BRANG MAI MYIT RU AI LAM

BRANG MAI MYIT RU AI LAM

(SUMRAI) KA AI:LAHTAW BRANG JA

Jahpawt ningsin rim rim naw nga yang, Brang Mai mare baw nta kaw nna, hkum shapyan kau let lanyan pru wa ra ai. Brang Mai grai nkam shamu ai sha sharang nna rawt shamu hkawm nga nu ai, shana ting Maihtawng Ja ing hte Kaw Chyang hpe shachyan shaga ai majaw, nhtoi hprat nmai yup da nu ai, ya pyi shanhte a nta mam dup ga nsaw tawn yang gaw, rawt shamu kam na nai nga ai. Shi hte rau zet ai manang ni pyi naw si garai jawng nga ta masai. Brang Mai lahta tsang jawng lung ngut ai hpang, dakkasu jawng sanpoi n-awng nna nta wa nga mat ai re. Shi sanpoi gade lang gahtap shang yu tim, bungli nmu tam hkraw nga ai, yu maya re bungli tam galaw yu yang, gumhpraw masum mali tsa sha jaw ai majaw, shi a malut gumhpraw pyi ntai nga ai. Shi dai zawn le hkawm waw hkawm hkrai rai jang, kanu yan kawa num langai mi hkungran tawn ya sai. Brang Mai chyawm gaw hkum hkrang galu kaba rai, manu mana htuk ai brang zet re majaw, num tam grai n-yak nga lu ai. Hka langai din ai de na shayi num hte dinghku shang sha masai. Ya chyawm Brang Mai grau myit ru wa sai, dinghku shang sha sai hpang na lam gaw tsun pyi nma ai, tsi shakrat hpe du hkra pyi hkang ra nga ai. Shi shani shagu gade shakut dum tim, labu palawng sha pyi nlu mari hpun hkraw nga ai, madu jan hte ma langai jawm shangai kaw nna grau chyum ai zawn nga mat nga ai. Hkrak nga jang, Brang Mai a nta dinghku kaw grai yak hkra nrai nga ai, kaga nta ni hte shadawn dat yang, shanhte gaw tsahti pyi naw mai sawn ai, nta grai kaba ai shachyaw tawn ai hta n-ga, bum de " nga dumsu rem tawn, hpun kawa hkai tawn, layang de kumshu yi mu 30 dang mung naw hkai tawn rai nga ma ai.

Dai gaw kanu yan kawa shakut tawn ai hkrai rai nga ai. Madung gaw Brang Mai yaw shada myit mang ai lam nau tsaw nga ai, shi tsa salik ni madang tsaw ai hkrai lu, gat sa tim lam nkam hkawm re majaw, tam ai hte lang kau ai nhung nga ai. Brang Mai nta du shang wa yang, madu jan manap shat pyi hkut wa sai. Brang Mai jan mung hkum gawng shingyan galu kaba rai nna, hkum shan ni grai hpraw tu tsawm ai num she rai nga ai. Brang Mai jan num rai nwa yang, kaga gahtawng ni shi hpe grai sa hpyi yu masai, Brang Mai nta ni sa hpyi ai shana du hkra, nta htinggaw mi hte naw sa kabang nga ai. Shingrai Brang Mai jan a kanu yan kawa kadai hpe ya sha na nchye mat na, baw grai machyi kau ma ai. Ganing nchye di na, kasha jan hpe tsun yu u ngu jang, Brang Mai hpe ta layung madi sai. Num wa ai hpang, manang ni shi hpe:" Brang Mai kaw hpa rai wa nta?"Ngu san yang: "Brang Mai hkum pungzan htuk ai hta n-ga, kanu yan kawa hte ntsan hkat , laika hpaji mung chye re majaw, wa kau ai re. " Nga u ai. Brang Mai shat gawk chyinghka lam kaw naw wa lagu yu nga yang, kawa nhku de nna gale pru wa ra ai, "Brang Mai nang mana gade sa mat ai ta?"Brang Mai kawa a nsen na kajawng nna, chyahkring sha ma-a mat sai, "Mana. . . **mana*. . •AWh, htaw Tu Lum U hpa woi malum sha nna, shi a nta yup nan mat ai gaw e. "Nga htan jang, kawa nau nkam ai lai hte: "Um, yahte nang asam nau nkap nga ndai lu, shana shanang nta npru wa ai she kawam yu u, shana ma yak na, ngai nam jan gaw yup pyi nlu sha ai, nang gaw shinggan de krai pyawng hkawm, dinghku la zawn nrai wa nga ai lu! "Ngu hta dat jang, Brang Mai ga pyi nshaga gwi ai shi a yup gawk de lahkyum shang wa mat sai.

