KALANG SHA PU AI NWAI PAN
"E hkau Brang, nang hpe lama mi tsun dan na, huhu..." Zau Myu Awng gaw Brang Ja kaw mani sum sum rai sa wa nga ai. "Tsun na lam nga yang lawan tsun u le, nang hpe yu yang kabu hpa shiga tsun na wa zawn gaw n rai nga ndai." Brang Ja loi hkap shapye dat nu ai. "Aga, hkau Brang myiman ndai hpe atsawm yu yu!" Zau Myu Awng shi a myiman hpe layung hte madi tawn rai, sinda shachyen dan nga ai. Brang Ja mung grau shala mayu wa ai hte: "Rai nga ai, nang madun jang she atsawm yu hkrup ai, na myiman wa kan mase da ai woi shingkra hte she bung ai le i, haha..." "Mala la ngu hkum tsun yu, num kasha ni pyi ndai myiman hpe mu mayu nna hkali she bu ma ai re yaw." Zau Myu Awng shakawng taw nga u ai. "Teng na re, moi ya Seng Bu mung na myiman mu kajawng nna hkali kaba she bu mat ai da le. " "Ram sai, ga kaja tsun ga, ya ngai nang hpe tsun ngu ai mung Seng Bu hte seng ai lam re. " "Naw. Naw, shut sai, ngai tsun dan na madat yu." "Mai sai, woi du wa. "Ndai hku... Seng Bu hpe ngai sumtsaw ai."
Zau Myu Awng grai nwam ai tsun dat nu ai. "N mai byin ai nga dat ai ngu?" "N rai dam ... Myit yu na da, ngai shi hpe nau hkum na yaw ngu tsun yang, du wa na shata 2 nhtoi 30 ya shani mahtai jaw na da, hihi...tsun magang salum gumhtawn wa magang rai wanna, nsa pyi n lu sa wa sai le hehe... ” "Haha...gadawng si mat it, shata 2 kaw nhtoi 30 ya n rawng ai hpe n si dingsa matsing da u, angawk angak san." Zau Myu Awng tsawmra na kra mau mat nna shi myiman mung gwi hkyi gabye krup ai nsam de gale mat wa sai. "Aga, Seng Bu ndai tsawm tsawm rai, masha pe grai she chye zingri ai rai nga ai. Chyum laika mung nhti sam ai, hkrisatan a tsawra myit gachyi mi pyi n rawng ai." Brang Ja gaw Zau Myu Awng hpe matsan dum ai majaw, n-gun jaw nga ai: "Hkau Zau e, dai daram gaw myit hkum daw le, ngai lam mi hku hpaji naw daw ya na." "Tsun dan yu rit taw." "Atsawm madat u yaw, gachyi mi mung nshut ai." "E law, e law." "Ahem...ahem, ndai hku." Brang Ja masing kaba jahkrat bang wa sai. "Gara hku?" "E, nang madat yu u, Seng Bu yup ai gawk nang chye ai i?" "Shi gawk makau kaw lamung hpun kaba tu ai le." "E, dai lamung hpun kaw lung nna sumtsaw ga sa tsun u. "
"N mai na re, loi hkring shi kawa lahpaw hte hkan shachyut gap da yang, kaning di na?" "Hkum tsang, shi kawa gaw lauban she re me, lahpaw hkum chye gap u ga le, ngai tsun ai hku galaw u ! Num ngu ai ni gaw la lata yang, gwi ai ni hpe she lata ai re yaw. " "Dai hku nga jang 2 lang na sumtsaw sa sana bai rawt yu ga le." "Rawt u." "Naw wa sana, daina na matu loili hkyem yu ga hkau Brang, nang hpe gaw Seng Bu a mahtai lu ai shani she chyeju htang sana yaw." "E law, e law." Zau Myu Awng shana lawan du u ga nga akyu she lagu hpyi nga sai, kadai mung shi zawn rai na re, hpa majaw nga yang, tsawra hte hkrum lu na majaw rai nga ai. Nsin sin wa ai hte zuphpawng shachyut ai mare salang wa zawn Zau Myu Awng, Seng Bu hpe atsam madun na matu rawt mat wa sai. Seng Bu a yup gawk hta wan htoi nga ai hpe mu dat ai majaw, Zau Myu Awng a myiman gaw mati mu tam ai gaida jan a myiman nsam zawn htoi gabrim mat nu ai. Wang gata de Wunpawng jauhkyen hte gumhtawn shang wa nhtawm, woi la wa a hpun lung hku lamung hpun de man mat wa nu ai. "Aka, aka..." Chyahkrau kawa gatut sai, raitim la ga kalang dat, woi la lamai ngat, lauze lagaw kalang hkat nga ai hte maren, hpun labra kaw dung hkring la nga yang, "Wau, wau, waul... " Nga nsen na dat ai majaw, hpun hpang de mada dat yang, gwi la kaba langai mi lamung hpun pawt kaw sin dung nga ai hpe mu dat sai.
