"Aring, nang le, laika hpaji gaw grai chye ndai, sumtsaw sumra lam hta gaw hpa n chye ai, ma kasha langai zawn nan rai nga ai le." Ring Nan hpe yu n-gun n lu dik ai hku tsun kau dat ai Seng Tawng a n myit mada ai, kaba la ai ga si ni a majaw, Ring Nan masin loi brawng sha mi nga wa ai, hpa majaw nang ngai hpe dai hku tsun ai rai ngu naw san hkyem nga yang: "Hpa hkum san chyai nga sa, gaja wa nga yang nang hte htuk dik ai gaw Lat Mun Pan sha re. Ha, ngai gaja wa tsun ai le, anhte jawng kaw na sha gaw, tsawm htum shadang, tsawm htum shayi janmau lu ai mung nan sha rai nga ai, laika hta nga yang mung, nan lahkawng hpe gadai pyi n dep na re, bai nna, Lat Mun Pan mung nang hpe nga yang myiman jaw ahkyak la dik ai wa mi, hpa majaw nang shi hpe myit n shang sha ai gaw ngai mau pyi n ma sai re."
Dai shaloi Ring Nan nsa kaba shaw la let, mani sum rai: "Lat Mun Pan hte an yan gaw, moi naw gaji ai aten kaw nna grai tsawra hkuhkau ai manang, ya mung moi na zawn sha re, ngai shi hpe hpa rai myit shut na rai, bai an a lapran kaw na hpraw tsawm ai makyit sumri hpe ngai nsam n kam chya ai." "Ha, Aring, nang atsawm sha myit yu u, anhte myu mare gata hta, Lat Mun Pan daram tsawm ai num sha naw nga ai i?" "Atawng, nang tsun ai gaw re le, raitim ngai wa..." "Dai wa mi nang gaw grai she n nga i? Gaja wa nga yang, anhte mare kaba kaw na sha gaw tam yang taw ai baw sutgan langai re lu, nang ahkyak n la n la she di nga u le, loi hkring manang ni ret di la kau ya jang gaw mau mahka mat na lu, shingran pyi mu ai."
Ring Nan gaw yu htuk dik ai hku baw hpe nga di nna, Kawriya kaw na sumla hkrung shadang ni zawn lahpa lahkawng maga hpe loi mi sharawt shatsaw let, shi hti nga ai laika hkan na ga si ni hpe: "Tsawra myit ngu ai gaw tsawm ai n tsawm ai ngu ai hte hpa n seng ai, Atawng hkuhkau ai, ahkyak la ai ni hte mung n seng ai, nye salum gata kaw na shi na shi hkrai, kraw hkai wa ai hkam sha ai lam ni hte she gaw de mai ai, Lat Mun Pan gaw tsawm ai, ram ai, bai nna ngai hpe mung hkuhkau makyit sumri tawn da ai, raitim ngai shi hpe n tsawra lu ai, ngai tsawra ai gaw, Chyahkyi Lu re, ngai hpe tsun ya rit yaw, Chyahkyi Lu hte nang gaw jawng gawk mung bung ai n rai i?" Seng Tawng gaw baw hpe gang kau nna: "Dai jan she rai yang gaw, ngai n kam tsun ya ai. Nang shangun na rai yang Lat Mun Pan hte she myit hkrum ya ai, dai jan hte she rai yang gaw nang madu tsun la u, ngai hpe shangun na matu gaw la sha si u yaw."
