SUMTSAW MANGHKANG

SUMTSAW MANGHKANG

LU MAI

"Aga, waw ra Jinghpaw num n re ni Hkau Naw? ganang na rai kun?" "Gara mi e?" "Dai dai an hpang maga de hkawm hkrat wa ra ai." "She chye taw nga le, ma lahkawng a kanu Ji Mai gaida jan rai nga ai le" "Ngai yu yang gaw mahkawn gaba zawn she rai nga ai, hpa baw mu galaw ai kun?" La Doi myi pyi n grip ai yu taw let myit hta lani mi gaw num dai hte lu hkrum shaga hkra ngu lagu saku da nga u ai. "Asuya magam gun re ai." Naw Mai simai mari hkawm nga ai Ji Mai hpe galang praw yu dat let tsun dan u ai. "Shi a sat lawat hpe yu yang madang loi tsaw ai Jinghpaw num rai nga ai. "La Doi lagaw lahtin sharawt da, du gaw shawnglam de lalam tawn rai hkan chyan yu taw nga sai "Hkau Doi nang dinghku la re dum nga ai kun? hpa wa hkan asoi sham taw nga nta. "Naw Mai La Doi a palawng matu kaw hkan gang ashun let tsun nga ai.

"Hkum hkan gang yu law, ya gade madaw hkawm mat wa sai kun?" gat de manap shat sa sha ai La Doi gaw n-gut n-gut nga ai myit hte Naw Mai a hpang kaw hkan nna manam dap de nhtang wa nu ai. "E, Ji Mai, ngai Abu law, nang hte lama mi hkrum shaga chyai yu na ngu nga nngai, rau yang ya ndai Nampan wang manam dap de sa wa yu rit, ngai nhka lam gaba kaw la nga na. "lungseng gaji gajaw matut dut sha nna Yinkyang pa kaw lu le sha ai Abu, lam makau kaw tsap let Ji Mai ngu ai hte htinglet nga ai na dat ai La Doi a na gaw brangtai a na zawn jawng jawng she nga wa nna, gat ya kaw mu da ai num dai hte mying bung ai masha rai kun? shingnrai Ji Mai shi nan re mung nchye ai, ganing nga tim mu jang chye sai ngu myit gun let, La Doi gaw manam dap chyinghka lam nhku maga na dawhpum gaba makau kaw makoi tsap nga nu ai. "E, Abu, nang hpa rai dai daram lasi tsawm mat nta?" Ji Mai simai mari hpai nna sa wa ra ai. "Nang rai jang gaw grai hpum tsawm mat nga ndai le..." Abu mung manang jan hpe kap shakawn dat nu ai. Dawhpum kaw makoi tsap nga ai La Doi gaw Ji Mai a nsen hpe sha na nna, man pra pra pyi rai n yu yang, masin htukhtak mat wa ai majaw, dawhpum shingdu de gayin tsap let masin naw gan shakawp nga ai laman hta nta na jan a : "N wa, gara kaw du taw nga sai rai?"nga ai chyenan mu hta nu ai. "Shwili kaw, hpa rai fung hkrai matut satsang a ta? ngai majoi pyaw chyai hkawm ai mung n re gaw." La Doi nta na jan hpe hta dat sai.

