LWI NGA AI SAI HKA
MANMAW HKAWN
Daihpawt na sawmrawm nhtoi manap gaw, yupmang zawn zawn, shingran zawn zawn nga kau dat sai. Nye a shawng kaw lamu de lakang langai mi htan htawn da ai hpe mu dat nngai, lakang a nsam gaw hpraw tsawm la ai, dai lakang grai tsaw hkra, ngai lung mat wa ni ai, ntsa kaw du ai shaloi, Jinghpaw mung sumla grai tsit tsawm la ai hpe ngai mu dat ai. Jinghpaw mung sumla hpe yu nga yang, gaang hku sai hka lwi hkrat wa nga ai gaw htumpa du hkra lwi nga ai. Lakang kawn yu wa yang, lanam ta hta layang ga na shu ni ngoi garu taw nga ai zawn nga nsen gaw nshu nshang, nchyi nmu nga hkam sha yak hkra garu gachyi taw nga ai hpe na dat nngai. Atsawm sha bai madat dat yu yang gaw yawn madai ai nsen zawn, hkrapngu hkrapngwi ai nsen rai taw nga ai, dai nsen ni gaw nu a kasha e, wa a kasha e, ganau e, hpu e, shawng e, ning e, hkau e, adwi e. Nga nna shaga jahtau ai ga hpan hkum hkra hte Jinghpaw ni a nsen re ai hpe chye na la kau dat let, mau nga yang hprang wa ai gaw, nhtoi htoi nga la sai. Dai kumla gaw hpa wa rai kun? Ngu, Seng Mai myit hta hkam sha taw nga lu ai. Seng Mai hka de sa wa yang, buhpun palawng hkrut taw nga ai kanu tung hpe mu dat u ai. "Atung, na shabyi kaw kaning di hkra kau ai ta? Grai machyi mat na sai, matsan mayan le." Ngu san dat nu ai. "Na wa di ka-ni chye lu ai kawn myit n su mat sai, ka-ni lu mayu kyin, yin kut bu wa nna gumhpraw hpyi ai, atung gara kaw na n hta jaw ai majaw, adup abyen zingri ai gaw myiman kaw sha n rai nga ai, asha e, she yu u*." Nga palawng malu dan ai gaw, hkum ting la shara pyi n ngam hkra hpye hkyeng dumrit nga ai, ningma dai ni yu hkrit yu mau na zawn rai taw nga lu ai.
Rawma hpyenla ni hpri chyinghkyi sumri hte Yesu hpe adup tawn ai Yesu a shingma na ningma hkang ni hpe Seng Mai myit dum dat nga lu ai. Gade kaja ai wa mung ka-ni a majaw kyang lailen ni hten mat che nga a hka! Ngu Seng Mai myit nga lu ai. "Atung tsi mari htu, chya na re, tsirung de sa ga le." Nga Seng Mai tsun ai. "Tsirung sa na hkum tsun, gaya gahpa, ya sha na shat mung n lu ai, htaw na nnau hpe yu u." Nga tsun dan u ai majaw, Seng Mai shingdu de yu dat yang, kanu hpe garum nga ai ma gaw nyep hte bya rai, myiman aka akawk, labu palawng ashep ashap, agawt agat, npawt npat, lagaw lata lamyin ni galu galang achyang amang rai nna lu ntsin bu, namsi ntsin bu, pepsi bu zawn re ai kawksing kawksang bu dingsa ni hpe kashin shatsawm taw nga ai ma hpe mu dat nu ai. "Atung ndai gaw hpa galaw na i?" Nga Seng Mai san dat u ai. "Na nnau ni hpe shat hpa hte n mari jaw nna, lap mi lu gaw lu ngu, annu ni hkan hta mahkawng la ai re, ya dai sa dut nna na nnau ni hpe shat da mi shakawt ga ngu kashin nga ai. Atung hkrai yak nna, dai na ganau ntai nmai rai sa galaw taw nga ai, shat kawsi dik sai lawan kashin nhtawm sa dut saga nga kyin bu nga lu ai." Nga tsun u ai. Karai e, grai matsan dum la ai, nta wa nna shat sa jaw sha yang mai na re ngu Seng Mai myit dum dat u ai. Seng Mai nta de shat wa la hpai rai, kanu tung a nta de sa wa nu ai.
