NANGHPAM TSIN-YAM

NANGHPAM TSIN-YAM

TANGBAU MARY

1990 ning ten hta Sammung mare buga hta grai lauban ai salang Shanghting Tang hte jan Hpaumyang Kaw gaw kasha lahkawng hte grai pyaw hkra nga ma ai. Kasha yan gaw la sha yan rai ma ai. Shannu wa ni gaw hpa lam hta mung myit hkrum let sha aten shagu mani sumsai rai nga ma ai. Dai ten hta Sammung mare masha ni law malaw gaw yi sun hkauna galaw sha yang grai matsan ai nga tsun nga ma ai. Shanhte gaw gumhpraw lu lawan ai ka-ni sun hkrai galaw shaja nga ai, ka-ni sun galaw sha ai dinghku ni gumhpraw grai lu ai. Yi sun hkauna galaw sha ai ni ka-ni galaw ai ni na daram n lu ma ai. Dai ten hta salang Shanghting Tang gaw yi sun galaw sha nna sha nga ai. Gade lu ai raitim, ka-ni hpe nlu nsha yu ai salang rai nga ai. Shing rai laning hte laning kasha yan mung kaba wa sai, kasha Ma Gam kanu yan kawa hte rau nga let bungli galaw ai, kanau Ma Naw gaw Hpakan de manang ni hte lungseng htu na matu sa mat wa nu ai. Ma Gam nta nga let kanu yan kawa hte shani shana bungli galaw shakut u ai. Kanu gaw lu nga ai hta grau lu mayu ai wa rai nga ai. "Kawa e, annu wa ni mung daining kawn ka-ni she hkai sha saga, masha ni grai lu su ma sai." Nga, Hpaumyang Kaw gaw madu wa hte bawngban mayu nga ai. "Kanu e, ka-ni ngu ai gaw matsat shabat she re, yi sun galaw sha tim shat da mi n sha ai gaw n nga ga ai le." Nga Shanghting Tang madu jan hpe shadum nga ai. "Tsun yang dai hku hkrai rai sai, ngai ning Hkawn nta naw wam yu ga."

Hpaumyang Kaw madu wa hte ga n rum nna mare lam mat wa sai. "E, ning Hkawn..." "Oi, ning Kaw she rai nga ai, shang wa rit dung ga." "Ning Hkawn nang gaw grai she hpum tsawm mat nga ndai le, hpa rai na wa tsawm dik wa nta? Moi na hte mung grai shai mat nga ai le.." Hpaumyang Kaw kaning Hkawn hpe shingdu aman yaw gayin let tsun u ai. "Nye a dingla wa gaw ka-ni yi galaw dut sha ai majaw, annu wa ni ndai zawn lu wa ai rai nga ai." Kaning Hkawn gaw Hpaumyang Kaw hpe na ladan, ja hkachyi, lungseng lahkawn ni malu dan let tsun nga ai. Hpaumyang Kaw gaw kaning Hkawn hte madu mahkrawn jahta nga masai. "Kawa e, manang ni pyi moi na hta grau lu ma masai, anhte gaw grau she matsan wa ai zawn rai nga ai." Ngu chyu anyam satsang ai majaw, dai shaning kawn shannu wa ni mung ka-ni yi galaw hpang wa masai. Kasha Ma Gam mung kaga mare de num langai hte dinghku wa de mat nu ai. Ma Gam kasha langai lu ai hpang, manang n kaja ai ni hte ganawn hkrup ai hta n-ga, myit n lu sharai mat nna, ka-ni ya byin mat wa nu ai. Kanu yan kawa kaw na gumhpraw hkrai wa hpyi, kawa rem tawn ai nga kanu mung lagu dut sha kau ya tim, kanu gaw kasha hpe grai maga ai. "Nu, nye kasha grai machyi ai, gumhpraw mung n lu ai, gumhpraw 100000 naw hkoi ya rit." "Ndai ma hpe tsi tsi na matu re, ndai sen mi gaw na re." Hpaumyang Kaw kasha hpe gumhpraw mayun jaw u ai, kawa mu jang hta wa wa rai nna, kasha hpe gumhpraw latup ya let, lau wa su ngu ai kumla madun u ai.

"Mai sa nu, ngai wa sai." Kanu kaw gumhpraw lu la ai hte, Ma Gam nta de madu jan yannu kaw n wa ai, mare de ka-ni hpraw lu, htu, manang ni hte jawm pyaw hkawm rai, bat hku nta n wa mat nu ai. Ma Gam a madu jan gaw nta kaw ma shangai ai hpang, labu palawng hkrut, nhku bungli galaw rai nna, sai ni htaw ai majaw, n lu shamu ai gaw shat pyi n mai hta sha mat nu ai, kasha hpe mung n lu hta pawn u ai. Lana de madu wa mare na pru wa yang, madu jan machyi kaba hkrum ai zawn rai taw nga la sai. "Kanu, hpa byin ai ta?" "Kawa e, nang gaw pyaw hkawm taw ai i? Ngai grai jamjau nga nngai, ngai nye kasha Pan Pan hte n lu hka ai, nang hpe mung n-gwi ap da ai, nye kasha nang hte nga yang, ngai zawn machyi si mat na ra ai, dai majaw hpa mi rai rai, amoi yan agu kaw Pan Pan hpe wa ap da u yaw..." Nga tsun da nna madu jan nsa di mat wa sai. Ma Gam hpang shani kasha Pan Pan hpe pawn nna kanu yan kawa kaw wa nu ai. "Ma Gam, dai ma hpe hpa rai pawn hkawm a ta? Nang na kasha hpe dut sha na ngu ai i?" "N re wa, ningnam jan Je Nu n nga mat sai majaw, ndai ma hpe ngai n lu bau ai." Nga ma pawn ladawn nga jang, kawa gaw gashu hpe hkap pawn la nu ai. Shanghting Tang gaw kasha hpe pyi nju na daram myit hta n pyaw ai, kawa a sutgan hte nta kaw nga ai u wa yamnga hpe Ma Gam e hkrai dut sha kau ya ai majaw, grai matsan mat nu ai. Ma Gam madu jan Je Nu si mat ai hpang, shi mung shinggan hkan wam hkawm mat wa sai. Ka-ni kut n dang sharang ai shaloi, masha gahtawng hkan masha ni a nta na rai hkrai lagu dut sha hkawm hkawm rai ai majaw, laning mi n du ai Ma Gam hpe mare masha ni e jawm adup sat kau manu ai. Masum ning a hpang, salang Shanghting Tang a kasha Ma Naw Hpakan kaw na num woi rai pru wa ra ai. Dai ten hta Ma Gam a kasha masum ning rai sai. "Pan Pan, htaw na nu yan wa wa ra ai." Hpaumyang Kaw gashu Pan Pan hpe kasha Ma Naw yan hpe madun nna tsun u ai. Ma Naw yan du shang wa ai hte Pan Pan gaw: "Anu, awa..." Nga kagat sa wa let: "Wa hpe Pan Pan grai dum ai." Nga mada tsun nga u ai.

"Nu, ma ndai gaw kadai ta?" Ma Naw shi makau kaw tsap nga ai Pan Pan hpe yu taw let san nga u ai. "Na nhpu ba a kasha re, ningrat mung ma shata pyi n tup yang n nga mat sai. Na hpu mung ma hpe wa ap ai hpang, masha ni a rai hkrai lagu nna, masha ni adup sat kau ya sai. Ya ndai ma gaw nan hpe kanu kawa sha shadu sai, nan mung ma shaga jang htan ya ra ai re lu." "Mai sa nu." Shanghting Tang a dinghku hta dusat yamnga n lu mat rai grai yak hkak wa nga ma ai hta n-ga, kasha Ma Naw mung ka-ni grai chye lu wa sai. "Amoi, hpawtde ka-ni yi de agu kaw n-gu naw wa sa na." Ma Naw jan tsun ai. "Ninggu mung nta n chye wa sam sai, dingtaw gaw kadai n kam wa sa ai." "Amoi ngai wa sa na, nang Pan Pan hpe woi let nta kaw mam buri lahkawng naw nga ai, dai hpe lam let nta nga mu yaw, ngai yi na wa jang she mam wa htu na." Ma Naw a madu jan Wa-hpai Lu Bu gaw ndai ten hta shangai nhtoi ten gaw rai wa sai raitim, bungli nhkring nsa galaw ra nga ai. Shana de nta du wa yang, jahpawt lam tawn da ai mam buri lahkawng gaw madu wa e hpai dut sha kau ya la nga sai. Lu Bu grai pawt ningyun bu na zawn nga hkam sha nu ai, raitim sharang let madu wa hpe la nga nu ai. Shana shanmoi gaw n-gu n lu nna Lu Bu di wa ai hpalun hpe shat shalaw na hpa hpa sha nga manu ai, madu wa bungli gaw n galaw, jan du yang she nta de wa u ai. "Hkum shang wa, nang zawn re masha myit n rawng ai gwi daram pyi manu n dan ai, pru wa u!" Lu Bu madu wa hpe hkap pawt u ai. "AWh, nang gaw ngai la da yang, ngai hpe bai nhtang de gawt ai hku i? Nang zawn re num..." Madu jan ma kan hte re jan hpe htu ganawng kau dat nu ai.

Lu Bu shadaw kaw baw wa adawt nna malap mat wa nu ai. "Nu, ngai gara hku di sana, nye madu jan..." Ma Naw si malap taw nga ai madu jan hpe yu nna tsun ai. Hpang jahawt Lu Bu dum wa ai hte: "Amoi, ngai nta ndai kaw n kam nga sai, ndai nta ngai prat tup gara hku mung n lu ganawn ai, nanhte amyu ni gaw ka-ni n lu yang si wa sam ai, anhte amyu hta ndai zawn re masha n nga ai, ngai n dang nga sai." Nga hkrap let tsun u ai. "Ngainam, dai hku hkum rai, ya nang ma shangai ten du sai, pru wa na rai yang, hkum san ai hpang ma hte rau mayu nta wa tim mai ai." "Amoi, ngai ndai nta ma n kam shangai ai, mayu nta wa na malai ngai hkrai shangai na, nye wa ngai hpe ndai Ma Naw hte gachyi mung myit n hkrum ai, ngai lama wa yang, yawng hkra ngai hpe jawm daru na mara ai." Lu Bu rai baw gun nna pru wa yang, Pan Pan gaw kanu kaw hkan hkrap ganan nga u ai. "Nu, nu.. Pan Pan hpe hkum tawn kau da, nu hte n lu hka ai, nu hpe ma la taw ai grai na sai, anu ya bai pru mat jang, nu hte hkrum lu na matu aten ni n kam la sai, nu hte rau nga na." Pan Pan hkan marawn hkrap ai nsen wa Lu Bu a myit kraw hta kasha majing langai zawn nga hkam sha mat nu ai. Kasha hkrap ai hpe n dang hkam sha ai majaw, shi lang ai nhpye hpe kabai kau nhtawm kasha hpang de bai gat wa nu ai. "Ya kawn galoi mung nu Pan Pan hpe hpa-ji chye myit su hkra galaw na nye lit rai sai." Ngu Pan Pan hpe ahpum tawn u ai. Jan du wa tim madu wa gaw n pru wa rai, Lu Bu gaw: "Amoi, Ma Naw gara sa ai ta?" Ngu san sai. "Ka-ni yi de gumhpraw tam sha ai da, jan du sai wa, ya mung n wa, ngai ning Hkawn kaw naw sa yu n-ga." Nga pru mat wa sai.

