GATSAN GA NA CHYINGHKAI WA A HKRA LATA

GATSAN GA NA CHYINGHKAI WA A HKRA LATA

SAU KA-MAI

Dai shara gaw, Mali hte Nmai zup ai shara rai nga ai. Lanam ta hkoi nna kashung shang wa sai ginhtawng ladaw a shata shagawng dung ai lana mi, ten hkying nga yang yuptung hpawa, shayi numsha manang kata, katsi katsang ngai hkrai sha wa, Mali hte Nmai zup ai lunghtawn ntsa dung chyai let grupyin de mada mau manka bu nga nngai. Gaja wa nga yang ndai shara e shawngde ngai kalang mi pyi n du yu nngai. Nye a daidaw buga gaw Sakhkung madu uphkang mungdaw, Shadan krung buga de rai nga ai. Dai re wa mi ngai hkrai sha ndai shara de sa du taw nga ai hpe ngai gara hku mung n chye tsun mat ni ai. Hka hku de nna bung ahpawt hkrat wa ai Mali hpungtsin a majaw, lagaw lata myiman ni katsi wa nga ai hpe adum sha hkam sha lu nga ai. Shata jan a npu e sinpraw maga mada mu lu ai bum lahkawng gaw, tsawm dik htum ai Singleng bum hte Loingu bum yan rai nga ma ai hpe law law lang na yu sai hte maren chye lu nga ai. Sinna maga de yu dat yang wut nhpan bunghku zawn gran kazut nga ai bum kaba mung Nhkai bum rai ang na hpe aloi sha htai la lu nga ai.

Sumwi hpraw gin-yan kasha langai mi mung si mani hpa tsawm ai lai ri sumpan zawn, Singleng bum sen kaw nna sinna maga Nhkai bum hpe dep hkra gindun n di ai sha gran matut taw nga ai. AWh! nde wa simsa pyaw la ai shara de du lu yang ngai hpa lam hpe wa sumru chyai yu sana ta? Sumtsaw sumra lam kun? Prat dep sumla hkrung shayi shadang ni a lam mahtang kun? Yungwi shayi shadang ni a lam wa sumru na kun? Mali hte Nmai hka yan wa mung nsim nsa shani shana prat dingsa lwi yawng n zim nga ma ai zawn, makau grupyin hkan na bum ni mung prat dingsa n shamu n shamawt ai sha grin nga ma ai wa i? Shinggyim masha ni chyawm gaw, ban mi wai mat nna, ban mi bai paw pru nga ai. Htoi san ai shata jan a din tsawm ai myiman hpe shata mi ting rai yang she lana mi sha mu lu nga ai. Manu dan ai nye a hkawn ram prat mung jahkring mi sha pu tsawm nga li ai. Htoi san din tsawm nga ai shagawng shana na shata jan hpe chyang mang htat la ai sumwi ni e magap shinggang kau ai zawn, nye a tsawm htap ai manu dan ai hkawn ram prat hpe mung jahten sharun ai agung alau hte mungkan pyaw lam ni a majaw lahpawt lama byin mat ai rai yang kanang mai na! Ndai bum, ndai ga, ndai hka, ndai ginra ni hpe moi moi de na jiwoi jiwa ni salu salat hpaw, asak sai hka hkaw nna tam tawn da sai buga ni rai nga ai gaw, hpa kam shut sharan nga ai. Anhte Sakhkung madu uphkang mungdaw e nga ai Jinghpaw Wunpawng sha ni lang hte mung, ndai shara ndai buga hpe "Uma buga a salum gindai," ngu nna hkungga tsawra shareng shagrau da nga ga ai re. Jiwoi jiwa ni chyawm gaw pra wai mat wa masai.

