UDI LATA AT JAN

UDI LATA AT JAN

HPAN JA

(Sumrai laika ndai hpe, sumrai kaji hku nna galang mi ka shabra yu sai, ya gaw sumrai gadun hku nna bai galaw ka shabra ai re, lahkawng lang ka shapraw ai lachyum gaw, sumrai laika gaw madu sha chye myit jahtuk la jang, gara hku ka dat tim mai ai, gade daram ka na gaw laika ka ai sara ni a atsam sha rai nga ai, bai ka jat ai gaw shi a lakying lashan sha re, lachyum nshai ai. Lama hti hkrup ai ni gaw, shadawn maram yu yang, sumrai laika ka hpaji loi jat la lu na hpe kam ai.)

Jahpawt manap ninghtoi san wa ai ten ne, Samdang Kai gaw, maidang de lanyau langai mi bang tawn tim chye lu na zawn nrai ai mawa labu hkawng ling hkawng lang re bu tawn, kawa lap sumla kap ai mi palawng hpun tawn, kara gaw gumra mai zawn di laju jut kaw gyit tawn rai, manap gat sa wa nu ai. Shi gat lawk de shang wa ai shaloi dat wan pyi garai nsat ai. Wa shan seng kaw wa shan mari hkyem nna, wa magyi, wa garep, wa kan ni hpe gale galau di gang hkrai gang galap yu nhtawm: "Wa ndai gaw wa yi kun? wa la kun?" Ngu san dat u ai, wa shan dut ai wa pyi loi mani sai sai rai shi hpe yu tawn nna, wa shan gahtam ai saboi a gata maga noi tawn ai, wa la sumprang hpe, shi a man e "buk" nga hkra hta kabai mara tawn ya nhtawm: "Mawk, nhpa shan rai kun nang yu la u." ngu dat nu ai. Shaloi Samdang Kai gaw matu kaw wa mun sa sa rai hkra majawm tu ai wa sumprang gang la nna, wa kan wap wap re kaw sharawn tawn dat yang, wa dai a sumprang rai na zawn rai jang she, loi mi ganyung ganyang re wa kan hpyi gang jen la nna, gahtan she ganyung la hkra yu dat nu ai, wa hpyi na wa mun hkindai ni masum brum brum rai tu taw nga jang she, wa la shan nan rai sai ngu myit dik nna: "Joi mi gade de dut na re ta?" ngu rawt mada san dat nu ai. "Nang shan zin ra na kun, sau lawm ai madaw ra na kun? nang ra ai shan hta hkan nna she manu tsun ga." Wa shan madu wa wa htau nhtu hta la nna gahtam na hkyem let san u ai. "Ngai dangbau shan joi mi mari na, joi mi gade de re ta?" nga nna, wa maidang e hkra ta layung madi tawn nna bai san dat nu ai.

"Magyi shan gaw joi mi mali shi manga dut ai, hka, ta dawm la kau u, ngai gahtam ya de." Shan dut wa wa htau nhtu sharawt dat nga tim, Samdang Kai gaw ta shalawm kau na nhkrit ai, wa dangbau gade nde jum tawn nna, gade nde na gahtap lat kau ya, gaang na shan zin daw de na shan she ra ai, ngu nu ai. Shan dut ai wa: "Ngai chye nga ai law." Nga nna gahtam dat ai, dang hkyum maga de loi shanang mat nu ai. Dai gaw shi galoi mung gahtam htam re ladat rai nga ai, magyi shan re nga tim, danghkyum maga na shan gaw nau nzin ai sha, hpyi sau shan gayau gaya di nna dut sha ga ai majaw, shi chye ai hku gahtam lat dat nu ai re. Samdang Kai wa shan gahtam mayan kau ya ai hpe nkam yu let: "Gaang de garai ndu nga ai le, ndai kaw na sha gahtam ya rit." Nga, hkra ta layung hte magyi shan bai dip madun nu ai, wa shan dut lauban wa Samdang Kai hpe nau nngwi ai hku yu dat nhtawm, yan u ngu tsun dat let, masin mi asi wa dangbau hkarum nra she ga hkra gahtam ga dat nu ai. "Ara, ndai hku na joi mi gahtam ya ni, jan jang nra ai lu." Samdang Kai wa danggum maga de na grai hkye tsawm ai shan madi tawn nna bai tsun sai. Shaloi shan lauban wa shi ra ai yang na wa shan gang shading la hkra bai gahtam di la nna, jang ban kaw hta bang hkyem nga ai kaw, Samdang Kai bai hkan gare la nna, dip hkrai dip manat yu yang, nra lapau gachyi law ai mi manat hkrup dat nu ai.

