WOI A HKAINU DAW
ROI BU
Tangbau Hawng Naw gaw Wa hkye Zau Naw hte dinghku de nna, kasha pyi masum lu sai hpang e shabrang tsawm langai hte bai gaja hkat nhtawm, madu wa n nga ai ten hta lagu jahkrum hkat hkat rai nga ai. Hawng Naw hte gasawt ai la kasha gaw Lahpai kasha rai nga ai. Shabrang sha naw re majaw hpa mahkrum madup mung n nga ai kata hta dinghku num hpe sa shaga shut nga nu ai. Hawng Naw madu wa hpaga la re majaw, nta kaw n nga ai ten sha grau law ai nga yang, shabrang tsawm ni hpe mu jang grai she chye lum la nga nu ai. Shabrang ni law law wa, Hawng Naw ma masum a kanu rai timung, shabrang kasha ni hpe grai she woi pyaw chyai nna, shi a buhkrawng kata kaw gadawng jawng ma ai. "Gawng shingyan hte ahpraw tsawm ai gaw gaman lila sha re ai." Nga mahkawn hte maren, Hawng Naw mung hkumhkrang tsawm jan tim myit nse la lu ai hku re. Shabrang ni law law hpe mying jahten, shabrang maku daw kau ya rai nga lu ai. Dai lam ni hpe madu wa sumtsan ga na hpaga sa awng la na bai wa ai ten hta kaji gajaw soisoi nga na tim, sakse hkrak nmu ai majaw, madu jan hpe tsun sharin shaga n manu nga ai. Lani mi, Hawng Naw madu wa hpaji daw ai lam hpe n myit dum da u ai. Kanu e, ngai hpawtni bai pru hkawm wa na re! manang ni hte zahpaw da ai lam nga ai majaw, nta kaw loimi na hkra nga na ngu ai wa nmai byin mat nga ai, ngai na arai loi mi naw lajang da ya rit nga tsun nna, Hawng Naw mung shawoi na hte maren rai na shadu ai majaw, madu wa pru hkawm mat wa jaw sai ngu, myit pyaw kabu let shi a shabrang Lahpai wa hpe bai shaga la nna, pyaw chyai nga ma yang, madu wa Zau Naw agajawng sha bai gale pru wa nna, Hawng Naw hte Lahpai la wa rau yup taw nga ai hpe wa mu nu ai.
Zau Naw pawt pawt ai gaw lahkawng yan hpe galangta wa gahtam dumhpyawt kau na kun? Gyit shajup la nna hkyuk htawng de madaw sa rawng kau na kun? Ngu naw myit pawt tauta nga yang, Hawng Naw hte Lahpai wa yupgawk de nna rawt pru wa jang, Zau Naw mahtang hpa tsun na nchye mat nna madu jan hpe sha dun gashi dat nna, dawdap shakum kaw baw dip shakap tawn ya nhtawm, makau kaw taw ai nhtu hte shada tawn in, nang si na kun? Ndai nta kaw nna mahtang pru wa na kun? Ngai hpe yu kaji nna nta kaw du hkra shinggan la wa woi yup ai gaw ngu nhtu hte sharim nga jang, Hawng Naw mung nta kawn pru mat na nga yau la sai majaw nsat ai tawn kau nu ai. Zau Naw kasha ni hpe: "Ningnu masha pyi nre ai, gwi kanu she re majaw, hpa yawn shara n nga ra ai, nannau ni hpe wa atsawm sha lu bau ai." Ngu n-gun jaw ga tsun ai majaw kawa a ga madat nna nga nga masai. Hawng Naw madu wa hte hka ai hpang, shi hpe grai tsawra ai nga tsun ai Lahpai la wa mung, kanu kawa jinghku jingyu ni myit nhkrum lawm ai ngu nna, kaga shara de hprawng yan hkawm mat wa nu ai. Lahpai la wa e mung bai hprawng kau da hkrum ai Hawng Naw gaw shanhte mare na shingkra Maran la langai hpe woi nna, shi kanu kawa ni nga ai Sammung ginwang Mungya buga Htingra hkyet mare kaw bai pru wa nu ai. Gade nna yang dai Maran la wa mung Hawng Naw hpe ndai mare kaw ngai n lu nga ai ngu tsun kau da nhtawm Manmaw ga de bai wa mat nu ai.
