NGA JIN NNA KYIP, PRA JIN NNA SIP
BAWK TAWNG
2012 ning shata man 5 praw 31 ya shana de hkying 8 manit 10 jan e, shaji mayen hte gayau gaya di ngai hpe shat maya jaw nna bau maka lai wa yu sai hkai, mungkan ga ntsa hpe shakram kau da let nsoi nsa dawp mat wa nu ai. Hkai hkoi mat wa ai shani sak 106 ning du sai. Hkai gaw Nhkum krung Lauying gahtawng na Sumdu Lauyang kasha re, Kahkut de num wa mat wa ai shani kaw nna mayu ga de galang pyi nhtang yu wa yu ai da. Kumbang lai ai shani, shawngnum Chyahkyet Htu htawng da ai wa dim La-nyeng(Ma Tang) hpe ba, wa lum( Ma Tu )hpe dun rai nna lai ai re nga nna, wa Lum nawng e tsun u ai. Hpa majaw num nnan jan kumbang lai ai shani ma ba ai gaw ba, dun ai gaw dun rai a ni nga yang, hkai gaw dwila Gambaw Tu a nambat masum ngu na num jan rai nga ai, shi shang wa ai shani kawn, shawng num lahkawng e htawng da ai ma ni Ma Tu Ma Tang du nga la nna, nhku ting myi tu ai sha mu mat nu ai. Ang shaa rai dai shaning mawru wa nna, anhte nta na mamdum ni Lagyen hka hkaraw de wum she nga gyi ru bang mat wa ai shaloi, hkai gaw nta nbang chyinghka lam kaw nna wa ni hpe gumpawm ahpum let mamdum sharut kaw lawm mat wa ai sha hkan yu nna: Goi e, ngai sha ni hpa sha na re ta nga sawmrawm myiprwi she gahte nu ai.
Hkai mahkawn ai ten hta, shanhte nta kaw mu sa galaw nna nga ai Shanghpaw La ngu ai nchyang shabrang la hte sumtsaw byin nna, ahka hkum hkum wa, gaulum gaubawng bawng rai gaya n-gyi ama ba tawn nta kaw nga nga ai ten hta na lana de mi mam htu nga yang, manam la lahkawng shi makau hku lai wa ai mu nna: "Tsa yan e, jan du wa sayang gade sa wa ai rai mani? Ndai hkan manam mat saga law." Ngu hkap shaga dat ai shaloi, la dai yan gaw: "Num tam hkawm ai rai ga ai." Nga htan sai, dai ten hta hkai gaw n-gyi ba nna nta kaw nga nga ai majaw, shi hpe kadai ra na nshadu nna: "Anhte gahtawng kaw ngai hta lai nna mahkawn kadai n nga sai law." Ngu sagoi ga hte hkan shatu dat nu ai. Aga she nat ai nga hte maren, hkai a gahpu gayung ni gahtawng kaw num hpyi manam du ai nga na ai hte akam rai re sai nga ai zawn, n-gyi ba nna nta kaw nga nga ai ngu gaw nta na ni a myiman hpyi sep ya ai, gaya jahkrum ai ngu nna, hkai hpe shingkra rai nga ai dwila Gambaw Tu hpe dip shagwi ya kau dat manu ai da.
Hkai num wa mat ai hpang, nta na gahpu gayung ni shi sumtsaw wa hpe shachyut kap rai sai, shingrai Shanghpaw La kasha Zau Hkun hpe sha hta ba lang rai hprawng mat wa ai kaw, hkai a gahpu gayung ni hpang de nna sanat hte tung ngu hkan gap bun ma ai da. Ngai dum wa yang hkai nawng e: Gwi prat kaw pra kau nna, gwi prat kaw pra kau nna..." Nga madu pra sa ai prat lak hpe ndawng la ai zawn nga chyu tsun u ai. Daini ngai kaba nna htauli htaula chye myit ai shaloi she hkai a matu nrai dum ya nga ni ai. Madu tsawra ai masha hte hka bra ra, madu a nshang kawn bak nga hkrat ai saidaw saichyen hpe tawn kau da nna, masha ni a kasha hpe sa bau laka ya, tsawra ai wa mung htunghking hte madu hpe hkungran la na atsam n-gun nlu, gahpu gayung ni a ga hpe ningdang nlu, ninghkap nmai re gumchying gumsa lailen hpe hkyet rung nna tsun ai ga ni rai nga ai hpe htai la lu ya ai, shingrai hkai a matu myit hpawm lawm ya nga nngai re. Myit nmai shadang ai kam maka a majaw, myit shatawng kau nna hkai Gambaw ni a nta kaw wa nga ai kawn, shawngnum Dingsi Ma Ngat lu da ai Ali Gam, Gambaw Naw, Ma La ni hte Chyahkyet Htu htawng da ai Shadau Li, Ma Tu, La Nyeng kaji kaba la kasha manga kru woi kaba ai hta n ga, madu a Ma Hkawn, Ma Lu, Ma Roi ni matut manoi rai bai pra jat ai ma ni hpe mung lanu lahku ai hta lai nna, lawu lahta nta kagu, kaning ni a shinggan ma ni hpe du hkra woi la nna alum ala rai woi nga lai wa yu nu ai.
