LAI

Hkauna hka kau hkinggau ntsa na hpun kawa maling hte lamu ganghkau na hpraw tu wamwam summwi ni wulu hpum ai zawn gatsi zim rawng nga ai. Hka ntsa hte hka kata maren san tsawm ai majaw, grupyin marit maroi mi alu rai nga ai. Tsit tsawm ai hka kau lahkawng maga mare gahtawng de da nga ai, hpun kawa maling kata dan ndan rai kra ai nta numgaw de jahpawt manap na htawnglawng wanhkut alun rai mawng ai hpe mu mada ai shaloi, buga gahtawng mare alum ala rai nga ai hpe mu lu ai. Mare gaang hku gyigaw let lwi gumpai yu wa ai Hkauna hka hta, hkatsu, chyahkan, wurat wutsang, nga gam amyu myu sawng ai, nga hkam da ai wa la ni jahpawt manap sengke jawn let hka kau de nga raw sa ma ai, shanhte gaw hkatsu hpe sha ai baw pyi n shadu mat masai, ngai ngai rai jang, shadu la, kabaw la rai, hkri hpa kaw gahtawt sha na hpe grai sharawng taw nga ni ai, shalalap nga re ni hpe hkaipyek banggali u hpe pagawn chyagawt jaw kau ma al, gat de sa dut sha mu ngu shadum dat jang, "gaya ai" nga nna madu ra ai hpe sha lata gapung sha, gayi sha rai, u nyau ni hpe jaw kau ai wa mu nna, yu lahpawt dum nga nngai.

Hkauna hka hka hkran lahkawng maga hkauhting hkauna nga ai, mangai ngai wa nna, nakawng shagu u shari ri tawn ai, jahpawt jan mai wa ai ten hta wa-hpawk htemlem nsen grai ngawi ai, wa-hpawk nsen n na ai shaning ramram na mat wa sai, ngai gaw hkarang yi hta sha u gawn ai shaloi wa-hpawk dum ai shadu kau, ndai shara hta gaw hkauna kaw tim ubyit utsa gawn ra nga ai, htinggaw law malaw hkauna kaw mam n hkai mat sai, malawng de lasham hkai shatut tawn ai, lai rem sha nna ja gumhpraw tam lang nga ai. Shingrai, mangai ta raitim, nadap pa de atsit tsit re lasham hpun grai tu ai hpe mu mada ai, Hkauna hka ndai hkran wora hkran na hkauna makau, shing nrai nta sun makau hkan le kaw langai, wo kaw langai re yu-mauchyan ginsum gap da ma ai, praw di yu dat ai shaloi, nga dumsu walawng rai sam ai ngu yang, chyahpung shachya asin amun chyipchyip kum magap kau, yiwa rai daw ngu shadu, ginsum loi bai galu kaba nga ai, mati kamu hkai ai ginsum shadu kau na zawn mung rai, ntsa lam hku n yu shapraw ai ginsum dai gaw lai rem ai nta rai nga ai. "Tsa ba, nang a lai yup sai kun?" "Lau yup u ga ngu, alum sha nba jahpun da sai.

" Shang Wun wudang shinggan kawn htingbu na Naw Ba hpe san dat u ai. Lai hpe nba jahpun ai nga na dat nna, maumau ngu let Shang Wun a hpang kaw hkan nang nga ni ai, lai rem ai ginsum de lau du na hpe myit mada nga ni ai, nba hpun ai lai kasha ni hpe laulau sa mu mayu ai, tintin ngu wudang hpaw kau rai, mawdaw lam gadawng lawu de na hkauna de gagat yu wa sai. Shang Wun tsun ai: "Lai ndai hpung ni hpe 2023 ning shata 9 nhtawi 30 ya jahpawt, lai shakraw rung de na wa la bang da ai re, nli nambat 781 lai re, lai myu grai law ai, ba-hkang nambat 3, kyinsu nambat 2, nambat 7532 ni hpe yaw yu sai, ndai lang na 781 gaw lai kasha loi gaji nna, ri ri shapraw ai ri numnak rawng ai hta n-ga, manu gaw kyin lahkawng na yen 50 jaw na re da." "Shawoi na manu gara hku sha jaw ma?" "Tsawm gaja ai hpe kyin lahkawng na yen 47 jaw ai, ri marun mat ai, maza mat ai re ni gaw paw ai." San mayu ai lam grai law ai re, ginsum de du sai, ndai lapran abui sha lai rem sharin nang let san la na ngu myit nga ni ai. Shang Wun ginsum chyinghka lam na hpunpyen hpe makau de gang sit kau rai, chyinghka lam kaw, ga de du kra magap sharen tawn al sumpan nba hpe chyinghkyi hkai kaw gang mahkai noi kau ai hpang, nhku de woi shang wa sai.

Ginsum nhku kaw yan lahkawng re pinra galaw tawn ai, chyinghkyen pinra lahkawng a ntsa kaw ahpa re balasatik nyep tawn ai, balasatik ntsa kaw awawt awat re lasham lap ni hta nsam mutmut rai, loi chyangchyang re lai kasha ni shamu shamawt n rai ai mara jawng nga ai. Lai kasha dai ni gaw galu de ta latsa lamyi mi daram galu nna, za-htu shingna matu shing nrai riwom singtsin daram sha naw kaba ai rai nga ma ai. Galang praw yu dat ai shaloi, shingtai sumbra kasha zawn rai nga ai, atsawm yu yang, laika kaw matsun ka da ai hte maren, shi a hkumhkrang gaw baw, sinda, kan, ningmai garan nga ai. Baw pyetpyet rai, baw a nhkrem maga gade nde myi tu ai, tsun ma yang lai a myi gaw mammam sha rai nau n mu ai; sinda gata n ga mi de lagaw masum tu ai, lahkawng maga rai yang zum masum rai nga ai, sinda na lagaw zum masum dai ni gaw namlap sha ai shaloi, jum shading lawm ai akyu rawng ai, ta hte bung nga ai re; kan daw gaw loi galu ai, kan gata maga de n ga mi lagaw manga tu ai, gade nde rai yang zum manga tu ai, kan daw na lagaw zum manga dai ni gaw hkum shamu shamawt gumrawt n-gun dat ai shaloi akyu rawng ai, shamu shamawt ai shaloi magra jum let hkawm ai shaloi ngang ai; ningmai daw hta hkum ntsa de ading re maichyan langai tu ai, nrung zawn ading re rai nga ai, ningmai daw hta nam sa lam maidang hku re; hkum nhkrem lawu gade nde achyang mak dindin re shara 18 nga ai, dai gaw lai a nsa lam re, nsa lai, nsa shaw shara re; bai nna lai a hkum gaw lamyi laman 13 du ai.

Namlap singkung kaw magra yup nga ai hkrang gaw wanleng kasha zawn rai nga ai. Shang Wun tsun ai, jahpawt jahkui sa gat bun ai htawm, lasham lap galang mi sa bang jaw yu sai, shani gaang kawn law malawng yup mat wa sai, hkyinghkum 48 yup la nna, hprang wa ai hte hpyi hkai galai kau jang she namlap bai jaw ai nga hkap tsun dan ai. Ngai gaw shata 10 praw 1 shani hkying mali jan e nambat langai lang lai ndai hpung ni hpe sa mu ai re. Shang Wun hpe san la nna chye ai, lai rem na rai yang, lai n la bang shi ai laban bat mi a shawng e, sanseng ai hka hte lai pinra gashin kau rai, masum ya lam shaka tawn ai hpang, ana ganu sat shadung, jahkui ni hpe ntsin hte gayau gat kau rai, lai pinra kaw gat ai sha nrai, ga hkan du hkra gat kau ai htawm, ginsum de masha n mai shang sai, chyinghka chyipchyip la kau ra ai, lai kasha la bang na shani, jahpawt lasham lap loi hkalung ai di tawn nna, lai pinra hta ara sha nyep tawn ai kaw, lai kasha ni hpe mung ara sha bai mara da ai htawm, lasham lap hkalung sawisawi mawt gat jaw, lai kasha naw hkalung ai majaw, namlap hkalung jaw ai re nga tsun dan ai. Daina de gaw yup mat ai lai law sai majaw, namlap n jat jaw ra sai, n yup ai ni daihpawt bang ya ai sha jang rai sai nga ngai hpe lai yaw ginsum de sa woi yu ai. Shata 10 praw 2 ya jahpawt hkying matsat jan e, jahkui shadung hpe hking hte ara sha yup nga ai lai kasha ni a hkum ntsa hkan hking bun kau da rai, gahtawng mare shara shagu yaw hkawm nga ni ai.

Sun gaiwang hkan kung wa ai hkainu ni wukyep nba mun kyip noi abya jawng let tu nga ai, hkainu ju sha mayu nna, hkalung ai hkainu wuhka ran lata daw la rai, ju sha lu ai majaw myit grai dik mat ni ai. Kawa tawng pinra gata hta htawihtawi mutmut re kahkum si hte atsit tsit re mawa gawsen si noi gawiwat abya ai ni hpe grai yu sharawng na zawn rai nga ai. Sun gumhpan hta ahtawi htawi re pu pu ai sapbup si galu yangyang rai si ai mu jang, chyana shing nrai asan di gangau shayap sha na hpe myit dum wa ai, sun htumpa e shagan gat wa sai, galu de dawng mi janjan galu nna galeng nga ai magui kawng kumgyin ni hpe grai yu tsawra la na zawn rai ai, ga sha dat yang hkrihkri duidui akya nga ai, hkalung ai kumgyin hpe di masawp dat tim hpyi hta ju tu ai na ai, sep dat ai hte gyepgyep nga kumgyin ano pru ai, akya nga mu la ai, tsan ai shara kawn pyi kumgyin bat waiwai nga manam pyaw ai na ai, nta ndaw na machya e dung chyai let kumgyin si grai di sep sha kau da ni a1. Htinggaw nkau a sun kaw shagy1, aya, latsan, nai, nawkyu, shinglim shingtawn, shanam, gaubyet, majap, u jawban pan, banput pan amyu hkum hkra hkai shatut tawn ai sa mu nna, hkarang yi zawn she nawn kau wa ni ai.

Shapre nhkrun tsawtsaw jun tawn ai kaw shapre wumwum rai, ahtawi htawi re shapre pu pu let sisi tingru nga ai, shapre pu hte mangai simai shadu sha mu la ai hpe du hkra dum shai wa nngai. Pu amang mang rai numru kaw si majaw ai nbawraw ni hpe yu tsawm dum la ai myit hte, nta madu n nga tim, sun de wudang hpaw kau rai datbung shang dem hkawm chyai kau da ni ai. Sun htumpa gumhpan makau de lagawi hpaw hte langa hpaw grai grai tsit lali ai. Nkau kau a nta chyahpung shachya gaw tsingdu pa kaw lai nna, simai hkinlang mi hkai tawn ai n mu ai, ganing nga tim hkauna de sun galaw da jaw ma ai ngu tak la ni ai. Mare na mano manang ni nam de dumsu gau sa ai let ja jawng zawn lagra ai gala mati, byapbyap re kamu hpraw, dumba zawn lagra htawi tsawm ai kahkum pu mati re wa tam kumhpa jaw, gyigyi re kashun daw wa jaw, manam tim shum la ai hkahpu ru di wa jaw, sun na tsit ai mang ai prang nawkyu sa di jaw, tsit lali hkalung hkrangbawng sa baw kumhpa, singgyin zawn gumdin tsawm ai mahkri sum gaji, japtsing, tsit ai mang ai shaba si, dindin yawnyawn re hpun bahkri si, wuraw makru re sa kumhpa jaw rai nna, jahpawt shana simaw simai mumu maimai myit dik hkra shachyip sha nga ni ai. Gumlau mare kaw htinggaw 64 nga ai, htinggaw gaang hkup ngu na lai yaw nna ja gumhpraw tam nga ma ai.

