LAHPU SA HPU NGA MA AI

LAHPU SA HPU NGA MA AI

Wuilen • Fu Hke Na

Shayi Ai Mi Li • Geli A Shin n nga mat sai majaw, gat lawk ting na masha ni lahpu sa hpu nga ma ai. Hpa majaw gat lawk ting na masha ni lahpu sa hpu ma ta nga yang, Ai Mì Li shayi n nga mat ai gaw masat dingsat shadaw langai daw mat ai hte bung nga ai, gat lawk na wa la ni gaw hkungga lara ai myit hte sa ai re, nu num ni law malawng chyawm, Ai Mi Li shayi rawng ai htingnu kata de sa yu mayu ai myit a majaw sa ai ni rai nga ma ai, htingnu wang kata de nampan sun gawn lajang ai shanchyang mayam dingla wa kaw lai nna, shi jan ning ngu na hingnu ndai kaw gadai n shang yu mat sai. Ndai htingnu gaw shawng de grai ahkyak ai gat lam kaw, ahkran hpraw chya kau ai jut mali re hpun hte shachyaw ai htingnu rai nga ai, tsa ban shi jahku sanit shi ning prat na nsam rawng ai nta rai nga ai, din din re numgaw nisa kaw sen sen re gawngngu bai galaw shadun da nhtawn, wanwan re punra ni galaw da ai majaw, yu yang asan rai grai pyaw na zawn rai nga ai. Raitim, ya gaw mawdaw hte basi rin ai jak rung nta ni e abut shanut di gaup kau taw nga ai, moi na arawng satang sari ni hpe gachyi mi pyi n mu hkra galup kau ya sai.

Abyak shalak re htingnu dai a n tsawm sawm gaw mala la a n tsawm rai tim, shi hkrai grai wa mi rai naw shachyen dung nga ai. Ya gaw, Ai Mi Li shayi mung dai sari sadang mying kaba ai hpung ni kaw lawm nang mat wa nu ai, shanhte yawng marau maling shinggrup ai lupba kata kaw yup pyaw nan nga masai, yan hte yan di lup da ai masha dai ni gaw sinna dingdung majan prat na Gyefusin majan chyarang kaw asak apnawng si hkrum mat ai sinna ga na hte dingdung ga na amying ningsang n chye mat ai hpyenla ni a lupwa hkrai rai nga ai. Ai Mi Li naw nga ai ten hta, shi gaw jiwoi hkringhtawng dagraw ai gawng malai hku sha nrai, yawng a masat kumla langai hku mung rai taw nga ai majaw, shawa masha ni hpe nawng e hkan tsang shangun ngun rai nga u ai. 1894 ning na lani mi hta, gat lawk du Sha-taw Lisi wa kawn shanchyang masha ni nshang kaw sumpan n gyit ban ai gat n mai sa ai ngu ai aming jahkrat ai shaloi, Ai Mi Li bang ra ai hkanse ahkun ni ma hkra hpe dawm kau ya sanu ai, aten gaw kawa n nga mat ai shani kawn shi n nga mat ai shani du hkra rai nga ai, ndai gaw gat lawk ting Ai Mi Li hpe ama hkam matut yu wa ai mu magam langai rai taw nga ai.

Ahkun hkanse n bang ra ai lam mung Ai Mi Li n kam bang nna n bang ai n rai nga ai, gat lawk du wa Sha- taw Lisi kawn gaman kaw Ai Mi Li a kawa lai wa sai ten hta, gat lawk asuya rung ni hpe gumhpraw hkoi ya yu ai, asuya ni hka wa ai hku nna ahkun hkanse n bang shangun re ngu tsun shapaw masu u ai. Ga ndai ni mung Sha-taw Lisi a prat lak na masha ni hte shi zawn kung zen ai masha ni she wam tsun, wam galaw shapraw ai hta n-ga, myit htauli htala n nga ai masha ni sha kam nga ai. Hpang e, Sha-taw Lisi hta grau nna myi hpaw kunglet ai ni gat lawk du hte mu htam masha galai galaw ai shaloi, dai zawn dawdan da ai lam hpe myit n hkrum lawm nga masai. Shing rai, laning mi na shaning nnan hta, shanhte Ai Mi Li hpe ahkun bang na shana laika langai shagun ma ai. Shata lahkawng du tim, tsim hte tsam rai jang, rung laika langai bai shagun dat masai, Ai Mi Li hpe rau ai ten hta tara du wa a rung dap de sa wa yu ngu masai. Laban bat mi a hpang, gat lawk du wa nan Ai Mi Li hpe shakram bai ka ya nna, shi a nta de tim sa wa na, shing nrai rung mawdaw hprai dat nna sa tau na ngu u ai, rai yang, shanhte lu la ai gaw maisau pa langai sha rai taw nga ai, grai dingsa mat sai maisau pa kaw grai na hkra tawn kau ai pawngtin tsi hte grai tsawm nna ka ai laye gachyi chyi law ai shakram dai a lachyum gaw shi shinggan n pru mat sai sha nga nhtawm, ahkun hkanse bang shana laika mung bai nhtang matep bang shalawm dat ya ai kaw lai nna, kaga hpa n tsun u ai.