"E-ning Hkawn, nye nta na Ma Naw gaw taw?" "Ning Kaw e, na kasha gaw shawng de na hte n bung mat sai, dani mung bungli galaw ai wa, hkyinghkum masum pyi ganoi n lu galaw, htaw yi wa kaw daini bungli galaw ai daram na ka- ni hpyi nna jaw da sai, she nlu pyaw taw nga a dawng." Nga hkap tsun dan sai. Hpaumyang Kaw masin lun nga ai ta, yi de kasha hpe tam mat wa sai. "Ma Naw!" Hpaumyang Kaw yi wa shinggan kawn sa marawn dat sai. "Nu, hpa rai wa sata?" "Nang hpe myit tsang ai majaw du wa ai rai nga ai le, ya nang gaw nta de pyi she ndum hkra ka-ni lu marawp yang gaw, moi na sumtsaw dingsa hte hkrum jahta ai she nga grai pyaw, nta de na madu jan hpa byin ai gaw dum ai i?" Hpaumyang Kaw yi wa shinggan kaw nshang madi kau rai, kasha hpe sa makan nga ai. "Nta de hpa re ta?" Nga Ma Naw gat du wa yang, madu jan ma shangai tawn nna galeng taw nga ai. "Kanu hpa sha mayu a? Hpa sha na rai?" Ma Naw ka-ni lu hkru sai majaw, ga grai shapyaw chye nga ai. "Nang ngai hpe lu jaw sha ai i? Na n-gup kaw pyi mai yang shani shana ka-ni hpe marawp nga na zawn she n nga i?" Lu Bu grai ba let shaga u ai. "Ngainam hpa sha u." Hkainu hpa hpe Lu Bu lu nga nu ai.

"Ma Naw e, na madu jan gaw matsan shayan nan re, ndai zawn hkainu shat n sha yu na re, nang gaw ka-ni hkrai lu nga yu..." Hpaumyang Kaw gaw ganam myit daw na tsang nna, kasha hpe daru dat nu ai. "Nu e, ya ten hta masha mi ngai hpe ka- ni hte nga na i? Madu jan hte hka na i? Nga san hkrup yang, madu jan hte hka na ngu tsun na zawn she nga nga ai law." "Ma Naw e, ya annu ni dinghku moi na zawn n rai sai, na wa mung dingla sai, nang hkrai sha rai sai, ya nang mung ninghpu Ma Gam a lahpa she galai nga ai i?" "Nu e, ngai kasha nga ai, hpa hkum tsang." Ngu, Ma Naw kanu hpe myit shapyaw ya u ai. Ma Naw shana madu jan gali nga ai hkachyi hpe dut sha ga ngu wa hpyi nga nu ai. "Kawa e, ndai gaw n mai dut sha ai, gade yak tim ndai hkachyi n mai shamawt ai, nye dwi n si yang, mari tawn da ya ai re." "Lu Bu e, Ya gaw nang na nu hte mung n nga sai, ya gaw ngai tsun ai ga madat u le, na dwi gaw si mat sai, hpa n ra sai." "N mai ai law..." "E! Ngai hpe jaw na i? N jaw na i? Dai sha tsun u!" "N jaw ai." Ma Naw madu jan a du na hkachkyi gashun abrut di la mat wa nu ai. "Amoi, nye hkachyi Ma Naw la mat wa sai law." Lu Bu ku kaw gumrawt let gamoi hpe marawn dat nu ai. "Ngainam e, yau sai, moi mung gara hku n chye di ai." Salang Shanghting Tang gaw grai machyi nna si mat wa sai.

Dai hpang dinghku grau nga yak mat wa sai, Lu Bu mung ma shangai ai shata mi n du shi tim, bungli gaw nhkring nsa galaw nga nu ai. Shana de jan du na nta wa tim, gamoi mare hkrai wam hkawm shat mung n shadu da ya, madu wa mung nta n nga, Lu Bu hkrai ma gaw hkrap rai grai jamjau chyum nga nu ai. Pan Pan gaw kanu bungli galaw nna pru wa shagu muk hkap hpyi hpyi rai nga lu ai. "Nu sha e, ya gaw nu gumhpraw n lu shi ai, ma hpe nu muk sha n re palawng grai tsawm ai mari ya na yaw." Ngu, Lu Bu gaw Pan Pan hpe asawng u ai. "Um." Pan Pan grai myit su ai hte kanu a ga madat nga ai. Lu Bu shat shadu na ngu n-gu pung wa yu yang, pung kaw n-gu n rawng nga la ai majaw grai myit htum mat nu ai, ngai bungli gade galaw tim, sha na n-gu pyi n lu ai, nye prat wa ndai zawn re dinghku hta chye ang ai gaw ngu shi hkrai myiprwi lagu hkrat nga nu ai. Hkrap jin la nna, kanau hpe ba, Pan Pan hpe dun rai nadap de palang baw na matu sa mat wa nu ai. "Apan».." "Oi." "Kanau hpe atsawm yu u yaw, nu palang naw baw na, gara de mung hkum sa re lu." Lu Bu kasha yan hpe yi wa kaw tawn da u ai. "Mai sa nu." Lu Bu hkauna pa kaw hpalang baw nga yang, la langai gat sa wa ra ai: "Lu Bu e, Lu Bu..." Nga sa marawn dat sai. "Ya hpa wa rai sata?" Lu Bu mung kajawng kaja ngu htan san dat nu ai. "Na dingla wa nga lagu nna mare salang ni rim mat wa sai." "Re i?" Lu Bu kasha hpe wa hta ba la, Pan Pan hpe dun rai mare de bai te mat wa sai.

"Kawa, hpa rai nhkru n kaja ai bungli galaw a ta?" Lu Bu gaw nsa hte hke nga san sati u ai. "Kanu e, dai gaw nye gam maka nan rai na sai." Gyit htingku tawn ai Ma Naw gaw baw pyi n sharawt gwi ai tsun ai. "Kawa nang gaw nye jamjau jaw ai hku rai nga ai le i? Nye kasha yan matsan mayan she rai sai, ngai ndai ka-ni hpe grai nju ai." Nga, Lu Bu hkrap nga yang, balik ni sa wa ra ai. "Awa, Pan Pan hpe galang bai tawn kau da sana i? Wa hpe ma grai tsawra ai re le, wa lawan wa rit, Pan Pan wa hte n kam hka ai.. Wa... Awa..." Ma Naw hpe balik ni woi mat wa ai shaloi, Pan Pan hkan shachyut hkrap nga ai. Kawa mung kasha hkan shachyut marawn hkrap ai nsen hpe galoi mung na hta shingran ana nga nu ai. 3 Lu Bu kaw hpyendap de madu wa a lam tsun na matu shaga laika du wa ai. "Amoi, ngai hpyendap de naw sa na, ma yan hpe yu da u yaw." Lu Bu nau myit law ai majaw grai lasi mat nu ai. Madu wa kaw du na matu mung gumhpraw n lu myit htum ai wa ganang n chye adawt si mat ai zawn she nga nu ai, htingbu nta na gumhpraw hkoi hka mung rai n lu wa rai nga yang, madu wa hpang de na ka-ni lu mara e htawng 10 ning, masha rai lagu ai majaw gumhpraw sen 30, ndai bat hta hkrak tup jaw, n rai yang htawng 3 ning bai gahtap rawng nga nna, Lu Bu mana mat na zawn nga hkam sha nga ai. Myiprwi si hkrat ai gaw marang htu ai zawn lwi hkrat dingyang rai nu ai. Madu wa hpe htawng de woi mat wa yang Lu Bu hkan shachyut marawn hkrap let tsun ai ga gaw: "Kawa, htawng rawng ai ten akyu hpyi u yaw, myit malai u, nang grai tsawra ai ka-ni hpe nju mat u, ya annu ni ndai Sammung kaw n lu nga sai, dai majaw nang hpe tsun dan dat mayu ai, na a tsawra "Kaw Chyang Hkawn" hpe malap nu yaw, shi gaw anhte dinghku a tsin-yam nan re•…." Lu Bu nta de nhtang wa yang, kasha grai machyi nga la ai. "Nye kasha hpa bai byin wa sata amoi?" Lu Bu kasha hpe masawp let san u ai.

"Ngainam ma hpe tsirung de lawan she woi sa na hku rai u." Lu Bu kasha hpe pawn la nna kagat mat wa sai. "Sara nye kasha hpe lawan tsi ya rit, sara ngai grai hpyi nyem ai." Lu Bu salat hte li rai tsirung kaw du shang wa sai. "Rai sai, dai hku nga yang, tsirung shang na matu gumhpraw mun mi hkying manga ya jaw dat rit." Lawnghpraw hpun ai tsi sara tsun u ai. "Sara, nye dingla wa mung htawng hkrat taw ai, annu ni ya ten hta gumhpraw lap mi mung n lu taw ai, sara e matsan naw dum la rit, ngai grai hpyi nyem ai, nye kasha aten lai gaw n mai ai. Sara, tsi gumhpraw dai daram ting nga yang gaw ndai ngai a ta chyawp sara hpe ap da na mai ai i? Nye kasha hpe mai hkra tsi ya rit." Lu Bu ta chyawp tsi sara a ta kaw raw bang ya let tsun u ai. "Dai nga yang nang ndai kaw la nga u yaw." Tsi sara wa ma hpe pawn rai nna pru mat wa sai. "Nye kasha'.." Lu Bu tsirung na lahkum kaw dung shanat la nga u ai. "Gai ya gaw n tsang ra sai, ndai tsi hpe galoi mung dingyang matsun kaw hkan nna jaw sha u yaw." "Mai sa sara." Lu Bu kasha hpe pawn rai nta wa sai. Nta shang wa yang, gamoi jan dawdap kaw bai hkrap dung nga la nna: "Amoi hpa byin ai ta?" Ngu Lu Bu gaw atsang arang hte san u ai. "Ngainam e, anmoi ni lawan she htawt mat wa ra sai, masha ni hpe gumhpraw sen 30 wa ra ai hta n-ga, ninggu rai n si yang hkoi da ai bau masum mung jaw ra ai, anmoi ni nta dut kau da rai pru mat wa saga." "Anmoi ni hpa rai ndai daram jamjau nga ai kun?" Lu Bu gamoi hpe yu nna tsun u ai. "Ngainam e, ndai zawn byin ai nye majaw re, daini gaw nye dinghku yawng hten za mat sai, ngai e..." Hpaumyang Kaw sinda lahtum let tsun nga ai. "Amoi e, dai hku madu hpe mara hkum shagun la, ya she yak tim lani mi gaw bai pyaw wa na rai nga ai le." "Gai, nannu ni bu hpun palawng lau wa lajang hkyem la masu, nta mari na ni du wa na ra ai."