Ndai lang ngai Shadan krung Gumlau mare kaw mangai simaw simai wa shadu sha chyai ngu du hkawm ai n re, Jinghpaw bum ga na buga ginra numchying yaw hkawm ai ma n re, madung gaw mung masha ni ganing rai lai yaw rem nga ai lam hpe chye mayu nna wa ai, ngai madu nan lai rem nang na matu du wa ai she re, myit lawm ai hte lai hte seng ai laika ngau ka shalat na lit nga ai. Hpang jahpawt, yup nga ai lai kasha ni prang sai kun ngu myit nji n gu hte jaujau kauna pa de sa wa sai. Ginsum sa hpaw yu dat yang, pinra hta lai kasha nkau mi baw shadap tawn gayin gaye rai gabrawng nga la ai, ganing nga tim kosi nna namlap gayin tam ai rai jaw ai ngu myit nga ni ai, yup na shawng e bang jaw ai lasham lap ni hkraw kyip mat sai, nkau mi shamu shamawt nrai ai azim rai naw yup pyaw nga ai. "Namlap bang jaw sana nrai?" "Daina de rau jaw na re, shawng rawt ai ni hpe shawng jaw kau jang, kaba ai n bung wa ai.

Sa sa namlap sa di ga." Shang Wun ngai hpe shana de jaw na lasham lap singga mi sa woi di u ai. "Lani mi namlap singga mi sha jaw i? Pyaw let mu galaw ai zawn sha nga nga ai. " "Lai kasha kaba wa magang namlap sha lu magang, ba n ba gaw du jang chye na ra ai." Shang Wun ngai hpe jahkrit manawng hte tsun ai. Ngai mung lai rem mu magam galaw yang, gade daram ba ai hpe hkam sha yu na ngu myit shajin da sai majaw, du na ten hpe ala nga ni ai. Shani hkying mali hta, lai rem ai hkauna de bai du sa wa ga ai. Punra na lai kasha ni hprang ai grai law sai, Shang Wun gaw jahkui shadung hte hpangsau san ngu ai ana htang jahkoi tsi hpe gayau la rai, lai kasha ni hpe gat bun u ai, lai kasha ni mi kawn mutmut rai nga ai kaw jahkui hte gayau ai tsi shadung bai gat bun jang, grau nna mut hpraw mat ma masai, lai kasha ni a mammam re myi ni grau n mu mat na sai ngu myit ya ai. Matut nna lasham lap langai hte langai, ahpra di pinra kaw tawn jaw ai, lasham lap mazut ai maga hpe gata de shayawn nna tawn jaw ai, dai gaw lai kasha ni lung magra sha manu na matu re. Npawt sharawt nna bang mat wa ai, pinra langai sha naw bang jaw ngut yang, shawng bang tawn ya ai lasham lap ntsa hta lai kasha ni lung mara sha nga sai, gade daram kosi mat sai n chye ai, gadai mung gadai a man kaw ang ai lasham lap hpe makmak sha nga masai, pinra lahkawng hta lasham lap tawn mara jaw ngut ai hpang, hkedu lin hte hkedu sin ngu ai tsi ntsin hpe hka hte gayau la rai lasham lap ntsa hkan bai gat bun sai, lai n machyi na matu, tsi jaw ai ga re nga tsun dan ai, lai rem ai gaw ma-ngai bau ai hte maren myit lawm ra ai hpe mu chye ai.

Lai yaw kau ngut ai hte, hpang jahpawt jaw na lasham lap singga kaba mi bai sa di hkyen da rai, nta wa ga ai. Shana hkying sanit jan hkauna de lai kasha ni hpe galang bai sa yu gawan ga ai. Lai kasha ni yawng rawt ra masai, yawng mayawng rawt ai hte hkum na buhpun palawng dingsa hkai galai kau ra ai, lasham lap hkan raw tawn ai hpyi shakyip ni amut mut rai kap nga la sai. Akam e prang hpang hkrat ai lai kasha nkau hpyi galai nga la ai hpe sa mu ni ai, hkum hpe shawng de nsa htu shalun dat ai zawn di shakang dat ai hte, baw na hpyi shawng ga malaw ai htawm, sinda na lagaw hte kan daw na lagaw ni lasham singkung kaw magra tawn, shawng de gumtsun dat dat rai hkawm ai hte rau, hkum na hpyi gachyi chyi rai malaw yu wa nga ai, makau kaw "shaja u! Shaja u!" ngu chyenan datmyi wan nan tawn yu tsap nga ai nye myit gaw, nji si wanna lata hte sa gang malawk kau dat ya na zawn pyi ngu wa ni ai, ma lu lawm ai jan a n-gun dat rai sa yu shaja tsap nang ai manit 30 dang re hte hpyi dingsa hpyut di raw galai kau dat lu sai.

Hpyi hkai galai kau ai hpang, lai kasha ni hkum hkalung ai hta n-ga, n-gun shaja nna grai ba sai, naw hkringsa la jaw ai ngu myit nga yang, shat tam sha gasu bang wa ai baw gaw pai hkra gayin gaye rai dawng nga ai. Lai a hpyi n chye kaba ai majaw, lai a hkumhkrang kaba wa na matu hpyi galai kau ra ai, lai a prat hpyi manga lang galai ai, jahtum na lang gaw lai ri tsip gata kaw galai ai. Hpyi galang galai yang, sak laning mi jat ai hte bung nna, hpyi galang mi galai ai hte sak laning mi jat ai hku shamying tsun ai, ga shadawn, shawng nnan lang hpyi galai sai lai hpe sak lahkawng ning, hpyi lahkawng lang galai ai lai hpe sak masum ning hkran kap ai lai hku nna shamying tsun nga ai. Ngai ta tut rem nang bang wa ai lai ndai hpung ni gaw sak masum ning hkran kap ai lai ni hkrai rai ma ai, lai shakraw rung kaw hpyi lahkawng lang hkai galai yu sai hkrai re. Daini daina hpyi bai galai hkai kau ai hpang kawn gaw sak mali ning lai ngu shamying shaga tsun mat wa na rai nga ai. Hpyi galai kau ai kaw jahkui bai gat bun nna, mutmut chyangchyang re lai kasha yawng a hpraw nsam gaw, hka shin kau ai htawm na ma-ngai ni hpe pawngta chya tawn ya ai zawn rai hpraw jat mat sai.

Praw 4 ya jahpawt hkying matsat hta hkauna de du hkrat wa sai. Mana de bang jaw da ai lasham lap ni singkung marawng ai sha mu mat hkra machyin sha kau masai, lai kasha ni gashung la na zawn rai lasham lam singkung hkan singgu krin rai magra ba nga ma ai, ngai shanhte hpe shala chyai let lasham lap singkung hte nawng di hta hpai galang dat tim, noi gawiwat tiktik, magra grai ngang ai, hkum gata de loi sin tsit ai nsam rawng ai, dai gaw namlap sha bang ai majaw rai na re. Shana de jaw na lasham lap singga mi shawng sa di tawn ai hpang, hkying jahku e she jahkui shadung hte hpangsau san shadung gayau la rai, lai kasha ni a hkum ntsa hkan gat bun ya sai, matut nna namlap bai bang ya ga ai. Lai kasha ni hpe lasham lap e n mu hkra gaup mara kau sai, pinra langai kaw bang jaw ngut rai, kaga pinra de bai bang jaw na matu, shakum lagaw hku abum tawn ai lasham lap nhtang hta la ngu gayin wa yang, adap ashap bun kau ai zawn re lai kasha ni amut dutdut rai lasham lam ntsa de tam gano sha bang nga masai. Lasham lap bang jaw ngut kau rai, pinra de gahtep madat dat yang, chyichyi chyi nga nsen gaw namlap sha shingjawng ai zawn nga nga ai.

Namlap bang jaw ai shaloi lasham lap hpe pinra makau de loi sit tawn da ya ai, dai gaw gaang kaw gahkyin majaw nga ai lai kasha ni, makau de namlap sa tam sha nna, garan bra hkawm jang, shara shadam jat ya ai hte bung nga ai. Shani gaang hkauna pa de lai kasha ni hpe bai sa gawan yu ni ai. "Jan ja ai, n saup ma ni? Bungsi loi shalawt ga i." ngu lai kasha ni hte ngai tsun ngai htan rai, shakum hku na jan nbung shingga ai muga galap noi kau dat se ai. Daihpawt bang da ya ai namlap ni awawt awat rai, chying ai pa mi pyi n mu mat sai, lai kasha ni maidang lalam tawn, baw hpe lasham lap kaw ba let makrut ai lunglung yuyu rai kyin ai hkrai, lai ndai ni a n-gup gaw zingret hpa she rai nga ai, lasham lap ret sha grai lawan ai. Shana de kying mali hta, namlap ganoi krin hkra sha kau wa nga la sai. Marang htu hkyen ai majaw, hpawtde jaw na lasham lap singga mi sa di da ai htawm, hkying manga jan e marang arut nga htu ai shaloi, ginsum gata kaw lai kasha ni hpe: "Sha mu, sha mu, lau sha nna lau kaba." ngu tsun let lasham lap bai bang ya ni ai.

Praw 5 ya jahpawt hkying matsat jan e ginsum sa hpaw dat ai shaloi, pinra ting amut ahpraw re lai kasha mara nga la ai sha mu mat sai. Namlap sha shakrin kau rai, zim sha nga nga la ai lai kasha ni gaw shanhte law grai lapyin dum ai zawn, nta madu ni hpe namlap lau bang ya marit, kosi nga ga ai nga zawn pinra kaw ba garai nga la masai. Shawoi jahpawt na hte maren jahkui hte tsi shadung gat ya rai, namlap bai bang jaw da saga ai. Shana de jaw na lasham lap di gun nna du wa yang, mi sha bang da ya ai namlap ni hpe sha awok kau nga la ai majaw, galang mi bai jat jaw saga ai. Namlap nde sha lawan ai n-gup gaw ganing re n-gup re ta ngu, namlap langai kaw lai kasha langai hta shalun la nna ginsum shinggan de pru wa hkra rai, lai kasha namlap sha ai yu azi nga ni ai. Lai kasha dai gaw namlap makau kaw shawng gawa wo la rai, sinda daw na shawng lagaw zum masum hte namlap hpe jum shading tawn, baw sharawt la rai, yingam sharawt la hkra lahta maga hku nna lawu de sha yu wa ai, shawng lagaw jum tawn ai shara kaw sha du ai hte galang bai lahta kawn lawu de sha yu wa wa rai ai, dai lai a wa gaw lagut hpa, chyahkring na laman, namlap hpe wakwak wanwan di sha jahka tawn u ai, bai yu yu rai nga yang, sumla sawi lak sama ni namlap kaw, praw de na shata jan nshau htingko sumla sawi tawn ai zawn rai nga ai. Shana de hkying mali jan, sinna maga lamu mung marang htu wa hkyen ai, gun hpaw kau ai shakum shatai ai muga shayu shachyip kau da rai, hpang jahpawt jaw na lasham lap singga mi sa di gun tawn saga ai. Lai hpe namlap madi ai n mai jaw ai, shingrai di jahkun tawn ra ai, marang n hkra ai di la lu yang grau gaja ai, nta madu jan Shang Wun ta grai laram ai, lasham lap singga mi hpe manit hkun jan pyi n rai ra ai di kau lu ai.

Shana ting sha na matu, namlap loi shalaw bang da ya saga ai, daina de yu yang, lai kasha ni hkoize ndung daram kaba wa masai, namlap lawlaw sha nna laulau kaba wa na hpe myit mada nga ga ai. Praw 6 ya jahpawt, hkying jahku n du lu ai shaloi, ginsum de du hkrat wa ga ai. Mana de bang da ya ai namlap ni hpe n mu mat sai, amut yangyang re lai kasha ni marawng marang re lasham singkung kaw, lawu lahta lagaw hte zim sha rai magra ba nga ma ai. Lai kasha nkau ashawng ahpang rai lasham lap singkung shakrin mi sha kaw jawm ba nga ai hpe mu yang, gumrawt shingjawng hkat ai yan zawn rai nga ma ai, nkau gaw grai myit hkrum ai yan zawn rai, rau run rai shamu shamawt n rai ai lasham singkung mi kaw magra kap ba ai hpe ta hte sa gahtawk dat tim baw pyi n sharawt ai, mali manga shara mi kaw manai makai rai jawm gumbawm nga ai mung lawm ai, hkum daw mi shada gamyet tawn hkat nna, gumtsun pru wa yak taw ai majaw, baw sha le dawng wo dawng rai gayin nga ai, yu yak nna sa gang garan kau na zawn ngu al re, shada gawa ashin ga-law hkat ai lam n nga ai, kam ai hku rai mu ga ngu, jahkui hte tsi shadung shawng gayau gat kyin mat wa ni ai.