Ngai dum wa yang anhte nta kaw nshang pyi grai htingkaw ai Nmaw Kaw Lu ngu ai hkai Bawk hte Nambang de htawt mat wa shangun ai Gumje Gam, Changkyin de Lalu lashi jan tai ai Ndau Kai, dwi a gahkri Gambaw kasha nrai tim Gambaw mying mying ai Gambaw Chyang ni yawng gaw hkai e sharin shaga ai gata hta nga kaba wa ai ni hkrai re nga nna kaba ai ni tsun dan dan rai ma ai. Hkai a prat prat mung shi tsun ai hte maren, gwi prat kaw pra kau nna rai jaw sai, dwi Gambaw Tu hte jawm nga ai kru sanit ning sha naw rai yang, bai gaida mat nu ai. Shingrai dai hpang kaw nna hkai gaw: "Shingkra ngu ai kadai mung hkum gapa mu, ngai hpe yu nna hkrit mu." Nga hkrai bai tsun shari taw nga nu ai. Dwi n nga mat ai hpang, anhte nta dinghku grai chyaren mat ai zawn nga ai, moi Bawk tsun ai kaw chye la lu ai, shannau ni mam dan bum tawn nna, mam gabye la na nga pyi nlu ai, myit nhtum ai moi Bawk gaw shata jan gata kaw mam bum sin ai shaloi, shannau ni a mambum makau hkan Sam nga hkrai dat shadam tawn ai mu nna, jum hte Sam ni a nga hpe shalen dun la nhtawm, lana jan e bum tawn ai mambum ni lagu gabye shama la kau ai hpe htingbu ni pyi kaning rai galaw du ai hpe mau nma lai wa yu masai nga tsun u ai, lu ai jum hpe nga shalen kau nna, shannau ni sha ai si mai gaw asit awat nga ai shadu sha, shana ting yupnga let nga dun gayin, nhtoi htoi wa ai hte nga dat kau rai chyum lai wa sai hpe daini she mani let ngai hpe tsun dan u ai, raitim dai shaloi gaw masha ni hpe tsun dan na ga hkum tsun, hkrit pyi nrau, kaning nchye rai shaw ai ladat ni hkrai rai nga ai.
Ma ni wura wahpawng na makru zawn lani hte lani alawn rai kaba wa nna, numla na ja gumhpraw tam ai gaw dubawng pyi shingdu de gale noi mat na daram ba ai hkai gaw, num kasha ni a hpu ja hpe la kasha ni a num la ai kaw hkrai bai htawm bang kau ai hta n-ga, Lanyeng jan hpe la tawn ai laning jan sha naw rai yang, bai machyi si mat, Ma Tu mung num sa yu ai shaloi gaw datmyi hte dingdung dingda di nan numrat yu nna, galu seng seng re mu mada nhtawm hprawn hkungran la ai madu jan hpe yu magang myisai n yu htuk dum nna, ma pyi jawm lu sayang madu jan hpe kabai kau da nhtawm hprawng mat wa sai. Dai hpang Ma Tu, Lanyeng ni a num galang bai la ra ai kawn nna, hkai a masin hku kaw mun tu ai zawn ngu pawt mayu nga nu ai, madu a nshang kaw nna hkrat ai la kasha shingtai hpe numla ya na gaw hkum tsun, kaning rai kaba wa ai pyi n mu yu nu ai, kawa hte matsan mayan rai kaba wa ai kasha Zau Hkun gaw, kanu shanwa hpe kabai kau da nna numwa mat ai hpe nju ndawng ai myit hte kaba ai hpang Kahkut de kanu hpe hkan gyam hkawm ai shaloi, gat lam hpunggaw hkan gade gyam yu tim, masha ni hte gashik gashoi rai chyu hkawm ai nga yang, sanat lashawng gang shut na tsang nna, ta dawm kau nu ai.
