MANU DAN AI TSAW MYIT

MANU DAN AI TSAW MYIT

Gareng Gun Awng

Myitkyina mare gaba gaang na lu sha seng langai a yu-ngwi punra hta, mahkawn hkawn hkyem nga ai asak 25 ning daram re shabrang langai mi, Ja Seng Ing a myit kraw hta Um, shi hpe yu yang, myit n shang sha tim shang sha na zawn, tsawra shingwang dam lada la na zawn zawn, sumtsaw mung grai she n law nga dawng. Ngu yu sumru taw nga u ai. Num sha ni a myit masin salum shagu hta ju machyi na daram, kalang ta dandan dawngdawng rai matsing shangun hkra yu htuk nga ai, hkumgawng shingyan galu gaba, myikaw mun htat htat sin sin rai nna, shan mawmai rai, bu hkra kadun ahpraw bu tawn, palawng kasha kadun ahpraw re a ntsa hta achyang re lawngta galu hpun da nhtawm, grai hkam sha ai nsam ni hte tingse dum let mahkawn hkawn shapyaw nga lu ai. "Nye a prat hta nang hpe hkrai sha tsawra nga ai wa, hpa majaw nang nye a yupmang gabye kau da, na a prat hta ngai hpe n ra sai i? Kau tawn da na nang gwi gwi rai sai i?..." Myu Lat a yu- ngwi hka leng hta pyau let, pripla pripla re wanpu nsam ni a npu e, mahkawn madat dung hkam sha nga ai Ja Seng Ing hpe Tsin Tsin machyang ndum hte ahtu gahtawk dat nu ai. "Num nang yaw, gara hku ta? Myi she n grip hkra zim nga ai le, myit shang sha mat sai i?" "Um, myit shang sha na zawn gaw san nga ai, hihi..." Ja Seng Ing mani sum rai, baw gum let galu la ai shi a na makau e abya nga ai kara hpe masawp jahkrat dat let tsun u ai. "Ja Seng Ing nang myit sham sha na zawn nga ai gaw masha hpe i? mahkawn hpe madaw i?" "Um, lahkawng, masha hpe da, mahkawn hpe da." Ja Seng Ing lu nga ai namsi ntsin gawm hpe saboi kaw shadun kau let, kaji seng seng re ta layung lahkawng sharawt madun dat sai. "

Sharai mai jang, ngai hpe naw sharai ya rit." Myu Lat shi mahkawn hpe hpungdim dat kau ai hpang, shawa masha ni a ta lahpawk nsen gaw, lu sha seng ting garu gachyi nga mat wa salu ai. Myu Lat mahkawn hkawn ngut nna manang ni dung chyai nga ai shara de sa wa ai hpe Ja Seng Ing hkan yu nga nu ai. "Seng, nau hkum hpyau yaw, sari loi mi sha gaw naw lang yu u!" Tsin Tsin manang jan hpe shadum let shi mung praw di hkan yu dat salu ai, Myu Lat sa dung ai shara gaw Ja Seng Ing ni dung ai makau kaw re majaw, Myu Lat a shaga nsen hpe asan sha na nga malu ai. "Ngai hpe sha tsun nna, madu mung, hum! Kam pyi n kam tsun ai." Tsin Tsin gaw Myu Lat sa dung ai shara hta dung lawm nga ai Ring Awng hpe azi yu nga yang, Ja Seng Ing e gahtan kaw ta yungdawn hte gahtawk ya let tsun u ai. "Seng, wawra la hpe ngai chye ai..." Tsin Tsin ga pyi rai n htum yang, Ring Awng shanhte hpang de sa wa ra ai. "Nang, Ja Tsin Tsin n re i?" "Re le, nang, Ring Awng n re i?" Tsin Tsin rawt tsap dat let san u ai. "Re le, aga, an n mu hkat ai manga kru ning she rai mat hkra wa i, gara hkan matsut hkawm nga ai rai?" Ring Awng makau na lahkum garawt la nna dung bang wa nu ai. Tsin Tsin gaw Ring Awng a ga san n htai ai, shi a manang ni hpe shawng shachyan ya bang wa sai.

"Ndai nye manang ni re, shachyan ya na yaw, shi shaga mying gaw Htoi San nga ma ai, Maran kasha re, Seng yan, shi mying gaw Ring Awng da, Labang kasha re, daw ang ai hku shaga la hkat ga." Ring Awng rawt tsap let Tsin Tsin a manang yan hpe shakram la dat sai. "Nye mying Ring Awng nga ma ai, Labang kasha re, hku hkau ai ni gaw Aring ngu shaga ma ai." "Labang ni gaw gahkri gatsa ang na re, asak mung maren dang sha naw rai na re, Aring ngu na le." Ja Seng Ing mung akaw alaw mani sumsai hte Ring Awng hpe shachyan shakram nga sai. "Ngai hte gaw anhkau ni ngu ga le i, nye mying Htoi San nga ma ai, Maran kasha re, hkau AWng ngu na e, ganau num sha chyawm n nga ai, hkau Ring chyawm mi lu kun?" Shan chyang chyang rai hkumgawng gaba buk buk, kara magyi magyi re, shi nsam hte mying gachyi mi pyi n bung ai Htoi San gaw mani hte breng nga let Ring Awng hpe hkap shaga shachyan la nu ai. Shachyan shaga ngut ai hte, Tsin Tsin lama mi hpe myit hprang ai nsam hte Ring Awng hpe san dat sai. "Mi yat sha mahkawn hkawn ai wa gaw Aring a manang i? " "Re le, chyahkring mi yaw." Ngu tsun let shi manang ni nga ai de nhtang wa mat ai htawm, manang ni hpe woi rai bai sa wa ai majaw, Ja Seng Ing ni mung yawng rawt tsap nna, Ring Awng a manang ni hpe hkap tau la nga ma ai.

