TSIN-YAM KATA NA LAWT LU LAM
Gareng Gun Awng
"Agu Sut, ndai lang gaw grai maja ra na re, ya ndai lang na arang gaw sen hkying mi jan a matu re da, kankan kaka rai ra na re. Seng Lu myit tsang ai hte gagu Sut Li Awng hpe tsun shadum let lata na ahkying hpe madi dan ai hpe Sut Li Awng gaw: "Ngainam Seng, nau hkum hkrit, nau hkrit yang tin ai, tin yang kataw chye ai, hpa hkum myit." Ngu, Sut Li Awng gaw Seng Lu hpe myit shapyaw ya let shi mung tsang ai lam law nga lu ai. "Seng Li... Seng Li..." "Na... Na..." "Ya, Sadung lam mazup kaw num sha langai hte la sha langai ka-ni hpraw hpe mawdaw ahpraw hte hkying 6:30 kaw htaw lai wa na re da." Ngu jak shana nga ai. Seng Li hte hpyenma ni mung, shani tup la yu tim, dai mawdaw n pru wa ai majaw: "Du wa, du wa, matsun tawn ai mawdaw mung n pru, masha yan mung n gale, gara hku galaw ra na matsun la rit." Ngu du wa hpe shana dat sai. Dai yang e... "Hpang jahtum hpa baw mawdaw lai wa ai rai?" "Ken Baw Cycle dingsa langai mi hta masha masum jawn nna lai wa sai, dai hpang jahtum rai sai." Ngu Seng Li htan shana dat sai. "Mawdaw dai hpe lu hkra shachyut, dep jang, nang rung de woi wa rit, n dep dep hkra rim la mu!" Nga Seng Li a du wa amying jaw ai. "Mai sa!" Gahtawng gaji langai de du wa ai shaloi, Seng Lu mawdaw kata kawn hpang de mada yu let: "Agu Sut, hpang de balik ni hkan nga ai, mare, mare de she gawt bang sanu." Nga hkrit ma tsun nga sai. Sut Li Awng hpa n tsun ai sha mare ga-ang de gawt bang wa nhtawm, chyahkring mi myit yu nna: "Seng, an mawdaw kabai da nhtawm, masha garan saga, hpang e she chyenan matut hkat saga." Ngu tsun let, mare shingnawm de Sut Li Awng gaw mawdaw galau tawn kau da rai, Seng Lu hte hka bra mat ai hpang, nta langai kaw hprawng shang wa nu ai.
"Nu sha e... Nu hpe kau da sai i? Prat ting ka-ni ya, tsa ya tai nna, ya ka-ni dawn kau rai, myit su wa sai ngu jang she nu hpe kau da sai i? Maroi nni nngai law... Nu sha si ai gaw ndai nanghpam ka-ni a majaw nan rai sai law.." Sut Li Awng ma lama rai nhku kata de shang wa yang, gumgai langai sharawn tawn ai kasha a moimang makau kaw dung shayu yawn hkrap taw nga ai hpe shang mu na nu ai. Sut Li Awng a myit hta grai hkam sha mat salu ai, gumgai jan manam langai shang mau tsap taw nga ai mu nna: "Ndai nanghpam ka-ni sha anga nga dingsang, ndai ka-ni nanghpam sha adut sha nga yang gaw, anhte myu ni yawng mung annu hkam sha ai zawn hkam sha ra na sha re law..." Nga bai shali dan u ai. Sut Li Awng shi nan ka-ni dut shabra taw nga ai, gumgai jan a man hta hkrum sha nga ai tsin-yam hpe mu nna, chyahkring sha gawng run myiprwi ni lwi hkrat wa nna, myiprwi si gatsut kau let mare shingnawm de hprawng shang mat wa sanu ai. "Du wa, mi yet na mawdaw rai nga ai, anhte hpe mu kau nna hprawng sai rai nga ai." Ngu, Seng Li ni gaw mare shingnawm makau hkan tam garet nga ma ai. Raitim, Sut Li Awng hka hkawng dingsa na sumwum kata e lagyim rawng nga ai hpe n mu ai lai kau da masai. Dai hpang Sut Li Awng pru wa yu yang, ningsin sin wa magang sai majaw, Seng Lu hpe chyenan gayet matut dat u ai. "Agu Sut, gara hku rai sa?" "Ngainam e, agu Sut ganoi noi she rim gatut ai, arai ni gaw ngai hte rau rai nga ai, ya nang gara kaw rai sa, awh, e, e. Rai sai, agu Sut daina jang nan, gara hku mi raitim Seng kaw du hkra wa na yaw, awh, Seng, chyenan dingyang hpaw da u yaw." Ngu htet shana let, ahkying hpe yu dat yang, shana na hkying 10:46 rai sai. Sut Li Awng hte Seng Lu shat seng hta hkrum masai. "Seng nang gara hku lawt wa ai rai?" Seng Lu mani sha sum rai, byin lai wa sai lam hpe tsun dan nga ai.
