WUNPAWNG SALUM
Hkawng Ze
Lana de mi na ningrim jan shang mahka hta, sara Labang Seng Doi Hkawng gaw, makau grupyin a tsawmhtap ai shingni ni hpe yu chyai let, "Myit mada nga ai Wunpawng mungdan" ngu ai ga baw hpe la-kap nna, sumrai ka mahkret nga yang, sara ma Nhkum Seng Pan e hpang hku lanyan sa wa nna, myi sa pat dat ya nu ai. Seng Doi Hkawng gajawng ai ta ka nga ai maisau pa hte pawngtin hpe ga de tat jahkrat kau dat nu ai. "Aga! Gu Doi grai gajawng mat sai i? Ah Pan grai tawngban sai yaw." "Aga! Gadai kun she ngu yang, Ah Pan she rai nga ai gaw, ya gara hku nna du sa wa ai law, Ah Pan." Seng Pan gaw, Seng Doi Hkawng gajawng nna jahkrat kau dat ai maisau pa hpe hta hti dat nu ai. "AWh! Gu Doi amyu sha hte seng nna bungli galaw nga ai ten hta, Ah Pan grai myit n rawng ai hku na, gu Doi hpe sa shala shut kau dat sai, Ah Pan a majaw gu Doi dingbai dingna byin mat na sai i?"
"Ah Pan e, gu Doi gara hku mung n myit la ai, gu Doi mung ya sha bungli gatsi ni hpe marawp chyai let, manang mung n lu rai majoi n kam dung kau ai majaw, laika hpe manang shatai nga ai gaw e, ya Ah Pan sa wa ai hte hkrak rai sai, gamung jawm jahta chyai ga le i." "Um, gaja ai le, gu Doi ka tawn da ai sumrai grai hkrak nga ai le, Ah Pan mung gu Doi zawn amyu sha lam kaw, laili laika shingni atsam hte grai shang lawm shakut mayu ai re wa! Ah Pan gaw, myit hta rawng tim, n chye ka shapraw taw nga ai, gu Doi aten lu yang, Ah Pan hpe mung sharin ya yang n mai na i?" "E le, Ah Pan ya na zawn myit lawm ai nga majaw, gu Doi grai na kabu sai. Anhte Chyurum amyu sha ni laili laika su hprang ai lam n nga ai majaw, lam shagu hta grai naw gawngkya nga ga ai, Ah Pan myit lawm ai nga jang, gu Doi sharin ya na le yaw, Ah Pan mung jawng bungli n kyin ai ten hta, gu Doi kaw sa wa rit le."
"Ah Pan grai na kabu sai, gu Doi gaw, myu sha laili laika rawt jat wa na lam hta, ya na zawn grai shakut da-ting nga ai hpe mu lu ai majaw, Ah Pan grai yu n-gun lu ai, matut shakut u yaw, gu Doi." "Ya na zawn n-gun jaw la ai majaw, Ah Pan hpe grai chyeju dum dik sai, gu Doi mung byin mai ai atsam hte amyu sha lam kaw apnawng ai lam sha re, amyu sha langai mi grin nga lu na matu gaw, laili laika rai nga ai. Tinang amyu a laili laika hpe madung n tawn ai sha, maigan wa kaw hkrai shamyet lawm nga ai rai yang, tinang amyu gaw lani hte lani htum mat wa na sha re. Anhte amyu ni mung, maigan wa a ga, laika hpe chye hkra, kungkyang hkra sharin hkam la gaw mai ai, raitim, tinang gaw kaga tsasam maigan amyu n re, galoi tim rai na n re ngu ai myit rawng chye ra ai." "Um, rai nga ai, gu Doi zawn rai, tinang amyu sha lam hta grai shakut mayu ai ramma, myu sha nlang ma hkra nga wa ai rai yang, anhte myu ni grai rawt jat galu kaba wa na re. Tinang amyu sha laili laika, htunghking rusai labau, ahtik gamung sumtu sumnep ni hpe tsawra manu shadan ka shalat ai myu sha ningka sara ni law htam wa ai rai yang, anhte a myu sha laika gaw grau madang tsaw maden sumhka wa lu na re ngu, Ah Pan kam nngai." "Ah Pan tsun ai teng ai, gu Doi mung anhte myu sha ni tinang a myu sha laika hpe manu shadan ai hte grau nna myit maju jung rawt jat wa hkra, ka shalat lu ai ramma ni hpe grai myit mada ala nga nngai." "Gu Doi e, myu sha bungli hta myit maju jung galaw nga ai gaw, hkrak dik sai, raitim gu Doi nang gaw myu a magam bungli hkrai myit nna madu a asak kaba wa sai hpe mung dum ra ai re lu yaw." "Ah Pan, hpa baw hpe tsun mayu ai mi? Gu Doi nau n chye na kau dat ai le."