"Aga, Atawng nang wawa mung grai tsun yak ai." "Re, nang Chyahkyi Lu hpe she sumtsaw ga tsun na rai yang ngai hpe hkum tsun shangun, htaw Lat Mun Pan hpe she jang tsun shangun u, Lat Mun Pan hte Chyahkyi Lu shan yan gaw nta mung ni hkat ai, dai sha re, ngai wa sana." Dakkasu jawng wang gata e hpaw tawn da ai hpalap seng kaw nna Seng Tawng hte Ring Nan namsi ntsin ni lu ma rai bra masai. Seng Tawng shi a mawdaw hpe "Wu" nga hkra gau mat wa sanu ai hpe hkan yu nga ai Ring Nan nsa kaba shaw la nna, nang hpe garum n lu hpyi tim n yawn ai, ngai Lat Mun Pan hpe tsun shangun tim mai ai sha re, ngu anyam la nna shi na sengke jak jasu la nhtawm, pru mat wa sanu ai. Bat mi daram na ai hpang, Ring Nan Lat Mun Pan a jawng gawk de sa wa yang, Lat Mun Pan ni jawng yu ai hte hkrak rai nna, jawng gawk kaw na pru wa ai Lat Mun Pan gaw shi hpe mu nna mau mau rai, Ring Nan hpang de ni gahtep sa wa nna: "Aring hpa sa galaw ai rai?" "Nang hpe wa tau la ai le, arau wa ga ngu mayu ai goi." "Sagya e, mau hpa hkye hkrang wa she rai sai, nang hpa byin wa ai re ta?" Ring Nan gaw mani sum rai let: "Hpa n re, ngai nang hpe lama mi tsun na ngu nna goi."
Ring Nan shing nga jang Lat Mun Pan myijut kabai let: "Gai, tsun u, nang ngai hpe hpa tsun na lam nga ai rai?" Ngu baw hpe nga di nna azi yu nga yang: "Gara kaw na, ganing ngu tsun hpang na re pyi n chye mat sai, nang hpe gaw gaya ai hte, n tsun gaw n mai n dum yang mung n ngoi nga ai baw le, hehe." "Mungkan e, nang wawa mung hpa tsun na ngu rai, dai daram tsun yak ai gaw, gumhpraw hkoi na ngu ai i?" "Haha, ngai gaw nang kaw hpa di gumhpraw hkoi na." Ring Nan myiman nsam she hten hkra ningdang ai mu nna, Lat Mun Pan grau shala mayu wa ai majaw: "Shing n rai gaw, nang kaw masha ni n mai chye ai baw prat dep ana, shing n rai sin hkraw ana, bai ya aten grai tsang ra ai baw kawruna sinwop ana machyi wa ai i?" "Mak tek law, nang tsun ai hku nga yang, ngai kaw gaw ana tsip ana daju she rai mat sai, um le, ana gaw ana re rai tim, ya nang tsun ai ana ni hta grau ahkyak ai." "Oh, re i?" "Apan nang hkum sagoi kau ya le." Lat Mun Pan gaw Ring Nan shi hpe hpa tsun mayu ai, hpa shangun mayu ai lam ni mahkra Seng Tawng jau nna chyenan gayet da ngut sai re majaw, Lat Mun Pan gaw Ring Nan hpe da-sang sang agya ala ngu shala nga ai rai nga ai.
"Nang chyawm tsun na gaw lawan n tsun nna mi." "Apan ngai, ngai sumtsaw tawn sana ngu..." "Gaja wa i? Nang gaja wa tsun ai i?" Lat Mun Pan gaw Ring Nan hpe n kam ai nsam hte yu nga ai. "Kadai rai?" "Chyahkyi Lu." "Chyahkyi... Nang ra taw ai gaw masha she shadu da ai wa mi dusat she rai nga ai le taw..." "Mana law, dusat n re law, Chyahkyi Lu law." Ring Nan lawan bai sharai tsun ai hpe Lat Mun Pan loi mi mani kre la ai hpang, hten nga ai myiman bai sharai la nna: "Rai sai le, Chyahkyi mi rai rai, shannga mi rai rai, hpa rai ngai hpe sa tsun ai re ta?" "Hehe, nang hpe tsun shangun na ngu nna le." "Karai e! Ngai wa na sumtsaw gasa tai ya na hku i?" "Re le, Seng Tawng ngai hpe tsun ai, Chyahkyi Lu hte nang gaw nta mung ni hkat ai, hkau mung hkau ai, dai majaw ngai hpe naw garum la rit yaw." Lat Mun Pan gaw grai tsawm hkra mani nga ai. Lat Mun Pan mani sum di dat yang, nachying tsawm la nga ai myiman hpraw nsam gaw ahpraw atu rai, shabyi sha pau pau rai, ladi mung preng yan sha rai, htat la ai myikaw mun ni gaw masha shagu a myit masin salum hpe gang jahkring da ya lu nga ai.