"Agu Sut gaw shagri she gaprep mat sai, awh, Seng, mana an bra mat ai hpang, ngai nta langai mi kaw prawng bang wa yang, myit machyi hpa, myit yawn hpa lam mu kau da sai, dai mabyin hpe mu ai htawm, ndai bungli hpe myit she machyi wa sai." Sut Li Awng myit n ma nga ai nsam hte tsun nga u ai. Seng Lu gaw n chye na ai zawn rai: "Nhpa mi wa mu kau da wa sata agu Sut?" Nga galaw san u ai. Sut Li Awng shi mu kau da ai gumgai yannu a mabyin hpe bai tsun dan ai shaloi, Seng Lu gaw: "Agu Sut, ndai bungli hpe tawn kau sana nga, nu gaw hkraw na i?" Nga san sai. Sut Li Awng gaw shi myit jahkut dawdan kau nna: "Seng, agu Sut ndai bungli hpe myit yu yang, n kaja ai hpe chye na wa sai, bai nna, ndai bungli gaw mungkan ting na kanu ni a myiprwi hte ka-ni a majaw jamjau hkrum nga ai Chyurum sha ni a hkrapngu hkrapngwi nsen ni hpe jahkrat ai hte bung ai, masha ni a myiprwi hkrat jamjau hkrum, prat jahten kau ya chye ai ndai nanghpam dut lu dut sha ai hte lu la ai ja gumhpraw ni hpe ngai n marin sai, sha tawn nga ai shat mung n shang mat sai, dai n kaja ai lam ni gu Sut hpe hkrit hpa shingna langai zawn yup n lu, sha n lu hkra masin salum hpe jahkrit ya taw nga ai." Sut Li Awng gaw shi sha nga ai shat bagan hpe ganawng sit kau dat rai hkra tsun nga u ai. Seng Lu mung ga-hpri gawm hta lang let Sut Li Awng a ga hpe myit yu, sawn yu nna, gawm hpe saboi kaw tawn kau nhtawm: "Re i, agu Sut, Seng mung agu Sut a ga na yang, ndai bungli hpe hkyet rung wa sai." "AWh, Seng, agu grai ahkyak ai lam lama mi tsun na, tsun na ngu, tsun na lam n pru hkraw ai, ya gaw asan sha tsun sana." Sut Li Awng, Seng Lu hpe yu shati tawn nna tsun u ai.