"Ya yawng hpe nye manang ni e bai shachyan ya na yaw, shawng nnan ngai hkri Ja Seng Ing a man ding ding kaw dung nga ai wa a mying gaw Myu Lat nga ma ai, Gareng kasha re, Myu Lat na man ang kaw dung ai mung Ja Seng Ing nga ma ai, Maru tangbau kasha re, bai nna, hkau Lat a makau na nye manang wa gaw Zau Naw, Lahpai kasha re, Zau yan Lat shi mying gaw Htoi San da, Maran kasha re, shi gaw kaji prat na manang Ja Tsin Tsin, Lahtaw kasha re, daw ang ai hku shaga la ga." Ring Awng shachyan ya ngut ai hte Myu Lat rawt tsap hkra rai, Ja Seng Ing hpe shakram dat nu ai. "Maru tangbau nga yang, angu ni ang na re, nye nu mung Maru tangbau kasha re." "Rai yang gaw agu Myu Lat ngu na le, asak gaw Seng agu hta lahkawng masum ning dang kaji na re." Ja Seng Ing mung rawt tsap let tsun u ai. "Daina Htoi San a shangai nhtoi hta anhte masum sha rai sai ngu grai lagawn ai, ya gaw manaw manang bai jat sai majaw, grai pyaw na sai. Htoi San ngwipyaw ai shangai nhtoi rai u ga yaw." Ja Seng Ing gaw Htoi San hpe namsi ntsin hte hkungga shaman ya let kungga jaw dat nu ai. Htoi San gaw lu hpa sha hpa bai htet jat la hkra rai, shi a shangai nhtoi hta manaw manang nnan ni hte pyaw chyai nga masai. Pripla pripla re wanpu gala ai gata kaw n myit mada ai sha hkrum chye hkat la ai Ja Seng Ing hpe yu azi nga ai Myu Lat gaw: "Kalang sha mu ai raitim, prat ting malap kau da n lu na zawn, shingni pring tsup ai shayi sha rai nga ai..." Ndai ga si ni gaw Myu Lat a n-gup kawn pru ai ga si n rai, sung htum ai myit kraw salum gata kawn prut pru wa ai ga si she rai nga lu ai.

Raitim, Ja Seng Ing hte manang ni na chye lu na n rai nga ma ai. Myu Lat myigrip pyi n grip hkra Ja Seng Ing hpe azi yu let zim nga yang, Zau Naw gadai n mu ai hku ahtawk dat nu ai. "Myu Lat, wa na nga ai i? Ja Seng Ing san nga ai le." "AWh! Seng nang hpa tsun wa sata? Nau garu nna atsawm n na kau dat ai." Nga gaya gaya re myiman nsam hte bai san dat u ai. Myu Lat masu kau dat sanu ai, hpa majaw nga yang Ja Seng Ing tsun ai ga asan pra pra na ai raitim, gaya hkrum nga sai re majaw, masu kau ra sanu ai, Ja Seng Ing mung Myu Lat gaya mat ai re hpe chye kau dat ai hte, magap ya ai nsam hte mani sum rai kaga lam bai tsun masu kau dat nu ai. "Agu Myu Lat hkawn ai mahkawn hte nsen grai pyaw ai ngu ai gaw e." "Chyeju kaba sa." "Agu Myu Lat hpa majaw dai mahkawn hpe lata mahkawn ai rai?" "Dai, dai wa i, nang hkau Zau Naw lata ya ai le, dai mahkawn hkawn u nga nna gaw e." Myu Lat htai yak nga ai. "Masu nga ai shi, mahkawn dai shi she lata mahkawn nna gaw." Zau Naw gaya hpya dat nu ai. "Ndai mahkawn, Seng hte Tsin Tsin an mung grai ra ai mahkawn she re gaw, agu Myu Lat hkam sha ai lam gaw she n nga na i?" "E, hpa ngu na hkam sha ai lam gaw n nga ai law." "Ndai lusha seng ting na yu- ngwi shadang ni hta na gaw nye hkau na nsen nyam dik ai re." Zau Naw shagrau shaa ga tsun dat nu ai. "Ndai kaw mahkawn hkawn ai aten grai na sai i?" Tsin Tsin sha nga ai sabyi si hpe sha shakre kau nna san u ai. "Hka, laning mi jan lahkawng ning dang gaw rai sai." "AWh, loi gaw na sai i."