Shanmoi ni gumhpraw hka jaw kau da nna pru mat wa masai. "Amoi e, ya gara de sa wa na re? Htaw ra Hka la yang de nye tsaba ang ai jinghku ni nga ma ai, shanhte hpe wa hpyi nyem naw wa shingbyi ga i?" Lu Bu gade yawng na n chye mat nna jinghku nga ai gamoi hpe tsun dan u ai. "Mai ai, ngainam e nang chye ai shara gade tim woi sa rit." Gamoi jan Hpaumyang Kaw myit hkrum let tsun u ai. "Nu, Pan Pan shat grai kawsi ai." Pan Pan hpang kaw hkan hkawm nang nga let tsun ai. "Nu sha, ya nta de du hkyem sai, nta du jang lawlaw sha ga i?" Ngu, Lu Bu kasha hpe asawng u ai. "Mai sa nu." Pan Pan nta du jang shat lawlaw mu sha na re nga jang, sat htawt tim ahkat rai bai hkan hkawm nang nga sai. "Hka la yang mare du sai amoi. Amoi! Gara de rai wa sa? Pan Pan adwi gara de rai wa sata?" Lu Bu gamoi hpe shaga dat yang, gatsi ai majaw nhtang gayin mada ai shaloi, gamoi n hkan nang nga sai. Gamoi Hpaumyang Kaw gaw shannu ni shawng kaw hkawm nga ai ten hta, lu ai gumhpraw gun rai hprawng makoi mat wa sai. "Amoi •Hpa rai ngai hpe hprawng kau da ai rai? Ngai hpe n kam ai kun? Ngai amoi hpe sha pyi grai bau mayu ai wa le..." Lu Bu a hkrap nsen hpe lamdung lawu kaw makoi rawng nga ai Hpaumyang Kaw na nna: "Ngainam e, amoi hpe mara raw ya rit, ngai gaw nang daram n chye myit ai, nang a gamoi tai na n ging nngai." Nga myit let hprawng mat wa sai. "Tsa ba.. Tsa ba..• Ni ba-•Ni ba..." Lu Bu gaw ma yan hpe woi rai gani gatsa ni a nta de san shang wa sai.

"Kadai ta? Lu Bu she rai nga ai." Gatsa ba chyinghka sa hpaw dat sai. "Tsa ba, annu ni hpe tsa ba a nta kaw nga na ahkang jaw rit, annu ni nga shara n lu mat sai." Lu Bu gaw chyinghka lam kaw tsap let gatsa ba hpe hpyi shawn u ai. "Sa sa, nhku de shang wa ga." "Ma pyi grai kaba sai rai nga ai le." Lu Bu a gani ba ma yan hpe hkap yu nna shaga u ai. "Re, ni ba." "Nu, Pan Pan shat grai kawsi ai." Pan Pan galang bai kanu hpe shat kawsi ai lam tsun dan u ai. "Gai gai, shat gawk de shat wa tam sha masu, tsa ba mung matsan ai, nannu ni sharang nna nga mu yaw." Gatsa ba shat gawk de madun let matsun u ai. "Mai sa, chyeju kaba sai." Lu Bu kasha yan hpe woi shang wa let htan ai. Matsat ning na ai hpang. "Nu, Pan Pan hpe jidwi a kasha grai roi sha ai, jawng kaw mung kawa n lu ai ma shadam nga tsun nna, jawng ting AWng Lat annau hpe yawng hkra hte dai zawn nga jawm tsun ai nu, wa hpe grai hkrum mayu sai..." Pan Pan kanu hpe shannau jawng kaw na mahkrum madup wa tsun dan nga ai. "Anu, masha ni ngai hpe kawa n lu ai ma da." AWng Lat mung n-gup shapyet kau hkra tsun n ra taw nga ai. "Nu sha yan e, masha ni hpa tsun tim, nannau gaw n mai ga-law hkat ai yaw, annu ni grai yak ai, masha ni hpa tsun tim sharang ra ai, nu sha yan chye na sai i?" Lu Bu kasha yan hpe ahpum tawn nna sharin nga ai. "Um, chye na sai." Pan Pan shannau htan ai. "He, AWng Lat nang hkrai i? Na Shawng gaw taw?" Jawngma langai mi AWng Lat hpe jum shatsap tawn nna san u ai. "Nanhte ngai hpe hpa di mayu ai rai?" AWng Lat hkrit hkrit nga ai nsen hte shaga ai. "Haha'•Nang zawn re ma wa me anhte hpe ga ja ja nga taw i? Manang ni daini gaw.. AWh rai sai." Jawngma kaba ni AWng Lat hpe ahtwi bang wa sai.

"Aka law-"'Ashawng:"." AWng Lat hpe ladi sai she pru hkra ahtwi tawn masai. "Ah*. Kanau kadai re nang hpe shing di ai?" Pan Pan kanau hpe sa shadaw let san ai. "Shawng, ji bawk ni re." "He! Naw La pru wa yu, nang hpe ngai sat kau na!" Pan Pan kanau a matu share marawn bang wa sai. "Nang wa i?" Naw La a makau kaw tsap ai manang ni Pan Pan hpe grai yu kaji ai hku tsun ndam nga ma ai. "Naw La, nang hpe nye kaji re ngu hkungga yang, nang gaw annau hpe roi sha i? Nta kaw lam mi, jawng kaw lam mi, nang zawn re hpe ji bawk ngu na pyi n ging ai, nang zawn re gwi la, htwi!" Dai ten hta, Pan Pan hpe la sha langai shingdu de nna htawng dat sai, Pan Pan pawt mayu nna hpuntawng kasha hta la nna, la sha dai a baw kaw adup kau dat ya nu ai. Dai hpang, Pan Pan hpe sara ma jawng rung gawk de shaga tawn da nu ai. Machyi hkrum ai la sha a kanu mung sa wa ai hte: "He, ma nang hpa rai dai daram n kaja ai ta? Nang hpe mung dai zawn di yu ga le." Nga hta bang wa sai. "Grai tawngban ai, nye mara re, ngai hpe mara jaw rit, ngai shut sai." Pan Pan hputdi let tawngban taw ai hpe Naw La mu nna mani nga u ai. "Ashawng, hkum hkrap sa law." AWng Lat lawngta gang sharen la nhtawm, gana a myiprwi si gatsut kau ya nga ai. "Nye kanau..." Pan Pan kanau hpe ahpum nna hkrap nga yang, sara ma kaba Pan Pan hpe shaga dat sai. "Pan Pan pru wa yu rit. "Mai sa sara ma."

Pan Pan pru wa yang, jawng wang kaw jawngma ni yawng jawm yu nga ma ai. "Gai nanhte yawng madat mu, ndai Pan Pan gaw masha langai hpe sai pru hkra galaw yu nga ai, labu malu u." Nga sara ma gaw Pan Pan hpe gayet bang wa sai. "Aka law, sara ma e, ya hpang de dai zawn n galaw sai, aka ka, sara ma grai tawngban ai, grai machyi ai lu." Pan Pan labawp masawp let tsun u ai. "Hkum shaga, nang masha ni hpe adup yang dai zawn hkam sha ai hkrai re." Nga, Pan Pan a labawp yu hpa pyi n nga mat hkra ri duk hte gayat da sai. "Yawng mai wa sai." Sara ma jawngma ni hpe bra mat shangun sai. Pan Pan hkrai hkrap dung nga yang, kanu gat sa wa ra ai. "Goi law. Goi sha nye apan..." Lu Bu sa mau kajawng taw nga nu ai. "Nu, nu, Pan Pan hpe mara raw ya rit." Lu Bu gaw kasha hpe wa ahpum nna: "Nu sha hta mara n nga ai, nu chye ai nye kasha grai myit su ai." Nga, kasha hpe dun rai nta kaw tsi wa chya let dung nga yang, Naw La kanu hte shang wa ra ai. "He, nannu gaw grai pyaw taw ai i? Shat galoi shadu na rai? Pan Pan ngai hpe hka ja ya rit." Naw La a kanu nhku du shang wa ai hte tsun ai. "Mai ai." Kanau AWng Lat gaw gana shawng lagaw htenren let hka ja mat wa ai hpe yu matsan dum nga u ai. Lu Bu gaw ndai gatsa ni a nta kaw ma yan hpe prat tum woi nga ai baw masa n pru ai majaw, myit ai lam langai nga nga nu ai. "Nu sha yan, nannau hkrai raitim, shada tsawra hkat ra ai lu yaw, annu ni ndai zawn yak hkak hkrum ai gaw ka-ni a majaw re, AWng Lat nu ga hpe madat u yaw, nang hpa-ji chye wa ai shani, myu hte mungdan hpe nang nan woi awn ra ai yaw, Pan Pan mung myit su ra ai, manang ni roi tim naw hkam sharang ra ai, nu hpawtde Hpakan naw lung na, nannau atsawm rai nga mu lu, gai, ten n rai sai, yup nga saga, hpawtde grai jau rawt ra ai."

Lu Bu kasha yan hpe shi hkawm hkyem ai lam tsun dan u ai. 5 "AWng Lat rawt nu, jawng sa ra ai, shawng bungli naw galaw na, laika hti u yaw." Pan Pan kanau hpe jasu nga ai. "Mai ai shawng." AWng Lat myi kanun let htan u ai. "He Pan Pan, na nu gaw ndai de n wa sai, nannau hkrai shat hpa sha na." Naw La gumrawng gumrawng nga let Pan Pan hpe shaga u ai. "Anu tsun ai bai wa na da, ji bawk shat sha nu yaw." Pan Pan shagrit shanyem ai myit hte htan ai. "Ngai kam sha yang sha na rai nga ai le." Nga, Naw La shat simai wa hpaw yu yang, nai shatmai rai taw ai hte: "Ndan re n kam sha ai." Nga let di htawng galau kau dat nu ai. Pan Pan pawt mayu nna marawn dat nu ai. "Naw La, nang shadu ai re i? Nang n-gu tum mi chye tam ai i?" "AWh, nang gaw anhte nta nga nna ngai hpe marawn ai hku i? Pan Pan ya jang nannau nye nta na pru mat wa mu, ngai n kam yu ai mawhpyi kasha ni." "Naw La, nang gade pawt mayu tim, annau hpe mawhpyi gaw hkum tsun, ngai n ra ai" "Nau hkum shaga taw nga sa, rai lawan baw la u, pru wa u!" Nga marawn let Pan Pan hpe htawng dat sai. "Ngai pru na, AWng Lat rai hkyem u." Pan Pan mung pawt let kanau hpe shadut dat sai. "Shawng gara de sa na?" AWng Lat maumau nga let san ai. "Annau ndai hta grau pyaw ai shara de sa ga." Pan Pan gaw kanau hpe dun let pru mat wa nna: "Naw La nang grai pyaw sai n rai i? Lani mi nang gaw annau kaw hpyi sha ai nhtoi du na re, dai shani ngai nang hpe grau nna galaw na, masha gaw prat tup matsan taw na n re, asak sha hkrung nga dingsa n matsan ai, ngai tsun ai ga hpe matsing da u." Pan Pan shannau pru mat wa tim, kaba ai ni kadai mung hpa n nga, yawng jawm yu shalai nga ma ai.

