SHI

SHI

Shawnghtawk Tsing Pan

Shi hpe ngai tam ai grai na sai. Shi hte ngai asak matsat jahku ning daram kaw na hka mat wa ga ai re. Ya ngai asak sumshi ning jan wa hkra shi hpe tam nga nngai. Shi hte nye a shangai nhtoi lani mi sha rai nna, shimari ta praw manga ya shani rai nga ai. Raitim an gaw marun yan nau n rai ga ai. Htingbu kasha yan she rai nga ai. An a kanu kawa ni mung an a shangai nhtoi du shagu daidaw poi rau sha galaw ya ya rai ma ai. Shi a shingteng amying gaw Dawt, Ali gaw ngai a shaga mying re. Anhte nambat masum Jinghpaw dap Kuthkai e kanu kawa shingnip hta rau sha kaba wa ai ganawn manang yan rai ga ai. Jawng mung rau sha lung hpang wa ga ai. An lahkawng laika tsang lahkawng hta lung nga ga yang, shi a kanu kawa hpyendu shang tai mat wa nna, dap htawt mat wa sai. Shanhte htawt mat wa ai shaloi, shi jaw kau da ai kumhpa hte htet da ai ga ni, nye kraw hta malap n lu, ya du hkra matsing da nga nngai. "An lahkawng kaba jang bai hkrum ga i, nang gaw hpyendu tai, ngai gaw sara ma tai na yaw. Maw! Ndai nang ngai hpe myit dum let hpyendu tai wa na matu sanat gadun."

Shi ngai hpe ma ni gasup chyai ai baw sanat sumla gadun chye jaw da ai raitim, ngai gaw hpa n chye kumhpa dat ai majaw, nye nu hkai da ai numri pan ahtoi hpe di la nna: "Ngai hpe dum na matu." Ngu shakram let jaw yang, shi mung "Chyeju kaba sai." Nga tsun ai hte myiprwi ing nga sai, rawt hkyem nga ai mawdaw kaw na kanu kawa ni shaga dat ai majaw, shi kagat mat wa sai. Ya du hkra, dai lam ni hpe shingran amu nga ngai. Naw gaji daw re majaw, grai nna matsing hpa byin nga li ai, kalang lang shi gaw ngai hpe ya du hkra i naw myit dum nga ai kun? Ngu mung ngai hkrai myit sumru yu. Dinghku n shang ai shabrang kaba ten hta, ngai Myen mung htumpa Rahkaing mungdaw kaw nna Manmaw ga de asuya bungli hte seng nna htawt wa ni ai. Nye bungli hte aya gaw masha htawt shang jahpan yu lajang dap kaw na shagan lahkawng kap ai du rai nga ai. Ngai du hkawm ai shara shagu shi a shingran hpe amadat nga ngai, Manmaw mare du yang, kalang mi nu yan wa tsun ai ga hkaw mi hpe myit dum dat ai majaw, nye a salum sai lam ni gumhtawn nga li ai: "Dawt yan nu wa ni Manmaw de re zawn nga ai." Da le.

Manmaw mare nambat langai lahta tsang jawng lam numbraw hku lai di yang, ram daw htuk tsawm ai hkumgawng shingyan hta labu atsit bu tawn nna, nshang gaw ganatang a nshang zawn kye tsawm nga ai hta n-ga, hka rim zawn lwi dumpyang hkrat yu ai samram kara ni hpe hpang kawn hkan yu yang, nshang kaw woi di ahpum shakyet la let galu chyang tsawm nga ai kara ni hpe hkan masawp yu na zawn ngu nga ni ai, n re she rai sai, nye myi gaw hka myi she myi wa nga ai, ahpraw atu re wunyaw myiman hta myijat jat da ai majaw, ngai shi hpe yu tim, shi kadai hpe yu ai n chye nga ni ai, ta hta laika buk ni hpai da let, ten shachyut ai jan zawn, awut rai lai lai re sara ma langai hte ayan ahkrum nga ai majaw, yu matsing da ni ai. Gade n na yang, dai sara ma pe grai hkuhkau mayu ai myit ni rawng wa li ai. Hpa rai, dai sara ma hpe ngai nachying myit lawm taw nga ai kun? Ngu mung, nye myit hpe jep yu let mau nngai. Dai sara ma hte n hkrum na tsang ai majaw, ahkying aten tuptup e dai lam numbraw de krai sa wa mayu yu rai nga nngai. Kalang lang shai lai hkat mat nna, shi hpe n mu kau krup ai shani hkan rai jang, shani tup myit n sim n sa byin chye mat mat rai nga ai, kalang lang ngai sumtsan hkawm ang mat wa ai ten ni hta raitim, dai manap ten hta ngai shi hpe myit dum chye nga ai. Ndai zawn rai ngai shi hpe hkuhkau mayu ai lam ni gaw, shi gachyi mi mung dum chye na n rai .