Rai yang kanu tung yan ma gaw hka kaw na rai n du wa shi nga lu ai, Seng Mai a kawa di gaw kasha Ma Gam hpe lagaw lahkawng kaw magra jum nna, nhtang chyung rai hpai tawn nhtawm, kasha hpe adup gayat let tsun ai: "Kadai kaw raitim lu hkra hkoi wa rit ngu tsun ai nchye na ai i?... Gumhpraw dai sha pyi n lu hkoi wa ai gaw, hpa lachyum n pru ai kasha, waw! si mat u, bau ba ai, alaga shat shama ai nang zawn re shat mung hkum sha!" Nga nna kasha hpe ga de baw adit gabai jahkrat kau da ai hpang, mare de pru hkawm mat wa sai. Kasha Ma Gam gaw: "Nu Nu • Lawan hkye la rit law, lawan hkye la rit law, si wa re nga ai law, aka law, aka law, nu." Nga jahtau hkrap nga ai hpe loi tsan ai shara kaw na Seng Mai mu na nga nu ai. Seng Mai gagat sa wa nna: "Oi. • Rawt u, rawt u, matsan mayan. " Ngu sa pawn sharawt ahpum la dat u ai. Ma Gam gaw akya shala rai hkum ting mang, hpye nna sai hte mya rai nga ai hta n-ga, atsam mung n nga mat ai zawn rai, hkrap pyi nau n lu hkrap mat nga sai. Tinang a kasha, tinang a saitum saipa, tinang a amyu matu asi hpe pyi ndai zawn di wa chye ai baw gatsi majan she rai nga a hka! Um*" Ndai zawn re ai dinghku gade she naw nga ai kun? Ngu Seng Mai myit let, Ma Gam hpe lakawn la nga yang, kanu tung yannu bai du wa ai hte: "Ya hpa bai byin ai ta? Na wa di bai rai sai rai nga ai." Nga tsun dat ai, shawoi na lam tau chye nga lu ai.
"Asha e, na wa di gaw dai hku hkrai rai sai, annu ni a matu mungkan htum sai, kaning n chye di mat saga ai, masha ni hpe tsun na matu mung hkyiya dinghku nga nna, tsun chyai, jahta chyai hpa galaw ya ai sha rai mat mat re ai, tsun mung grai tsun yu sai. Annu ni a matu gaya gahpa si mat yang she mai sai, asha e." Nga Seng Mai hpe shali dan nga u ai. Dai ten hta makau grupyin ni yawng gaw azim sha nga nga ma ai, mu ai ni mung poi yu ai hpa sha yu shalai nga ma ai. Seng Mai gaw shi la sa ai shat hpe kanu tung a kasha ni hpe jaw sha let, n-gun jaw aga tsun kau da nna bai hkawm mat wa nu ai. Gatsi majan nanghpam a tsin-yam gaw buga shagu, dinghku shagu ruhkrawn zawn hkrawn shang wa ai, kadai n mu n chye ai zimzim hte du shang wa nga ai. Lapu hkawm lai wa yang gaw pyi na yang na na, gatsi majan laru shang wa ai gaw gara hku mung n na lu nga ai. Ding lai wa ai hpang she myi hte mu lu nga ai. Hpang jahtum, sutgan ja gumhpraw, dum nta, yi, sun, hkauna, gashu kasha ni du hkra ma mat wa lu nga ai. Gatut jang she kajawng hkam sha ai hkrai hkrai rai nga ai, dinghku shagu, masha shagu ngu na, hpa-ji chye ai, n chye ai ni yawng lawm nga ai nga nna Seng Mai myit nga lu ai.
Seng Mai jarit de sa wa yang, jarit makau hku masha gamawng jawng nga ai, hpawmi, dingla, mahkawn shabrang, hpyenla ni, asak shi lahkawng masum ram sha naw re ai ramma ni du hkra sasa wawa gahkrang hkawm taw nga ai hpe mu nu ai. Gara de sa ma ai kun? Ngu hkan yu yang, jarit hka kau kaw ginsum kaji ni mung grai nga ai, muk kaji kajaw hte dwi hpa namsi ntsin ni dut nga ai gat seng kaji langai mung nga nga ai, dai kaw gat mari ai masha ni gaw namsi ntsin hte muk ni mari lu sha ai, shing nrai galai sha nga ma ai, gat seng kaji tim shang wa ai gaw n sharam ai, ja rai hte htinghput htingra du hkra ngu ga le, makau hkan gaw tsirung gaba hkan na machyi masha ni zawn, tsi htu la ai hte lu sha nga ai hkrai rai nga ma ai. Ma ni du hkra n ngam sai, yu nga yang, n-gup hku hkumbawp hte chyi rai nna nsa hkyet mat wa ai ni mung tawmtawm rai nga ai hpe mu u ai. Ndai gaw wa sat dap kaw sat na matu bang tawn da ai wa ni, jaw ai mi sha, manang wa hpe ya sha sha sat kau dat ai raitim, hpa zawn n nawn ai sai ni hkan mata sha rai, pyawpyaw nga shajang ai, tinang gaw sat na matu san da sai hpe aten la nga ai wa ni zawn sha, tinang lu sha htu na ka-ni hpe sha madung da let nga ai zawn re hpe mu lu ai. Dut sha ai ni gaw gumhpraw hpe yu, mari ai ni gaw law n law, hkru n hkru hpe yu nna nga shajang ai mu nga lu ai.