Raitim Ring Nan a salum gaw manang langai hta lai nna n jan nga lu ai. "Mai ai le, she tsun ya ra gaw, nang gaw ngai tsawra dik ai manang langai she re mi, she garum ra law." Lat Mun Pan tsun ya na nga ai ga hpe na dat ai hte rau, saboi ntsa e mara da ai Lat Mun Pan a lata hpe Ring Nan myit pyaw ai hte jum tek let: "Chyeju kaba sai yaw! Apan ngai grai na gabu sai!" Ring Nan jum da ai kya kya sha nga ai Lat Mun Pan a lata hpe grai na hkra jum nga ai hpe dum dat ai hte rau: "Ha, grai tawngban sai yaw, ngai grai gabu mat nna, hehe." Lat Mun Pan gaw ma kasha langai zawn, kalang gaw nten gawa tawn, kalang gaw shabyi shabawng tawn rai: "Hpa re pyi n chye ai, kalang gaw gabu ai nga, kalang gaw tawngban ai bai nga, n mana wa ai i!" Ring Nan mung n-gun mi alu rai mani la nna: "Apan, nang le, nye a matu Karai Kasang e jaw ai manang gaja majing re yaw." "Um law, um law, nang myit pyaw jang ngai mung myit pyaw sai." Shata mi daram na ai hpang, nampan sun kaw Ring Nan Chyahkyi Lu hte pyaw chyai hkawm la nna nta de wa ai lam kaw, n myit mada ai Zau Chyan hte hkrum sai, Ring Nan sengke jahkring dat ai hte Zau Chyan sengke ntsa e lakrang dung nga nna: "Gai, Aring, gau sanu." Ngu tsun dat ai hte Ring Nan gaw: "Hkau Zau hpa galaw ai ga re? Gade gau sa ga ngu ai re ta?" "Ding ding sha gau u! Ngut jang, la-pai maga magaw bang dat u, e kaw na 'MALI HKU' lu sha seng ngu ai de gawt sa u." "Aga! Shinglet mung galu lu ai wa, nang hpe ngai lama mi tsun ra nga ai."
Ring Nan ganing n chye ngu mat sanu ai, ramma manang re majaw ningdang na yak mat sanu ai. Bai nna Zau Chyan gaw shi tsun yang tsun ai hku galaw chye ai hte loi grang ja ai wa rai nga ai hta n-ga, sut masa hkrun lam hta ningnan sha naw shamu shamawt hpang wa ai la sha langai rai nga ai, Ring Nan gaw sengke ntsa kaw nna yu ai hte: "Hkau Zau, nang ngai hpe hpa di hkyem ai ta?" Zau Chyan mani sum rai, myikawng maga mi sharawt la let: "Nang n ngan re hpe wa ngai ganing lu di na!" Ngu tsun nna lu hpa, sha hpa ni hpe htet nga ai. Zau Chyan htet da ai gaw, tsa pyi gawm kaba lahkawng, shan ju hkaipyek gakang hte kaga hpan hkum sumhpa ni rai nga ai. "Nang hpe ganing gaw n di lu law, na gumhpraw sumbu kaw na gumhpraw mahkra shaw dat u ngu hkyem ai she rai yang mi e." "Tsa pyi lu hkyem ai kun? Ha, hkum mai u ga le, anhte ni gaw jawng kaw na da, hpung kaw na da ningbaw lit gun ai, ramma hpung kaw na ningbaw mung re, dai hku n gaja ai kasi gaw n mai galaw ai, gumhpraw ma ai gaw n ahkyak ai." Zau Chyan gaw Ring Nan a ga hpe nau n na ra ai nsam hte agya kau ya let:
"Hpa hkum palek chyai nga, daini gaw nang lu ra ai, anhte zawn re ramma ni n lu ya yang, anhte Jinghpaw Wunpawng ni a tsa pyi hpe gadai lu ya na, amyu kaba, sai kaba amyu ni gaw gadai gade a htunghking hpe gaw chye tsawra ma ai, mala la sha n rai jang gaw htunghking sharawt ai hte pyi naw bung ai, hehe." "Ngai n chye lu ai mi gaw, tsa n lu tim tsa mai gaw sha garum na le." "Dai hku n mai ai Aring, ndai kawk mi sha lu kau u, ngai hkrai n ma lu ai, htet pyi htet kau sai re gaw lahpawt lama, bai nna ngai nang hpe sa shakram ai ga re." "Nang gara de sa hkyem ai wa?" Zau Chyan Ring Nan a ga san rai n htai shi ai sha azi yu nga let: "Aring nang sumtsaw lu sai nga ai, re i?" "Re, lu sai le, hpa byin ai ta?" Zau Chyan a shadut shadat nga ai ga a gata hta, Ring Nan tsa n lu ga ai raitim, tsa pyi kawk kasha mi dik di lu bang dat sanu ai, n lu ga ai re nna, kraw n hkrat nga ai. Kawk mi tsawm mari lu shakre ngut ai hpang baw yin yin nga wa nu ai, Mali hka kau de na mawng lung wa ai saiwan ni, nbung gatsi ni a majaw rai na sai. Zau Chyan chyawm gaw matut manoi dagrawng tik tik rai bu nga ai, Ring Nan hpe mung shaga masu su let, bang ya ya di nga ai.
Ring Nan mung Chyahkyi Lu a lam tsun nga lu ai majaw nachying wa myit dik ai hte: "Aring nang gara hku byin mat ai ta?" "Ngai wa i, Chyahkyi Lu hpe tsawra ai le, dai majaw ngai Lat Mun Pan hpe garum hpyi rai tsun shangun ai kaw nna byin mat ai le..." Ring Nan a myi tum ni myi mazup kaw e mahkawng nga sai. Shinglet mung ali ahti nga, n san ai pyi tsun dan na masa rai wa nga sai. Ring Nan a myi gaw Zau Chyan hpe yu nga yang, marai lahkawng masum byin wawa rai nga ai hpe tsawm mari sharai yu yu rai nga ai majaw, myi hpyi pyi htap lahkawng masum she gahtap nga sai. "Aring, ngai na manang ni tsun ai, na sumtsaw jan a shingdu labau nau gaw n tsawm ai da re lu." "Dai lam ni yawng ngai na ngut sai, shi sumtsaw law ai mung ngai chye ai." Zau Chyan gaw nsa kaba shaw let, lu nga ai tsa pyi gawm hpe lu shakre kau let: "Ngai gaw nang hpe Lat Mun Pan hte she byin shangun mayu ai, bai nna nan lahkawng gaw grai htap htuk ai." "Raitim ngai wa Apan hpe gara hku nna mung n hkam sha lu ai le, ngai tsun dan na tsawra myit ngu ai gaw aloi hte sha galaw shachyaw la n mai ai, htaw sung htum...
Ring Nan ga pyi rai n htum shi yang Zau Chyan a gawm hta tsa pyi bang let: "Rai sai le, nang Lat Mun Pan hpe myit n shang sha ai nga yang mung rai sai, ya ngai Lat Mun Pan hpe sa woi prawn na ngu ai re, dai majaw ngai nang hpe chye shangun mayu ai hte nang hpe sa shakram ai ga re, ndai tsa pyi manu hte tsa mai a manu ni hpe gaw, ngai hpe shakram ai hku nna, daw ai hku sawn la kau sanu yaw." Ngu tsun let rawng nga ai tsa pyi ngam hpe dagrawng lu kau let pru mat wa sanu ai. "Hpa da oh? Ndai..." Zau Chyan gaw Ring Nan a ga hpe n la madat ai sha pru mat wa ai hpe Ring Nan hkan yu dat let: "Mak tek! Sa-wa ara ngai hpe hkrai bai maw kau da sai ga rai nga ai, seng madu ni, ndai kaw gade ang sai kun?" Dai shaloi seng kaw na mahkawn kasha langai sa wa nna: "Yawng rai yang mun manga e hkying kru sha ang ai, Agu." Ring Nan rawt nna gumhpraw sumbu shaw na ngu rawt tsap ai hte gading gadang nga wa ai majaw, bai dung nna gumhpraw shaw yu yang: "Ha... Mun lahkawng jan sha rawng mat sai, daihpawt sen mi jan naw rawng ai ngu ai wa mi, hehe, chyahkring mi naw yaw, ngai na manang ni kaw chyenan naw gayet na, ya loi hkring manang ni du jang jaw na yaw, mai ai n rai?" "Mai ai."
