MUT LA

MUT LA

SHAWNGHTAWK TSING PAN

Nye mying Mut La nga ma ai. Nye nu gaw madu n lu ai gwi dam kanu langai mi re. Annau ni marai manga hpe galang ta rau sha shangai da nna, matsan mayan rai tam sha let chyu shachyu lai wa u ai. Annau ni nu a chyu garai n hka lu yang, nu gaw gat hkan kawam tam sha hkawm ai majaw, masha ni gung bang jaw ai lusha hta sha hkrup nna si mat sai. Dai kaw nna annau mung dumbru dumbra rai, kadai mung kadai chye ai hku tam lu tam sha nna, hka bra mat saga ai. Ya gaw annau ni hkrum tim, n chye hkat mat na saga ai. Shing nrai nye a gahpu ganau ni nkau nga yang she nga sana, nu zawn si mat ai mung lawm yang lawm mat sana re. Ngai chyawm gaw lani mi na nhtoi hta, kawsi let laika sharin jawng langai a makau na hpun pawt e hkrap dung nga yang, dusat grai chye tsawra ai Brang Dut a majaw, nga na shara hte lusha a matu ntsang ra mat nngai. Brang Dut a kanu gaw nye a mun ni hpe yu nna "Mut La" ngu shamying da ai rai lu ai. Dai majaw, shanhte nta ting ngai hpe Mut La nga shaga ma ai. Nye a madu shannu wa ni marai masum sha rai ma ai. Brang Dut a kawa gaw nta e nau n nga ai. Nhtoi law law ya grai na hkra hkra nta na hkawm mat mat rai u ai. Brang Dut a kanu gaw jahpawt jaujau rawt nna shat shadu, shannu lahkawng manap shat sha ngut jang, kanu gaw shingnoi gun, Brang Dut gaw nhpye hpye rai, nta na pru hkawm mat mat rai ma ai.

Ngai chyu sha nta sin nga nga rai nngai. Shana de Brang Dut nhpye hpye nna shawng du wa wa rai nga ai. Brang Dut du wa shagu nye a matu muk, namhtan zawn re sha hpa lama ma la wa ya chye u ai. Ngai ningmai gangat let shi hpe kabu gara hkap tau la jang, shi ngai hpe "Mut La, Mut La" nga, nye a mying hpe shaga let, pawn nna masawp ai hte ahpum manam rai chye nga ai. Ngai mung shi hpe grai tsawra ai hte shi a shabyi yan hpe mata ya ya rai nngai. Shaloi shi "Hihi...haha..." nga nna grai mani pyaw chye nga ai. Shing rai, Brang Dut gaw ngai hte makrai hkat chyai la nna, shat gawk shang, shat shadu rai, jan du wa ten rai jang, galoi mung kanu gaw grai li ai shingnoi gun let du wa wa rai nga ai, kanu du wa ai hte Brang Dut an kabu gara hkap tau la la rai ga ai. Kanu du wa ai gade n na yang, nsin sin sai. Shannu wankawk shatu tawn rai shat gawk e shat lushan hkyen ma ai. Shannu shat sha nga ai ten hta, ngai shat gawk chyinghka lam e dung nna, shannu sha ai hpe galang lang hkumbai she gapya wa hkra yu nga nga rai nngai. Shing rai, ndum shami hkumbai gapya hkra yu nga ai ngai hpe Brang Dut mu hkrup dat jang, "Ha! Mut La, hkumbai she gapya hkra gaw hkum yu e le... Loi sha gaw sari la nna shatep yu u.

