LAMU GANGHKAU NTSA E PYEN AI WA

LAMU GANGHKAU NTSA E PYEN AI WA

(SUMRAI) KA AI:LAHTAW BRANG JA

Shana yuptung e, Ma Hka gaw mare de tsa sa lu hkru la nna, ndi nda rai nta bai nhtang shang wa ra ai. Shi gaw nta makau kaw du wa jang,  "Ngai Ma Hka nang sai lu, nang sai lu. "Nga mahkawn nna shang wa ra ai. Ma Hka chyinghka lam kaw shang wa hkyem nga yang,  chyinghka gadun kaw ahtu nna, ga kaw "Buk"nga hkra galau taw mat sai. Tsam mari lu rawt tsap nna:"Ningnu,  e ningnu . . . . . . "ngu nna gade marawn yu tim,  kadai nhtan ya nga ai. Ma Hka grai na hkra masawp yang she daw dap na wan dat sumri mu masawp nu ai, wan gang shatu dat nhtawm, yup gawk de wa lagu yu yang,  madu jan apyaw sha yup taw nga sai. Madu jan gaw Ma Hka shaga ai na chyalu re,  shi nkam htan ya nga ai. Ma Hka gaw palawng ninghpu hkrai re pyi nraw kau ai, madu jan a makau kaw galeng bang wa sai, chyahkring sha naw rai yang, yupgawk nta pyi ganan na zawn nga hkra gawk bang wa sai. Bai madu jan gaw, Ma Hka tsa bat hkrai wa wa nga nna, nmai yup hkraw ai majaw, bunghkum hta la rai, nhtang hku yup mat sai. Jahpawt nhtoi mahka yang, madu jan shana tup yup shakrang kau nna, kan chyabung mat nna, grai ngoi galu ai nsa shamawng dat nu ai. Tsa bran wa sai Ma Hka gaw shi hpe shaga ai zawn nga ai mi na dat nna: "Nhpa daw awh?"ngu galaw gahte san u ai. Madu jan nhkap htan ya ai hta n-ga, sun sun nga ai mi manam pru wa ai majaw, masawp dat yu yang,  madu jan a maidang wa mi chyu she masawp hkrup u ai.

Shaloi Ma Hka gaw: "Sa-wa ndang e garawt na num mung e! "nga anyam la na, bai gale yup mat sai. Ma Hka galang mi bai dum pru wa yang, shinggan de jan pyi pru sai, madu jan galoi rawt mat wa ai re pyi ndum kau nga ai. Mayu nau hkun wa ai zawn nga nna, shat gawk na hka gatsi ka-mai kaba mi sa lu kau dat sai, ra ra naw nga ai majaw, dawdap nhtung na tsa dinghkru wa hta sharat yu yang, htingye sha pyi nrawng mat sai. Madu jan kaw gumhpraw hpyi la nna naw sa mari lu na wa rai sam ai ngu tam yu yang, madu jan hpe mung nmu mat nu ai. Shaloi she mare htumpa nta ni hkungran poi galaw ai re shai dat nu ai. Ma Hka loi agang mat sai dangpai lawai kau, kara mung zawng zawng rai,  zauhkai mung nhkai ai mare htumpa nta de sa wa sai. hkungran poi nta kaw du wa hkyem jang, chyinghtawng lap di la nna anyep gatsut kau, ta hte myi hkyi machyin kau rai shang wa sai. Hkungran poi kaw bungli sa galaw lawm ai ni grai mawng jawng nga mala sai. Ma Hka gaw wudang kaw lai shang wa ai hte: "Shawa masha ni ngai Ma Hka bai gaprip taw nga sai, chying bau hte lawan hkap tau la marit! "Nga nna jahtau dat u ai. Dai kaw nga ai ni yawng shi hpe myi jinghtawng rai jawm yu la nna, yawng mani mat masai, nkau gaw: "Salang hka wa poi bai shalum sa wa ra ai. "nga nna gahte tsun ai mung rawng ma ai. Shat gawk kaw shat sa shadu lawm nga ai madu jan Ma Hka a nsen na dat nna,  ndaw ya de kagat pru wa ra ai, Ma Hka hpe myi grai kaba hkra hpaw shachyen bun let: "Sa-wa nang ndai de nhpa la sha sa ai re ta?"ngu nna share dat jang,  Ma Hka mani sai sai rai tsun ai: "Ningnu dai hku hkum tsun le, ngai ndu yang poi nbyin ai gaw. "nga kau da nna, dawdap de hkre hkre shang mat wa sai.