Ndai lam ni ngai kaba ai hpang masha ni tsun ai kaw na la lu ai. Ngai dum wa yang, hkai bum kaw hkarang yi galaw nna nga nga la sai, laban bat kru ya du shagu, nu annau ni hpe bum de wa yaw na matu hkangwi wa gun da shangun ngun rai ai, dai ten hta wa Ali Gam, wa ba Shadau Li, wa ba Zau Hkun ni si htum ma sai, la kasha ndai ni hpe hkai e dagam sat kau ai hkrai re nga tsun ma ai. Hpa majaw madu a kasha ni hpe dagam sat kau ma ai kun ngu mau nga ni ai. Lani mi hta, hkai gaw lahta nta na ganam jan hte ndaw kaw tsi yu hkat ma ai, jan gadang wa ai hte rau shada baw mung yu ngut hkat kau nna, bra hkyem ai shaloi, shani ganam jan raw tawn ai hkaichyi n mu mat ai majaw, shada myit npyaw lagu shadu hkat wa ai shaloi, hkai gaw lamu de ta ladawn nna, ngai n mu, n la, n hta nngai, ngai la yang gaw ngai sha nrai, ngai sha ni du hkra si htum mat u ga ngu marawn ningdang lai wa yu nu ai da, raitim lahta nta ni myit npyaw ai gaw ding yang, annau ni kaba ai hpang du hkra kaba ai ni bum nta hkaraw singgat na hka hkum ja lu, masha ni alawng dat bang yu sai nga nna, anhte hpe hka htung kaw na hka she woi ja lu ma ai. Hkai gaw gying ja nna lawt mat, gying kya ai la kasha kau mi gaw pra mangan n nga nna nga makru daw ma sai.
Ngai jawng kaji lung ai ten hta hkai a ka-ni panlap grai mawt ya yu sai, hkai galoi kaw nna tauba marawp ai lam hpe san ai shaloi, moi Bawk tsun ai: Laning mi hkai machyi kaba hkrum u ai, tsi sara ni hkai hpe shata masum dang sha lu pra na sai nga nna tsun ya ai majaw, myit htum a jum ju rai bang wa ai wa Ali Gam gaw kanu hpe jaw jahtum ai mi rai yang rai nga, bum na ashu ashan mu hpa nga manga tam jaw nu ai da, lani mi wa gaw: "Ma Bawk nang gumhpraw gade wa naw mahkawng da a? nu hpe ka-ni sha n jaw yu sai, nang lu ai gumhpraw ba hpe naw ya yu rit." Nga nna shata masum du ai hpang wa buhpun palawng gaw shep shep rai ka-ni joi mi mari gun nna nta bai pru wa u ai, hkai gaw ka-ni dai shadu lu nna mi re, shata masum lai tim nsi ai, hkumhkrang bai hkamja wa ai hta n-ga ka-ni mung lu shakap la nu ai, dai shani kawn nna, hkai ka-ni kajam ai gaw annau ni lu matsing hkra lu kau nu ai. Pa de htawt yu wa ai hpang, asuya ni kawchyang hkawn hte chyai ai ni hpe Htaihpyin gat de sa sharang kau nga shana masai, hkai gaw masha ni shingnoi shingga kaw hpun nba panyep ni baw gun ai kaw lai nna, ka-ni tauba du hkra shanat gun rai sa wa ai hpe hkan yu gaya nna, shawng de pyi " Ka-ni dawn sayang gaw ngai hpe si u ga ngu ai re." nga myit htum ai jan, hpa mung nbyin ai asan awan madu hkrai nta kaw dawn kabai kau nu ai, masha ngu ai wa myit a daw hkrai rai nga ai, myit sha da-ting dawdan kau jang awngdang lam lu la nga ai.
Kanu kawa ni e hte alum ala panun panyen rai n nga ai jahkrai let kaba wa ai hkai gaw, sak sumshi jan ning kaw nna bai gaida mat, kadai gamoi gana ni e dumdum wanwan ngu nna woi nga ai lam n nga ai majaw, ma ni hte nawng e gajet makan marawn jen let nga lai wa ai ten law nna, ganam ni hpe raitim zingri zengrat azep aza nmu nma ngu nna woi nga lai wa nu ai. Laning mi nu machyi kaba hkrum nna shamu shamawt nlu rai nga tim, hkai shi hpe ganang kaning nga a nga pyi nsan dam ai hta n-ga, roi nra masin machyi ga tsun jaw jaw re nga, tsirung rawng ai shaloi, tsa pa sha mayu nna gat sa ai htingbu jan hpe: "Moi tsa pa dun tawn ai, ya na gat loi mi la hkrat wa jaw rit," ngu shangun dat jang, hpang na gat shani htingbu jan gaw: "Ga tam sha ai she rai sai, madu wa shanyeng nna she machyi ai ni mi, hpa tsa pa sha sha ngu hkap matsa bun ai." Ngu tsa pa nla sa wa ya nu ai, nu gaw hkai a ga dai hpe prat tup matsing gun na ngu sam nu ai, anhte kaba hkra shali dan dan rai u ai. Akam e sha nu hte tsirung rau rawng ai Sam num jan a man kaw tsa pa sha mayu ai, mare de kadai nta kaw tim, loi mi mari hkrat wa jaw rit ngu tsun ai hte Sam num jan a kasha sanit matsat ning dang du ai num kasha gaw: "Ma ni ngai Ya tsa pa dun ai mu ai." Nga tsa pa hka-wan kaba mi la hkrat wa jaw ai sha nna, lani hte lani n-gun rawng, hkum gawng atsam bai mai wa nu ai.
