BUGA GINRA A N TSUN PRU SHI AI LAM NI

MAI JA YANG MUKLUM NA HPAGA LAM HTE MUNG SHAWA HKAMJA LAM HTE SENG NNA JAWNGMA NI A SAWK MAHKAWNG DA AI SAWK LAIKA NI

Anhte Mai Ja Yang College na Bachelor of Arts and Science jawng ngut mat ai sawk sagawn ninghkring ni ka da ai ndai sawk tam laika ni hpe grai gumrawng gumtawng let tang madun dat ga ai. Anhte a ninghkring ni galaw ai ndai amu ni gaw anhte a hpaji lam masa hta shawng ningnan ka hpang, sawk hpang ai laika ni rai nga ai. Tinang a buga galu kaba wa na lam hpe myit mada ai hte sawk sagawn hpaji hte kapyawn nna myit hkum ting dek galaw shakut da ai laika ni rai nga ai. Ndai laika ni gaw anhte a buga ginra na hkai lu hkai sha ai lam, hpaga lam hte hkamja lam masa ni hta naw ra rawng nga ai shara ni hpe mu mada na matu hte seng ang ai ni, lu sharai lu na matu yaw shada let sawk sagawn da ai laika masum hpe tang madun dat nngai law. 

Mung shawa hkamja lam: buga masha ni hkali byin ai hpe chye na hkawn hkrang ai lam grai law ai raitim, marang htu ai aten hta ana kap ai masha jahpan hpa majaw law jat wa ai hpe sawk sagawn da ai. 

Hkai rem sut masa: hkai rem hpaji (2022–2025) hpe sawk sagawn ai lam, 2021 ning na Myen mungdan n sim n sa wa ai hpang, buga hkai sun galaw sha ai ni gaw mung masa n sim n sa hte gumhpraw manu rawt jat wa ai lam zawn re ai ni hpe hkam sha wa ai lam hpe sawk shagawn da ai. 

Hpaga lam: Mai Ja yang e nga ai Salum Hka San Company a daw jau ai lam hte wuhpung wuhpawng a kam hpa ai lam ni gaw, dai ginra hpe sanseng ai hka hpe gara hku madi shadaw ya ai hpe sawk sagawn da ai.

Ndai laika ni gaw hpaji lam hta ra kadawn ai lam jut shara mi sha pyi madi shadaw lu na hpe myit mada nngai; anhte sawk shagawn ninghkring ni gaw jawng wang kata na sharin hkam la ai kaw nna shinggyim wuhpawng hpe hpaji lam hta kungkyang ai hte lam kaja ai de galai shai wa ai hpe myit mada ai hte tatut madun ai lam rai nga ai. Anhte ginra a shawng lam hpe myit mang let shakut da ai ndai hpaji sawk sagawn ninghkring ni a sawk tam da ai lam ni hpe madi shadaw mayu ai ni, kaja ai hku ningmu jaw mayu ai ni hpe alum ala hkap tau la ga ai.