"AWng Lat, annau gara de sa na ta?" Nga, Pan Pan gaw: "Nu mung galoi she wa na kun nye kanau e.." Nga kanau hpe dun rai lam hkan mau hkawm nga ai. Shana de jan du wa rai shat kawsi wa ai kanau gaw: "Ashawng hka lu mayu ai, shat mung kawsi ai." Nga hpyi wa sai. "AWng Lat ndai kaw naw nga taw u, shawng htawra gat de shat wa la na yaw." Ngu kanau hpe hpunpawt makau kaw shadung da rai, Pan Pan kanau wa hpe shat hpyi jaw na matu hkawm mat wa nu ai. Gana jan hkawm mat wa ai hpang, AWng Lat gaw nau kawsi nna hpun nhpang kaw kawsi malap mat wa nu ai. Lu sha tam mat wa ai gana mung rai n pru wa re lapran hta, ang shaa rai lusu suthti wa Maran Brang Tawng hte jan Langjaw Kaw Nau yan lai wa yang, lam kaw ma hpe mu dat ma ai. "Kaw, htawra hpunpawt kaw ma kasha langai galeng nga ai, hpa wa re kun she sa yu ga." Nga hpunpawt de lung wa yu manu ai. "Kanu, ma ndai hpe tsirung de lawan woi sa ga, malap taw nga ai." Maran Brang Tawng gaw madu jan Langiaw Kaw Nau hte AWng Lat hpe hta pawn nna tsirung de kagat mat wa masai. "Nye kanau gade rai wa sa? AWng Lat, nye kanau*.." Pan Pan shat makai hpai rai kabu gara hte kanau hpang de nhtang wa yang, kanau hpe n wa mu nna, mau kajawng hkrit let tam marawn hkawm nga nu ai. "AWng Lat..." Pan Pan hkrap nga yang, ka-ni hpaga ga sha ai num langai lai wa hkrup ra ai. "E ma, hpa rai hkrap taw a ta?" "Ngai, nye kanau hpe shamat kau sai, nga, nga shara mung n lu ai." Nga hkrap gae let tsun dan nga ai. "Dai hku nga yang ngai hte rau nga ga. Hpa ntsang ra ai, kanau hpe gaungwi tam na re, sa sa jan du wa sai." Ngu Pan Pan hpe woi mat wa sai. Pan Pan grupyin gayin yu yu rai hkan nang mat wa nu ai.

Awng Lat tsirung na prang wa yang, makau kaw gana n nga taw ai. "Ashawng, nye ashawng gaw taw? Ashawng... Nye shawng gaw ashawng.." Nga gana hpe rawt hkrap tam bang wa sai. "Ma nang hpe woi la ai shara de woi sa na yaw." Maran Brang Tawng hte Langjaw Kaw Nau yanla gaw AWng Lat shi kawsi malap nga ai hpunpawt de bai woi hkrat wa na myit nga ai. "Um." Ningrim rim wa ai ten hta, AWng Lat gaw hpunpawt makau hkan gana hpe tam marawn hkrap hkawm nga u ai. "Ashawng ngai kadai hte nga na? Ngai hpe tawn kau da sai i?" "Ma, hpa hkum tsang anhte rau nga na rai nga ai le, jan grai du wa sai, anhte nta wa saga i." AWng Lat hpe kasha n lu ai Maran Brang Tawng yan Langjaw Kaw Nau shanla e kasha langai zawn grai tsawra let bau la kau sai. Lu Bu mung Hpakan ga du wa ai hte kanu kawa ni e hkap nhkum da kau sai. "Lu Bu nang gaw kanu kawa hpe myit ru shangun ai, ya kawn gade sa na hkum myit sa, nta kaw atsawm nga nga sanu." Hkumgawng ahpum asau, nhka mun sai sai di madat da ai Lu Bu a kawa gaw hka bawng marawp let lahkum kaw dung rai, shi a ga chyu lale ai kasha shingtai hpe grai pawt mayu ai raitim, bai nhtang pru wa sai majaw, ga pyaw pyaw hte hkap shaga u ai. "Awa, ngai hpe mara raw ya rit, ngai kasha lahkawng lu ai, shannau hte n lu hka ai, ngai nye kasha yan kaw bai wa ra ai." Lu Bu kawa hpe hpyi nyem taw nga ai. "Lu Bu nang ngai ningnu hpe naw myit shapu shangun mayu ai i?" Lasi lasi re Lu Bu a kanu gaw namlap maka ka ai buhkrawng bu tawn, jaw ti kaw numri pan daw tsat kau rai nga ai, ta kaw ngachyu gawm hpai rai kawa a makau kaw wa dung bang wa let tsun u ai.

Lu Bu gaw Gala kasha re, kanu yan kawa ma grai shaprat tim, si mat mat re majaw, shi hpe shangai ai hpang, jinghku Jinghpaw ni kaw sa hpyi shamying ya ai mying rai u ai. "N re, ngai nye kasha yan hpe woi la rai nu hte rau bai wa nga na." "Na nu myit pyaw na matu, nang gaw lauban Zau Dan hte hkungran ra na re." Lu Bu a kawa amying jahkrat dat sai. "Ngai hpe Zau Dan hte nga shangun na rai yang gaw, ngai ndai nta hte tsan ai de nye kasha yan hte pyaw pyaw nga hkawm na ni ai." Lu Bu ninghkap nga ai. Shata lahkawng lai ai hpang, Lu Bu kanu yan kawa hpe kau da nna, kasha yan hpang de nhtang wa ai shaloi, lam kaw num sha langai hte hkrum shaga u ai. "E ning, nang Shanghting Tang a ganam n re i?" "Re le..." "Na madu wa htawng kaw n nga mat sai shata mi dang rai sai." "Dai hku nga yang hprawng mat wa ai i?" "N re law, si mat sai." "Si mat sai da awh? Goi, nye prat wa .." Lu Bu lam kaw madu wa gatsan ga rai mat wa sai shiga na gun rai, grai nga yak mat nu ai raitim, ma yan naw nga ai ngu madu myit hpe madu awai la nna gatsa ba a nta de bai du wa nu ai. "Tsa ba, e ni ba nga ai kun?" "Kadai kun she ngu yang." Gani ba n ri la ai zawn nga ai manawng hte chyinghka sa hpaw la sai. "Nye ma yan gaw taw?" Lu Bu nhku shang wa ai hte ma yan hpe n mu nna san u ai. "Shannau hkrai ndai kaw n kam nga ai nga, nang hkawm mat wa ai hpang jang pru hkawm mat wa masai." Gani ba chyinghka la kau let tsun dan ai. "Ni ba nang masu ai, nye ma yan hpe ngai tsun da ai, ngai sha n wa yang gara de hkum sa ngu sai, Naw La nang n rai i?" Lu Bu kaning nga tim ma yan Naw La hte nhtan shai hkat byin ai lam rai na sai ngu myit la u ai. "Naw La nang gaw masha myit n rawng ai, kaba tim nye kasha AWng Lat daram pyi myit n su ai."

Lu Bu kasha yan hpe myit tsang ai majaw, gatsa ba yan a man pyi n yu hkra tsun dat sai. "He, Lu Bu nang nye nta wa nga nna, annu wa ni hpe nhtang de myit n pyaw ai ga ga i? Nang mung pru wa u, na kasha yan ndai kaw n nga sai." Naw La a kanu gwi lagut share nga wa sai. "Pru na, nanhte hpe ngai masha zawn nnawn ai, mun n tu ai gwi, lani mi nanhte mung nlawm npawt rai yak wa ai shani nye man hta hkum sa wa, dai shani ngai hpe gani gatsa a myiman pyi n yu ai kadai hkum nga!" "Lawan pru wa u!" Naw La a kanu Lu Bu hpe htu ganawng shapraw kau dat nu ai. Dai hpang, Lu Bu mung shi chye ai shara hkan sha gaw kasha yan a shiga hkan san tam hkawm yu u ai, tsan tsan de tam hkawm na matu ja gumhpraw hta bai dang rai, myit htum nna kanu yan kawa kaw bai nhtang du wa ai htawm, kanu yan kawa gaw shi hpe lauban Zau Dan hte hkungran mat shangun sai. "Zau Nan, ya kawn nang nu lu sai yaw." Lauban Zau Dan gaw sak shi jan ning re kasha hpe kabu gara mani sumsai hte tsun dan u ai. "N ra ai, nye nu si mat sai, shi nye nu n re ai." Zau Nan gaw Lu Bu hpe nju ai myisai hte yu nga ai. "Kanu e myit hta hkum matsing da yaw, Zau Nan kanu hte n nga ai shaning na mat sai majaw re." Zau Dan kasha a matu Lu Bu hpe hpyi nyem u ai. "N ra ai law, ngai mung kasha lu ai, ngai chye na ai." Lu Bu n-gup hta she shing ngu tim, kraw hta grai hkam sha mat nu ai. 7 Pan Pan hpe woi nga ai num dai la kasha Gam AWng ngu ai langai lu u ai, maigan de jawng lung ai wa na gade nna sai.

Pan Pan daini du yang mahkawn shingtung wa rai wa sai, shi hpe woi nga ai ka-ni hpaga ga ai num jan gaw Pan Pan hpe: "Pan Pan, nang hpe ngai mying kaga galai ya na yaw." Ngu tsun u ai. "N mai na re, ngai mying galai kau jang, nu yan kanau ngai hpe n mu tam wa ai." Pan Pan kanu yan kanau hpe dum ai dingyang rai nga ai. Raiyang, kanau AWng Lat gaw shi gana jan hpe naw matsing n matsing pyi n chye dam nga nu ai. "Awa, ngai tsang shi awng sai." AWng Lat gaw shi hpe hta rem mat wa ai Maran Brang Tawng hte Langjaw Kaw Nau yan hpe kanu kawa hku shaga mat sai. AWng Lat mung brang zet kasha langai rai nga sai, hkum shan dikdik rai n-gun grai ja na zawn rai nga ai. "Re i?" Kawa n myit madawm da ai majaw san u ai. "AWng Lat grai kabu ai, nu ngai sanpoi awng ai n kabu ai i?" Kanu gaw nau kabu nna myiprwi si she gahte hkrat wa nu ai. "Nu, hpa byin a?" AWng Lat ya she kanu a myiprwi si mu kajawng u ai. "Nu grai kabu ai." Ngu kasha hpe ahpum la nu ai. AWng Lat a matu kanu yan kawa kyu hpyi hpawng kaba galaw ya manu ai. "Aseng ngai grai kabu ai, ya na zawn sanpoi awng ai majaw, Aseng nang gaw taw?" AWng Lat sanpoi awng ai lam hpe shi jawngma manang Aseng hpe sa tsun dan u ai. "Ngai hkrat ai..." Aseng baw dagup tawn let htan ai. "Hpa da awh?" AWng Lat na kajawng nna myi kaba hpaw let gyigyi re kara kaw ta masawp da nhtawm galang bai san u ai. "Re, ngai hkrat ai, raitim ngai grai tsawra ai AWng Lat awng ai majaw grai kabu ai, AWng matut nna hpa galaw na rai?" Aseng sinda man hta abya nga ai kara masawp let tsun u ai. "Ngai gaw hpyendu jawng lung na, naw kaji yang ngai hpe shangai ai nye nu matsun da ai. Gatsi majan hta hkrum mat sai ni hte ya byin taw nga ai ni, grai n byin shi ai ni a matu ngwi pyaw hkra nga lu na matu gaw ngai woi awn na, nye lit re, ka-ni hpe ninghkap na matu nanghpam ngu ai n nga mat hkra woi awn na nye lata kaw re, ndai ka-ni a majaw anhte nta masha ni hka bra ma ai, si htum mat wa sai..."

