bumlang ni hpe mada yu let tsun dan hpang wa sanu ai. Zau Myu a dum ndum nga ai shingran ni hta gaw shi ma prat ten shi hkrai sha naw rai yang kanu yan kawa agying ga-law hkat ai hpe sha adum nga lu ai. "Ningnu e, masha e mung n ra, Karai e mung n ra re bungli hkum matut galaw sa law, ya nang galaw ai bungli hte nang lu tawn ai kasha la sha re, i gaw dum nga ndai kun lu." "Ngai hpe hpa hkum sa shara, nanwa nta kaw azim sha dung nna la sha taw mu, ngai na maza n kam hkam ai." "N re le, ngai mung tam nga nngai le, ngai tam ai lam gaw lu sut lu su wa ai baw mi n rai tim, myit simsa lam gaw lu nga ai le, ya nang galaw taw nga ai gaw tinang a amyu hpe tinang bai sat ai amu re. Bai nna, nang galaw shut ai a marang an a gashu kasha ban hte ban ari lu wa ai baw re, nang i gaw dum nga nni?" "He he na ga ni hpe htaw yu hku kaw sa tsun bang u, gara wa mi nang tam wa ai gumhpraw hte mari ai rung rai rai? Mani pyi mani mayu ai. Rai nga ai, rai nga ai, nang tam ai gumhpraw nau law nna kasha pyi she lu wa satim, ngai a matu ningsin ja ka hpuja hpaga ni pyi n lu bang shi nga ai, ngai gaw grai she gaya wa sai."

"Ningnu e, ngai hpe gaw dai ram ram wa gaw n tsun jaw ra ai gaw e, ngai mung lu wa ang yang gaw bang na ngu myit da ai re le." Madu jan Htu Seng gaw madu wa Zau Naw a ga ni hpe shi na hta gachyi mi mung n shang nga lu ai. Htu Seng gaw ka-ni hpraw hpaga ga ai hpe madu wa chye nna, pat hkum ai hpe n na ra nna, ga-law hpang wa ai rai nga malu ai. Dai shaloi Zau Myu gaw kanu yan kawa ga ja ja hte jen hkat nga ai hpe mu nna hkrit hkrap nga lu ai. "Dai kaw hkum palek taw nga sa, ngai n kam madat ai, nang yu, ngai tsun na ngai gaw nye dinghku rawt jat galu kaba wa na hpe sha myit ai, gade myiprwi hpe mung n matsan dum lu ai." "E ningnu e, nang dai ram ram baw ja taw yang gaw ngai mung hpang jahtum ga tsun na, nang gaw nang pyaw na hku sha myit nga u, nang dut sha nga ai gaw masha ni a salu salat hte tam la lu ai ja gumhpraw hpe aloi sha masu la, nang dut ya nna si sum ma ai masha ni a kanu kawa ni a hkrapngu hkrapngoi rai myiprwi si hpe arang bang nna lu ai, nang a nga ngwi nga pyaw lam gaw ngai n ra sharawng lawm ai." "Nang n ra sharawng yang mung nang hkrai kaning di na n kam nga yang gaw pru wa u le taw, e pru wa na rai yang mung nang hkrai pru wa, nye kasha gaw nang hte hpa n seng ai."