Brang Mai gaw nta na la kasha shingtai re, gana ni masum rai ma yang, yawng num wa mat sai. Naw gaji yang, kanu yan kawa shi hpe ga ja pyi nshaga yu nga ai hte rau, nta na bungli mung atsawm n-galaw yu nga ai. Ya gaw kanu yan kawa gumgai dingla sai hte rau, gana ni num wa mat ma sai majaw, nta ting na dinghku lit gun hpai ra mat sai. Kanu yan kawa mung shi hpe grai kam nga yang, shana nta npru wa jang myit grai npyaw ai majaw , shi hpe mu shagu ahkre nga ma ai. Brang Mai ni nga ai gahtawng gaw bum lagaw kaw rai nga ai, gahtawng makau pai hkra hka kaba lahkawng lwi yu wa ai majaw, ndai shara hta nai mam hkai sha, kumshu hkai sha raitim, grai tu tsawm ai hta n-ga, gat sa gat wa mung ni nga ai. Lai sai ten hta, ndai gahtawng na masha gumja gumhpra rai grai kung zet lai wa yu sai. Raitim maigan de na ka-ni hpraw hte ka-ni chyang shang wa ai hpang, gahtawng kaw ka-ni ya jawng ai hta n-ga, ka-ni dut ai masha mung grai nga ai. Gahtawng kaw ka-ni ya hpung 3 nga ai, nambat 1 hpung ni gaw ka-ni hpraw lu htu ai ni, nambat 2 hpung gaw ka-ni chyang lu ai ni, nambat 3 hpung gaw pyaw poi du, shing nrai mam hkai ngut, mam dan ngut jang, gumhpraw jawm gahkyin la nna ka-ni mari lu ai ni. Gahtawng kaw dai hpung masum nga ai majaw, mare kaw u di hkum mi pyi nmai jan mat sai. Brang Mai jawng kaw nna ningnan pru wa yang, ka-ni ngu ai gaw masha a hkum hpe jahten sharun ya wa ai re chye nna nwam hkra nga ai. Dinghku shang sha ai hpang, gahtawng na manang ni hte hkrai ganawn nna, "Lu chyam yu le, tsi kaba re. "nga nna chyu saw ma ai. Brang Mai bai yu yang, gahtawng na masha num la n-ginhka ai, malawng ga de ka-ni chyang chye shala ai hkrai rai nga ai.

Shingrai Brang Mai lani mi na nhtoi kan mase nna lu chyam yu yang, kan mase ai sawp rap mai mat nga ai hta n-ga, yi ngam gade kaba ai raitim htim galaw kau na zawn nga ai myit masin rawng wa nga ai. Brang Mai galang mi lu chyam shut jang, ka-ni zuphpawng shagu lawm mat wa sai. Brang Mai la tawn ai mam dup ga mung, shi hte hpawk re hkrai rai nga ai. Hkauna nkau kaw kumshu hkai kau ai majaw, dup la ra ai mam mung gade wa nlaw nga ai . Shanhte mam dup let shana matut galaw ra ai bungli bai jawm dup bang wa sai. "Daina bai Tu Lum a nta kaw i?" "Nam lap nlu nga ai law. " "Ngai mawt tawn sai, bunghkrawng kaw kabaw la hkra di ai re, grai hkrak hkra rai sai. " Nga nna bawng hkut tawn masai. Brang Mai ka-ni tsun gazik ai na jang, jan ndu hkraw ai zawn nga wa sai. Mam dup ga sa ai masha law ai majaw, jan pyi rai nshang yang, mam yawng dup la kau sai. Shana ga sa ai ni yawng Brang Mai a nta shat sha ma ai. Shat sha ngut ai hpang, Brang Mai ndaw ya hkan gasung masu nna mye rai mat sai. Brang Mai grai chyang nna Tu Lum a nta du lung wa yang, manang ni ka-ni shadu hkut nna pan nga mala sai. Du na hte du hkum sai majaw, dawdap na wanmang makau kaw panyep la nyep tawn, namsi ntsin du tawn, U di shadu tawn rai, lagaw kyawan hkintum kau nna, ka-ni nat marawp bang wa sai. Shan hte kani loi lu la nna, namsi ntsin n-gup mi lu dat, U di bai baw sha dat rai, grai she pyaw dum taw nga sai. Brang Mai hpung ni lu hkru sha hkru wa jang, ka-ni lu ai mau mwi hkai chyai, nse nsa re lam jahta, masha ni a num tsawm ntsawm tam tsun, manang wa hpe shatan nhkan nga ai ga tsun rai ten shalai nga ma ai. Nhtoi mahka U goi wa jang she nau shaga pu nna yup garai jawng nga masai. Dai Tu Lum ngu ai wa a madu jan mung, madu wa ka-ni nau lu dan ai majaw, mayu nta de wa mat ai re.

Num ni nnga jang, Brang Mai ni hpung grau kabu ai zawn rai nga ai. Brang Mai dai mam dup ai tawng yang, shani shagu ga sa ai hte maren, shana shagu ka-ni hkrai lu hkawm u ai. Mam dup ngut tim, Brang Mai a ka-ni tauba nmai tat mat sai, jan du wa jang tam yu na zawn chyu nga ai majaw, shani shagu ka-ni dut ai de hkrai gahkrang ra mat nu ai. Dai ka-ni hpe ningnan lu yang grai pyaw ngawn dum ai, lu na wa jang, mu ai machyim nnga mat tim, nmu lu jang nyep san gapya wa, hkum hkrang shajup machyi wa rai nga ai. Shingrai Brang Mai lani hte lani ka-ni chyung wa sai. Kumshu dan ten bai du wa yang, Brang Mai a myi-man hte nten pyi chyang mat sai hta n-ga, hkum hkrang mung lasi lamun rai wa nga ai. Brang Mai a kanu yan kawa hte madu jan gaw, Brang Mai ka-ni lu ai shi ga soi soi nga ai na nna, Brang Mai hpe ka-ni lu 'ndai da ngu jang, lamu de ta she madi hkra ningdang kau nga ai. Nta masha ni mung sakse nlu ai re majaw, ganing nchye ngu nga ai, hkum sa lu hkum sa sha ngu na sha chye mat sai. Ka-ni chyang gaw manu laja ai baw jahkai re majaw, Brang Mai hpung ni gumhpraw ndang hkam mat sai. Shingrai shanhte ka-ni hpraw mari wa nna bai chyam yu ma yang, dai she grau ahkyak nga ai, manu paw ai hta n-ga, n-gun mung grau rawng nga ai. Kumshu dan ngut nna hkauka gat ten bai du wa yang, Brang Mai bungli pyi nau nlu sa mat sai, ka-ni hpraw gaw kut wa jang shara magup gadau hkawm mat wa na zawn nga, lu hkru jang mung nkam shamu re baw she rai nga si. Shing rai hkauna pyi kawa dingla wa she sa galau nga ai.