"Nwa e, ma yannau ni muk nau htet ai majaw matut dat ai re law... "La Doi a gainu jan nsen grai nyem ai hte tsun nga ai. "Num nang nau jawp ndai law, ngai wa jang chye la wa ya ai, hkum garu sa."La Doi madu jan ga pyi rai nhtum yang chyenan dip sat kau nna gayin dat yang, Ji Mai yan hpe nhkan mu kau dat ai majaw, myit hta: "Mana law, ahkyak rai jang she fung bai shang wa wa re gaw." Chyenan pyi gabai ga kau na daram pawt mayu mat nu ai. Mali manga ya lai mat wa ai hpang, La Doi ndum shami e Naw Mai hpe: "Hkau Naw, nang Ji Mai gaida re du hkra chye ai gaw shi a fung nambat mung chye taw a dawng?" nga san dat sai. "Nehye ai." "Hkau Naw e, Ji Mai a chyenan lu hkra naw shakut yu u law, anhkau a hpaga awng jang nang hpe kumhpa law law jaw na" La Doi mani let Naw Mai hpe asawng bang wa sai. "Gade wa jaw na, Myen gumhpraw kun? ngai gaw Miwa gumhpraw she ra ai lu." Naw Mai gumhpraw jaw na nga jang grai myit lawm wa nga ai. "Miwa gumhpraw 500, na sai kun?" "Mai sa, anhkau a bungli awng dang lu na matu ta naw shawng shakram da ga. "Naw Mai gumhpraw lu tam lang hkyem ai majaw, gabu awhlaw taw nga sai. "E hkau, ndai yu! gumhpraw sha jaw jang gaw hpa mung byin mai ai yaw." Masum ya a hpang, Naw Mai Ji Mai a chyenan nambat ka shakap tawn ai maisau pa langai La Doi hpe hpai galam dan sai. "Chyeju gaba sai, maw maw nang ra ai chyenan nambat, naw shawng gayat chyam yu na kun? loi ngai hpe masu sha shadu na lu. "Naw Mai gumhpraw sumbu kaw hti bang kau nna La Doi hpe bai shatu dat nu ai. "Bai bai, Hkau Naw daina de hpa sha mayu ata? tsun yu u.

"La Doi maisau pa na chyenan nambat hpe myit hta galang bai matsing gun let tsun nga ai. "Um, u hkrawng langai sha na, byiya mung lu na, an a yupgawk de nan la wa ya. AWh le le, awh le le goi... "La Doi mahtang lungseng hpaga awng ai daram gabu mat nna, hka shin gawk hta mahkawn hte rung nga hka shin rawng nga sai. Matut nna lai wa ai ten ni hta La Doi gaw Marit gaw marit, hkrit gaw hkrit ngu ai nan gatut nga sai. Ji Mai a gawng shingyan hpe dum dat shagu, hkum ting nshungsi gahprwi wa, hkuhkau ai rai yang Ji Mai hpe pawn tawn mayu, sha mai ai rai yang ahkyup di sha kau mayu, n ji n gu nchye tsun ai myit ni shi hpe shadut taw nga nna, Ji Mai hpe fung langai matut dat ai majaw: "Oi, kadai rai ?" Nga ai nsen na dat ai La Doi a hkum gaw nrut nra tsam mat wa ai zawn nga nna :"AWh, fung gayat shut sam sai, grai n hkungga ai hku tai mat sai law." Ngu tsun maa dat ai shaloi: "E law, e law, hpa n ra ai." Nga ai hpang, La Doi madu tsun mayu ai ga gaw n Iu tsun shapraw rai, madu a hkum hpe grai anya dum kau nu ai. La Doi numla dam mat ai zawn rai lahkum kaw mau dung nga ai hpe wa mu ai Naw Mai gaw baw masawp let: "Hkau La sumtsaw balen jung mat sai kun? Myi grip grip ai pyi nmu nga ai le, sharam u lu, magawn nmai myit ai, myit numshe shang shut jang yak dam na lu. " "E, nchye tsun sai, hpang na lam hpe kadai wa dang tau chye da na. "La Doi nsa gaba shaw let tsun nga ai. Ten lani hte lani lai mat wa tim, La Doi Ji Mai hpe myit ai masin nzim hkraw ai majaw, yup n pyaw sha nmu, mu galaw myit nlawm nga sai. Lahpawt mi hta La Doi gaw Ji Mai ni nga ai nta lawk de san sa wa nu ai, kam gaja ai wa man hta wa du pyi yupnga ai nga ai hte maren, rung yu ai ten hta, Ji Mai simai mari hpai nna pru wa ra ai, La Doi myit hta: "Dai hpawt gaw ganing nga tim, ga lahkun sha pyi hkrum shaga lu hkra." Ngu myit da-ting la nna: "E Hkri, ndai yan kaw La AWng ngu ai salang langai nnga a ta?" Ngu san masu dat nu ai.

