MALI HKU NA TSAWM SHAYI

MALI HKU NA TSAWM SHAYI

MYU TSAW

Ugum jan gaw bum lang shagawng hkaraw nhkap shagu hpe mani sai nsam hte shakram kau da nna, mungkan ga kaga de gayin mat wa sai. Mali hka nam daw na ja htu dabang hta ja htu sa ai Maru Seng Tawng gaw, ri nka kaw santeng shanghkawp hte ndi mala ja hkying hka lau ni hpe baw jahkum gun nna, jan du mat sai rai timung ja hkyep tsawmra mi lu htu hkying la sai majaw, krawwang myit hta kabu awng awng sha nga let, ri nka hpana sha manat kau rai Mali hka kau hku garet nna hka hku de na nta wa lam de achyan rai hkawm mat wa nu ai. Ningsin gaw yu nga dangam prat ting shadu sha kau sai di htumpa zawn rai sin chyang mat wa sai, mungkan mung sumnum la ai Hkawn ji zawn simsa ai hta lai nna, lam pai hkra hkakrik hkatawn ni wa garang shalai ai nsen galang numrang ngoi ai hte "Hpung hpang" nga nga ni hka ntsa de gumlawt pru nna machyi shingtai rim sha ai nsen a majaw, Seng Tawng gaw la grai du dum nna she hkawm yang wa me, ningsin e mungkan hpe galup kau jang, masin kaji ji ai wa mung, ri sin tsin mi daram sha rai kra kaji chye, yu magang lam makau hkan na hpundu hte tsingdu ninghpawng ni mung achyang na na rai shamu hkawm wa hkyem ai zawn re hkrai, Seng Tawng a masin salum ni galang mi hte galang mi gumlawt bukbak lawan wanna, nsa kaba pyi nshaw gwi wa sai, ndum shami Seng Tawng a woimun hte kara laji ni tsap marawng mat nna, woimun pawt shagu ahku hku ai zawn nbung lagyi atsin nga shang wanna, ri nka hte shingma lapran hku pru ai salat gaw, le hkyenghka hku ading sha lwi hkrat mat wa sai, ningsin gaw ta latsang manga shaw shadawn dat yu tim hpa n mu mada sai, Seng Tawng gaw lamu na shagan ni htoi gabrim gala ai nsam sha jau nna, hkying hkum lahkawng masum shakut let masawp hkawm mat wa nu ai.

Seng Tawng hka hta marang jat ngu ai baw jamjau hkrum sha nu ai, kan mung bum sumshi tawt lai ai gwi dam kan zawn akyu nga ngoi garu bang wa sai, hpang gara ra ai wa mung yuhkraw hku pyi sharaw hkru lai na matu jin chyalu sha rai sai, ga malai "Hkrit magang shawng lam nyin nyin re htit. " Nga ai she dik wa sai, Seng Tawng lagaw mung dawm hpai kau nna pyen na zawn ngu nga yang she "Buk galak." Nga lam makau de nna amun hkrai tsung tsung re ta hte lahtaw kaw gra di gang gadawng ai zawn nga, shagum de up rai galau gumpa taw ai hte, ri nka mung shi a baw hku tawt lai mat wa nna, shi gun ai rai ma hkra gaw shawng lam e ayai aya rai ru taw mat sai. Dai yang Seng Tawng gaw numla kailang galawk mat ai zawn nga rawt gagat mat wa na rai sam ai ngu tsawmra lahpre yu tim, lagaw mung lahkap na lasa dan di kau ya ai zawn nrawt hkawm lu nu ai, tsawm mari baw shadap nna mada dat yu yang, shi a shawng lam gade ntsan ai shara kaw wan nyipla nyipla rai htoi tu nga ai hpe mu mada dat ai majaw, zaibru jang hkan shata lam garet hkawm sai gawlauk hka shi mu mada dat ai hpa, kabu sha gaw nchye mat nna, lagaw lahkawng ta lahkawng ma hkra hte wa hpang yang me gawawng ai machyi jigrawng dingla wa zawn rai gramgri hkawm let: "Nta madu ni e...chyinghka lau she hpaw la marit law." Nga marawn jahtau gagat mat wa nu ai.