Shi hpe laika hte ka shachyan na ngu yang mung n htuk, n-gup hte shachyan shaga na mung lam n hku, sari kaba la ai shi hpe lam e hkrum yang, mani sum di dan na ngu myit yu tim, shi mana shachyoi kau na hpe tsang rai, shaning she htum mat wa hkra, sara ma a mying pyi garai n chye lu nngai, tsun chyai na manang mung n lu ai majaw, tinang krai kraw hta sumru chyai let, lani hte lani manu dan la ai aten ni hpe shama shalai kau nga sangai. Kalang mi na laban kru ya lana de mi, ngai hkrai sha mying kaba la ai Japan sumla hkrung langai hpe Shagan ngu ai sumla hkrung madun shara kaw sa yu nga ai shaloi, ngai a makau htep na man nga ai lahkum hta, ma yannu ni masum sa shang dung bang wa ma ai, atsawm sha yu dat yang, nambat langai lahta tsang jawng na, ngai yu matsing nga ai myijat hte re sara ma, ngai myit lawm taw nga ai sara ma she rai nga ai. Ngai hte ni dik ai lahkum kaw asak kru ning daram rai sai num kasha ma, kanu a lahpyen kaw asak mali manga ning daram re ai la kasha ma pawn da nga ai. Nye myit hta n chye shamying ai ana myu mi hkam sha taw nga sai, "AWh, shannu ni she rai nga ma hka! Kadai jan rai kun?" Nye kraw gata hta ning ngu ai ga san ni pring mat sai. Sara ma shi gaw sari kaba hte zim sha dung nga ai.

Shi hpe ngai ani sha grai na kra mu mada yang she nye a salum ni grau gumhtawn wa nga li ai. Hpa majaw ngai ndai zawn hkam sha nga ai kun? Masha jan hpe ngai ndai zawn myit de na shut ni ai rai kun? Um, n jaw sai, shut sai, nye myit mana ndai hkyet sharung she rai sai, ngarai dikap tai na teng sha rai sai, nye myit ndai zawn shawshi shap nga sai. Hpang shani gaw, shimari ta praw manga ya rai nna, nye asak sumshi langai ning pring ai shangai nhtoi mung rai nga ai hta n-ga, laban nhtoi re majaw, laban jawng de sa wa ni ai. "Daini na madu a shana lu sha hpawng a matu, muk hte sabyi hpe alu jaw ya ai sara ma Seng Pan gaw, shi a shangai nhtoi mung rai, n nga mat sai shi a chyinghkai kawa du wa Zau Naw hpe myit dum let jaw ya ai alu rai nu ai." Nga nna hpungup wa shana dat ai shiga hpe na dat ai ngai, nachying myit lawm nang mat ni ai. Du wa Zau Naw a kasha Seng Pan, daining gade ning hpring sai rai kun? Nye a shangai nhtoi hte wa abung taw ai gaw, kadai wa rai kun? Dawt wa mi rai kun i? Rawt tsap dan yang mai na wa, nye myit gata e ndai zawn myit kabung dum taw nga sai. Nchyi nmu gadau gadap nga ai nye myit hpe ndang dip wa ai majaw, nye makau e dung ai salang langai hpe yat sha gahte san dat nngai. "Sara ma Seng Pan ngu ai kadai kun i?" "N chye nngai law, ngai mung manam rai nngai." Goi e... Manam shada she bai sa dung kau i? Daini na laban jawng sa gaw, myit n lawm mat ni ai, mara shalaw she rai sai. Raitim, nawku hpungdim ai ten hta, "Madu Yesu e, ndai alu jaw bang ya ai sara ma Seng Pan ngu ai alu madu hte hkrum shaga lu na ahkang jaw rit law." Ngu myit kraw gata hta kyu hpyi nem la lu ngai.