AWng Lat myit n-gun grai rawt nga u ai. "AWng myit grai sam ai, grai kaja ai, AWng myit ai awngdang na matu Aseng akyu hpyi ya nga na, AWng Aseng hpe hkum malap kau yaw." Hpraw nsam mawmaw hkumgawng siksik re Aseng palawng matu abrut chyai let tsun nga ai. "Aseng, ngai gaw nang hpe sha tsawra ai." AWng Lat jawng naw lung nga ai ten hta raitim, Aseng hpe sha myisai yu htuk taw nga nu ai. "Ngai nang hpe la nga na yaw AWng, Aseng hpang de bai nhtang wa ai ten du hkra la nga na." Aeng mung AWng Lat hpe myit mada ai lam grai nga nga u ai. Jan du wa ai htawm, AWng Lat Aseng hpe nja nhpra hte nta du hkra hkan sa dat nu ai. Aseng nta shang wa yang, kawa ka-ni lu nna hkoi da ai gumhpraw wa hpyi ai masha ni nga nga la ai hta n-ga, kanu mung krap hte hkri nga nga la sai. "Aseng, nu a hkum hta gumhpraw lap mi mung n lu taw ai, na wa gaw nu hpe sat na nga taw ai law, hka ji ai ni shani shana sa taw nga ai, nu gara hku di na?" "Hpawtde n jaw jang gaw na kasha hpe anhte woi mat wa na." Gumhpraw hka ji sa ai la masum gumshem share nga ma ai. "Dai hku gaw hkum di, ngai lu kra tam jaw na, ngai hpe ten bat mi ahkang jaw marit yaw.." Aseng a kanu hpyi nyem nga ai. AWng Lat hpyendu jawng lung mat wa na jahpawt jaujau Aseng ni a nta de sa wa nu ai. "Aseng, Aseng»." "Kadai ta?" "Ngai re, AWng Lat, Aseng nga ai i?" "Hpa ngu na?" "Ngai shi hte hkrum shaga mayu ai." "N nga ai." "Ani, Aseng wa jang ndai laika hpe jaw ya rit yaw." AWng Lat gaw Aseng a kanu hpe laika jaw kau da nhtawm, nhtang mat wa sai. "Anu yan wa ngai hkawm sana re." AWng Lat hpyendap de sa wa hkyem nu ai. "Nye kasha grai shakut u yaw." "Mai sa." Maran Brang Tawng gaw kasha AWng Lat hpe baw kaw ta jum let: "Nye kasha AWng Lat daini kawn mungdan hpe woi awn ai ningbaw kaja, myu hpe pawn ba ai shadang sha byin tai wa nu ga law." Nga shaman dat ya sai.

"Awa shaman ya ai hte maren byin tai wa u ga." AWng Lat gaw kanu yan kawa hpe ahpum la nhtawm hkawm mat wa sai. AWng Lat hkawm mat wa ai shaloi, Aseng hpe n hkrum da lu ai majaw, myit hta rai mi dun ai zawn nga nga nu ai. Hpyendap du ai htawm, AWng Lat hte rau manang ni mung grai law hkra hpyen hpa-ji sharin nga nu ai. "AWng Lat nang hpe du wa hkrum mayu ai da." AWng Lat a hpyenma manang langai wa htawn shana dan nga ai. "Mai sa." AWng Lat du wa kaw lung wa nu ai. "Du wa, AWng Lat du sai." AWng Lat sinda shachyen da, lahkap apreng jan rai salam shana dat nu ai. "Um. Dai kaw dung yu, anhte gaw ka-ni hpe shamyit na matu re, nang gaw du jawng naw lung nga yang, anhte kaw n lu hkan na re, ndai lang anhte ka-ni ninghkap na matu ahkyak dik re, nang gaw myit lawm ai hte hpyendap kaw hpa-ji sharin let nga u..." Du wa shi myit da ai lam AWng Lat hpe tsun paran dan u ai. "Du wa, ngai ka-ni ninghkap ai de lawm na, ndai ka-ni hpe ngai grai nju ai, ngai mung shang lawm na." AWng Lat rawt tsap hkra hpyi shawn u ai. "Mai sa, dai hku nga yang daina zup hpawng na re." Du wa grai na hkra AWng Lat hpe mada yu nna htan nu ai. "Mai sa du wa." AWng Lat lahkap galang bai shapreng kau hkra du wa hpe salam kau da nhtawm, ta latup manat shaja kau hkra rai pru mat wa sai. Ndai ten hta Pan Pan mung shi hpe woi nga ai num jan kaw ka-ni hpaga galaw nang nga u ai. "Ka-ni hpe ngai lau ni ai, grai nju ai, daini ndai zawn kanu kanau hte hka ai mung ka-ni a majaw re, ngai pru mat sana."

Hkawntung rai sai Pan Pan ka-ni dut la lu ai gumhpraw hpe shi hpe woi nga ai num jan a man hta wa kabai tawn nna tsun u ai. "Hpa rai pru na, dai hku n mai ai, nye lam ni hpyen wa na yang, ngai prat tup htawng rawng ra na rai nga ai." "Ngai kadai hpe n tsun dan ai." "Ngai n kam ai." Pan Pan nhku shang wa yang, Gam AWng ka-ni htu taw nga ai. "Gam AWng ka-ni hkum htu, dai hpyen re." "Nang hpa wa tsun taw ai ta? Nye lam ngai hkawm ai." Gam AWng dung nhkyeng nga let tsun u ai. "Na nu mu jang pawt na ra ai." "Ah, nu ngai hpe pawt na, ha, grai mani mayu ai wa re, nu gaw dut, ngai kasha gaw lu, htu." Gam AWng du gangat let htan u ai. "Nang maigan de hpa-ji sharin la ai gaw ka-ni lu na matu re i?" "Ashawng Pan, nang hte hpa n seng ai, hkum ajawp, nang galaw ra ai bungli she galaw u." Gam AWng gana tsun ai ga hpe n ri nga u ai. "Ashawng Pan hpa rai dai ram mau nga a?" Gam AWng ka-ni hkru jang ga pyaw hte gana hpe shaga u ai. "AWh, hpa n re law." "Brang Dut ndai ngai galoi mung nanhte a man e tsun tsun re nye shawng Pan re." Gam AWng shi woi wa ai kara gaw ahkye rawng rawng re manang wa hpe gana e shachyan ya u ai. "Ngai na mying Brang Dut nga ai re, hkrum chye lu ai majaw grai kabu ai." Brang Dut Pan Pan hpang de ta shakram ladawn hkrat wa ai majaw, Pan Pan mung myit n lawm let hkap shakram dat nu ai.

Pan Pan mung shi du hkawm ai shara hte hkrum shaga ai masha ni hpe kanu yan kanau a shiga san sagawn hkawm yu tim, n mu tam sagawn hkraw nga nna, myit n mu ai lam grai law nga nu ai. "Aseng, hpawtni nu shinggan pru hkawm ra ai, nang nta kaw atsawm nga u yaw." Aseng a kanu gaw AWng Lat jaw da ai shakram kaika hpe kasha hpe n hkap shalai ya u ai. Hpang jahpawt Aseng kanu hkawm mat wa ai pyi n hkan mu kau dat nu ai. Hkrun lam kaw ka-ni hkap jep ai gik nga ai, Aseng a kanu hte rau dung ai num langai gaw shi a ka-ni joi mi hpe Aseng kanu a nhpye kaw lagu bang dat ya nu ai. "Mawdaw jawn ai ni yawng yu mu." Gik hkap ai hpyenla tsun ai. "Ndai kadai a nhpye re?" Hpyenma langai Aseng ya kanu a nhpye hta hpai tawn nna, lam makau hku tsap jawng nga ai hpaga yumga masha ni hpe san u ai. "Ngai na re." Aseng a kanu htan ai. "Yawng hkawm manu, nang gaw naw hkring u." Gik hkap ai hpyenla langai Aseng na kanu a nhpye kawn ka-ni shaw shapraw dan nu ai. "Ah, ngai n re... Ngai dai zawn myit n rawng ai, dai ka-ni hpe ngai nju taw nga yang hpa rai ngai dut sha na ta?" Aseng a kanu mau let ningdang nga ai. "Anhte gaw sakse sakgan, tara hte nang hpe rim da sai." Aseng kaw kanu hpe rim da ai laika pru wa nna: "Nu e. N mai byin ai, ngai gumhpraw n lu ai, gara hku nye nu hpe lu jahkrum na ta, ngai dai hku sha nga n mai sai, gumhpraw tam na, nye nu hpe lu hkra ngai shaw la na." Aseng gaw shi hkrai myit ru taw nga nu ai. "AWng Lat nang gaw grai she samat nga ai le."

AWng Lat hpyenla buhpun palawng hking sumraw da nna grai shingkang taw ai nga yang, shi hpyenma manang wa shakawn dat u ai. "Hkau wa nang hpa wa tsun ai kun she ngu yang." "AWng Lat hpawtde anhte ka-ni yi wa hkyen na re nga, ra ai lam galaw da saga." "AWng Lat, na nu yan wa du ai." AWng Lat a manang wa shana ai. "Nu..." Nga marawn let AWng Lat kanu yan kawa hpe ahpum la nna: "Hkamja ai i? Nu yan wa" Ngu hkap kabu tau la nu ai. "Nu yan hpe hpa hkum tsang, nang hpawtde hkawm na re hpe chye nna, tsi wa jaw ai re, nu sha hkamja lam sadi u yaw." "Mai sa nu." AWng Lat kanu yan kawa hpe shabyi galang bai apum ya nu ai. Kanu yan kawa nhtang mat wa ai hpang jahpawt jaujau AWng Lat manang ni hte Sammung maga de rawt mat wa manu ai. AWng Lat a shangai kanu Lu Bu mung kasha yannau hte hka ai shaning ramram na mat wa tim, ten shagu dum ai dingyang rai nga nu ai. Ja gumhpraw ndut ndang rai jai lu ai ten hta grau, kasha yan hpe dum magang rai nga ai. Nye kasha yan ya ten ganang rai nga ai kun? Gara hkan garen gari matsan hkrum hkawm nga ma ai kun? Ndai mungkan hta naw nga nga ma ai kun? N chye mat sai. Madu wa Zau Dan a kasha Zau Nan gaw Sammung mare de kawa n chye ai hku ka-ni yi galaw taw da ai hta n-ga, ka-ni hpaga kaba galaw nga u ai, shingrai, shata mi hta kawa hpe gumhpraw kaba shagun jaw jaw rai u ai. Ang shaa rai, Zau Nan gaw Lu Bu na gatsa ba a kasha Naw La hte ka-ni hpaga galaw nna, shi madu mung ka- ni kaba byin taw nga nu ai. Naw La a kanu yan kawa gaw magam bungli galaw maju n jung, kasha mung shan hte tsan gang hkawm rai, shan hkrai buga kaw matsan shayan rai nga nga ma ai. "Kanu e, an mung lama mi gaw gan galaw ra sai." Naw La a kawa wanmang kaw myit htum dung nga u ai. "Hpa galaw na matu mung n hkrup, ngai n chye galaw ai."

