SALANG SHADA SHARIN AI LAM

SALANG SHADA SHARIN AI LAM

Pungga Ja Li

Masha kaba langai ngai ritkawp tara tawt lai ai rai yang, shi hte seng ai kahpu kawa ni e sharin ai lam nga chye ai. Shing n rai rau nga salang ni hpawng chyawm nna jawm sharin ai lam nga chye ai. Dai zawn rai sharin shaga ai shaloi gaw, dai ritkawp tawt lai ai wa gaw, gara hku ganing rai tawt lai ai ngu ai hpe jep joi ngut jang shut ai wa a maga hte tengman ai maga nga nna hpung lahkawng garan nhtawm shada tsun dara jahkrup shangut kau chye ma ai. Shing n rai marai lahkawng shada shut ai rai yang, dai masha lahkawng a maga lahkawng de hpung lahkawng hpaw nna shangut kau chye ma ai. Dai zawn re mara jeyang ai shaloi gaw, tinang myit lu ai hku masin jasat la shada araw hkat ai hku n re sha salang ni hpe tang dan, shi htawn ai masa hku tsun jahta nga ma ai. Salang hpung lahkawng ni mung tinang myit lu ai hku, tsun mayu ai hku n tsun ai sha tara masat hte hkrak tsun paran chye ma ai. Shanhte a tara kanu masat ni gaw, shinggyim masha ni hta byin chye ai ganawn mazum ai kaw nna pru wa ai manghkang ni hpe hkumtsup pri nem ai hku tsun shaga dawdan lu na lam ni nga nga malu ai. Dai hpe ga malai ngu nna tsun ai.

Dai ga malai hpe shi hte shi labang nna jahta ai shaloi ga malai ngu nna n tsun ai sha moi na salang ni ndai hku tsun ga ma ai, jiwoi jiwa ni tsun gama ai nga nna tsun chye ma ai. Dai jiwoi, jiwa ni tsun ga ai ga nkau mi gaw lawu na hte maren re. ( 1) Shingbwi ju hpe kadai n masen, du kasha hpe kadai n sharin. Du kasha salang kasha zawn nga ra ai ngu shagun mayu ai lam rai nga ai. ( 2) Lamu ra yang ga madi, anum ra yang la si. Masha la hte masha jan shut hkat ai ruhka hta la wa hka daw ra ai ngu ai tara masat hpe tsun nga ai. (3) Masha gaja gaw masha n shatan, gwi gaja gaw manam n wau. Shada shatan nhkan ai kaw na byin ai manghkang hpe paran ai lam rai nga ai. (4) Ma ga raitimung hka kaba, ninghkyi raitimung ningma sung. Hka hkrum ai baw ga hpe ma ni a man e tsun ai majaw byin ai manghkang hpe hparan ai lam rai nga ai. (5) Lagaw madi yang she n-gup madi ai. Shinggan de pru sa yang she lu sha ai, nhku kaw rawng nga yang hpa n lu sha ai ngu ai lachyum re. (6) Wa kanu a uhka chyang mu. Hpawk hpawk re yan mara shagun hkat ai hpe tsun mayu ai. (7) shawng byin shawng tsun hpang byin hpang tsun. Manang jan a kasha n-gyi ba ai hpe arawng la kra tsun kau ai hpang, shi a kasha marai 2 ting n-gyi ba ai. Manghkang ngu ai gaw kadai kaw mung byin chye ai majaw. Manang wa byin yang nau n mai jawng ai ngu mayu ai.

(8) Magwi hkrit yang shinglam machyu ai. Tinang hka jaw ai nta de jahkring hkring sa chyai yang tsang ai myit hpe hkyem sa shangun ai. (9) Hka gata na nga mu. Laing gata na nga hpe mu lu ai raitim si mai di de du na n loi ai. Tinang n byin ging ai n lu la ging ai hpe myit mangoi ai wa hpe sharin ai ga re. (10) Tsawm ai hte mu ai hpe re ai hkum gaw langai sha nga ai. Masha shada grai shai hkat ai raitim "tsawm" ai hte "mu" ai ra ai hta bung hkat ai ngu mayu ai. (11) Du ke hte baw chyang she bung ai. Masha gaw baw de kara tu ai hte du kaw kaji ai yawng bung tim myit masin n bung ai ngu mayu ai. (12) Sharaw gaw shinggan de ka ai masha gaw kata de ka ai. Masha a myit hpe ntsa lam sha yu nna n dang tak chye ai. ( 13) Hpu-nau du tai gat n nga ai. Mayu gaw num la jang lu ai. Da- ma gaw num ya jang lu ai. Hpu-nau gaw wahkrang kaw gara hku mung n mai lu ai. Kahpu ganau shada byin ai manghkang hpe paran ai ga re. (14) Tsap gahtam ai dawdap, tsap hkrum ai gaw ninggam. Myit makun ai hku hkrak ta tut byin na grai yak ai ngu mayu ai. (15) Bau ka gun nhtang wa na myit dai lu. Akyang n gaja atsam n rawng jang, kadai mung da-ma n kam shatai, kadai mung n kam wa rai nna num hpyi n lu na hpe tsun mayu ai. (16) Mam hpe gaw jahtai ntsa e lam ai, masha gaw mungkan ntsa e nga ai. Masha ngu ai gaw mungga, htunghking ntsa kaw nga ra ai ngu ai.