Hawng Naw Maran la wa e kau da ai gade nna lu yang, dai Htingra hkyet na shi hta sak grai naw kaji ai Zahkung Naw ngu ai wa hpe bai gyem bang wa nu ai. Zahkung Naw a kanu kawa ni gaw kasha hta sak shi manga dang kaba ai Hawng Naw hpe la na matu myit nhkrum nga ai raitim, Hawng Naw shani shana ndi nhka Zahkung Naw hpe hkrai hkan sin hkawm nga ai majaw, sumtsaw balen jung mat nna hka yawng ai kaw yawng nang mat nu ai. Shingrai, Zahkung Naw a kanu kawa ni gaw Hawng Naw hpe hkungran ya manu ai. Galaw lu galaw sha lam hta maju jum mahkrun shang ai majaw, dinghku chyawm ramdaw ngwipyaw nga mai nga ai. Num sha lahkawng, la sha masum mung bai jawm shaprat masai. Dinghku lum ai majaw mare masha ni mung hkungga lara kamsham ai myit hte Hawng Naw hpe hpung gumhpraw kunhting galaw shangun ma ai. Nnan daw gaw grai kangka ai zawn rai gunhpai nga nu ai raitim, galang mi sun gumhpan tawt ashep man sai nga dumsu gaw galoi mung masha ni a sun gaiwang chyalau ai nga ga malai hte maren, Hawng Naw gaw shanhte nta kaw nchyang sa chyang ai Miwa mung Kawnghka mare na la kasha lahkawng hta na langai hte bai lagu tsawra hkat bang wa nu ai. Hawng Naw madu wa nchye ai sha nchyang la shabrang hte sawk sek wa jang, nchyang la sha anga laban langai mahtang gaw shan a matu yu yak, yu hkrit ya nna nta de wa mat nu ai. Zahkung Naw madu jan hpe grai kam sham ai majaw, makau grupyin na jinghku jingyu ni shingdu hku nna soi sam ngu tsun shadum ai lam hpe pyi na n shang nga u ai.
Lani mi, Zahkung Naw hkauna pa de nga yu sa mat wa yang, Hawng Naw gaw shi kunhting da ai hpung gumhpraw mare na kam ram ai hpawmi jan langai hpe sa hpai ap kau da nna, nchyang la kasha hte Miwa mung Kawnghka mare de swi rai bai ginrun mat wa nu ai. Shana de Zahkung Naw hkauna pa de nna nta du wa yang, madu jan nsin sin wa tim n pru wa ai majaw, kasha ni hpe san yu yang mung nchye ai nga nna, shanhte nta wawra hkran kaw nga ai gamoi Bawk hpe Hawng Naw hpe n mu nni ngu sa san yu ai shaloi she, daini shani gaang e aning nchyang la wa hte htingba kaba gun rai lai mat wa ai nga hkap tsun dan jang she, madu jan nchyang la wa hte hprawng mat wa sai re chye nna, yawn ai hte pawt mayu ai hte rai aging agang marawn hkrap la nna mau dung nga nu ai. Hpang shani, Zahkung Naw nhtu n-ga sha hpye lang rai Miwa mung Kawngka mare de hkan mat wa nu ai. Dai shana de tingsa ja jan shang wa ai hte rau madu jan hpe woi nna nta bai du pru wa ra ai. Dai shana Zahkung Naw a nta kaw mare na ni shani chyahkyi langai lu gap la ai majaw, mare ting masha ni shanhte nta kaw shan jawm hpya sha nna gahkyin jawng nga ai ten hta shanla du shang wa nna, masha yawng gaw num nnan woi shang wa ai zawn hkap jawm yu gumbawm nga manu ai, Zahkung Naw a kawa gaw kasha yan ganam hpe mu jang, gumwai ga hte: Ma Naw e, anwa ni a ulawng hta nga wasu shang sai nga tsun ma ai nga nna hkap tsun dat nu ai.