Dawdap kaw salang ni sumpum mi dung nga ma ai. Ma Hka shang wa ai mu jang, nhtung maga de hkahku nhkaw hkaw kau hkra re dingla langai wa gaw,  myi nda hku Ma Hka hpe hkap yu let tsun ai: "Ma Hka nang daini bai lu yaw!" Ma Hka ga dai na jang: "Wa bawk, ngai ganing bai rai wa sa, ngai pyi ya she shang wa nga yang. " nga nna kawa bawk hpe ninghkap u ai. Kawa bawk du lasa she dingkren hkra rai: "Ya shang wa nna she sadi u ngu nga yang! "nga nna hta dat jang, Ma Hka gaw: "Um law, um law. " nga let gatsi dung mat sai. Ma Hka shara magup asoi yu yang,  shi ra sharawng ai baw rai nhtung shanang ai wanmang makau kaw dung nga ai. Shi chyan yu yang ndep nna,  kawa bawk a makau kaw dung ai salang langai mi hpe gahte tsun dat sai. Kawa bawk bai na kau nna: "Dai yu, dai yu, ya sha tsun nga yang! "ngu jang, dai makau hkan dung nga ai salang ni gaw: "Waw hta ya mu, shi galoi sha niu ai tawn yu ai Tsa chyaru mi gaw shara magup jawng nga yang mi, shinggan hkan tam lu yang grau nhtuk ai, ndai kaw anhte mu nga yang lu la nu ga. " "Hka wa tsa kut wa jang, n-gu hte pyi chye galai lu wa ai, ndai nmu lu jang, nta na rai bai wa saza na ra ai, singtsi sha tsa jawng nga yang, lau mat hkra lu la shangun mu. . . . . "Salang ni shing nga jang, kawa bawk mung ganing nchye ngu mat nu ai.

Ma Hka hpe tsa dinghkru hta ya dat jang,  tsa ru lu bang wa sai, shi a ta nau gari ai majaw, tsa htinggap de nmai ru bang hkraw nga ai. Kawa bawk bai n-yu lu wa nu ai "Ja i, nye hta gayup la nna wan mang kaw pak di kau na zawn ngu nngai law! "Ma Hka a makau kaw dung ai kara pyi hpraw sai dingla wa she: "Hka hka ngai du jaw de. " nga nna ru ya sai. Ma Hka a ta nau gari nna, dap de sumpum mi gatsap jahkrat kau nu ai,  tsam mari sha hting -gap daw mi lu mawut bang dat nu ai. Ma Hka tsa loi mi lu gahteng la jang she ta gari ai mung mai mat nu ai. Shi hkrai htinggap mi bai lu la ai hpang, jahta anya bang wa nu ai, kadai nkam madat ya tim, shi tsun shi htan,  shing nrai manang wa hpe gang gale la nna ahprup jaw rai u ai. Jan lawng wa jang, mayu da-ma makyin jinghku daw ai ni mung du rau masai. Jinghku ni hpe hkungga nna tsa ru jaw shagu, Ma Hka kaw mung hkra nga ai, shi gaw lu magang ja hkrai ja mat nu ai, ga shaga tim shinglet pyi laba mat sai. Salang ni nyu lu wa nna, yup nga u ngu jang,  salang ni a shingdu kaw yup mat sai. Shat sha ten du nna jasu yu tim nrawt hkraw mat nu ai. Shana de yang, Ma Hka dum pru wa sai. Salang ni shi hpe shat sa tam sha la su ngu jang: "Ngai na shat gaw ndai gaw e. " nga nna tsa palin daw mi re hta da-grawng lu kau sai. Kawa bawk ndung sai majaw, shi gade lu tim kadai n-gawn mat sai. Shi wan mang makau kaw loi mi dagup dung la nna, nga rang rai yup mat sai. Shana yup tung e, Ma Hka galang mi bai dum pru wa yang, shara magup asin chyip nga mat sai. Wan dat si mat jaw ang ai, shinggan de masha gaw grai naw garu nga ma ai.