Seng Lu mung Sut Li Awng a aga manawng hpe madat yu ai hte Sut Li Awng a myitum kata na byin pru wa ai ga si ni hpe chye na ya let baw hpe gum da nga ai. "Seng hpe agu Sut tsawra myit majing hte tsawra ai ngu tsun yang, pawt na i Seng?" Sut Li Awng gaw Seng Lu a ta kaw sa jum kra rai tsun u ai. Seng Lu mani sum rai: "She pawt law." Ngu ta gang shaw la kau dat nu ai. "Kaja wa agu Sut hpe pawt mat sai i? Seng pawt na nga yang, agu Sut a ga hpe bai dawm la kau sana, hkum pawt sa yaw." Sut Li Awng ta hpe dawm la kau nna, Seng Lu hte loi gang hkra sit dung let tawngban dat nu ai. Seng Lu gaw Sut Li Awng hpe myijut kabai bun let: "Shing nga jang grau pawt." Nga wa nna, Sut Li Awng grai myit yak mat nu ai. "Hpa majaw pawt wa ta? Tsawra ai ngu yang pawt, agu Sut a ga hpe dawm la kau sai ngu yang mung pawt re gaw, agu Sut n chye na mat sai." Seng Lu loi mi pawt mayu ai nsam shapraw let: "She pawt law, mi moi kaw na gaw n tsun, ya wa she tsun ai gaw Agu Sut hpang hkrat mat sai gaw." Nga jang, Sut Li Awng kabu ai zawn, yawn ai zawn nchyi nmu nga let: "Agu Sut hang hkrat mat sai da awh?" Nga mau taw nga sai. Seng Lu sharang da na atsam n nga sai majaw: "Agu Sut tsawra ai hpang hkrat ai, Seng gaw moi kawn agu Sut hpe tsawra taw sai, agu Sut galoi tsun na, tsun na ngu nau la jin kau nna pawt mayu ai le, hehe..." Mani let Sut Li Awng hpa wa tsun pru wa na ga hpe la nga ai. "Ya kaw na Agu Sut hpe hkum pawt sa yaw, Seng na mayu ai ga hpe ya kaw nna agu Sut lani mi manga lang tsun tsun di na yaw, haha..." Sut Li Awng kabu gara hte Seng Lu hpe ahpum tawn let sadi jaw u ai. Grai pyaw nga ai sumtsaw ningnan sing sing yan a nsen hpe ga-up kau lu ai gaw chyenan nsen langai rai nga ai.
"Oi, nu... " Nga Seng Lu kanu a chyenan madat htan let, Sut Li Awng hpe jahkring mi ngu lata kumla madun u ai. "Daina she shalai hkat ga ngu tsun da hkat sai, e law, e law, ya Myitkyina kaw re, agu Sut i, nga ai le, nang Seng a makau kaw dung nga ai, shaga na i? AWh, e, e, mai sa nu." Seng Lu chyenan jahkrat kau let: "Agu Sut, nu tsun ai lawan shajin nna lawan wa manu da." Ngu kanu a ga hpe Sut Li Awng hpe htawn tsun dan u ai. Sut Li Awng mani let: "Aga, niba wa wa mung bai rai sai, ya she shi kasha hte sumtsaw byin wa yang she..." Ngu shi hkrai anyam la nna, Seng Lu hpe: "Seng, niba hpe wawra byin ai, ndai byin ai ngu nhtawm, masum ya daram naw nga la ga i?" Ngu bawngban yu u ai. Seng Lu myijut kabai bun let tsun ai: "Kadai wa n kam ya ai." "Hpa majaw wa mi?" "Agu Sut a kyang grai laban na rai nga ai le." Sut Li Awng aja wa mani let: "AWh, awh, dai wa i, dai wa mi akyang laban ai n re gaw, tsawra ai ga she re." Nga tsun ai ga hpe Seng Lu baw gum let azim madat la nga ai. Sut Li Awng gaw kraw kata gatu nga ai sumtsaw ga ni tsun shaleng lu sai majaw, kabu gara hte Seng Lu hpe kindun woi kau rai shat seng kaw na pru mat wa sai. Seng Lu hte Sut Li Awng bungli shajin la nna, Muse de bai nhtang du wa masai. Nta du shang wa ai shaloi, jan Seng Ra hkap tau let: "Awngdang sai n rai, dai hku rai ra ai, nu sha yan byin ai, hka shin la nna shat sha saga." Nga kabu taw nga ai. Jahpawt manap Seng Lu kahkum tum maka gaji ji law ai nsam tsit buhpun palawng hpun kau, lahtin tsaw hkalep matep tawn, samram kara shingdu de masit dingpyang tawn rai, shannu ni a nta wang kata na singgoi lahkum kaw dung goiwat let, laika hti nga ai. "Seng, ngai gaw mana ting n lu yup nngai."