AWh! ngai ngai wa mung le, nye a chyeju madu tsawra ai chyinghkai wa, Uma buga hpe makawp maga la ra sai nga, labau lit hkrun lam hkawm sa nga ding ngam, n myit mada ai shawng lam ginra, Ta-hkaw hka lagyawng kata, Sanggang krung ngu ai shara e, asak du baw apnawng mat wa sai gaw, laning mi pyi du wa nga sahka! Nde de wa simsa pyaw la ai shara e du nga lu yang, cheju madu chyinghkai wa hpe n myit dum ai sha kanang na nga lu na law!. Moi ngai ma kaji ten lani mi hta chyinghkai wa marau hpun hkai ai de hkan ganan nang yu nngai. Nye wa bungli galaw nga yang, ngai gaw makau grupyin hkan na shi hkrai tu ai nampu nampan namlaw namlap ni hpe hkan di chyai nga nngai. N myit mada ai sha lam makau shara mi hta pu tsawm nga ai numri pan langai hpe mu dat ai majaw, grai ra sharawng let tin shapun sha sa gang di dat ai ngu yang, nye a ta hta numri pan ju manat jung la nna, marawn jahtau hkrap dat nngai. Shaloi nye wa kagat wa nna nye a lata na ju hpe gang shaw kau ya ai. Sai pyi tsawmra mi pru wa ai hpe mu lu nngai. Shaloi nye wa ngai hpe tsun sharin ai gaw: "Ma e, arai ma hkra gaw, tinang a hkum hpe makawp maga na atsam nga shajang ai hkrai re.

Numri pan hta ju tu ai, nai lap nai pu ni masa ai, tsamat lap ni kasawt hkra jang, machyi kaprep kahtet wa ai, namsi namsaw hpun ni mung ju tu nga ai. Hpun kawa nampu nampan ni pyi tinang hkum hpe kaman be be roi rip n hkam nga ma ai lam sawn yu nna hpaji rawng ra ai yaw" ngu nna sang lang dan ni ai. Shaloi ngai bai htan ai gaw: " Ataw, wa e, nye hkum gaw ju mung n tu, masa mung n chye, kaprep mung n chye ai wa mi kaning di na rai ta?* Ngu bai htan dat nngai. Nye wa bai tsun ai gaw: " Ma e, shinggyim masha ngu ai gaw, masen ai ju hta grau nyam al bawnu machye machyang rawng ai amyu re. Grau nna gaw num kasha ni kaba wa nna numri pan zawn pu tsawm wa jang, jahten sharun ai agung alau hpyen grai law ai hpe dum ra ai. Tut e kaba ai myitsu ni a sharin shaga ai ga hpe dum nga let sadi sahka nga ra ai. Sari sadang rawng ai shayi numsha kaja byin tai hkra shakut ra ai: " Ngu nna tsun sharin shaga la ni ai. Dai sha n-ga chyinghkai wa matut tsun shaleng ai gaw, " Ma e, naw madat yu u. Nam na dusat ni mung tinang a hkum hpe makawp maga na matu nrung ni tu ai; kawng tu ai; masen ai lamyin ni tu nga ma ai.