Gade nna yang, Zahkung Naw nta galaw na matu ngau sa shaw ai shaloi, nshang gashin daw kau ai majaw, Mangshi de lung wa nna tsirung wa rawng masai, loi mai wa ai hte bumtsi bai wa tam matut sha na hku tsirung pru mat wa manu ai. Zahkung Naw nshang gashin daw kau ai hpang kawn, madu jan hte yupgawk npawng mat nu ai. Dai ten hta gagu dingla wa bai machyi nna, Munggu pa tsirung kaw laban bat mi daram gagu wa hpe tsirung sa woi rawng yu tim n mai hkraw ai majaw, nta de woi wa kau ai hpang gade nna yang gagu wa dingla u gun gu mat wa sai. Gagu n nga mat ai hpang gade nna yang, Hawng Naw gaw dai mare na Zahkung amyu rai nga ai Rung Rang Dang Sing ngu ai shabrang kasha langai hte Munggu gat sa gat wa rai bai ginrun hkawm nga nu ai. Zahkung Naw bumtsi gapung lu nna hkum grai naw sadi nga ai ten hta, madu jan nam gatsing bai sha nga sai hpe gaw loi soi sam hku chye tim, madu nan nbyin mat sai re majaw, kaning nchye di nga lu ai. Hawng Naw hte Rung Rang Dang Sing lagu matut hkat ai laning mi a hpang e, Zahkung Naw a gajan Zahkung Htu gaw Miwa hkran Lunglin ga gumpraw wa tam ai nga nna Miwa la langai hte gaja hkat ai majaw, nta de woi yu wa nna Jinghpaw htung hte sa hpyi ai majaw, nta na ni mung atsawm sha sharawt poi galaw ya manu ai. Zahkung Htu a sharawt sha poi shana gaw, kyu hpyi hpawng galaw ai hta lai nna, mare masha ni hpe sumla hkrung bang dan ai majaw, Zahkung Naw gaw sumla hkrung bang madun ai jak jum lawm nna, dai shana nta galoi pyi n wa nga u ai, sumla hkrung langai ngut ai hpang langai bai matut bang dan kyin nga sai.
Hawng Naw yan Rung Rang Dang Sing gaw Zahkung Naw hpe kaning di nyan kau na myit hkrum da sai hte maren, Zahkung Naw n nga ai laman shi gapung lu ai bumtsi ndum hta didi wwi re gayau bang da ya manu ai. Jahpawt u goi wa ten hta, Hawng Naw madu wa hpe nhkru ai hku gyem sat na hku hkyem da sai majaw, nten hta lagat ntsin chya lang nna, gamoi ni a nta kaw sumla hkrung bang dan nga ai madu wa hpe wa ahkyaw nga nu ai. Madu jan myit magaw rawng ai nchye da ai Zahkung Naw gaw nta de hkan wa nang du wa jang, kawa e maw maw ndai tsi naw gan lu la nna she hkringsa u nga nna, ga ngwi ga pyaw hte tsun asawng nga jang, shawoi na shi alu nga ai tsi ndum na bumtsi hpe gawm kaw ru bang nna lu kau dat nu ai. Manit shi manga daram re hte Zahkung Naw kan machyi si wa re ni ai nga nna, yup ra e da gun taw nga nu ai, madu jan gaw kawa e hpa wa byin wa sata? Sha gang kau dat yu ga, sha mi she rawng kun nga masu nna, sha gang ya, sai shaw ya ai hpang, Zahkung Naw myihpraw galau tawn si htan dan wa jang, yupku kaw atsawm sha galaw pawn galeng tawn nna nba ni hta jahpun kau da nhtawm, sumla hkrung naw bang yu nga ai gamoi ni a nta de gagat mat wa nu ai. Hawng Naw gaw madu wa e shana sat kau da ai lam hpe kadai mung nchye u ga ngu nna, dingla ni dung nga ai dawdap kaw wa dung dat ai hte, shi du na hkachyi daw lahkawng rai dun e di hkrat yu wa sai.
Jahpawt manap hkying mali daram rai wa sai majaw, dingla kau mi yup shamwi wa nna, wanmang kaw dingla lahkawng sha dung nga sai, kau mi gaw shana tup sumla hkrung yu kau nna myi mung yu tsu dum rai hkringsa mat ma masai. Zahkung Naw a kasha sak lahkawng ning re Ma Naw kanu hpe tam gawm nna hkrap nga jang, makau kaw yup nga ai sak kru ning re gahpu ba mahtang bai gajawng dum wa nna, wan kawk masawp shachyi dat yang, ganau hpe nyem let rawt dung nga yang she, shannau ni a makau kaw kawa yup nga ai mu jang, grai kabu let kawa hpe shaga dat yang nhtan ai hta n-ga shamu shamawt nrai ai galeng nga nna, kawa a sinda kaw aja wa amya dat yu yang ja ja lang lang nga jang, kanu gawoi dwi ni nga ai nta de gagat lung wa nu ai. Sak kru re kasha kanu Hawng Naw hpe mu dat ai hte: E nu, wa gaw nshaga mat sai law, nga tsun dat jang, kanu gaw kaning re lam gaw shi chye da chyalu re majaw, gajawng gaja mung nai ai, nkam sha ai zawn re nsam hte kasha ni hpe woi nna nta de bai yu wa nu ai. Jahpawt nhtoi san wa ai hte mare masha ni langai hpang langai mau nma rai Zahkung Naw hpe sa yu nna, ndai wa mana tup pyi agaja sha re, sumla hkrung bang dan nga ai wa nre ni taw? Ya daihpawt sha mi gan si mat ai gaw gung she gatut sam sai. Nga sa jawm gadum gahte tsun hkat nga ma sai.