Myiman shan nsam chyangchyang rai, hkumgawng lapran le re Sut Li Awng mung laban jawng sa hkyem ai zawn, lawnghpraw lawng kaw Hka hku dangpai lawai kau, achyang re kephtep htep tawn rai, Seng Lu hpang de sa wa u ai. "Hpa majaw n mai yup ai rai agu Sut?" Seng Lu chye mayu ai myit hte Sut Li Awng hpe mada let san dat yang, myiman hta lama mi hkam sha nga ai zawn rai nga u ai. "Hpa majaw nga yang, ndai nanghpam dut sha ai bungli gaw mara grai kaba ai, hpyen grai law ai, agu Sut le, Chyurum myu sha ni hpe ndai nanghpam tsin-yam hta na lawt shangun mayu sai." Sut Li Awng gaw grai myit chyat ai zawn rai Seng Lu a makau kaw dung dat let tsun u ai. Seng Lu singgoi lahkum kawn rawt ngoi rai, grai myit shang sha ai nsen hte: "Re i, agu Sut, masha hta mung akyu n jaw, Karai Kasang n ra, tara mung n ra re wa, hpa majaw anhte ndai bungli galaw nga ga ai kun?" Nga tsun sumru nga ai. Sut Li Awng tsap nga ai Seng Lu hpe gang shadung la nhtawm: "Bai nna, an a sumtsaw hkrun lam hta dingbai dingna shang wa na hpe mung agu Sut grai tsang ai." Nga maram tsun u ai. Seng Lu myit yu let: "Dai gaw re, raitim nu hkraw na kun? Nu hkraw na n shadu ai, hpa nga tim hkum tsang, Seng gaw agu Sut myit ra ai hku sha re yaw..." Nga, grai myit da-ting ai hku Sut Li Awng hpe yu na tsun nga jang, Sut Li Awng gaw Seng Lu a sanap hka chya tawn ai atu asan re shabyi kaw sa masawp dat nu ai. Dai yang e, nta hkuwawt kaw na n myit mada ai nsen: "Ngaihkri Sut e, nan a lam hpe ngai chye sai, raitim ndai lang gaw naw galaw ra na re." Nga shaga pru wa ai nsen de, Sut Li Awng gaw myiman gayin let: "Ni ba, ndai magam bungli hta lai nna mai kaja ai bungli grai nga ai, kaga bungli she galai galaw saga. " Ngu htan u ai.
Seng Ra pawt mayu tim sharang let: "Ma Sut e, ni ba mung grai gaw n kam galaw sai raitim, arai ni la kau sai, bai nna Zau Ring ni hpe shana tsun kau ngut sai, ndai lang gaw arai nau n law ai majaw, Sut nang hkrai sa u yaw, na nnam gaw naw nga la u ga. " Nga mu bai madun dat sai. Seng Ra shi a myit hta lama mi lagu hkyem da ai majaw, kasha Seng Lu pe n bang dat ai hpe Sut Li Awng n chye nga ai. "Ni ba, ndai nanghpam malu masha gaw anhte lu sut lu su na matu sha anhte myit ai, kaja wa nga yang, ndai nanghpam hta hkrat sum nga ai gaw, anhte Chyurum sha ni sha re, tai hpyen wa a gatsi majan hta anhte ni hpe laknak langai zawn jai lang hkrum nga ga ai hpe anhte dum ra sai, tinang amyu sha ni hpe tinang bai nhtang sat ai ngu ai gaw labau grai ntsawm ai ni ba." Sut Li Awng nhkrit nkang hte gani ba hpe tsun shadum u ai. Seng Ra nau pawt mayu wa nna Sut Li Awng hpe layung madi tawn: "Sut Li Awng, nang gaw shakrep hpe taukawk tai hkra tsun mayu ai i? Nang ngai hpe galoi wa ga htan yu a? Galaw na i? N galaw na i? N galaw na rai jang nye nta na pru wa, nye ga madat nna galaw na rai jang gaw nye kasha hte hkungran ya na, ndai lam lahkawng nang lata la u." Nga tsun marawn bun dat nu ai. Sut Li Awng myit htum mat salu ai, Seng Lu hpang de mada dat yang: "Agu Sut, ndai lang sha gaw nu a ga madat kau ga, ndai lang agu Sut wa jang, ngwi pyaw ai dinghku de saga i." Nga bai hpyi shawn ai majaw, Sut Li Awng mung lai n lu mat rai, galaw na hku myit dawdan salu ai.