Bai galang mi Nu Dim Lanyeng jan hkai hpe kashu wa ba dan ngu nna Shadan krung kaw nna Kahkut kaw lam hkawm du wa yang, dun kaw hpajet sumdaw gumyan taw ai hpe lagaw hte shakum de lahkat kau dat let: "Num she nga ai ndai zawn san ai rai hte sumbat shatai ai, ri hte tingting hkanghkang alum rai nchye da sumbat ai gaw." Nga nna tsun tim, prat tum kashu ni hpe sumpan lahpa mi mung n mari jahpun yu u ai. Hkai shi madu a rai hpe manang ni gachyi mi lang hkra ya na hpe nmyit hkawn u ai, dai majaw ganam ni shi a ri singtsin mi lang kau ya na hpe grai nra nga ai, galang mi wankawk kaw wanpu sumri htum mat nna, nhtung yep na ri loi mi wanpu sumri manai lang kau ya ai hpe wu pawt bu mang taw nga ai kaw nna, hkai a hpa mung nhkra ya yu sai da. Mawa mung mung masa shuk, ahku hku ai ten hta anhte nta kadai mung kadai chye ai hku dumbru dumbra rai nga hkawm mat wa ai shaloi, hkai hte hkai Bawk chyu sha bum na nta sin nna nga nga ta sai, annu ni Dinghkung de sa htawt nga mat, wa Bawk mung Nhkum krung hkan nga byak hkawm, wa ba Shadau Li nta ni Gangdau ya de htawt machyu mat wa, wa Lum nta ni Mali de sa nga, wa Dim Lanyeng gaw asuya bungli galaw hkawm nna nta n nga, num kasha ni kadai mung kadai a dinghku majan nna nga hkawm mat ai nga yang, hkai hpe kawan gatsan rai ai masha n nga nna, hkai gaw nawng e kasha ni a man hta: " Lasa mang kaw lahpaw chyit rai noi nga nna, ngai hpe nlu wa kawan a ni." Nga matsa tsa rai u ai.
Mawa mung gram galai tara pru nna lamu ga hte hkauhting hkauna kadai mung kadai hpe garan ya nna, galaw lu galaw sha wa ai ten hta, anhte nta ni gaw shinggan de nga hkawm mat ai majaw, madu a hkauhting hkauna ni du hkra masha ni e garan la kau ya ai hta n-ga, nta sin ai hkai yan hpe garan ya ai mung, galaw sha na masha n nga ai majaw masha ni hpe galaw sha kau shangun re nhkan hta, Mawa mung tara kaja wa ai hpang, anhte nta ni gaungwi gaungwi rai bai nhtang gahkyin wa tim hkauhting hkauna n lu ai daram rai mat sai. Bum hpatwat hkan hkaibang yi chye sha nna nga ai ten hta, hkai hpe pa de sa htawt nga na matu gade lang tsun yu tim, pa de nsi ai kawn ga gata de rawng ai, hkrit ngai nga chyu ningdang u ai, bum na nta gaw shachyaw ai hpunbyen shangu nta, kagam galup ai pa na nta shakum du hkra ga re majaw tsun ai rai ga ai. Galang lang annau ni bum de lung wa jang, hkai gaw shana e : Hpun n ju yang hpa ju nga nna, wan alum ala didi wumwum rai woi wut kra nhtawm, hpang jahpawt nhtoi htoi ai hte gaw annau ni hpe: Sa sa hpun gun mat wa saga nga nna hpun chyu woi gun gun rai u ai. Bum nta na wa hkali jawng ai ngu gaw npu de hpun sa hpai shing nrai sun de chyinghkrang si mai sa di rai yang, lagaw shinglang de lim lim nga jang mada dat yu u, shinglang ting chyang mat lu nga ai. Wa hkali hpe nri ai ngai gaw wan hte nta nat kau na ngu pawt jang, hkai gaw ga she nat ai nga daru ru rai u ai.
Bum na nta dap law, gawk law ai majaw, wan nwut hkra ai shara maga de gaungwi ngwi rai tsam waw mat ma wa sai hta n-ga, sak kaba wa sai hkai mung hkumhkrang sat lawat shamu shamawt n manu wa ai hte maren, pa de sa nga ra nu ai. Pa de sa htawt nga ai kaw nna galang lang myu de moi Bawk kaw mung sa nga yu u ai, raiyang, myu shang jang lam chyu dam dam re hpe grai n rai dum u ai, shingrai gahtawng buga de she machyu manu dum, pa na nta dawdap kaw wanmang n nga ai majaw, hkai hpe gawk de jarung kaw wan wut ya, sha- ji mayen mahtoi bang na kawk san ya re hpe hkai grai abai dum u ai. Kashu kasha law ai re majaw, gade nde sa nna wa ai ni yawng sha-ji malut byinlang hte sha hpa amyu myu hkrai wa kumhpa nga ai, sha hpa ntaw ai hkai gaw, mare na gumgai manang ni hpe malut ni kam ai hku magra gam garan jaw lu ai hpe arawng la u ai, ndaw adun hkan sha-ji tawng hte gayau gaya re mayen hkrai prat jahkye ayai tawn ai hta n-ga, ahpraw hpraw re shakum shakap, lahkum hkan du hkra ahkye hkye re sha- ji mayen ni langai mi e dasang soi shakap tawn ai zawn re hpe nta masha ni n yu lu si wa ai majaw, sha-ji maya jang mayen law la ai, mahka mung kawk li hkra kra prat bang tawn ai hpe sa ru gashin kau ya ra rai, mu law dum wa ai nta masha ni ga mung angun wa sai, bum ga daphkun kaw prat bang dap hte ahpre magap kau, shinggan pru jang, tsingdu tsingman ninghpu maling hkan mahtoi tawn yang malut sha-ji mayen hka n mu ai.