"AWh, nang gaw dai madang du hkra tsun du wa sai gaw i, mai ai le lani mi na nhtoi hta gumhpraw a majaw nang jamjau n hkrum u ga, nye kasha hpe mung lani mi na nhtoi lu hkra wa woi la na nngai." Zau Naw shi ga htum ai hte gawk e rawng nga ai kasha Zau Myu hpe wa ahpum la nna: "Wa a kasha e, ma myitsu su rai nga yaw. Ya lani mi ma hpe wa ndai matsat shabat tsin-yam ngarai kaw na wa wa woi la na yaw." Zau Naw myiprwi si gahte let chyinghka lam kaw na nhtang yu nna, myiprwi si ni hte, hpang jahtum shakram kau da sanu ai. Dai yang Htu Seng gaw ka-ni hpraw hpaga arau galaw ai Labang Myu AWng hte ningnan ra hkat hpang wa ai majaw, madu wa Zau Naw a ga madat ya na aten n lu jaw ai nhkan e Zau Naw hte hka mat manu ai. Laning mi ngu na hta Htu Seng gaw Labang Myu AWng hte arau nga mat masai. Myu AWng gaw ka-ni ya, ya hkyi kaba rai nga ai hpe Htu Seng ma hkum shata kru ngu na hta she chye ai majaw, kaning gaw n di jut htum mat sai nga yang, jang dai ma hpe shangai la kau sanu ai. Ma num sha rai nga malu ai. Num sha masum ning ngu na hta Myu AWng ka-ni htu shut nna n nga mat salu ai. Dai yang Htu Seng ma pawn let shi a myit hta: "Aga ya ngai shut sai, nye madu wa Zau Naw a ga madat ai rai taw gaw ya na zawn n byin na wa." Nga myit malai hpang hkrat nga nu ai. Htu Seng shi hkrai ma lahkawng hte ru yak jamjau hkrum sha nga salu ai. Ma yan gaw naw gaji ai re majaw yak hkak lam hpe hpa n chye ma ai raitim grai myit su ma ai.

Zau Myu asak hpring tim jawng n lu bang ai hte num sha hpe mung amying du hkra n lu shamying la ai majaw, num sha hpe "Num Hkawn" ngu nna sha shaga ma ai. Aten ladaw ni lani hte lani, laning hte laning lai mat wa sai. Htu Seng ma yan jawng n lu sa nna, nta makau na ginsum hpe yu nna: "Um, dai ning gaw Num Hkawn pyi manga ning hpring sahka!" Nga hten grawp mat wa nga ai ginsum hpe yu let tsun u ai. Lana mi de Htu Seng shana maga de jan shang wa ai hpe bai mada mau dung nga yang, nta shinggan de mawdaw ngoi ai nsen hte rau: "Ndai Htu Seng a nta rai kun?" Nga san pru ai nsen na dat nhtawm, du sharawt mada dat yang, mawdaw gata kawn mare salang ni hte, htunghking salang ni hta lai nna, Htu Seng a myit hta chye na zawn zawn re la langai yu wa ai hpe mu nna, wang chyinghka lam de sa wa nu ai. "Re re, Htu Seng gaw ngai rai nga nngai, nhku de lung wa ga." Zau Naw gaw Htu Seng a chyabyak chyalak daw wa na hkyem hkyem re nta hpe mu nna, grai myit n pyaw nga lu ai. Htu Seng gaw Zau Naw re hpe n matsing mat salu ai. "Nu a kasha, Zau Myu, htaw hka htung na hka alagyi nga sa ja la su." "N ra sai, n ra sai." "Seng ngai hpe atsawm sha yu u, n matsing mat sai i?" Nga Zau Naw shaga dat jang she Htu Seng atsawm mada yu u ai. "Nang, nang Zau Naw n re i?" "Re, Seng." "Ya, ya kaning ngu du wa nta?" "Ngai nye kasha hpe sa woi la ai re." "N mai byin na re." "Hpa majaw n mai byin na, ya nye kasha nang hte arau nga nna jawng mung n lu lung ai da, na dinghku lam ni yawng ngai na ngut sai, dai majaw ngai nye kasha hpe hpaji chye hkra shakut shangun na." Zau Naw matut nna bai tsun ai.