Galoi mung madu wa tam jaw ai sha man sai Naw La a kanu gaw latsawn hpreng rai dung dat let tsun u ai. "Ya an lahkawng hpa sha na ta?" "Na kasha Naw La kaw htet sha u." "Naw La a shiga mung n na nga ai." "Lu Bu mung grai she nga pyaw mat sai nga ai wa." Naw La a kanu gaw hkoi lu hkoi sha mai ai jinghku jingyu ni yawng hpe myit yu ai hpang, Lu Bu kaw myit du nu ai. "Apan nang bungli n lu ai n re i? Ngai hte rau nye wa kaw bungli galaw nang ga n mai i?" Brang Dut a kawa manam dap kaba langai hpaw da nga ai majaw, Pan Pan hpe saw nga u ai. "Mai ai le." Pan Pan mi kawn ka-ni galaw ai bungli n kam galaw taw nna myit ru nga yang, Brang Dut shing nga bai tsun rai jang, Pan Pan manam dap kaw manam hkap ai bungli galaw mat nu ai. AWng Lat hpyen hpung ni Sammung mare de du ai shaloi, mare masha ni yawng hprawng mat ma manu ai. "Salang wa e, anhte hpe hkap hkalum la ai majaw, chyeju dum dik sai." Hpang jahpawt AWng Lat hpyen hpung ni mare masha ni hpe shaga la nna, ga san galaw yang, mare masha ni kadai mung ka-ni hpe hkrai galaw na nga nna ningdang jawng nga ma ai. Dai hta lai nna, ka-ni pat hpyen hpung ni du ai hpe Zau Nan hpung ni na kau manu ai. "Tawk! Hpyenla ndai ni nye a kanbau bungli hpe jahten na hkyem nga ma ai, hpyenla langai hte sha naw hkrum yu u ga, shamyit kau na." Zau Nan da-kan taw nga ai. "Lauban wa, hpyen hpung ni mare masha ni a ka-ni hpe hkyen kau ma masai da, gade nna yang anhte ni kaw bai du wa na sha rai sai." Zau Nan kaw hkan ai shabrang langai wa shana tsun nga u ai. "Hpa hkum tsang, hpawtde na matu ka- ni atsawm galaw da u, gumra lawlaw hte htaw na re, hpyen hte n hkrum hkra sadi na." "Mai sa." Zau Nan hpung ni ka-ni hpaga kaba shalai hkyem nga ma ai. "AWng Lat, Aseng a kanu hpe anhte hpyen hpung nkau mi ka-ni lu rim la ai majaw htawng hkrat taw ai da.." AWng Lat a hpyenma manang wa tsun u ai. "Ngai hpyendap de hkawm mat wa ai shaloi, Aseng hte n hkrum da ai, shi a shiga mung n na lu ai." Nga, AWng Lat gaw gumra hta jawn nna Aseng a kanu hpe jahkrum mat wa sai. "Ni ba, hpa rai na htawng hkrat mat ai ta?" AWng Lat atsang arang nga Aseng a kanu hpe sa san shaga u ai.

"Ngai n chye ai, mara n nga ai masha hpe rim ai nanhte hpyenla ni hpe nju ai, nang hpe mung n kam yu ai, ya jang pru wa u, na myiman du hkra ngai n kam yu ai." Htawng gata na Aseng a kanu AWng Lat hpe mu ai hte hkap pawt gawt taw nga ai. AWng Lat hkang hpyi la rai, nta wa let Aseng hpe wa jahkrum na myit mada nhtawm, nta wa nu ai. "Aseng, Aseng*.." AWng Lat Aseng ni a nta ndaw kaw tsap let wa shaga dat nu ai. "Kadai ta sa marawn taw nga ai." "Aseng n nga ai i?" "N nga ai." "Gara de sa mat wa sai ta?" "Ndai nta hpe anhte mari la kau sai, dai shani kawn pru mat wa nu ai." AWng Lat grai myit n pyaw let nhtang mat wa nu ai. Aseng e, ya ten gara kaw wa ta? Nang tsun ai, AWng wa ten du hkra la na nga, ya gaw hpa shiga mung n na mat sai i? Ngai hpe grai nju mat sai i? Ngai a Seng hte galang mi dang naw hkrum mayu ai le. AWng Lat myit shawshi shap let ndum ai nta de hkawm du wa nu ai. "Nu sha, hpyendap na ni ya sha gyenan du ma ai, lawan nhtang wa nga htet nga ma ai." AWng Lat nhku shang wa ai hte kanu shiga gahtet bai hkap shana ai majaw, bai matut hkawm mat wa nu ai. AWng Lat hpyendap de du ai hte ka-ni hpaga shalai sha ai ni hpe shingla na matu rawt mat wa nu ai. "Anhte masha hpung garan na re." "Mai ai." "Nanhte hpung ni ndai bum lam hkan mu, anhte hka lam hkan na, anhte yawng hka zup ai shara kaw bai hkrum ga." AWng Lat hpung ni hka lam hkan lung wa yang, hyen ni hte hkrum gatut manu ai. "Hkum shamu! Nanhte yawng hpe shinggrup kau da sai." Ka-ni galai taw nga ai ten hta, AWng Lat marawn share nga yang, nkau mi prawng mayun mat wa sai. "Lauban wa, anhte hpung ni ka-ni sum mat sai, ka-ni pat hyen hpung kaba hte hkrum ai majaw, masha kau gaw rim hkrum, si hkrum ai ni gaw si hkrum rai mat sai." Zau Nan kaw hkan ai ma langai prawng lawt ai majaw, shiga wa tsun dan nga ai.

"Tawk! Nang mung si ra ai." Zau Nan nshang na sanat gadun shaw la nna ma dai hpe gap sat kau dat nu ai. Dai ten hta Zau Nan grai pawt nga nu ai. "Hyen du wa hpe ngai nan gap na, ngai myit n dik ai, nye gumhpraw sen gahtap sum sai hta n-ga, nye ma ni si ai gaw si, rim hkrum ai gaw rim hkrum." Zau Nan wa she wutik hkra n-gut nga u ai. Nanghpam pat jasan hpung ni lu la ai ka-ni hpe hpyendap de wa nat kau masai, masha marai manga hpe htawng hta bang kau rai manu ai. Matut nna ka-ni lagu galaw, shalai ai mare masha ni hpe rim, ndai lang ka-ni shamyit kau lu na matu, AWng Lat woi awn na lam hpe hpyen hpung ni yawng myit hkrum nga masai. "Anhte ndai lang gaw hpang jahtum rai na re, awngdang na wa ai shani anhte yawng padang poi galaw na re, hpawtde rawt na hkyem masu." "Mai sa, du wa." Hpyenma ni yawng magam bungli nnan bai lu ai majaw, bram rai hkawm ma masai. "AWng Lat, grai kabu ya ai, ndai lang grau awngdang lu u ga, Nu Nu kyu hpyi dat ya ai yaw, ndai tsi hpe galoi mung lu u, hkamja lam a matu re." Hkumgawng galu kaba batbat rai palawng ahpraw re hpun da ai tsi sara ma Nu Nu mani sumsai hte AWng Lat hpe tsi sa kumhpa let shaga nga u ai. "Nu Nu e, grai agam sai wa re." AWng Lat tsi sara ma Nu Nu jaw ai tsi hkap la let tsun u ai. "N ra ai gaw e." "Sara ma Nu Nu machyi masha du ai." "E, ya wa na." AWng Lat hte shaga tsap nga yang, Nu Nu a tsi sara ma manang sa shaga dat ai majaw, tin shapun rai bai bra wa masai. "Agu AWng, Nu Nu naw wa sai, ya hpang de bai sa chyai na." "Mai sa." Hkawm mat wa ai Nu Nu hpe AWng Lat hkan yu taw nga nu ai. Aseng gumhpraw tam hkawm ai nga tim, kanu hpe jaw na daram gaw n lu tam kraw rai, myit ru ai ten hta shi hkrai: AWng Lat nang gaw grai pyaw nga na re, AWng hpe grai dum ai, AWng wa na ten hpe la nga na ngu ai wa, dai aten gaw galoi wa she rai na ta? An n hkrum lu ai ndai ka-ni a majaw nan rai sai nga madu hkrai madu shaga rai u ai.

Aseng bungli matut hkawm mat wa yang, shat seng kaw bungli matut la hkrum nu ai, shi a lauban wa a madu jan gaw AIDS ana hte si mat wa sai nga, dai shat seng kaw mu galaw garum ai manang ni hkap tsun dan ai. "Aseng, nang kaw laika du ai, na nu grai machyi taw ai da." Shat seng na Aseng a manang jan shakram shalai ya let tsun ai. "Goi, ngai kaning di na, bungli galaw ai bat mi sha naw rai, ganang na gumhpraw hte nu hpe hkye la na.." Nga Aseng tsun ai ga hpe shi hte rau bungli galaw ai mahkawn kaba langai na kau nna: "E manang jan, nang hpa rai myit ru nga ai ta? Ngai nang hpe gumpraw grai lu ai lauban langai matut ya na, gara hku, myit yu u." Manang jan myi hte ja rai gahte san u ai. "Manang jan e, ngai n-gwi ai law." Aseng baw gayin let htan u ai. "Nang dai hku rai taw nga yang, na nu machyi si mat yang nang kaning rai na, myit yu u." "Aning. Ngai hpe madun dat rit." Laban bat mi a hpang, Aseng myit yu jin ai htawm, manang jan hpe htan u ai. "Daina hkying sanit kaw manam dap de hkrum ga." "Mai sa." Aseng myidi hte shim, nshung si hte rawng ngu htan kau dat nu ai Pan Pan manam dap kaw masha mying hkap ka la nga nu ai. "Na mying?" "Seng San." "Gawk mali kaw re, nang hpe lauban wa la taw ai grai na sai." Pan Pan manam dap nta htap ntsa de madun dat let tsun u ai. "Chye sai." Aseng a prat gaw dai ten kaw nna n tsawm mat sai. Aseng ta kaw gumhpraw lang let hkrap nga nu ai. "Nye prat ntsawm mat sai, gumhpraw a majaw nye prat hten sai, ngai grai tsawra ai AWng Lat hpe n-gwi yu ni ai, ya kawn shi hte grau tsan gang ai shara de she nga hkawm mat sana*."