Raitim, Sut Li Awng a myit hta uhka a ndan dum hpa n chye tsun ai manghkang hpe maram lu nga sai. "Seng e, ganing di ai baw rai wa sai kun? N chye mat sai law... Mai kaja ai hku Karai Kasang matsun la na hpe sha akyu jawm hpyi ga i." Ngu Seng Lu a ta kaw sa jum manat nga let tsun u ai. Seng Lu mung Sut Li Awng a gahpa kaw shamyet let: "Seng mung akyu hpyi ya na, agu Sut hte ndai nanghpang ka-ni tsin-yam hta hkrat sum nga ai myu sha ni a ntsa Karai Kasang mai kaja ai hku lawt lu na lam matsun madun la na hpe kam ai." "Um, ndai arai ni hpe kaga de n dut shabra ai sha gumhpraw mung lu hkra gaw ngai myit shapraw ra sai." Nga, Sut Li Awng a kraw hta myit da nga ai. Sut Li Awng sungsung tangtang myit yu ai hpang: "Um, ndai ladat hkrak ai." Ngu myit jahkut la nhtawm yup mat wa sanu ai. Jahpawt manap e: "Agu Sut, agu Sut, jahpawt kan tsi na palap lu ga da, nu shaga nga ai." Seng Lu gawk de Sut Li Awng htan ai nsen n na ai majaw, gawk de shang wa yu yang, laika pa langai mi hta: Agu Sut hpe myit sadi dung let la nga u yaw, lani mi na nhtoi hta agu Sut Seng hpe lu hkra wa woi la na, agu Sut hpe chye na ya rit! Nga ai laika wa mu hti ai Seng Lu a myit hta "AWh, agu Sut, nye nu hpe myit machyi mat sai kun?" Ngu myit la nhtawm, laika azim sha kyem da salu ai. "Nu, agu Sut hkawm mat sai, shi gawk hta n nga sai." Seng Ra myiman nsam loi hten mat ai hpe kasha Seng Lu n mu nga ai. "Ma Sut ndai gaw hpa mung n tsun da ai wa mi hkawm mat wa ai gaw." Ngu tsun let ngam nga ai ngachyu ntsin hpe lu shakre kau rai shinggan de pru mat wa salu ai. "Grai hkrak sai, grai hkrak sai, ya na zawn nanhte mungchying sha ni myi hpaw wa ai gaw Karai Kasang lam madun la ai ga rai nga ai." Sut Li Awng la wa ai ka-ni hpraw hte gumhpraw ni hpe nanghpam pat jasan kawmati hta sa ap nna, shi a mara ni hpe tsun dan, yin la nga lu ai.
"Du jum e, ndai ngai zawn re wa hpe lachyen lahka n di ai sha hkap hkalum zinlum la ai hpe grai chyeju dum ai, ngai mung byin lai wa sai mara ni hpe gashin let, ndai nanghpam pat jasan magam hta jut shara mi kaw sha pyi shang lawm ap nawng mayu ai." Nga Sut Li Awng gaw shi myit da-ting kau nna, galaw hkrat wa hkyem ai lam hpe hpyi shawn nga ai. Du jum kabu gara ai myiman hte: "She mai law, hkau Sut e, nang zawn re ramma ni ndai kaw grai ra ahkyak ai, ndai nanghpam pat jasan kaw gaw nanhte zawn myit marai rawng nna, bungli n chye ai ni hpe kanbau bungli a matu madi shadaw ta hpa-ji ni hpe mung sharin ya nga ga ai." Nga tsun u ai ga hpe Sut Li Awng myit shang sha let madat nga ai. "Bai nna nanhte ramma ni gaw, myu hte mungdan a htoi tu ai wunbu shagan langai zawn rai ra ai, dai majaw nang tara ni hpe hkan nang hkan sa let ap nawng u le yaw, ngai shinggan de bungli naw ra ai, naw hkawm na." Du jum gaw ra ai matsun da nna, shinggan de pru mat wa sai. Sut Li Awng hkum hta asan atsang nga ai myit hte nanghpam pat jasan kawmati rung shinggan hkan pru mada hkawm nga ai. "Mung San, hkau Mung San n re i?" "Re le, nang Sut Li Awng n rai wa sani?" "Re le, Mung San nang gara hku na ndai de du wa ai ga re?" Sut Li Awng kabu gara manang wa Mung San hte mu hkrum shaga u ai. "Hkau Sut e, ngai maw dai hku sha gaw e, galoi wa mi maka kap ga a ta e, maka n kap, ka-ni yahkyi tai nna, nang de du wa ai rai nga ai le, raitim ya gaw nang kaw hkye hkrang la ai bai hkrum ai majaw, ya ngai masha ningnan tai sai, ngai hpe gaw san nna, nang gaw gara hku du wa ai rai?" Sut Li Awng mung shi byin lai wa ai lam ni hte shi yaw shada da ai lam ni hpe tsun dan bang wa sai.