Wan tu ai shara de ni magang Seng Tawng a masin loi kaba wa nu ai majaw, ta lahkawng hpe dawm la kau nna, lagaw hte hkawm sit wa wa yu yang, dai nta gaw kachyi sha law nna htap lahkawng di galaw tawn ai, tsawmra dingsa sai shingbwi ta rai nga ai, gatun sha law ai lakang baw kaw punra kachyi pa ai mi mung galaw tawn nga ai, Seng Tawng shaga marawn ai nsen pe na lu ai majaw rai sam ai, lakang baw htum ai kaw hpaw tawn ai chyinghka lam hta Hka hku hpakang bu tawn nna, ke tsawm la ai shang a lahta na kadai wa mu hkrup tim, myisha hpe sit kau nja na zawn re sinda hte mata tim grai dwi na zawn re adu, dukrung maga kara jaw hpawng kaba mi majaw tawn re num langai, pai lagaw hpe anyem sha re chyinghka lam kadun a shinggan maga sa gabye tawn nna, abwi sha ndaw ya de myiman hpe praw rai mada dat let: "Goi law, galaw ga na kadai manam wa rai nga nni ye, hpa baw jamjau hkrum nga nta, lau she shang wa rit. " Nga htawng seng mi dum dat ai zawn nga ai nsen hte hkap shaga la ai hkrum nu ai. Seng Tawng gaw dai num jan a nsen hpe na yang grai chye hkat ai ni a shaga nsen zawn nga ai majaw, kadai wa rai wa sai kun ngu, laka pawt e tsap nga hkra galaw asoi yu yang, num de a tsawmhtap la ai myiman nsam ni gaw, Seng Tawng chye hkat ai masha ni hta n lawm nga ai majaw, masha langai ngai hte nsen bung hkat ai wa mi she rai sam ai ngu myit la nna, anyem sha re punra gata e hpum taw nga ai gwi chyang hpe yungdawn hte madi let: "Hkri wawra gwi gaw nchye gawa a dawng?" Nga san dat u ai, num dai jan mani sai nsam hte: "N gawa ai, n gawa ai, gwi dai grai myitsu ai she re, jinghku ni hpe grau nchye gawa ai, lau she shang wa rit."

Nga jang, dai gwi chyang mung atsang waw rai rawt nna, Seng Tawng hpang de moi kaw nna chye hkat saga ai nga zawn rai ningmai gangat nna, kabu hkalum sa wa nu ai, Seng Tawng lakang kaw gabye lung wa let dai gwi hpe bai yu yang mung grai chye hkat yu ai zawn nga ai myit bai rawng pru nu ai, dai hpe Seng Tawng gaw du ari kau let: "N rai na re, ndai lam daw de ngai hte chye hkat ai jinghku hte manaw manang gaw n nga ai." Ngu myit la nna, dai chyinghka lam e tsap nga ai num jan hpe bai mada yu yang , shi hkra lata hte lang shatu tawn ai wankawk nsam a majaw rai kun, pasa pu zawn hpraw nga ai myiman na sawum pu nsam zawn pu tsawm nga ai sailen nten gata na wa lam lahkawng mung htaphtuk dik ai hkainu si tum baw dingren tawn ai zawn rai hkra tsawm ai majaw, Seng Tawng gaw htim apup dat yu na zawn nga ai myit hpe pyi gan rawng pru nna: "Gwi daw manit mi a shawng e sha pyi labu kaw jit she tat bang kau na daram ntai ai wa mi, ya gaw bai zet gaprep si wa sa yi." Ngu shi hkum hpe lagu matsa let, shi a magyi kaw aja wa mahti manai la nna: "E hkri e, lam lapran ningsin sin mat ai majaw, nanhte a nta manam ngu shang wa nngai law." Ngu tsun u ai. "Ntsang ra ai, ntsang ra ai lau she shang wa rit, ya du hkra wa shakut hkawm ai gaw." Nga htan let wankawk hpe lang shatsaw nna, Seng Tawng hpe nhku de woi shang wa nu ai.