"AWh, gu Doi a magam bungli hpe shingtau garum ya na ningrum ningtau ra sai ngu tsun mayu ai lam rai nga ai le, gu Doi." "Aga! hpa wa kun she ngu yang." "Gu Doi, nsin grai kaba wa sai, Ah Pan naw wa sana yaw." "Um, gaja sai, gu Doi wa sa dat na le, Ah Pan." "N ra ai law, gu Doi mung hkring la sanu, hpawtna bai hkrum jahta ga." "Gaja sai, Ah Pan." Nhkum Seng Pan gaw, ningrim jan shang mahka kaw na, nsin kaba mat du hkra myu sha lam hte seng ai gamung jawm jahta chyai let, bra mat wa manu ai. "Taling... Ling.. Ling.." Sara Labang Seng Doi Hkawng kaw chyenan shang wa nu ai. "E... Gadai kun?" "Hihi•. Gu Doi mung, Ah Pan hpe bai shala taw sai, n kam tsun dat ai lu." "AWh..! Ah Pan kun? Gu Doi galang ta chyenan hta jum dat ai majaw rai nga ai, tawngban ai yaw." "E law, gu Doi, Ah Pan mung majoi tsun dat ai she re gaw e, ya gu Doi gara kaw rai? Ah Pan sa wa na yaw, manang ma lawm ai, gu Doi rau ai kun?" "Gu Doi nta kaw manang ni hte jahta nga ai, sa wa rit le, Ah Pan. Manang ni hpe mung shachyan ya na" "AWk, ya sa wa sai yaw, gu Doi." "Gaja sai." "Aga! Hkau Doi Hkawng, gadai hte wa shaga taw nga a fa? Gu Doi, Ah Pan she nga tsun hkat nga ai le, ndai wa mat mat ai garep nra hpe bai mu tawn sai rai nga ai."
"Aga! hpa wa tsun taw nga ai mi? Manang ni a man kaw gaya gahpa nga hkum tsun taw yu u." "Hehe.. Hkau Doi chye taw sai yaw." Seng Doi Hkawng hte manang ni jahta pyaw taw nga yang, shinggan de na shaga nsen pru wa ai. "Gu Doi, Ah Pan ni du sa wa sai." "E, Ah Pan shang wa marit." "Gu Doi mung manang ni hte she rai nga ai i?" "Re, Ah Pan, awh, tsawmhtap ai Jinghpaw htunghking nga ai hte maren, manang ni hpe naw shachyan ya na yaw, Ah Pan." "Gaja sai, gu Doi." "Ndai gaw, gu Doi a jawng lung manang re, gaji ten kaw na grai hku hkau ai hte ganawn wa ai tsawra manang re. Wunpawng Zaiwa bawsang kaw na re, amyu rusai gaw Zi Lahpai ni rai nna, mying gaw Zau Myu nga ai re. Ya yang, Sumpra bum ginwang kaw, amyu sha ni rawt jat galu kaba lam hta jawng sara jawng up magam bungli hpe galaw gunhpai shakut nga ai sara re. Ndai manang wa gaw Wunpawng Lachi bawsang kaw na re, rusai gaw Lagwi ni re, jinghpaw hku gaw Labang ni nga ma ai, shaga mying gaw Ting Zung nga ai re, magam bungli gaw, Lawk Hkawng ginwang kaw ramma ni hpe myu sha laili laika hte seng na, woi awn taw nga ai sara re. Ya ndai Laiza de du yu wa ai lam gaw Ginjaw htunghking hte laili laika magam dap kaw na woi awn ai Jinghpaw shata hti laika sumtang tang hpawng ha shang lawm madat hkaja la na matu du sa wa ai sara yan re."