(17) Hpun lung gwi ai wa hpun hkrat si, hka hta gwi ai wa hka hkrat si. Shinggyim masha gaw ram htum ngu ai kadai n nga ai ngu ai hpe tsun mayu ai. (18) Woi a ningma yu. Woi langai kaw ningma kap yang, machyi sa kawan ai ni gaw machyi ai wa a man kaw si ai lam, machyi n mai jahta ai ngu mayu ai. (19) Hka hkrat ai wa a manang tam. Mara galaw chye ai wa kaga wa hpe mung mara galaw hkra alau chye ai. (20) Sani si gaw tsaw ai kaw si nna hpun pawt de hkrat yat mat ai. Gade arawng lu, ja gumhpraw lu tim lani mi kaga ni hte maren sha re ngu mayu ai. (21) Wa gaja n-gai kaw htum ai. Wa gaja ai ten hta ja ai lu sha hpe sha ai raitim wa daw htum mat jang n-gai hte sha bai mayu ra ai. N-gun ja ai ten hta n-gun ja tim n-gun kya ai ten bai nga wa na hpe sharin shaga ai. (22) Myit malai gaw nga ai. hpraw malai gaw n nga ai. Shan chyang ai wa gaw shan n hpraw wa lu tim myit n gaja wa gaw myit gaja wa lu ai. (23) Chyahkan yan nu ni a gamung. Ma ni hpe gaw tsun, tinang gaw myit n galai. (24) Manang jaw n ja, tinang sha n ma. Nau maji ai ni hpe sharin ai. Manang jaw n ja, tinang sha n ma ngu nna sharin ai.

(25) palam la gasat yang lamu du ai. Manghkang byin ai shaloi mara chyu tsun hkat nga yang gaw, manghkang grau sawng wa na re ngu ai hpe sharin ai. (26) Woi a hpun lakung tat. Hpun lakung gaw, tinang hpe garum ai lam akyu hkam sha ai lam ni hten mat ai shaloi tsun ai. ( 27) Shu a rim gumhtawn. Dawdan sai kawn na gaw myit n ung ang ai sha galaw mat wa na matu sharin ai. ( 28) Matsan ai wa a bu jung bu. Bu jung ngu ai gaw manu grai dan ai raitimung, bu jung labu bu ai hpe lu su ai wa n ngu lu ai. Hpa majaw nga yang labu n lu ai majaw bu ai she re. (29) Sha yang du, galaw yang mayam. Bungli shaja ai wa sha mu mu mai mai lu sha na re ngu mayu ai. ( 30) Goi na u gaw u di kaw na chye yu. Dai hpe gaw myitsu wa na ma gaw kaji kaw maka nga ai. (31) U yi goi yang nhtoi n htoi. Num ni woi awn ai dinghku gaw masan n sa ai dinghku re ngu tsun mayu ai. (32) Na hpang wa gaw kaga hku na ai. Myi kyaw wa gaw kaga hku bum de yu ai. Masha kaga ni mu ai hku, na ai hku, n chye na, n mu ai wa gaw myi kyaw, na hpang re ngu tsun mayu ai. (33) Dan kawk hpai ai wa si hkanu. Sanat hpai ai wa lapa tsu. Galang ta law law lu mayu ai wa gaw hpa mung n lu byin chye ai ngu mayu ai. (34) Arawng mala yang wan yam ma ai. Arawng tam ai wa gaw matsan wa chye ai. (35 ) Jahtung a man e u di baw. N gu na hpe hkum garan.

(36) U lu mahka e hpung gun ku. Lu sha na rai wa sayang she lagawn mat ai. (37) Num ni mu ai shan hkang, la ni mu ai lahpaw hpra. Num ni gaw shan hkang hpe n chye hpaga ai. La ni gaw lahpaw hpra hpe n chye yu ai. ( 38) Hpun kaw n jung langa kaw jung. N-gun ja ai wa hpe ndang jang, n-gun kya wa myit jasi la ai. ( 39) Jahkrai a matu hka, awoi a matu pala. Jahkrai a matu hka gaw shading ai zawn rai nna wa chye ai. (40) Kawa tu ai laman hte laman, masha pra ai gaw prat hte pra ai. Masha gaw prat langai hpang langai galai pra ai baw re. (41) Hkrawng ai kaba hkang kaji. Gumhkawng gaw gumhkawng nna gaja wa ai gaw hpa n nga. ( 42) Ga tsan ai gaw na, nra tsan ai gaw wa. Law law shaga ai hta na gaja ai hpe she mai madat ai. (43) Shani shat sa ai wa, duu hprang waw. Ningpawt kaw na n chye yang manghkang shabyin chye ai. ( 44) Shalap mu yang shalap di. Chye ai wa kaga galaw ai wa kaga n mai ai. Chye ai wa nan matut galaw ra ai. Ga malai hte sharin shaga ai kaw lai nhtawm, maumwi kadun hte sharin shaga ai lam naw nga ai.