"Sut Li Awng e, gara de law nang hkrai i? Shawoi na na tsawm shayi gaw n lawm sai i?" Zau Chyang hte lam kaw hkrum nna, lam hkawm let jahta nga ma ai. "Re, hkau Chyang." Zau Chyang gaw Sut Li Awng hpe yu nna: "Shawoi na baw bungli sha i? Dai rai yang gaw nang loi mi maja ra na re, ya hte na gani hte la langai mi jahta nga ai hpe mu nna, ngai hpang hku kaw hkan madat yu yang... " Sut Li Awng gaw Zau Chyang hpe lu sha seng de woi bang wa nna: "She tsun dan yu rit, ni ba nye lam hpe hpa baw nga tsun ai rai?" Sut Li Awng namsi ntsin htet nga yang, Zau Chyang gaw shi na wa ai ga hpe tsun dan u ai. "Hkau Sut, nanhte moi gaw grai lu su lai wa ai re da, na ni ba, tsa ba ni chyawm gaw grai matsan ma ai da. Shing rai, na nu gaw shi gahpu ba nta ni hpe shaga la nna, nta na ra mara bungli galaw shangun let rau woi nga ma ai da. Dai hpang gade ning n rai yang, na wa gaw ka-ni hpaga a majaw hkyukhtawng rawng mat wa htawm, htawng kaw machyi kaba hkrum ai majaw n nga mat wa sai. Na nu ningtsang tsang nna shaning ting ting machyi nga, yup ra hta na pyi n lu rawt hkawm mat jang she, na ni ba hte na tsa ba yan hpe shaga la nna numhtet ga tsun da ai da." "Hpa baw ni tsun da ai da?" Sut Li Awng manang wa kaw sit dung hkra rai san nga nu ai. "Hkau Sut nang sak hkun manga ning du jang, nang lu ang ai ja sutgan ni hpe ap ya na hte na nu a ganam makyin Seng Lu hte hkungran ya na matu htet da ai da law." Sut Li Awng mau mat sanu ai. "Bai nna, hpa ni naw na ai rai?" Sut Li Awng manang wa a ta kaw sa jum tawn let bai san u ai. "Shan yan hpang jahtum tsun ai, nang hpe jaw ra ai gumhpraw hte ja sutgan ni hpe n kam jaw ai da, bai nna, Seng Lu hpe mung shi hpaga rau galaw ai Miwa lauban langai hte myit hkrum da sai nga ai." Sut Li Awng myit shuk wa ai hte: "Hpa majaw Miwa lauban hpe jaw sha mayu ai da i?" Nga rawt pawt tsap wa nu ai.
"Dai gaw na ni ba lauban wa kaw na gumhpraw grai hkoi lang da ai gaw e, na ni ba hpai grai gasup ai gaw, dai majaw rai nga ai." "Dai lam ni hte seng nna ngai gaw hpa hpe maja ra a?" "AWh, ngai ganoi malap kau nga ai, nang hpe gaw ndai lang shalai shangun nna, nang hpe shi ladat hte htawng de bang na hku myit ai, mi yet ngai tsun ai la hpe shaga nna shangun ai rai sam ai, dai majaw grai maja ra ai, hkau Sut nang n sa yang she mai na nhten." Sut Li Awng sumru yu nna Zau Chyang hpe yu let: "Ngai nan sa na, ndai bungli hpe ngai nan jahtum na hku galaw dat na, hkau Chyang nye matu hpa hkum tsang, ngai myit da ai lam nga ai." Ngu tsun nhtawm, Zau Chyang hpe chyeju ga hte shakram kau da sai. Sut Li Awng Myitkyina de mawdaw hte n re ai sha, nam lam hku ruyak jamjau hkam let lani lana hkawm ai hpang, Myitkyina kaw du shang wa ai hte ra ai ni shajin la nhtawm, Zau Ring hpe chyenan matut dat ai shaloi, Zau Ring mau ai hte: "Sut, gara kaw sa wa ra na? Shawoi na shara kaw sha i?" Nga shaga ngut ai hpang, Zau Ring shangun ma hpe shaga la rai, Sut Li Awng shaga da ai shara de sa wa masai. "Gumhpraw gaw hpring ai kun?" Ngu tsun let gumhpraw sumpu hpe hta lang nna, yin rai nhtang wat wa hkyem ai hte: "Hkau Zau, ndai ka-ni hpraw gaw grai sau nga ai le, nga chyu shadung she rai nga ai, sa-wa hkalung ndai anhte hpe mawp sha sai rai nga ai." Nga ka-ni hkap la ai Zau Ring a ma ni tsun sai.