Gumgai dingla ni hte sha-ji malut sha galai sha rai jan shadu nga ai hkai hpe sha-ji maya yang n-gup amawng byin wa ai ngu jahkrit ai kaw nna, hkai malut sha-ji ngu ai hpe tsep kawp tawn kau nu ai, masha ni gaw malut sha-ji n maya yang n-gup hkri ai, wa gaya ai nga tsun ma ai tim, hkai kaning nga n nga pyaw ai lam mung ntsun yu ai. Matut nna hkai baw machyi ai nga nhtawm, baw mai tsi shadung sha ayin bai lu nu ai, lani mi hkum masum mali lang hkut shangun ai hta lai nna, baw mai tsi shadung n sha nlawt, mu galaw gade kyin nga tim, hkai hpe shama nhkut da ya nmai, shawng shani hkut ai hka pyi naw hkye nga ai kaw, bai ahkut gahtap htap re majaw, shama hpyi htat mat nu ai. Ndaw hku hkum hkut chye ai masha lai shagu: "Hkai hpe hkum naw gan ahkyen da ya rit law, grai nga n pyaw re nga ai." Ngu lam lai masha ni hpe du hkra hkum hkut shangun kau kau rai u ai, shawngde bum ga nga ai shaloi, masha mu ai hte atsawm sha lam she hkawm nga ai masha ndi nda rai hkawm madai masu let, hkai hpe hka naw sa ja da ya ni, hpunjum langai sha naw sa hpai ju da ya ni ngu, lai malai masha hpe mung shangun sha lai wa nu u ai. Hkai baw mai tsi shadung sha ai chye nna, htuk kaba hku wa mari da ya ya rai nngai, rai yang, baw mai tsi shadung ayin kap wa ai, ka-ni rawng ai majaw, ayin lu wa ai ngu bai tsun dan jang, baw mai tsi shadung nsha mat ai hta n-ga, hkum du hkra n hkut mat nu ai.
Ngai hkai hpe shakawn shagrau ai lam gaw myit ai hte tsepkawp galaw du ai majaw rai nga ai. Ka-ni dawn kau ai hta lai nna, malut sha-ji du hkra n maya mat, baw mai tsi shadung nsha mat, hkum hkut man ai lam ni langai hpang langai jahkring tawn kau nu ai. Nta na ni hkai hpe shat sha shadu jaw ra mat nna, myit grai pyaw nga yang, nmyit madawm ai lam ni bai pru sai, ndai lang hkai akajawng sha shat chyu hpyi mat, shat sha ngut ai manit manga daram du ai hte : "Ndai nta ni e, mani she sha sai shat hpe ya mung nwa jaw ma ai gaw, kaw-si si wa re nga ai law, n-gup mi pyi lawan wan wa bang ya mani law. Shat n nga jang, manhtu tim wa bang ya mani law." Ngu nji n-gu shama sha mat sai, masha ni lai hkrup nna: "Hkai shat sha sai kun?" Nga san hkrup ai ten hta raitim, "N sha ai, ndai nta ni ngai hpe shat n jaw ma ai." Nga nchye ai ni na yang gaw, teng sha gumgai hpe shat n jaw sam ma ai ngu shadu kau na zawn nga chyu tsun u ai. Hkai shat chyu sha mat ai kaw nna, nta na wandap kaw nawng e shat di gakang tawn ai, shani shana nmasat ai hkai a shat saboi kaw shat hka- wan sha ataw mat sai, yuptung yuphka yup prang e shi hkrai tek e tak e nga rawt masawp sha nga nga rai u ai, gatsi galang re shat sha tim, kan nhkaw ai majaw nta ting mau gari lai yu saga ai, shat sha laman magang, nam sa ai mung law wa sai, galang lang maisau n mu mat jang, sumbu shing nrai bunghkum gata hkan na gumpraw ni masawp la nna maidang gatsut kau rai u ai.
