BAREN SUMLA SANGLANG AI LAM

BAREN SUMLA SANGLANG AI LAM

PUNGGA JA LI

Asuya manau shadung hta baren sumla lung ai hte seng nna ntsa lam sanglang ai lam galaw sai. Raitim mung, mung masha nkau mi n sanglang ai zawn naw nga ai majaw gahtap sanglang dan ai. Asuya gaw htunghking kawmiti hpe manau shadung ka na lit jaw sai. Htunghking kawmiti sha nrai, manau shatai shabyin kawmiti kaw na lit jaw ai hte ningmu jut shagu hku sawk gyin nna bai tang ai shaloi hkap la sai majaw, Asuya manau shadung hta baren sumla shalun da sai. Hkrisatan makam masham ningnu hku yu ai lam, anhte amyu gaw tsa lam shadang ganoi tup hkra Hkrisatan makam masham hpe hkap la saga ai majaw, Hkrisatan makam masham hku mung htap htuk ra na rai nga ai. Mawshe a prat hta Isarael amyu ni galang mi lapu e gawa(achye) nna yawng machyi jawng ai shaloi, Mawshe gaw lapu sumla galaw nhtawm, machyi mai mayu ai ni hpe sumla hpe sharawt mada yu mu ngu tsun ai. Machyi masha nkau mi gaw lapu achye nna machyi nga yang, lapu sumla bai yu shangun ai ngu n sharawt mada ma ai. Dai ni gaw machyi n mai ai. Nkau mi gaw shakut nna lapu sumla hpe sharawt mada ai lam gaw Mawshe a ga pe kam ai lam rai nga ai. Mawshe a ga hpe kam ai gaw Yehawwa hpe kam ai lam re. Dai ni Wunpawng sha ni lam shagu hta machyi hkrum sai, lapu sumla hpe sharawt mada yu ra sai. Lahta e tsun sai hte maren lapu sumla hpe sharawt mada ai gaw Karai Kasang hpe mada ai ngu mayu ai.

Ndai ten hta ta tut hku tsun ga nga yang, ningbaw ningla ni tinang a lit bungli dinghku a matu shawng de na hta grau nna akyu hpyi wa sai. Dik nna ningbaw gaba tang ai mung shawng de gaw Shanglawt rung kaw sha galaw ai. Ya gaw akyu hpyi hpawng kaw nan ningbaw tang sai. Ga shaka nnan hta Madu Yesu tsun ai, lapu zawn hpaji rawng mu nga ai, lapu hpe sara tang nga ai, shi hpe jinghku hku na matu n rai, shi a hpaji hpe lagu na matu tsun ai. Ndai ten gaw n hkru nga ai rai nna grai hpaji rawng ra ai. Yu maya mung, yu maya masha hku hpaji rawng ra sai. Salang mung salang hku hpaji rawng ra ai. Lapran tsang masha mung lapran tsang hku hpaji rawng ra ai. Ningbaw ni mung ningbaw hku rawng ra ai. Wunhpung wuhpawng mung wuhpung wuhpawng hku hpaji rawng ra ai. Hyen masa, mung masa, sut masa, ganawn mazum masa yawng kaw hpaji shaw ra sai, gara hku hpaji rawng na nga yang, Yesu tsun ai lapu zawn rawng na matu tsun ai. Dai kumla hku manau shadung kaw lapu shalun sai. Daru magam kringhtawng hku lu ai Wunpawng sha ni a daru magam gaw Ninggawn wa Magam kaw na lu ai re. Ninggawn Magam gaw baren num la ai shani kaw nna baren sumla lu wa ai. Moi na shadip jahpang du ni baren sumla shalun nna daru magam lang hkrat wa ai hkringhtawng hpe Shanglawt asuya ni shachyaw ai ngu mayu ai.

Shanglawt asuya a daru magam gaw alak mi gyin la ai n re, moi na daru magam hpe shachyaw ai she ngu ai hku Shanglawt asuya a shadung kaw baren shalun sai. Mung masha ni hpe aming jaw matsun n nga ai, mung masha ni a shadung gaw tingnang ra ai hku ka lu na ahkang nga ai. Asuya shadung gaw shi hte shi rai nga ai. Htunghking masa hku yu ai, nhtu sumla gaw Mahtum Mahta Mahtum Kaw Tsalat hpe la ai shani mayu ni e kungdawn ai nhtu re. Dai ni du hkra nhtu hpe masat dingsat hku mayu hpe hkungga ai hku lang nga ga ai. Numraw ma Ja Bang hpe la ai shani kaw na mayu kungdawn gaw baren sumla rai nga ai. Mayu hpe hkungga ai htung lu ga ai majaw, nhtu gaw Mahtum Mahta kungdawn, baren gaw lapu amyu a kungdawn hku lang ai rai. Labau ningnu hku lang ai labau gaba Maran Brang Di tsun ai, Mawnggawliya dinghku yang, lapu kumla lang ai da. Anhte mung n law amyu raitim, rusai galu ai kumla hku lapu lang ai re. Mawnggawliya rusai gaw Asha dan masha ni a daju rai nga ai. Bai nna htunghking grai kung ngang sai Miwa ni lapu baren lang ai, anhte mung shanhte zawn ningsa sai, kung sai amyu re ai lam madun lu na matu lang ai. Ndai sumla gaw Miwa hte bung ai rai nna shanhte hte mung grau hkau wa mai ai ginjang masat mung rai nga ai.