Ngai na dat ai hkrapngu hkrapngwi nsen dai ni wa rai sam ai ngu myit nga nu ai. Matut nna mare gaba kaw du yang mung, makau hkan gaw pyada dap, shing nrai hpyendap nga nga nna, hkyiya ni mung poi zawn zawn yan ganawng hkawm nga ma ai, maza sumpum hkan hkan ahpre tam sha taw nga ai ni mung lawm nga ai, kadai ni wa rai kun? Ngu sa yu yang, Jinghpaw kasha ni grai law nga ma ai. Ndai gaw sai hka lwi wa nga ai ngu na kun? Ngu nna, Seng Mai gaw shi a yupmang shingran hpe dum nga lu ai. Seng Mai mare baw na gatsa ba, ka-ni dawn dabang kaw wa sai nga na ai, gani ba mung ma shangai sai nga hkamja nga ma ai kun? Naw wa du yu n-ga ngu lung wa yang, mare gata kaw tsap nang ai ni wam hkawm nga ai gaw lam pyi she kaji mat hkra yan gumpa hkawm nga ma ai hpe mu dat nu ai. Ka-ni dawn dabang kaw na wa nga nga ai ni tsa lu garu, hkawm nga a hka! Shada adawt adat rai ganawng hkawm nga ma ai. Anhte a mare hta mung tsa nang nna ga-law bra ai ni hte ka-ni lu nna ga-law bra ai ni grai she law nga ai. Ndai gaw ka-ni dawn tsi hte tsa lu yang, ka-ni yin kut ai mai ai, tang du ai, namsi ntsin myu lahkawng masum gayau lu yang ka-ni hte bung ai nga she rai sam ai, ngu myit let hkawm nga ai gaw, gatsa ba a nta du mat nu ai. "E.. Tsaba' • Niba'*• Kadai mung nhtan pru ai wa i, chyinghka gaw la da, gade wa sa mat ma ai kun? Niba'.." Nga shaga dat u ai. "Oi*. Shang wa rit, shang wa rit, nang nhku de shang wa rit, niba hkum n zeng shi nna yup-ra kaw nga nga ai, shang wa rit." Nga htan pru wa ai hte Seng Mai nhku de shang bang wa nu ai. "Niba hkamja ai i? Ya ma gaw taw? Hkamja nga a ni?" Nga san dat u ai.
"Ngaihkri jan nang gaw hkamja n hkamja tsun nga u, yahte shani ma mung nau nhkamja, niba mung baw sin ai hte shat mung n kam sha, hkamja lam nau n hkrak nna, tsirung sa yu ga ngu, na tsaba hpe tsun yang mung n madat, tsa lu tsi sha la nhtawm, mare de hkrai lam mat wa wa rai ai majaw, annu hkrai raitim sa yu na ngu sa wa ai, lam kaw baw sin nna gadang malap mat wa ai. Shaloi, masha ni na tsaba hpe sa shaga ya ma ai re gaw, ningtsa ba ma sha wa hta pawn la rai mare de bai pru mat wa ai, ngai hprang wa ai htawm, ya ma gaw taw? Daini tup ma matsan mayan chyu mung n shachyu ai gaw, ma grai kawsi mat na sai ngu san dat yang, htaw, masha ni hpe sa jaw kau sai sha nga, shi gaw hkum she n dang hkra tsa na nga lu ai, ngai grai na kajawng gahpra mat nna kadai hpe sa jaw ai ta? Gara kaw ta? Shing nga ai gaw kaja wa tsun nga nni? Kadai tsun ai mung n na ga ai, ya gaw kanang ta? Ngu san dat yang, mare htumpa kaw masha ni hpe sa jaw kau da sai nga ai." Nga Seng Mai a gani ba shi hpe hkap shali dan u ai. "Niba hpa rai jaw kau ai kun?" Nga Seng Mai galaw san dat nu ai. "Ntsaba shi gaw masha ni a madu jan hte sawksek ai nga nna tsun ma ai, niba ma shangai ai shaloi, yu mung n wa yu ai, niba hkrai tsirung kaw mai byin ai hku tsi sara ni hte shangai la ngai, ya du hkra niba hpe gawn lajang ai lam n nga ai, lu na sha na, kashin gamun nta bungli ni mung machyi tim mai byin ai hku sharang let galaw ra nga ai law, ngaihkri jan e, ya bat mi du wa nga ai, ma mung n woi wa ai, tsun mung n mai tsun, adup zingri wa ai, hkum gaw naw hkalung ai hte grai hkrit let sha nga nga nngai.