Hkai gaw kashu kasha law htam ai jan rai nna, gumpraw hte she maidang gatsut mat sai ngu tsun chyai ga ai, gumpraw dai ni hpe yu lahpawt dum ai ning Tawng gaw bai sa gashin la rai u ai. Mazang nrin ladu lanang lai shat chyu hpyi sha mat ai laning mi du mat wa ai hpang, sak kaba ai ni pyi shanhte a prat hta kadai mung gumgai dingla wa yang, ten ntam ai shat shade sha ai masha n mu yu ai nga gari taw nga masai. Hkai a hkum ting shagan zawn shat kap mat sai, buhpun palawng hkan shat hkyep asi noi abya mat, shat hkyep kap ai nba hpun, shat hkyep kap ai bunghkaw hkaw, yup-ra hkan na shat hkyep ni gaw yu hkyi zawn tarin jawng nga ai, masha ni e mu yang gaw san seng n galaw yu ai zawn rai nga ai, ntsin lu gawm kaw mung shat hkyep tsing rawng nga, myi n gai mat ai majaw, ganang masawp hkrup yang ganang kaw shat hkyep kap. Hkai shat sha yang, shat gaman shawng sha kau nna she simai ntsin lu, sihtu ni bai hta sha rai u ai, shat sha ten ntam mat ai kawn nna, shat gaman sha ai ten she law mat sai. Masha kau mi hkai kaw sha lawm ai masha mi nga ai, nampum namhka toi kau ya yu mu nga nha tsun shadum ai mung nga nga ai, tim, nta kaw kyu hpyi ai majaw, nampum toi na hpe shara dum nga ai, bai nna moi Bawk hpe nang kyu nhpyi ai jan wa toi kau ya u nga jang, shi grau asuya masha re nga du gayin u ai.
Shat sha nga dangam hkai lani hte lani lasi lamun rai mat wa sai. Masha lasi jang, nshang shingkyit n ngang mat, lungpu chyahkan kra wa ai mung ndum wa rai, prat tup shinggan pru yang shingnoi shingga n-gun ai ni hpe daru, bu hkra bu ai num ni hpe jahpoi hpoi re hkai hpe ning Tawng e nshang kaw noikrat rawng ai bu hkra shabu tawn nu ai. Bu hkra hkra ai hkai shinggan pru bai n manu dum nga sai, anhte gawun bu nna lahput kra ai mu jang pyi daru ru re hkai gaw, maidang gang malu nna shinggan pru na hpe nachying n gwi nwam nga u ai majaw, "Shoi, ndai san ai jahtung labu me." Nga gang abrut raw kau yu tim, hpang e gaw, bu hkra bu yang lum ai na chye sam sai, agatsi nga bu hkra lahkawng masum she garawt je kau sanu ai. Hkai hpe ning Tawng e: "Hkai nang gaw kashu kasha law ai re majaw, shara mi htawt nga nga rai nga pyaw si nga ndai, shat shadu jaw na masha ntaw, tsi mari jaw na masha nga, langai mi pru wa jang hka wa shin da ya, buhpun palawng wa gashin kau da ya, buhpun palawng mung ntaw nma lu, kumhpaw kumhpa ku nhtung hpring jawng, hkalap hku nna masha ni lagu sha na du hkra lawm, anhte ma nlaw ai ni gaw hpangde kadai wa e shat shadu jaw na kun? Ngu jang, "Masha ngu ai gaw lak hte lak rai yu hkang lajang hkat wa ai hkrai re. Grau pyaw na gaw nanhte rai na." Nga myit shapyaw ya chye ai.