Myit n dik n wai la ai hte nawku htingnu hpe gayin mada kau da nna wa mat ni ai. Maga ta lani mi hta, anhte a rung wang gata e, zat pya poi galaw ga ai. Hpungup wa hte rau manang langai lawm sa ai. "He! Myu Li, du kaba." "Ha! Hkau Hkun Sa, nang gara kaw makoi nga nni? Galoi mung n mu hkrup ai le, Manmaw ga e ngai chye ai masha n nga ai ngu, myit gaji si nga yang wa." "Ngai Putau de she bungli ang ai gaw, mani she du yu hkrat wa ai re, hpungup sara wa tsun ai kaw na, ngai nang rai na re ngu tak sai mi. Ga! Nang gaw grai naw shabrang kang tsawm taw nga ai le." "Nang mung maren shingkang taw nga ndai." "Anhte Yanggung dakkasu ngut ai kaw na, nang dai masha htawt shang jahpan yu lajang dap de shang nna du tai wa ai n rai? Ngai gaw jawng sara tai mat wa ai le." "Nang hte mu hkrum nna grai kabu sai law manang wa e," Hkum Sa Putau de garai n lung wa ai ten ni hta, shani shagu ngai shi kaw sa du chyai chyai rai nngai. Lani mi ngai n ip da lu sai ga san ni hpe san yu ni ai. "Hkau nang sara ma Seng Pan ngu ai hpe i chye?" "Chye gaw e hkau, hpa baw law, nang mung shabrang kaba, shi mung gaida mahkawn, ahkyak ai lam nga sai kun?" "AWh! Shi gaida re ni?" "E le... Hpa byin a ta? Ngu ai, asan sha gaw re ni? Hehe..." "Asan sha gaw e, hpa chye laklai na. Shi hpe ngai grai chye mayu, mu mayu nna, nang ngaihkau wa hpe san yu ai sha she re gaw e." "Mai sa hkau, nang shi hpe grai mu mayu yang, hpawtna de shawa dabang de sa ga.

Shi galoi mung shawa dabang kaw ginsup ka ai hpung hta lawm ai she rai yang, byin mai masa htuk yang, mu shachyan ya na re." "tengteng i hkau, ngai nang hte rau sa na nngai, gai taw, ya gaw shi a lam nang chye ai daram jahta dan yu rit hkau." "Shi gaw nambat langai lahta tsang jawng na lapran tsang ni hpe sharin ai sara ma re, ma masum hte gaida kanu tai nna nga nga ai, Ma La kasha kaba htum ai wa gaw, chyahten rai lu ai, n mai hkawm ai, dung sha mai ai. Sara ma gaw sari kaba la ai nga ma ai, Mali hka kau na Simsa lawk e kanu gumgai hte nga ma ai. Gai! Ndai hte chye jang rai sai n rai i, nang hpa majaw chye mayu ai lam ngai hpe bai tsun dan rit taw." "Nye a matu tsawmra ahkyak ai lam re majaw, hpang de she tsun sanglang dan sana yaw hkau, shi hpe shawng mu yu jang rai sai, hkau nang hpe grai kamhpa sana lu, chyeju kaba u ga yaw." "He... Hkau Li, shi hpe n mu ai, shi bu hkawm sa ai lam nga sam sai, ginsup ka hpung hta n lawm nga ai." Laban shana de, manang wa shing nga tsun dat ai ga a majaw, nye a myit hta gaman gaman nga let, hkawm mat wa hkyem ai hte sara Hkun Sa gaw num kasha ma langai hpe madun let: "Hkau Li, waw, sara ma Seng Pan a kasha sa nga ai, sa shaga yu ga." Nga num sha ma langai a makau de woi sa wa nna: "E..." Nga let num sha hpang de ta wawk nga u ai Sumla hkrung yu yang, kanu yan ganau hte nye a makau e dung ai ma nan rai nga ai. Myit dum kajawng ai hte, sara ma Seng Pan ngu ai kadai re hpe tak maram la lu ni ai.