Brang Mai bai rai jang, madu jan hpe ndai kaw machyi ai wawra kaw pyaw ai, ndai mari na, wawra mari na ngu nna, gumhpraw hkrai wa masu ahpyawp lang u ai, madu jan mung myit mai la ai jan re majaw, teng jaw ai ngu na, sadek gata kaw she makoi sai pyi shaw ya kau kau rai u ai. Jahtum e manang ni shi hpe Brang Mai ka-ni grai lu mat sai nga nna, hkan jep yu yang, hpang hkrat mat sai. Brang Mai hpe yu tek nga ninglen namdum sa masu nna prawng mat wa lu nga ai. Brang Mai nta masha ni kaw gumhpraw lu hpyi jang, nta na U lagu hpai dut, mam n-gu hpai dut rai chyum si wa sai. Nta masha shi hpe nhku kaw rawng tawn nna sharang shangun yu yang, yawng bungli sa ra ai krai rai na, kadai nsin jang, hkalap mala je kau nna hprawng pru mat wa re majaw, grai hkang yak nga ai. Nta masha ni ganing nchye di nna, ginwang daw na ka-ni sharang shara de sa sa kau masai. Brang Mai shata masum s& sharang ai hpang bai pru wa sai. Raitim nta wa nga ai 10 ya pyi rai ndu yang, shawng de na ka-ni ya manang ni hte hkrum jang: "Lu yu u le, nlu yu ai sha gaw nrai. "ngu jang, "Kaja wa re i! "nga nna dum tamu lu bang wa sai. Brang Mai a n-gup gaw galang mi lu man sai re majaw, lu shabu dat jang, shawoi na ka-ni ya hkum nan bai rai mat sai. Dai hpang kaw nna, Brang Mai nta nga na ten nnga sai, shani shana shinggan de hkrai kyin gayin hkawm u ai, shi nta du wa jang, nta na rung rai lama mi gaw mat mat nga ai. Madu jan shi hpe ka-ni hkum lu sa, dinghku atsawm de sha ga, ma mung lani hte lani kaba wa sai, htawm hpang de na lit grau li ai, nga nna she hkrap hkra tsun yu sai, Brang Mai laklai shai ai lam hpa nnga ai.

Kanu yan kawa mung kasha hpe adup sat kau nga yang, mara gun ra na rai, jahkawm tawn yang gaw wa yu gaya rai, shangai tawn ai hka she shadu mat sai. Gade nna yang, shawng de shanhte nta ni tsam mari mara shakut nna mari tawn ai sengke du hkra dut sha kau nu ai. Ladu lai nna chyum si wa jang, nta masha ni mare salang shaga nna jawm je yang ma ai. Mare salang ni mung ka-ni lu yang madu a hkum jahten la ai hta n-ga, dinghku shabya, mare gahtawng shabya rai, masha shada jam jau jaw hkat ai bungli re nga nna, angwi apyaw sha daru sharin ma ai. Brang Mai pe shawng shana sha jawm daru sharin yang, hpang jahpawt njang nmu mat sai. Shata mi jan wa tim nta pru wa sai, nta masha ni ganang sa galau si mat sai rai kun ngu nna, shara magup hkan tam yu ma ai, ginwang she grup hkra tam kau tim, Brang Mai zawn re mi nhkawm pru mat sai. Bai Brang Mai rai jang gaw ginwang gat kaw sha up rawng nga, shi gaw nta masha hte mare masha ni jawm daru ai hpe nna ra nna, lagyim hkawm ai rai nga ai. Shi gaw ka-ni ya manang ni hte nta kasha langai mi kaw jawm lagyim rawng nga ma ai. Shi a manang dai ni gaw shani yup la, ka-ni lu la rai, shana du jang gaw gashun lu gashun sha hkawm re ni rai nga ma ai.

Brang Mai nta na she lagu wam tim, shinggan de lagu hkawm, gashun sha hkawm rai na gaw n-gwi nga ai. Manang ni shi hpe gashun sha ga nga jang, hkum n-pyaw nngai nga masu sha nna shalai kau u ai. Ka-ni ya manang ni mung, ningnan daw e, shanhte ka-ni lu jang Brang Mai hpe mung jaw ma ai, ten na wa jang, nang n-gun mung ndat lawm ai mi nga nna, ka-ni njaw lu mat ma-gai. Shingrai jang, Brang Mai gaw jawngma manang ni kaw sa hkoi lang, sa hpyi lang rai u ai. Jawng ma manang ni shi ka-ni lu mat ai re chye jang, gumhpraw nhkoi ya hkraw mat sai. Brang Mai hpa nan nlu nsha mat sai, nta de nhtang yu wa ngu yang, nta masha ni e hkrai azep satsang ai hpe nkam madat, nga taw nga na lam mung htum mat rai grai myit yak nga ai. Brang Mai ganing nchye di na, gat yang hkan na maisau tingsa, tsa pawng, hpri daw hpri tang re ni hta dut u ai. Kaja wa rai dai ni hta dut yang, shat hkru hkru lu sha ai hta n-ga, ka-ni mung naw lu mari lu nga ai. Brang Mai nta masha ni mu na hkrit na, gat shani du jang gat yang de nwam sa ai, gat n-ang jang, shing nrai shana hkan she pru hkawm u ai. Kaja wa Brang Mai myit du ai hte maren, shi hte rau yup ai manang ni hpe, gade nna yang, pyada ni e sa magawn mat wa sai. Manang ni nnga jang, Brang Mai nta shap rawng shabrai nlu jaw ai majaw, yup shara nlu mat nu ai, shi gaw ganang hkrup ganang yup hkawm mat sai.