"Ngai shan zin sha ra ai ngu nga yang me, hpa rai na shalawm ya ai re hka, lawan krau kau ya rit." Nga nna tsun ai ga gaw, pawt ga she rai sai. "Wa sat ai kaw sai hkaw, wa shan kaw nra loi rawng ai gaw mara she rai yang me, ya ngai dapawt manap na shan • nnan dut ai majaw nang hte nkam tsun hkat ai law." Shan dut lauban wa nshi grai masen ai hta galai la nna, wa shan kaw gahtam lawm ai nra hkyep bai se kau ya rai, jang ban kaw hta bang dat nna shen yu yang, joi mi ja ja rai sai. "Ajang gaw man ai rai kun, loi hkring ngai kaga hkan gang yu yang joi jang ndu jang bai nhtang hkrat wa nna sa anya na nkam nngai re lu." Samdang Kai jang kaw chyan mada let bai tsun dat nu ai. "Gara kaw mung sa gang yu su, lama shan ndai joi du na hte mi sha ra tim, ngai nang hpe alaga jaw sha kau na!" Shan dut lauban wa bala satik tingsan kaw shan hta bang la nna, shi a man de hkra di tawn ya nhtawm, gumhpraw ya na la nga nu ai. Gumhpraw ya na shaloi Samdang Kai manu bai manai sai, shi tsun ai: "Na wa shan ndai garai ndut yu ai rai nga ai le, ngai shawng mari sai re gaw, joi mi mali shi shi di ga, ngai shawng mari jang hpaga grai gaja na nit dai." Nga tsun let, gumhpraw lap mali shi tup sha shaw ya kau da nna, shan tingsan hta la nu ai. Shan dut lauban wa myit grai npyaw let: "Nang zawn rai shan mari sha ai ni hkrai rai yang, anhte shan dut ai ni matsan si mat na hku re." Ngu dat nu ai.

"Nanhte shan dut ai ni lahpat mi lu tam ai gumhpraw gaw, ngai shata mi tup tam ai hta grau law nga ai mu." Ngu aga htan let tawm rai mat wa sai. Samdang Kai shan dut lawk kaw nna namlaw namlap si mai dut ai gat lawk de shanam gaubawng bai sa mari ai shaloi mung, myit mi alawm, hkatum mi ashang rai, shanam mari tim shanam ru, shanam lapran hkan na aga, shanam ganu ni ma hkra gang gyi apun kau nna mari la, gaubawng mari yang mung gaubawng ru, ginsa mat wa ai lap ni abrut di kau, bahkri si mari ai shaloi mung aga e hta dignren tawn yang maren sha kaba ai sha mari la rai, gatrai madu ni gade hkan je tim je ndang, shi ra ai she madung ai hku nan mari shachyip la nna, mawdaw lam de pru wa yang, manap jan lagaw pyi nta lapran hkan shingkra hkawm magang sai. Rung bungli sa na hpang hkrat wa sai ngu, myit tin magang lam hkawm amat rai, laisi hpun tu dingren ai masha hkawm lam hku lamat mat wa nu ai she, laisi hpun pawt kaw, hkaw hpraw hkaw tawn nna, na kaw gumhpraw lakan she kan dang-la tawn hkra re bum Mawa num langai gaw, yihku hte makai gyit ai Udi dut dung nga ai bai wa mu nna, nta e Udi nlu sai myit dum dat rai, Udi dut ai jan a man e shajawm dung bang wa nna: "Udi ndai ni gaw bum ga na Udi re ni? Jak ushat yaw ai Udi re ni? Shi na gade de dut ai re?" Nga san nna, Udi numhtan hta mahkan yu dat nu ai. Miwa gumgai gaw: "Bum ga hkai nu sha yaw rai rem ai U ni di ai Udi re, shi na gumhpraw hkoi shi mali li dut ai." Nga, mani sha sai sai rai tsun dan nu ai.

Samdang Kai gaw shi mari lang ai wa shan joi mi hte si mai hpe pai maga de aga e nan hkra di tawn kau nhtawm, myit mi alawm rai Udi bai lata bang wa nu ai. Shi Udi makai langai hte langai kaw na Udi loi grau kaba brau brau re ni hpe shaw lata la nna, du she nhkyeng la hkra, na kaw shaang nna naw shawng lang garu yu, shara ai nna jang she, ta lahkawng hte Udi magum la nna, myi tai mi myi di tawn nna, jan maga de bai htawng shati yu rai yang, ahtoi asan re mu jang she, di lang nrai nga ai ngu, shi a lahprang gata ang kaw gahkyin tawn dat dat rai, myit mu sam si lata taw nga ai hpe, Udi dut ai jan nkam yu si wa nu ai majaw: "Udi kaba ai nang hkrai lata la kau sayang, ngam ai kaji gajaw re dut sha yak ai re law, gayau gaya di nna she dut na." Ngu jawp dat nu ai. "She lata le, gumhpraw ya nna she mari ai me, ngai alaga hpyi la ai gaw nrai, gatrai mi gaw lata ma dut ma she rai yang me." Nga nna dingyang naw lata sham taw nga nu ai.

Samdang Kai Udi lata let, Udi dut ai jan hpe jinghpaw ga pyi nchye na a lu ngu, kinsha lasha ga hte angun let, Udi hkun dang lu lata tawn nu ai. Shi Udi makai mi bai hpya yan bang wa ai shaloi, Mawa num jan gaw, gut palawng hpe hkindang pyi ndang ai hpun tawn, gyepdin gaw bawlung htawng ai ni din ai baw din tawn re la langai mi, Samdang Kai a wa shan tingsan hta lang mat wa ai mu nna, tsun dan ngu yang lagut wa shi kaw ari shayu na hkrit tsang rai, Udi numhtan hkan gang let: "Udi hkum lata sa, daini gaw wa shan wa gangau sha nu." Ngu Udi numhtan gashun ahkye dat ai kaw, Samdang Kai bai rai jang mung: "Gumhpraw hte she mari ai gat rai me, she lata law!" Nga pawt nna aja wa gare dat ai, Mawa gumgai e dat kau ai kaw, shi mung lahkap dung shayup kau nna lagaw nlu shapyan la mat ai majaw, aga de dung galang mat wa ai, shi lata tawn ai Udi kaw nan myet di dung ga kau dat nu ai rai.