WUNPAWNG SHAYI NUM

WUNPAWNG SHAYI NUM

PUNGGA JA LI

Shinggyim masha ni hta ntsa lam hku nna ala hte anum ngu nna nga shajang ai. Ala hte anum lahkawng yan shinggyim masha rai nga ga ai. Raitim law malawng hku yu ai shaloi, num sha ni gaw la sha ni hta grit nem ai hku mu shajang ai. La sha ni hta num sha ni gaw n-gun kya ai, myit kya ai ngu hku hkam la nga ai. Rai timung, masha hpe sawk sagawn ai hpaji ninghkring ni mu ai gaw, num sha ni gaw la sha ni hta n-gun atsam, myit masin atsam grau rawng ai ngu tsun ma ai. Anhte nan mu mada ai ta tut masa pre yu ai shaloi mung n-gun lagaw atsam, myit masin atsam marai, num sha ni grau shapraw lu ai ngu tsun mai nga ai. Sakse hku tsun ga nga yang, shingkra gaw dinghku bungli nlu sharawt ai. Jahkrai ni a prat hpe yu ai shaloi kawa jahkrai ai gaw tsamai ai rai nna, kanu jahkrai gaw grau sawng nga ai. Ngai a mahkrum madup langai mi hpe tsun ga, ngai a manang langai mi gaw lahpawt mi na hkying sanit chyen daram hta aja awa marawn hkrap taw nga ai.

Shingrai ngai sa htim hpu yu ai shaloi, nta madu jan hpakan ga de arai gun dut lung wa nna shi hkrai wa shat, u shat, hka ja, hpun hta, dingye ye ai bungli ni ndang galaw wa ai majaw marawn hkrap ai nga nna tsun u ai. Shayi num sha ni e apyaw sha galaw kau ai bungli ni hpe myu shadang sha ni hku nna, hkrap hkra galaw ra nga ai. Shayi num ni prat tup gaida da nna, kashu kasha bau lu nga ma ai, shadang la ni masum ning shingkra n kra lu nga ma ai. Wunpawng sha ni a matsun maroi maumwi hta myu shayi sha ni a lam grai tsun da shajang nga ai. Dai maumwi ni hta gaw myu shayi sha ni manu dan ahkyak ai lam grai tsun ai hta n-ga, myu shadang sha ni hta shing nrai pyi grau ahkyak ai lam tsun nga ai. Kumhtoi wa Kumhtan gaw Hpan Karai ni hpang de wan sa hpyi ai shaloi, Wan lang wa Htingnan wa kaw nna matsun ai hta shinggyim Tu Nut ngu ai hte Mashang Htu But ngu ai yan maga hpra dung nna, wan gang nhtawm, wan shalat la na matu tsun ai, Ngun ja ai la wa-ngan ni hkrai wan gang na matu ntsun ai, dai hpe yu ai shaloi la ni hte num ni gaw n-gun maren sha lu ai hpe madun nga ai.

Dai hta n-ga shinggyim masha ni daru magam lata ai shaloi, nsen ngoi shingjawng ma yang, mu wa ngoi na shaloi, dusat du myeng ni kajawng nna, hprawng ayai mat na tsang ai majaw, tinang rem ai dusat du myeng hpe tinang gyit dun da ma yang, num sha ni gaw tinang da ai shingkyit hte gyit da ai nga ma ai. La ni gaw nam na shaba lap sumri rit nna gyit da ma ai da. Dai shaloi mu wa nsen kaba shapraw dat jang, dusat ni yawng gajawng lak wa ai shaloi la ni dun da ai shaba lap sumri ni yawng di ma nna, dusat hprawng mat ma shajang sai. Num ni dun da ai dusat ni chyu sha ngam ai rai nna, daini shinggyim masha ni rem ai dusat ni gaw num ni dun da ai dusat ni re nga ma ai. Daini nam de nga ai dusat du myeng ni gaw la ni dun da ai kaw na sumri di nna hprawng mat ai du sat ni re nga ma ai. Ndai maumwi hta shinggyim wuhpung hta num ni grau hkuptsup ai hte hpaji rawng ai hpe madun nga ai hta n-ga, shinggyim wuhpung a matu akyu rawng, manu dan ai lam ni hpe num ni a hpaji hte tam shalat da ai ngu tsun mayu nga ai. Shinggyim masha ni ra sharawng ai hte manu dan ai chyaru tsa shadu na matsi hpe Shingni Htu Bam Majan ngu ai num sha e nam na dumsi kaw na sharin la ai dusat hpaji re nga ma ai. Bai langai mi gaw shinggyim masha ni hpa galaw ang ai, gara hku nga yang htaphtuk ai ngu hpe chye lata la na matu ningwawt nlung hpe shayi num sha rai nga ai Kinnun jan Kinnai Wawt lang ai nga ma ai.