Myu shayi ni gaw lu sagawn da ya masai, hpawtni she hparan na da. Na tsaba gaw daini sha salang ni woi la nna hkyuk kaw bang da masai. Niba krai sha jamjau nga ai, kaning di ai baw re mung n chye sai, ma hpe matsan dum dik ai, shani shana yup mung n lu yup ai, sha mung n mai ai, grau nna she nga n pyaw si wa re nga ai, mare de nga hkawm na atsam mung n rawng ai, ma shangai ai shata n tup ai htingbu sa yang, masha ni n ra chye ma ai. Ma sa hkan woi la na matu mung atsam nan n lu ai, baw sin gadang malap wa wa re ai law, grai nga yak la ai, hpa majaw ngu ai mung mahtai rai n chye nga ai, niba a prat kaning di jahtum na n chye tsun mat sai." Nga gani ba tsun nga ai. "Um jaw kau hkrum ai ma a labau wa le i..." Nga Seng Mai sumru nga lu ai. "Niba e, matsan dum dik ai, tsaba mung le i..." Nga shara bu taw nga u ai. "Na tsaba ka-ni sa dawn sai ngu grai kabu ai wa, dawn ngut nna bai wa yang gaw tsa lu, ka-ni tsi re ai nga tsi tawng hkyep kaji sha dat rai lu ai, tsi dai sha ngut ai hpang tsa bai lu jang, ka-ni lu ai raw sha rai, mying taw nga mat mat rai u ai, kaning re ai gaw n chye ai, niba maram yu ai hku nga yang gaw, tsa hte tsi dai pawng yang ka-ni atsam bai lu la ai zawn san bu nga ai." Nga Seng Mai a gani ba gahtap tsun nga ai.
"Niba e, Jinghpaw la ndai ni gaw kaning wa rai wa masai kun? Karai Kasang gaw Adam hkrai nga n mai ai majaw, Ewa hpe garep nra hte hpan da ai nga ai re wa• Ya ten na Ewa ni a prat gaw hpyen wa a bawng ni hta grau jamjau nga ga ai, mayam ni hta mung grau nga yak nga ga ai, hpyen du yang roirip zingri zingrat, nhtu nshat tai shajang, tinang amyu la ni mung, hkyiya tai mat shajang nhtawm, madu jan ni hpe zingri zingrat, tinang kasha hpe pyi n hkyamsa mat ai gaw, gatsi majan grai sawng ai ngu ai lachyum she rai sam sai. Jinghpaw ni a labau hta galoi mung n nga ga ai, n byin ga ai hku lak mi alai rai, myithtum myitchyum jamjau shajang nga ga ai, tsun ai wa gaw sindai shayi ni n lawm yang, n hpringtsup ai da." Nga Seng Mai tsun nga ai. "Um'". Rai nga ai, ngaihkri jan tsun ai hte maren, ka-ni nanghpam a majaw rai na sai." Nta wa lam hta Seng Mai gaw anhte myu ni gatsi majan hte gahtet majan gaba byin ai lam hta si ru mat ai bawsang yawng a sai gaw, Jinghpaw Wunpawng mung ting hta sai hka lwi ai zawn she rai taw nga sai, ndai gaw anhte myu a matu htat dik ai ningsin sai hka she rai sam sai, nhtoi bai htoi na matu, ka-ni nanghpam hpe sai hkringhtawng kaw nna, Karai a chyalai n-gun atsam hte myu tsaw ninggawn tawa yawng myit atsam n-gun dat nhtawm, tengman kangka sadi dung ai hte hkan sa ra sai ngu Seng Mai myit nga lu ai.