Dai num jan ahpang e hkawm nga ai Seng Tawng gaw shara magup yu asoi da u ai, kaji hkak hkak re shingbwi nta sha raitim, nhku de asan awan di ye lajang kau nga ai, nhku hpe gawk masum di ga garan tawn nga ai, lapran kaw gaw dawdap rai nna wandap kaw wan up tawn ai mung wanhkut naw mawng nga ai, hkra maga na gawk mahtang gaw shatgawk rai nga ai, di mala ni hpe atu asan di gashin dagup bang tawn ai kahtang a makau e nyau chyang langai mung myi gaw atsit lele rai nna hpaw taw nga ai, shatdap na wandap hta mung wan naw chyi amyep taw nga ai re, pai maga na gawk mahtang chyawm me gaw chyinghka lam hta sumpan ahpraw hte noi shinggang kau ai majaw, gata de n mu nga ai. Dai num jan Seng Tawng hpe dawdap chyahpung dun panyep nyep tawn ai shara hpe madun let: "Grai kawsi hpang gara mat na sindai." Nga tsun nna wankawk hpe kachyi law ai yihku hkindu hte hkri ai lahkum kasha ntsa e hkra di mara kau dat nna, tsamai magap hte ntsin htingnat na kawa nhtung hta na ntsin ru la nhtawm: "Maw tsa hka naw shawng lu dat u." Nga ta lahkawng hte tsamai magap hpe jum nna, Seng Tawng a man de ladawn dat u ai.

"Chyeju kaba sa. " Seng Tawng gari gawa nga ai nsen hte tsun let tsamai magap hpe ta lahkawng hte hkap la u yang, alagyi in nyap nga ai manat hkrup dat nna, nhpa wa rai wa sai kun ngu, atsawm yu yu yang she, dai num jan a ta hpe tsamai magap hte rau manat lawm nga ai hpe mu ai majaw, ta lahkawng hpe alawan wan gan dawm nhtang la kau dat ai nga yang, "Kawk kalak." Nga shan a ta lapran na tsamai magap gaw daphpun e hkrat bang mat nna, ntsin mung dapjut hku gadawng ru bang mat sai. Seng Tawng a myit hta grai agam let " Lasa mang ta mung, ahkyak kaw hpanhkyung di ngu ai baw she rai sai. " Ngu myit let dapjut kaw hkaw bang mat ai ntsin hpe hkan yu dat yang, ntsin dai ni gaw shamu shamawt rai dap up gata de ganaw bang mat wa ai zawn re hpe hkan mu dat ai majaw, ya hpa baw masa hku wa rai wa sai kun ngu myi hpe galaw myigrip shading la hkra naw hkan asoi hkyem nga yang, dai num jan gaw lawan dik ai shamu shamawt hte daphpun de sit hkrat wa nna: "Nra ai, nra ai, ya bai du la na re." Nga tsun let dai dapjut e hkaw taw ai hka hpe wan numhtaw hte wan up ahpre gaput kau dat let, tsamai magap bai hta la nna, htingnat de ntsin bai ru mat wa sai. Seng Tawng dai num jan a hkum shingyan hpe shingdu hku hkan yu let : "Daina gaw hkrit gajawng mat ai majaw, myi ka mat ai she rai sam sai. " Ngu myit la nna ntsin hkru hkru la lu rai, hkum gaw dawdap e dung nga tim, myi gaw shatgawk e shat shadu gabrawng nga ai num jan a shamu shamawt hpe asoi let sha la sha nga nu ai.