Ja Seng Ing lata hte madi tawn ai nhka hpe lahkawng masum lang gum ganga let tsun u ai. "Re, Seng." "Gai gai, ga shaga pyaw taw nna, aten pyi grai lai wa sai, anhte yawng Htoi San a daidaw nhtoi hpe hkalum ai hte hpawn, shi hpe kalang bai hkungga jaw dat ga." Tsin Tsin ahkying yu let namsi ntsin gawm hpai tawn rai rawt tsap dat nna yawng hpe ginlawn dat nu ai. "Hkamja wunli lu u ga." "Aga, rai nga ai, hkying shi lahkawng pyi lau rai sai, bra saga, bai hkrum." Ring Awng mung shi lata na ahkying hpe yu let tsun nga ai. "Hkan sa na le?" "Rai sai Aring, Seng mawdaw gawt ai, Htoi San hpe shawng wa sa nna ngai mung Seng kaw she hkan yup sana, hpang hkan bai hkrum chyai ga." Ngu tsun kau da let, lu sha seng kawn pru mat wa manu ai. Ring Awng, Myu Lat, Zau Naw shanhte masum tingse sha hpai rai, shanhte shap da ai nta de du wa masai. "Aring, nang hte dai Lahtaw kasha nga ai Tsin Tsin hte gara kaw na gara hku chye hkat ai ma, nang hte gara hku seng ai rai?" Yupku hta galeng nga ai Zau Naw gaw Ring Awng hpe san u ai. "Gara hku ngu tsun na, shi hte ngai gaw moi rau htingbu sha re.

Jawng lung sa tim rau, shi hte n hkrum ai gaw an tsang shi sanpoi htai ngut ai hpang kawn n hkrum hkat mat sai, an gara hku seng a ta? Nga yang, ngai maga hku nna Tsin Tsin hpe sumtsaw mahtai sha naw hpyi nga ai shaloi, shanhte kaga gahtawng de htawt mat ai, dai kawn n hkrum mat ai, ya daina she bai hkrum ai ga rai nga ai." "Tsin Tsin a ntsa ya mung naw tsawra nga ai i?" "She tsawra le, nye tsawra myit gaw n hten, n mat, n tsu ai, galoi mung grin nga ai, tsawra myit ni hte naw tsawra ai." Ring Awng hte Zau Naw jahta nga tim, loi mi sha pyi n shaga nang ai Myu Lat hpe Ring Awng e "Hkau Myu, yup sai i? Loi mi sha gaw jahta yu u le." Ngu shaga dat nu ai. "Yup saga, hpawtde jau rawt ra ai, jahpawt gaw sha n jasu yang, jau jau n chye rawt ai yan she, yup manu ngai grai yup mayu sai." Ngu tsun let Myu Lat shagum up rai, nba htinggrum hprwi di yupsu sun nga nu ai. Ring Awng hte Zau Naw zim ai hpang she baw shakra la nna, mani sum rai shi a myit shingran hta pru wa ai Ja Seng Ing a galu seng seng re hkumgawng shingyan ni, dangbau lai hkra galu ai kara ni hpe dandan lengleng kalang bai mu nga nu ai hta n-ga, lu sha seng na lahkum hta dung let shaga ai nsen ni, mani dat ai shaloi ara rai maji kra ai wundan awa ni, galu yang rai loi mi masen ai ladi, grai mung n pa grai mung n masen re myiman hpraw nsam ni hte nhka kaw achyang rai kaji law in tu ai prat ni, hkum kaw kap kap sha rai hpun da ai palawng hkye ni, htoihtoi hkyehkye rai maka gayau ai Jinghpaw labu bu da ai ni, kam ai made tsawmhtap nga ai shayi sha Ja Seng Ing hpe gaw nsin gata e Myu Lat a myiman hta dan pra taw nga sai. "AWh Seng e, nye masin salum hpe dingbai dingna jaw kau da sai i?" Ngu shi hkrai shana ting sumhtang shingran ran nna n mai yup ai sha galeng taw nga nu ai. Laban bat mi lai mat wa sai.

Myu Lat Mali hka kau e dung let Mali hka mahkrai lawm ai Mali hka nu a tsawm ningja hpe sumla soi nga ai hpe Ja Seng Ing hte manang nkau mi Mali hka kau de sa pyaw chyai let sumla sa dem ai shaloi, ang shaa rai sa mu hkrup masai. "AWh, gadai wa re kun ngu yang, agu Myu Lat she rai nga a hka, agu Myu gaw mahku pyaw ai daram sumla soi mung grai ram nga ai le." "Ah, Seng..." Sumla soi nga yang, makau e sa tsap shaga nga ai masha nsen na dat nna, Myu Lat gayin yu dat yang Ja Seng Ing tsap nga la sai. "Re, Seng ndai hpaji gaw moi agu Myu naw kaji ai kawn agu Myu a wa sharin ya ai re, sanit matsat ning hkan nna soi chye ni ai." "Rai yang, Seng a hkrang bung sumla hpe agu Myu rau ai ten hta mung soi ya rit le, mai na i?" Ja Seng Ing sumla yu let tsun u ai. "She mai le, hpawtni hkan agu Myu nga ai nta de sa wa rit le." "Gaja wa i? Agu Myu?" Ja Seng Ing gabu gara nga ai nsam hte san nga u ai. "Gaja wa le." "Rai yang, agu Myu hpe ma Seng sumla gayet ya na yaw." "Mai gaw e." Sumla gayat ngut nna, Myu Lat shi nga ai nta hkringdat tsun dan nu ai. "Chye ai n rai?" "Chye ai le, dai lam hku Seng ni hkring nhkring lai ang ai, htaw manang ni shaga nga masai, naw wa sai yaw." Ngu tsun let Ja Seng Ing manang ni hpang de gat mat wa ai hpe Myu Lat nja nhpra rai hkan yu let bai anyam taw nga sanu ai.