Brang Mai shing rai tam sha hkawm ai ten shata 3 lai ai hpang na lani mi hta, Brang Mai jan ma machyi nna ginwang tsi rung de lung ma ai . Tsi htu ngut nna gat yang kaw hkawm nga yang, Brang Mai zawn re la langai mi, gat yang makau na maza pung kaw ashap taw nga ai hpe mu mada u ai, dai la wa hpang de sit sa wa nna atsawm yu dat yang, Brang Mai nan she rai taw nga ai, Brang Mai mung madu jan hpe mu dat nna grai kajawng kau nu ai, makau hkan nhkun she htu tawn yang gaw, lawan gumhtawn shang mat wa na zawn ngu da nu ai. Madu jan shi hpe mu ai hte rau, myiprwi si pya pya rai hkrap ashut si wa sai. Makau kaw hkan nang ai shan a kasha rai jang, kanu a magyi kaw noi nna lagu azi yu taw nga sai. Brang Mai madu jan hpe ganing nchye ngu na, kasha hpe "Ma" sha naw ngu dat yang, kasha mung jahtau hkrap wa ra ai. Kaja wa Brang Mai hpe yu dat yang, hkrit na zawn she rai mat sai. Kara nau gaiu nna myi man chyen mi magap mat, myi man hte du hkan gaw galoi kaw nna hka nshin sai rai kun, hkama yi shari hkan na kamu makrat tu ai hpun du punghkaw zawn she rai mat nu ai, palawng langai sha hpun ai mung maja she gabrim hkra re hta n-ga, lawng hpraw lawng chyang re pyi nchye ginhka mat nga ai, labu mung lahkawng maga lahput kaw du hkra ga dumbrang mat, kyep htap zup mi garawt hkawm ai mung sumri maga mi di mat rai nga ai. Madu jan hkrap jin la nna: "Nang ka-ni htu mat hkra rai sa ni?"Ngu san yang, Brang Mai madu jan hpe pyi nmada wam nna, du krung let tsun ai: "AIDS ana kap wa na hkrit nna htu hkra gaw nwam nngai. "Nga htan u ai.

Madu jan Brang Mai shing nga jang, myi man nsam loi tsawm wa sai. Madu jan nsa kaba shaw la hkra tsun ai "Ngai nanhte a nta shang wa ai shani kaw nna, lahkum kaw maidang pyi galoi nshadun hkra pu ba nga nngai, pu ba hkawm ai lachyum madung gaw an a dinghku ngang kang wa na matu sha re. Agu yan amoi mung lani hte lani sat lagaw nkung mat wa sai, dinghku bungli gun na gaw na a lit nan rai nga ai. Nang yu u le, ma mung ngai la kasha shangai tawn ya sai, nang myit ndik na lam hpa baw naw nga a ta?"Ngu nna san shati jang, Brang Mai gaw hkrap dagup dung mat sai. Loi mi hkring jang madu jan Brang Mai hpe: "Nang yi naw myit mala; l na re ta? Nang dai hku rai gải nga jang, ngai mung ma kabai kau da rina gade raitim hkawm mat wa sai! "Brang Mai ga dai na jang: "Myit malai sana, mayit malai sana, shawng de ngai asam nkap ai bungli galaw ai majaw, nu yan wa hte nannu hpe jam jau jaw ai lam grai nga lai wa sai, dai hpe grai tawngban nngai, bai nmyit malai jang gaw, ntawt na gwi la wa hte pyi nbung mat sai, raitim ngai hkrai ka-ni ganing di nsharang lu ngai, she naw hkye la rit! "Nga nna shi shut ai lam yin la u ai. Madu jan gaw shi dai zawn matsan mayan rai dam hkawm ai hpe n-yu lu ai majaw, ndai lang sha pyi naw kam yu na ngu myit la nna, dai shaloi njang, shannu hpang shani tsi naw matut htu hkyem ai gumhpraw hte, labu palawng mari galai ya nhtawm, ginwang ka-ni sharang dap de sa sa bang kau sai. Brang Mai ka-ni sharang dap kaw laning chyen mi sa rawng la nna bai pru wa sai. Shi gaw shawng de ka-ni rai nlu yang na hte maren bai zet tsawm taw nga sai.