Ring Nan myit ru myit yak hkrum sha nga sai, shi daihpawt gumhpraw sen mi jan bang sa wa ai gaw, shi sumtsaw jan hpe sen mi mun lahkawng nga ai labu palawng mari jaw kau dat ai hpe, sawn dum dat sanu ai majaw, shi sumtsaw jan hpe chyenan gayet nna garum hpyi na hku myit lu ai hte: "Oh, oh, halaw, Lu i?" "Halaw, Lu Mai re, ya gadai re kun?" "Amai, Aring re." "Aring, nang gara hku byin ai ta? Ga shaga ai mung baili baila nga, nang tsa nang taw ai i? Ram sai dai zawn re arawn alai ni hte ngai kaw galoi mung hkum matut mahkai wa, grai myit n pyaw mat sai, nang gaw dai zawn re akyang, dai zawn re arawn alai nga ai re n chye ai majaw, nang hpe hkap la ai ngai shut mat sai, dai sha re!" Gawk galak nga hkra chyenan jahkrat nsen na ai hte, shi tsawmra mi myit ru mat sanu ai hpang jahtum e, Seng Tawng hpe kalang mi bai chyenan gayet dat sanu ai. "Atawng ngai hpe naw sa garum la rit. Ya ngai Mali hka makau kaw na, 'MALI HKU' lu sha seng kaw re." Ring Nan bai dum wa nna myi hpaw yu yang, wap wap nga shi n chye ai yupku kaw rai nga la ai. Shi a myihpyi hpe atsawm galap yu yang, shi n du ga ai yupgawk tsasam, gaji tim asan aseng rai nga ai hpe mu nna rawt dung wa let: "Ya ngai gara shara kaw wa rai wa sa ta? Sumla hkrung hkan yu hkrup ai gaw tsa ya ni tsa nang jang lam makau hkan she yup ai mu ga ai mi.
Oh, ngai gaw tsa ya n rai nna, ning re yupra kaw yup nga ai rai sam ai." Ngu Ring Nan shi hkrai anyam dung nga yang, shi shingdu e shingna langai nyip rai pru wa nna, Ring Nan a n-gup hpe yat sha pat ya let, hkum shaga zim sha nga u ngu ai lachyum hkrang shapraw nga ai gaw, Lat Mun Pan nan rai nga ai. "Nye yupgawk... Ngai na yupgawk kaw nang du taw ai re." "Ha! Ganing rai na yupgawk kaw ngai du nga ai re ta?" "Nsen nau hkum shaja shaga!" Ring Nan mung Lat Mun Pan gahte tsun ai hku hkan gahte chyam yu nga ai. "Ngai n chye gahte ai gaw." Lat Mun Pan gaw Ring Nan hpe tsawm la ai myijut kabai let: "Nang hkum shaga, ngai tsun dan na." Gaja wa nan mung, Ring Nan a prat hta n gahte ga ai zawn chye mung n chye gahte nga ai. Ring Nan hpe num kasha ni kaw nna shawng ningnan sharin la ai gaw, gahte ai ga shaga ladat nan rai nga salu ai. De a hpang e yupgawk kaw na mapmap nga ai wanpu npu e, Lat Mun Pan gaw Ring Nan hpang de gahtep sa wa nna, yet sha gahte let: "Daina maga de Seng Tawng ngai kaw chyenan gayet wa ai, nang 'MALI HKU' kaw gaya hkrum hkyem nga ai nga nna, ngai manang ni hpe garum hpyi na kun ngu mung gaw myit ai, raitim nang na sari kaw hkra na ra ai ngu myit rai, nye mawdaw hte nang hpe woi wa ai re, bai nna, na nta de nang tsa nang ai hkrang hte wa yang nang pawt gatut na mung tsang ai, nye nta masha ni pyi gadai n chye ai." "Ha! Manghkang wa she rai sai."