"AWh, Seng e, gara hku mi buhpun tawn da tim, tsawm dik la nga ndai. Dai shani Ja Seng Ing lawngta kadun achyang hte bu hkra hpraw galu bu hpun sumraw da nna, baw na kara hpe mung la-pai maga mi, la-hkra maga mi rai gyit tawn da ai, hpa n chye ai ma kasha zawn tsawm kam ai made mi tsawm nga ai Ja Seng Ing a shingni hpe hkan yu let anyam tsap nga yang, sumla gayat hkawm nna wa ai Ring Awng hte Zau Naw gaw: "Hpa yu tsap nga ai ta? N-gup gaw lemlem rai nna wa mi." Ngu wa hpu dat sai. "Hpa n re law, nan yan jin sai i?" Myu Lat gaya gaya san ai nsam hte manang wa yan hpe galaw san dat nu ai. "An gaw jin sai, nang gaw jin sai i?" "Ngai mung jin sai, wa saga." Nga sumla soi ai rai ni hpe tin shapun rai hta zing kyin nga nu ai. Shana maga de, Ja Seng Ing shi shani gayat wa ai Myu Lat a sumla hpe yu let, sinda ntsa e mara tawn rai: "Agu Myu nang, hpa rai Seng a salum chyinghka hpe sa akawk nga ai rai, ya hkring Seng a salum gata de garawt bang la kau na lu, hihi." Nga shi hkrai mani sum rai taw nga u ai. Myu Lat a datbung hpe bunghkum gata de bang da rai yup mat wa ai Ja Seng Ing gaw shana ting yupmang hkrai bai mu nga sanu ai. Ja Seng Ing hpe ta ladawn let shaga nga ai, mani sum rai Myu Lat a lata kaw hkrau rai hkap hkindun la nhtawm, samwi ni a ntsa hkan pyen pyau chyai nga manu ai.

Dai yang Ja Seng Ing a n-gup kawn pru ai yu-ngwi gaw "Yupmang gata na shadang sha..." Ngu ai mahkawn sha hkawn rai grai pyaw chyai nga ma ai. "Seng, nu sha rawt sanu, hkying gade rai sai rai, yu yu u." Ja Seng Ing a ganu chyinghka akawk let sa jasu kau dat sai. "Rawt sai, nu." Yupmang hta grai pyaw chyai nga ai Ja Seng Ing hpe ganu e sa jasu gajawng dat ai majaw, nshung si hte hprwi ngu gajawng rawt let, Myu Lat a datbung hpe galaw makoi kau sanu ai. Hka shin, man myit, manap shat sha la rai, Myu Lat hpang de sa na hkyem nga yang, "Seng, ya gara de bai hkawm hkyem ai, yahte shinggan nau pru nga ndai lu, num sha re ai hpe gaw naw dum nga ndai kun? Nu a makau naw wa dung yu." Ngu ganu e shaga dat sai. Hkikhkam la ai htingnu dawdap na dung punghkum gaba hta, shi laika hti let shinggan de pru hkawm hkyem ai kasha Ja Seng Ing hpe shaga la nu ai. "Nu sha e, num sha ngu ai gaw shinggan de lachyum n pru ai nau hkum lam hkawm, sari sadang hte nga chye ra ai, nu sha mung madang dep hpaji chye chyalu she re gaw, nu ma hpe nau n kam tsun ai, nu sha ningrum ningtau mu yang mung nu hpe shawng tsun ra ai re lu." "Um law, nu e, nu sha gaw ma she naw re ai wa mi, raitim mu jang gaw nu hpe shawng tsun dan na le yaw, annu krai she re wa mi, nu ngai hkawm sai yaw." Ja Seng Ing nten hpe pawng di shapawng la nna, du hpe loi shanyem kau rai tsun u ai.

"Jau jau bai wa re lu." Ja Seng Ing a ganu myijat ntsa hku nna kasha hpe hkan yu dat let shadum nga ai. "Mai sa nu." Pru wa ai chyinghka lam kawn ganu hpe nhtang yu let htan u ai. Ja Seng Ing mawdaw gata e shang dung let Tsin Tsin hpe gyenan matut dat u ai. "Tsin Tsin, ya nang nta kaw i? Seng kaw i? E, e, ya ngai sa woi la na yaw, nang kaw du jang she tsun dan sana." Ngu shana ngut ai hte gyenan dip jahkrat kau nhtawm, Tsin Tsin a hpun palawng kun rai dut ai seng gaba de sa mat wa sanu ai. Ja Seng Ing mawdaw kawn pru wa let, set taw nga ai achyang re myiset hpe baw ntsa de htu shalun kau rai, manang jan hpang de sa wa nga u ai. "Tsin Tsin, i rau ai rai?" "Rau ai le, nang she shawng tsun yu, gara de woi sa hkyem ai rai?" Tsin Tsin seng kawn pru wa let san nga ai. "Tsin Tsin, mani ngai manang ni hte Mali hka de sumla sa gayet chyai ai shaloi, Myu Lat hpe bai hkrum ai le, shi daini ngai hpe nye hkrang bung sumla soi ya na nga tsun dat ai, manang hkan tai ya rit yaw." "Nang shi nta chye ai ngu taw?" "Mani shi tsun dan nna chye ai." Ja Seng Ing baw gum let tsun nga ai. "Rai yang gaw sa ga le, Ring Awng ni mung she nnga na i." Mawdaw hte Myu Lat ni nga ai de sa wa ai lam hta Ja Seng Ing gaw Tsin Tsin hpe myijut hku yu let, "Tsin Tsin nang hte Ring Awng manang hku sha i? Shing nrai manaw manang hta jan ai i?" Ngu san dat sai.