Galang lang hkai hpa myit du nhtawm ru taw nga ai kun, kasha ni hpe pawn mani ba mani ngu sharu sha chye ai, moi Bawk nshang she gashin kau hkra hkra hkai ra ai hku hkan nna myit shapyaw ya u ai, moi Shawng hte moi Ji yan gaw, hkai nau jawp la ai, sharu sha la ai nga nri nna, nta wa tim lana mi yup da jang gaw grai rai sai, mayu gaw hkai hpe nri ai yan she hkai n nga mat ai shani rai jang gaw, hkai hpe ga lahkun mi pyi ntsun da ai rai mat wa ai nga wa hkrap yawn si ma ai. Masha ngu ai wai ten du wa jang, kadai mung madu a hkuhkin hkrai mazing mayu sam ai. Masha ni lang ai rai shi lu ai hte loi bung ai mu shagu, shi a lagu la ai hkrai shadu mayu nga ai. Ga shadawn: Hkai shi lu ai nhpye zawn re hpye ai masha shang jang, nta na ni shi a nhpye hpe masha ni e lagu kumhpa kau ya ai, shi lu ai labu zawn re nta masha ni bu ai mu jang mung, shi a labu lagu bu kau ya ai nga anyam anyam rai u ai. Masha hpe rai hkrai lagu shadu ai hpe nu n na ri ai majaw: "Nang si jang, ban shachyat na rai gaw kadai mung n shamawt ya ai, htaw jawng da nit dai." Ngu bai jen gamak dat yu rai chyum lai wa yu sai. 2011 ning Yinkyang ginwang nnangnawn nawn ai majaw, shinggan de ginsup gap la nna yup ai shaloi kawn, hkai hkum ting gawut shabawng tawn ai noikrat shubawng zawn, mahti yang baw na zawn bum taw nga nu ai, kaba ai ni tsun ai hku nga jang, gumgai dingla ni bum nna kyip ai hpang maja ra ai nga, hkai nga yak sam ai: "Yu dat mani law, masawp dat mani law, daina gaw lai lu na zawn n nga nga ni ai." Nga tsun u ai, lai wa sai ten hta e mung, anhte hkawm mat wa sai ngu tsun da shagu: "Daining na ginhtawng gaw nai lu na sani ai, shing nrai ndai yinam lai lu na zawn n nga nga re ai, shingran madat mu lu." Nga law law lang tsun lai wa nu ai, anhte hkai galoi wa shi tsun ai zawn ndang sharang wa na lam hpe nchye da nna, kadai mung kadai ra ai ta tut bungli a majaw, hkai hte na na nga ai ten n nga nga ai, tsun ga nga yang, hkai ma ngai bai gale mat sai, magyi kaw bunghkum tawn shangun nna hkum mayut anut masawp ya let woi shaga chyai na hpe grai sharawng nga u ai, tu magang gadun magang re numdu pu kara ni masit ya, anyup mat ai palawng gang shapyan ya rai woi nga na hpe grai ra u ai.
Sak latsa jan ning du ai hpang, Hkai a gahtan hku achyang chyang re kara bai tu pru wa ai majaw, nta ting mau nga yang, kashu Brang Mai gaw: "Hkai nchye si sai, hkai a si ten lai mat sai." Nga tsun dat nu ai. Teng sha hkai a duu hpun pyi masum lang galai lajang da sai, shawng nnan na gaw wa galaw da ya ai re, daini wa a lupwa makau hkan hpun kaba pyi tu na sai, hkai a matu ngu galaw da ai duu dai hpe wa Bawk e madu mat wa nu ai, lahkawng ngu na ban bum kawn pa de htawt hkrat wa ai htawm, yunchyun e loi makret kau ya ai hta lai nna, madi mayap hkra nna matu hkan kaji ji tsam hka hka mat ai majaw, hkai nra ai nga jawp ai ten hta, hkai Bawk mung hkai a ga madat ai zawn shi a shawng e wa mat nu ai, shingrai ban dai hpe hkai Bawk hpe bang kau sai, hkai Bawk naw hkrung ai shaloi, hkai nawng e hkai Bawk hpe: "Mana nang, galoi si na ngu da nu ni?" Nga chyu matsa tsa rai u ai, "Ngai nga yang nsi sayang, masha ni e gwi hta wa hta zawn di hta kau na nhkrit da nu ai." Ngu sa jahkrit hkrit rai nga ai, yawng gaw hkai yu mu mada dat ai shaloi si yang she myit pyaw ai zawn kasha ni law malawng shi a shawng e wa ma sai.
Masum ngu na ban gaw kashu Brang Mai shamu hpun kran dut nna bai mari ya ai rai sai, shingkang shingwang rai ai ban gaw masha si jang lang ai baw zawn pyi nrai hkra htoi hkye tsawm nga al, raitim mali manga ning lai mat wa ai htawm, hkran nsam bai hpoi mat wa nna, kashu Brang Mai gaw: "Hkai nang gaw ngai hpe manu hpu hpu hte ban mari shangun nna, paw paw hte bai dut kau shangun hkyem nga ndai." Ngu tsun ai hpe shi e si shachyut ai, si ganawng ai nga yawn let: "Ngai hpe ra ai hku n galaw jang, dap hkun kaw dung nna yu na we ai." Ngu bai nhtang jahkrit ai hkrum nu ai, hkai a na zen zen mung mau na daram zen nga ai, dawdap kaw tsun ai ga ni shi gawk de galeng nga ai jan asan awan na lu, shatan nmai ai gumgai rai nga ai, masha ni tsun ai gumgai nchye ai ni gaw na zen ai nga teng nga ai. Moi Bawk a kasha ma Gam hpyendap kaw hpyenma ni hpe makan jen man ai majaw, ga shaga tim nsen ja ja jen jen nga u ai, hkai hpe wa kawan shagu ga chye ai jinghpaw ga lahkun mi gaw: "Hkai." rai nga ai, hkai gaw: "Ayung wa mung ngai hpe nahpang mana jan e zawn ngu chyu wa marawn rawn re." Nga nrai dum nga u ai. Hkai shat nsha mat sai. "Sharang nna sha u, shakut nna sha u, shat nsha jang si wa ai." Ngu tsun yu tim nhkrit mat sai, shat bawt ai hte prat ahprut kabai kau ya ya rai, hpa ntsin n lu, nga chyu nsing manam ai nga, asan re hka gatsi chyu sha lu ya sai.