Gaja wa Zahkung Naw a si mang hpe yu yang lagaw, lata lamyin, myiman shan ni yawng chyang gale mat sai majaw, sa yu ai ni madu jan hpe ntsen ai zawn re myiman nsam hkrai madun nga ma ai. Hawng Naw gaw uhka a ndan dum rai shi mara hpe shi chye tawn ai majaw, masha ni hpe hkrit gaya wa ai hte rai nna, madu wa a myiman kaw pawngta shingmun hte chya shamut kau da nna, la kaji hte hka hkran de mahkawn hte rung nga hka shin sa mat wa nu ai. Mare masha ni gaw Hawng Naw hpe mau nma nna hpa galaw na re pyi nchye mat manu ai. Raitim mare masha ni gaw anhte a man na mu re majaw, yawn timung lam ang ai hku lajang ra sai nga, yawng mayawng gaw ra ai lam hpe chyawm lajang nna Zahkung Naw hpe makoi mayang kau masai. Zahkung Htu mung kaning nchye di sai majaw, gahpu Bawk hpe makoi mayang kau da nna tintin rai Lunglin de shan a hkungran poi naw wa galaw ra ai nga nna, bai hkawm mat wa masai. Kanu gaw kasha si kau da ai hta lai nna, num kasha mung sumtsan ga de num wa kau da rai nna, madu a hkum hpe madu hkrai nlu shalan mat wa nna, ga mung nshaga, shat mung nsha ai loi ya mi ting shi hkrai mau dung mat nu ai. Nhkru ai, ntara ai, nhtap htuk ai lam hkrai hkawm ai Hawng Naw gaw madu wa a lup na ga pyi rai nhkraw shi yang, kasha ni hpe kabai kau da nna Rung Rang Dang Sing la wa hte Myitkyina de nga sha mat wa masai.
Gamoi jan gaw gashu ni hpe lakawn nna grai yak hkak ai hte nga nga masai. Hawng Naw yan Rung Rang Dang Sing manga ning jan jawm nga hkawm wa tim, gashu kasha langai mung nshangai jat ai majaw, Hawng Naw gaw shi num kasha yan hpe bai wa asawn taw nga nu ai. Num sha yan mung kanu kaw hkan nang mayu nna, gawoi dwi nhkraw jang, dwi nang annau hpe nu kaw nhkan nang shangun jang, tsi sha nna wa a lup makau e sa si taw mat na ga ai nga gawoi dwi hpe jahkrit sha ma ai majaw, kawawr dwi masin grai gaprep machyi let kanu kaw hkan nang mat wa shangun sai. Gawoi dwi gaw gashu la kasha masum hpe woi let yak hkak rai woi shakut lai wa nu ai. Ya gaw kaba ai gashu wa dinghku de nna gawoi dwi hpe atsawm sha bau nga u ai, ja gumhpraw mung lauban madang hku wa nrai tim, ramdaw gaw manu sai majaw ngwi pyaw ai hku rai sai. Hawng Naw num kasha lahkawng hpe woi la timung, langai gaw num wa mat, langai gaw hpyen lahkawn ai kaw lawm mat wa rai nna grai yak hkak nga yang she, madu wa mung nang hte prat tup nga tim, nye matu mara n kap, kasha mung n shangai ya lu sai majaw, hpyenla she galaw mat wa sana ngu nna kau da sai. Manga ning a hpang, Hawng Naw gaw hkyut htawng rawng nga sai. Zahkung Naw a kanu si wa na shawng e, gashu ni hpe kawa kaning rai si mat wa ai lam ni hpe asan awan tsun dat ai majaw, gashu ni gaw mara kaba gun nga ai kanu hpe, shi galaw lai wa ai mara raw na matu, gumgai matu e kanu hpe tara rung de shawk bang manu ai.