Dai num jan mung shat shadu let raitim chyahkring chyahkra nrai yang tsawm la ai myi gaba hte dawdap de gayin mada da rai kyin bu nga nu ai. Ten gade dang na ai hpang rai kun; "Tsa, shat sha sanu yaw, grai kawsi mat na sindai. " Nga dai num jan gaw, shat n-gawt hta shat makai si htu matep, simai hpawhkyawn ni hpe dawdap e dung nga ai Seng Tawng a man e sa hpai tawn ya nu ai, shat simai dai ni gaw Seng Tawng sak hkun mali ning du hkra sha yu ai simai baw hta na mu dik ai rai sai. Chyinghka lam hku bung shang wa ai Mali hka bungli hte rau sha grai manam pyaw la ai pantsun bat hpe manam hkrup hkrup re Seng Tawng gaw, gara lam de nna manam pru ai pantsun wa rai nga ai kun ngu ladi nchyun hte manam sagawn yu yang she, shi a man e chyingiawm dung nna shi shat sha ngut na hpe la ai num jan kaw nna, manam pru pru re bat she rai nga ai majaw: "Goi law mungkan ntsa ndai zawn nga manam pyaw ai baw masha mung naw nga a hka i!" Nga myit let, daina na lam e sin mat ai ningsin gaw chyeju ningsin wa nan she rai sai ngu lagu kabu si da nu ai. Chyahkring nai yang, Seng Tawng shat sha ngut sai majaw, shi a man e chyingjawm dung nga ai num jan rawt nna, lahput lapran hku labu hpakang hpe magawn matep kau iet, Seng Tawng hpangde sit tsap nna sha ngut sai shat n-gawt hta hpai la nhtawm, shatgawk maga de shang mat wa nu ai.

Seng Tawng n-gup gatsut kau let dai num jan hkawm tim lagaw sat pyi n shara ai chye hkawm ai hpe hkawn yu taw nga nu ai. Num dai shat gawk na bungli shajin kau nna, dawdap maga de bai gayin pru wa in, wandap e chyingiawm dung bang wa let, hkru htum wa magang sai wan mahtaw ni hpe galaw nawn dinghkrum tawn nna: "Ya tsa nang gaw galaw ganang ga na lai sa ai manam rai nta?" Nga Seng Tawng hpe shachyan dat nu ai. "AWh, ngai gaw htaw Mali hka hku Ura pa na Maran Seng Tawng ngu ai rai ngai, Mali hka nam na ja htu dabang hta ja htu sa nna bai nhtang wa ai rai ngai, ataw hkri nang gaw hpa baw kasha rai nta?" "Ngai gaw Maru Tangbau rai nna shaga mying gaw Kaw Lum nga ma ai. " "AWh, dai rai yang gaw an-gu anrat ni ngu nna shaga hkat ga yaw, ngai gaw asak hkun mali ning rai sai, mayu kasha gaw gade ning rai sata?" "Ngai mung hkun mali ning du sai, anrat rai na re i?" "Rai nga ai, shaloi gaw ngai hpe mung arat ngu rit yaw." "Arat nang hkrai sha nga ai kun? nta masha ni gaw rang?" "Nye nu yan wa gaw Putau de namsi sun galaw ai majaw dai de nga ma ai, gahpu langai gaw num la nna htingbran pru dinghku de sha mat sai, ganau num sha gaw makyina de jawng naw lung ai." "Rat nang hkrai sha ndai kaw hpa galaw nna nga nta?" "Ngai mung galang lang gat dut sa rai nna nga ai gaw e. "

Seng Tawng a myit hta shawoi ndai lam hku lai yang, ndai mayan nta nga ai zawn nnawn kau sai mi, kun daina gaw ningsin gata hta hkawm ai kaw bai gajawng hkrum rai nna, amyit lawut lawat nga mat ai majaw, shara atsawm nchye kau ai she rai sam sai ngu myit la ai hta n-ga, Kaw Lum a shingyaw man hte hpraw nsam ni gaw marit si na zawn rai nga ai majaw, kaga lam hpe galoi n myit sumru sai, shan wan si wa ai she ndum hkra, adi ngu jawm jahta rawng nga masai. Shan lahkawng sinpraw sinna dingdung dingda hpe galang lai di jahta lai mat wa ai hte yuptung lai nna nhtoi hpungtsin ganan sai, Kaw Lum grai myit yak la ai zawn re myiman hte: "Rat e, ya nang gaw grai pu ba la na sindai wa mi, ngai gaw ngai hkrai sha nga ai majaw, yupra hpun nba mung kaga nhkyem tawn lu ai, ngai yup ai langai sha lu ai, nang shawng yup la u, ngai gaw hpawtde nang rawt ai hpang bai yup na nngai. " Nga tsun jang, Seng Tawng gaw: "Rat e, n mai na jaw, nang mung daina tup grai ze kau sai gaw, yup mayu dik na sindai, nang she lau yup su." Ngu htan ai shaloi, Kaw Lum alawan wan: " Ngai gaw nta madu rai nga ai majaw, manam hpe jaw yup ai gaw htung re, dai majaw nang she lau yup na hkyem u. " Nga tsun nu ai. "Manam gaw rai nngai, raitim ngai gaw la rai nga ai majaw, nu num ni hpe tsawra makawp maga na lit ngai ai, dai majaw, ngai gaw ndai dawdap makau e dung let nang hpe sin na." Ngu Seng Tawng gaw la sari sadang atsam hpe tsun madun dat nu ai.