"Hka, La AWng nga ai salang mi n na yu ai, ngai mung rung sa rung yu rai lai ai kaw nna, shinggan nau npru ai majaw, anhte ndai wang hta Jinghpaw kadai bai sa nga jat ai mung nchye ai. "Ji Mai tsun let zawsi shaw nna chyinghka hpaw hkyem mat jang, La Doi grai mau ai nsen hte: "AWh, shaloi gaw kaga hkan bai san yu na nngai." Ji Mai hpe yu nga yang, Ji Mai mari hpai ai ta na simai nỉ hkrat wa hkyem ai mu dat nna atsang arang grai lawan ai sat lawat hte :"Hka hka! ngai gan hpai ya de, nang grai n manu nga ndai" Nga tsun let, Ji Mai: "E, n ra sai." Ga pyi rai ntsun htum yang: "Simai sha hpai garum ai gaw hpa nra na re. "Ji Mai a ta na simai sa la hpai kau ya rau nu ai. "Crai chyeju gaba sai yaw." "Dai sha hpa bungli gaba mung n rai ai mi." Nhku hkan shang wa lu ai La Doi gaw nchye tsun hkra gabu taw nga sai. Ji Mai hka du jaw let: "Dung ga yi, hka Iu ga. "Nga hkungga wa jang, La Doi gaya ai myit rawng wa ai nga yang, grai nau la ai zawn rai "E, naw hkawm sana nngai." nga rawt hkyem sai, shi hpe yu yang mung, grai kyin nga nngai nga ai zawn rai ai majaw, Ji Mai : "E, shaloi gaw gaungwi sha yaw." Ngu hkan yu sa kau dat nu ai. "Hkau Naw, chyinghka lau hpaw yu u law. "La Doi chyinghka wa akawk kyin nga ai na ai Naw Mai gaw, labu pyi galoi nhta bu la ai chyinghka sa hpaw dat yang, La Doi mani sumsai rai shang wa ai mu ai majaw: "Hpa gabu shiga mu da sa? yu yang zet zet rai, myi mung le le rai nga ndai le, Ji Mai hte sa mu hkrum sai kun?" Ngu san dat nu ai. "Nang gaw ya du hkra labu pyi nbu ai gawk kaw rawng nga, la ni gaw Ji Mai hte gat de simai sa mari nna pyi wa sai. "La Doi shakawng tsun dat nu ai. "Madat dat yang, teng na zawn mung n nga nga ai le, masha ni tsun ai Ji Mai gaw grai rai dum ai, grai gumrawng ai, madang grai tsaw ai num she re da le, alaga shinglang hpyi she malu hkra shachyut tim dep na gaw rai kun lu?" Naw Mai jahpoi asang dat nu ai.

"Hkau Naw e, la ngu ai gaw shing Te num hkwi la lu ai hpe she la nga ai gaw, ngai hpe yu taw nga yaw! an a hkungran poi tsa lu na gumhpraw she hkyem da u." "Ji Mai htam gade na hpa baw ngu ai gawk kaw mu htam a?" Lani mi La Doi gaw ginwang daw asuya rungdap de dam hkrat wa nna, chyinghka lam sin ai hpyenma wa hpe matu nhkrup ai sa san chyam dat nu ai. "Htap mali, laika hta ai gawk kaw re." Ndai laman La Doi kam grai nan gaja nga u ai. "Kawk kawk..." La Doi a laka lung ai lahkam gaw masum lang htawt na hpe lahkawng lang sha htawt let nsa hte hke nga rung gawk chyinghka wa akawk dat nu ai. "AWh, hang kun?" Ji Mai loi mau ai nsen hte hkap san dat jang, La Doi ga tsun nhpang htum mat ai zawn nga na"E, re law, nanhte a rung up wa hpe sa tam mayu nngai." Ngu tsun masu kau dat sai. "AWh, shi htap masum kaw re. Nang sa yu su. "Ji Mai shi hpe dung ga nga nsaw sai. "E law, e law chyeju gaba sai." La Doi gaya hkrum ai zawn nga man kang mat wa sai, Ji Mai hte grai sa jahta la na hku sawn tawn da ai wa, ga tsun nhpang mat mat nna shi hkrai: "Nye baw nu nhyin sai, nbyin sai." nga anyam n-gut let nhang wa mat nu ai. La Doi hkring sa shara de wa nna yup ku hta nda hpan wa galeng taw nga sai, Ji Mai hpe dum ai myit ni gaw nzim hkraw, ganing gaw nchye di, hkrap na zawn nga, marawn jahtau dat na zawn nga, masin salum du hkra hpawm mat ai zawn nga hkam sha let shana ting sumtsaw ayawn mahkawn ni bang madat let nhtoi jahtoi kau nu ai.