Ma Hka shinggan pru mayu si wa nna, rawt shamu hkawm wa sai,  shi tsa rai nhkoi nga ai majaw, rawt hkawm jang gading gadang naw nga da nu ai. Ma Hka nbang n-ga na shakum hku masawp nna garet pru wa yang, gumgai sumpum mi yup ai gawk chyinghka lam kaw masawp du jang, nbang na chyinghka lam du jaw sai ngu myit la ai majaw, gawk de shang bang wa sai, dap hkun makau kaw bai du jang, ntawt rai ang sai ngu jit hpre pre ji dat ai jit si gamang wa nna gumgai ni hpe kra ai majaw,  gumgai langai mi gaw: "E. . . . . Goi law, goi law, kadai nan re ta?Ndai kaw mi jit sa ji ai gaw! "ngu nna jahtau marawn dat manu ai. Ma Hka gaw gajawng let: "Acha e, gumgai nante gaw ntawt de mi sa yup ai gaw. "nga nna jit pyi nji ngut ai pru mat wa sai. Ma Hka gaw hpang shana de masha pyi asan nga jang she nta lam gadawng de yawng mat wa sai. Shi gaw lam nmai hkawm mat nna, wa tai tai yu, nam hkan gang noi yu rai, gahkau wa a nta kaw du jang,  dai gahkau wa a nta de bai damyem bang wa sai. Ang sha-a gahkau wa anta kaw shat sha nga mala sai, shi shat kawsi sai re majaw, tsawmra mi mawut bang nu ai. Shat sha hkru nna dawdap kaw wa dung nga jang, tsa bai bran wa sai. Ma Hka shaloi tsa bai hpyi lu bang wa nu ai, gahkau gaw ya sha bran wa nga yang mi nga nna njaw hkraw u ai, Ma Hka gaw: "Hkau, ngai tsa nmu lu jang, la re zawn pyi nnga ai, gachyi mi sha pyi jaw yu rit. "nga nna hpyi aput taw nga sai. Ma Hka shing nga hpyi aput taw nga jang,  gahkau wa masin pawt nna tsa yam hte nawng sa hpai shadun tawn ya sai. Ma Hka gaw ya sha nrai yang tsa hteng lu la la rai dung taw nga sai. Shana yup tung tung wa sai hte maren, Ma Hka mung myikaw bai ndang sharawt wa nu ai.

Ma Hka wa sana ngu jang, gahkau wa tsun ai: "Tsa shade na sai mi ndai kaw yup mat u le. " "E, nmai law, ningnau jan grai pawt wa ai law. ""Um, nang hkrit chye yang wa chyawm rai nga ai,  wa yu su,  wa yu su. " Ma Hka gaw lakang kaw yu wa ai shaloi nhung hpyi nga ai hte rau, kraw awn awn nga wa nna, ningnang n-gau pyi rai nrap yang madawn ayai dat nu ai, madawn dat ai shat si mai ni gaw, ningnang n-gau dawga kaw pring mat hkra rai sai. Ntawt na gwi kagat sa wa nna manam yu ai hpang, makau kaw sa wau tsap nga nu ai. Gahkau wa madawn ai nsen na dat nna,  "Sa-wa nang nge, nmai naw yang gaw hkum naw law, ya kadai hte kau na rai! " nga nna marawn dat u ai. Gahkau wa shing nga jang, Ma Hka gaw:"Hkau, nang jaw ai shat si-mai ndai kaw bai tawn da sai yaw. "nga jahtau kau da nna nsin kata de hkawm shang mat wa sai. Ma Hka hkami hkama nga let, nta de tsam mari masawp du wa sai. Shi gaw myi nmu baw sin nga ai majaw, nta chyinghka lam nmu tam hkraw mat nu ai, wa lawng chyinghka lam masawp hkrup jang, nta chyinghka lam rai jaw sai ngu ganawng je shang wa sai. Shi gaw wa kanu a mkau kaw daw agrawp galeng taw nga nna: "Ningnu, waw de sit u, waw de sit u. "nga wa shachyat yup taw nga sai. Jahpawt de madu jan hkannu ni wa shat yaw sa yang, Ma Hka wa kanu hte yup nga la ai hpe sa mu nna, ntsin ban kaba mi sa jaw bun dat manu ai. Ma Hka shaloi she rawt gajawng dum pru wa sai. Shi shut dum sai re majaw madu jan hka jaw bun tim, ganing nngu lu nga ai. Kasha Ma Gam shi hpe: "Wa nang nla pran sa ai i?"ngu nna shatu jang, Ma Hka mani sai sai rai kasha hpe: "Ningnu ningnan langai mi tam yu na ngu ai wa, chyinghka lam nre ai kaw she shang shut a hka, e lasa ni law. "nga nna mani asang kau ya sai.