"Ngai tsun ai ga madat yang, na kasha Num Hkawn hte nang hpe nta langai mari la na gumhpraw du hkra jaw da na, bai nna nannu galaw lu galaw sha lu na matu bungli gaja langai mung lajang da ya na, ma yannau a galu kaba lam hta grai hpang hkrat wa sai, nang atsawm myit yu u, hpawt de ngai bai sa wa na." Ngu Zau Naw tsun sai. Dai ten e, namhtan hte hpahka sa ru jaw ai nta htingbu na Hkawn Shawng mung namhtan langai hta sha let: "Re re ning Seng, nang atsawm myit yu u, ya salang Zau Naw hpe jaw kau dat u, salang Zau Naw hpe jaw kau dat ai mi nga tim, tsasam ni kaw mung n re wa mi, kawa majing kaw she re gaw, bai nna na kasha yan nang kaw nga yang gaw jawng lung hkum tsun, hpang de ma hpe masha ni hpaji n chye ai nga nna yu gaji kau ya na rai nga ai le." Makau e dung nga ai dingla langai, yaman shaw maya let: "Na kasha yan hpe matsan mayan rai laika mung n chye, matsan jamjau let masha ni a mayam tai shangun kau sana i? Masha gaw laika n chye yang mayam hte nan bung ai." Nga bai tsun shadum nga u ai. "Ngai... Ngai hpa n chye tsun mat sai law, ngai hku nna gaw Zau Myu hte n kam hka ai, bai nna shannau hpe mung n kam jahka kau ai, raitim nye kasha yan hpe gaw hpaji chye shangun mayu ai." Nga tsun let Htu Seng hkrap ashuk taw nga sai.

Zau Naw azim sha madat nga salu ai. Hkawn Shawng dung nga ai kaw nna sharai dung la hkra rai bai shadum sharin bang wa sai. "Ning Seng e, anhte kanu ni a myit hpe gaw tau ya ai, raitim anhte kanu ngu ai ni gaw kasha ni hpe tsawra ai lam hta galang kanu hte pu htum kanu zawn tsawra myit sak jaw ap nawng myit rawng ra ai, nang mung chye chyalu sha rai na ndai, galang kanu ni gaw n-gup e mayu kau sai lu sha hpe pyi kasha ni kawsi yang naw prat jaw chye ai hte kanu ni mi n sha yang n sha, jaw mayu ai myit rawng ra ai, bai nna pu htum kanu ni mung, kasha hkai nna pra sa wa lu na matu, shi hkum shi si hkam kau lu ai, pu htum kanu a tsawra myit ni hpe kasi la mai ai re le." "Um, kaning wa di na i? Nye kasha Zau Myu hte gaw n hka lu, ndai zawn matsan tsin-yam nawng hta gaw Num Hkawn yannau a prat hpe mung n dagrawng bang shangun mayu, gara hku mi nga nga ngai daw dan ra sai, ngai a mara rai sai law. Nu sha e..." Htu Seng lana mi ting n yup hkra sumru yu nna, hpang jahpawt hkrap nsen hte kasha Zau Myu hpe lahpyen hta pawn bang la nna: "Nu sha Zau Myu mana sha sa ai wa gaw na wa re, i gaw naw dum nga nni?" "Dum ai, nu." "Moi nang naw gaji yang na wa tsun da ai hte maren, na wa hpang hkan mat wa ra na re yaw." "N kam ai law, nu e, ma le nu yan ganau hpe n kau da lu ai." "Nu a ga madat u." "Nu hte nga yang nannau jawng mung n lu lung, masha ni chye ai laika mung n chye na, masha ni sha ai baw mung n lu sha, labu palawng mung chyapchyap rehpun ra ai, dai majaw na wa kaw hkan nang mat u yaw, du kring na wa sa woi la na ra ai."