Dai majaw Kinnun jan Kinnai lai jum pawt gindai ngu tsun ai lachyum gaw, shinggyim masha ni chye ang ai hpaji hta jan nna shayi num sha ni chye ai ngu tsun nga ai. Wunpawng sha ni a kaba htum ai hpaji rai nga ai dumsa jaiwa hpaji hpe moi shawng de gaw num ni dumsa ai nga ma ai. Raitim ya prat gaw dumsa jaiwa mung la ni she law mat nga ai. Maumwi hta num ni dumsa ai shaloi, dumsa shabrai nau law ai rai nna, dumsa shabrain lu jaw ai majaw, la ni gaw num ni dumsa ai kaw na madat matsing la nhtawm bai dumsa matut ai re nga ma ai. Hpa majaw dumsa shabrai htat ai hpe myit yu ai shaloi, num ni dumsa ai gaw la ni dumsa ai hta grau sung ai hku chye dumsa ai majaw rai ang ai. Num ni dumsa ai kaw na, la ni bai dumsa matut ai shaloi, Nan wa Tu Nau ngu ai wa shawng dumsa ai hte Madum Hkyet La Sang ngu ai wa hkinjawng shawng jawng nhtawm, Shayawng Hkum ngu ai wa Manau jaiwa wa hpang ai nga ma ai. Ndai maumwi ni hpe yu wa ai shaloi, num sha ni gaw ningbaw ningla shara kaw nga lai wa sai lam dan leng nga ai. . Maumwi hta shayi num ni gaw shanhte lu ai ahkaw ahkang hpe shinggyim wuhpawng magan galaw n-gun rawt jat zinghka wa ai kaw hkan in la ni hpe jaw kau nna, tinang a ahkaw ahkang shamat kau ai hpe mu lu ai.

Dai zawn rai ahkaw ahkang di hkrat mat ai myu shayi sha ni hte seng nna, ga malai ni hta mung mu lu nga ai. Dai ga malai nkau mi gaw: Num chyau chyau hka, la chyau chyau sha, num pamung kadai n saw, u yi goi yang nhtoi n htoi, samit gade galu tim nga n-ganaw, num gade kung tim, magam nhyin nga ai ga malai ni gaw myu shayi ni hpe dip mat wa ai, la ni anum ni hpe dang na ja chyum ga ni tai wa sai. Dai ga malai ni hte maren, myu shayi sha ni hpe mare buga uphkang na ahkang n jaw, ji jaw nat jaw ai shani hkinjawng dumsa jaiwa n galaw shangun, ahkyak ai mung man jahta ai shaloi myu shayi ni hpe n jahta, n shaga shangun re ai hta n-ga, madat mara matsing la na pyi n lu ai. Shat shadu, hka ja, hpunhta bungli ni sha jaw da nga ma ai. Shangun manu na matu wan kanu hpunjum, dinghku kanu anum ngu shapyaw jaw da nga ai. Ndai prat hta moi na htunghking lailen masa ni yawng kabai kau nhtawm, prat nnan a sat lawat asak hkrung lam de sa wa nga saga ai hte maren, kaga lam ni yawng kabai kau lu saga ai. Hpun sumraw ai lam mung moi buhkra n bu tim, ya bu hkra bu sai. Moi tsa n lu ai myu shayi sha ni a lailen hpe jahten kau nna, daini tsa chye lu sai, ka -ni n chye lu ai htunghking hpe jahten kau nna ka -ni chye lu ai myu shayi ni nga wa sai.

Tinang a madu wa ni hpe htim share ai htung n nga ai hpe jahten kau nna, htim share gwi chye ai myu shayi tai wa sai. La ni hte nang shoi nang sha nga nna, shinggrau nna ga n shaga ai htung hpe jahten kau nna la ni hte maren, chye da kren shaga ai myu shayi ni tai wa sai. Laika hpaji sharin ai lam hta rai timung, naw ku daw jau ai lam hta rai timung maren mara ahkaw ahkang lu sai. Laklai ai lam nga timung, lahta de tsun lai wa sai myu shayi ni ginlut kau ai myu shayi ni a manu hte ahkaw ahkang hpe gaw garai n lu la nga ga ai. Myu shayi sha ni hpe ahkaw ahkang ginlut shangun ai htunghking nkau ni hpe tsun ga nga yang, num wa ai htung rai nga ai. Wunpawng myu sha ni a htung hta la la ai htung n nga ai, num la ai htung sha nga ai. Dai htung gaw anhte myu ni a htung nan rai nga ai. Dai re majaw htunghking hku nna, kyem da ra ai lam rai nga mali ai. Rai timung asak hkrung ai nam nak hku nna gaw sat lawat gram mat wa ra sai. Num wa ngu ai hta na wa ngu ai gaw hkrai shara kaw nna madung de htawt mat wa ai hpe tsun ai rai nga ai. Ga shadawn: Maran Hkawn gaw Lahtaw Gam kaw wa ai nga yang, shi a hkrai da nta rai nga ai Maran nta kaw na shi a nta madung rai nga ai Lahtaw ni a nta madung de htawt mat wa ai hpe tsun ai rai nga ai. Maran kasha rai tim, Lahtaw ni a bungli hpe galaw ra mat sai. Kasha gade shaprat timung, Lahtaw ni a mying shamying mat ra, shingrai Maran Hkawn a gam maka gaw shi a amyu nre ai Lahtaw ni kaw shamyet ra nga ai.