Jahkui gayau tawn pinra de gahtep hkrat wa ai shaloi, lai kasha ni ba ai lasham lap singkung gata hkan e, chyingnam tum mate te law ai achyang chyang re rai ni hpe mu dat se ai, ta hte sa hta tarin tim, ayai ai lam n nga ai, lungja kasha daram ja nga ai, Shang Wun hpe: "Achyang chyang re rai tarin ndai ni gaw, lai hkyi i?" ngu san dat jang: "Rai nga ai, namhpun gaja re." nga htan ai. Atsit re namlap sha ai lai ni, nyi shapraw ai hkyi gaw wan maga zawn chyang, lungja daram ja ai hta n-ga, pinra ting chyingnam chyang gat tawn ai zawn law nga ai. Jahkui gat bun kau da rai, shana de jaw na lasham lap bai di mat wa saga ai. "Hkru hkru sha nna, ri atsawm ri yaw." lasham lap bang ya shagu, nta madu jan Shang Wun gaw lai ni hpe matsun ga tsun tsun rai u ai. Punra lahkawng hta lasham lap bang ngut yang, jahpawt na hkying shi langai rai mat sai. Shani hkying mali hta, ginsum de bai du hkrat wa ai shaloi, lasham lap naw rawng nga la ai, lai nkau gaw lagawn lamawn rai baw shadap tawn, namlap n sha ai mau marawng nga ai, yu dat yang, hkoize made de law kaba wa sai, kaba ba law ai baw shadap tawn ai mu jang, baw kaba ma ni zawn rai, mawi na num jan shingchyut hpe ma shatai ai maumui dum wa nna, pinra ting tup nga ai lai ni hpe yu hkrit wa ni ai.

Lai rem nang ai ten kru ya du tim, lai kasha ni hpe atsawm nhta jum yu ai, n chye gawa ai chye nga ninglen, myit hta n gun ai majaw, hpunlum di kaw gahtet gatsi chyam yu ai jan zawn ta ndung hte lai kasha hkum kaw grai lawan let sa gahtawk dat nna, bai dawm la kau kau rai nngai, tsan tsan kawn yu ai ten law ai. Marang rai n htu dep ai ten kaw lasham lap singga mi sa laram di wa nhtawm, pinra hta lasham lap ahpa hpa di bang ya ga ai. "Hpawtni gaw lai kasha ni yawng bai yup mat na ten du sai." "Ma-ngai ni zawn yup nna sha, sha la nna yup." "Re le, nkau mi n sha sai shayawm bang ya u." Ngai na lasha let madat dat tim, shat sha ai nsen kya mat sai. Lasham lap masum ya sha la nna galang bai yup mat na hkyen masai. Praw 7 ya jahpawt hkying jahku kaw ginsum sa hpaw yu dat ai, pinra ntsa hta namlap atsit tsit re naw ngam nga ai, lai kasha ni pinra kaw baw shadap tawn, shamu shamawt nrai ai nga nga la masai. Masha yupnga ai shaloi pyi du htim yu wa ai ten nga ai, lai kasha ni gaw sinda shachyen tawn, lahkak zawn re baw lapau hpe sharawt tawn ading ding rai nga ai, yungdawn hte baw kaw sa gahtawk dat yang, jan rai bai dap mat mat rai nga ai, yup tim lagaw lasham lap singkung kaw magra ai grai ngang ai, lai myidi nna yup ai mi re, myi hpaw tawn yup ai mi re, lai a myi hpe ngai gade asawi yu tim asan n mu ya ai, chyang mak re sha mu ai. Shang Wun ngai hpe pinra npu de balasatik woi gang nyep tawn rai, jahkui gat kau re hpang, pinra ntsa na lai kasha kau mi hpe gata lam de woi garan tawn u ai. Lasham singkung kaw noi ai lai kasha ni hpe grai yu lagyi ya dum ai myit hte: "Ga de hta garan tawn ai ni gashung si mat na le." ngu jang, "N gashung na matu jahkui gat ya sai."

Shang Wun ta hte agra rai lai kasha ni hpe magra garan let, ngai lasham lap singkung matu kaw jum nna, abui asi rai hta lajen nga ai mu nna: "Abe, lai wa rem ai nga ai jan, lai n jum gui ai gaw?" nga mani jahpawi u ai. "Nra n rawng ai hkrung jahkai jum yang nshungsi hprui, woimun rawng rawng nga wa ai." ngu lai kasha ni rawt htim gumchyup wa na hpe tsang ai zawn tsan tsan rai hta lajen nga ni ai. Ndai lang yup rawt ai htawm kawn, lai kasha ni lani hte lani kaba grai lawan wa nna, pinra lahkawng kaw n shang ai majaw, ga de garan tawn sai. Lai pinra lahkawng na lai kasha ni hpe garan tawn ngut ai hte, lasham lap mawt gat jaw ga ai, yup ai ni yup, n yup ai ni namlap dingyang sha lu na matu rai nga ai, bai nna namlap hpe mawt jasawi kau jang, yup nga ai lai kasha ni hpe n dagup hkra na matu mawt jaw ai, namlap sha ai sharat ni grai gaji mat sai. Shadan krung lai yaw hpaji matsun sharin sara tsun ai, lai a hkum na gahtet gatsi shadang gaw grupyin ginra na gahtet gatsi shadang hte langai sha re nga ai ga hpe dum nna, masin shaja la hkra rai, sinda shachyen nga ai lai kasha langai a hkum hpe sa masawp dat ai shaloi, teng sha lagyi nga ai, langai a hpang langai di bai hkan masawp shara hkawm mat wa yu tim, maren lagyi pyaw nga ai hta n-ga, lai a hkum gaw amanyen sha nga nga ai, lai sumpan jum dat ai zawn nga manyen ai. Gahtet gatsi shadang 23 a lawu de rai jang, shangda kung ai lam hta nini dang hpang hkrat nna, gahtet gatsi shadang 25 a lawu de gaw loi kung lawan ai nga ga ni dum rai, yahte masum mali ya shayan nna, shana de marang kaba hkrai htu ai majaw, lai ndai hpung ni kung hpang hkrat wa na hpe tsang taw nga ni ai.

Sawn tawn ai ten kaw n kung yang, lasham lap gadawn wa nna hpa n jaw mat, ngai rung kaw hpyi shawn da ai ahkang aten du mat rai, lai ri ri ai n mu yu la na tsang nga ai. Shana de hkying manga e, lai ginsum de bai sa yu gawan ga ai, lai kasha ni yup mat ma sai majaw, lasham lam n bang jaw sai. Jahkui hte tsi shadung gayau gat bun kau ai hpang na lai kasha ni amut ahpraw dutdut rai, sinda shachyen tawn, shamu shamawt n rai ai, gyawna bum gaduk kaw gawp nga ai hpyenma ni zawn, grai yu tsawm shingkang dum nga ni ai, yu magang tsawra na zawn rai nga masai, mun mali manga du ai lai kasha ni gaw pinra lawu lahta kaw, langai mi a rawt saga nga ai aming la ai zawn rai gatsi zim nga ma ai. Praw 8 ya jahpawt hkying shi langai, lai sa gawan ai, hkyinghkum 48 yup nna shawng hprang ai lai kasha nkau mi hpyi hkai bang wa sai. Hpyi hkai ai lai kasha ni hkum na n-gun tup hte hpyi dingsa garawt shaw kau shaja nga tim, makau kaw naw yup nga ai ni gaw lamu aga galai shai wa tim, shanhte hte hpa n seng ai zawn shamu shamawt n rai nga ai, hkum laman daw mi na hpyi galai shayu kau lu na matu, makun malan gumrawt ai gaw ngai pyi hkum she nhkyeng nang wa hkra shaja kau ni ai, hkum laman daw mi na hpyi lu raw kau ai hte kring mi gan sa la nna, bai gumtsun shakut kut rai nga ai, gade jahtau madai let shaja ai mi re, ngai n na ya nna sha rai sai, lasham lap singkung hpyi pyi malu gyi ma na daram gumtsun mahkyit nga ai.

Hpyi shawng kai galai raw kau lu sai lai ni mung, manang jan wa hpe garum la ai lai kumla n rawng ai, shi hkrai shi rai naw yup nga ai ni a hkum ntsa hku ayak ahkyak rai man mara gumtsun lai, shat tam sha hkawm mayu sam ma ai, shanhte gaw shada n chye garum shingtau la hkat ai hte maren, shada ga-law hkat ai lam n nga, gawa ashin hkat ai lam n galaw ai, manang wa e baw kaw jit hkyi nyi bun ya tim, agatsi sha hkam sha shalai lu ma ai. Lai kasha nkau mi naw yup ai majaw, shawng rawt ai ni kosi sharang ra nga ma ai. Dai majaw praw matsat ya shani namlap rai n bang jaw ai. Praw 9 ya jahpawt hkying matsat jan e ginsum kaw du hkrat wa yang, lai ni ahpraw nunu bawkbawk rai hkalung tsawm la nga masai, kyipkyip re hpyi dingsa ni gaw nsam raw mat ai bu palawng shaje zawn pinra na lasham singkung hte jahkui maling hkan gatun tun law hkraw jawng nga ai. Daini kawn lai ndai ni sak manga ning kran shang sal, yu dat yang, mani na daram hkalung ai zawn nrai ai, yawng mayawng mani sha shadap tawn ai baw sinda jahtim shayu kau nna azim sha pinra kaw ba nga masai. Shang Wun ngai hpe singga kaba masum woi hta gun rai, hkauna de lasham lap woi di mat wa sai. Shadan ni tsun ai ga hte maren, n myit madawm da ai wa re, lai wa sai ten, lai n yup ai shaloi rai tim, lani mi lasham lap singga lahkawng sha di yaw ai majaw, grai pyaw lai wa sai.

Daihpawt gaw ta ngawngan daw machyi hkra di kau saga ai, nyem ai lasham lap ni hpe ta lahkawng hte htikhtik htawkhtawk shara ai she na kra laman di lu ai, tsaw ai hpe ta n-ga mi hte gang ngui tawn, n-ga ta hte ndung kawn npawt du hkra di yu wa ngut ai hte, lahpaw zawn magaw nga ai lasham lakung jum ai ta dat kau jang, ningwut mat wa ai lasham hpun lakung gaw, kara adum kau ya ai zawn riri rai ndung kaw lap matsun sha kap nga ta sai. Daihpawt lamu nip nna, namlap di pyaw ai, jan ja ai shaloi, ngai lasham lap hpe shingnip shatai rai, lasham lakung tsaw ai maling gata kaw shang shingbyi tsap let di ai, lasham lap nkau gaji la ai, kawa lap gat ai zawn singga hpring yak la ai, matut yu sai lasham li hkai ai lap gaw, lap htat ai hta n-ga, pa mung pa rai, lagum hpaw lap htat ai zawn singga hpring lawan ai, gahpa ladu tsu ai na hkra jahpawt jan daw mi di yang, singga sanit lu di saga ai. Shang Wun hkum gaji gadun siksik rai tim, lasham singga kaba lahkawng hkawng shachyaw gun nna lahkawng lang ginsum de lasham lap wa gun sa u ai, ngai a baw kaw sumshi jan ning singga n mara yu sai, shingrai singga mi sha gun tim, pungding ga machyi wa ai gaw singga lawan wan shayu kau mayu ai myit hpe sharang let, singga hpa-na manat nna, lasham maling hkan baila hkawm nga ni ai. Shani hkying shi lahkawng e, jahkui hte tsi shadung shawng gat bun kau rai, singga na lasham lap magra bang jaw saga ai.

"Grai kosi sai nrai? Lau sha mu, aningtsing sha re re." singga kasha kaw lasham lap garan hpye let, lahta tsang pinra na ni hpe shawng bang jaw mat wa ni ai. Namlap magra shara bang mat wa sai hpang de gayin yu dat yang, lai kasha ni hpe n mu mat hkra lasham lap e magap gaup kau sai. Punra lahta htap na ni hpe bang jaw ngut ai hte, pinra gata de na ni hpe bai bang jaw sangai, ga de re majaw, lasham lap bang ai singga garawt let, htawt chyingjawm jawm rai bang jaw ra nna, nmanu nmana nchyawn nbyen nga ai, ndum ai rawt dat jang, pinra kaw hpungkum adawt la, pinra makau hkan na jahkui ni kara, palawng e shakap la rai, kara chyupchyup nga mazut mazep mat ai sha nrai, lagaw nshang ni du hkra tsu machyi ai, pinra lawu lahta bang jaw ngut yang, hkying hkum mi nan shang ai. Ten ma ai hpe dum dat jang, Nshawn ginwang buga shara nkau na ni jak hte galang ta apa pat di namlap bang jaw ai hpe myit dum manawn wa ni ai.