Aseng hkrap ai nsen wa jahkrai ma ni shat kawsi taw ai zawn nga, hkan hkrap na zawn she nga yawn hkrap nga ai, myiprwi si mung panglai zawn lwi pru nga lu ai. Hpang shani Aseng kanu hpe sa jahkrum ai shaloi, hpa n byin ai zawn kanu hpe tsi ni jaw sha rai kanu a makau kaw dung nga yang, kanu gaw: "Aseng, AWng Lat hte nawng e hkrum lu ai kun?" Nga san u ai. "Nu, AWng Lat num grai myit su ai, kanu kawa ni grai myit hkrum ai sara ma hte hkungran na re da." Aseng ga dai tsun ai hte myiprwi si hkrat wa nna shinggan de pru mat wa nu ai. "Nye a kasha e, nu a mara re." Kanu gaw nsa kaba shaw let kasha hpe matsan dum nga nu ai. 9 "AWng Lat, hpa mau nga ta? Num mau yang gaw hka, la mau yang gaw ndan pala da yaw, lau hkyem u, anhte yawng rawt na sha rai sai." "AWh, mai sa." AWng Lat ra ai lam shajin la rai manang ni hte mawdaw kaw lung hkyem ai shaloi, lam makau hku lauban mawdaw lai wa ai kaw kanu hte bung ai num hpe mu hkrup kau dat nu ai. "AWng Lat, lawan lung wa rit, ten n nga sai." Hpyenla manang wa ta ladawn let AWng Lat hpe mawdaw ntsa de gang shalun la nu ai. AWng Lat hpung ni ka-ni galaw sha ai bumga de lung mat wa masai. Shagawng bumga mare dai hta Hpaumyang Kaw shi hkrai, masha ni hta grau law hkra ka-ni yi kaba galaw sha taw nga nu ai. "Mare masha ni, daina zuphpawng nga ai, htinggaw shagu ndu nmai re, yawng sa ra na." AWng Lat ni bumga du ai hte shawa masha ni hpe zuphpawng hpawng na hku ndau shabra shana hkawm nga ma ai. "Nu wa mare masha ni yawng hpe grai hkungga ai, anhte hpyen hpung ni gaw nu wa ni hpe chye na shangun mayu ai, ya anhte galaw sha taw ai ka-ni gaw masha sat ai bungli she re, anhte dai bungli hpe kabai tawn kau na, yi sun hkauna galaw sha ga! Daini ndai ka- ni a marang e, anhte Wunpawng myu shayi shadang ni hkrat sum mat ma sai, dai hta n-ga, ka-ni a majaw dinghku gata n pyaw ai, mare kaba hkan e nga ai ramma ni yawng hten za mat ma wa sai, dai majaw, ndai ka-ni hpe dawm kau ga, shaloi she anhte mungdan rawt jat wa na rai nga ai."

AWng Lat mungga hkaw tsun ngut ai hpang, dingla langai rawt tsap nna bai tsun bang wa nu ai. "Du ni e, ngai gaw ndai ka-ni n nga yang gaw, nye prat htum sai, kasha mung grai law ai, ka-ni hte sha bau taw nga ai, nye a ka-ni yi gaw hkum hkyen kau ya." "Jidwi hpa ntsang ra ai, anhte ni yu lajang na ga ai." Mare masha ni yawng n chye na mat ma masai. "Ka-ni yi n galaw yang, hpa sha na! Shanhte wa jaw sha na zawn nga hkra, n-gup gaw bawlaw, ta gaw lagyaw, galaw sha na re, hpa hkum hkrit mu." Num langai grang hkawm nga nu ai. Hpyen hpung nkau mi mare masha ni hpe hkai lu hkai sha, rem lu rem sha na hpa- ji lam matsun sharin ya hkawm, nkau gaw ka-ni yi de ka-ni wa hkyen nga ma ai. Zau Nan hte Naw La gaw hpyen hpung ni a hpang hkan lagu yu let makoi nga ma ai. "Naw La, htaw ra hpyen hpung du wa hpe gap u." "Mai sa." Gap dat ai ndan pala AWng Lat a gahpa kaw hkra mat nu ai. "Aka law..." AWng Lat hpyen manang ni yu nga ninglen malap mat wa sai. "Ndai ndan pala gaw marai mi e gap ai rai na re, anhte jawm tam yu ga, AWng Lat hpe mare kaba de woi wa ra ai." Nga hpyen hpung manang ni AWng Lat hpe mare kaba tsirung de wa sa kau da manu ai. AWng Lat tsirung rawng ai laman, sara ma Nu Nu sa kawan nga ai. "Agu AWng, hpa rai atsawm n maja a ta? Nu Nu grai tsang kau sai, ya loi mi n mai wa ai i?" Nu Nu grai tsang ai nsam hte AWng Lat a ku makau kaw sa dung let tsun u ai. "Nu Nu agu AWng hpe dai daram tsang yang, hpa n byin sai..." Shan lahkawng jahta nga ai ga hpe, AWng Lat tsirung rawng ai shiga na lu ai majaw, tsirung de tam san sa wa ai Aseng na kau dat ai nga yang, myit hta ngaw nga yawn ai Aseng nhtang pru mat wa ai shaloi, tsi pung kaw wa ahtu la nna galau mat wa nu ai.

Shinggan de kawkkak shara ai na dat nna, AWng Lat pru wa yang, tsirung ntawt kaw galau dung nga ai Aseng hpe sa mu dat nu ai. "Aseng, nang hpa rai tsirung de du taw ai rai?" AWng Lat gahpa kaw sumhpan hpraw hte naw ahkyen tawn ai pyi malap kau hkra Aseng hpe sa pawn sharawt bang wa nu ai. "Nang masha yu shut sai, ngai Aseng n re." Aseng ga kawn rawt wa let tsun u ai. "N mai byin ai, ngai hpe hkum masu, nang Aseng re ngai chye ai, aten shagu nye a salum hta rawng nga ai num sha re, hpa rai masu ai?" AWng Lat Aseng a ta lahpum kaw jum tawn nna tsun u ai. "Ngai hpe hkum jum." AWng Lat a ta hpe ahpre di kau da nna, Aseng kagat pru mat wa nu ai. Aeng tsirung shinggan kaw wa hkrap dung nga yang, AWng Lat mung bai hkan dep sai. "Aseng, hpa rai ngai hpe ndai zawn hku hkau ai ta? Ngai n chye na mat sai, tsun dan yu rit, nang n ra na lam ngai hpa galaw sa? Ngai hte sara ma Nu Nu gaw yu yu na manang she re, nang myit ai hku n re.." Nga tsun ai ga hpe, AWng Lat a hpang kaw hkan gat nang nga ai sara ma Nu Nu sa na kau nna, hkawm nga ai sat pyi kring gadawn mat nu ai. Shi myit kraw hta AWng Lat shi hpe myit shang sha taw ai shadu ai wa, man hta n rai ai lam byin taw nga ai majaw, yawn let nhtang mat wa nu ai. "Aseng ngai hpe chye na ya rit le." AWng Lat hpyi shawn taw nga nu ai. "Ngai nang hte sumtsaw byin ai grai shut ai, nang hpe ngai ya du hkra myit n shang sha yu ai, lai wa sai ten tsun shaga ai gaw nye a matu hpa n re, nang gaw ngai tsun ai ga grai she kam nga ai gaw." Aseng baw sha shadap kau rai ningdang nga nu ai. "Aseng nang hpa tsun taw nga ai, nang tsun ai ngai wa ai ten du hkra la taw nga na nga?" AWng Lat mau n ma nga sai.

"Dai gaw nang myit pyaw na matu sha re, daini kawn nang hte ngai hpa n rai sai, lam kaw mu tim n chye hkat ai zawn sha nga ga." Nga, tsun let Aseng hkawm mat wa sai. AWng Lat a salum wan zawn hkru nga sai, shi tsap ai shara kaw dung mat nu ai. Mara gata ai kaw ndai hku kau da hkrum ai gam maka a majaw, AWng Lat hkrap ai nsen gaw kanu dam mat ai ma kaji zawn nga nga ai. Aseng mung lam makau na hpunpawt kaw bai wa hkrap dung nga nu ai. AWng ngai nang hpe tsun ai ga gaw nang hpe tsawra ai majaw re, ngai hta prat dep kinse ana kap mat sai, dai majaw re* AWng anhkawng a lapran kaw ka- ni ngu ai nga ai a marang e, gade tsawra tim hka bra ra sai, Aseng hpe mara hkum raw ya yaw, an a lapran nanghpam tsin-yam langai a majaw rai sai, nye prat byin mai yang nang hte hpang na prat hta anhkawng rau nga lu u ga, ngai kyu hpyi nga na nga shi hkrai hkrap ashuk dung nga u ai. Dai hpang, AWng Lat hkum zeng pyi rai n mai lu yang, shagawng bum mare de bai lung mat wa nu ai. 10 Laning a hpang, Pan Pan mung shagawng bum mare de sara num galaw na matu lung na hkyem nga nu ai. "Apan, hpa myit lu ai ta? Nang tsang shi mung n du ai wa." Gam AWng a kanu san u ai. "Hpa ntsang ra ai, ngai chye ai made sharin ya na, gumhpraw gaw nye matu hpa n re, myu sha ni hpe pawn ba na gaw anhte ramma ni a lit re, ngai shangai pra sa wa ai ten gumhpraw hpai let n pra sa wa ai, matsan mayan re masha she re, ngai nye nu yan kanau hte dwi ni hpe mu hkra tam mayu ai, grau nna kanau AWng Lat hpe tam ra ai." Pan Pan rai lajang let tsun nga ai.