"Maktek! Hkalung ndai hpe lu hkra rim mu!" Dai shaloi jang Zau Ring gaw hkan marawn tsun let, shi mung shachyut nang kap rai sa. Hpunggaw langai mi kaw shangun ma marai manga tsap taw ai hpe sha sa mu nna, Sut Li Awng hpe gaw nhkan mu kau dat sai. "Seng Ra... Seng Ra... Nang lani mi gatut nan gatut na!" Nga, jum mung sum banau mung mye re Zau Ring gaw marawn pawt la nhtawm, shi shangun ma ni pe shaga la nna wa mat sai. Sut Li Awng gaw dai gumhpraw hte ka- ni hpraw ni hpe nanghpam ka-ni pat jasan kawmati rung de du hkra la wa nna ap ya sai lam, Mung San hpe tsun dan nga ai. "Dai hku rai nga ai hkau Mung San e." Sut Li Awng a ga na nna Mung San gaw: "Hkau Sut e, na a tsam hte na dawdan ai lam hpe gaw grai hkungga sai, grai na n- gun lu sai." Sut Li Awng pat jasan magam bungli hta mali ning du hkra ap nawng gunhpai ngut ai hpang, dai pat jasan kaw na pru ai hpang, shi manang Mung San hte Hpakan de rawt na bawng nga ma ai. "Hkau Sut, ya nang Hpakan de lungseng sa htu ga nga ai wa, nang na sumtsaw kaw n wa sai i?" "Wa gaw she wa mayu law, hkau Mung San e, raitim, masha ngu ai gaw byin mayu ai hte byin ging ai hpe shawng galaw ra ai da, dai majaw ngai lauban byin yang she wa sana ngu myit da ai." Mung San baw ganga kau let: "Dai gaw dai le, raitim lama na nang lauban lawan n byin hkraw yang gaw, nang shi kaw n wa sana i taw?" Nga san u ai. "Dai rai yang gaw, an yan gam maka n bung na rai nga ai ngu myit shadik la ra sai ga rai nga ai, raitim ahkyak ai gaw Karai Kasang a lam matsun ai hku hkan yang gaw, madu Karai lam matsun ya na hpe kam ai." Dai ten hta n myit mada ai Sut Li Awng gaw Zau Chyang hte hkrum sai. "Hkau Chyang gara de law?" "Sut, ya nang ganang na gale pru wa ai? Nang gaw tsim hte tsam, Seng Lu gaw gaida da nna, ndai mare kaw na pru hkawm mat wa sai, na ni ba mung htawng rawng mat sai, na nta mung na ni ba masha ni kaw gumhpraw hte ap da kau sai, masum ning ga sadi laika ka da ma ai da."