Ma hte sara Hkun Sa shaga hkat ngut jang, ma hpe lagaw leng hta htaw wa saga ai majaw, ya gaw, nta mung chye la sai. Shi gaw hkrunlam hkawm mat ai re da, dai shana gaw ngai sumru yu na lam grai law mat sai. Shi a kawa du wa Zau Naw, shi a shangai nhtoi, shimari ta praw manga, shi hpe ngai nan mu ai kaw na, nye a sung htum ai myit masin kraw lawang gata, myu mi ngu hkam sha taw nga ai. Um... hum... Ndai lam ni gaw, ngai prat tup tam nga ai, shi nan rai na re ngu, ngai tengteng kam mat ni ai. Raitim, shi hpe ganing ngu sa shachyan bang wa na mahtai hpe n lu myit shapraw nga nngai. Lama wa ngai sa shaga dat yang, ngai myit ai hku n rai nga la jang gaya gahpa, shi a kaba la ai sari hpe mung n hkungga ai tai na, ngai mung sari n rawng ai tai na, nye a matu bungli kaba langai jat mat sai hku re, aten shagu shi a lam hpe chyu sumru nga mat ni ai. "AWh... Dawt, nang mung sara ma, ngai mung du rai sai le, an galoi hkrumzup lu na ta? Grai hkrum mayu dik sai le..." Lana de mi chyawm gaw, lama mi lu myit shapraw dat ai majaw, hkrang shapraw shamu shamawt na matu, myit dawdan ni ai.

Lana de mi kara sau chya masit dingdung kau, dangpai bu ahkang la, lawnghpraw galai shakya la rai, ningsin sin wa ai hte tingse hta lang kau rai, sara ma Seng Pan ni a nta ndaw ang ang man hkrum mawdaw lam kran na lagat hpun pawt e, sa dum mahkawn shangwi nga ni ai. Ndai mahkawn hpe an naw gaji yang, nye a tsa ba Brang Lawn tingse hte dum nna mahkawn dan dan re ai sha n-ga, mahkawn lachyum hpe mung hpyan hkai dan dan rai u ai. An mung grai na ra ai hte tsa ba Brang Lawn hpe ya sha sha mahkawn shangun nna, jawm madat dat rai ga ai. Hpang e mung chye mahkawn saga ai hte maren an mahkawn nga ga ai. "Tsit lali hka kau...baw hpraw dingla langai mi, kasha rau...simsa ngwipyaw...shayi sha hpe tam nga, kabu dik ai kawa dingla, pyaw dik ai shayi sha, shayi mahkawn sumtsaw lu wa..." Mahku hpe sharam dik ai hku, yungwi nsen shapraw nna, gaungwi sha mahkawn let, dai nta a laklai wa ai lam hpe mada yu nga nngai, shai wa ai lam n mu ai, mahkawn htum mat nna, tingse gaman dum let bai yu nga timung, hpa shingran mi n mu, Dawt re she teng yang gaw, mahkawn ndai na jang, teng sha pru wa na re ngu, ngai myit mada nga nngai. Raitim, ngai myit ai hku n byin wa ai majaw, nye a kraw chyat la nga li ai.

