Hkritung gawng lawn wa
Hkritung shata langai hte
lahkawng rai wa yang, ma ganu
jan nta masha hte jinghku
jingyu ni hpe tsun dan ai:
E, ya ngai hkritung agawng lawn,
Hkriwang baga pawn wa sai.
Hkritung shaman ai
Nta masha hte jinghku jingyu
ni hkritung shaman ai:
E, rai yang gaw nang a hkritung
aja gaw ring wa u ga!
Hkriwang baga gaw kring wa u
ga lo!
Hkritung moi ai
Shata manga hte kru daram rai
wa jang hkritung sumri dun ai:
Wunli nunggawng,
Brangli dungwang a gawng,
Gatsen ma di dun shingma yan a,
Shadang ninggang lawn,
Shayi shingwoi pawn,
Hkritung aja lawn,
Hkriwang baga pawn,
Hkritung aja let wa,
Hkriwang baga zet wa,
Hkritung aja sumri ngang,
Hkriwang baga sumdai kang,
Shadang ninggang dinghku
shangang ai,
Gawng gumgun sumri dun
shangang,
Shayi shingwoi gumhpai
mahkui dun shakang,
Hkritung aja gumgun sumri hte
tut ngang sai,
Hkriwang baga gumhpai
mahkui kang sai.
Gawng yan ten du
Gatsen ma hkritung agawng lawn,
Hkriwang baga pawn,
Shangai shata du,
Dinghkai ninghtoi gu,
Shangai ginshi yan,
Dinghkai ginshi hpyan,
Shadang ninggang shayu,
Shayi shingwoi gumhpu,
Hkritung aja shayu,
Hkriwang baga gumhpu.
Oh...Gaang yidung maden,
Shingra yidung shachyen na
wa lo!
E, rai sa lo!
Jahtawng htu
Jahtawng htu yang, kaihtum
lahkawng hkyem tawn nna htu ai,
langai gaw jahtawng htu, lahkawng
gaw chyayan htu ai kaw lang ai
Jahtawng gaw la ni htu, chyayan
gaw num ni htu ai, chyayen gaw
ma hte ganu hpe sha myen
ai. Gaji jahtawng htu, gawoi
gaw chyayen htu, jahtawng hte
chyayen hpe gaji yan gawoi
galang ta htu dat ai.
E, ngaishu gaw daini kaw nna galu
alat lang,
Gaba mahkrau krang u ga,
Ganu gawa gaji gawoi hpe bau
maka lu ai kashu rai u ga,
Akro lailik chyang a1,
Pungding laika dang ai,
Hpaji janmau gup ai,
Waji labau manat,
Wawoi htunghking ntat,
Galu wunli wang,
Gaba zinghka shang ai,
Adu ajan tai lauban rai,
Gumhpraw sut su,
Ngamai masin machyi let,
Ya pawt ai kashu rai u ga,
Ngaishu yannu gaw daini kaw
nna liwaw hpuntaw nhkra ai sha,
Chyayen ndai sha in galu gaba
mayat maya zinghka wa u ga lo!
Ma hka pru pru ai
Gatsen ma hkritung gawng lawn,
Hkriwang baga pawn,
Shadang ninggang lun,
Shayi shingwoi gun,
Shangai shata tup,
Zinghkai ninghtoi gu,
Shangai ginshi yan,
Zinghkai ginshi hpyan,
Shadang ninggang shayu,
Shadang ninggang hta,
Shayi shingwoi shayu,
Shayi shingwoi magra,
Hkritung aja shayu,
Hkriwang baga gumhpu,
Wareng gumhtung waw,
Npaw shadai daw,
Shapyan ari gyit,
Npaw shadai daihtik,
Amying wunchyen shamying,
Magyep noigawng shading,
Amying wunchyen gaja jaw,
Magyep noigawng gaja hpaw,
Hkritung aja hta,
Hkriwang baga magra,
Hkra wulung wunli ninggawng a,
Mying wunchyen jaw,
Wumung maku wunan sumri
lun ai,
Nbang lam de ninghkawng ajan
waw yu,
Npan lam de hkakrik katawn woi
htu,
Npan lam de ninghkawng ajan
woi yu,
Nbang lam de hkakrik katawn
woi htu,
Hkra wulung wumung maku
gaw galu alat lang,
Gaba mahkrau hkrang,
Alk laika chye,
Akro hpaji deng,
Akro hpaji gat,
Laijum laika hpaji let,
Pamung paman hpaji gat,
Hkra wulung e gumgun sumri
lun,
Gumhpai mahkui dun,
Shata mali ma mani,
Shata manga ma shaga,
Gaji gawoi mapu lawt,
Ganu nba ten ningbat lawt,
Gawa hpakang sumdaw pawt,
Latsa lamun ning,
Shayi shadang asut lu wun,
Sinpraw sinna aja lu wun nga lu
nga mai,
Mayat maya,
Gumja gumhpra rai pra na sai!