"Hka, gara hku na nang hpe tsun dan ai baw kun, shi chyawm ngai hpe sumtsaw ga tsun da ai le i, ngai hku nna mung mahtai jaw na hku gaw hkyem da ai raitim, shi hpe ngai mahtai n lu jaw kau dat ai." Tsin Tsin gaya gaya rai, ta latsang ni hpe manai gayup let tsun u ai. "Hpa majaw wa mi?" "Ngai hpe sha san taw na gaw, nang hku na Myu Lat a ntsa gara hku mu ai rai?" "Gara hku mu na rai, shi gaw mahku nsen pyaw ai, sumla soi ram ai, tsawm ai, ga shaga si mani ai." " Seng e, dai gaw dai le, nang maga hku nna shi hpe myit shang sha, n shang sha hpe she san ai wa mi." "Shi maga hku nna wanpu tsit ai hte ngai mung tsit chyalu sha re." Ja Seng Ing mawdaw hpe gaungwi sha jahkring kau dat nhtawm, Tsin Tsin hpe yu mada nna, mani sum rai tsun dat ai. "Nan yan gam maka rum mu ga yaw, raitim, nang a nu yan wa ni chye mat yang chyawm n chye tsun hpa re." Tsin Tsin mung Myu Lat hte Ja Seng Ing yan a lam hpe myit hkrum lawm ya ai majaw, tengman nga ai masa ni hpe mung maram let tsun dan nga ai. "Um, nye wa hte shawng gaw maigan de she re mi, nu gaw hpa nga na n re." Tsin Tsin gaw prat madang n bung ai Myu Lat hte Ja Seng Ing yan hpe myit tsang ya nga salu ai. Ja Seng Ing gaw hkawhkam wang zawn hkikhkam ai lusu dinghku gata na kasha rai, hpa tsun n ra hkra prat madang dep nga ai, rai yang, Myu Lat ya shi galaw nga ai bungli hte nga sa madang ni nyem taw nga ai majaw, shan a prat madang lapran na sumprat ni gaw hpa baw rai wa na hpe sawn la n lu nga lu ai. Shaga chyai let ndum ai Myu Lat ni nga ai shara de du sa wa masai. "Tit Tit..." Nhku de nna kagat pru wa ai gaw Ring Awng rai nga ai. "Aring nanhte arau sha nga ma ai i?" "Re, anhte masum arau sha jawm nga ai." Ja Seng Ing dawdap e du ai hte grupgrup yinyin mada yu nga salu ai. Myu Lat soi tawn ai sumla ni hte shingjawng poi hta kumhpa lu ai sumla ni hpe shakum kan grai noi da nga ai. "Punghkum chyawm n nga ai, nang jahtai de dung chyai dat ga."

Ring Awng grai gaya ai zawn nga nsen hte le yu waw yu rai nga ai Ja Seng Ing hpe shaga dat u ai. "Hkau Lat yan Zau Naw shinggan de gan sa ai, loi hkring wa na ra ai, chye ai hku naw dung chai ga." "Pru mat wa ai grai na sai i?" "Na gaw na sai, gat de gan sa ai nga re wa mi..." Wang chyinghka hpaw nsen na nna, Ring Awng gaw "Wa sam sai." Ngu tsun dat nu ai. Myu Lat lata hta sumla soi ai baw hking rai mari hpai wa ra ai, Zau Naw gaw nbaw shat hte nga chyu, simaw simai ni ndang nla abut aye rai hkra mari lang nna shang wa mara ai. "Agu Myu Lat ni hpe bungli jat jaw ya ai hte bung mat sai" Ja Seng Ing hkap shaga dat sai. "N ra ai gaw e, anhte pyi naw grai agam nga ai." Myu Lat gahtan na salat gatsut kau let htan u ai. "Hpa rai Seng yan hpe agam ai wa?" Tsin Tsin nau n chye madat nna Myu Lat hpe yu let bai san dat nu ai. "Mu ai hte maren sha le, dung lahkum pyi n nga ai." Myu Lat shi a sumla soi hking rai hpe dun kaw tawn da let tsun nga ai. "Agu Myu e, masha ngu ai gaw lu ai hte n lu ai hpa n seng ai gaw e, ahkyak ai gaw myit masin sha ahkyak ai." "Re, Ja Seng Ing tsun ai teng ai." Zau Naw gaw gat na mari wa ai nbaw shat hpe n-gun mi alu rai, n-gup pyi apawng rai hkra sha let tsun u ai. "Agu Myu hpa n sha shi ai n rai?" Ja Seng Ing nhku kaw hkawm gayin let san u ai. "Sha ngut sai, gat kaw shat sha lang sai." Myu Lat masu dat sanu ai.