Zau Myu gaw grai myitsu ai kasha re, kanu hpe yu matsan dum nna: "Nu e, ma jawng mung n kam lung ai, muk mung n kam sha ai, nu yan ganau hpe ma bau na le yaw nu, wa kaw n kam hkan wa ai nu." Nga tsun u ai. Doi shaloi Zau Myu sanit ning rai sanu ai. Num Hkawn gaw manga ning sha naw shang wa ai rai nga lu ai. "Nu tsun ai ga n madat ai ga re i? Nu yan ganau hpe matsan dum yang, na wa kaw hkan su." Ngu myiprwi si ni hte matsan shayan rai tsun nga ai hpe Zau Myu yu gaw yu matsan dum, kanu yan ganau hte gaw n hka lu rai, Zau Myu grai myit yak nga lu ai. "Nu e, ma a majaw myiprwi si gaw hkum hkrat, ma le nu yan ganau hte n hka lu tim, ma nu a ga madat na yaw nu, hkum hkrap sa yaw nu." "Nu a kasha e, nu mung ma hte gara hku mung n hka lu ai raitim, na nnau Num Hkawn a prat jan pru tsawm ra ai." Htu Seng hte Zau Myu shaga hkat nga ai shaloi, Num Hkawn gaw: "N kam ai, n kam ai Num Hkawn hpe hkum kau da yaw aba, Num Hkawn hkrai rai mat yang, manang ni roi sha na ra ai." Nga hkrap ari bang wa nu ai. "Num Hkawn e, aba mung jawng dat jang bai wa na le yaw, nu hte nga nna jawng laika shakut u, laika chye jang kadai mung Num Hkawn hpe n lu roi sha na ra ai, dai majaw laika grai shakut u lu yaw." Nga tsun nga ninglen Zau Myu myiprwi si hkrat mayu ai raitim, ganau Num Hkawn a man e wa wu-tik nna sharang kau lu ai. Myit kraw salum hta gaw gapaw di mat na daram masha hte n ging hkra hkam sha nga lu ai. Hpang jahpawt Zau Naw mawdaw hte du wa sa ra ai. "Gara hku myit tawn da sa, Seng." "Nang myit ra ai hku rai sanu ga law." Htu Seng gade wa mi sharang tim, shi hkrai matep lwi pru wa ai myiprwi si ni hpe gatsut kau let tsun wu ai.

"Grai chyeju kaba sai law, Seng e, ngai mung nannu ni hpe gaw n kam jahka kau ai raitim, ma ni a prat shawng lam a matu myit nna she ngai ning hku dawdan ai re." "Ya na zawn Zau Myu nye ntsa mara n mu ai sha, ma yannau hpe myit ya ai majaw... Majaw..." Htu Seng shaga matut na atsam n rawng mat salu ai. "Gai gai anwa naw wa saga, Num Hkawn, nu a ga madat yaw." Ngu shaga kau da rai, la sa ai gumhpraw buri tawn kau da ya let pru mat wa sanu ai. Zau Myu hpe woi nna pru mat wa ai jahkring mi rai yang, ninghpu hte hput re mawdaw hpang e shachyut nang ai Num Hkawn hpe mu dat masai. Mawdaw jahkring dat ai hte Zau Myu ganau hpang de kagat mat wa sanu ai. Zau Myu ganau hpe chyit di ahpum tawn nna: "Num Hkawn e, hpa rai aba kaw hkan nang ai rai ma? Ya, ba jawng dat jang ganau kaw bai wa na rai nga ai le, annau nu yan wa a ga madat ra ai, myitsu kasha she tai ga ngu aba galoi mung tsun ai re le." "Num Hkawn aba hte n hka lu ai." "Aba mung maren sha re yaw." "Aba..." Num Hkawn aja wa marawn let gahpu hpe gayin mada da rai hpang de bai nhtang mat wa ai nu ai. Zau Myu mung ganau hpang de man yawn rai, lata ladawn let kau da sanu ai. Lwi pru wa ai myiprwi si ni gaw wanleng hkuwawt hku nna bung shang wa ai nbung ni hte rau, Zau Myu a shabyi hku hkrat yu wa nga sai. "Aga hkau Zau e na myit n pyaw lam mabyin ni hpe she alun ya ai hku tai mat sai law..." Naw Lat grai ana let tsun u ai. "N ra ai gaw e, ya na zawn hkam sha nga ai lam ni hpe tsun shapraw dat kau lu ai majaw, loi mi asan nga mat sai." Zau Myu myiprwi si gatsut kau rai tsun ai.