Ladu lanang lai sha nga ai shat hpe galang hprut nsha mat ai hte ga shaga n-gun ni lani hte lani yawm mat wa, nta masha ni gaw ndal lang hkai kaning nga tim, anhte hpe kau da hkyem sai ngu, hpun hta lajang tawn, hkai a makoi mayang lam ni myit bang wa saga ai. Hkai shat nsha mat ai lam hpe moi Shawng, moi Bawk, moi Ji, tsan ai hkan nga shanu nga ai kashu ni hpe du hkra shana dat sai, yawng gaw hkai hpe wa jaw jahtum ai rai yang rai nga shat lit tsa hku gun nna wa kawan masai, raitim hkai kadai a shat n-gup mi mung niu mayu ya mat nu ai, shat nsha ya ai hta n-ga, ga lahkun mung nkam tsun shaga mat sai, hkai a prat hta nkam tsun ai lam gaw Share majan a lam rai nga ai, Share majan hta hkai majan shat shadu nang chye sai nga, majan a majaw gahpu Doi a sak sumri sum lawm mat, daini myit n mu ai lam ni yawng hkai hte rau hkoi mat wa na sai. Hkai nsa sha kap nga ai ten hta, kashu Hkawn Hpang gaw hkai si wa hkyem sai nga shani shana yu ai laban bat lahkawng du ai shana de, hkai akajawng sha ngoi rai rawt dung nga nna, shat hpyi pru wa ai majaw, shawng gaw : "Hkai bai hkrung sai, hkai bai prawn wa sai, hkai bai mai wa sai." Nga gabu hkrap let marawn hkawm nga sai, mayu masha rai yang gaw: "Aka ka..." nga madai let ku hkan madi let gaungwi rawt wa na rai nga ai, hkai gaw galang ta rawt in ngoi, galoi mung aka ka nga ntsun yu u ai, hkum npyaw tim hkum hkut tsi sha ai kaw lai nna, nat kawa ai hpyi kawa ai nga galoi mung ntsun yu ai.
Hkai nlu nsha shamu shamawt nrai ai laban bat lahkawng a hpang, akajawng sha shat bai rawt hpyi ai shiga na lu ai kawn, ngai gaw hkai mungkan ga ntsa hta nga ai ten nlaw sai hpe chye ni ai, shawngde dwi Lashi dingla (nu a kawa) mung ndum adam sinpraw sinna pyi nchye ginhka hkra machyi nga ai wa, akajawng sha rawt nna nhpye, n-ga ni hta jahkum hkawm ngut ai hte agatsi grawp rai nshaga ai gatsan ga de len mat wa ai re. Hkai si wa na shawng e sai hkyi du hkra sa nu ai, sai hkyi hpe nta na ni gaw: "Ja re, sut re." Nga nna nta chyahpung kaw htu lup da sai, pra sa wa ai shani she sai hkyi sa ai mu yu ai, raitim hkai gaw hkumhkrang gata na maza mala manam shagram rai ni ma hkra jasan jaseng kau nna asan awan myit dik myit mu let hkawm wa na sawn sam ai, hkai hkawm wa na shawng e myit shuk ai lam langai naw nga ai, dai gaw shi gatsan ga du wa yang, dwi Gambaw Tu hte i naw wa mu hkrum nga na lam rai nga ai, mahtang dwi a shawngnum lahkawng gaw hkai a shawng e si wa sai majaw, dwi shawngnum yan hte nga mat nna, shi hpe nhkap woi la na hpe myit tsang myit ru myit yak nga u ai.
Matut nna hkai nlu nsha re laban bat mi bai du sai, basi hte nten hkan hka sha madit ya lu sai, n-ra kaw hpyi sha kap mat sai, nu dim gaw hkai hpe: "Moi nang hpa wa naw la nga nni, ningshu ni mung numla numwa ma sai, myit pu na lam n nga sai, wa nu wa nu." Ngu nna gaw sa tsun yu, hkai annau ni sak kaba tim num nwa ai nga nga jang: "Htwi, n-gyi sha pyi nchye ba la ai." Nga mayen hte pyek rai jahpoi ai ga mi re, shadut ai ga mi re, num wa lam hpe grai myit pu lawm u ai. Masha a prat mi hpe laika lam ndai ni hte sha tsun nhpra, lun nma nga ai, hkai jahtum e lahta kaw tsun lai wa ai ten hta nsoi nsa dawm mat wa nu ai, shu mashi shu masha wan mang nshang hkra pra ai gaw hkai rai sai, kanu langai a prat awngdang a lu ai mung hkai rai sai, htani htana shi a saidaw saichyen ni a maumwi rai nu ai, shingrai hkai a matu gatsan ga hta garen gari gaida jan nwa tai u ga ngu myit mada dat nngai law.