Dumsi hpe sumru yu u, hkum ting ju hkrai hpring rai nga ai; kadai wa shi hpe sa roi lu na rai ta? Lapu ni hta tuk, lagat ni hta balen rawng shajang ma ai; kadai wa shanhte hpe aloi ali roi rip gwi nga a ta? Ndai wa tsun ai hpaji ga ni hpe prat tup matsing da let, sari rawng ai, mahkun hku ai, shakawn ging ai shayi numsha kaja langai byin tai lu hkra shakut u yaw," nga nna sharin shaga lai wa sai. Chyinghkai wa sharin shaga ai hpaji ga ni hpe daini bai nhtang sumru yu yang, awh! Nachying wa manu dan la nga a hka! Mali hte Nmai hka sha alwi nga dingsa, Singleng bum hte Nhkai bum sha agrin nga dingsa, chyinghkai wa a sharin shaga ai ga ni hpe malap kau lu na n rai. Kalang mi mung annau ni krai sha hpa n re ai hpe manghkang shatai nna tsun garu htai lai shawng shai bu nga ga yang, chyinghkai wa bungli na du wa ai hte hkrak sha rai nna, annau ni hpe daru sharin ai ga mung nye a prat tup malap kau lu na n rai nga li ai. Shi tsun sharin ai ga ni g0 : " Goi law! ma nanhte hte wa, Kawa langai a nshang na hkrat ai; kanu langai a hkritung na prat ai; madoi chyu hpang langai sha jawm chyu ai chyurum hpunau shada she rai nga ninglen, hpa rai me shada da wa n hkrum n ra rai nga myit ta?" Nga nna daru sharin nga yang, ngai mahtang ngup palek nna kajau tsun dat ai gaw: "Wa, chyurum ngu ai wa mi annau ni hte hpa seng a ta? Chyurum ngu ai gaw Chyumrum Wunpawng le, annau ni gaw Nu yan Wa a kasha ni le," ngu nna tsun brawp dat nngai.

Dai ga a majaw, annau ni a chyeju madu tsawra ai chyinghkai wa myit galu galang hte matut tsun sang lang dan ai gaw, " Rai sa, Ah Ji a ga san mung san ging ai ga san rai nga ai. Atsawm sha madat sumhting la mu; wa tsun sang lang dan made ga." Nga nna tsun sang lang dan mi ai. Nye a shaga mying madung hpe Ji Pan ngu nna nu yan wa shamying da ya sai rai tim, yawng gaw ngai hpe tsawra ai hte Ah Ji ngu nna hkrai sha jawm tsun shaga ma ai. " Nannau ni shada chyurum hpunau ni rai nga ai zawn, Jinghpaw Wunpawng sha ni yawng mung chyurum hpunau ni hkrai re. Nung, Rawang, Zi, Maru, Jinghpaw, Lashi hte Lisu ngu nna tsun shamying ai she shai tim, yawng gaw kaji daju langai a kasha ni; madoi chyu hpang langai jawm chyu, ntsin hka hpawk langai jawm lu, ginru ginsa langai hta rau hkawm sa, labau htunghking langai hta rau nga pra hkrat wa ai ni hkrai re." Lang shagu ngu na wa, wa hpe ga san gajau san gwi ai gaw ngai hkrai sha rai nga ai." Wa wa mung tinang nan sa mu dep lawm ai zawn zawn," ngu anyam dat se ai. Raitim anhte a wa n pawt ai shan ga, grau grau manu dan ai ga ni she tsun gale pru wa ra ai.

Shi tsun hkai dan ai ga gaw: Chyurum Jinghpaw Wunpawng myu sha ni rai nga ai lam gaw, labau maumwi mausa, Jaiwa dumsa matsun mungga ni hta mu chye lu ai sha nga, dan leng ai sakse law law hpe mung naw mu lu nga ga ai. Mungkan ntsa Chyurum Jinghpaw Wunpawng sha ni a laklai ai lam langai mi gaw, Marip, Maran, Lahtaw, Lahpai, Nhkum, Jasen, Magawng, Kareng, Udi Chyang maja, Hkashu Hkasha, Nding Pyen Tingsa nga nna ru sai lakung lama ni hte hkum tsup nga ga ai. Maigan amyu ni hta dai zawn re ai lam nga dam ai n rai. Bai nna shada da shachyen shaga ai lam hta mung, mayu shayi, kashu kahkri nga nna hkungga lara masat masa hkat chye ga ai. Kaga amyu ni gaw kanu kawa• majing hta lai nna kani katsa hte kagu kamoi ginhka masat ai lam n nga. Kahkri hte kanam, karat hte kajan gayau gaya; kayung hte kahkau, kaning hte kanau gayau gumchyak shanut gumpak nga malu ai. Kawa Di a kasha hte mung yu ra jang la hkat wa; kahkri hte katsa raitim yu sharawng jang nga sha wa ma ai. Shachyen shaga htung lai n nga, hkungga lara madin malai gata ai ni she rai ma ai. Grau nna laklai dik ai lam langai mi gaw, mungkan ting rai yang anhte Chyurum Jinghpaw Wunpawng sha ni hta chyu sha Gam, Naw, La, Tu, Tang; Kaw, Lu, Roi, Htu, Kai nga nna shamying masat lang chye ga ai re.