Bai gahtap mahkawn na mung n-gun n lu dum mat sai majaw, tingse hpai nna wa mat ni ai. N ngwi n pyaw n simsa la ai myit a majaw, nshung ta rai ti pyi sau bu nga nngai. Lahkawng lang ngu na shana bai shakut sa nna, myit mada kaba hte simani dik ai hku Tinggaw Tawng a nsen hte bung hkra, shakut mahkawn ahkyek yu timung, gaman lila shingran gata she rai taw nga ai oi. Dai shana mung ngai grai myit daw let bai wa mat ni ai. Masum lang ngu na shana, daina gaw hpang jahtum rai nu ga ngu, myit jahkut da nna, grau shakut let bai sa shangwi shapyaw sharung shayawt taw nga ni ai. Mahkawn htum mat nna, tingse hkrai chyu sha ahpre dum sharat nga yang, dai nta de mada azi yu nhtawm, myit hta grau hkam sha n pyaw wa ai majaw, teng sha hkam sha nga ai salum gata na yungwi hpe shapraw let, atsam bai gahtap jat dat nngai. Na ai ni a na hta, marit maroi na yawn hkam sha jang, na na ma ai ngu kam ai. Htaw...htaw... Jan shinggang ai sumpan hkalap gata kaw masha langai mi angwi sha hkawm sit sa wa nna, ngai hpang de man yawng let, tsap nga ai hpe mu dat nngai, shi mahkawn htum hkra tsap let madat nga ai hpe mu lu ai.

Shi rai na re, awh, Dawt, Dawt hpa rai hkalap gata kaw tsap nga nni? Ngai nang hpe atsawm sha n mu lu ai le, awh, shingngu yang mung shi gaw sari kaba la ai sara ma she re mi gaw, mara n sha- gun ging ai le, nang, mahkawn madat ai rai nni? Dawt e, nang Dawt rai nni? Ngu man chyaw man hkrum san mayu la nngai oi, um... Ndai ladat hku mung hkrum shaga lu na lam n hku ai she rai nga, ya sha sha mahkawn sa mahkawn jang mung, lungdin hkrup sha na tsang ra ai. Ramma ni ngu ai hkru ai n rai, ladat kaga mi she naw wa shaw yu na re ngu, grai n wai let bai wa mat ni ai. Manau poi a matu, mahkawn mahkawn hpung ni bat kru ya shana shagu nawku jawng e mahkawn sumra ra rai ma ai da. Ngai mung she naw sa sumra lawm yu we ga, ngu myit lu ai hte hpang na bat kaw nna, mahkawn sa sumra lawm nngai. Mahkawn woi mahkawn ai hpuawn wa hte mung myiman hkrum gadup mu hkat chyalu rai ga ai majaw, hkuhkau nga saga ai, hpuawn wa kabu gara hkap tau hkalum la ai zawn, yawng hte mung shachyan ya sai majaw, yawng hte ngai hkuhkau lu saga ai hte maren, dai kaw ngai grai hkuhkau mayu nga ai sara ma Seng Pan mung lawm nga ai. Ngai gade sha kabu ai gaw, ya yang ngai hkrai sha naw chye na re, n dang tsun hkra, n dang hkra lagu kabu taw nga ni ai.