"Hkau La numla dam ai zawn rai wa nga ndai le, hkum npaw ai kun?" Naw Mai La Doi yup gan gan ai chye nga ninglen shala asang dat nu ai. "Numla dam ai mahtang kun? myit mahtang dam ai kun? Ji Mai hpe marit ai myit ni n köp hkraw, n sim mai, ganing di sana kun?" La Doi shi hkum hta teng teng hkam sha nga ai lam ni tsun shapraw u ai. "Shade dum yang gaw fung gap dat u le, shi a nsen na lu jang mi she nga pyaw mat na mung nchye, hka hka! nang ngwi yang ngai gap dat n ga!" Naw Mai La Doi a chyenan sa gashun mat wa sai. "E, Ji Mai i?" "Re le, nang kadai re ta?" Ji Mai nsen n na man ai masha re ai majaw san dat u ai. "Nshut ai, nye manang wa nang hpe tam mayu ai da, hkring naw la rit. "Naw Mai chyenan nsen htawn ai shara magap kau nna : "Maw, maw, hkrang sai, hkrang sai, lawan hta u." ngu La doi hpe chyenan ladawn dat sai. "Hkau Naw, ma zawn shum gasup." La Doi naw ndang nga ai laman Naw Mai e chyenan hpe na kaw sa gahtep ya ai majaw: "E, Ji Mai i?"ngu shaga matut dat nu ai. "Re law, nang kadai rai?" Ji Mai akya nga ai nsen hte bai san dat jang: "Ngai gaw na chyinghka lam kaw simai hpai ya nna, mani sha mung nang a rung de sa ai wa le, nang hte hkrum shaga mayu ai hta n ga, daina de aten yi lu na kun? Anhte hpe Sam shat seng de woi sa rit ngu mayu ai, nang hpe grai gaw ana ai she anhte sha pyaw ai shat seng ni atsawm nchye shi ai majaw, nang hpe chyenan matut dat ai re." ngu bai tsun numshe kau dat nu ai.

"Grai chyeju gaba sai, raitim daina de ngai nrau ai, hpang de rau jang woi sa na yaw, bai hkrum ga. "Ji Mai masha gatsing ni a chyenan mu hta nna loi mau mau nga nga u ai. La Doi gaw Ji Mai e ndang kau ai hkrum tim myit grai pyaw mat ngai ai, mahtang shi madat mayu ai shaga nsen ni hpe na lu sai majaw, myit dik taw nga sai. Bai Naw Mai laban wa gaw myit n gut taw nga ai, Ji Mai hpe n lu saw ai nga yang, shinggan de mu mu mai mai shat ma mi sa sha na ngu saku da ai gase mat nna myit nmu nga ai. Shata 10 praw 1 ya shana Ginwangdaw shawa ginsum rung kaw ginsup pya shingjawng poi nga ai majaw, La Doi yan Naw Mai mung sa yu ma ai. Nampan wang hku lai wa ai shaloi, shan a makau hku Ji Mai zawn re num langai lai mat wa ai mu dat nna, La Doi gaw Naw Mai hpe gang lang let hkan shachyut tam mat wa yang, Ji Mai gaw la langai hte nampan sun na lahkum kaw dung jahta nga ai sa mu sai. Ndai ten na La Doi a sin dawng myit gaw Ji Mai a makau kaw dung nga ai la dai hpe sa numret gatawng sat kau na daram n ju nga ai myit hpe dip da nna Naw Mai hpe: "Hpa tsun ma ai kun? sa lagu madat yu su." nga ganawng shangun dat nu ai. "Rung na mu bingli hte seng ai lam she tsun ma ai. "hkring re hte Naw Mai mani ha ha let nhtang wa ra ai. Matut nna lai yu wa ai ten ni hta La Doi a gawng shing yan gaw lani hte lani lasi agrawp mat wa sai. N lu n sha, nhka mun madat da, hpaga lam hta myit nlawm, shani shana yup gawk hkrai rawng, shaga ai ga hkum shagu na manawng mung wantsi lawm ai zawn nga nga ai.