Annu sha ngut na kring sha rai sai, naw sharang u,ya hkring, annu sha ngut nna ngam ai yawng, nang lu sha na rai nga ai le, yaw, haha..." Nga, mani let tsun dat ai shaloi, ngai grai gaya kau kau rai nngai. Ngai gaya nna shannu hpe n yu ai gum mat jang, kanu gaw: "Htaw, Adut nang dan nga tsun dat nna, Mut La pyi gaya mat sai." Da. Brang Dut mung mani let, "Nu, dusat mung chye gaya ai i?" Da. Kanu gaw, "E... Dusat pyi chye gaya ai, raitim, anhte woinyi rawng ai shinggyim masha nkau mi n chye gaya ai she mau hpa rai nga ai." Nga, bai tsun u ai. Shaloi, ngai arawng la ai zawn ngu hkam sha ai majaw, nye myiman hpe loi mi bai lu shadap dat nngai. Raitim, ndai lang gaw ndum shami hkumbai n gapya wa hkra grai sadi kau se ai. Gade n na yang, shannu shat sha ngut masai. Brang Dut gaw shannu a angaw angam ma hkra ngai hpe jaw sha let shaga chyai nga ai. "Mut La... Daini tup nang nta sin ya nna, grai chyeju dum ai yaw. Daina bai atsawm sin e ..." Brang Dut gaw ngai shat sha ngut hkra sin ya let, ngai hpe makawp nna, matut shaga ga rai chye nga ai. "Mut La, nang grai tsawm wa nit dai. Ngai nang hpe nnan woi wa ai shaloi, gachyi sha re rai ndai le...hum... hum..." Brang Dut dai zawn tsun shagu ngai kabu myit pyaw la nngai.

Dai majaw, ngai gaw annau ni yawng hta na gam gaja rawng dik ai wa re ngu hkam la nngai. Lani mi hta, ngai hkrai nta sin nna nga nga yang, Brang Dut a kawa sumtsan hkawm ai de na du wa ra ai. Shi hkrai n rai, Brang Dut a kanu hta grau kaji nna, grai shakya ai num langai hte rai lu ai. Dai num hpe mu ai hte rau, ngai n yu ra we ai majaw, agying wau kau nngai. Shaloi, Brang Dut a kawa gaw "Mut La, Mut La... Ndai lagut n re yaw. Jinghku she re." Da. Brang Dut a kawa dai zawn tsun dan timung, nye a myi hta gaw lagut madang hku sha mu nga ai majaw, grau pawt mayu wa nna, ganoi noi htim gawa lu hkra she wau bun da we ai. Shaloi, Brang Dut a kawa ngai hpe pawt let, "Gwi mung maka n kap ai, nye htawng agat kau dat de ga." Nga nna, nye a kan ang ang kaw aja awa htawng bun dat ya ai. Ngai mung hkrit let dai num hpe grai n ju ai nsen hte wau nna, chyahpung de hprawng mat wa nngai. Shani tup, Brang Dut a kawa hte dai num nhku na n pru ma ai. Ngai gaw shan hpa wa galaw nga ma ai kun? Ngu chye mayu ai majaw, shawoi ngai hpum hpum re ntawt de lanyau lung wa nna, yet sha wa hpum yupsu sun nga nngai. Shan dawdap e rau sha yep rai dung nna, panu panen rai hkat nga ma ai. Num ndai hpe yu yang, maka kap na zawn gaw nsan nga sai.

Lagut nan nan re, ngai teng sha tsun lu se ai. Shana de Brang Dut wa ra ai. Brang Dut hpe ngai shawoi na hta grau gagat nna sa tau la ngai. Nta de man yawng nna wau dan da we ai. Brang Dut nye a laklai ai nsam hpe yu nna tak la chye u ai. Shi ngai hpe ahpum la nna san ai. "Hpa ta? Mut La, nta e manam du nga a ni? Shing nrai, wa du nga a ni?" Brang Dut dai daram chye na ya ai majaw, ngai grau n-gun lu ai hte grau wau shaja dat ngai. Shaloi, Brang Dut a kawa nhku na pru wa ra ai. Brang Dut mung grai kabu ai hte kawa hpang de gagat sa wa nu ai. "Wa! Ha... Nye wa wa sai law..." Brang Dut a kawa kasha hpe ahpum la nna, nhku de woi shang wa nu ai. Ngai mung hkan lung wa nhtawm ntawt kaw wa hpum nga ni ai. Brang Dut a kawa kasha hpe sha hpa muk htuk mi shaw jaw nga ai. Brang Dut gaw muk htuk hpe la nna, nye a makau e sa sha let, ngai hpe mung "Mut La, maw, sha u, nye wa la wa ya ai muk re." Ngu, tsun let jaw sha nga ai. Gade n na yang, dai manam num jan shi a shanhpyi nhpye hta hpai rai pru wa ra ai. Brang Dut a kawa mung hkan pru nang wa nhtawm, "Ma, wa mare de naw hkawm na." "E law wa, lawan bai wa rit yaw." Shanwa lahkawng ndai zawn shaga hkat ngut jang, Brang Dut a kawa hte dai num rau run rai, pru mat wa masai.