Mu htam masha ni zuphpawng kaga alak mi bai hpaw la rai, Ai Mi Li hpe sa kawan na matu masha hprai shapraw da masai. Chyinghka sa agawk ma ai, matsat ning, shing nrai shi ning a shawng e Ai Mi Li kagam hte galaw ai rai kaw sumla soi sharin ai mu jahkring kau ai kawn, gadai mung chyinghka lam kaba ndai hku n pru shang yu sai. Shanchyang dingla wa shanhte hpe asin nip nip nga ai nhku chyinghka kata de hpaw jashang la sai, nhku kata na lakang hku ntsang de lung wa yang grau nna asin nga nga ai. Ninghpu ninghpaw bat ni ladi de shalut bang wa ai sha nrai, alagyi bambam nga ai hta n-ga, masha nga bat n bat nga ai dawdap de woi du lung wa sai, nhku hkan tawn da ai saboi lahkum ni ali anak re shanhpyi krai gayawp da nga ai, shanchyang dingla wa kahpru zawn di chywi gahtap da ai jan ningga ai hkalap na kaw hpe sa manai hpaw dat ai hte, shanhpyi lahkum na hpyi ni je taw nga ai hpe mu mada dat manu ai, shanhte dung bang wa ai hte, magyi lahkawng maga hku ninghpu alun rai mawng lung wa ra ai, ninghpu ninghpaw ni hkalap hku jinghkyen shang wa ai jan lagaw kata kaw abun rai mawng gayin taw nga ai.

Ja nsam raw mat sai wan wut kra ai wanmang shakum nisa hta Ai Mi Li kawa a hkrang sumla noi tawn nga ai. Ai Mi Li shang wa ai hte, shanhte yawng rawt tsap dat masai. Ai Mi Li a shauje nshang gaw ret daw tawn ai hpunjum zawn kaba apung nga ai, hkum ting achyang re hpun palawng hpun da u ai, ja nayi na gachyi law ai sumri gaw nshang du hkra abya nga ai, dai abya nga ai sumri Ai Mi Li a shingkyit kata de hkrat dumpyang bang taw nga ai, achyang re dawhkrawng hte shi a hkum hpe shadaw da nga u ai, dawhkrawng baw hta sup da ai ja nsam ni mung jau nna hkrat mat sai. Ai Mi Li a hkumgawng shingyang gadun la ai majaw rai nna kun, masha num ni a hkum hta tsawm daw hpum ai rai ni shi a hkum hta gaw chyabung ai she mu nga ai. Yu dat yang, grai na hkra hka chyasi laing kaw brawng taw nga ai mang zawn ahpraw rai bawm wawm kaba nga u ai. Du sa ai manam ni hpa majaw du sa ai lam hpe tsun shadan shaleng dan ai hte, shi a bawng tsaw la ai shabyi machyaw na myiman kaw lahkyawk shang mat wa ai shinggan myisha yan gaw anut gumchya tawn ai nbaw shadung gumdin kaw anyaw bang da ai nra tawng tarin zawn, chyahkring mi ndai de na manam ni a myiman hpe yu yu, chyahkring mi gaw wawra de na manam ni a myiman hpe yu yu rai nga u ai. Ai Mi Li manam ni hpe dung ga n nga ai. Chyinghka lam kaw tsap let agatsi sha tsap nga ai, gat lawk asuya a gawng malai ga shaga ai masha maum maa nga ga tsun ngut ai shaloi she, shi a nshang kaw noi abya makoi rawng nga ai nayi seksak shara ai nsen hpe na dat masai. "Gyefusin shara kaw ngai hpa ahkun n bang ra ai.

Sha- taw Lisi du wa jau nna ngai hpe tsun da yu sai. Shing nrai nanhte gat lawk asuya rung de ka matsing zumhting da ai jahpan sa jep yu rai yang, kaning re mu lam re hpe asan sha chye lu na re." Ngu tsun jahkoi kau nu ai. "Anhte matsing zumhting laika ni hta sawk jep yu sai, Ai Mi Li shayi, anhte gaw asuya rung na ni rai ga ai. Tara du wa nan sen htu nna shagun dat ai shana laika nang n hkap mu la yu ai kun?" "Lu la yu ai, ngai shana laika langai lu la yu ai," Ai Mi Li matut nna tsun ai, "Shi madu kawn tara du ngu shamying la ai nhten... Gyefusin kaw ngai ahkun hpa n bang ra nngai." "Ahkun bang ai jahpan laika hta shing nga tsun shadan da ai lam n nga ai, nang chye na ai kun? Anhte gaw tara kaw hkan nna... 99 "Nanhte Sha-taw Lisi du wa hpe sa tam masu, ngai Gyefusin kaw hpa ahkun n bang ra nngai." "Raitim, shayi Ai Mi Li..." "Nanhte du wa Sha-taw Lisi hpe sa tam masu." (Sha- taw Lisi du wa n nga mat ai shi jan ning rai mat sai.) "Ngai Gyefusin kaw hpa ahkun n bang ra nngai. Htaw Bi!" Nga tsun ai hte shanchyang dingla pru wa ra ai. "Ndai manam ni hpe sa sa dat u." Ai Mi Li gaw masha dai ni hpe hpa kaga n chye tsun ai nhtang wa mat shangun nu ai, 30 ning a shawng e ahpu ahkang nga ai bat manam mawng pru wa ai shaloi, kawa ban ni hpe ninghkap dang kau ai zawn dang kau nu ai.