Dai hte maren Chyurum sha ni gaw rau rau sha galaw lu galaw sha, rau rau sha num jaw num ya, rau rau sha ga tsun ga la, rau rau sha kanawn mazum nga pra; Yi sun hkauna hte mare buga ni hpe jahten sharun sharu shatsang ai matse labye, hkan galang, wadu, sharaw ni hpe mung rau rau sha jawm ninghkap gasat shachyut kau chye ai chyurum hpunau majing ni rai nga ai zawn, nannau ni mung shada da tsawra makawp maga pu gang sin machyi hkat chye ai, myu jet ai, sai kaba ai, kahpu kanau ni rai nga yang, masha yawng e hkrit hkungga yu kaba ai hte rawt galu kaba nga mu nga mai wa na re, nga nna sharin shaga lai wa sai. AWh! Moi gaw ngai wa ndai ga ni hpe majoi ahpa atang sha she madat shalai kau ngai. Ya daini ndai Mali hte Nmai zup ai lunghtawn ntsa bai nhtang sumru dat yu yang, nachying manu dan ai, lachyum sung ai hpaji ga ni rai nga ai hpe ya she grau grau dum hprang wa lu ngai. Manu n dawdan lu ai chyinghkai wa a chyeju ni nan rai nga ai. Dai hte maren nye a jawngma manang ni rai nga ai Lum Dai, Dau Naw, Bawm Sawng, Ah Chang hte A-T-Mi ni a mying ni hpe dum sawn dinglik dat yu yang, chyinghkai Wa tsun shaleng dan ai masa hte hkrak Jinghpaw Wunpawng jet ai shingteng amying ni nan rai nga ma ai hpe asan sha chye na lu ni ai. Bai kalang mi mung nta e annau ni hkrai sha wa jahtawng n htu ai amyu kaga ga shaga nna se garu nga ga yang, annau ni a chyinghkai wa du shang wa nna annau ni hpe daru sharin mi ai ga gaw: Nannau ni hpe Jinghpaw Wunpawng jet ai kasha hku she shangai bau maka da yang me, kaning rai me jahtawng n htu al amyu, labau n lu ai amyu byin mat nga myit ta? Lwidwi hpun ngu nna she hkai da ai kaw lwi hkri si si pru yang, hkai da ai wa kabu lu na kun? Sagu kasha ngu she rem maka da ai mi bainam kasha gale mat yang, sagu madu myit pyaw lu na kun? Uhpum kanu gaw, shi hpum nga ai udi ni kaw na n-gaw gawk kasha ni kraw pru wa yang tsawra lu na kun?"