"Nang mahtang manam i? ngai mahtang manam i?" Seng Tawng gaw Kaw Lum hpe ndang dara nna, dai gawk chyinghka lam kaw grang tawn ai sumpan hpraw hpe gayen kau nhtawm, yup gawk de shang mat wa nu ai. "Rat e grai nhkungga ai she tai mat sai, nang hpe ning re yup-ra kaw sha shayup ai ngu mara shum jaw yaw, htawmhpang de ngai ning rat nga ngwi nga pyaw wa ai shani nang hpe bai hkungga na rit nngai." Kaw Lum gaw chyinghka lam shinggan e tsap let Seng Tawng hpe tawngban bu nga ai. Dai yup gawk hta wankawk lang nna tsap nga ai Seng Tawng gaw kachyi sha pa nna, aran ara re panyep kaw mutmut hprawhpraw re lachyit nba mi gayan taw nga ai lai nna, palawng tingsa hte makai tawn ai hpuntawng daw hpe gaw bunghkum shatai re hpe mu mada ai majaw, "Goi law, rat a nga sat nga sa lam hta gaw grai jam jau hkrum sam nga ai." Ngu myit let lachyit nba gang hpun la nna, wan kawk gut sat kau in yup galeng mat wa nu ai. "Rat, an lahkawng jawm yup ga i? mahkawn yan shabrang she re ai wa mi gaw hpa nra na re, grau ahkyak ai gaw ngai hpun nba n lu ai majaw rai nga ai, raitim ya ngai mung grai yup mayu wa sai. " Kaw Lum chyinghka lam e grang tawn ai sumpan hpraw hpe gayen kau nna tsun u ai. "Jawm yup ga le, grai agam sai wa re, arat hpe jam jau jaw ai wa she rai sai, yupra gaw ngai hkrai bai madu sha kau ya, law law ndai rat a makau kaw galeng dat u."

Seng Tawng hkum hpe nhkrem hku galeng dat nna, yup-ra kachyi mi yan ya nu ai. Kaw Lum pantsun bat sha waiwai nga Seng Tawng yan ya ai nyep chyen kaw galeng gumtsun bang wa nu ai, bunghkum hkang hkak la nga ai, sha lu ai gaw Seng Tawng hkrai hkum kau sai majaw, shi a hkra lata hpe Kaw Lum a dukrung hku shawn bang dat ya nna hkum shangun sai, pai ta hte gaw Mali hka bungli loi ahpawt ai majaw loi gashung wa ai zawn nga nna, Kaw Lum a hkum hpe ahpum sit la nna htephtep rai shalum hkat let shada masin salum gumhtawn buk bak Du mung yup nhkyeng kau ang sai, jaja langlang nga nna nhkyeng machyi mat, hkra lata mung ali in naknak nga mat ai majaw, Seng Tawng gaw lagaw hte nshang hpe galaw gabye shading la nna, hkra ta maga de mada dat ai hte, myi she nchye grip, shamu shamawt mung nchye mat hkra mau taw mat nu ai. Ayai aya rai nna je mat sai nyep chyen hta shi galeng taw nga nna, shi a hkra maga na ta ntsa e gaw shan hte hpyi ni akap mat sai hpungkum nra gaw, dukrung marung nra hte matut manaoi rai shi a ta hta mara nga ai, garep nra chyawm gaw ayai aya rai dai makau hkan ayai taw nga ai, dangban nra hte lahput lapau lagaw laseng ni gaw ajinghtum sha rai nna hkumtsup taw nga ai, shan a lapran e zaibru zaini hte gayau gaya rai nna, amyawng amya rai ai hte nsa kaba shaw ai sha jawm madat nna, galeng yup taw nga masai.