"Ya na zawn, amyu sha lam hta myit machyu jung shang lawm gunhpai nga ai manang ni hte hkrumzup hkuhkau la lu ai majaw, Ah Pan a myit hta grai n-gun lu ai hta sha n-ga, arawng mung la nngai." Nhkum Seng Pan gaw kagu Labang Seng Doi Hkawng shachyan ya ai manang ni hte langai hte langai ta shakram dat nu ai "Ya gaw, Ah Pan hpang maga de na manang yan hpe bai shachyan ya yang mai na kun?" "AWh... Eh... Gaja sai, gu Doi, nau jahta na bai gan malap taw nga ai. Htunghking nga ai hte maren shachyan shaga ga nga yang, ngai gaw Nhkum rusai kaw na re, mying gaw Seng Pan ngu shaga ai, magam bungli gaw Alen bum IDPS hpaji jawng hta e, apnawng sara lit hpe gunhpai nga ai re. Ndai manang jan gaw, Maran gasha re, mying gaw Ja Brim nga ai re. Ndai manang jan gaw Wunpawng Lawngwaw bawsang kaw na rai nhtawm, rusai gaw Jumhpawk ni nga ma ai, mying gaw Dau Naw nga ai re, Ah Pan hte rau magam bungli jawm gunhpai taw nga ai, nga shara gaw Myitkyina Shata pru lawk kaw na rai ga ai."
Labang Seng Doi Hkawng gaw, manang ni hte n myit mada ai sha, n bung ai ginra shagu na manang ni hte hkrumzup lu ai majaw, myit hta grai kabu nga ai. "Ya na zawn hkrumzup lu ai lam gaw, Karai Kasang a shaman chyeju nan rai sai, grai kabu hpa rai sai i? Manang ni." "Um, rai nga ai, gu Doi, Ah Pan mung ya na zawn manu dawdan n lu ai amyu sha lam kaw grai myit n-gun Iu na zawn rai hkra shang lawm shakut nga ai myit rum manang ni hte hkrumzup lu ai majaw, grai n-gun lu kabu awlaw nga nngai." "Ya na zawn, hkrumzup lu ai gaw grai gaja ai lam rai nga sai, anhte ni yawng, myu sha laili laika grau nna rawt jat wa lu na matu, ta gindun let shawng lam de lahkam sa wa ga i!" "Ara, rai sa law, ya na zawn, hkau Zau Myu a ga na lu ai majaw, ngai ninghkau Ting Zung ndang tsun hkra kabu dik sai law." "Re, Ah Naw mung, grai kabu nga nngai." "Gu Doi, dai hku nga yang, du na ten hta Jinghpaw shata hti laika sumtang tang hpawng hta anhte ni yawng shang lawm lu na matu, dai na a yaw shada lam hpe loi tsun dan yang mai na kun?" "Aga! Ah Pan e, hpa rai nna n mai na law, she mai le, gu Doi tsun dan na yaw."
"Lawan she tsun dat yu rit, hpu Doi. Ganau Ah Naw mung grai madat mayu wa sai." "Tsun dan na yaw, ndai Jinghpaw shata hti laika sumtang tang hpawng galaw ai lam a yaw shada lam gaw, anhte Jinghpaw amyu sha ni gaw moi jiwoi jiwa ni a hkringhtawng ban prat hta, ya na zawn maisau pa kaw ka shakap tawn ai shata hti laika n nga ai. Anhte a gaji gawa ni gaw, makau grupyin a shingra maka ni, du hkra ladaw galai shai wa ai lam ni, shata mahkawn shayu ai lam ni, lamu na shata hpe hkrai sha madung tawn nna, shaning shata kaw yu nna hti ai majaw, aten na wa jang, du hkra ladaw ni gahprai wa ai lam jahkring hkring byin pru lai wa sai. Ya prat hta jan hpe madung tawn nna, shaning shata hti ai hpaji bai mu sawk jat ai majaw, hkumtsup tangdu ai shaning shata hti ai lai masa byin pru wa sai. Dai hpe anhte Sinpraw dan masha ni law malawng wa 'Inglik shata hti laika' ngu ai hku nna, chye na nga ga ai. Sara Byin Gregawry XIII a lakhtak hta sawk tam shagrin da lu ai re majaw, "Gregawrian shata hti lai masa " ngu na mung, labau shang tsun lang nga ai re; Yesu shangai paw pru ai aten hte shingdaw nna, "Hkristu shata hti laika" mung nga ma ai.