"Rai nga ai le, nang she manghkang tam wa nna gaw, Aring nang hpa rai tsa lu ai re ta? Shawoi pyi n lu ai mi, bai nna nang gaw jawng ting kaw na jawngma ningbaw langai n re i? Dai zawn re n gaja ai kasi n mai madun ai re le." "Re law, ngai shut mat sai law." Lat Mun Pan nsa kaba shaw let: "Aring nang Chyahkyi Lu a majaw grai hkam sha nga ai i?" "Ha, hpa n seng ai law, nang wawa mung." "N chye ai le, nang shawoi pyi dai hku galoi n nga ga ai mi." Ring Nan hte Lat Mun Pan yet sha nga shaga ai nsen hte: "Ya, ganing di sana?" "Nang tsa nang bran hkra, ngai na makau kaw dung yu nga ai re, grai myit ru ai law, nta kaw na ni yawng yup ma sai, chye mat jang gaw grau manghkang kaba mat na ra ai." "Hpa rai ngai hpe sa woi wa ai rai?" Dai shaloi Lat Mun Pan, baw hpe yet sha gum let: "Ngai nang hpe n sa woi wa yang, nang ganing di sana, dai aten nang ngai hpe ra ahkyak nga na re ngu shadu nna, ngai shut mat sai i? Aring?" Lat Mun Pan a ga san hpe Ring Nan rai n htai shi ai sha, loi mi na ai hpang she: "Ngai madaw she shut sai law, Zau Chyan manghkang tam kau da ya ai rai nga ai le, shi gaw nang hpe woi hprawn na nga ai, re i? Nan lahkawng gaw sumtsaw kun?"
"N re law, shi nang hpe majoi shala ai rai nga ai, shi hte she byin yang gaw, nang hpe nye yupgawk kaw hkum wa makoi da u ga le, gadai wa nang hpe mara raw ya lu na rai?" "Re, na nu yan wa chye jang mung n loi na re, nang grai gwi ai she rai nga ai." "Nang gara hku wa na, hkying langai rai hkyem sai." "Nta kaw na ni gaw pawt sana sha rai sai." Dai shaloi Lat Mun Pan gaw, shi nta de chyenan gayet da ya sai, nye nta kaw ngai hte laika hti nga ai lam, nta wa loi hpang hkrat na lam shana da ya sai lam tsun dan nna, Ring Nan a manghkang ni yawng mayawng a matu atsawm sha lajang da ya ai Lat Mun Pan hpe, hkungga dik ai nsam hte mada yu nna: "Chyeju kaba dik sai yaw, Apan." "N ra ai goi, Aring na manghkang mung nye manghkang hku sha ngai hkam la ai." "Ngai hpang kalang ya na zawn bai shut wa yang, na yupgawk kaw kalang mi bai wa makoi rawng nga na ahkang naw nga na kun i?" Lat Mun Pan Ring Nan a lahpa e yat sha adup ya let: "Daina na lam ni hpe malap kau sanu yaw, Aring ngai nang hpe wang shinggan du hkra sa sa da na, na sengke hpe gaw htaw ra marau hpun lahkawng a shingdu e makoi da ya sai."