Dai ga ni a majaw annau ni yawng zim sha nga mat ga ai. Anhte a chyinghkai wa nachying n ra ai re hpe dum chye saga ai. Ya she chyinghkai wa a sharin shaga ai lam ni grau grau hprang wa lu nngai. Lunghtawn ntsa ngai hkrai sha dung sumru nga ai ten ni kade na mat ai pyi n chye sai. Din tsawm ai shata jan mung Nhkai bum maga de n-gyeng shanang mat wa sai. Chyinghkai wa a chyeju hpe myit dum sumru hkam sha lu ai majaw, myiprwi si ni lwi kapya hkrat wa ai hpe sha dum lu ni ai. Lunghtawn ntsa dung let grup grup bai gayin mada yu nngai. Shaloi Mali Nmai zup ai shara a hka nam maga hku nna, wu kadu ai nsen kaba hte hpawn, hka leng kaba langai mi rawt htingkun lung wa ra ai. Dai hka leng kaba gaw, grai pawt sindawng ai nsam hte Mali Nmai zup ai shara hpe lim kaput wa nna, ngai dung nga ai lunghtawn mung myi grip mi na laman hta sha, hka la-ing kata de lup shang mat wa sai. Nye a hkum hkrang wa mung, hka kata de lup shang wa na ntawn e sha, hka nam maga praw di gan azi mada dat yu yang, Mali hte Nmai zup a lawu e sha, grai tsaw ai madim kaba langa mi grang pat kau nga sahka! Mali hte Nmai zup ai lunghtawn ntsa, n dum shami sa dung chyai hkrup kau ai nye a gam maka wa, si na matu sa wa ai she rai mat nga sahka! Ngai kaning chye di sana! Ngai hpe hkye la na kadai mung n-nga, marawn jahtau tim kadai mung n-na; Mali hte Nmai zup ai shara e, moi moi kaw nna nga taw sai Tanghpre mare wa mung, le sung dik ai hka hpungtang kata de lup shang mat wa sai.

Hpun kawa ndung nchyan pyi n-dawng, hpa shiga shingran pyi n-brawng hkra katsi katsang rai mat nga sai. Ngai ngai wa mung, masin gaw n-gut, hpa di gaw n ngut; hka leng hpungla e gayat gumpye nna, kalang lang gaw hka hpyi ntsa gumjawt pru, kalang lang gaw hka hpungtang de du mat yu, rai bu nga nngai. Hka ntsin law law lang lu hkrup kau sai majaw, n-gun mung grai kya mat nna lagaw lata ni yawng sharu mat wa sai. Dai ten hta n myit mada ai sha noikrat shabawng hka li jawn ai la kasha langai mi nye a makau de ni kahtep wa ai hpe mu mada dat lu nngai. Gaja wa sha ngai kaw du wa ai hte rau, shi a noikrat shabawng hka li hta magra jum dat lu ni ai. Nye a myit hta mung, n-si ai sha asak bai lawt lu sana rai sail hpe chye lu ai majaw, lagaw lata ni n-gun she kya tim, myit n-gun gaw bai lu nga sai. Rai tim, dai la kasha ngai hpe tsun ai ga gaw: "Nang hpa baw amyu rai ta? Na a mying hpa nga lit ta" Nga nna Myen ga hku san pru wa ai. Ngai mung n-gun kya dik la nga tim, hkye la na du pru sa ai wa a man e, masu magaw galoi n tsun yu ai kasha rai nga ai hte maren, Myen ga pyi n-kung n kang kapawk galawk hte sha, "Jinghpaw Wunpawng amyu, Marip Ji Pan ngu ai rai nngai," ngu htan dat ni ai. Shaloi dai la kasha gaw, ngai hpe hkye shaw la na malai, lagaw hte hka de hkindit jahkrat bang kau da nna lai mat wa sai.

Nye a hkum hkrang gawng shingyan chyawm gaw, dim pat tawn ai Mali hka la-ing kaang, sung dik ai hka hpungtang de yat yat htin shang mat wa sai. Teng sha wa ngai si mat sahka! Hkring mi rai yang nye a numla gaw nye a hkum tsawp kaw na pru nhtawm singkaw tu ai u kasha zawn atsang awng rai pyen pyau hkawm mat wa sai. Nye a hkum tsawp chyawm gaw, sung htum ai hka hpungtang e simsa let kaleng taw nga ai. Nye a wenyi mung gara de sa na n chye, Mali hka madim hka nawng hpe shinggrup let pyen yawn hkawm taw nga ai. Mali hte Nmai hka yan mung, pat dim da ai madim kaba a majaw, tu matu, hkrung mahkrung mahkra hpe lim kaput kau nga sai. Jiwoi jiwa moi kaju kajat prat kaw nna grin nga ai tsawm htap shingni, buga ginra ni hten za mat nga sai. Shaloi ngai mada yu yang, Singleng bum hte Nhkai bum yan a lapran lai ri sumpan zawn gran matut nga ai summwi hpraw kasha gaw, yat yat sha mahkawng kahkyin wa nhtawm, nye a hkum tsawp kaleng taw nga ai shara de ang ang sha nem hkrat wa ra ai.