Dai gaw kawa n nga mat ai hpang lahkawng ning a htawm, anhte yawng shi hte chye hkungran hkat na re ngu ai masha dai(Shi a sumtsaw wa) shi hpe kabai kau da ai hpang gade nna ai ten hta rai nga ai. Kawa si ai htawm, Ai Mi Li shinggan de nau n pru hkawm mat u ai, grau nna shi a sumtsaw wa kau tawn da ai hpang kawn gat lawk na masha ni shi hpe n mu mada mat masai. Hpawmi nkau gaw shi hpe sa kawan na matu sa wa ai re, chyinghka n hkap hpaw la ai hkrum manu ai. Shi nga ai grupyin hta masha nga ai shingran gaw shanchyang wa ka-tawng langai hpai rai pru pru shang shang re dai rai sai ga re, dai shaloi shanchyang wa shabrang naw rai u ai. Gat lawk na hpawmi ni gaw: "La sha rai jang, kaning re la raitim, shat gawk hpe asan awan chye lajang na she shadu nga ma ai." Nga jawm tsun gajai nga ma ai. Shing rai, rai mi yat ai zawn nga bat manam she manam wa ai shaloi raitim, gadai hpa zawn n nawn nga ma ai. Htingbu na nu num langai jan gaw gat lawk na asak 80 jan rai sai tara du wa Sidifun Si kaw ashi sa shawk nga u ai. Sidifun Si gaw: "Myitsu jan e, mu ndai a lam hta ngai kaning wa sa chye di u ga ngu nna me?" Ngu tsun sai.

"Waw, shi hpe ahpu ahkang nga ai bat dai lau jahkoi kau ngu shana u," nga nna nu num jan gaw: "Tara kaw dawdan da ai n rai i taw? " Ngu tara du wa hpe san shati nga nu ai. "Dai ram chyawm n rai ra ai," tara du wa gaw: "Ngai ngu yang, shi woi nga ai shanchyang wa wang hkan lapu shing nrai, yu langai dang adup sat tawn jaw ai. Shanchyang wa hpe sa tsun shadum na nngai." Ngu sanu ai. Hpang shani, marai lahkawng ashi bai sa shawk ra ai, la langai gaw si mani nga ai manawng hte: "Tara du wa e, anhte wumang zawn nga manam ai bat ndai hpe san laman rai ra saga ai, ngai gaw shayi Ai Mi Li hpe satsang na gachyi mi pyi n kam ai hta n-ga, wam mung n wam satsang ai, raitim, anhte ladat mi gaw shaw ra saga ai." Ngu tsun u ai. Dai shana jang gat lawk na myitsu salang masum hte mu htam masha ramma langai rai bawngban zuphpawng jawm hpaw masai. "Mu ndai aloi sha re," ramma wa tsun ai: "Dawdan tawn ai ten hta, shi hpe nta sanseng atsawm galaw shangun jang rai sai, n galaw jang..." "Myitrum wa e, ganang mai na?" Tara du Sidifun Si: "Nang masha ni a myiman pyi n ngam hkra, nang a nta kaw ahpu ahkang nga ai bat manam nga ai ngu sa tsun gwi ai kun?" Ngu hta dat nu ai.

Shing rai, hpang shana yuptung e, marai mali Ai Mi Li a wang kata de man gale lanyan shang wa masai, lagut ndu zawn marung gaw kungkung rai nta hpe garen shinggrup hkawm nga masai, nta shakum lagaw hte ga nhkun mahka hkan ladi hte aja wa marawp manam hkawm nga sai, langai mi gaw gahpa kaw hpye da ai nhpye kata na rai lama mi la shapraw nna, nli gat ai zawn rai bai gat hkawm nga u ai. Shanhte gaw ga nhkun chyinghka hpaw malawng kau rai, kata de hte nta shakum lagaw gruprup yinyin shara shagu jahkwi shingmun hkan gat bun da sai. Wang shingdu maga de bai nhtang pru wa ai shaloi, shang wa ai shaloi asin re hkalap langai mi hta wan tu taw nga sai, Ai Mi Li nhku kata kaw dung nga ai, wanpu gaw shi a shingdu kaw rai nna, shamu shamawt n rai ai apreng re hkumhkrang hpe yu dat yang, shadun tawn ai hkrang sumla zawn rai nga ai. Shanhte wang kata na tsingdu pa hku yat sha lanyan pru mat wa nhtawm, gat lam na hkwishu hpun kata de hkawm shang mat wa masai. Laban bat lahkawng a hpang, manam ai bat hkoi mat sai. Gat lawk na masha ni Ai Mi Li a gahkai Wwiya Hte sai hten mana bu mat ai lam hpe myit dum dat ai shaloi she Ai Mi Li a matu nga yak bang wa ya masai, Geli A Shin nta ni madu hkrai madu nau rai dum, madu a nga pra madang hpe n myit yu ai, Ai Mi Li sha nrai, shi hte maren re num sha ni mung kaning re shabrang ni hpe rai tim myit n shang sha ma ai.