Mat sai lachyit nba langai matep gazu taw nga ai, dai nra ni gaw jahpawt manap jan mai dinghtan bun ai majaw, hpraw nsam ni tu gala nga ai. Shamu nchye mat sai Seng Tawng gaw tsawmra na kra mau mahka la nna, byin ai lam hpe asan sha chye lu na matu, nshamu hkra mat sai bawnu hpe gau jasat nna myit sumru mat wa nu ai. Mana shi shang manam yup ai nta na nta madu gaw ndai she rai sam ai ngu myit la lu nna, gahtan hku lwi gapun pru wa ai salat hpe gatsut kau nna, hkra lata hpe yat sha gang shaw la nna, rawt dung nga let dai makau mayan hkan atsawm mada shara yu yang she, Mali hka kau hku lai ai lam a lam dung lahta maga na ga hkapau langai mi hta maisak hpun hte shachyaw nna zaibru ga hta nhkyeng nhkyang rai jung nga ai udang hta "Maran Kaw Lum, 1968 ning pra sa nna, 1992 ning e madu yesu hta yup pyaw mat wa sai." Nga kap nga ai. Dai maisak udang a pai maga lunghkrung langai a ntsa e tu abya nga ai pantsun chyawm gaw, manam pyaw bat sha waiwai nga gashun gashe rai noi abya pu tsawm taw nga ai. "AWh, mana ngai shaga manam shang wa ai shingbwi nta gaw Kaw Lum a lupding lupba she rai nga a hka! hka kau na zaini hta sung hkra bai nlup da ai kaw, lanam ta na hka hpunla e wa ahtu satsang ai majaw, ginrawn mat nna, shinggan de kra taw mat ai rai nga ai. " Nga Seng Tawng labu palawng kaw kap ai zaibru ni hpe rawt ahpu kau nna, chye ai ni hpe ndai shara hta byin yu ai lam ni san sagawn la na matu, lam lamaw de gagat mat wa sai.

Lai mat wa sai lahkawng ning a shawng e, Makyina Shata pru manau wang makau na Maran Kaw Lum gaw, ganu yan gawa hte gahpu gaw Putau de namsi sun sa galaw nna, shi ganau Ma Bawk hte Makyina nta e nga nna Kaw Lum gaw ja maw hkan gat sa dut rai nna, jawng lung nga ai ganau jan hpe jawng htu u ai. Lani mi na gat dut sa gaw, htingra ta re ai majaw, lamu na jan e gaten ai hte, ga gata na salu e kabawng ai hte, zaibru jang e garau ai hte rai pru ai salat gaw kara pyi hkrut kau lu sai, hpang gara ra ai gaw panglai hpe pyi marai mi hkrai lu jahkyet kau lu na zawn nga ai hpe hkam sha nga ai Kaw Lum gaw, ya sha nra yang ja htu nhkun e ing rawng nga ai hka hte myiman htawk myit myit rai nna, ta lahkawng hte hka chyagawt lu la la rai gahtet shakawp nga u ai. Hkring nai yang Kaw Lum a kan bungbung nga nna ngoi garu wa ai ja manai machyi wa ai majaw, zaibru dabang na tsanlun hpun nhpang de gagat sa nna, nam sa hkawm ai gaw, ngut sai ngu rawt mat wa ai hte bai sa mayu yu re majaw, hpang jahtum e gaw ndang gagat mat nna, tsanlun hpun npawt e dung shanan taw nga nu ai. Jan sinna maga de garet mat wa sai raitim, gahtet ai lam gaw n yawm nga ai, Kaw Lum a gat dut manang ni gaw nta wa mat saga nga nna, manang shaga jahkum yang she, Kaw Lum niawm nga ai majaw, shara magup hkan tam shaga hkawm wa yu ai shaloi, tsanlun hpun pawt e kan nau mase mat ai Kaw Lum gaw labu pyi nlu hta bu la ai kya hpuba nga ai hpe sa mu nna, manaw manang ni yawng gajawng gaja hte nta niu woi du wa tim, mare kaba de woi du wa nna, tsi la ga nga jawm bawng la in Kaw Lum a gat dut htingga kaw rawng ai lachyit nba sha la nhtawm, Kaw Lum hpe dai nba kaw galeng tawn, nba a jut mali kaw jum magra nhtawm, wa lam de jawm hpai gagat mat wa manu ai.