Nshang malan let pinra ntsa de mada dat ai shaloi, gawi e, shawng bang ya ai atsit tsit re lasham lap ntsa hku ahpraw hpraw re lai ni man mara nga la sai, tsit ai kaw hpraw re nsam ra, yu tsawm la nga sai, lasham lap sha shingjawng ai zawn, gadai mung gadai a man na namlap hpe makret awak nga ai baw gaw lunglung yuyu rai kyin nga ai. Na lasha la hkra rai madat dat yang, shinggan de nbung bung ai n na, hkauna hka lui ai n na, u numji numchyawi shaga ai nsen n na, ginsum gata ting sau di prut gachye ai zawn nga nsen ngawi mat sai. Galang bai madat dat yang, marang htu kasha ai zawn nga, jak chyui ai nsen zawn mung nga, sumpan zen nsen mung nga, pinra na namlap sha ma kau nna, hkauna pa lasham yi de pyen rawt hkyen ai ni zawn rai sha shakut nga ma ai. Shana de hkying mali kawn marang hte sha nga ai kaw lasham lap sa di ai, singga manga di yang ningsin sin mat sai. Punra hta shani gaang bang jaw da ai namlap pa mi pyi n ngam hkra sha kau nga la masai, pinra ting tittit bawkbawk yangyang re lai kasha ni hkrai rang rang rai mara ba taw ai majaw, lawan wan namlap bai bang jaw ra nga sai. Ginsum kaw wanpu n dun shatu tawn ai, myi n mu mat na tsang rai, namlap di ta tsu machyi ai hpe sharang let, lawan ladan hte jahpawt di jahkun tawn ai lasham lap hpe singga gaji kaw hta magawn anyin bang la rai bang jaw wa saga ai. "Loiloi htat nna bang ya ga." "Mai ai, namlap gata ntsa n masat ra sai kun?" "Gaba sai, gale galau bang ya tim hpa n ra sai."

An lahkawng aman rai pinra lahkawng lawu lahta bang jaw ngut yang, hkying hkum mi lang kau ai. Atsit tsit re lasham lap pinra lawu lahta bum nga ai hpe gayin mada let, myit hta daina ting sha tim n ma sha na sai ngu, na lasha la hkra pinra de gahtep dat ni ai, nye a shingyang na hkun kaw gashaw bang wa ai nsen gaw shinggan na ningsin hkakrik hkatawn ni shaga ai nsen hpe pyi magap kau nga sai. Namlap sha shama kau ai majaw, nhtawi 10 ya jahpawt sa mu ai lai kasha ni gaw akrin akru ahpraw nunu lele rai nga a1, namlap hte gayau gaya re shaloi na nsam myu mi, namlap sha jahtum kau nna lasham lap singkung kaw ba mara ai nsam gaw singgu krin nan rai ai. Hkoize baw made de law ai lai kasha ni gaw mida sanit matsat galu nna, dam de mida mi e chyen dam ai pinra lawu lahta kaw tup mat nga ai, praw di yu dat yang, htu garai tawn ai hkintawng rawng zawn mung rai, banau kaw byet kaba mawng ai zawn mung rai nga ai. Shang Wun ngai hpe pinra lawu lahta hkan e n chye kaba ai, manang ni hta hkum ngau grau gaji ai lai kasha woi tam lata u ai, myit hta gaji ai hpung mi di garan rem hkyen sam ai ngu, shi hpe hta gahkyin ya jang, shinggan kawa wa-hpang maga de awut di kabai shapraw kau dat nu ai. "Gabai kau ai kun?" "Gabai kau le, namlap shama." "Matsan dum ai, shara mi gahkyin rem tawn ga, kaba jang ri ri na ra ai." "Ri n chye ri ai, loiya mi re hte machyi si mat chye ai." nga jang, wa yaw yang, yawng hta gaji al wa kyi lawm ai hpa, lai kaw lai shingkyi lawm ai hpe lata kabai kau ra ai lam chye la ni ai.

Lai shingkyi lata hta kau, lasham lap bang jaw kau da rai, Hkauna hka wora hkran Wa-ma ya jinghku Maji nta de sa chyai na matu, leng masum sengke gawt nna sa wa saga ai. Maji nta htinggaw mi gaw kagam galup, hpunpyen nyep, shakum, madin ni kawa hte da ai ntsa nta dingsa kaw lai rem ma ai, nhku gawk shagu, dawdap hta galang ta hpunpyen ntsa kaw balasatik nyep la rai, lai kasha ni hpe garai tawn yaw ai. "Ga! Grai chye nga ai le, nta dingsa kaw lai rem na dum ai gaw, nbung sisi nga bung, gahtet saup n tsang ra, shakum hku nbung hkrang, gatsi jang chyinghka htem la kau, wanpu kaba hpaw tawn ya, grai yu manu ai." ngu yaw hkawm nga ni ai. Gok de lasham lap bang jaw da ai majaw, dawdap maga na lai kasha ni lasham lap manam ai na nna, dawdap madin shakum htumpa hku baw ara rai shayawn marawng nga al hpe sa yu mau nga ni ai. "Dodap na ni hpe laulau sa bang jaw dat mu, loihkring shakum de lung mat ma na." ngai n yu lu si wa ni ai "Dodap myit su salang ni hpe shawng jaw ai gaw htung re." Shang Wun mani let bai tsun dat sai. "Lai rem tim htunghking masa hte maren rem ra ai i." nta madu jan lasham singga hta hpai pru wa ra ai. "Haha..." Jom mani la rai, ntawt kaw dung chyai let, sun maga de mada dat ni ai.

Tsan ai shara de layang yi maling mut tu ai mu, ni ai bum hta hpun gayau gaya re maling kaba rai nga ai, bum lagaw Hkauna hka hkinggau hku kawa ayan ayan rai tu ngui ai hpe mu, Hkauna hka lui shamu ai n mu, zim sha rai nga ai, hka kau ndai hkran rui re shara hku lasham lap tsit lali nga ai, myisha hpe loi ni ai shara de yu dat ai shaloi, sun hkindawt lawu hku ahtawi htawi re shapre pu hta gatnen ni pyen kabawi ai hpe mu, kawa ninghkri nhkrun kaw nawkyu si si abya nga ai hpe mu dat ai hte, nbusi baw ju bang, shinglim lap maret bang, japtsing hte mangai maihtu htu sha mayu wa ni ai, galu yangyang rai si ai yungpadi si hpe hkumlik kasha hte nai bang rai shadu sha mayu ai gaw, ya jang sa di la na ngu nga ai, mangmang re naisam lap matsun hpe du hkra di gangau gatset sha kau ya mayu ai, masha ni a sun de hkrai masem ai myi hpe hkyet rung ai myit hte dawm la kau dat tim, hkinggau matu hku kram nga ai kumgyin lap hpe bai mu dat ai majaw, ntawt kaw dung nga nzim wa sai. "Kumgyin grai si nga ai." gyinru ahprun let nta madu jan hpe tsun dan ni ai. "Di sha ga le, gade si nga ta?" nta madu jan lai yaw kyin nna, kumgyin si n si pyi galoi n sa gawan ai nga tsun ai. "Hkalung ai mali manga si ai, lahkawng hkye mat sai." ngai sumla dem let htan ai. "Hkalung ai di wa rit, ya jang ga sha ga." not kaw galeng nga ai Shang Wun rawt dung dat hkra tsun u ai.

"Grai tsawm ai, n wam di kau ai, loi naw kaba u ga." sha mayu ai sharang let, ndang masu dat ni ai. "Hkalung ai she sha mu ai, lau di wa rit." Shang wun kumgyim sep na nhtu galu lang tawn rai, not kaw la dung nga ai. Gaji kawko re kumgyin langai di lung wa ni ai, hkalung galu tsawm ai ni loi naw kaba u ga, hkye ai hpe mung gyinli rai u ga ngu myit nga yang, nta madu jan gyinhkye lahkawng hte ju pyi achyang rawng rawng rai naw tu ai bai sa di jat nu ai. Anhte ntawt kaw kumgyin hkalung ahkyup nga sha ai nsen gaw, nhku de lai kasha ni lasham lap asha nga sha ai nsen hte shingjawng ai zawn nga nga ai. "Madat sha! Ya chyawm lawm sha sai nrai i?" nhtawi 11 ya jahpawt, Shang Wun ginsum chyinghka shingdang ai hpunpyen gang sit dat ai hte, agajawng nga tsun u ai. "Hpa ta?" "Lai kasha sa lagu sha ai nam u, yu hkam ai mahkam kaw dau nga ai." "Mau sai re, ntsa pyen malen mi, ga de na mahkam kaw lu ai, chyinghka lam hku hku naw chye matep shang wa, ganing re nam u ta?" yu hkam ai maisau pa ntsa kaw mun mutmut re nam u kasha langai singko lagra tawn, lagaw gaw magyep kanoi kaw kap mat rai, gahprup chyit nga ai. "Galoi mung lagu sha man ai u rai nga ai." "Matsan mayen le, ya ganing di je la na rai?" ngai maisau pa ntsa na u hpe sa gang je magang, nam u chyit gahprup magang rai, singko n ga mi mahkam kaw galaw magyep kap mat jang, Shang Wun yu hkam maisau pa hte nawng di Hkauna hka de sa kabai shatsawt kau nu ai.

Anhte ginsum kaw n nga ai shaloi, nam u ni lai kasha ni hpe n-gup mawng mawng di sa achye sha hkru la ai htawm, u kasha ni hpe wa jaw na matu, n-gup kaw lai kasha bai hta makrang lang rai pyen hprawng mat wa wa rai nga dawng ngu myit nga ni ai. "E, ndai kaw atsit tsit rai madi ai hpa baw bai rai wa sa?" ginsup shakum lagaw shara lahkawng kaw tsittsit rai madi ai mu dat nna, Shang Wun hpe jahtau dat ni ai. "Ga! Yunchyun ni lai kasha sa lagu dun sha ai rai nga ai." "Yu mung lai kasha sha kun?" "Sha le, kagyin ni du hkra sa hpai sha chye ai, ga, yu si ndai ni gaw ndai hkan mung dun achya sha tawn nga ai." Shang Wun ngai hpe wuttawng shakum hku hta atsit tsit re ntsin hka madun u ai. Lai kasha ni a hkum gaw ntsin tawng hkrai rai sam ai, ga madi ai she mu nga ai, tim lai yaw ai hpaji sara ni tsun ai, lai a hkum na ntsin gaw htawi ai re nga, tsit hka gaw sha bang ai namlap rai na re ngu myit la ai. Shani shana ndai zawn nam na rai e dingsa nsim yang, yaw nga ai lai yawm de rai wa chyalu re, tim ngai ngai gaw lasham lap n dang di jaw dum wa nna, namlap n di jaw ra na matu, lai kasha ni hpe lasham hpun de madaw sa hta shalun tawn, shanhte hpe hkrai kam ai hku lasham hpun lakung hkan gram hkawm let sha shangun na myit du ai re, lai rem lak sama sara ni lai hpe jan n mai mai shingte ai nga ga bai dum dat rai, n tsun shapraw ai gatsi kau ni ai, lama ngai myit ai hku lai kasha ni hpe lasham lap maling de sa shalun bang da yang, shingtai sumbra, ndi lagram, yu, nam u, hkadu hka, nchyere, kagyin ni e rim sha shama kau na sha rai nga ai.