Shing rai, anhte galoi mung ndai nta na masha ni hpe sumla kata na masha she ngu ga ai: Gawng shingyan siksik rai nna palawng ahpraw re hpun da ai Ai Mi Li kawa a hpang kaw tsap taw nga ai, shawng kaw tsap ai kawa gaw lagaw lakrang tawn nhtawm, dawhkrawng langai hkrawng da, nhku maga hpaw malang tawn ai chyinghka shanwa a shingna gaang kaw chya rai taw nga ai. Ai Mi Li nta ni myit ana lu ai lam teng ai hpe chye ai hpang, Ai Mi Li sak 30 shang wa tim num rai n wa ai ten hta, anhte gadai mung kabu ai myit n rawng ga ai, lama wa teng sha ginjang man kaw nga ai rai yang, Ai Mi Li ginjang dai hpe shalai kau hkra gaw n chye rai na re. Tsun ma yang, kawa si mat ai hpang, shi hpe ngam da ya ai sutgan gaw htingnu dai sha re da nga jang, masha ni loi chyawm kabu nga ma ai, hpa majaw kabu a ta? Shanhte Ai Mi Li hpe matsan dum ai lam mai madun nna rai nga ai. Shi hkrai garen gari, matsan tsinyam hkrum tim gadai hpe n chye tsun dan ai kawn, masha a nga pra mahkrum madup machyim hpe chye nu ai. Ya daini shi gumhpraw fun mi law jat jang kabu chye, fun mi yawm mat yang myit ru myit tsang ai lam hpe hkam sha lu sanu ai.

Kawa si mat ai hpang shani, nu num ni yawng nta de sa kawan let, shi hpe garum shingtau rai na hkyem ma ai, ndai gaw anhte gat lawk na htung rai nga ai. Rai yang, Ai Mi Li shanhte hpe chyinghka lam kaw hkap tau la ai hkrum masai, buhpun palawng mung mayu laban hpun ai baw hpun da rai, yawn ai myiman nsam gachyi mi pyi n rawng nga ai. Ai Mi Li shanhte hpe kawa n si ai ngu hkap tsun dan u ai. Lahkawng masum ya du hkra, hpung sara ni mi sa tsun tsun, tsi sara ni mi sa tsun tsun, kawa n si ai hkrai chyu nga nga u ai. Gat lawk na masha ni tara rung de sa shawk na hkyem bang wa ai shaloi she Ai Mi Li hpa n fsun mat nna, kawa hpe alawan wan sa hpai lup kau ya manu ai. Dai shaloi anhte Ai Mi Li hpe sai hten mana bu ai zawn rai n nawn ga ai. Nau yawn nna madu a masin hpe n lu dip da ai majaw byin ai re ngu myit la ga ai. Anhte shi a kawa brang ram ni hpe yawng hkan shachyut jahprawng kau ya ai hpe naw matsing nga ai hte maren, daini shi hpa sha pyi n lu mat sai hpe mung mu chye nga ga ai, shing rai, masha ni nawng e galaw ai zawn, Ai Mi Li mung shi a lu malu yawng gashun mat wa ya ai masha dai hpe chyitchyit hkan gang tawn da nu ai. Ai Mi Li grai na hkra machyi mat ai. Shi hpe bai mu ai shaloi kara zen gadun kau nu ai, yu dat yang mahkawn kasha zawn rai nga ai hta n-ga, nawku jawng na aka akawk re hkalap pat kaw kap ai lamu shayi hte shai ai gaw, Ai Mi Li a nsam loi yawn yawn rai ai nsam sha rai nga ai.

Uphkang rung asuya kawn gat lawk na masha lai lam hku pyilat ga nyep na matu gadi laika hta sen htu kau sai, Ai Mi Li a kawa n nga mat ai dai shaning na yi-nam ta hta galaw hpang na hku masing jahkrat da sai. Loi ya mi re hte lam galaw rung dap ni, mu galaw ai shanchyang masha, lawze, jak rai sumpum sumpam hte du hkrat wa mara ai, mu woi galaw ai ningbaw wa gaw hkumhkrang galu kaba, hpraw nsam achyang nana re dingdung ga na masha rai nga ai, ga shaga mahku nsen grai kaba nna, shinggan myisha yan gaw shingyaw myiman nsam hta loi sansan rai nga ai, yu dat yang marim mangam rai n-gun marai n ja tim ja na zawn re He-maw •Baw Lung ngu ai wa re. Gat lawk hkan na ma wunawng ni gaw shi shanchyang masha ni hpe kinsha lasha nga matsa ai ga hpe hkan madat let hpang kaw hkan nang nga ai, mu galaw ai shanchyang masha ni gaw santeng zauhtu sharawt dat, shayu dat re kaw hkan nna mu galaw mahkawn hkawn nga ma ai. Gade nna yang gat lawk ting na masha ni shi hpe chye mat sai. Galoi ten mi rai rai, shawa dabang hkan mani haha ai nsen sha na ai shara kaw gaw He-maw •Baw Lung lawm nga ai. Gade nna ai hpang, laban bat shana de shagu Ai Mi Li hte He-maw •Baw Lung gaw gumra leng sha jawn kau rai shinggan de pru hkawm chyai mat wa wa re hpe mu saga ai. Ahtoi re gumra leng hte hkye hkye re laring gumra a nsam grai nan htuk nga ai re.