Gaja wa nga yang, shanhte masum a gumhpraw pawng nna sumla soi arung arai, namlaw namlap simai gachyi mi mari ngam ai hte nbaw shat makai mi hte nga chyu kawk mi mari wa nhtawm, wa jawm sha na ngu la wa ai re. Rai yang, Zau Naw hpe yu yang ngam da lu na zawn n rai mat sanu ai. "N kam sha ai, nbaw shat sha yang grai lau ai, ya hkring kam kam nga jang she bai sha na re." Ring Awng tsun masu let, Zau Naw ladawn ai nbaw shat matep ngam hpe shat gawk de sa tawn da kau sanu ai. Gaja wa nga yang Ring Awng dai nbaw shat matep mi hkum tsun, matep manga dang sha nga tim lu sha ai hta n-ga, kam mung kam sha nga ai, raitim, manang wa Myu Lat hpe mung myit ya ra ai majaw, nja nhpra hte nbaw shat matep hpe yu la nna tawn kau nu ai. "Daihpawt agu Myu Lat sumla soi ya na nga ai hpe sha myit nna, sha hpa lu hpa n la hkrat wa kau ai, Tsin Tsin hte Ring Awng nan lama ma naw sa mari wa marit le." Ja Seng Ing e shinggan de shangun dat sai. "Tsin Tsin, nang hkrai sa su yaw, shing nrai Zau Naw hpe bai saw woi u, ngai mana ka da ai mahkawn naw ka shangut kau ra nga ai." Sumbu kaw gumhpraw n rawng dum nga ai Ring Awng gaw ningdang wa nu ai. "E, e, ngai ya sha gat kawn wa ai majaw, grai ba nga ai." Zau Naw mung tsun let shat gawk de gat shang mat wa sai. "Sa sa, ngai hkrai n kam ai, manang sha pyi hkan tai ya rit."

Tsin Tsin lata hte sa gang la ai majaw, Ring Awng kaning gaw nchyi di, gumhpraw hte seng nna lap mi mung n-gun da rai, salat hte li rai, myit gaw kyi kyi ngu hkan nang nga salu ai. Tsin Tsin hte Ring Awng pru mat wa ai hpang, Myu Lat gaw Ja Seng Ing hpe hkrang sumla soi ya na myit nga ai. "Seng, ya jang sumla soi saga i?" "Mai ai le, gara hku dung ya ra na rai?" "Dai hku rai tim rai sai, ahkyak ai gaw myiman nsam hpe sha soi la nna, kaga shingdu nsam hpe gaw jahtuk soi bang la ga." Myu Lat nta kaw lahkum n nga ai majaw, Ja Seng Ing hpe chyahtai ntsa kaw dung nga shangun nu ai. Ja Seng Ing a pyilan singkaw hte bung ai myikaw, ladi, kara ni hpe shawng soi jahkrat nna nsam jahtuk nga yang, sha hpa sa mari wa ai Tsin Tsin hte Ring Awng du wa mara ai. "Agu Myu, sha hpa naw sha chyai let hkring la ga i?" Ja Seng Ing rawt tsap dat nu ai. "Aga, grai bung nga ai le, Seng nang yu yu u." Ja Seng Ing a hkrang bung sumla hpe wa yu mau tsap nga ai Tsin Tsin gaw Ja Seng Ing hpe sumla madi madun nga nu ai. "He, grai bung nga ai, n chye ai ni mu yang, sumla gayat da ai zawn she nawn na rai nga ai." Ring Awng mung praw rai yu dat let tsun shagrau dat sai. Zau Naw gaw Tsin Tsin mari wa ai lu hpa sha hpa hpe shat gawk de hkap la shang wa nhtawm, bagan ni hta sha hpa garan bang rai, dawdap na chyahtai kaw wa hpai tawn rai jawm sha nga masai. Lu hpa sha hpa jawm sha la nna sumla matut soi shakre la rai, Tsin Tsin hte Ja Seng Ing gaw bai nhtang wa mat masai. "Seng, an shara mi kaw naw jahta chyai ga." "Mai ai le." Ja Seng Ing mawdaw hpe Mali hka kau de gawt mat wa sanu ai. "Seng nang ndai marai masum hpe gara hku yu shapraw lu ai rai?" Ja Seng Ing gaw manang jan Tsin Tsin a ga san hpe n chye na nga ai.

"Nang gaw gara hku mu ai rai?" Ngu Tsin Tsin hpe mahtang bai san dat nu ai. "Ngai hku nna gaw Aring, agu Myu Lat, Zau Naw ni gaw ramma raitim, tinang lagaw tinang tsap let shakut shaja ai hpe mu mada ai." Tsin Tsin tsawmra na hkra myit la nna, Mali hka hpe yu let tsun u ai. "Re i, Tsin Tsin, nye wa ngai naw kaji yang tsun ai ga hpe ya du hkra malap n lu ai, "Ma e, shinggyim masha nkau mi shat sha ai gaw, shat sha na matu sha, asak hkrung na matu sha re, nkau mi gaw shat sha na matu sha asak hkrung ai, ndai ga lachyum gaw bung ai zawn mi nga tim, hkam la ai lam n bung ai, shat sha na matu asak hkrung ai wa gaw shat sha na matu sha bawnu hta rawng nna, shat mumu maimai sha nga lu na matu, gumhpraw law law tam ai, gumhpraw lu jang hpa pyi mai byin ai ngu ai masha hpan, bai nna asak hkrung na matu shat sha ai ni chyawm gaw shanhte a prat hpe akyu rawng ai hte nga pra mayu ai majaw, asak hkrung nga lu na matu hkumhkrang a matu ra ai n-gun jahpring ya lu na matu masha a matu n re, shi myit yaw shada ai myit makam ni a majaw, shat sha nga ai wa hpe gaw, hkungga ging ai da." "Re i Seng, atsawm myit yu ga nga yang, na wa tsun ai grai jaw ai, mi yet ngai shanhte a shat gawk de shang sa yu sai, hpa nga yang hpa nan n nga ai, mai byin ai hte byin mai ai hku nga let shakut nga ma ai." "Tsin Tsin, ngai shanhte a matu lama mi gaw galaw mayu ai law." "Seng nang gara hku myit da ai rai?" "Shanhte a matu akyu rawng ai baw lama mi le..." "Nang tsun ai hpe ngai mung hkap la ai, raitim, shanhte hkap la na gaw grau ahkyak ai." Nga nna Ja Seng Ing hte Tsin Tsin Mali hka kau e dung jahta nga ma ai. Laban shani nawku jawng sa na hkyem nga ai Myu Lat, Zau Naw, Ring Awng ni nta kawn pru wa ai hte, achyang re mawdaw shanhte a makau hta sa hkring ai majaw, mau nga yang, Myu Lat "Seng." Nga shaga dat sai.