Ngai dai num jan hpe grai yu sam n nang ai majaw, mi na zawn hkan wau dat da we ai. Shaloi Brang Dut gaw ngai hpe ahpum let "He, Mut La, hpa rai hkan wau si bu nga nta? Wa a manang she rai yang me." Brang Dut shing nga tsun jang grau wau dat se ai. Brang Dut a kawa hte dai manam num Brang Dut an hpe gayin yu dat ai. Shaloi she ngai grau wau bun dat ni ai. Brang Dut gaw nye makau e dung let ngai hpe masawp nna mau ai ga tsun nga ai. "Yaw, Mut La, hpa baw lachyum ta? Dai num hpe nang shade de wa n yu ra si ai gaw, dai num hpe nang hpa zawn nawn ai rai? Tsun yu u?" Da. Ngai mung Brang Dut a myiman hpe yu let, aja awa wau dan da we ai. Brang Dut ngai hpe yu nna mau mau rai, sumru yu nhtawm, nta hte tsan mat sai kawa hte dai num hpe bai hkan yu dat u ai. Hkan yu nga yang sha, Brang Dut a kawa yan lam hpunggaw de shang mat wa sai majaw, n hkan mu jahtum kau dat saga ai. Dai shana nsin kaba ngu na shaloi she, Brang Dut a kawa shi hkrai bai du wa ra ai. Shi chyaru grai nang nna wa ai hpe mu lu ai. Shi a nsam hpe mung daini na manam num a shingran hpe mung n yu ra rai nna, shi hpe ngai grai htim gawa mayu da we ai. Raitim, ngai gaw Brang Dut yannu a myiman tau nna, azim sha nye a shara e hpum nga kau se ai.

Dai shana, Brang Dut a kanu yan kawa agying agang ga-law hkat ma ai. Chyinghka la kau nna ga-law hkat ma ai raitim, ngai gaw shanhte a nsen hpe maram madat let, shingran rawraw mu, na nga nngai. Brang Dut a kanu gaw kawa hpe pawt nna, matsa re nga ai. Shannu lahkawng hkrap bu re nga ma ai. Ngai mung shana tup myit n pyaw let nhtoi hkren n yup ai nga shalai kau se ai. Hpang jahpawt jaujau, Brang Dut yannu nhku na pru wa mara ai. Brang Dut gaw galoi mung shi hpye ai nhpye hpe hpye pru wa u ai. Kanu mung shi gun gun re shingnoi hpe gun da nga ai. Ngai mung rawt nna, Brang Dut gaw nye a makau e chyingiawm dung dat nhtawm, nye a du hta noi let tsun nga ai. "Mut La, anhte ndai nta kaw n nga sana re. Nu ma, ngai ma, nang ma rai, htaw! Annu ni a namsi sun nta kaw sa nga mat saga. Daini kaw nna annu gaw, chyahkrung gaida yannu rai mat saga ai hku re. Ndai nta hta, mani hpawt nang n yu ra bu ai num jan, nye wa hte rau nga mat sana re da. Sa, sa, pru mat wa saga."

Ngai nhku de chyan mada dat yu yang, dawdap e Brang Dut a kawa chyaru nang nna naw yup taw nga ai hpe mu lu ai. Ngai mung lakang de hkan yu nang nhtawm, Brang Dut yannu hpang de kabu gara hkan gagat nang mat wa ni ai. Lam e, Brang Dut a kanu nye a mying gang nna tsun nga ai. "Hum! Gaya n chye ai num, dinghku la re chye nga ninglen, shang anin nga gwi ai num, nye a gwi Mut La daram pyi n chye gaya ai, htwi!" Da. Brang Dut hpe sharawt mada dat yu yang, Brang Dut gaw shi a nhpye na noikrat lahpaw hte nlung shinggyin langai shaw lang dat ai hpe mu lu ai. Shing rai, Brang Dut gaw shi a npu na nten hpe gawa da let, grai tsan ai maling gata de lachyum n pru ai lahpaw galang mi majoi gap bang dat u ai.