Mahkawn hkawn ji langai a yupgawk kaw na rai n pru wa shi yang, dai mahkawn kasha a lata hpe atsawm sha jum nna shakram let: "Apan." "Hpa ta?" "Chyeju yaw!" "Um law." Hkying langai jan du hkra rai n yup shi ai Ring Nan a gawa gaw, "Du wa sai i?" "Re, awa." "Zeng gaw nga nga nni?" "Wa nang hpa baw san mayu ai ga re ta?" "Oh, laika hti ai zeng gaw nga nga ai i ngu na she san ai goi, nang wa mung hpa rai nga ai ta? Lat Mun Pan gaw nang shi hte laika jawm hti nga ai nga, chyenan gayet da ai kaw na chye sayang mi, ngai gaw na wa re yaw, ma hpe wa ga gaja langai tsun mayu ai, shinggyim masha ngu ai gaw kalang lang chye shut ai hkrai re, de a matu mara dat ya ai hte, hkye hkrang la ai lam ngu ai nga ai. Raitim kalang mi shut ai hpe mara dat ya ai majaw, ya ya sha ashut nga yang masha gaw mara raw ya ai hte hkye hkrang la ai lam hte n gingdan na re. "Mai sa, awa." Shi gawa rawt tsap nna Ring Nan a lahpa hpe ahpuk ya let: "Lat Mun Pan gaw shi a sari sadang hte num sha langai a arawn alai ni hpe nyet kau hkra rai, tsa seng gata kawn nang hpe hkindun woi pru wa ai, mawdaw ntsa mara htaw woi wa ai ni hpe awa mu kau da sai. Dai hpe awa mung yu mau ai. Num sha langai hte tsa seng gaw hpa n seng ai, raitim, shi nang hpe manu shadan ai, shi a sari hte, nang hpe makawp maga la ai hpe gaw nang hkrup mara di kau na hpe sha awa tsang ai.
Ya na hpang kalang hpa lam hte na mi rai rai, tsa seng de hkum sa sanu, dai sha re. "Ma n myit mada ai sha..." "Ram sai, lele wowo hkum tsun jahpai, nang shi yupgawk kaw rai nga ai aten hta, shi ganu gawa ni chye mat jang, gaya gahpa byin wa chye ai baw re, nang shi ntsa chye myit ya ai baw re, hpang kalang dai hku hkum rai sa, shinggyim masha ngu ai kalang sha mai shut ai, ahkaw ahkang ngu ai mung kalang sha lu mai ai." Ring Nan a kraw hta, mai sa, ngai hpang kalang e n galaw sana, sadi sahka hte nga sana ngu myit malai nga u ai. "Aring nang hpe le, anya ai ngu yang gaw n kam hkap la, nang ram ram anya ai gaw, mungkan ga ntsa e n nga na sai." Seng Tawng gaw Ring Nan hpe kalang bai tsun jahpyak nga ai hpe n kam hkam ai, myiman nsam hte, bai azi yu nga yang: "Hkum yu nga, htaw, nde sa wa ai gadai kun?" Jawng gawk gata kaw na pru wa ai Lat Mun Pan gaw Ring Nan a shingdu e du ai hte: "Hpa ni wa mi tsun hkat nga ma ta? Nan yan hpe yu yang, hka mau mau ai zawn rai, yu hkat nga nna wa mi." "Aring sumtsaw langai bai tawn sana da law." "Ha?" "Langai hte rai n ram shi ai ngu? Gai tsun yu u, ngai gadai hpe bai tsun ya ra na re rai?" Dai shaloi Ring Nan gajawng gaja rai: "Majoi, Atawng dai jawp nga ai, ngai Chyahkyi Lu hte hka mat sai, ngai... Ngai brang tung she tung nga sana ngu ai goi, ya an pyi nang hte muk sa sha ga ngu nang hpe la taw ai re." "Gaja wa kun?" "Gaja wa le!" "Rai jang gaw, sa!"
"Dai Aring hpe nau hkum kam yaw, Apan, Aring shi bawnu galaw taw nga ai, ya chyahkring muk sha ngut jang gaw an yan hpe bai shangun sha na kun pyi n chye ai." "N ra ai goi, ngai Aring hpe kam ai, Aring gaw brangtung brang gye galaw na da, re n rai Aring?" Sanyen zawn baw hpe lawan ladan gum nga ai Ring Nan hpe Seng Tawng gaw: "Galoi du hkra brangtung tung nga na rai? Ngu na naw san u le, Apan dai wa hpe mi nang rai nna she kam ai, tsun pyi n kam tsun shamying ai." "Gai, dai rai jang gaw, san sana, Aring nang galoi du hkra brangtung tung nga na rai ta? Tsun dat u, Aring, Atawng ndai lam n san jang muk lu sha na n tai ai re majaw." "Um, htai na le... Hka gara hku tsun na, Apan a yupgawk de hpang kalang bai rai n du wa shi ai aten du hkra..." "Hpa ni tsun taw ai ga re ta Aring?" Lat Mun Pan Ring Nan hpe yu mau nga yang: "Ngai gaja wa tsun ai Apan, nye wa tsun ai, ahkaw ahkang ngu ai gaw kalang sha mai lu ai da, ngai hpe chye na ya rit yaw, lani mi na nhtoi hta ngai tsa n nang ai sha, nang mung ngai hpe mayun mayawi makoi sharawng da ai hku n re ai sha, shawa masha lawlaw a man e, makyin jinghku yawng a man e, sari mi anga rai hkungran la nna she na yupgawk de ngai shang wa mayu ai." Lat Mun Pan baw hpe gum da nga ai hpe Ring Nan shi nhka hpe si mani dik ai hku jum let: "Apan nang hpe ngai n chye tsun hkra tsawra hkrup mat sai."