Nnan daw e, hpa wa mi nga tim Ai Mi Li myit manoi na shara langai lu sai ngu anhte mung yu kabu lawm nga saga ai, rai yang, nu num ni yawng gaw: "Geli A Shin nta na masha ni kaning nga tim, lani mi galaw lani mi sha re dingdung ga na masha hpe gaw n chye ra na re." Nga tsun ma ai, bai sak loi kaba sai ni gaw yawn hkyen ai wa mi rai tim, nga sat nga sa madang tsaw ai ni hpe madu a "Sari sadang rawn lai" gaw n chye sa malap kau shangun na re nga tsun ai mung nga nga ai, n-gup kaw she "Sari sadang rawn lai" ngu ntsun dam tim, shanhte gaw: "Ai Mi Li matsan mayan she rai sai, shi a jinghku jingyu ni shi hpe kawan gatsan rai yang mai na wa." Nga tsun nga sai. Yala pa-ma kaw shi a jinghku ni nga ai raitim, Wwiya Hte mana gumgai jan si ai shaloi, gumgai jan a sutgan a majaw, kawa shanhte hte ga- law myit n pyaw hkat ai kawn, nta lahkawng matut hkat ai lam n nga mat sai. Shing rai, Ai Mi Li a kawa si ai shani lawu lahta nta masha ni gadai mung n pru wa ma ai. Dingla ni: "Matsan mayan re Ai Mi Li."hpe tsun du ai hte, baw hkrum hkrum rai, ta hte n-gup kaw magum kau rai shanhte shada: "Nang ngu yang, teng sha re kun?" "She rai le, n teng yang hpa naw rai na? ..." Nga jawm gadum dum rai nga ma ai. Laban shana de gat lam hku gumra lagaw aduk nga hkawm lai mat wa ai shaloi, jan shinggang sumpan hte shinggang kau ai gumra leng kata na lai buhpun palawng sesa shara ai nsen du hkra: "Matsan mayan re Ai Mi Li." nga ai zawn she nga nga ai.

Ai Mi Li lam hkawm yang, galoi mung gumrawng la ai zawn rai baw hpe shadap tawn let hkawm hkawm rai u ai, anhte shi hpe byak mat sai ngu ai ten hta rai tim, nhka sha shadap kau rai hkrai hkawm hkawm rai ai, shawoi na hta grau nna masha ni hpe shi gaw lu sut lu su nta na masha re ngu ai kumla hpe chye shangun mayu ai zawn re hta n-ga, mayu maya re masha ni hte ganawn tim, shi a sari sadang n yawm, rawn laikyang n lai ai ngu ai hpe yawng e shadan shaleng dan ai zawn mung rai nga nu ai. Ga shadawn: Ai Mi Li yu tsi mari ai lam, masha shana sat ai gung tsi mari ai lam ni, ndai gaw masha ni shi hpe: "Matsan mayan re Ai Mi Li."Nga tsun gajai wa ai hpang, laning mi jan e, shi a lawu lahta gana yan shi hpe wa kawan ai shaloi rai nga ai. "Ngai gung tsi loi mari mayu ai." Ai Mi Li tsi seng na tsi dut ai wa hpe tsun u ai. Dai shaloi shi sak 30 dang rai sai tim, gahpa ahpa leplep, nshang keke rai, yu dat yang mahkawn kasha zawn naw rai nga ai, majoi shawoi na hta loi lasi mat ai chyu sha rai nga ai, raidum la ai zawn re shinggan myisha yan gaw achyang lele rai, myiman na shan hpe na labying lahkawng maga hte myihkyawk lapran kaw jen gang da nga ai, shing re myiman nsam gaw myit dat yu tim, panglai langchyi sin ai masha ni a nsam she rai nga ai. "Ngai gung tsi loi mari na." Ai Mi Li galang bai tsun dat u ai. "E law, Ai Mi Li. Kaning re baw mari na? Yu shana sat ai baw zawn re kun? Shing nrai..." "Hpa baw hpan ngai n gawn ai, nanhte a seng kaw dut ai gung grau gaja ai baw mari na." Tsi dut wa galang ta tsi sumpum mi a mying tsun shapraw dat let: "Shanhte hpa hpe mung lu shana sat ai, magwi hpe pyi lu shana sat ai.