Brang Mai nta wa yu dat yang, dinghku gata na rung rai shi hpai dut sha kau ma sai majaw, ningnan kaw nna bai shakut la ra mat sai. Brang Mai nta du wa ai hpang, shinggan pyi nwam gale ai nta kaw hkrai rawng nga u ai. Shi gaw nta kaw rawng nga nmai sai, myit shut jang ka-ni bai lu mat na tsang da nu ai, bai lam mi gaw kasha jawng lung ten du wa sai majaw, jawng lung shabrai htu ra nga ai. Brang Mai shinggan de bungli tam galaw na hkyem nga yang, shi a jawngma manang langai mi Kawngehyu de nna shakram shagun dat u ai. Manang wa tsun ai, Kawngchyu kaw gumhpraw tam grai loi ai, ya ngai tsi hpai dut nna gumhpraw tam yang, shata mi gumhpraw lap 5000 dang gaw n-yak sha tam nga ai, nang kam yang gaw, gumhpraw lap 3000 dang gun nna sa wa rit, 1000 gaw nang na mawdaw shabrai, 2000 gaw tsi hpaga seng kaw sa dip da na matu re, nga nna htet dat jang, Brang Mai singkaw tu taw pyen mat wa na zawn nga si wa sai. Brang Mai a nta masha ni bawng yu yang, Nta masha ni mung gahtawng kaw nga taw nga jang, ka-ni bai tam lu na mung tsang nga ai majaw, kawa bum de rem tawn ai dumsu nkau mi dut nna sa wa shangun sai. Brang Mai wanleng jawn nna kawngchyu kaw du yang, dai de na mungkan gaw kaga she rai nga ai, gaw gap tawn ai nta ni dawng yu dat ya du krung she tsu machyi wa nga ai, gat yang hkan masha hte mawdaw gashoi ai hkrai mu, ndai zawn re shara hpe Brang Mai yup-mang hta pyi nmu yu nga ai. Brang Mai dai tsi dut sha ai hpaga seng kaw ningnan shang wa yang, gumhpraw sa gyau kau ai hpang, shata chyen mi tsi dut na hpaji hkrai woi sharin ma ai.

Hpaji sharin ngut jang, tsi hpaga lauban ni tsun ai, dut ai ni naw shawng mari sha yu ra ai, tsi dai la ni sha yang, hkum hkrang kang wa, num ni sha yang madi tsawm wa re baw re da. Tsi manu gade re ni ngu san yang, gumhpraw lap 2000 nga ma ai. Nau laja ai, nmari sha na ngu jang, shaloi gaw tsi dut na ahkaw ahkang njaw ai nga nna jahkrit ai majaw, ganing nchye di nna, nta de gumhpraw bai htet dat sai. Nta masha ni kumshu dut ai gumhpraw bai shagun dat ma ai. Ya chyawm tsi dut hkawm lu na sai ngu yang, tsi dut hkawm na ga nshakra hkraw ma ai, sa san jang: "Nang ginra ndai ganing re masa rai nga ai kun naw yu hkawm su. "Bai ngu ma ai . Shing rai Brang Mai gaw shani shagu gat yang hkan hkrai kawam hkawm u ai. Brang Mai hkawm mat wa jang, lit loi tsang mat ai zawn nga sai majaw, nta masha ni magam bingli hpe aja awa galaw shaja nga ma ai. Canu gumgai jan gaw, nta kaw jum majap asau sha ra nga ai majaw, gat de si-mai sa hkyawt dut, bum de gat rai sa tam la nna gat sa rai, ningwan kyin bu nga ai. Kawa hte Brang Mai jan bai rai jang, kumshu yi magang, bum de Zhaugaw hkai, hpun kawa hkai, U wa yam nga rem rai ma ai. Gumgai jan gat de hkrai gahkrang jang, nta dinghku gata na bungli gaw Brang Mai jan hkrai galaw ra mat sai. Shi gaw ma woi let, kumshu yi sa magang, shana nhtang wa jang wa shat di gun wa, nta du wa jang wa shat yaw, shat shadu rai, hkum jasan kau na ten pyi nlu ai daram she rai nga ai. Rai tim shi Brang Mai shawng de na lai kyang ni lai wa ai hpe yu kabu nga ai majaw, pu ba tim, lagu mani na ten naw nga ai.

Brang Mai tawng ya mi gat hkan kawam jin la na, nkam kawam mat jang, shani shagu yup hkrai yup taw nga sai. Shata mi dang lai ai hpang, tsi seng lauban ni shi hpe tsun ai: "Ya tsi dut sha na garai nnga ai, daini daina nang galaw ra ai bungli gaw, nang na manang ni, shing nrai, masha kaga hpe anhte a tsi hpaga seng de shaga bang la na hku re, hpang de galaw ra ai bungli grai naw law ai majaw, masha mung law ra ai, ya kaw nna lawan galaw bang wa ra sai, nang galaw ndu jang, la-hka nhtuk jaw lu ai. " Nga nna sa jahkrit shama ma ai. Brang Mai ga dai na jang, ndai zawn re myu kaba kaw tsi nnga ai gaw masu sha sai she re, shi a jawngma manang wa mung masu magaw ai hpung kaw lawm sai, "Manang rai sam ai ngu yang, ndang wa she rai a hka. " 'nga ai ga malai kaw ang mat sai. Brang Mai gaw shanhte hpe grai laja nna mari la shangun ai tsi nsha kau wam nga ai, shaning htum jang, nta na ni hpe wa jaw na hku sawn u ai. Shi tsi hpaga seng ni hpe ntsen ai majaw, tsi dai sa jep yu yang, n-gu shadung hte galaw ai tsi she rai taw nga sai, nta hkan galaw sha ai hkau mun daram pyi manu ndan nga ai. Brang Mai masin pawt nna, shi a manang hpe sa hta u yang, manang gaw: "Manang wa e, nang hpe ngai grai tawngban sai, ngai mung shat kan bau ra ai majaw nang hpe masu sha ai re. Nang mung shakut u, laning mi masha marai 20 tam bang jang, shata mi gumhpraw lap 5000 jaw ai hta n-ga, adu aya mung naw sharawt na ma ai. "Nga nna hkap htan ya u ai.