Zau Myu hte Naw Lat Yanggung du ai hte tinang nta wa mat masai. Zau Myu gaw kawa hpe ganam mu da sai lam, Myitkyina kaw na re lam wa tsun dan nu ai. Kawa mung Zau Myu hpe tsawra nga ai Seng Lu jahkring hkring shi hpe wa san ai lam ni tsun dan u ai. Zau Myu yahte ting manam hkap tau mu galaw ai hta n-ga, wanleng bai dung wa rai, grai pu ba sai majaw, yup-ra jau jau shang mat sanu ai. Yup-ra e. "AWh Seng Lu e... Nang ngai hpe gade ram tsawra ai raitim, na ntsa nye tsawra myit ni gaw gahpu langai hta jan nna n lu tsawra ai majaw, agu Zau hpe mara raw ya rit yaw, um, ya ten Ja Seng Ing mung shi nta kaw i gaw du sai kun, Seng mung ngai hpe dum nga na sai." Jahpawt manap jau jau rawt ai hte Zau Myu gaw kawa hpe: "Awa, Ja Seng Ing hpe galoi sa hpyi ya na?" Ngu san taw nga sai. "Wa rai n rau shi ai, bai nna num hpyi sa yang gaw ja nka naw hkyem la ra ai, galu kaba lam tam sa ai re majaw, n mai tin ai. Ya na ta gaw rau sai, raitim lahkawng masum ya dang sha aten lu ai, dai majaw lawan ai hku nbungli hte she lung wa ga." Ngu kasha hpe myit shapyaw da salu ai. Zau Naw madu jan Htu Seng hte hka nna, manang ni hte Hpakan lungseng maw de lung nna shakut la sanu ai. Bai Zau Naw gaw nanghpam malu masha n jai lang ai hte, pyaw hpa len hpa lam n nga ai majaw, ja gumhpraw grai lu sadi nna, manga ning laman sut du kaba byin wa lu nu ai. Hpang na ta, Zau Myu nbungli ntsa e, nau kabu ai majaw masin gahkrap nga salu ai. Myitkyina nbungli daru e Zau Myu gaw kawa hpe akam sha Myitkyina lung sai, let ja e kanu yan ganau hpe wa tam yu ga ngu tsun u ai.

"Wa, nu yan Num Hkawn hpe tam yu ga i?" "Mai ai le, tam ga, tam ga." Ja Seng Ing jaw da ai hkringdat hte maren hkan sa wa yu yang, buhpun palawng chywi sha ai seng kaba langai mi rai nga lu ai. Shana maga jan du nna seng pat hkyem ai Ja Seng Ing hpe Zau Myu mawdaw kawn pru wa let shaga dat sai. "Seng..." "Aga, tsa ba." Ja Seng Ing kabu gajawng nga sai. "Seng ni nta gaw?" Zau Myu seng lawu lahta mada let san u ai. "Ndai seng a hpang de re, tsa ba." Ja Seng Ing Zau Myu hpe dun madun mat wa hkyem ai shaloi, hpang kaw masha langai naw hkan nang ai mu dat nna, ladawn dat ai ta dawm la kau nu ai. "Seng, ndai gaw nye wa re, wa ndai gaw ngai tsun ai Ja Seng Ing re." Zau Myu gaw Ja Seng Ing hpang de gahtep hkawm let shaga nga u ai. "Seng na nu hpe gaw tsun da sai i?" "Tsun gaw tsun da sai le..." "Ya na nu nga ai i?" "N nga ai, gat sa wa sai, sa sa ntsa de lung wa ga, nu gaw ya hkring wa na ra ai." Ja Seng Ing ni nta gaw asan aseng rai grai hkrak nga malu ai. Loi kring mi nga ai hte nta wang chyinghka hpaw nsen na sai. "Itaw, nu wa ra ai, jahkring mi yaw." Ja Seng Ing tsun let nta npu de kagat yu wa nu ai. Zau Naw gaw shang wa na chyinghka lam kaw shingdu yawn rai dung nga lu ai. Ja Seng Ing a kanu nta ntsa de lung wa ra ai. "Ma tsun ai manam du na nga nna gat sa mat ai rai nga ai." Ngu let nhku de shang wa yang, Zau Naw hte myiman hkrum rai sa shaga shachyen gatut manu ai. "Seng..." "Zau..." Lahkawng yan a n-gup kaw nna arau sha galang ta pru wa ai nsen rai ng ai, dai yang Zau Myu hte Ja Seng Ing gaw shada da yu hkat nna, mau nga ma ai.