"Agu Myu, nawku jawng sa hkyem ai i? Seng yan mung sa na ngu ai le, arau sa ga le." Jinghpaw rida maka labu hte palawng lawng hpraw hpun tawn ai Ja Seng Ing gaw mawdaw gata kawn shaga dat sai. "Rai sai law, anhte gaw bat shagu lam hkawm nna hkrai sa man sai, rai sanu ga Tsin Tsin nan sa magang manu yaw." Myu Lat myit ai kaga n rai, Ja Seng Ing hte Tsin Tsin a sari jahpoi ahtu hkra na hpe tsang ai majaw, ningdang ai rai nga ai. "Tsin Tsin, an ma lam hkawm ga i?" Ja Seng Ing gaw hpang de gayin yu nna Tsin Tsin hpe san nga ai. "Mai ai le, hkamja lam pyi she lu ai." Ja Seng Ing hte Tsin Tsin yan nawku jawng lam de hkawm sa mat wa nga ai hpe Myu Lat kaning ndi sai majaw, azim sha hkan nang mat wa sanu ai. Nawku jawng yu ai hte lam bai jawm hkawm wa masai. "Tsin Tsin, lama ma naw sa lu sha let jahta chyai ga i? Agu Myu ni ma naw hkan ra ai re lu, n hkan sai kawn na gaw manaw manang ngu pyi hkum sawn la sa." Ja Seng Ing yawng hpe gayin mada let tsun u ai. Myu Lat kaning n chye ngu mat sai majaw, hkan nang mat wa na sha chye sai. "Manang ni e, ngai hpe hpa hkum sawn la, bungli hte seng ai lam langai mi naw nga ai, ngai shawng wa magang na ni ai." Ngu tsun kau da let Zau Naw shi hkrai nta de wa mat sanu ai. Shanhte marai mali gaw lu sha seng gata kaw dung chyai let Myu Lat a lam jahta dat, Ring Awng a lam jahta dat, Tsin Tsin hte Ja Seng Ing a lam jahta dat rai, grai pyaw ai hte jahta dung nga ma ai.

Shana maga de, Ja Seng Ing a ganu dawdap kaw dung taw nga sai. "Nu sha e, nu hpawt de Yanggung de lahkawng masum ya dang naw sa na, ganu num ni a sharin hpawng nga ai da, nang nta atsawm sin u re lu, mare nau hkum hkawm, ya hkring rai mi re ai la ni hte hkrup mat yang, nu gawng run mat na ra ai, Tsin Tsin mung she nga ai reng mi." "E law, rai sai, rai sai." Ja Seng Ing ganu a n-gup sa pat kau ya let, ganu hpe shanyeng bang wa nu ai. Hpang jahpawt, Ja Seng Ing gaw ganu hpe bungli gut de sa sa kau da rai, wa let Tsin Tsin a seng de gayin bang wa sanu ai. "Tsin Tsin, daina yu-ngwi punra lamang nga ai da, nang na sai i?" "N na ai le, nang sa yu na ngu? Na nu sa yu shangun ai i?" "Nye nu Yanggung de sa mat sai, ya sha naw ngai shi hpe bungli gut de sa sa da nna nhtang wa ai re, Gawdin pa kaw re, htaw hkyem nga masai." Ja Seng Ing gawng tsang ai nsam hte tsun u ai. "Htaw ra hpung ni hpe n saw woi sai i?" Tsin Tsin loi mi myit la ai zawn rai tsun ai. "Ganang mai na, shanhte n lawm yang hkum mai u ga le, n re i?" Ja Seng Ing mani sum rai manang jan hpe galaw san dat nu ai. "Agu Myu, Aring, ataw gadai mung n nga nga ai le, nang zaw du hkra la da nga ai." Dai yang Zau Naw shinggan de nna du wa ra ai. "AWh, Seng yan Tsin Tsin kaning ngu du sa ai rai?" "Agu Myu hte Ring Awng gaw taw?" "Daihpawt kawn pru mat wa ai, gadai mung n du wa shi nga ai, ngai hpe mung hpa n tsun da ai le." "Anhte yu-ngwi punra de sa ga le." Ja Seng Ing myiman loi mi jahten kau let saw dat nu ai. "Mai ai le, ngai pyi sa mayu ai manang n lu nna n sa sana ngu pyi myit kau sai wa, sa ga sa ga." Zau Naw mung hkrawnhkra nga htan sai. "Ya hkring, sa tau la na yaw." Shana hkying kru daram hta Zau Naw hpe sa woi la rai, shanhte masum yu-ngwi lamang de sa wa manu ai. "Tsin Tsin, agu Myu yan hpe tam yu u yaw, ndai yan anhte hpe hpa pyi n tsun da hkra wa mi."

