MIWA NI MATI HPE KYI ZUNG NGU AI MAUMWI
Labang Naw San
Moi shawng de e, grai lagawn ai Miwa la langai nga ai da. Dai wa gaw lagawn la ai majaw ganu yan gawa ngam da ya ai sutgan ni hpe sha jai sha nna nga u ai. Lagawn punghkan la dai wa, ganu yan gawa tam da ya ai sutgan ja gumhpraw ni hpe jai sha ai ten hta gaw, manaw manang mung grai lu nga u ai. Sutgan ni hpe tam jat ai lam n nga ai re majaw, lani hte lani rai yawm ma mat wa nu ai. Ya shi matsan hkrum sai, shi matsan hkrum mat ai hpang, shawng e shi woi lu woi sha woi pyaw ai manaw manang ni ma hkra shi hpe koi kau ai hta n-ga, tsan gang mat ma masai.
Ja gumhpraw sut mung ma, manaw manang mung n lu mat re lagawn la wa gaw, shat hpa n sha tim, mu galaw na n myit ai, lagu lagut rai hkawm na hpe sha myit du nu ai. Lana mi na aten hta, kawsi ai n dang sharang wa ai majaw, gani yan gatsa a u lawng na u sa lagu sha hpang wa nu ai. Shing rai lagu sha yang, salu salat n hkrat, n ba ai sha lu sha rai, shi a prat hta u lagu sha nna nga shakre kau nu ai. Shi si mat ai hpang, gani yan gatsa a nta kaw, u ganu bai sa paw nna, shani shagu udi sha di, u kasha gaw n chye hpum shakraw rai, lana mi hta nta madu wa gaw u dai hpe rim la nna: Udi mung n chye hpum re gaw, sat sha kau ga ngu ai hte, u dai ga shaga wa ra sai da.
"Ni yan tsa e, ngai nan a u nau lagu sha kau ya ai majaw, hka sa wa ai rai nngai." Nga shaga pru wa sai, matut nna: "Tsa e, ya ngai si jang, nye a mang hpe sawyi hte makai nna sa lup u, nye lupba kaw lama mi bai tu pru wa na ra ai, dai hpe bai baw sha mu." Ngu tsun da nna si mat wa sai. Nta madu wa mung dai u ganu tsun da ai ga madat hte maren, u mang hpe sawyi hte makai nna sa lup da nu ai. Gade nna ai hpang, u lup da ai shara kaw ajawng zawn re rai mi tu nga la sai majaw, nta de baw wa nhtawm wa shadu sha yu yang, grai shum mu nna kyi zung ngu shamying u ai da. Maten daini du hkra Miwa ni gaw mati hpe kyi zung nga ma ai, Miwa ni gaw u hpe kyi nga nna, sawyi hpe gaw zung ngu shamying nga ma ai. Shing rai, mati gaw lagawn punghkan wa u lagu sha ai hka, daini du hkra hka wa ai re da.