Latsa lamun ning,
Punghpraw punglo in nga,
Gahtan dawng in pra nu ga lo!
Hka pru nbaw tsa wa gun jaw ai
Mayu zanu gumsan hka hku ni e,
Daini anhte damyi shayi,
Da-ma dinghkai shagyi ni,
Shadang ninggang lu hta,
Hkritung aja lu magra sai,
Mayu zanu gumsan hka hku ni
hpe,
Hka pru ntsun ntsing nbaw wa sa
ga ai,
Hkanan ahpang chyaru magyep
tsa hku wa jaw ga ai lo.
Mayu zanu ni shaman dat ya ai
E, damyi ala da-ma gasha ni,
Daini kaw in gaw,
Ndai paten ningbat wai,
Hpakang sumdaw pai,
Hpaten ningbat lawt,
Hpakang sumdaw pawt in,
Ali n ra awaw hpuntaw n hkra ai
sha,
Galu gaba wa nu ga lo!
Alat lang magrau grang,
Wali shadan dang,
Mayu da-ma hku masing
ngang,
Ra masing kang ai kashu rai u
ga lo!
Ma shayu ai
O, ngaishu gaw lo,
Li ningchyi n hkra,
Gajai wunrai n ra u ga lo!
Hpugun ningdip,
Hpalam ningrip n hkra ai,
Galu gaba wa u ga lo!
Maro mara n hkra ai,
Galu gaba wa u ga lo!
Ngaishu galu gaba jang gaw,
Hpaji laika chye,
Hparat ninghkawng gu,
Pamung wunten ja,
Paman mangan nga u ga lo!
Ja-li ja-ga chye,
Hpaga dingga chye,
Ja let rumdung awat wang,
Ja htu mailau ngang,
Ja hkan singgawn kang u ga lo!
Yi sa yi wa manu in,
Ningtam maden chye,
Naitam shachyen chye,
Nhpraw naura wang,
Nhkye naura shang,
Nhpraw asut mung lu,
Nhkye agan mung su,
Wamung bading ing,
Hpaisan wulo hkap ring,
Nbang ka la tup,
Nan ka yi sup,
Lawu lahta gahpu ganau,
Shat jaw ka-htang lawt,
Mayu da-ma makyin jinghku,
Shat ya ka-htang pawt in,
Daining mam hte htaning mam
gayau,
Htaning mam hte hpraning
mam bai jahkau in,
Nsa nnan ganap,
Nai sa hte nai nan bai gahtap,
Wudung wuli asut mung lu,
Siyang dumsu wuhku wula
akan mung su,
Asut numnawng shalun lu ai rai
u ga lo!
Gahtau gumhpraw asut ing,
Hpuntang jahkawng akan hpring,
Ja noi chyinghkyi ing,
Ja hta hpungjut hpring in,
Marai jawdung shangang lu,
Ningrai jawhpawng shakang lu,
Laijum sumri ngang,
Laika sumdai kang,
Pungding awat wang,
Alik laika hkum in,
Magam tingnyang lun lu,
Awang lahkum dung lu,
Gaw wa gaw sa lam hta hpa n ra,
Shi lam sumri ngang,
Hkun lam sumdai kang in,
Shayi agaw ngang,
Shadang akan kang,
Mayat maya gumja gumhpra,
Punghpraw punglo rai,
Ndung wuroi ri in nga u ga lo!
Maran Kumding Ko Shawng