Brang Mai ga dai na jang grau pawt mayu wa sai, shi bai tsun ai: "Nanhte masha hpe masu hkalem ai bungli galaw nga myit dai, ngai pyada dap de sa shawk nal "Ngu nna bai share dat sai. Shi a manang wa ga dai na jang: "E, man -ang wa nang dai hku hkum galaw, masha ndai ni myit masin chyang dik ai, nhkru n-kaja dik ai ni hkrai rai ma ai, nang pyada dap de sa shawk jang, Kawngchyu pyi rai n-gale yang, nang hpe kan lagu sat kau na ma ai. "Ngu u ai. Brang Mai nta na kanu yan kawa hte ma yan nu hpe bai dum dat na, gatsi mat nu ai. Brang Mai gaw kadai hpe mung nmasu wam nga ai majaw, manya masu nna nga taw nga sai. Kaja wa shata tup tim, Brang Mai hpe gumhpraw nhtuk jaw mat masai. Brang Mai gaw wa htu tsi mari na gumpraw pyi nan nlu mat sai. Ganing nchye di nna, shi a jawngma manang lahkawng hpe masu dat sai, gade nna yang dai yan mung gale pru wa ra ai. Dai manang yan mung gumhpraw lap 4000 sa ap ma ai, shaloi she Brang Mai hpe gumhpraw 30% di jaw ma ai. Brang Mai gaw gumhpraw dai lu la jang she loi lu awai la nga ai. Shata mi dang bai lai ai hpang, Brang Mai gumhpraw bai nlu mat sai, kadai hpe bai masu la na mung nchye mat sai hta n-ga, kaga masha ni hpe masu na mung nwam nga ai. Tsi hpaga seng na lauban ni mung gumhpraw nlu mat sai hkrai gazik ma ai hte maren, shat lu sha mung lani hte lani yak wa sai, ningnan daw e gat lapran mi shan galang naw gatut ma ai, gumhpraw nlu sai nga ai shani kaw nna, sau pyi nhang ai hkrang hpraw shadu jaw ma ai.

Lani mi na nhtoi hta, tsi seng lauban wa tsun ai: "Ja gumhpraw yak hkak ai majaw nanhte hpe shadu jaw na si-mai nlu mat sai, gat de si-mai naw sa tam la masu. "Nga shangun dat sai. Brang Mai gaw si-mai wa lu sha na rai yang hkan nang yu na re ngu myit la nna, hkan sa yu yang, gat ya hkan masha ni tsan kabai kau sai chy -inghkrang lap, alu si, dingsap si chyahten re ni she sa woi hta ma ai. Nkau gaw gaya dum nna nsa hta jang, shat pyi nhkap jaw nga ai. Brang Mai gaw shawng de ka-ni lu yang, maza pung pyi ashap hkawm yu sai re majaw, si-mai hta hkawm na sha gaw nhkrit nga ai. Rai tim shing rai yak hkak wa jang, madu jan hpe grai dum nga ai, ta kaw shani shagu shan si-mai wa mi nlu sha tim, namlaw namlap nai si-mai ni madu jan shadu jaw jang, mana maka mu dum ai. Brang Mai nta de hprawng wa mat mayu sai rai tim, nta wa na lam shabrai nlu ai majaw, ganing nchye di nna nga shanaw taw ai sha rai sai. Brang Mai shing rai nga matsan taw nga ai ten hta, lani mi shi gat de bai sa kawam hkawm yang, sengke langai mi mawdaw yan ai majaw, shi a makau kaw nan gau gale kau sai. Sengke gau ai gaw num langai mi re, sengke galau ai hte rau, num dai mung ga kaw nshamu ai taw mat sai. Brang Mai mau tsap mat nu ai, ganing wa di sana kun ngu shingdu aman gayin yu yang, sa hkye la ai masha kadai mung nnga ma ai. Dai shara kaw nna tsi rung hte gade ntsan nga ai majaw, Brang Mai num dai hpe hta ba nna tsirung de kagat mat wa sai. Isi rung kaw sa jep yu yang, ningma kaba kap ai lam nnga ai, majoi mi baw kaw hkra nna baw sin ndum mat ai chyu sha re.

Kaja wa gade nna yang num dai jan dum pru wa ra ai, num dai Brang Mai hpe chyeju dum ai ga grai tsun kau nu ai. Brang Mai num dai hpe ningnan mu yang, nau kajawng kau ai majaw, ganing re re atsawm n-yu kau nga ai, ya bai yu dat yang, manu mana tsawm ai num she rai nga ai. Num dai datshin hkan na num ni zawn rai hkra tsawm ai hta n-ga, bu hpun pa-lawng ni mung madang grai tsaw ai, manu laja ai hkrai lang nga ai. Brang Mai tsap nga yang, gaya gaya nga wa ai majaw, naw wa mat sana ngu jang, nang nga ai shara naw tsun dan rit ngu u ai, Brang Mai gaw shan hte yup hpreng jawm hpreng ai nga shara dai nkam tsun dan ai raitim, nau san shati jang tsun dan kau nu ai. Brang Mai pru hkawm mat wa ai lam kaw myit lu ai gaw:Nang mi gaw loi mi hkring ai hte ngai hpe malap kau na chyu sha re, nye a nga shara wa gaw hkum san masu le. Nmyit madawm ai lam gaw, lani mi sha naw din yang, num dai Brang Mai hpe tam hkrat wa ra ai. Brang Mai ga shaga tim she ma-a mat hkra lagu kabu kau nu ai. Num dai Brang Mai hpe shat sha saw u ai. Brang Mai gaw shat sha shara yak nga ai majaw, num jan saw jang, n-yak sha hkrawn rai hkan nang sai. Shat sha nga ai ten hta, shan a mahkrum madup lam jahta chyai ma ai, shana du jang gaw ginsup bai ka sa rai grai pyaw kau ma -sai.