Shingra masa hte maren, jan shata shagan hpaji hku tsun ga nga yang gaw, jan hpe madung tawn ai shaning shata hti lai masa rai nga ai. Hkumtsup hkra gaw, sara kaba ni tang madun wa ai kaw she madat la saga i, Jinghpaw shata hti laika galaw shapraw sa wa ai a yaw shada lam gaw, anhte Jinghpaw ni kaw mung gyin shalat sawn shapraw ai lam ni madang tsaw wa lu na matu hte anhte Jinghpaw amyu sha ni lai sai ten hta akyu jashawn jai lang mat wa ai htunghking lang arung arai, ahtik laika, aga sumtu ni hpe grau nna shangang shakang sa wa lu na matu rai nga ai." "Grai hkrak ai yaw, shata lam she rai nga ai le i? Gu Doi, rai yang, ndai lamang hpe gaw, gadai gara wuhpung kaw na woi awn ai rai?" "Ndai lamang hpe gaw, anhte a tsawra hkungga ai du kaba Sumlut Gun Maw kaw na woi awn nna, "Ginjaw htunghking hte laili laika magam dap" kaw na tatut lit la hkrang shapraw galaw sa wa ai lam rai nga ai." "Aga! Anhte myu sha yawng a matu grai akyu kaba ai magam lit yi-ngam she rai nga ai le i? Gu Doi." "Re, Ah Pan." "Hpu Doi, ndai yi-ngam hpe galoi kaw na galaw hpang wa ai rai?" "Ndai yi-ngam hpe gaw 2016 ning shata man 12 praw 14-15 ya laman lahkawng ya tup Hparat panglai Jinghpaw shata hti laika shapraw ginjaw kaw galaw lai wa sai.
Ndai hpawng lamang hta, Miwa gumsan mungdan na du kaba Manam Tawng ( Htoi Man), Myitkyina de na du kaba Wawn AWng ( Hkasha Uma AWng ), sara kaba Maju Tu Ja (Hkawp Pungwa), sara kaba Lungiun Tu Raw, Putau de na sara kaba Htinse Htin Be, Laiza kaw na Pungga Sinwa AWng, Hprup La San ndai machyoi ninghkring sara ni shang lawm tang madun mat wa ai lam galaw sai. Matut nna bai galaw sa wa na magam lit yi-ngam hta gaw, Miwa mung, Indiya Asam mungdaw, Jinghpaw mungdaw ginra shagu na machyoi ninghkring hpe bai shaga nna galang mi bai, sumtang tang madun hpawng galaw na re nga nna, du kaba Sumlut Gun Maw kaw na tsun numhtet tawn ai, dai ngut jang she, rapdaw ningbaw hpaw shabawn na Jinghpaw shata hti laika hpe galaw sa wa na re." "AWh, hkrak sai, hkrak sai, ndai zawn re ai hpawng lamang ni hia, anhte ramma ni mung shang lawm lu ai rai yang, gade sha gaja na wa i? Hkau Doi?" "Re, hkau Zau Myu, anhte myu sha ni wa, tinang amyu sha lam yan kaw grai shakut taw nga ai zawn raitim, sawt ai myit jasat ni naw rawng nga ai, madung gaw amyu langai mi grin nga lu na matu laili laika, tsun shaga aga, htunghking labau ni gaw madung rai nga ai."
"Um, rai nga ai, hkau Doi, ngai chye na tawn ai hku nga yang mung, amyu sha langai a maka kumla isaw wa lu na matu gaw, anhte myu sha ni tinang a myit kraw lawang gata hta galoi mung dum nga ra ai lam gaw: 1. Ginru ginsa labau nga ai myu. 2. Ahtik ga lu ai myu. 3. Mungdan lu ai myu. 4. Tengman ai makam masham lu ai myu. 5. Htunghking ningli rida maka Iu ai myu. 6. Lik laika lu ai myu. 7. Galaw lu galaw sha magam lit yi-ngam lu ai myu ni re ngu ai hpe, n malap ai sha, myu sha lam hta anhte Chyurum sha ni yawng, shang lawm shakut gunhpai nga ai rai yang, anhte Jinghpaw myu sha ni grau nna rawt jat wa lu na re ngu, ga lahtum n shut kam nga nngai." "Teng dik re... Gu Zau Myu, anhte daini na ramma ni wa, tinang amyu a, laili laika, ginru ginsa labau, htunghking lam ni hpe makawp maga hkangzing mayu ai myit n rawng ma ai. Tsasam maigan wa a hpang kaw hkrai hkan shang lawm nga ai rai yang, anhte myu sha ni a maka gaw, fsawmhtap na lam grai naw yak na re." "Ah Pan, tsun ai lam jaw ai. Gu Doi shara shagu du hkawm mat wa ai shaloi na, anhte ramma ni hpe yu dat yang, tinang amyu sha laika hta myit lawm ai ramma ni nau n nga ai hpe mu dat ai shaloi, myit kraw gata maroi nni ai zawn ngu hkam sha yak nga nngai. "