Zau Chyang laika pa shaw nna, Seng Lu a hkringdat ka ya let: "Sut, ndai gaw Seng Lu ni a gahtawng re, nang du hkra sa jahkrum u." Nga tsun ai. "Um law, lani mi na nhtoi hta gaw lu sa jahkrum na re ngu ngai kam ai, ya shi gaida da mat ai raitim, shi a ntsa nye a tsawra myit gaw galoi mung n shai ai, gaida da nga ai Wunpawng shayi sha langai mi a tsin-yam hpe gaw anhte Wunpawng shadang sha ni a lit nan rai nga ai." Sut Li Awng sumtsaw jan Seng Lu a shiga na nna, masin sheng nga n pyaw mat nu ai, hpa rai gaida da wa ai ga san grai nga ai raitim, myit ai lam shawng shakut na da- ting da sai majaw, Zau Chyang hte hka bra ai hpang, Mung San hte Hpakan de lungseng htu rawt mat wa sai. Masum ning na ai hpang, Sut Li Awng yan lungseng kaja mu htu shaw ma ai, lauban byin nna Mung San shi dum nta de yu wa mat, Sut Li Awng gaw shi a krawwang hta galoi mung bang da nga ai Seng Lu hpe tam mat wa sai. "Ma, nu gat naw sa dut na, jidwi hte nga taw u yaw, jidwi a ga madat u re lu." "Anu, lawan bai wa yaw." "E law, e law, nu muk la wa ya na yaw nu sha." Gat dut nna kawa dingla hte kasha hpe bau maka nga ai mabyin masa hpe mu yang, Sut Li Awng a myit hta sharang n lu ai sha: "Seng ..." Ngu shaga dat nu ai. Seng Lu ri singga kaw tin shapun rai gatrai baw let, kasha hte shaga nga yang, grai man ai nsen zawn nga ai masha shi hpe shaga dat ai zawn nga, shingdu de nhtang gayin dat ai shaloi, Sut Li Awng a kraw salum kaw na pru wa ai myiprwi si ni hpe mu hkrup ai hte n myit mada ai sha: "Agu Sut." Ngu ndum ai gahte tsun kau sanu ai.
Daini na Seng Lu gaw labu nshaw nshun di bu da, hpun da ai palawng mung nsam raw ma ai hpun tawn, kara hpe gaw marawng marang di shingdu kaw majaw da, hkumgawng lasi lamun rai mat, dinghku lit li ai majaw, hkum tsingli na ten pyi n lu nga ai ten hta, Sut Li Awng wa mu nna, matsan yu dum la na zawn rai, myiprwi gahte let tsap nga nu ai. Dai ten hta Seng Lu a kasha gaw kanu hpe: "Nu, ya mung gat n sa shi ai i?" Nga san dat u ai. "Seng, ma ndai gaw..." Kadai a kasha ta ngu pyi rai n lu san shi yang, kasha gaw: "Anu, nang tsun ai awa bai wa na nga ai, ndai wa re i nu?" Nga, Seng Lu a makau kaw tsap nga nna, Sut Li Awng hpe yu let san nga ai shaloi, Seng Lu mung kabu myiprwi si hte: "Re, nu sha e, nu sha grai mu mayu ai ma na wa gaw ya ma a man hta tsap nga ai, ndai ma na wa re yaw..." Ngu tsun dan dat nu ai. Sut Li Awng ma hpe hta pawn la nna: "Seng, ndai agu Sut a kasha da awh?" Ngu mau let san u ai. "Re, agu Sut, Seng hte agu Sut yan a kasha majing re, Sut Seng Li ngu mying shamying da ai, agu Sut, Seng le, agu Sut htet da ai laika hte maren gu Sut hpe sadi dung ai hte la nga ai le.." Nga kabu myiprwi gatsut kau let tsun shali dan nga u ai.
Sut Li Awng gaw ma hpe: "Wa sha".." Ngu shaga dat ai hte rau, kasha Sut Seng Li mung: "Wa, e wa." Nga shaga let: "Ma le, wa hpe grai mu mayu ai she re gaw, jawng kaw manang ni ma hpe tsun ai, nang gaw kawa n lu ai kasha nga nna tsun ma ai. Ma grai myit gaji ai raitim ya gaw ma wa lu sai, ya kawn galoi mung ma hpe hkum kau da sa yaw wa•." Nga, ma tat ga ga let Sut Li Awng hpe tsun dan u ai. "Ya kaw na, awa yan nu hte galoi mung arau nga sana ngu ma pe wa ga sadi jaw ai yaw, bai nna anwa ni moi na zawn yakhkak jamjau let n nga ra sai, masha ni yu gaji ai mung n hkrum na sai." Ngu, Sut Li Awng gaw ma hte Seng Lu hpe man kaw chyitchyit ahpum da u ai.