Shana yup ten du tim Brang Mai gaw num dai hte grai naw nkam hka nga ai, nja nhpra rai hka bra ai hpang, Brang Mai nhtoi htoi wa hkra nmai yup mat sai. Dai hpang kaw nna num dai Brang Mai hpe shani shanang sa tam u ai, shi hte rau yup ai ni pyi myi yu ju wa nga ai. Num dai Brang Mai a labu hpun palawng ningsa mat ma ai mu jang, yawng ningnan hkrai mari galai ya, ta gye-nan mari ya rai nhtawm, pyaw pa lam de hkrai woi sa u ai. Ten na wa jang Brang Mai gaw num dai hpe myit kap mat sai, chyahking mi nmu tim, hkum kaw lama mi ra ai zawn nga nna, masin ndung hkraw da nu ai, nawt nawt gaw shi yup ai shara de pyi nwa mat sai, num jan hte manam jarawp hkan she sa yup mat sai. Brang Mai gaw madu jan hte sumtsaw ntsaw ai dinghku jawm de ai majaw, num dai hte ganawn shut jang, manya pyi bu mat na daram ra machyi nga ai. Brang Mai gaw num jan tsun dan nna chye lu ai, num dai mung num wa sai , asak gaw Brang Mai hte maren 27 ning rai sai, shi a madu wa gumhpraw grai lu ai lauban kaba re, shaning ting ting shinggan de hpaga ga nna nta nau nnga ai. Shi madu wa hte dinghku shang sha ai 4 ning du sai raitim, ma nshangai hkraw ai majaw, madu wa nta du wa jang adup zingri ai hkrai hkrum sha nu ai da. Shi tsi rung de sa jep yu yang, ma nchye shangai ai lam hpa nnga ai, ra gaw madu wa kaw she ra jaw ai raitim, madu wa gaw ga tsun shalai kau dum nna tsi rung nsa kraw nga ai. Ya shi madu wa hte hka hkyem ai majaw, ndai zawn rai pyawng hkawm mat ai re da.

Num dai Brang Mai hpe tsun ai: "Hpang de gaw nang hpe she kam sai, shamyet shanat shingbyi shara mung nang kaw rai sai, nang ngai hpe masu magaw roi rip ai lam nmai galaw ai. Hpang de ganing rai jawm nga na lam hpe hkum myit tsang, ngai lagu mahkawng tawn ai gumhpraw an a gashu ni du hkra sha tim nma ai. "Ngu nna Brang Mai pe n-gun jaw u ai. Brang Mai mung shi dinghku la rai mat sai hpe tsun dan mayu ai raitim, num jan hpe mu jang shinglet ja mat nga ai, shi gaw dai nchye tsun hkra re tsawra myit chyahkring sha htum mat na hpe myit tsang nga ai. Brang Mai dai num jan hte chye hkat ai kaw nna, madu jan hkan nu hpe malap kau sai hte rau, kanu kawa lu ai mung ndum mat sai. Brang Mai dai num jan hte ganawn nga ai ten hta, num jan a madu wa mung galang lang gaw nia wa nga ai. Num jan daina nye madu wa nga ai, nang kaw nlu sa sai nga nna, ta gye-nan hte ga htawn dat jang, Brang Mai gaw num jan madu wa hte jawm yup nga ai shingran mu ai majaw, shana nhtoi hkren hkren nmai yup nga ai, galang lang gaw matu mahka nmu ai gat yang hkan sa kawam mat rai u ai. Num jan hte shing rai ganawn ai shata 2 a pang, Num jan akajawng sha shingran gatsi mat sai, gye-nan kaw ga htawn yu yang, gye-nan mung nhkrang mal, nta de sa tam ngu yang, num jan Brang Mai hpe nta de nwoi sa yu ai majaw, ganang kaw sa tam na re nchye nga ai. Brang Mai gaw shan chyai hkawm yu ai shara hkan, num jan lai wa ang ai lam hkan, sai hten mat ai zawn rai sa hkap sa tam u ai.

Shata chyen mi dang tam kau tim nmu mat sai. Gumhpraw nlu mat ai majaw, num jan mari ya ai ta gyenan tang sha kau nna bai tam yu tim, num jan zawn re pyi nhkawm dan nga ai. Brang Mai gaw num jan ganing re hkala nba hkrum sha kun, shing nrai gaw madu wa shan a lam chye kau nna, madu wa e lagu sat kau kun ngu grai lagu yawn hkrap kau nu ai. Lani mi na nhtoi hta, Brang Mai num shamat kau nna yup shara kaw yawn taru rawng nga yang, manang ni shi hpe shakram laika langai mi sa ya ma ai, shi dai laika laye hpe yu dat ai hte, num jan shagun ai re hpe chye nna, grai kabu let hpaw hti yu sai. Ngai tsawra dik ai Brang Mai e: Nang ndai shakram lu la hti ai ten hta, ngai maigan mung de du mat wa sai. Lai wa sai ten hta, an jawm ganawn ai ten ni law law rai sai hte maren, nang ngai hpe myit shapyaw shalan ya ai majaw, grai chyeju dum ai. Ngai ma hkum rai mat ai shata mi jan rai sai, nye a madu wa ngai ma hkum re chye jang, shawng de shi hte ningnan ra hkat wa ai shaloi na zawn rai, ngai hpe yu lanu lahku ai hta n-ga, tsawra myit masin machyi ai lai bai madun ai majaw, nye a madu wa hte nhka lu mat sai, dai hta n-ga nna, nye a kasha mung kawa lu ra ai. Hpang de ma hpaji grau nna kung gat na matu, maigan de sa htawt nga mat saga ai. Nang hpe shut ai lam nga na sai, ngai grai tawngban ai.