Raitim, nang ra mayu ai tsi gaw..." "Gung," Ai Mi Li gaw: "Masha i lu shana sat a?" Nga san dat nu ai. "Gung? Chye na sai, Ai Mi Li shayi. Raitim nang ra ai gaw... " "Ngai ra ai gaw gung law!" Tsi dut ai wa Ai Mi Li hpe galang praw rai yu dat jang, Ai Mi Li mung hkum hpe jan rai hkra galaw tsap la nna, myiman gaw gang shapreng tawn ai dawnghkawn zawn di tsi dut ai wa hpe yu azi da nga sai. "AWh, awh, nga ai nga ai," tsi dut ai wa gaw: "Lama ndai baw gung ra yang, tara kaw masat dawdan da ai hte maren, kaning re kaw lang na tsun shadan laika ka ra ai." Ngu tsun dat nu ai. Tsi dut ai wa a myi lahkawng hte hkrum rai na matu, Ai Mi Li shi a du hpe shingdu de loi nga di la hkra rai, yu shati taw nga nu ai, tsi dut ai wa shi a myisha hpe dawm la kau ai htawm, kata de gung shang makai mat a ai ta n pru wa sai, jahtum e, gung makai sa la ya ai gaw tsi seng kaw rai sa ai shanchyang masha wa rai nga ai. Nta du wa ai hpang, Ai Mi Li tsi makai hpyan yu ai shaloi, nra hkrihkraw hkrai re masha sumla hkrang kap ai maisau kawk hta: "Yu tsi" Ngu ka shakap da nga ai. Hpang shani, anhte yawng: "Ai Mi Li na si hkyem sai." Ngu ai sha n rai, na si gwi lu yang gaw rai sai ngu pyi tsun kau ga ai. Nambat langai lang shi He-maw •Baw Lung hte rau nga ai hpe mu ai shaloi, anhte ni: "Shi num wa hkyem sai." Ngu myit la ga ai, rai yang, hpang e "Ai Mì Li kawn He-maw •Baw Lung hpe myit hkawn myit hprang hkra naw tsun shadum ra ai." Nga bai tsun pru wa mara ai.

Hpa majaw nga yang, He-maw • Baw Lung nan shi gaw la ni hte she ganawn kam ai nga ai sha nrai, Mi Lu tsa seng kaw ramma ni hte tsa lu ai shaloi mung, shi dinghku shang sha na myit n lawm ai nga tsun ai lam hpe yawng chye da nga ai. Hpang hkan e, laban shana de Ai Mi Li reng reng sha rai baw hpe tsaw tsaw shadap kau, He-maw• Baw Lung gaw gupchyawp nhkyeng nhkyeng di chyawp tawn, n-gup kaw se-kya malut makrang da, ahtoi re ta laraw sha dagraw kau rai gumra gau ai sumri hte lasik lang kau rai, shan lahkawng grai tsawm ai gumra leng kaw jawn let pru hkawm mat wa shagu, anhte yawng gaw: "Ai Mi Li matsan mayan she rai sai." Hkrai hkan ngu ga ai. Matut nna nu num ni gaw gat lawk na mying jahten ai, ramma ni len la pa sha chye wa ai nga jawm tsun garu nga masai, wa la ni chyawm hpa n tsun ai gatsi nga nga ma ai, rai yang jahtum e nu num ni hpung sara wa hpe: Ai Mi Li ta ni mung hpung masha re, she naw sa tsun shadum su, ngu sa shadut dat masai. Hpung sara wa Ai Mi Li hte sa hkrum shaga ai lam hpe gachyi mi mung n wa tsun shapraw yu ai nga tim, gahtap nna sa na hpe myit gadawng lung dum mat nu ai. Hpang na laban hta, Ai Mi Li gumra leng hte gat lam kaw bai hkawm pru ai htawm shani, hpung sara wa a madu jan gaw Yala pa- ma kaw nga ai Ai Mi Li a lawu lahta gana yan hpe shakram laika ka shagun dat nu ai.

Ai Mi Li lawu lahta jinghku naw lu ai hpe chye ai kawn, anhte gaw mu dai kaning she rai wa na kun ngu yu nga saga ai. Nan daw e hpa nga ain na ai, matut nna shan hkungran hkyem ai shiga na chye lu saga ai. Ai Mi Li rung rai dut ai gumhpraw seng de sa nna, gumpraw hte galaw ai la ni a man myit lagaw shin jarung ni sa mari ai sha nrai, rung rai shagu hta "He • Baw" ngu ai laika hkum tek shakap shangun ai nga ma ai. Lahkawng ya a hpang masha ni anhte hpe Ai Mi Li la buhpun palawng sa mari ai shaloi, shana hpun yup ai baw palawng du hkra mari ai nga bai tsun pru wa mara ai. Shing rai, anhte gaw Ai Mi Li yan He- maw• Baw Lung hkungran sai ngu myit hta grai kabu nga saga ai, kabu ai lam gaw Ai Mi Li a lawu lahta gana yan grau nna Geli A Shin nta na rusai rawnlai rawng ai hpe mu ai majaw rai nga ai. Gat lam na pyilat ga nyep ngut ai grai na ai hpang, He-maw •Baw Lung rai mat wa ai shaloi, anhte gachyi mi pyi n gajawng ai, kabu gara rai gadai n hkan sa dat ai majaw chyawm, myit hta loi gawm gawm ngu ga ai. Raitim, anhte yawng shi ndai lang hkawm mat wa ai gaw Ai Mi Li hpe hkungran la na matu ra ai mu lajang mat wa ai re, shing nrai, Ai Mi Li hpe shi a lawu lahta gana yan e hkawm mat wa shangun na ginjang tam ya ai re ngu myit nga saga ai (Dai ten hta anhte yawng gaw Ai Mi Li a matu sha myit ya nna, gana yan hpe lawan rai mat wa mu ngu shachyut kau ya mayu nga saga ai) myit ai hte raw, laban bat mi a hpang gana yan wa mat masai.