Ya chyawm, Zau Myu Awng a myiman nsam gaw kan chyat nna makan dung nga ai woi kanu hte bung mat sai. Hkrap mayu ai zawn mani mayu ai zawn, hkrap dat na ngu yang mana shadu na bai tsang, nhtoi htoi hkra dung na ngu yang mung, chyahkrau tsip na chyahkrau ni hpe dang hang na ntai, yu wa na ngu yang gaw gwi kawa na bai tai, shi tsawra jan hpe pawt mayu wa ai zawn nga tim, gwi mahtang gaw Zau Myu Awng hta grau zen mat sai. Zau Myu Awng palawng raw la nna, hpun hte loi mi tsan ai shara de kabai dat nu ai. Myit ai gaw hpun hpang na gwi palawng majaw de gagat htim mat wa ai laman prawng yu wa na ngu yang, gwi mahtang shi hta grau zen mat, hpun pawt sin tik tik rai nga ai. Shata lahkawng gashung ai ngu gaw nhka she kashai wa, shana kying masum daram she gwi nta chyahpung de rawt mat wa ai hpang she, lamung hpun ndung kawn yu wa nu ai. Zau Myu Awng gwi ndeng n hkra ai zawn nga pawt mayu ai myit hpe dip da let, loi ya mi ting shinggan pyi n pru mat nu ai. Brang Ja sa wa nna, n-gun jaw let naw shakut na matu tsun ai pyi du sha ga- nga mat sai. Kalang mi na laban shani nawku jawng sa wa ai lam kaw Seng Bu hte tut rai hkrum ai hte, Zau Myu Awng ndang sharang sai tsaw myit a majaw, "Abu." Ngu hkan shaga dat nu ai.
"Hpa baw mi ?" Seng Bu mung shi hpe hkap shaga u ai. "Nang hpe ngai ... ngai ... "Hkum tsun sa, ngai chye ai, maw." Seng Bu laika langai jaw ngut ai hte nawku jawng de shawng rai mat wa sai. Zau Myu Awng gaw laika la gun nna, asak 95 ning du ai dingla wa lam hkawm ai zawn rai nawku jawng de hkawm shang wa nu ai. Zau Myu Awng gaw kabu dik mat sam sai, naw ku ngut ai hte nta wa lam kaw hkawm nga ai lagaw gaw, lahput laswi hkyet mat ai zawn gari kawa rai nga ai, nhku du shang wa ai hte sumbu kaw rai gahtet ai mi gun tawn ai zawn lawan ladan rai shaw la nna, Seng Bu jaw ai laika hpaw hti bang wa nu ai. De: Brang Ja, Abrang ngai mung, nang zawn sha re, nang hpe grai tsawra ai. Nang hpe tsawra ai ... Da ? Hten sai, Zau wa a myiman, laika gaw shi a matu n rai nga ai, Brang Ja a laika she rai nga ai. Myitkraw hta gaw: Abu e... Nang hte ngai sut madang, hpaji madang she n bung tim, nye a tsawra myit gaw nammuk dara hta pyi grau kaba la ai re. Zau Myu Awng ta kaw lang nga ai laika ga de hkrat mat ai pyi n dum hkra myit yawn nga nu ai. Nang hpe ngai a tsawra myit ni yawng jaw kau ni ai le... Mungkan hka leng kaba hta nye a tsawra myit ni tsawt lawm mat sai, nye a prat lachyum n pru sai. "Seng Bu."