Ja htu dabang kaw nna hkawm pru mat wa ai gaw, mare du na daw madap naw rai yang, "Aka lu, hkum hpai ginrang yu sa law, machyi la ai lau she hkring yu mu." Kaw Lum lachyit nba matu kaw gang tawn nna, yat sha tsun u ai majaw, manang ni lam makau e Kaw Lum hpe lachyit nba hte galeng tawn nna, shanhte mung sa la nga ma ai. "Aka law• machyi la ai law, e nu ndang sharang si wa re ni ai law, aka lu ..." Kaw Lum a madai nsen gaw galang hte galang nga kaji mat wa nga ai. "Naw sharang u lu yaw Kaw Lum, chyahkring mi nai yang mare de du ai hte tsi htu la jang gaw mai na ra ai, she sharang u. " , "Grai naw awai u lu yaw." Manang ni Kaw Lum hpe ashun let gade shalan tim, Kaw Lum a sai nsam nrawng mat sai myiman na ahpa rai hkraw mat sai nten gaw kachyi chyi galap tim, hpa tsun ai nna mat sai, manang ni goi lagoi ngu hkan shaga abrut nga dangam Kaw Lum a tsawm la ai myi hpe abwi sha myidi kau dat let nsoi nsa dumhprut mat wa nu ai. Kaw Lum e ahpre di kabai kau tawn da ai gat dut manang ni gaw, ningsin mahka e gade gaw nhkap hkap re lam gaang kaw mau pahke shaw dung nga masai, Kaw Lum a moimang hpe hpai nna ningsin e masha ni a mare amya shang wa na hpe mung n-gwi, shi a nta masha ni hpe htet na matu mung shanhte gaw gat dut dabang e she jawm chye hkat ai ni she re majaw, kadai jan kadai wa a kasha rai nga ai hpe nchye lu ma ai majaw, nhtet shana ya lu nga ma ai, shingrai kaning nan nchye di sai manang ni gaw jawm dup la nna, lam kawn gade ntsan ai kawng palaw gata yang me, shingban hte ningsun hku krawk nna, gat dut num manang langai mi gun ai kachyi pa ai panyep hte dai nhkun kaw htung bang tawn, shi a palawng hte lungdin langai hpe makai nna, bunghkum tawn ya in, shi pe hpai ai lachyit nba hpe gaw jahpun da nna jawm ahpre lup kau da manu ai.

Tsawmra na ai hpang ganu gawa ni sa mu sagawn la nna, moimang makoi ai kyu hpyi let dai lupba hta udang mung adit jung tawn da ya manu ai. Shingrai byin ai lam hpe chve lu sai Seng Tawng gaw, masin hte hprut nga, goi law, mahkawn jan nsi ai wa, mungkan ga ntsa sa pra ai gadun la ai ten hpe n-gaw nwai hte bai shakram kau da ra ai hpe myit ndik lawm ai hte, grau yu yak na zawn re gaw, dai nrut nra ni zaibru jang ntsa e lam garai taw nga ai majaw, nchye hkat tim, mana shi hpe hkap daw lajang jaw woi manam la ai hpe chyeju dum ra nga ai ngu myit la nna, shi lu htu gun ai ja ma hkra hpe lauban ni hpe dut ya kau nna, lu ai gumhpraw hte duu mari la nna, masha saw jat la rai Kaw Lum a moimang na ni hpe duu kaw jahkum bang nna, nungsun hku sung sung htu la rai lup lajang kau nna, pyilat ga ni hte lup hpe ngangngang kangkang gaw kau tawn da nhtawm, dai zaibru jang na lup nnan hpe hpang jahtum hku gayin yu kau da let shi a buga de chyang chyang hkawm mat wa nu ai.