Bai nna, anhte myit mada da ai hte maren, He-maw • Baw Lung mung gat lawk de bai nhang wa ra ai. Lana de mi htingbu ni nan shanchyang wa shat gawk chyinghka hpaw nna He- maw • Baw Lung hpe shang wa shangun ai mu ma ai. Ndai gaw anhte hpang jahtum ngu na He-maw • Baw Lung hpe mu ai rai sai. Ai Mi Li hpe mung grai na hkra n mu yu saga ai. Shanchyang wa ka- tawng hpai rai pru pru shang shang raitim, chyinghka kaba nawng e la da nga ai. Galang lang Ai Mi Li a shingna hkalap hku lai wa ai hpe mu ai sha re, jahkwi sa lagu gat ai shana masha ni mu ai shaloi na zawn rai nga ai, teng sha tsun ga nga yang shata kru ngu na ting, Ai Mi Li shinggan de n pru hkawm yu mat sai. Mau na lam hpa n nga ai, shawng de kawa naw nga ai shaloi e mung, ya n ya Ai Mi Li a sumtsaw sumra lam hta chyu hkan jehpre jahten sharun kau ya ya rai u ai, ladu lanang lai, n hkru la ai laikyang dai ni, ya du hkra rai n hkoi hkraw ai zawn naw rai nga ai. Anhte Ai Mi Li hpe bai mu ai shaloi hpum mat ai hta n-ga, kara mung ahpraw rai mut mat sai. Hpang hkan e, laning hte laning grau grau hpraw jat mat wa sai, makhpyik shadung hte jum gayau tawn ai zawn rai hkra mut ai kara ni gaw, sak 74 shaning machyi si mat ai shani du tim, amut rai grai naw law nga ai.

Ai Mi Li sak mali shi ning dang re shaloi, kru sanit ning daram gaw jawngma ni hpe nta e shawun kaw sumla soi sharin u ai, shi nta npu na gawk langai mi seng lajang la nna jawng gawk galaw u ai, Sha-taw Lisi a prat na gashu kasha ni yawng hpe Ai Mi Li kaw sumla sa soi sharin shangun ma ai, htep lahti kangka ai hte ahkying aten man man sharin ya ai majaw, nawku jawng de ma ni hpe sa sa ai shaloi na zawn, alu kawk kaw sa bang na gumhpraw tum gyaw lahkawng e fun manga du hkra jaw dat ai ni mung maren sha rai nga ai. Dai ten hta Ai Mi Li ahkun hkanse gumhpraw n bang ra u ai. Hpang hkan, prat lak galai wa ai kawn, gat lawk na du salang mu htam masha ni kaga bai galai wa sai hte maren, sumla soi sharin ai jawngma ni mung kaba mat wa sai majaw, gaungwi ngwi bra ma sai, masha ni mung madu a ma ni hpe sumla soi kawk, hkedan hte sumla hkrang zen lang hkra rai Ai Mi Li kaw sumla n sa soi sharin shangun mat sai. Hpang jahtum na jawngma rai mat wa ai htawm, shinggan na chyinghka gan la kau ai sha nrai, prat tup la kau nu ai. Gat lawk ting shakram laika shagun ai shaloi gumhpraw n pru ra mat ai hpang, Ai Mi Li chyu sha chyinghka lam kaw nambat kap ai hpri pye hte zadek kawk langai dit shakap na lam hpe ninghkap u ai. Kaning ngu tsun tim, agatsi sha nga nga ai. Lani hte lani lai, shata mi lai, laning mi lai, anhte yu nga ninglen shanchyang wa a kara pyi hpraw mat ai sha nrai, marung mung htingku mat tim, shani shagu ka-tawng hpai nna pru pru shang shang naw rai nga nu ai.

Shaning shagu na shata 12 hta anhte Ai Mi Li hpe ahkun bang na shana laika shagun dat dat rai ga ai, raitim laban bat mi a hpang zadek rung kawn, masha n nga ai nga bai nhang pru wa wa rai ra ai. Loi ya mi n rai yang, kata htap na hkalap kawn shi a shingna hpe mu mu rai ga ai, shingna dai gaw nat ra kaw dawk shadun tawn ai hpara zawn rai nga ai, shi anhte hpe yu taw nga ai mung n chye ai, gara hku nga tim ntsa htap na chyinghka shachyip kau sam nu ai. Ai Mi Li gaw ndai zawn madu hkrai madu a nga sa madang hpe tsaw dum, raidum let hpawng shingra hte matut mahkai n nga ai agatsi sha, myit ru myit yak tim shi hkrai chyum sha rai prat mi hpe nga shalai kau sanu ai. Ai Mi Li gaw ninghpu ninghpaw hkrai hprwi, gatsi gatsang lagyi laga nga ai htingnu kata kaw machyi hkrum nga sai, shi hpe yu lajang ai masha mung ali ahti re shanchyang dingla wa hkrai sha rai nga ai. Anhte shi machyi ai n chye ga ai, shanchyang dingla wa hpe san na mung lagawn mat saga ai sha nrai, dingla dai gadai hte hkrum tim ga n shaga u ai, Ai Mi Li hpe mung ga shaga na zawn n nawn nngai, shanchyang dingla nawng e ga n shaga ai majaw, mayu pyi gasa mat sanu ai. Shing rai, Ai Mi Li gaw nta htap kata na gawk langai mi hta machyi si taw nga nu ai.