Yu, nam u dun sha ngam ai lai hkyi hka sa hpu mau matsa kau da rai, lasham lap singga manga sa di la ai htawm, lai kasha ni hpe jahkui hte tsi shadung wa gat bun kau rai, ngai mana de di garai da ai namlap bang jaw nga ai laman, Shang Wun gaw: "Daihpawt gaw lai kasha ni hpe mu hpa n-gun tsi jat jaw na re." nga tsi gat pung kaw ngachyu shadung zawn re htuk kasha manga hpe hka hte hpaw gayau nga u ai. "Hpa baw mu hpa?" "Ndai ngachyu shadung jaw jang, lai kaba bawng tsawm, ri ri tsawm ai sha nrai, namlap mung n shang ai." "Goi e, lai yaw tim, grai hpaji ai she rai nga ai." Lasham lap htathtat bumbum bang jaw da ai ntsa kaw wandu bat zawn grai manam pyaw ai lai ngachyu shadung ntsin gat bun da rai, ginsum shingjut shingno sanseng galaw kau ai hpang, Shang Wun mam singgu gat da nu ai. "Yunchyun ni a mu hpa i?" "Re, manam hkrup ai hte lau si lu ai." "Lai kasha ni manam hkra na n tsang ra ai kun?" "Lai kaw hpa n ra ai." Jahpawt na namlap bang jaw kau da rai, nta de shat wa shadu sha na matu, ginsum chyinghka la hkyen ai hte, Shang Wun a chyenan ngawi wa sai. "Moi dim, nang kaw lai ngachyu htuk gade naw ngam a? Law yang ngai hpe htuk lahkawng naw garan ya rit, ngai a nlaw na tai mat nga ai." nsen kaw madat shapraw ai, mare baw Bawk Mai a chyenan rai nga ai. "E law, du hkring nta kaw sa la yaw." Shang Wun shinggan ginsum kaw tawn ai lai ngachyu htuk kaba lahkawng nta de hta gun wa nu ai. "Tawn shalai kau na rai yang, ngai hpe tsing lu shangun na pyi n myit ai, manang jaw n ja, tinang sha n ma ngu ai gaw nanhte nan rai sai." Shang Wun a gamoi wa shat di makau na tsa yam kaw mara tawn ai lai ngachyu hpe yu nna ajawp nga ai.

Shang Wun gamoi jan lai ngachyu hpe sha hpa shadu nga ai hpe chye nna, agatsi ngu u ai. "Shat sha saga, shat hkut sai." Shang Wun jahpawt shat shadu hkut tawn rai, nta masha yawng hpe shaga dat u ai. "Ngai ra sha dik ai shalap hte nga gayi, wuraw makru gayau!" mayen mayu let hka wan hta shat laulau chyagawt bang nna hpu dat ni ai. "Ra sha jang, lawlaw sha u." Shang Wun ngai hpang de nga gayi lahpaw gayin dat nu ai. "Wora n mai sha sai kun? Ten lai mat sai i?" gumgai jan wa shat di makau kaw Shang Wun wa mara tawn da ai lai ngachyu htuk hpe madi let bai san dat nu ai. "Lai e jaw ai rai she re, ngai galoi madu hkrai rai makoi sha yu a!" Shang Wun gamoi hpe yu shati tawn loi shara marawn dat nu ai. "Oh, she, laika n chye yu nga ai mu." gumgai jan gaw ganam Shang Wun hpe shadu shut kau dum nna, myi hpyu rai, hkra ta hte gahtan, sinda pai hkra gahtawk kyu hpyi gum mat nu ai. "Daina de Bawk Mai sa la na ra ai, hta madun lu." Shang Wun gamoi hpe galaw matsun dat sai. Shat sha la nna, chyahkring mi gan sa la rai, hpang jahpawt jaw na lasham lap singga manga sa di tawn da saga ai. Lai kasha ni hpe namlap bang jaw ngut, namlap ntsa kaw wandu namchyim manam ai lai ngachyu ntsin gat bun kau re hte, nsin sin wa sai majaw, ginsum chyinghka shachyip kau da rai wa hkringsa mat sai.

Nhtawi htawi ai hte manap shat galaw sha la rai, hkauna pa de sa na sha myit nga ni ai, lai kasha ni lana mi lai, lani mi shai re hkrang hpe yu mayu, mana de bang da ya ai namlap sha kau ma sai kun? Yu ni bai sa lagu dun sha sai kun? Kagyin e sa hpai sha nga ai kun? U numji ni mayun shang sai kun ngu hkrai myit law rai nngai. Daihpawt na marang gaw hkauhpu shatsawt mangai marang ngu ai baw rai jaw sai, pa ga de mam dan ten nan rai nga ai. Marang palawng lahkawng gahtap hpun la, labawp du ai marang zauhkai hkai kau, hkumkop gupban gup rai hkauna pa de share hkrat wa saga ai. Marang maling na lasham lap ni hta hka singgat lui ai zawn rai lui nga ai, marang htu ai ngu lasham lap n di ai hkringsa mat n mai, ginsum gata na mun lam kaba du ai lai kasha ni la mahka nga ai majaw, marang mi htu htu, jan mi ja ja, nbung laru mi ru ru lasham lap di ra nga ai. Marang ahpye nga ai kaw di bang ai lasham lap li la ai, lagra mi sha manat lang tim, ta tsu wa lawan wan singga de bang kau mayu ai, Shang Wun singga lahkawng shachyaw gun, ginsum de namlap galang hte galang bat nna wa gun sa sa rai u ai, gade daram li ai gaw, ngai hpai sharawt lawm tim, shi hkra ta hte nakaw kaw dip tawn, pai ta hte lasham hpunpawt gang nna rawt wa ai gaw lasham pawt pyi gang baw kau dat na daram shaja u ai, nakaw gabye malu gashawt na hpe grai hkan yu tsang ai, lasham sun wudang ma hkra n hpaw hkalang kau ai majaw, shi lagaw n ga mi wudang kaw shawng shingkra lai nna, hpang lagaw bai htawt la re shaloi, shachyaw gun ai singga gadang wa wa rai grai hkan yu tsang si si rai nngai.

Shang Wun du hkrat wa yang, lasham lap singga mi n hpring na tsang nna, marang hte shaw re kaw, pai hkra ta lahkawng hte htikhtik htawkhtawk rai laman di nga ni ai, gaji ai hpe singga de maret anyin bang bang rai, namlap kaw hpa kap ai galoi n yu ai. "Ahte!" Singga de di bang dat ai namlap bai ahpre dat yang, atsit lam re rai mu dat nna, atsawm galaw gale yu dat ai shaloi, mun rawng rawng rai, ta yungdawn daram pa ai shingchyan namlap kaw kap nga ai mu dat ni ai. "Aga, nang she rai i, ngai hpe na ai." Sumshi mali shi jan ning a shawng e, hkarang yi magang ai shaloi, shingchyan gahtet hkrum yu ai. Shingchyan ngu ai mying pyi ganoi malap kau ai daini galang bai gahtet hkrum ai majaw, hkum ting ju hkrai marawng ai shingchyan hpe namlap hte hpawn ga de gabye apap sat kau da se ai. "Ta laseng kaw gaprep gaya hpawm mat ni ai." "Hpa nna?" "Dai yu, arawn sai, shingchyan e gahtet ai le." "Mayen mahtawi bun u." Shang Wun du hkrat wa ai hte, ta hkap malu dan ni ai, machyi gaprep ai sharang let, marang prang kaw lasham lakung gang ngui dat ai hte, namlap na marang hpruhpru nga ru bun ai hpe ari kau rai, namlap di shakut ai gaw, ta pyi gumgai hpyi hpyi mat sai, gade ning ndai zawn marang prang kaw mu n galaw yu sai majaw, ndum shami hkai mu masha tai ai ni hpe shakawn shagrau mayu nga ni ai. Shani gaang du wa ai hte, lasham lap singga sanit lu di shatup gun wa saga ai. Ginsum du shang wa ai hte marang palawng, zauhkai, gupban raw kau sai. "Dai lahkap hku sai hkrai hkrai lui nga ai le." Sang Wun marawn dat ai. "Alum myamya nga ai ngu yang, wawt e gawa sai rai nga ai." gayin gaye yu tim wawt noi ai n mu, sha hkru la nna galoi hkrat mat sai pyi n chye kau dat ai, sai gaw singgaw daw hkra lui nga ai. "Labu galu n kam bu ai jan, ya chyawm rai sai." Shang Wun ngai hpe mu galaw labu n bu ai, bu wawng bu hkrawng hte mu sa ai nga tsun tsun rai u ai. "Wot nanhte yaw, hpawtde lagaw kaw myehailin ahprup bun lang ra sai." hka pyun kaw lahkap na sai sa gashin let anyam nga ni ai. "Myehailin tsun nga ndai, mani na ta gumgai jan zhaugaw yi sa ai shaloi, lagaw hkan myehailin gat bun lang rai, htaw lahta nta Hkawn Di a lai ginsum kaw wa shang mada yu hkawm ai nga yang, lai kasha hpung mi si ma ai re." Shang Wun ngai hpe tsun dan dat sai.

"Myehailin bat manam hkrup tim si lu ai i?" "Si ma nna, lai kasha mari bang ai gumhpraw wa sai re le. Lai kasha ni myehailin n mai manam hkrup ai sha nrai, tsing sat tsi mung n mai manam hkra ai, wora hkran na ning shawng a htingbu ni hkauna kaw tsing sat tsi gat ma ai, lasham lap kaw tsi nbung kawn pawi hkra ai di jaw hkrup nna, lai kasha ni na si ma yu ai." Shang Wun pinra kaw lasham lap bang let madu mahkrawn tsun dan ai. "Lai rem yang, maja ra ai lam grai nga nga ai." na gajawng mau nga ni ai. Marang htu nna nchyi nmu nga ai, shingchyan e gahtet tawn ai hkrum ai sha nrai, wawt e mung gawa tawn, malap n lu ai nhtawi 12 ya shani rai nga ai. Lai kasha ni hpe n-gun ja, kaba bawng, ri ri tsawm na matu, shani hte shana de namlap kaw ngachyu bai gat jaw sai, jahpawt na namlap hta jahkui ntsin naw gat bun ai, lai kasha ni kan n machyi na matu jaw ai re nga tsun dan ai. Nhtawi 13 ya jahpawt, lam makau kaw Ji Nan rem ai lai ginsum de shang yu nngai. "Ah! Tsawm ai, nang yaw ai lai kasha ni grai tsawm ai, yu tsawra si na zawn re." lai kasha ni sha shakrin kau sai lasham lap lakung hkan man ba tingru ai hpe sa hpu dat ni ai. "Yawng a maren tsawm na re le." Ji Nan mani sai rai jahkui gayau gat bun hkyen nga u ai. Ji Nan gaw lasham lap n di ai, lakung hte nawng dan jaw u ai, lai kasha ni namlap sha shakrin kau ai lakung hta ba mara nga ai hpe grai yu tsawm dum kau ni ai, lakung hkinlang mi hpe hta hpai sharawt dat ni ai, lai kasha ni gaw labri hpun kaw labri si si ai zawn tingru noi abya taw ai, labri si gaw tsit ai mang ai, lai kasha ni gaw hpraw ai, nsam n bung ai sha re, hpai dingchyung tawn ai lasham lakung hkan noi magra abya nga ai lai kasha ni hpe namsi si tingru ai zawn yu nawn nga ni ai.

Tsun ma yang, lakung hte dan jaw ai lai kasha ni lasham lakung hkan ba gumrawt hkawm ai ten law mat nna, namlap sha lanyan mat rai, namlap n shang ai, raitim, pinra ntsa na lakung maza la kau ai shaloi aten ma ai, ba ai hta n-ga, ri ri wa na shawng e lawan wan maisau kawk sumhpya de n lu hta shalun jang, lasham lakung lapran e ri ri achya hkawm mat rai, hta shalun yak ai nga ai. "Hpawtni kawn ngai mung lasham lap di nna jaw sai, shing nrai myin wa jang hta shalun yak ai." "Ngai pyi nang lakung hte dan jaw nna yu manawn si nga ai." "Htaning n rem sai ngu lakung hte dan jaw kau ai re." "Hpa majaw n rem mat na rai? Shadan krung ni lai jak rung ni hte 20 ning rem na hku sen htu gadi tawn ai da le." "Lai rem yang, shat shadu sha na ten pyi n nga ai, ngai n rem tim masha ni rem ai gaw e." "Teng na tai ai, ndai lapran ngai nan ba nang nna mu chye ai." Ji Nan hte chyahkring mi shang jahta la rai, hkauna pa de sa wa ni ai. Lai kasha ni daihpawt grau kaba nga la ai, pinra ting ahpraw nunu bawkbawk rang rang rai hpring nga la sai, namlap sha shakrin kau sai majaw, pinra kaw lai kasha ni hkrai mara taw ai, ta yunghkyi made de law sai, kan gata hku na gadun dutdut re lagaw ni magra n-gun rawng la na zawn rai nga ai, lagaw lata hkum hkan ahpraw hpraw rai marawng tu ai mun ni hpe hkra yang masa gaya na rai ai, achyang tengpak re nsa lam ni kaw ashaw ahpung nga nsa pru shang ai mu na zawn rai hkra danleng nga sai, maichyan ntsa na nrung gaw lamu ganghkau de gap shalun dat hkyen ai pyenli zawn dingding rai marawng taw ai, lai kasha ni a hkumhkrang lani hte lani kaba wa magang, namlap lani hte lani shalaw bang jaw ra nga ai.