Madu jan gaw shi hpe: "Nang dai hkan tsa hkrai nang hkawm nga yu u le, asuya ni ma shangai shalaw ai nga sa shawa ma ai, nhpa sa hta ya na ngu ai rai kun?"Ma Hka tsa bai kut wa sai hte maren, madu jan shing nga jang, tsa nyan lu na hpaji bai gadaw bang wa sai. Ma Hka kasha mali shangai tawn u ai. Ma Hka ninghtawn rung du wa a nta de sa wa nna, ninghtawn rung du wa hpe tsun ai: "Asuya nanhte ma sharam shangai mu gaw nga, nba gaw nhtuk ya,  gashung nna num ni hte jawm yup jang ma bai lu wa wa rai, ma sharam shangai na rai yang gaw,  nba she naw htuk ya marit. " "Nang hpe ma sharam shangai na matu, mayat koi dagraw grai sa htawm ya sai le. " "Rai dai mung ta latsang hkan, lagaw kanu hkan shara magup dagraw chyam yu ma sai, num ni a kan bai bawng wa wa re wa re. "Ninghtawn du wa grai ndam hkra mani kau nna bai san ai: "Nang hpe dai hkan dagraw nga nna kadai tsun dan a ta?" "Shanhte ma sharam dap na magam lit gun ai ni she ta kaw dagraw dan ai gaw. Ngai yu yang, nba htuk ya yang she grau hkrak sai, nba lu jang gaw kadai wa num ni hte jawm yup kam na rai, lawan sa mari la masu. . "Ma Hka shing nga sa aput nga jang, ganing nchye di na, tsa pawng mi bai mari jaw dat jang she lu shabawn kau dat sai. Ma Hka wa kanu hte sa yup ai kaw nna, madu jan shi hpe gade pyi nsa shangun hkra tek kau nu ai. Madu jan gade tek timung, Ma Hka gaw madu jan a nhpye hkan gumhpraw lagu shaw la,  chyahtai wa, singga wa rai gumhpraw kawat ia nna, yupku kata hkan,  shakum lapran hkan tsa mari makoi tawn nna lagu lu rai u ai. Madu jan pawt na hkrit jang, hpunlum gawm kaba kaw tsa bang la nhtawm, ndaw ya hkan gawut la nna lu dat dat rai u ai.

Madu jan gaw Ma Hka hpunlum lu ai hkrai she shadu nga ai. Ma Hka gaw madu jan gade hkan tek tim lu mayun pru mat wa nga ai,  galang mi lu pru mat we jang. mare sha kawam tim gat lapran mi rai jang she nta du pru wa nu ai, mare gale jang gaw hpagan du ai daram na ra ai. Shi gaw ganang atsa nga yang ganang nan,  ganang ningsin sin yang ganang yup rai bu hkawm taw nga sai. Gade nna ai Ma Hka jahkru hkrai jahkru nna nmai shamu mat nu ai, madu jan tsi rung de sa woi jep yu yang, salum ana lu ai hta n-ga, sinda hkan ntsin rawng wa sai da. Ma Hka tsi rung tsawmra na hkra rawng kau nu ai, tsi rung pru na shani tsi sara ni tsa malut nmai hkra sai nga nna hkan matsun dat ma ai. Ma Hka tsi rung pru ai shata mi pyi rai ndu yang,  shawoi na hte raw bai rai mat sai. Ma Hka tsa galang mi tawn kau nna bai lu jang, grau apup apap she rai mat sai, tsa mu lu jang gaw anya hkrai anya hkawm, tsa nmu lu ai shaloi gaw u dagup hkyem ai zawn rai lanyan hkawm rai u ai. Ma Hka a madu jan gaw shi hpe pawt mayu ai hte rau, gaya mat nu ai, nau pawt mayu nna shi hkrai sha hprawng hkawm mat yu sai, ma ni hpe nau dum nna nhtang wa yu yang, ma ni gaw dumbru dumbra rai mare hkan she nga hkawm mat nga ai. Ma Hka rai jang kasha lu ai zawn mung nrai, mare hkan hkrai bam hkawm nna, loi mi bran wa jang, nta kaw rem tawn ai u hte tsa galai lu re majaw,  madu jan du wa jang, u langai mi pyi nhkawm mat sai. Madu jan nnga jang she kabu ai zawn rai, tsan la she laja mat hkra agang mat nu ai.