Naw Mai gaw manang wa hpe matsan dum ai hte La Doi a myit awai ya na matu Ji Mai hpe tam mat wa sai "Ngai shi hte atsawm hkrum shaga yu ai ten ni n nga, bai nna an shada tsaw ai, ra ai ngu ga gadi tsun ai lam mung n nga yu ai, ngai a majaw machyi gaba hkrum na lam gaw nteng na re." Naw Mai Ji Mai a nta de tam sa wa nna, byin nga ai lam ni hpe tsun shadan dan let hpyi shawn aput nga ai majaw, Ji Mai a myit pyi myu mi nga hkra hkam sha taw nga sai: "AWh, nye a majaw masha ni nga n ngawn hkrum, nye mying hten n mai, she naw sa kawan yu na re, shi mai jang ngai hte hpa n seng sai. "Ngu myit lu ai gata hta Naw Mai kaw hkan nang mat wa nu ai. "We! Hkau La, ngai Ji Mai hpe woi hkrat wa ya sai" Naw Mai lam lapran chyenan lagu shana dat nu ai. La Doi na gabu ai lata yup ku kaw nna rawt ngoi rai, nba ni rawt gahtap, buhpun palawng hpun sumraw, baw sau chya masit let pat yaw gayin yu, hkrup mara gabai tawn ai buhpun palawng ni hpe ku gata de hta makoi kau, yup ku panyep ni gang shapreng, hpa gaw hpa kyin ai mung nchye ai kyin gayin nga ai lapran, chyinghka kawk ai na nna, gabu gaduk nga ai masin hpe dip da let chyinghka hpawng di sa hpaw dat ai shaloi, Naw Mai a "AWk" galaw ai ta shawng mu dat ai majaw, aiwan ngu pawt dat hkyem ai she, Ji Mai shawng kaw bai hkawm shang wa nna, mani sumsai nsam hte hkap tau la sai. Ji Mai lup re hte Naw Mai gaw mu gaji mi ra nngai nga tsun masu nna yan kau da nu ai. "E, loi lasi mat wa nga ai le, hkum grai n pyaw ai kun?" Marai lahkawng sha dung gatsi nga yang, nsa sa pyi yak wa ai zawn nga nna, Ji Mai shawng ga shaga hpaw dat nu ai.

"Ya hte hka shin ai shaloi gatsi hkrum nna, waw shang mat ai sha re." La Doi loi gaya gaya rai Ji Mai hpe yu let masu ga tsun nga u ai. Ji Mai La Doi hpe tsaw ai ra ai myit nrawng ai majaw myit nlawm ai hte dung nzim wa sai. "Law, hka lu ga. "La Doi aku aka ngu let ntsin du jaw u ai. "Chyeju gaba sai, ngai naw hkawm sana. "Ji Mai tsun let rawt hkawm mat wa hkyem ai hte La Doi gaw n ji n gu rawt tsap nna: "Ji Mai, ngai nang hpe mu ai shani kaw nna nang hte hku hkau mayu ai myit ni lani hte lani grau rawt jat wa, nye mying gaw La Doi nga ma ai, Lahtaw kasha re, buga gaw Nshawn kaw na rai nngai. Nang hpe tsaw ai, ra ai majaw, nye salum pyi gapaw na daram nga yak mat ni ai. "Nga nna madu a kraw lawang gata hta hkam sha nga ai lam ni tsun dan nu ai. "Chye na sai, manang hku nna hkau ga le i? ra rawng ai lam nga yang mung garum hkat na re. "Ji Mai nmyit madawm ai kaw La Doi e sumtsaw mahtai hpyi ai hkrum ai majaw, hprawng lala hku "Ngai chyenan bai matut dat na nngai. "Nga La Doi hpang kaw hkan shaga tsun ai ga hpe pyi nhtan ai pru mat wa sai. La Doi a gawk kaw nna pru wa ai hpang, Ji Mai gaw chyenan la kau nu ai. Laban bat mi lai mat wa hkra Ji Mai a chyenan nmu matut mat ai La Doi a masin gaw grau nna n ji n gu, gaju galim, gating gatut, ganing nan nchye rai wa ai zawn nga nna, Naw Mai hpe saw woi nhtawm, gaya nsu Ji Mai a rung de sa wa masai. "Grai kyin nga ai kun?" La Doi yan Naw Mai gaya gaya rai let lanyan shang wa mara ai. "AWh, dung ga, dung ga, anhte a rungdu wa hpe bai sa tam chyai ma ai kun?" Ji Mai shi hpe sa tam ai chye nga ninglen lahkum hta ya let san masu dat sai.