Mani ting marang kaba htu ai majaw, daihpawt du hkrat wa ai hte jahkui shawng sa gat bun da sai. Matut nna mana de di shaka tawn ai lasham lap bumbum htathtat bang ya ai ntsa kaw, lai ngachyu ntsin bai gat bun jaw rai sai. Shani shagu namlap di ai gaw lai kasha ni hte shingjawng ai hpa, shanhte sha magang, anhte namlap lawlaw di shajin da ra magang rai nga ai. Lai kasha ni hpe ngai sha lawa kan kaba zawn shadu wa ni ai, namlap gade law kra bang jaw da tim, yin re hte shing nrai lana mi lai ai hte akrin akru machyin sha kau kau rai nga la ai, yup ai ten hta lai nna, shanhte a prat gaw sha na matu sa pra ai zawn nhkring nsa sha, hkying ten shagu sha, mungkan pyi sha jahtum kau na hkyen ai zawn rai, lai kasha ni hpe hkrit ai myit pyi rawng wa ni ai. Jahpawt hte shana rai yang, namlap singga shi mali di saga ai. Shana hkying sanit e namlap bang jaw ai shaloi, Shang Wun ngai hpe:"Ndai yu u, kan ningmai daw de loi san wa sai n rai i? Myin mayu wa sai."nga chyenan datmyi hte lai kasha nan madun u ai. "Gaja wa rai nga ai, kan lahta daw de sha sin sai, shangda wa sai." ngai mung lai kasha ni a hkum ntsa hkan gyenan datmyi hte hpaw madi nan hkawm nga ni ai.

Lai kasha nkau mi a kan lawu daw laman lamyi lahkawng masum san wa sai, naw sin ai daw gaw sha bang ai namlap ni rai nga ai, shangda mayu wa ai lawm jang, myit hta la nga gabu taw nga ni ai. Nhtawi 14 ya shani lamu hpawng sai, jan mai jang, gahtet gatsi shadang tsaw nna, lai kasha ni shangda lawan na myit mada nga ga ai. Jahpawt hkying jahku ginsum de du sa ai. Mana bang da ya ai pinra na namlap ni shara ra n sha ma, shara ra gaw sha shakrin kau rai nga la sai, n sha ma ai namlap ni hkan gale da rai, jahkui gat bun ngut ai hpang, namlap shawng bang jaw ga ai, namlap ntsa kaw lai ngachyu ntsin bai gat bun kau da rai, lasham lap di mat wa sai. Lamu marang hpawng ai shani re majaw, namlap di tim grai lawan lu ai, ashu asha adut adang n nga ai, daini du yang, lasham lap nadap mi sha ngam mat sai, nadap mali manga na namlap di jaw ma kau wa nna, Shang Wun gaw namlap n law jaw na tsang myit bai law wa nu ai, daini gaw nambat mali lang ngu na yup rawt ai hpang na kru ya shani rai sai, shawoi na ten hku rai yang, daini gaw lai kasha ni shangda bang wa nna, shat n sha sai, raitim, ndai lang marang shayan htu mat, lai kung shangda ten garawt mat na tai nga ai.

Lasham lap gat di nga ninglen, ningdung de ngam kau da ai hkyehkye re makrung hpe mu ai hte, masha ni lasham lap hpalap galaw ai dum dat, lasham lap hkalung simai shadu sha ai nga tsun ai dum dat rai, ndum shami ngai mung lasham lap makrung di maya dat ni ai. "E, sausau hkahka nga mu nga ai law." lasham lap di sha dan let tsun dat ni ai. "Nang mung lai kasha tai nna lasham lap sha i." Shang Wun namlap di let gayin tsun ai. "Lagawn shabran, lau di sha yu u, grai mu ai, ano rawng nna sau shum ai. " ngai galang bai di sha dat ni ai. "Mu ai majaw, lai kasha ni ra sha ai." Shang Wun lasham lakung ndung na lap makrung langai di sha dat nu ai. "Zepzep nga ai." "Maya magang sau magang re." "Um." namlap jawm di chim nga saga ai. Jahpawt hkying shi e, namlap singga sanit di gun da saga ai. Punra kaw namlap loi bai jat da ya rai, shat shadu sha mat wa sai. Shani hkying mali ginsum kaw bai du sa ai, pinra shakum makau ga hkan lai kasha garawt sha ai hka dingyang hka ai, nam u mi re, yu ni mi re, ga hta ntsin sha madi nya taw nga la ai, ganing rai sa achye baw sha rawng nga nga rai ai kun, an gaw galang mung n sa mu ai, masha nga shingran n ran jang sa lagu sha sha rai sam ma ai, hkrung mahkrung rai gaw nyan hpaji hte pra ai hkrai, gadai lai kasha sa dingsa lagu sha tim ngai gaw shani shana lasham lap di, lasham lap bang jaw sha chye sai. "Ndai yu." "Ganing rai a?" "Ana lu nna si mat ai." Shang Wun ta lahpan kaw shamu shamawt n rai ai lai kasha lahkawng hta bang tawn nna tsun dan ai. Ngai pinra hkan azin ayang azi yu hkawm nga ni ai, lai kasha si mat ai grai law wa kun ngu mau let, hkan tam yu tim n mu sai.

"Langai lahkawng si ai gaw mara re." Shang Wun shinggan de lai kasha chyasi langai bai hta kabai kau dat sai. Si ai lai kasha lahkawng masum hta kau rai, lai kasha ni namlap naw sha shakut nga ai lapran, nadap de ngam ai namlap sa di shakre la na hkyen ai shaloi, htingbu ganam jan an kaw sa wa ra ai. Htingbu ganam jan ngai hpe lai kasha ni a hkum hta ri rawng wa n rawng wa maram sharin ai. "Lai kasha a du hte sinda lapran kaw ta yungnu yan yungdawn hte dip manat dat u, tarin tarin nga rawng ai, dai gaw ri ri na ri mahkawng da ai re." htingbu ganam lai kasha langai hta manat dan ai. "N gui manat ai, si mat na tsang ai." ngai n wam manat taw nga ni ai. "N si law, dai yu u, n si ai." Shang Wun lai kasha langai a du kaw bai hta manat dat sai. "E, teng sha, tarin tarin nga rawng ai. " lai kasha a du kaw grai n wam ai manat dat ai hte, jaja lanlan nga ai rai manat hkrup sai. Lai kasha machyi nga dawng ngu lawan wan pinra kaw dat dat ai shaloi, lai kasha hkring mi ngawkngawk gan rai mat ai majaw, pagawn manat chyai ai baw n re ngu myit la ai. Shana de rui re hkauna pa maga nhtang mada yu dat yang, nadap manga kru hta na lasham hpun ni gaw baw shangun kau ya ai zawn riri dumdum rai ma sai. Marawn ting atsit rai wum ai lasham lap hpe di ma kau lu ai majaw, an hpe madu hkrai shakawn la ai myit rawng ai hta n-ga, namlap sha shama kau lu ai lai kasha ni hpe grau mau shagrau nga ni ai.

Lai pinra kaw namlap bang jaw kau ngut ai hpang, di tawn ai namlap gaw hpawtde jaw na matu sha ngam sai, rai yang, lai kasha ni namlap sha ai nsen asha nga naw ngawi ai, lai kasha kau mi a hkum daw lawu de san mat wa ai mung lawm, law malawng sinda daw naw sin nga ai, shingrai, namlap n law na tai ai majaw, Shang Wun myit law bang wa sai. "Ahkri, nang a lai kasha ni myin ma wa sai kun?" "Myin wa hkyen ai mung lawm, namlap sha ai ni mung dingyang naw sha nga ma ai." "Asha e, ngai pyi nang kaw namlap singga lahkawng masum naw sa hpyi di na ngu myit nga ai le. " "Namlap n lu jang hkum jaw masa, lai kasha ni namlap n jaw ai nga jahtau wa ai gaw nrai." "Ngai ga gaja she tsun ai, ahkri nang ma sagawi saga nga chyu tsun, hpawtde singga lahkawng masum naw di la shangun rit, namlap tu ai gaw nang a nadap kaw sha rai sai." "E law." Shang Wun madu a hkauna na lasham lap di yaw ma kau tim, lai kasha ni shangda masa n sa nna, gahkri Naw Ba kaw lasham lap hpyi u ai. Shawoi na shani rai yang, daini gaw lai kasha ni hpe ri ri na matu maisau kawk sumhpya de hta shalun ai ten rai sai nga, Shang Wun tsun ai, ndai lang lamu marang a majaw, lai shangda hpang hkrat mat nna, namlap gadawn mat rai, nhtawi 15 ya jahpawt, Naw Ba a kauna de lasham lap singga lahkawng shawng sa wa woi di la rai, hkying shi chyen ginsum de lai bai wa yaw ga ai. Lai kasha ni namlap sha ai amang rai magang, Shang Wun myit ru myit gahtet nsim nga sai. "Sara, e, ndai lang na lai gaw n myin hkraw ai mi rai sai, nanhte rung kaw namlap naw nga ai nrai? Nga jang, hpawtde singga lahkawng masum mi wa di jat la na tai nga ai."

Shang Wun lai shakraw rung de chyenan matut dat sai. «Yu nna law malawng rai n myin jang wa di u, yawm maga de rai jang tsi mahtang jaw kau sanu." "Namlap naw wa di na tai ai." Shang Wun htan ai. Shana de hkying manga hta, ginsum de bai du sa yu sai, gyenan datmyi hte lai kasha ni hpe hta nan yu saga ai, kau mi a sinda lawu de san rai nna baw daw naw tsit sin nga ai, hkum ting rai n san lu ai majaw, namlap dingyang bang jaw ra nga ai. Namlap ara bang da ai ntsa e, Shang Wun gaw lai ngachyu ntsin gayau ai kaw lai hpyi galai tsi bai jat bang nna gat nu ai, tsi dai gaw ma shangai hkyen ai ni hpe ma lawan shangai na matu tsi htu ai hte bung ai nga tsun dan ai. Lai rem hpaji amyu myu hpe mu chye la magang, hpa mu galaw tim nloi ai ngu myit la ai. Nhtawi 16 ya manap hkying sanit jan, Shang Wun leng masum sengke gawt nna, ngai hpe lai shakraw rung de lasham lap wa woi mari di u ai. Hpuntai yang gat, manau wang lai, nhprang shabyaw jak rung lai re hkra maga de gawai shang wa sai, Wuhpra ni a lamu ga bum lagaw hkaraw hku lasham lap atsit tsit rai wum nga la ai, lai rem rung ni hkalung ai sha di jaw ai majaw, loi loi ginsa ai namlap grai naw tu nga ai. "Lauban wa, gara maga hku na di na rai?" Shang Wun du lung wa ndawt, ndaw kaw an hpe la nga ai lai shakraw rung na lauban wa hpe san dat nu ai.