"Um, rai nga ai, gu Doi jawng kaw raitim, jawngma ni wa tinang amyu sha a lam laili laika sharin ten rai jang, jawngma ni myit n lawm, ka htung ka lai ni sharin tim, myit machyu jung ai lam n nga ai majaw, anhte Jinghpaw laika sharin ai sara ni sara ma ni jawng gawk shang ten hta grai myit gaji ai zawn nga hkam sha ai she re gaw, gu Doi." "Teng na re, Ah Pan. Dai zawn re mabyin ni ngai mung grai hkrum lai wa sai. Ngai chyawm grai rai nna hpaji madang gaw n nga ai, raitim, gu Doi a myit kraw gata hta amyu sha laili laika rawt jat wa na hpe grai myit sharawng ai, ya galaw taw nga ai bungli ni raitim, byin mai ai hku nna ladat shaw sawk hkaja nga ai lam sha re. Gu Doi sawk hkaja tawn ai ahtik labau, myu sha laili laika ka ladat ni, laika hti ladat ni ramma ni hpe ginlen sharin ya ai lam ni grai galaw sai. Rai yang, ramma ni myit n lawm ai majaw, grai sharin yak ai. Jawng kaw sharin tim, tsang 10 madang du sai jawngma ni kum-yai laika pyi laika man mi ka na matu grai yak ai hpe mu mada ai. Ndai zawn rai nga yang, gara hku na amyu sha laika rawt jat wa lu na law? Anhte myit nchyan jawm shaw ra nga ga ai." "Rai nga ai law, hpu Doi e, ngai ganau Ting Zung mu mada ai hku nga yang, anhte ni wa tinang hku nna myit nchyan shaw, atsam dat na myit ni n rawng ai hta sha n-ga, laika hti mung bai lagawn, hkaja mayu ai myit n rawng ai majaw, gade sharin tim gaman kaw sharin shalai kau, 'Nailap ntsa hka jaw bun ai hpa' she rai taw nga ai. Dai hpe ganu gawa nkau ni tinang a gasha lagawn ai hpe gaw n tsun na, jawng de na sharin sara ni n kyet ai hku she bai tsun jahpai rai nga ma ai. Ramma nkau mi tinang amyu sha hpe tsawra ai nga gade tsun tim, tinang a laika, aga ni hpe manu shadan tsun shaga ai lam n nga yang, myu hpe tsaw ai ngu tsun na matu n mai byin nga ai." "Ganau Ting Zung tsun ai lam jaw ai.
Myu hpe tsaw ai ngu gade tsun gajai nga tim, myu sha lapran ginhka ginran lachyen lahka re ai myit hte myu sha laika hpe madung n tawn yang, myu hpe tsaw ai ngu tsun n mai nga ai. Tinang gaw kaga amyu ni a ga, laika hpe kungkyang hkra sharin hkaja hkam la mai ai, tim, tinang a myit hta galoi mung dum da ra na gaw, tinang gaw kaga tsasam maigan amyu n re, galoi mung rai na n re ngu ai myit hte sak hkrung chye ra ai." "Re ganau, ndai lam ni ramma ni hpe laili laika ningmu jahpaw hkaw tsun hpawng ni woi galaw nna mahtai tam la ra nga saga ai. Dai shaloi she, anhte ni mahtai gaja lu sawk shapraw na re." "Hkau Doi, dai chyawm gaw jawm bawngban jahkrup yang htaphtuk manu na re ngu mu mada ai." "Gaja sai, ndai lam hpe gaw ginjaw htunghking hte laili laika magam dap de shawng hpaji hpyi san yu ai lam galaw ra na re. Hpa majaw nga yang, Jinghpaw mungkan kaw laili laika hte seng na, ningmu jahpaw hkaw tsun hpawng ni galang mung galaw yu ai lam n nga shi ai. Dai majaw, ginjaw htunghking hte laili laika magam dap kaw na sara kaba Maran Brang Di kaw hpaji sa hpyi yu ga. "Dai hku nga yang, anhte yawng rau ai nhtoi shani hpe ningdat tawn yang mai na kun i? Manang ni?" "Um, gaja ai le, gu Doi, bat hpang kru ya shani n mai na i? Gu Doi, kru ya shani jawng mung pat ai re majaw, Ah Pan ni mung hkan nang mayu na le." "AW, she mai gaw e, Ah Pan."