"Gam AWng gade rai wa sata?" Gam AWng a kanu Pan Pan hpe san ai. "Ngai mung atsawm n chye dat ai, atung, ka-ni hkum galaw sa, ya ten asuya ni ka-ni grai jep nga ai, dai bungli hpe dawm kau na gat seng kaba hpaw sha yang n mai na i?" Pan Pan shi hpe woi nga kaba ai Gam AWng a kanu hpe shadum u ai. "Dai lam hkum tsun, nye bungli ngai gara hku galaw na mung nye myit, nang pyi nang kam ai hku galaw sa wa mayu nga nna me, ndai lang grau gumhpraw kaba lu na re." Gam AWng a kanu prat tup ka-ni hpaga sha chye ga nga u ai. Pan Pan shagawng bumga de lung mat wa nu ai. Pan Pan mare masha ni hpe hkungga lara let atsawm tsawm rai shaga ganawn mazup, ma kaji ni hpe laika sharin rai nga nga yang, Hpakan de na lung wa ai lauban jan Lu Bu gaw buhpun palawng manu grai grai htat ai bu hpun kau, ja hkachyi gali da, lungseng lahkawn hkawn kau rai shi hpang hkan ai masha sumpum mi hte bumga de mare masha ni hpe lu sha htuk ya na matu lung wa u ai. "Grai chyeju kaba sai." Pan Pan mung lu sha sa htuk la u ai. "Num sha na mying kaning nga ai kun?" Lu Bu Pan Pan hpe mu ai hte grai shachyan mayu ai myit rawng nga ai. "Pan Pan, hpung shang ten rai sai." Manang ni bai sa shatin dat ai majaw, Pan Pan lauban jan hpe pyi galoi n shaga kau da nu ai. Lu Bu mung mare masha ni hpe lu sha gam jaw kau da nna, myit hta nwoi nwoi ngu let nhtang mat wa sai. Pan Pan a myit hta lauban jan hpe mu ai hte kanu zawn hkam sha nga nu ai. "Eh, Lu Bu nta nga ai kun?" Lu Ba ni a nampan sun chyinghka lam kaba shinggan kaw buhpun palawng abut aye rai hpun tawn, dawhkrawng hkrawng da re num hte la sa shaga tsap taw nga ai. "Kadai ta?" Lu Bu a nta na shangun ma san ai. "Ngai Lu Bu a gatsa re." "Nan ya gaw ngai hpe dum sai i? Grai she na kabu ai." Lu Bu chyinghka kaba kaw tsap taw nga let gatsa ba hpe tsun jaw u ai. "Lu Bu tsa ba hpe matsan naw dum la rit." Lu Bu a gatsa dawhkrawng kaw noi let hpyi nyen nga u ai. "Ngai jinghku n lu ai masha she re." Lu Bu gatsa yan gani hpe mu ai hte masin brawng nga ai hta n-ga, yawn ai myit rawng nna: "Ya she ngai nga ai dum, nye kasha yan ya ten ganang rai nga ai kun, hpa rai nga ai kun, ngai grai yawn ai, n ju ai." Nga tsun let chyinghka la kau dat nu ai.

"AWng Lat anhte hpyen hpung ni ka-ni hpe atsai lu shamyit kau jang, nang mung du langai rai sai, anhte hpawtde ka-ni tsai hkra shamyit kau lu na matu, daina mare masha ni hpe hkan lakawn hkawm ga.." AWng Lat a ningtau manang wa tsun ai. AWng Lat hpung ni shana de gumgai dingla ni hpe bungli hkan galaw garum hkawm nga sai, hpun chye ya, hka ja ya, ndaw wang sanseng galaw ya rai nga ma ai. "AWng Lat, sara ma ni mung sa wa nga ai." Pan Pan n myit madawm ai ten hta AWng Lat ngu ai shaga mying na dat ai majaw, AWng Lat hpe wa jum tawn nna: "Nang AWng Lat n re i?" Ngu galaw san dat nu ai. "Re le sara ma, ngai hpa byin ai rai?" AWng Lat myiman gayin wa let htan u ai. "Nang teng sha ngai a kanau rai nga ai, nye kanau, nang nye kanau re, ngai Pan Pan le, dam mat ai sagu hpe bai mu la sai..." Pan Pan kanau AWng Lat hpe ahpum tawn nhtawm hkrap taw nga ai. "Nang, ngai tam taw nga ai nye shawng Pan Pan i?" AWng Lat maumau nga let, Pan Pan hpe hkum kawn na lagaw du hkra yu san shateng nga nu ai. "Um..." Pan Pan myiprwi si gatsut kau let du hte ngat rai htan u ai. Shaloi jang AWng Lat mung gana hpe ahpum dat nu ai. Hkannau mu hkrum ai majaw grai kabu gumlawt nga masai. "Nye kanau ya hpa galaw taw ai rai?" Pan Pan kanau a gahpa kaw manat tawn nhtawm, galu kaba shingkang nga ai kanau hpe yaw let san u ai.

"Ngai ka-ni shamyit shatsai hpung kaw mu htam ai, ngai gaw grai nga pyaw ai, ngai hpe bau la ai nu yan wa mung ngai hpe grai tsawra ma ai, ngai mung nu hte shawng hpe tam ai ramram na sai, shawng nang nu a shiga n na yu ai kun? Nu kaning rai nga hkawm nga ai kun? Grai myit dum ai hte marit ai**• Ashawng ngai mu naw ra ai, nang ndai kaw nga ai chye sai, hpang de bai hkrum shaga ga i?" AWng Lat gana hpe shakram kau da nhtawm, hpyendap de gahkyin mat wa sai. AWng Lat hpyen hpung ni ka-ni yi hpe atsai sha lu hkyen kau nna awngdang sai raitim, ka-ni hpaga galaw sha nga ai ni hpe rim na matu yawng bai hkyem taw nga masai. "Nanhte hpung ni hkra maga de, nkau mi ndai pai maga de rawt na." AWng Lat ni ka- ni hpaga galaw ai masha rim na matu rawt mat wa masai. "He, hkum shamu! Nanhte hpe shinggrup kau da sai, kadai wa shamu yang kadai wa hpe gap kau na." Gumra daw hte ka-ni galai taw nga ai Zau Nan hpung ni hpe yawng lu rim la kau sai. AWng Lat ni a hpung langai ka-ni galai nga ai Pan Pan hpe woi nga kaba wa ai Gam AWng a kanu hpe rim kau ai hta lai nna, mare hkan e ka-ni dut sha ai ni hte lu ai ni yawng hpe rim kau manu ai. "Pan Pan, Gam AWng hte shi a kanu hpe AWng Lat hpung ni mare kaba de rim mat wa masai da." Pan Pan a sara ma manang ni wa tsun dan ai, kanu majing n re ai raitim, shi hpe woi nga kaba wa yu sai majaw, Pan Pan mare kaba hpyendap de hkan mat wa sai. "Zau Nan lam hkawm shut nna rim hkrum ai da, gara hku rai ai kun, ma hpe naw hkan yu na tai nga ai." Lu Bu a madu wa Zau Dan nsa kaba shaw let tsun sharung nga ai majaw, Lu Bu mung mare kaba hyendap de madu wa hte sa wa nu ai.

"Du wa, nye kasha Zau Nan gara htawng kaw ta? Chyeju hte naw jahkrum shangun rit." Lu Bu mu htam nga ai AWng Lat hpe sa san hkrup nu ai. Ang shaa rai Hpaumyang Kaw mung ka-ni dut ai marang e htawng de rim sa wa ai hpe Lu Bu hkap mu dat sai. "Amoi..." Lu Bu grai kajawng ai nsen hte shaga dat u ai. "Ya gara de wa ta?" Hpaumyang Kaw Lu Bu hpe mu dat ai hte du tarung mat nu ai. "AWng Lat, hpa kyin taw a?" Pan Pan mung ma lama rai hpyendap de Gam AWng hkannu hpe sa yu kawan na matu du hkrat wa ra ai, rung du ndawt tsan tsan kaw aja wa hte kanau hpe shaga dat sai. "Shawng Pan." AWng Lat gana hpang de gat hkrat wa nhtawn, Pan Pan a ta kaw sa dun la u ai. AWng Lat hte Pan Pan a shaga mying na dat ai hte Lu Bu sai she tsaw wa ai zawn nga, gamoi hte shaga nga ai ga dawm kau nhtawm: "Nan hpa tsun taw a? Du wa e, ngai gaw nye kasha Pan Pan hte AWng Lat dam mat nna, tam ai shaning grai na sai." Lu Bu gaw ndum ndam rai AWng Lat a ta kaw sa jum let: "Nang AWng Lat i?" Nga san shati yu taw nga sai. "Re. Ngai mung nye nu hpe tam taw ai grai na sai." AWng Lat htan ai. "Adwi le, adwi, ngai adwi hpe matsing ai." Pan Pan gaw hpyenla langai a makau kaw tsap nga ai Hpaumyang Kaw hpe mada taw let jahtau dat u ai. Lu Bu hpum kaba mat ai majaw, Pan Pan kanu hpe atsawm n lu yu shapraw nga u ai. "Ha, he, ndai hku rai yang gaw nu, nu..." AWng Lat kabu dau yin taw nga sai. "Nannau i?" Hpaumyang Kaw ma yan hpe yu let san u ai. "Re, adwi." Shannu ni grai kabu let ahpum hkat nga masai. "Annu ni ndai zawn byin ai gaw nu nannau hpe tawn da nna Hpakan de sa mat wa ai majaw re." Lu Bu gaw mahkawn shabrang rai mat sai kasha yan hpe grai tawngban nga u ai.

"Ngainam e, ngai she re, nannu ni hpe hprawng kau da ai... Nye mara e..." Hpaumyang Kaw grai myit shut dum nga nu ai. "Nu Yan dwi hta mara n nga ai, yawng gaw ka-ni a majaw re, daini Karai a chyeju lu ai nga yang, anhte bai hkrum lu sai, htawm hpang de kawn ndi nhka rau nga lu sai." AWng Lat yawng hpe myit shapyaw ya nu ai. Hpang jahpawt AWng Lat hte rau manang ni hpe shakawn shagrau poi hte ka-ni hpe ninghkap ai hkaw tsun hpawng galaw na matu, yawng hkra hte shara kaw dung nga yang, du kaba ni mungga shaga ai hte AWng Lat hpe kumhpa shagrau ya manu ai. "AWng Lat shawa masha ni hpe mungga shaga ya rit." Zuphpawng ju jum ai wa htet shana dat sai. "Mai sa." AWng Lat ngoi rai rawt tsap dat let, shawa dawtsa hpang de galang mi salam dat nna: "Daini du sa ai nu wa ni yawng hte shawng Karai Kasang a chyeju hpe shakawn ai, ngai ndai zawn masha kaba byin ai gaw ka-ni hpe gasat na matu re, ndai ka-ni a majaw annu annau ni yawng dumbru dumbra rai hka mat ma ai, ngai ndai nanghpam hpe nye prat hta n ra dik htum re, dai hta n-ga ngai tsawra ai nye a sumtsaw hte mung hka ra ai, raitim daini ngai myit pyaw sai.

Ya kawn ndai ka-ni hpe matut gasat na..." Nga tsun jang, kanu yan gana mung hkrap, manang ni mung hkrap rai nga sai. "Nye kasha AWng Lat grai byin ai." AWng Lat ga shaga kau da nna yu wa ai hte kanu yan kawa hkap hkalum ahpum la nga ai. "Ha, nu yan wa." AWng Lat mung kanu yan kawa hpe galaw ahpum dat nu ai. "Nye kasha grai ram sai, wa yan nu grai kabu ai." AWng Lat a kawa kasha hpe masawp nna shagrau taw nga sai. "AWh, nu, ndai gaw nye nu yan wa re." AWng Lat kanu Lu Bu hpe kawa Maran Brang Tawng yan kanu Langjaw Kaw Nau hpe shachyan ya u ai. "Grai chyeju kaba sai." Lu Bu nchye tsun hkra kabu let AWng Lat hpe bau kaba ya ai kanu yan kawa hpe shakram nga nu ai. "AWng Lat grai kabu sai yaw..." Sara ma Nu Nu mung shagrau poi hta du sa u ai. "Sara ma hpe AWng Lat grai tsawra ai, nye a matu sara ma hpe myit dik sai." AWng Lat gaw sara ma Nu Nu pe dun rai kanu ni hpang de sa wa sai.