"Lele, hkaraw hku na sha ngam sai, wora maga de na masha ni gumhpraw jaw mari tawn kau sai, ndai hku na gaw mani masha ni di ngam ai she rai sai." nga madun dan sai. Namlap hkan na numri gaw marang htu bun ai hpang na zawn shushu rai nga la a1, lakung gang ari kau kau rai, tin shapun nga ai myit hte aman rai di laram bang wa saga ai. Ginsum de na lai kasha ni daihpawt namlap hpa n sha sai hpe myit dum dat jang, lawlaw di gun yu wa na re ngu, singga kaw namlap di anyin bang bang rai nga saga ai. Hkying shi langai kaw namlap singga kaba mali htaw nna hkauna de bai du yu wa saga ai. "Ndai yu, nkau mi ari mahtawi achya tawn hkawm sai, myin wa sai, daihpawt sha jaw sana re, daina maisau kawk de hta shalun kau ra re." du wa ndawt Shang Wun lai pinra hkan yu hkawm let, ngai hpe ri ri achya tawn ai lai kasha hta madun u ai. "Hkrung jahkai kung wa nna shat n sha mat re hpe shangda ai ngu she jaw ai, nanhte gaw myin ai chyu nga, namsi namsaw re zawn ngu tsun ai wa i." "Yawng dai hku tsun man mat saga ai." Namlap bang jaw let lai kasha ni hpe shangda sai ngu ai hte myin wa ai, kung ai ngu shamying ai lam hpe tsun gashai hkat ga ai. "Namlap n sha ai, ri ri shara tam ai lai ni shi hkrai kawk de man lung wa chye ai." shani gaang, Shang Wun gaw pinra gata ntsa hta maisau kawk sumhpya sa hta mara tawn nu ai. Hkying mali hta, maisau kawk sumhpya ntsa hku ahpraw hpraw re lai kasha ni man hkawm nga sai, nkau gaw maisau kawk gata e dingyang namlap naw sha nga ai.

Maisau kawk sumhpya langai mi kaw kawk gaji masum tsa jan rawng ai, maisau kawk sumhpya matu lahkawng maga mahkai mara na matu kawa chyen gyit shakap tawn ai, maisau kawk sumhpya hpe gashi gashai shapyan shagyip dat di lang mai ai, pinra ting maisau kawk shapyan gamyet tawn ai majaw, lai kasha ni hpe yu tsang nga ni ai. "Maisau kawk lai kasha ni hpe n gamyet sat kau wa ai i?" ngai maisau kawk sumhpya hta gawo yu let san a1. "Hpa n ra ai, daina hta shalun kau na she re me, shanhte madu hkrai lung jang, anhte n hta ba ra ai." Shang Wun ngai hpe htan let, daina lai hta na ga saw bang wa sai. "Ngainam, daina lai naw sa hta garum yaw, nanhte a wanpu mung hpai hkrat wa." ganam Bawk Mai hpe shana u ai. "Agu, daina lai sa hta garum e." hkauna pa kaw dumsu rem nga ai Soyi hpe du hkra saw u ai. "Bawk, nanhte a wanpu daina ngai hpe naw shap shalang rit, dat jat da ya, du hkring ngai sa la na." Shang Wun ga saw nga ai laman, daina ganing di lai kasha ni hpe langai hte langai ta singgu hte jum sana kun ngu myit hta hkrit hkrit ngu let, maisau kawk ntsa hkan gram hkawm nga ai lai hpe yu nga ni ai. Shangda ai lai ni nsam ahpraw hpraw rai, gahtan hpyi ganyum tawn, mutmut juju re n-gup shaw tawn, hkum htunhtun di tingko shanu kau, lagaw lata hkintum kau ai gumgai kasha zawn maisau kawk ntsa e, le dawng, wo dawng rai mawng shamu nga ma ai. "Du hkring sa wa jang, hpri wan la lang na hkum malap kau e." "Hpri wan? Hpa di na?" "Lai hta bang ra ai." "Oh." Shana shat shadu sha ngut ai hte, nsin rim nga sal, hpun palawng jat hpun, wanpu hpai lang, hpri wan masum mali hta hpai rai hkauna pa de sa wa saga ai. Daina gaw yahte ting lai rem ai mu shi hte hpa seng ai zawn n rai ai, shani shana nta kaw u wa sha yaw, galang numrang shat shadu da re kaw lai nna, manang ni hte sing lu sing sha madung dat ai nta madu wa La San du hkra rawt sai. Wanpu mammam re ginsum gata de, lai hta garum sa manang ni langai hpang langai rai du shang wa mara ai. "Alaw, lai n rem ai wa, lai hta grai lawan nga ai le."

Soyi ginsum du shang wa ai hte, pinra ntsa kaw aman rai lai hta nga ai nta madu wa La San hpe sa hpu dat u ai. "Ngai n kam galaw nna she re e, la ni hpa galaw tim lawan ai." La San arawng mi alu ngu htan sai. "Lai kasha ni hpe lasham lap bai bang jaw chyai nga rai, ya ya sha jin ai law, ngai na gaw hpawtna hkan she hta mai na re, galoi na lang rai tim anhte a hpang hkrat nna myin myin re." Bawk Mai madu wa hpe mung woi lang rai sa wa ra ai. "Sha nang galoi pru wa ai rai?" grai na hkra n mu yu sai Bawk Mai a madu wa Ma Seng hpe Shang Wun hkap san dat u ai. "Mani pru wa ai, ndai lang kawn Hkyuzin de bai htawt na re da." Bawk Mai madu wa a matu htan ya nu ai. "Pru wa ai hte lai bai sa woi hta, hkring la na ten pyi n nga hkra, grai nrai sai wa re." "Lai hta garum ra ai le, shanhte shinggan de mu galaw hkawm ai ni hkrai ba ai n re, anhte nta nga ai ni shani shana lai rem nna gade ba ai mung chye la ra ai." lai hta lawan ai hte maren, madu wa Ma Seng shaga na matu pyi n nga hkra Bawk Mai e hkrai hkan htan tsun kau kau rai nga ai. "Ta langai hte sha hta tim, grai lawan nga ai le." Shang Wun gagu Soyi chyahkring mi na laman pri wan kaw lai kasha hpring hpring hta bang tawn ai mu nna, hpri wan na lai kasha ni hpe maisau kawk sumhpya de sa hta ru bang kau ya let tsun u ai. Soyi a hkra ta na ta latsang ni gaw shinggan de mu galaw hkawm ai shaloi, jak kaw rin di kau nna, nhtu lang, shat sha, hpa galaw tim pai ta hte hkrai galaw u ai. "Dai lagaw de gaw n yu, lai kasha bai gabye sat tawn sai!" Shang Wun madu wa pinra gata makau de na lai kasha gabye gapaw tawn ai hpe bai mu nna marawn dat sai. "Gabye sat yang sat, nye nga lawk laing de sa hta sharut bang kau ya na." La San lagaw de pyi n yu ai pawtpawt ngu htan dat ai.

"Hkaipyek shangma gau sa nna magawn jaw kau ya u." Soyi hka hta marang jat bai ngu dat nu ai. "Htaw, Wuhpai na la langai pyi, lai hta ai shaloi, lai kasha ni lung u ngu ai maisau kawk sumhpya de n lung ai, kaga de hkrai man hkawm mat mat rai, gade lang hkan hta shalun yu tim, bra amya hkawm mat wa, shing nrai di hkrat yu wa mat mat rai, n dang hkan hta shalun dum wa ai majaw, masin brawng nga, lasham lap di bang bang re tingsan kaw galaw magawn bang la nna, lagaw hte masin mi asi di gabye gumchya apap sat kau ai da. Dai kawn lai n rem sha ai, shinggan de nchyang chyang hkawm mat u ai." Bawk Mai mani let tsun u ai. "Dai kaw shing ngu she tsun dan u, ndai wa nrai wa na shadu nga madai. Ndai naw hta mara kau u, law sai." Shang Wun maisau kawk sumhpya kaw marawng marang di ru bang tawn ai lai kasha ni hpe yu let, madu wa hpe shangun dat sai. Lai kasha ni hpe hpri wan kaw shawng hta bang gahkyin tawn, maisau kawk sumhpya kaw bai ru garai shara bang tawn ngut ai htawm, lai kasha ni maisau kawk hkan magra noi bra hkawm ai hpang, pinra ntsa de noi tawn ai kawa tawng kaw maisau kawk sumhpya hpe bai hta mahkai noi tawn ai. Anhte marai mali gaw pinra na lai kasha hta, Shang Wun maisau kawk kaw ru garai bang, La San hpe hta noi shangun rai mu garan galaw ga ai. Manang ni aman rai lai kasha ni hpe ta lahpan kaw shawng hta majaw lang ai mu magang, myit hta kramkram yu ngu ai, ngai gaw yungdawn yan yungnu hte grai lawan let, langai hte langai di hpri wan kaw hta lajen bang nngai, lai kasha ni a lagaw lata hte ta lahpan kaw magra tawn ya ai, hkawm gumtsun ya ai hpe na hkrit ai, ta lahpan kaw byet lapai mi matsut rawng ai zawn, shing nrai hkintawng rawng zawn re lai kasha ni hpe daina du hkra yu hkrit let, sharang ganawn let hta shakut nga ni ai.

"Ngai a ta maubyinpau hkan pyi manyen pyaw mat sai, lai kasha ni grai manyen ai." yungnu yan yungdawn man hpe gasawt let hpu dat se ai. "Grai manyen lagyi pyaw ai re le, ta lahpan du hkra lagyep chya tawn ai zawn nga manyen ai." Bawk Mai ta lahpam masawp let tsun ai. "Lai n yaw ai ten hta, amanyen alagyi nga ai lai kasha ni hpe masawp mayu nna, marit shingran hkrai lu ai." "Lai masawp ayin pyi bu wa ai re le." Bawk Mai ta lahpan du hkra manyen ai nga tsun jang, lai kasha ni n chye gawa ai ngu myit hpe da-ting shaja la rai, hkra ta hte grai lawan nna, pai ta lahpan de hta lajen bang, hta lajen hta bang di lang tawn, shing nrai hkra ta lahpan kaw hta mahkawng bang tawn tawn rai, lai kasha ni ta lahpan kaw mazuk manai rawng nga ai hpe sharang let hta shakut nga ni ai, hkring re hpang, nye ta lahpan hpe masawp dat yang, lai sumpan masawp ai zawn nga manyen pyaw nga sai.

Amanyen nga ta lahpan masawp hkrup jang, daina na zawn wanpu mammam nga ai ginsum gata kaw, buhpun palawng dingsa ahtat awat re hpun tawn, achyum achyam, nhtau nrau rai lai hta shalun kyin nga ai ni hpe yu yu, myu kaba hta madang grai grai tsaw ai lai sumpan bu hpun shakya lang ai masha ni hpe bai myit dum dat rai, myit shabung dat tim, langai gaw lamu kaw, langai gaw ga kaw nan rai nga ai. Lai yaw ai ni lai sumpan buhpun palawng, nba, dubat n lu mari lang, lai sumpan bu hpun shakya ai ni, lai rem masha ni a salu salat hte mayak mahkak hpe dang chye ya ai nrai nga ai, lai sumpan hpun ai ni lam hkawm tim nbung lawm ai, ningja gala ai, dubat nbung kaw pyen gaye nang ai she mu, lai rem ai ni gaw sahka hte mang, salat hte li, lata hte brawng, shat pyi atsawm galoi n shadu sha ai daram bungli shachyut, marung nshang tingko machyi hkra hkiba ra nga ai. "Lai rem ai ni, lai nba sha pyi galaw hpun, shing nrai mari hpun rai mu, lai nba tsang nna lum ai hte re." ngai lai hta let tsun shadum dat ni ai. "Nba langai gumhpraw gade daram ang a?" "Hkying lahkawng jan dang law sai." "Ga, shade hpu ai i, n lu mari hpun ai law." "Lai tsip dut la nna mari la le." "Jawngma htu ra ai." "Tsi mawan ama hkam gumhpraw bang ra ai." "Gumgai dingla wa jang htuk sha na gumpraw bang ra ai hte, tsa lu sa ra ai hte re, e, tsun pyi n ma ai gumhpraw pru shara hkrai hkrai re law." Bawk Mai yan Shang Wun gahti galai nga shan a man hta ra ai lam krai tsun nga ma ai. "Kumgyin law, naw hkringsa la ga." ningsin gata e Soyi htingbu yi de kumgyin lahkawng sa di wa ra ai. "Hpang gara shamai sep dat mu." Shang Wun shakum na nhtu galu shaw ladawn dat sai. "Nsep ra ai, gala ga sha na re." ngai kumgyin hpe mali brakbrak di garan gam sai.