"Anhte yawng kru ya shani bai hkrum wa ga i ? manang ni." "Mai, gaja sai, hkau Doi." Sara Seng Doi Hkawng hte manang ni gaw, amyu sha laika rawt jat wa na lam hte myu sha ni laili laika hte su hprang wa na lam ni hpe gamung jawm dup jahta nga yang, ningsin kaba mat nu ai. Sara ma Seng Pan hte manang yan gaw, num gasha mung rai, wa na hkrun lam loi tsan ai majaw myit ru taw nga nu ai. "Ah Pan, grai myit n pyaw ai zawn rai nga ai le, hpa byin ai kun? Hkum n pyaw ai zawn nga ai i? Gu Doi hpe tsun dan rit." "Myit n pyaw ai gaw n re law, gu Doi, ningsin nau kaba mat na hkrit ai zawn nga nna le." "AWh, n tsang ra ai goi, Ah Pan nanhte masum hpe gu Doi hkan sa dat na le."
"Hkau Doi nang Ah Pan hpe wa sa dat u, sara ma Dau Naw hte Ja Brim hpe gaw hkau Ting Zung an lahkawng nta wa lam mung bung ai re majaw, an lahkawng hte rau wa u ga." "AWh, gaja sai, hkau Zau Myu yawng ngwi pyaw ai shana rai u ga yaw・・・” "E e, gaja sai, bai hkrum ga." Manang ni wa mat ai hte Seng Doi Hkawng mung, Seng Pan hpe wa sa dat nu ai. "Ah Pan..." "Oi, gu Doi, tsun u le, hpa baw tsun na rai?" "AWh, Ah Pan, manang ni gu Doi hpe Brangtung jahpan bang kau sana nga nna, gu Doi grai myit n pyaw nga ai law. "Hihi••hi•• Gu Doi wa mung, hpa wa kun she ngu yang gaw, mani hpa she tsun shapraw dat nga ai." "Aga! Ah Pan na matu mani hpa byin mat sai i? Gu Doi a kraw gata gaja nan hkam sha ai hpe tsun shapraw dat ai she re." "Gu Doi e.. Ah Pan chye na ai law, gu Doi ya du hkra gu Doi a garep nra hpe n mu tam shi ai i?" "Ah Pan, gu Doi mu tam sai ngu nna madi madun dat yang, Ah Pan pawt mat na hpe tsang nga nngai le e." "N pawt ai law, gu Doi, tsun dan rit le." "Gaja sha wa i? Ah Pan?" "Teng sha le, gu Doi."
"Dai hku nga yang, gu Doi tsun sana yaw?" "Um, tsun u, gu Doi." "Gu Doi a mat mat ai garep nra gaw, Ah Pan nan rai sai!" "Aga! Gu Doi e, na gajawng ai law! Mahtai jaw ai ga re ni?" "Um le, gu Doi gaw, masha ni na zawn magyi magaw gawai ga n chye tsun shaga ai law." "Um, gu Doi e, Ah Pan naw myit yu na le yaw, Jinghpaw ga malai nga ai hte maren, 'Nau tin yang gataw ai, nau sau yang byaw ai' ngu ai baw gu Doi hpe n byin shangun mayu ai." "Um, gaja sai, gu Doi myit mada ai lam n shut u ga yaw, Ah Pan." Seng Doi Hkawng hte Seng Pan gaw, nta du wa ai pyi n dum hkra lam hkawm let jahta pyaw nga yang, htingbu nta na gwi wau araw dat ai majaw, Seng Pan hkrit gajawng ai hte Seng Doi Hkawng a lahpa kaw ahpum manat dat nu ai. "Gu Doi, Ah Pan grai gajawng kau sai." Seng Pan ahpum dat ai hte Seng Doi Hkawng a masin salum hta n chye tsun hkra hkam sha mat nu ai. "Ah Pan, grai gajawng kau sai i?" "Um, Ah Pan grai gajawng kau ai le, awh! Gu Doi, Ah Pan a nta mung du sai, gu Doi gaungwi wa u yaw." "Gaja sai, ngwi pyaw ai shana rai u ga yaw, Ah Pan, gu Doi n kam shut u ga." "Um law, gu Doi, bai hkrum ga." Seng Doi Hkawng gaw Seng Pan hpe tsun mayu ai ga ni tsun dan lu sai majaw, krawwang sindung hta kabu kabu nga let shi hkrai bai nhtang wa nu ai.