"Awa hte niba gaw galoi na chye hkat ma?" Htu Seng gaw Zau Naw hpe yu mau nna: "Ya, ma Seng hpe sa hpyi ai yanwa gaw nan wa i?" Zau Myu lawan ladan ai hte: "Re le, niba." Ngu htan dat nu ai. Dai shaloi she Zau Naw gaw rawt tsap hkra rai: "Zau Myu, ndai gaw niba n re, na nnu she re." Ngu abwi sha tsun dat ai hte rau, Htu Seng yan Zau Naw mau ngut ai hpang, Ja Seng Ing hte Zau Myu bai mau mat manu ai hte shan yan a n-gup kawn na mung: "Aba!" "Num Hkawn!" Nga shaga pru wa masai. "Ya hpa mi byin wa sata? Mungkan ga ndai gaw annau re hpe pyi sumtsaw madang du hkra, hpa majaw gam maka ndai hku ngai hpe zingri nga ai kun i?" Zau Myu baw ari let dung gazut mat wa nu ai. Galai shai lawan ai ndai mungkan hta chyahkring mi na laman, Zau Myu hte Num Hkawn yan a prat hpe yawn hpa, mau hpa, pyaw hpa hte hkrit hpa ni hpe gahti galai jaw nga ai, prat ndai hpe maroi nni nga lu ai. Ja Seng Ing mung gahpu ba hpe she tsaw hkrup mat ai shi prat hpe shi gaya ai hte mau ai hte rai hkrap nna nta ntsa na kagat pru mat wa nu ai. "Hkum hkrap sa Seng, an myit da ai hku wa mi n byin wa tim, ya annau bai hkrum sai le, masha ngu ai gaw byin mayu ai hta byin ging ai hpe hkap la chye ai wa gaw masha gaja rai sai."

Zau Myu mare shinggan kaw she ganau Num Hkawn hpe hkan mu tam la nna, myit shalan ya nga u ai. Zau Naw yan Htu Seng mung nta ntsa nna arau sha yu wa nhtawm, kasha yan hpe tam mat wa masai. "Ma yannau e, ya byin mat wa ai lam ni ma hkra a npawt gaw nu a mara majaw rai na sai, nu a mara hpe raw kau ya marit law." Nga Htu Seng kasha yan hpe hpyi nem nga u ai. "Annau nu yan wa hpe mara n shagun ga ai law, nu." Dai shaloi Htu Seng shi a myit kraw gata hta mungkan pyin-ra na gaja dik mahtai hte kasha yan a ntsa hta: "Ma yannau e, masha ni gaw tinang a tingkyeng myit, law hpa myit marin ai myit, jaw ai shut ai n ginghka ai sha galaw shut nna, tsin-yam tsindam hkrum wa ai shani, gam maka hpe mara shagun chye ai, nu zawn re masha ni a majaw, hpa n chye ai ma ni du hkra tsin-yam tsindam hkrum sha chye wa a hka i!" Nga myit la lu u ai. Naw Lat sa jasu ashun dat ai majaw, shi mu nga ai shi mabyin shingran hpe tawn kau da ra mat salu ai.

Dai lam ni gaw lai wa sai 20 ning a shawng na rai nga lu ai. "Hkau Zau e dai hpawt gaw gat dut ginra de sa yu ga, bai nna labau laika zawn re naw sa mari la ga." Ngu Naw Lat Zau Myu hpe jasu la nna, man myit hka shin la rai, Mangshi mare hta galaw ai laili laika lu ai 120 ning hpring poi a laili laika dut shabra ai seng hta tsap nga yang, shara mi na masha wunawng a lapran hta, Zau Myu numsha langai mi hpe mu nna, hkan shachyut yu tim masha nau law ai majaw, n mu kau dat sanu ai. Bai nna dai numsha a mying hpe yat sha shaga kau dat nu ai. "Num Hkawn." Num Hkawn shing nrai, Ja Seng Ing mung dai poi hta sa du shang lawm nga lu ai. Zau Myu gaw ganau hpe gade wa mi tam hkawm yu tim, n mu tam mat salu ai. Dai poi hta Zau Myu a myit gata hta gara hku hkam sha nga ai hpe laika hti kanu kawa myitsu ji nban ni yawng mung chye na ya na sai hpe kam ai.