"Hkau Doi nang hpe hkrum mayu la ai nga aput taw ai majaw, woi sa wa ai re. "Naw Mai mani let shing nga tsun dat ai hte, La Doi gaw machyang ndum hte Naw Mai hpe aja wa adawt dat nna:"An nang hpe shinggan de shat ma mi sa jawm sha ga ngu sa saw ai re, chyeju hte aten jaw na hpe mung myit mada ai. "La Doi Ji Mai hpe yu taw nga let hpyi shawn dat nu ai. "Mai ai, ngai mu naw galaw shakre kau na, loi shat seng de hkrum ga. "Ji Mai manam shachyut ai ga ga jang, La Doi gaw Naw Mai hpe du sharawt dan let wa saga ngu ai kumla shapraw nna:"Alu sha sa wa yaw. "Ngu Ji Mai hpe galang bai htet kau da sai. Ji Mai hpe lu saw da sai La Doi a myit gaw ninghkawng jan hpe pyi ganawng jashang kau na daram jan du ndawt nga sai. Yup gawk du ai hte mahkawn mangwi hte rung nga hka shin, buhpun palawng galai, kara magyi ni hpe nhtang hku masit shapreng yu, mayan hku masit dat yu, ari shamawng tawn yu rai kyin taw nga ai hpe mu ai Naw Mai gaw yu ndam taw nga nu ai. Ji Mai mung La Doi yan rung de nan sa saw ai majaw, myiman n ya yang gaw nmanu dum rai, shan hkawm mat wa ai hpang jang ra ai laika ni hpe lawan wan hta shama kau rai, num manang langai woi matep na bai dum nna Abu hpe saw lang nu ai. "Law law, an hte a hkuhkau hkrumzup chye lu ai a majaw, jawm shaman lu ga, sha ga.

"Naw Mai Shachyen shaga tsa hpe shawng woi sharawt lu dat nu ai. "Sha ga yaw, n gaya ai sha madu ra ai hta sha ga. "La Doi tsawra shingni hpringtsup ai nsam hte Ji Mai a shatwan hta u shan tawng mi hta bang ya nu ai. "Chyeju gaba sai. " Ji Mai shatwan na u shan tawng hpe yu nga ninglen myit hta grai hkam sha nga ai, shi ma lahkawng a ganu tai lai wat wa tim, kadai shi hpe daini na zawn lahku lanu let shatwan hta lu sha hta bang ya ai masha n nga yu ai majaw, La Doi hpe grai nan myit su dum taw nga sai. Ji Mai hpe mu gabu ai La Doi gaw shat dang dang mat nna, tsa gawm hkrai sharawt let, tsa shaman jaw ai ahtang aman rai nga sai ngu yang, myi bri bri rai ai hta n-ga, man, du ni mung sama tawn ai zawn rai kye Isawm wa sai. Ji Mai yan Abu mung samsi nang wa sai, tsa gawm hta lang nna: "Law law, Yinkyang num ni Nshawn ni hpe hkungga dat ga ai. "nga mying langai bai galai shamying la la rai Abu hte shan gahti galai rai hkungga hkat nga yang, n-gup laraw wa ai hta n -ga, ta mung lagyaw wa sai. shingrai, n jum na mung jum wa, n hkra na mung hkra hkrat wa, ndi nda baili baila lahkawng yep yep rai shada jawm ahpum shadaw let ang ai shara de wa mat masai. "Dat u, ngai nsa n lu lai wa nga ai. " Ji Mai rawng ai n-gun ma hkra hte La Doi a wawt a saichyup rai marun nga ai n-gup hpe ganawng di kau dat ya sai. "Ganing di n dat ai, nang hpe tsaw ai majaw ndai hku byin wa ai re, nye numla na e hkrai shapoi la kau ya sai. "La Doi Ji Mai a nshang kaw chyit chyit ahpum tawn nna tsun u ai. "Hkawm sanu, ngai hpawtni rung naw lung ra ai. "Ji Mai shi hpe ahpum nga ai La Doi a ta hpe la kau ya let tsun nga ai.