Num la ai ngu ai shaloi mung hpa baw a matu la ai. Dinghku bungli galaw na matu hte kashu kasha mayat maya gumja gumhpra wa na matu nga nna tsun shaman ai. Dai re rai nna, num la ai gaw bungli galaw masha jat la ai hte ma shangai ya ai masha tam ai de yawng ai nga yang, myu shayi sha ni a ahkaw ahkang hte manu sum mat ai htunghking tai nga ai. Shi gaw lahta na bungli hku nga jang, ja gumhpraw tam ai lam, ja gumhpraw madu ai lam n nga nga ai, wa ap ai jai lang na, madu na ahkaw ahkang sha nga ai majaw, wa ap ai lam nnga jang lata kaman rai mat sai. Shingrai myu shayi sha ni a matu, madu wa si mat, shingnrai, madu wa hte hka mat jang, shatban shatdi mat mat ai hte bung ai hta n-ga, tinang a hkum nan mung sum mat ai zawn rai nga ai. Dai majaw ndai prat na myu shayi sha ni gaw tinang nan bungli shang ai hte tinang nan gumhpraw galaw shapraw ai hpaji lu ra sai, masa mung nga ra sai. Shing rai yang, madu wa n nga mat, hka mat ai raitim, madu wa a wuman shayawm ai, tinang a wuman hta hkra na n rai nga ai. Bai kaga lam langai mi gaw kawa htum mun kadai n daw, num share kadai n daw, shingnrai num pamung kadai n saw nga ai ga hpe malan kau ra sai. Shingrai laika hti ai lam hta raitim, shiga madat ai lam rai rai, shinggyim masha hte seng ai hpaji lam, mung masa lam, sut masa lam yawng hpe hkaja ra sai.

Ndai prat hta shayi num law malawng tsun jahta ai ga ni gaw shada shatan nhkan ai ga ni, hpa baw sha yang mu ai lam, gara hku nga yang pyaw ai lam, gara hku shakya yang tsawm ai lam ni law mat nga ai. Bai gara hku hpaji chye wa na lam, gara hku nga yang ngasat ngasa madang tsaw wa na lam, masha hpe gara hku woi awn na lam, masha hpe gara hku uphkang na lam, ganing rai yang ningbaw ningla tai wa lu na lam hpe jahta ai nau n nga ai. N gup hta jahta ai hpang she ta tut byin wa lu na lam nga ai. Wunpawng ginra hta ahkyak ai wuhpung wuhpawng bungli lamang ni hta, myu shayi sha ni n kam lawm ai lam, n lawm lu ai lam ni gaw myu shayi lam sum mat ai rai nga ai. Miwa gumsan mungdan na rapdaw kaba hta sumpun masum hta na sumpun mi gaw myu shayi sha ni re nga ma ai. Ameriga gunsan wa hpe hpaji jaw ai hte kaga mungkan mungdan ni hta, hku hkau ganawn mazum na ladat shaw ai mung myu shayi sha rai nga ma ai nga tsun ai. Kaga mungdan de hkringmang daju gumsan magam myu shayi sha ni nga wa ai ten hta Wunpawng myu shayi sha ni gaw htinggaw 5 hpe up na myit gaw rawng nga ai kun?. Lahta e tsun lai wa ai hta myu shayi sha ni hpe shanem shagrit nna tsun ai zawn tai ai raitim, myu shayi sha yawng hpe tsun ai n rai, law malawng byin nga ai hpe tsun ai sha re. Wunpawng amyu sha ni hpe dip shingdang da ai lam hpa n nga ai.

Ninghaw kaba galaw mayu yang galaw lu ai raitim, ningbaw kaba galaw na myit hte dai bungli a matu hpaji hpe n hka ja kam ai gaw myu shayi ni a lit rai nga ai. Ngai a mahkrum madup hku nga yang, myu sha la ni, wa la ni grai myit lawm ai Wunpawng maumwi ni hpe myu shayi ni, hpaw mi ni a man e tsun yang, yup nga wa ai masha grau law ai. Myit lawm ai masha nau n nga ai, wa la ni a hpawng kaw tsun yang, myit lawm ai masha law nna, myit n lawm ai masha yawm nga ai, ndai lam gaw Wunpawng shadang sha ni hte myu shayi sha ni shai hkat ai sat lawat nan rai nga ai. Dai re ai raitim, ndai prat gaw lam shagu ni galai lawan ai prat rai nga ai majaw, Wunpawng myu sha ni a myit masa, sat lawat ni galai shai mat wa na mung aten kadun, shaning kadun laman e byin wa lu na myit mada mai nga ai.