Ali nak nak re nbu hpun ku kaw sut naw grang da nga ai, amut re kara kata na bunghkum gaw gade ning hku hkum kau sai sha nrai, jan kaw n sa lam yu ai majaw, ahkye chyapchyap she rai mat sai. Shawng shang wa ai nu num ni hpe shanchyang dingla wa npan na chyinghka lam kaw hkap tau la u ai, nu num ni ga yat yat sha gahte let, myisai hte shara shagu mada yu nga masai. Shanchyang dingla wa yin re hte n mu mat sai, nhku kawn nbang chyinghka lam hku pru mat wa ai ta, mat mat sai. Ai Mi Li a lawu lahta gana yan du wa ai hpang shani jang makoi mayang poi galaw bang wa sai, gat lawk ting na masha ni gaw numri pan mara tawn ai Ai Mi Li a moimang hpe sa yu nga ma ai. Moimang tawn ai a ntsa maga shakum hta lama mi myit sumru ai zawn re Ai Mi Li a kawa a datbung noi da nga ai, nu num ni gachyaw gachya nga let masha a si hkrung si htan lam hpe tsun chyai nga ai, bai nna sak loi kaba sai dingla nkau mi rai jang, sinna maga jinghku hpyen palawng zeng sha hpun shakya lang kau rai, ndaw hkan, tsingdu pa hkan Ai Mi Li a prat hpe tsun gajai ai gaw shanhte hte pan mi na masha she shadu kau ai zawn nga hkra jahta nga ma ai, Ai Mi Li hte ginsup rau pyi ka yu ai sha nrai, sumtsaw ga pyi hpyi yu ai zawn she nawn wa nga ma ai, dingla dai ni sawnhkum nambat tsang tsaw magang kaba magang re hpe malap kau nga ai, ndai gaw dingla ni a kyang nan rai sai, shanhte yu wa yang, shawng de na sak prat gaw hkawm magang gaji magang re lam n rai ai sha, dam lada ai shung ta e pyi hpa wa-hkye hkra ai lam n nga ai tsit lali ai prangdan yang hku she yu nga ai, ndai shi ning laman hta sha she du ke palin zawn, shanhte hpe lai wa sai ten ni hte tsan gang jahka kau shangun nga ai.

Nisa htap na gawk langai mi gaw 40 ning dang gadai n shang yu sai hpe chye saga ai, nhka mala hpaw kau nna she mai shang wa nga ai. Ai Mi Li a moimang hta kau ai hpang she shanhte chyinghka sa hpaw yu masai. Chyinghka galang ta hpawng di mala hpaw dat ai hte, nhku ting na ninghpu hpe ganan shamawng dat sai. Num nnan gawk zawn di mawn da ai yup gawk dai lupwa nhkun zawn nga agatsi gatsang nga nga ai, hkalap na jan shingga ai numri pan nsam sumpan mung hpoi mat sai hta n-ga, numri pan nsam sam ai wanpu ntsa na wanpu dagraw, shakya saboi ni yawng amut amat rai mut dung nga ai, grai grai tsawm nna shagan hkyi hte galaw ai rai ni hpe ayan yan di tawn da nga ai, gumhpraw sup ai hka shin man myit jarung na gumhpraw nsam ni n mu mat ai sha nrai, tawk shakap da ai laika kanu mying sumla ni du hkra atsawm n mu mat sai. Rai mara tawn ai shara kaw, ya sha raw tawn ai zawn re du kawlin pyi ja ja re palawng langai hte dugyit taw nga ai, sa hta lang dat ai hte, palawng hte dugyit taw ai shara kaw gawgaw re praw de na shata jan sumla zawn re hka hka nga sai.

Atsawm sha gahtap da ai labu palawng lahkum kaw naw mara nga ai, zauhkai zum mi hte kabai kau sai mawza mung lahkum lagaw kata kaw garen gari rai azim sha taw nga ai. La dai ku kaw galeng taw nga ai. Anhte grai na hkra man kaw shan n kap ai wa hkrai nyin nyin rawng rawng re moimang nra hkrihkraw hpe yu tsap nga saga ai. Galeng taw nga ai moimang dai, ta lahkawng hte lama mi hpe ahpum dat hkyem ai zawn rai nga ai, rai yang, shi hpe sumtsaw sumra hta grau nna ngangkang ai, sumtsaw e zingri ai, htani htana hta grau grin ai yup nan ngu ai e dang kau sanu ai. Shi ngam da ai hkum shan ni gaw tsam malawng mat ai kata palawng hte shi galeng nga ai ku kaw yat kap mat sai. Shi a hkum hte makau hkan na bunghkum ni hta gade ning ting na ninghpu ni bum nga ai. Hpang e she anhte makau na bunghkum hta masha yup yu ai hka hka ai hpe mu ga ai. Anhte hpung kaw na masha langai wa bunghkum nisa kaw na rai lama mi hta lang dat nu ai, atsawm yu dat yang, mut mut nga ai bat ni ladi de shalut bang wa sai, dai gaw amut re kara singtsin mi rai nga ai.

Gale ai: Bawk Tawng