"Dai ga gaw na kraw gata kaw na salum ga ajet re i Aring?" "Re, ngai le nye makau kaw na tsawra myit ajet hpe moi kaw na mu ging ai re wa, ngai n hpang hkrat shi ai law i Apan?" "Aring nang hpe marai langai ngai sharin ya dat ai n re i?" "N re law, nye kraw gata kaw na ya she kraw hkai wa ai tsawra myit ajet ni nan re, Apan." Lat Mun Pan gaw hpraw tu ai shi a wa ni hpe kra hka mani la nna: "Atawng gaw nang hpe anya dik ai da law, ya na hku nga jang gaw n anya nga ai le i, hehe, nang gaw nye tsawra dik htum manang she re mi, nang byin mayu ai lam, ya ngai na matu ra mara hpe jahpring shatsup ya na jinjin sha re, nang wa she num sha langai a kraw gata kaw na salum ga nsen hpe n na ya masu su kau ai." Ring Nan a sumtsaw nnan sing sing a lata hpe si mani ai hku jum let: "Grai chyeju kaba sai yaw Apan!" Dai aten ahkrang mi ahkrai rai muk seng gata kaw na ngoi pru wa ai mahkawn gaw Lagyam Bawm Win a mahkawn "Na makau hta tsawm ai shi ni nga, na makau hta, na makau hta pyaw ngawn ai yu-ngwi nsen nga ai." Ngu ai mahkawn ga si ni gaw, Lat Mun Pan a kraw gata kaw na ga si ni hpe, hkrang shapraw ya ai mahkawn nan rai nga ai. Shan yan hpe yu nga ai Seng Tawng gaw, ya she ngut sai ngu ai ga yan hpe mu lu nna, mati bum mu ai gaida gumgai langai a myiman man nga let: "Sumtsaw jan hpe chyeju dum chye ai ni kaw na sha gaw Aring gaw ningtawn kumhpa nan lu ging sai, shara shagu chyeju chyeju nga, nang hpe gaw mau pyi mau ai."
"Chyeju hte sha rai nga ai le, ndai daram tsawm htap simani nna, hpraw tsawm dik ai sumtsaw lu na matu gaw mungkan ntsa hta kaba dik htum ai gaw shaman chyeju a majaw nan rai nga ai le. " "Ga hpe gayau gaya hkum nga, Aring nang le anya yang mung dik hkra anya, anya yang mung ladu shalai hkra, gaja wa nan nang hpe gaw yu pyi n kam yu ai, nang zawn re hte gaw Apan hte pyi n kam myit hkrum wa sai." Ring Nan gaw Lat Mun Pan a lata hpe hkindun let: "Nang myit mi hkrum yang hkrum, n hkrum yang n hkrum, nye makau kaw Apan nga nga jang, ngai na matu yawng hpring tsup sai, raitim nang myit galai shai na nga yang gaw, kalang sha mara raw ya lu, gai gai muk sha namsi ntsin lu rai saga." "Gwi daw, ngai hpe gaw chyeju n chye dum!" Seng Tawng myit n dik ai nsam shapraw nna anyam let hkan nang nga ai hpe mani sum rai nhtang yu yu rai let, Lat Mun Pan a lata hpe jum hkindun nna hkawm mat wa sanu ai.
Kareng Gun Awng