Hpang na bat mahkawn sumra ngut nna yan pru wa ai shaloi, n dang dip da lu sai nye a myit gaw sara ma Seng Pa hpe grai n wam let lu shaga dat sai. "Sara ma, na wa du wa Zau Naw re i?" "AWh, re law, du wa." "San na grai gaw n wam la ai law, moiya shimari ta praw manga ya na laban hta, sara ma jaw ai alu, madu a lu sha hpawng hpe ngai mung shang sha lawm lu ngai. Dai shani sara ma asak gade ning hpring ai kun? Asak san ai grai zai ai amu gaw re law, nye a shangai nhtoi hte bung ai majaw san ai re sara ma." Ga ndai ni tsun ma ai hte ngai a ta lahpan salat she madi hkra rai ni ai. "AWh, n ra ai gaw e, kalang lang masha ngu ai n myit mada ai lam grai bung chye ai she rai yang, ngai sumshi langai ning hpring ai re, du wa." Ngai nsa kaba shaw dat let: "Dawt" Ngu yat sha gahte shaga dat yu yang, shi myiman yin rai, ngai hpe yu wa ra ai shaloi, ngai lang bai grai kya la ai nsen hte "Dawt" Ngu shaga dat jang, shi gum let hkawm nga ai. Nye a myit kraw gata kabu ai zawn, yawn ai zawn ngu hkam sha la nga li ai. Hpa baw bai matut tsun na mung ngai n myit hkawn ai, shi mung azim sha rai nga ai majaw, myit sumru yu nga sam ai ngu nna, "Tsit lali tsawm hka kau na, baw hpraw dingla..." mahkawn hpe ga nsi n lat ai sha, nsen tsim hte angun dan yang, shi myiman ngai hpang de angwi sha bai gayin wa nhtawm, mau ai nsam hte ngai hpe sharawt mada yu nga u ai. "Dawt, nang Dawt re n rai i?" "Ali, Ali, nang Ali re i?" "Re, Dawt, nang hpe shaning law law myit dum let tam hkawm nga ai Ali re le..." Hkrum shachyan ai hte an lahkawng shakram nna bai shakram rai nga saga ai.

Dai shana ngai yup n pyaw ai zawn, shi mung yup n pyaw mat sai kun? Ngu, shana tup myit dum taw nngai. Dai kaw nna, shannu ni kaw rau ai ten shagu ngai sa du chyai nngai, ma ni hte mung grai hkuhkau tsawra hkat nga saga ai. Grau nna, manang hte n bung ai matsat ning rai sai ma Zi Zi hpe grau tsawra sumri dun nga ni ai. Kanu gumgai mung ngai hpe grai tsawra nga ai, shi mung shi a shingdu labau ni yawng ngai hpe tsun dan ai. Shi a mahkawn prat e sara tai jawng naw lung nga yang, grai tsawra hkat ai sumtsaw langai lu yu ai, raitim, hkungran na ni wa ai ten hta, ga sadi n dung ai dai la wa gaw, num kaga la mat ai majaw, masum ning daram hkam sha yak wa sai. Dai hpang kanu kawa ni jaw sha ai la kaw myidi shim wa mat ai ngu yang, tsawra myit n lawm ai dai dinghku gaw, shi ma masum hte gaida mat ai shani du hkra, n ngwi n pyaw mat wa sai. Gaida ai manga ning rai sai, kawa n nga mat ai hpang na shata e shangai ai ma gaji htum pyi manga ning rai mat sai nga nna, shi ngai hpe tsun dan ai. Shi a mabyin ni hpe azin ayang chye la lu ai shani kaw nna, ngai shi hpe grau tsawra matsan dum jat mat ni ai.

Nye a myit hta rawng ai lam ni yawng, ngai shi hpe chye hkra tsun dan yang, gachyi mi pyi n mai byin ai lam shi bai tsun htang wa ai majaw, ngai nachying gawng run hkam sha taw nga ni ai. Laning mi daram na wa hkra, ngai ga hkum mi sha atsun nga ai zawn, shi mung "N mai byin ai." Nga, jaja ningdang ai ga hkaw mi sha ahtan tsun nga u ai. "Dawt, moi naw gaji ai kaw na ngai nang hpe sha ala nga ai, myit mada nga ai re le, nu wa ni num la na gade gazik tim, ngai n madat ya ai gaw, ning ya du hkra rai nga nngai. Ya du hkra nang hpe tam nga ai wa myit yu u le, Nang rai nna she ningdang gwi dik ndai re." "Ali, na yawn la nngai law, nang ngai hpe dai daram myit mada nga na ngai n shadu ai, bai hkrum na mung ngai n tak ai, nye prat hta kalang sha pu ai salum pu hpe mung, sadi n dung ai la langai hpe jaw kau shut sai, nye prat ndai hte ram nu ga ngu, ngai myit jahkut kau chyalu rai mat sai. Ali nang, ngai hte bai hkrum ai kaja tim, yaw shada ai lam gaw hpang hkrat mat sai gaw, Ali nang hpe ngai sanseng dik ai tsawra myit hte gahpu ganau majing zawn sha, tsawra lu na re. Ngai zawn re ai ma masum ting hte gaida jan hpe hkum myit mada nga sa, grai grai tsawm ai, hpaji grai grai kaba ai amyu shayi ni sawng nga ma ai. Ali a arawng aya hpraw nsam hte mi gaw, baw dinghkrak lata la na sha rai nga ai. Hpa wa myit gaji nga nta? Ngai chyawm nye a hkiba la ai lit kadai hpe mung n kam shanoi sai, nye prat hpe mung yawn la nngai." Nga tsun u ai.