Punra ntsa hku hta shalun noi kau sai maisau kawk sumpya gaw lagat pa zawn rai nga ai, ahpraw hpraw re lai kasha ni kawk mahka hkan man hkawm nga ai hpe yu let: "Daina hta ma na re ni e, ya mung gata htap na naw hta ra nga ai." ngu san dat sai. "N ma ma gaw hta le." "Lawu htap na lai n law a1, hkring mi hta ma na ra ai." "Myit yu htum ai lu, nanhte lai yaw ai ni hpe, ngai gaw n gui ai." Soyi gaw dumsu rem sha ai wa re, jahpawt manap nam de dumsu sa dat kau da rai, nta kaw wa hkringsa la rai, jan du wa jang "maw jum, maw jum" ngu sa shaga gau la la re mu hpe loi dum nga u ai. "Daini ngai maisau kawk shawng n sa hta mara tawn yang, anhte grau ba na rai nga ai." Shang Wun lasham lap ntsa hku mara tawn ai maisau kawk hpe man na ga de hta tawn, loi gang gashai shagyip dat nna, hpri wan kaw hta mahkawng tawn ai lai kasha ni hpe ru mara garai dat let tsun u ai. "Rai nga ai, gambum masum hta na langai gaw shanhte hkrai lung nga ai." ngai gaw mara tawn ai maisau kawk sumhpya ntsa hta, lai kasha ni hpe bai hkan hta jat nga ni ai. "Ngai ndai maga hta na, nang wora maga hta u, shingrai yang galang ta asan sha hta ma ai." Bawk Mai gaw madu wa hpe shi a man ang de hta shangun dat nu ai, wanpu hpe pinra gata hpri sumri kaw noi tawn, man hkrum hkrum rai chyingjawm let, pinra lawu htap na lai bai hta shakut bang wa sai.

"Bai hkrat ma sai le, hkrat hkrai hkrat ai gaw galoi du hkra hta shalun chyai nga na rai." ngai maisau kawk sumhpya ntsa de nna, pinra kaw bai hkawn taw ai lai kasha ni hpe hkan hta shalun hkawm nga ni ai. "Maisau kawk nnan manyen nna magra yak sam ai, kawk dingsa kaw shalun ai ni lung ma sai." "Du hkring yawng hta ngut ai hpang bai hta shalun da na re, hpawtde sa hta shalun tim mai ai." "Nhti nhtang lunglung yuyu rai hkrai hkan hta shalun ra ai majaw, myehailin ahprup bun kau mayu wa ai re." La San sindawng ga bai tsun wa sai. "Lagat ahtut ai zawn shangu numhtan kaw wan shakap la di sa galip sat kau dat u le." Soyi mani let tsun jat ai. "Ndai daram ram tsawm ai lai kasha ni hpe, shing nga ga tsun ai yan, n kam hta jang wo wa mat manu." Shang Wun wu dat sai. "Myit yang mang ai, galaw yang dang ai, shawa lata brawng..." Daina ting ga hkum mi n shaga ai Ma Seng Mai na ga malai hte n-gun jaw u ai. Nshang rawt malan let ginsum grupyin mada dat yang, pinra hta yahte ting di jaw kau ai singga kaba sanit shi jan du ai lasham lap singkung ni gaw, lai hkyi hte gayau gaya gahtap galap rai abum nga sai, jahkui bat, lai hkyi sama bat ni shana na gatsi bungli hte ladi ntawn hku suisui nga lai wa ai hpe ngai gaw lai a sama re ngu myit la ai, lai hta kau ai hpang e abum taw nga ai lasham lap maza ni hpe ya jang shinggan de lajang shapraw kau na zawn ngu nga ni ai, pinra ntsa de gat pa zawn noi nga ai maisau kawk sumhpya e man hkawm nga ai lai kasha ni gaw atu asan nunu rai tsawm la nga ai, hpawtni hprani kawn kawk gata kaw ri ri bang da jang grau nna hpraw tsawm na rai nga ai majaw, pinra gata ntsa na lai hkyi bum ni hpe n yu lu wa ni ai. "Lai maza ni galang ta jasan kau da ga le?" "Lai ni hkum naw jasan kau ra ai." "Tit hkyi jasan kau ma ai hpang she ri ri ai re." "Lahkawng masum ya rai jang, la kau na rai nga ai."

Shang Wun yan Bawk Mai tsun dan ai. Shalawng de hkakrik hkatawn zim mat sai, shana hkying shi lahkawng du wa ai shaloi, lai kasha ni yawng hpe hta shalun kau lu saga ai. Ginsum chyinghka la kau da nna, shawng hpang rai nta wa sai. "Nang a hta jang, shana dat e." "Hpa nra ai, ngai kaw lai hta garum na shabrang grai nga ai." "Abui law, chyeju kaba dik sai." Lai kasha ni hpe maisau kawk sumhpya de hta shalun kau da lu sai majaw, nhtawi 17 ya shani gaw myit mu myit pyaw ai hte jan law hkra yup kau ni ai. Rot nna hkauna de shawng sa yu sai. Lai ginsum chyinghka hpawng di gang malawng hpaw dat ai hte, maisau kawk kawn hkawn yu ai lai kasha nkau mi pinra hkan hkawm amya let namlap naw sha nga la ai. "Atsawm magra mu le, gadai shani shana nanhte hpe hkrai hta shalun chyai na aten lu ai rai." Shang Wun lai kasha ni hpe maisau kawk man ai shara hkan hta bang let shaga ai. "Asha law, nye ta kaw nan hkyi nyi bun ya ai." lawngta kaw atsit pya re lai hkyi gumdin ari dat let jahtau dat ni ai. "Hkyi sha tsun nga ndai, jit du hkra ji gatsat bun ai re." "Ah, tsun nga ninglen..." gaja sha ta laseng kaw ahtawi re ntsin gahte bun dat ai hkrum sai. Ntsa de mada dat yang, lai kasha ni maisau kawk ntsa kawn sharawt tawn ai maidang gaw ma ni jit ji hkyen ai ja ku lalam tawn ai zawn rai nga ai, ji nyi jahkawn dat ai jit kyi mung marang htu ai hpa prehpre hprahpra she shara nga ai, ntsa de nna kaba ba law hkrat yu wa ai jit hkyi ni hpe sa yu mau nga ni ai.

"Galoi du hkra hkum jasan nga na rai?" "Shawng hpang nini dang rai na re. Ndai yu le, kau mi ri mahtawi achya tawn sai, lai tsip noi na shara sing bang wa sai." Shang Wun maisau kawk gata kaw ri ri ninggram hkawm nga ai lai hpe madun let tsun ai. "Payuk tsi manam ai?" "Ngai ndai hkan chya nga ai." Shang Wun maisau kawk sumhpya noi ai matu gade nde na kawa tawng e, ta hte payuk tsi lahkat achya hkawm nga ai. "Hpa a majaw chya ai?" "Lai kasha ni kawa tawng hkan n gau lung hkawm u ga ngu nna le, shing nrai ginsum numgaw du pyi lai tsip lung tsip hkawm wa ai." "Lai rem hpaji sara ni matsun ai ladat i?" "N re, anhte hkrai chyam yu nna chye ai." "Grai byin ai, koi gam ra ai lam grai nga tim, payuk tsi mai lang ai chyam shapraw nga madai." "Kaga tsaw ai shara de lai tsip tsip hkawm mat jang, n hkan raw la lu ai." Punra hta hkrat taw ai lai kasha kau mi hpe hta shalun kau da, noi tawn ai maisau kawk matu kaw payuk tsi chya da, chyinghka shachyip kau da rai nta bai wa mat saga ai. Ngam ai mu gaw lai kasha ni hpe sha kam sai. Ngai shi jan ya ting lasham lap di shakut, lai kasha ni mung sha shakut rai sai majaw, ahpraw yawn yawn re lai tsip lahkaw hpe sha la nga ni ai. Lai kasha ni kyin dik ai ten rai nga sai, ngai gaw shingdu de ta lale kau rai, ginsum gata noi nga ai maisau kawk sumhpya hpe sha asawi yu hkawm nga ni ai.

Hkum jasan kau ngut sai lai kasha ni gaw maisau kawk hku shagu gadai mung gadai rawng na shara la nna, kawk grupyin lai tsip noi na ri shawng ri mahtawi achya da ngut ai hte, gata kaw rawng let ri ri ai ahtang aman rai ai hpe mu yang, ngai anga laban jan baw pyi yu sin ai, n-ga mi de ri nna, n-ga mi de bai gayin nhtang ri ri rai, yu nga ninglen yawn yawn re lai tsip hkrang mu mada sai, nnan shani ri hpang wa ai shaloi gata na lai kasha hpe asan naw mu mada ai, nnan ri tawn ai lai tsip grai kya hkalung ai, ta hte sa gahtawk dat tim nyapnyap nga ai, ri ai lai tsip htat wa ai kaw hkan, gata na lai kasha hpe n mu mada wa jang, lai tsip ni htathtat jaja nga ai, nbung nsa hte hkunhkraw ka wa jang gaungui ngui grau nna ja ai, ahpraw yawn yawn re lai tsip hkrang ni maisau kawk sumhpya shagu hpring nga ai hpe sa mu ai shaloi, grau grau tsawm la nga ai. Ri shawng ri tawn ai lai tsip kaw jit hkyi hkra jang n tsawm mat ai, shingrai, hkum jasan hpang hkrat ai lai kasha ni hpe kaga shara kaw hta shalun tawn kau ma ai. Ri ri ma ai lai kasha gaw hpyi galai kau rai ahkra zawn lai ganu gale mat nna lai tsip gata kaw tingko rawng nga chye ai. "Ndai naw kya ai, ndai ja sai." lahkawng ya ngu na shani, maisau kawk sumhpya ting ahpraw yawn yawn re lai tsip ni hpe, ngai gaw ta yungdawn hte hkan gahtawk hkawm chyai nga ni ai. "Gade ya du jang, lai tsip raw na rai?" "Manga kru ya, lai tsip hkunhkraw ka ai hte, lai shu rung de nna shana jang raw na re." Ngai rem nang ai lai kasha ni a lai tsip raw na ten hpe n dang la sai, raitim, shawng kaw rem ai htingbu nta jan ang shaa rai, ngai du yu wa ai hpang shani lai tsip raw ai, Shang Wun an yaw ai lai kasha ni yup taw nga re majaw, htingbu jan hpe lai tsip sa raw garum ga ai.

Ginsum pinra kawa tawng hta mahkai noi tawn ai maisau kawk sumhpya hpe langai hte langai pinra kaw shayu tawn, lai tsip rawng ai maisau kawk kaw pai ta ta latsang hte dip shayu dat, shing nrai htu shalun dat, hkra ta hte hkap gang shaw di la rai, raw tawn ai lai tsip hpe tingsan kaw bang da, shing nrai nbung bung hkrang ai shara hta bum shaka tawn ai, raw abum tawn ai lai tsip gaw basi di abum tawn ai zawn rai nga ai. Ahpraw re lai tsip hpe hta sharat dat yu u, gata de hkawk hkawk nga shara ngawi ai, dai gaw lai ganu re. Lai raw ai shaloi, lai tsip marun ai hpe shara mi garan tawn, lai tsip marun gaw lai kasha lahkawng maisau kawk hku mi kaw shang nna, shara mi ri ri nna byin ai re, ntsawm maza hkra mat ai hpe kaga kaw raw gahkyin tawn rai ai, manu mung kaga n bung ai, lai tsip htat tsawm ai hpe tsawm ai hku manu jaw, marun ai, maza mat ai gaw grau paw ai. Ngai Mangshi du lung wa mat ai sanit ya a hpang, Shang Wun lai tsip sa dut ai nga shiga shana dat ai, manu yawng 3641.45 lu ai kaw na, lai kasha mari ai arang 393.24 shaw kau rai, ngam la lu ai gumhpraw 3248.21 re nga, gumhpraw jahpan lakmat dem shagun u ai. Lai namlap gumhpraw n sawn, lai tsi, jahkui mari a arang shaw kau rai, rem ai ten hkun ya na ba jahpu lani mi latsa jan ang nga ai. Shingrai, nta sin let lai rem ai ni, jai lang na gumhpraw lu tam ai nga tsun ai gaw teng nga ai. Lai rem nang ai hkum hkrum hpe malap lu na nrai nga sai, lai kasha ni a lani hte lani kaba laklai wa ai hkrang ni mung nawng e nye myit shingran hta arawng nga sai rai.

Hkawn Ra, Bawk Tawng, Hkawn Tsawm