"Hpawtde sha gaw rung hkum sa sa." Ji Mai hpe wa sa ai La Doi gaw hkawm na nmyit nga u ai. Ji Mai hpe dun la nna lahkum kaw bai ahpum gumchyup dung mat sai. Lahkum kaw nna ga de gumlet du, ga kaw nna lahkum de bai gumlet lung wa, hpang jahtum gaw ku de gumlet shang wa mat masai. "Tsaw tsaw, ngai a madu jan, ganang kaw nga nga nta? ngai nang a nta wang kaw tsap nga nngai. "La Doi gaw jum sha man sai wuloi zawn shani shana Ji Mai a nta de hkrai gahkrang mat sai. Ji Mai nhku kaw san seng galaw rawng nga ai majaw, shinggan de chyinghka agawk ai nna nga u ai, La Doi chyenan gayat bang dat jang she myit gabung bai dum wa sai, chyinghka nsa hpaw la ngu yang gaw La Doi hpe shinggan kaw nbung hkat hta lagyi tsap nga shangun yang nhtuk dum, hpaw la ngu yang mung gaida nta hta shinggan la ni shani shana pru pru shang shang rai yang, masha ni tsun kau na tsang, gara hku myit yu tim nhtuk dum, La Doi hpe hpang de shi a nta nau hkum sa ngu tsun sanglang dan kau na re ngu bai myit lu nna chyinghka sa hpaw la nu ai. "Tsaw tsaw, an a sumtsaw ngangkang na matu, la kasha langai naw lu la ga. " Ji Mai tsun mayu ai lam pyi rai nlu tsun shi yang, La Doi e ma lu jat na bai tsun dat ai majaw, teng sha pawt mayu ai myit rawng wa sai.

"Ma lu? ngai a ma lahkawng hpe pyi " ndang bau nna she nu wa ni woi nga kau ya ai re, ma bai lu nna asuya bungli gata mat jang, nang lu bau na kun? ngai hpe lani mi, shata mi, laning mi lu bau tim, nang prat tup lu bau ai nrai, nang a nta na ma ni hpe mahtang nhung chyu shangun na kun? dinghku la re hkum malap kau u! Hpang de an gaw yu yu na manang hku sha ganawn saga. Bai nna nye nu wa ni hte jinghku jingyu ni mung an hpe ndai hku masa ntam ai lam n galaw shangun chye ai. "Ji Mai man ntsawm hkra tsun nga ai. "Hka hpawk zawn lwi ai nye tsaw myit hpe dai hku sha niu dawm kau ai, bai nna, an a hkum shan ni mung gahtep hkra yu sai, ganing rai yu yu na manang hku sha ganawn na rai? nmai byin ai, matsing da u lu yaw." Ndai shana La Doi a myit ni mau mau, yawn yawn nga let Ji Mai a nta kaw na nhtang pru mat wa sai. La Doi a shingran shata masum du hkra gatsi mat wa ai shaloi, grai nwam ai myit hte Abu hpe Naw Mai yan a sat lawat lam sa san yu yang, La Doi yan Myen mung de lungseng mari mat wa sai da. Dai hpang kaw nna La Doi hpe la dingda ai Ji Mai a myit ni gaw nhti nhtang she gahkrang na zawn nga ndawt nga sai.