Nang tsawra dik ai jan 2000 ning shata 12 praw 3 ya Brang Mai gaw shaloi she loi mi myit hprang wa ai zawn ngu da nu ai. Shi myit lu ai gaw:Madu wa hte 4 ning jawm nga tim pyi ma nshangai hkraw ai she nga mi, awh . . . . • ma dai gaw **. . • laika hkan she hti hkrup yu ai maumwi wa, ngai kaw mung du sa hka, nye kam maka wa, masha nkau hte mung bung nga ai. Brang Mai myit npyaw ai majaw, num jan tawn da ya ai sengke mung bai dut kau nhtawm, shani shagu tsa seng hte ginsup ka ai shara hkan nang abyam hkawm mat sai. Lana mi shi ginsup ka ai shara de bai sa yang, shayi num langai hte sa chye hkat la u ai. Shayi num dai kara she jahkyeng kau hkra rai, grai tsawm grai htuk ai num re hta n-ga, tsa malut mung grai chye lu ai. Brang Mai shayi num dai hte lahkawng masum lang sa hkrum jang, shayi num dai kaw myit bai kap wa sai, shi gaw shayi num dai hte ganawn yang grai myit pyaw dum nga ai, shayi num dai mung gumhpraw grai lu ai zawn rai woi jai lang u ai, shayi num dai mung Brang Mai hpe yu ra mat jaw ai, gade nna yang, jawm yup jawm sha rai mat masai. Brang Mai a nta na ni gaw, Brang Mai Kawngchyu kaw num gaji lu mat sai da nga tim, nkam ya ma ai. Shawng de Brang Mai ka-ni ya she raitim, num lam hte seng nna hpa nga ai shiga rai nna yu ai majaw, Brang Mai num gaji lu chye na zawn nnawn nga ai. Brang Mai a masu ga pe kam nna Kawngchyu de du sa wa ai jawngma manang wa gaw, ruyak jam jau ai hpe nhkam lu nna, nta ga de bai nhtang mat wa sai. Shi nta du wa ai hpang, Brang Mai shi hpe masu ai bai shai dat nna, myit n-gut ai majaw, Brang Mai a nta de hkre hkre sa wa nhtawm, Brang Mai Kawngchyu kaw num gaji lu ai lam azin ayang tsun dan sai.

Brang Mai a kanu yan kawa gaw mau mat sai. Brang Mai jan gaw shi a yup gawk kaw nhtoi hkren hkra hkrap kau nu ai, hpang jahpawt nhtoi pyi rai nsan yang, Brang Mai jan kasha hpe woi nna mayu ga de rai mat wa sai. Gumgai yan dingla mung kasha nkyet sai re majaw, ganing n ngu lu mat sai. Brang Mai shayi num dai hte tawng ya mi jawm nga ai hpang, num dai ka-ni lu, ka-ni dut re masha re hpe chye lu nu ai. Num dai lu dan jang, shi a n-gup mung galang mi lu yu sai re majaw, ka-ni hpraw mu ai hte mayen gin-yu wa sai. Dai shani kaw nna, Brang Mai ka-ni ya ma-jing bai rai mat sai. Brang Mai hte ganawn ai shayi num dai ka-ni ya kaba re majaw, ka-ni praw lu ai hta n-ga, "Cumra", "K K fun"re mung chye lu nga ai. Brang Mai gaw shayi num jan nhpa lu yang, shi mung nhpa hkan lu nang rai chyum nga ai. Num dai hte shan gaw kaga nang hpam tsi jahkai chye dut sha wa sai hte rau, gwi ai myit masin mung rawng wa sai. Shan ningnan e gachyi gapu soi dut ai hpe shatang ndu dum na, ka-ni hpe hka hkran de gun shalai ma ai.

Ningnan daw e, lahkawng masum lang lu gun shalai ai majaw, mawdaw du hkra mari gawt ma-sai. Shan gumhpraw grau law hkra lu mayu ai majaw, ka-ni hpraw gun nna hka wawra hkran de bai rap wa hkyem yang, lam kaw pyada ni e hkap rim kau sai. Brang Mai jan madu wa hpe rim kau ai shiga na ai hpang, kasha hpe Brang Mai a nta kaw wa sa kau da nhtawm, buga hkan num wa tam hkawm ai Shantung la langai kaw hkan nang mat wa sai. Gade nna yang, pyada rung ni Brang Mai hpe Kawngchyu kaw gap kau hkyem sai, mang sa hta la mu nga nna shana dat ma ai. Brang Mai a kanu yan kawa gaw, sumtsan lam nlu hkawm mat sai re majaw, "Ganang rai tim garawt lup kau ya mani. " ngu nna ga htang kau dat ma ai. Gumgai yan dingla gaw, gashu hpe jawm yu na, nsa kaba shaw let mau nga masai.