Ngai atsawm sha azi yu nga yang, dai si mani ai sumwi gumdin kasha a ka-ang e chyinghkai wa a myiman hpe raw sha mu lu nngai. Ngai na lu ai nsen mung, "Ngai kawa sharin shaga numhtet numra ai ga hpe htep lahti shadik shatup ai kasha e, nang teng teng nga mu nga mai nna prat galu nga na ndai yaw." Nga tsun let chyinghkai wa a hkra lata hte nye a hkum tsawp hpe sung dik ai Mali hka a hpungtang shara kaw nna angwi sha dun sharawt hkrang shaw la ni ai. Ngai hka ntsa de waw pru wa ai hte rau, wu kadu ai nsen kaba hte hpawn, dim pat tawn ai madim bunghku mung, tsang hte tsang, pang hte pang, gyi ru mat wa ra ai. Panglai nawng zawn ing tawn nga ai Mali hka hte Nmai hka yan mung, moi mungkan nnan lat, ginding ga nai nnan prat hpang yang, Ninggawn Chyanun yan Hpunggam Woishun e shangai dumhpran, chyinghkai ginyan da ai raw sha, bai lwi yawng taw nga sai. Ngai nsa kaba shaw dat nngai. Myi hpe mung yat sha hpaw dat yu nngai. " Ya ngai kanang du nga ata?" Nye a chyinghkai nu gaw, hkrap let ngai hpe sin taw nga ai. Grup grup na ni mung, "Ah Ji! Ah Ji!" Nga nna shaga garu ai nsen ni hpe na lu ni ai. Ya ngai kaleng taw nga ai shara gaw Mali hte Nmai zup ai lunghtawn n rai, Anhte a Sakhkung mungdaw, Shadan krung buga e she rai nga ai.

Nhtoi tsawmra mi ngai machyi kaba hkrum nga ai ten hta nye a wenyi gaw, Mali hte Nmai zup ai lunghtawn ntsa de du mat wa a hka! Dai lunghtawn ntsa mungkan pyaw lam hpe she madung dat pyaw len taw nga ai rai yang, ya na zawn dinghta pinra de bai nhtang prawn wa lu na n rai nga ai hpe chye lu nngai. Mali hka hte Nmai hka mazup ngu ai gaw, anhte Jinghpaw Wunpawng amyu sha ni hkungga shareng ai Uma buga a salum gindai nan rai nga mali ai hte maren, dai shara hpe jahten sharun na maw mawn ai lam mahkra mung, anhte Jinghpaw Wunpawng amyu sha ni ma hkra a hpyen kaba ni rai nga ma ai. Ndai shara ndai ginra hpe anhte a asak hte galai nna makawp maga la ra nga ga ai. AWh! Mali hte Nmai zup ai lunghtawn mung moi moi na Jiwa ni a shingkang shingwang atsam jung rawng ai shara nan she rai nga ai. Chyinghkai wa a sharin shaga ai mungga sha pyi dai daram atsam kaba la nga ai. Chyinghkai wa hte rau n lu hkrum, n lu nga raitim, atsam rawng ai shi a hkra lata gaw ngai hpe hkye la ni ai. Dai hte maren moi de na jiwoi jiwa ni a sharin shaga ai matsun maroi mungga ni yawng mung asak rawng ai mungga ni hkrai rai nga ai law. Mali hte Nmai zup ai shara mung, Jinghpaw Wunpawng sha ni a salum gindai nan rai nga ai.