Shi a n-gup na tsa bat gaw ma ni hpe sa bun dat yang,  pyi nang mat na daram she rai nga ai. Madu jan pawt mayu nna, Ma Hka lu ai tsa pawng gashun la nhtawm, shi a baw kaw ru bun dat ya yang, Ma Hka gaw pawt pyi nchye mat sai "Hi--hi •-"nga mani kau ya u ai. Hpang e shi lu ai tsa kaw ntsin galai bang kau ya yu yang, shaloi chyawm Ma Hka grai pawt wa ra ai, madu jan a kaji gake kaw du hkra ashap bun nga ai. Madu jan Ma Hka a tsa pawng lagu la nna, sun kaw sa htu lup kau ya yang, shingbut tam nna chye ahkrai lu kau rai nga ai. Shingrai Ma Hka hpe nchye sharin shaga si wa sai. Ma Hka jan madu wa hpe yu mau nga yang, mare salang ni Ma Hka pe naw-ku jawng de laika hpaji sharin sa shangun na hku anyan gadaw nga ma ai. Ma Hka gaw mare salang ni a ga pe nlale lu ai majaw, jawng sa wa sai. Ma Hka jan mung tawng ya mi gaw grai myit pyaw mat sai. Shata lahkawng a hpang, Ma Hka jawng kaw nna pru wa ra ai. Ma Hka gaja wa grai zet mat sai, bungli galaw mung grai kyet nga ai. Raitim gade nna yang,  Ma Hka bai ndang sharang mat nu ai. Ma Hka tsa bai lu hpang wa ai shani kaw nna, madu jan mung shi pe nhkyem sa sai, Ma Hka tsa nang jang,  zauhkai gyepdin hte shabyi bye ya,  hkum hkan lung jawn tawn nna adup rai tim,  Ma Hka gaw hpa zawn nnawn ya nga ai. Shan shani shagu nau ga-law ai majaw,  mare salang ni mung lahkawng masum lang sa hparan ya yu sai. Salang ni a man kaw Ma Hka pang de nlu sana nrai sana nga, lani mi pyi rai ndin yang bai nang hkawm taw nga sai.

Mare salang ni mung shi matu baw grai machyi mat sai. Ma Hka shingrai nang hkawm ai na wa jang, poi shingra hkan tsa nang masu nna, shan krai gadoi hpai mat wa, sha hpa lama mi kra nmai ai mayun hpai mat wa rai u ai. Lana mi na nhtoi hta, Ma Hka maigan gahtawng langai kaw sa yang, sa hkru nna masha ni a yupgawk de bai lanyan shang wa ai majaw, masha ni e num shaw shadu nna pyada ni e magra mat wa sai, shaloi madu jan gaw ndai lang chyawm shari na sai ngu grai lagu kabu kau nu ai. 15 ya hpang Ma Hka bai pru wa ra ai. Ma Hka gaw myit malai lu ai lam gate mi pyi nga nga ai. Gwi a shingna malap pa she rai nga ai, pru wa ai lahkawng masum ya re hte tsa bai tam lu hkawm mat wa sai. Madu jan gaw tsa yam hte yupgawk nmai pawng mat sai majaw, Ma Hka hpe yupgawk kaga san ya kau sai. Ma Hka gaw shi a wa tsip zawn re yupgawk kaw galoi hkrup galoi wa ganaw yup, nkam wa jang gaw nwa rai u ai. Madu jan shi hpe nau pawt mayu nna, shata mi dang nmu mat tim nhkan sagawn mat sai. Ma Hka shingrai chyum ai laning chyen mi lai ai hpang, Ma Hka bai machyi wa nna, shi a yupgawk kaw gatsi rawng mat sai.

Madu jan Ma Hka hpe gade nju tim, si wa na zawn rai nga ai majaw, makyin jinghku ni hpe saw la nna tsi rung de sa jep yu yang, sinja ana gale mat nna, nlu tsi la mat sai. Madu jan hte makyin jinghku ni ganing nchye di nna nta de bai woi nhtang wa kau masai. Ma Hka si wa na ningtawn e rai tim, tsa chyaru hpe nmai malap hkraw nga ai, shi gaw shani shagu tsa naw jaw marit nga nna hpyi satsang u ai. Madu jan shi a ga hpe nri nna tsa ru jaw dat jang: "I. Lamu ganghkau ntsa e pyen ai zawn nga wa sai lu "nga nna sharung taw nga u ai. Lahpawt mi madu jan gat sa nna nhtang wa yang Ma Hka hpe wa shaga shamat kau sai. Ma Hka a mang hpai ai shani, si poi sa ai masha grai law ai, law malawng gaw "Ga hkawn sa" ai hkrai re. Shanhte gaw simai nma sha jang makai hpai mat wa, tsa mung kan kaw hkru jang,  dinghkru kaw du gun, nang gumpa jawng ai mung sumpum mi rai, hkoi shap nna sat ai dumsu lahkawng mung, si poi pyi rai nbra shi yang, nra gaman sha noi mat sai.