Ngai ganing ngu chye tsun sana i? Shi hpe ngai n chye tsun hkra yu matsan dum ai. Shi a shata shabrai lap mali tsa jan hte sha gaw, ma n tai n mai mung bau ra rai, ramram a lahta de shoichyum nga lu ai ngu, maram lu ai majaw le. Moi nu yan wa hte shi a kanu kawa ni mung hpyendap e htingbu tai let nta masha langai zawn sha nga lai wa ma ai re majaw, ya daini kanu mung ngai hpe n ja n hpra tsawra nga ai hte maren, ma Zi Zi mung ngai hpe grai chye kabu nga nu ai. Ngai hkawm ai de na bai du wa shagu, ma Zi Zi yan woi dwi a matu, lu sha, tsi mawan ni la wa jaw jaw rai yang, shanwoi dwi yan ngai hpe lang hte lang grau grau tsawra sindun nga masai. Ngai nde wa shi a ntsa tsawra sindun nga dingngam raitimung, shi gaw nye a tsawra myit hpe gachyi pyi n sawn ya ai hku rai lu ai. Shi a ntsa e sadi n dung ai, shi a sumtsaw wa daram pyi ngai hpe ahkyak n la ai hku ngai mu mada hkam sha ai majaw, grai yawn ai hte kaya mung gaya ai hte, myit n- dawt ai hte, pawt mayu ai myit she rawng wa ni ai. Dai majaw, ngai hkam sha yak ai zawn, shi mung hkam sha hkra ngai lama mi galaw na ngu, lagu myit da let, ahkying aten hpe ala nga nngai. Ngai Manmaw ga du ai masum ning hpring ai hte shagan langai bai jat ya nna, Hkang mung de bai htawt kau mani ai.

Shi hpe ngai dai lam ni sa tsun dan ai shaloi, shi a myisha e, myiprwi ni ing gabrim wa timung, myiprwi ni n di hkrat wa hkra, alawan bai lu sharai la kau ai hpe mu lu ai. Moi an naw gaji yang, an hka mat wa ai shaloi, shi ngai hpe sanat sumla kumhpa jaw da nna, ngai gaw shi hpe nu hkai da ai numri pan ahtoi hpe di kumhpa dat ai ten hta mung, shi ya na zawn myiprwi ni ing gabrim wa ai hpe shingran bai mu dat nngai. Dai shaloi mung shi hkrap mayu sharang kau nna, rawt wa hkyem sai mawdaw de kagat bang mat wa ai rai lu ai. Ya mung, shi hkrap mayu bai lu sharang kau nu ai. Ndai zawn, shi gade daram myit ja ai hpe mu ai majaw, ngai grai yu myit n dawt la we ai. "Dawt, nang tengteng sha tsun yu u, nang ngai hpe tsawra ai n rai i? Nang n kam tsun tim, na a myisha ni ngai hpe tsun dan masai. Na a n-gup kaw na lawan yin la kau dat u, shing nrai gaya hkrum na ra ai." Ngu, mani asawng ai zawn kaja wa zawn ngu tsun dat nngai, shaloi shi grai pawt wa u ai. "AWh! Mana mana nga, ngai ga hkum mi sha chye tsun ai, nang hpe gahpu ganau myit hta lai nna, n tsawra Iu ai ngu, gade lang tsun na re!" "Gai, gai, hkum pawt sa, sara ma kaba, ngai hpe n tsaw yang n tsawra u ga, na a kasha ni hpe matsan dum tsawra yang gaw ngai hpe hkungran la rit. Prat tup nang hpe ngai garum la na re." "Hpa seng a ta? Nye a kasha ni ngai langai mi a lit sha rai sai." "N re Dawt, ngai nang hpe teng sha tsawra matsan dum nna tsun ai, nang ya du hkra n chye na nni?" "Na a tsawra myit hpe chye na timung, nye a myit ni gachyi mung n- hkap la nga ma ai gaw, gara hku chye di na law i?" "Mai sa Dawt, atsawm madat yu u taw, nang ngai hpe mung n tsawra lu ai, hkungran mung n hkungran la lu ai.