"AWh, Brang Ja i, sa wa rit, nang laika lu la sai kun? Ja Hkawn nang hpe jaw ai laika le." "Re ni, n lu la shi ai, hkau Zau Myu Awng mung n sa jaw ai le, malap taw sam ai." "Mungkan e, ngai she nang a laika re ngu gu Zau Myu Awng hpe tsun dan malap kau sai. " Laban jawng sa wa ai lam kaw Seng Bu mung n myit mada ai Zau Myu Awng hte hkrum ai majaw, gaya ai nga yang malap tsun kau nu ai. "Dai majaw rai na re, bai nna hkau Zau Myu Awng gara hku myit nga ai law, shi nang hpe gade tsawra ai ngu ai gaw ngai pyi matsan dum wa sai." "Ngai mung shi hpe tsawra ai le, raitim shi mahtang mana mana rai chyu nga nna, manang myit ai hte shaga ai mung n chye na rai, pawt mayu ai hte hpawn shi hpe shakyin ai ngu, ten hpe shana tawn ai re, ngai gaw shi pe jau nna mahtai jaw mayu sai re." "Hkau Zau Myu Awng myit grai dinghpring ai, gaya mung grai gaya chye ai, shi tsawra myit chyawm gaw jet dik ai re yaw Seng Bu." "E law, ngai chye ai law." "Sa le, hkau Zau Myu Awng kaw sa chyai yu ga, grai na hkra shi hpe n mu hkrum sai. "
"Mai ai le, chyahkring naw la rit." Seng Bu gawk de shang wa nhtawm buhpun palawng tsawm tsawm wa galai la nu ai. Brang Ja hte Seng Bu gaw Zau Myu Awng kaw sa chyai ngu sa wa masai. Zau Myu Awng a nta kaw du shang wa yang, masha grai gamawng nga la ai majaw, mau mau ngu naw jawm tsap nga ai shaloi, Zau Myu Awng a kanu Seng Bu hpe mu dat ai hte: "Ngai nam Seng Bu e, ngaisha Zau Myu Awng n nga mat sai law, ni... Hpa byin ai kun? N chye sai. Ma ndai galoi mung tsa n lu ga ai wa, mana tup hkrap nna tsa hkrai lu u ai, ma ndai grai myitsu ai she re wa, mana gaw tsa n lu ga ai tsa lu nna, ndai zawn byin nga sai, ni... Nye kasha..." Nga krap let hkap shali dan nga u ai. Seng Bu gaw Zau Myu Awng a kanu hpe n-gun jaw ga pyi n chye tsun hkra naw mau ungang nga yang, Brang Ja gaw Zau Myu Awng a sinda kaw mara tawn ai laika pa la nna Seng Bu hpe jaw dat nu ai. De: Abu nang hpe nye a prat hte maren, ngai tsaw ai zawn nye manang Brang Ja hpe mung nye prat hte maren sha tsawra ai, nan lahkawng ngwi pyaw ai hkrisatan dinghku de mu yaw... Tsaw manang: Zau Myu Awng Seng Bu a masin salum ni gaw ga malap mat wa ai zawn nga hkam sha mat nu ai. "Agu Zau Myu Awng e, nang hpe ngai grai tsawra ai re le, Abu a mara hpe raw ya rit yaw, Abu shut ai lam a majaw, Abu hpe nang shakram kau da sai i ? Ni...ni...Gu Zau Myu Awng e, Abu nang hpe grai tsawra dik ai, gatsan ga hta myit n pyaw hkum rai lu yaw..." Seng Bu kagu Zau Myu Awng a moimang kaw masawp let hkrap malap kya mat wa nu ai.
(Sumrai gadun ndai gaw < Guthkai chyumjawng shanan » laika buk kaw ka bang tawn ai hpe, hti masha Labang Roi Bu shachyan dat ya ai re.)