Kahpu ganau hku sha tsawra lu ai nga yang mung, rai nu ga, raitim, Zi Zi hpe ngai bau na, nang tsun ai hte maren, gahpu ganau majing zawn tsawra teng yang gaw, nye a shawang tsawra myit hpe hkap la ya rit." "Ali, ngai gun sa ai nye a maka, kadai hpe mung ngai n shaka shakap na ngu ngang ngang myit dawdan da ai majaw, Zi Zi hte ngai n hka lu ai, nang myit n pyaw tim ganing n chye di, grai tawngban ai yaw,." Nga tsun let, gawk de htim shang mat wa nu ai. Shi gawk e wa hkrap nga na re ngu, ngai tak la lu ai, ngai hpe dai daram ningdang lu ai shi hpe teng sha matai htang sana ngu, aja awa myit dawdan kau nna ngai bai nhtang mat wa ni ai Hkang mung de lung wa ai nbungli hta, Zi Zi hte rau rai ngai. Kanu sara ma Seng Pan myit hkrum nna shakap dat ai n rai. Shi jawng sa mat wa ai ten e, mawdaw hte sa lagu woi la nna, ngai magam bungli htawt ai Hkang mung de woi hprawng mat wa ai rai nga ai.

Ma hpe yu ai gawoi dwi hpe gaw, tsi naw sa woi tsi na ngu masu kau da ai re. Shi jawng de na wa ai hte kasha Zi Zi hpe tam shamat nna mau kajawng si na sai. Shi a myit hta gara hku hkam sha na hpe ngai dum chye da we ai. Shi masin pawt na, gaya na, myit n pyaw na, ma hpe marit na, matsan dum na, nchyi mu n yup n sha byin na, tsawra n ja let hkrap na. Shi ndai zawn myit kraw gata amyu myu hkam sha nga sana re. Rai u ga, madat sha u ga, ngai shi a ntsa e, shaning law law tsawra myit mada da ai daram, shi ngai hpe n kawng ai, singga ai, ahkyak n shatai ai, tsawra nga ninglen ngai hpe n tsawra masu nna atik anang ningdang ai. Ngai gade hkam sha ai, shi nye a ntsa chye myit shingdaw ya yu nu ga. Shi hkam sha jin nna, Zi Zi hte an a hpang de mahtang hkan nang wa na kun? Shing nrai, shi a ja la ai lung salum hpe ndang sharai la nna:"Tsit lali tsawm ai hka kau na dingla zawn..." salum ni gapaw si mat na kun? N chye tak ni ai. Shi she myit shagrit kau nna, ngai hpang de hkan sa wa ai rai yang, galoi raitim, ngai gaw shadawn n dang ai tsawra myit hte hkap tau la na re. Wa run baw hpraw ten ni du yang du, moi mung shi hpe la nga ai, ya mung shi hpe la nga ai, htawmhpang de na ahkying aten ni hta mung, shi hpe chyu sha ala dingda nga na rai.