Ja Seng Ing hte Tsin Tsin makau mayan hkan na gat seng hkan myila hte tam yu tim n mu nga ma ai. yu-ngwi punra de mung ka ai ni ka, mahkawn ai ni mahkawn rai nga sai, Ja Seng Ing myit n lawm ai wam hkawm ai ten hta, ndau wa ga shaga sai. "Ndai lang shangwi shapyaw na yu-ngwi shadang gaw shi myit ra ai mahkawn hte shangwi shapyaw mat wa na re, ta hpawk hte hkap tau la ga." Nga lamang ndau wa ndau ngut ai hte, mahkawn punra na wanpu yawng nyip rai mat wa sai. Wanpu langai sha bai chyi wa ai de Tsin Tsin hte Ja Seng Ing yu azi nga yang, yu-ngwi nsen hte rau, dung punghkum hta dung let, . "Nang hte hku hkau ai ten ni kaw na, nye salum gata hta e, nang hpe chyu sha ngai tsawra dik mat sai yaw, nang hte n mu ai ten ni hta, ngai garen gari let hkam sha, prat ahkying mung hkun hkraw let si mat raitim, ngai nang chye hkra sumtsaw ga ni hpe hpa rai na, ngai n tsun gwi..." Nga mahkawn pru wa ra ai. "Seng! Agu Myu Lat hte Ring Awng le." "Ndai yan gaw nang kaw she rai nga a hka." Ja Seng Ing gabu gara sumsai hte tsun u ai. Myu Lat mahkawn hkawn ngut ai hte yu-ngwi punra nna Tsin Tsin, Ja Seng Ing, Zau Naw ni tsap nga ai shara de yu wa nu ai. "Aring nan gaw hpa mung n tsun da nna wa mi." Tsin Tsin gaw Ring Awng hpe mara shagun ai zawn nga nna grai myit dik nga lu ai. "Agu Myu grai pyaw ai yaw." Ja Seng Ing gaw Myu Lat ni mahkawn sa hkawn ai lam chye ai hte grai hkan gabu lawm nga sai.

Dai ten hta lamu marang loi htu wa ra ai. "Gai gai, marang gapya wa ai hte re gaw, seng langai ngai de jahta chyai ga, ndai lang agu Myu ni daw na yaw." Myu Lat shawng tsun shadan hkam la dat nu ai. "N ra ai gaw e, Seng an daw na le." Tsin Tsin shanhte a mayak mahkak hpe chye nna tau hkrau let myit la ya nga ai. "Tsin Tsin, nang hpa chye ai, daini sha hkrang pan sumla dut sha nna nye hkau Myu grai daw mayu sam ai, kalang numrang sha gaw daw jaw yu sai ngu ai mung she nga mayu le i." Tingse hpai let tsap nga ai Ring Awng gaw Myu Lat gumhpraw lu ai lam hpe yawng a man hta tsun shadan dan ya nga ai. Ja Seng Ing gaw zim sha rai shanhte tsun shaga nga ai hpe madat nga ai. "Seng daina gaw shawoi na hta grau tsawm nga ai le, dai sumwum pu nsam palawng hte gaja htuk nga ai." "Agu Myu gaw nau hkum shakawn nga yu, Seng n chye nga wa sai." Dai shana Ja Seng Ing sumwum pu nsam lawngta kadun kaw ahpraw re bu hkra bu hpun tawn nga ai. Myu Lat ni lu hpa sha hpa daw sha nga ai ten hta, marang grau nna htu gaba wa nga sai. "Marang grai htu gaba wa nga ai le, kaning di na re, mawdaw mung loi tsan ai kaw she tawn kau da sai, loi mi naw la yu ga." Tsin Tsin shinggan de asha nga htu ai marang hpe yu nna tsun u ai. "Marang loi mi hpawng sai, lawan wa saga, maw maw nye ntsa palawng gan hpun da u, Seng a palawng grai hpa nga ai."

Ja Seng Ing hpa n tsun chyai nga ai sha, Myu Lat a ntsa palawng la hpun nna mawdaw nga ai de gat mat wa manu ai. Jahpawt manap Myu Lat gat sa nga yang, shingdu maga de nna Tsin Tsin shaga dat sai. "Agu Myu Lat, gat sa ai i?" "AWh, Tsin Tsin nang ma gat sa ai i? Seng gaw n lawm ai kun?" "N lawm ai, mana marang loi mi pup sha nna, hkum grai gahtet nga ai, dai majaw tsi sa la let u hpa sa mari la nga nngai." "Hkum grai n pyaw nga ai i? Grai tsang ra ai i? Hkum gaw lajang da ya sai i?" Myu Lat grai myit tsang ai hte san nga ai. "Agu Myu Lat, ga san grai law nga ndai le, dai ram tsang yang, shi nta de hkan wa yu ga le." "Tsin Tsin e, hkan gaw she hkan mayu law, shi nu nga ai n re i?" Myu Lat myit grai kaji ai hte tsun nga ai. "N nga ai law, mani hpat Yanggung de sa mat wa sai, nta kaw Seng hte an sha re, kam yang hkan wa rit le, Seng mung agu Myu Lat hpe mu jang she n mai wa na i." Ngu Tsin Tsin e shala dat nu ai. "Tsin Tsin gaw Seng a man hta naw hkum shala shut re lu." Myu Lat gaya gaya re myiman hte tsun u ai. "Hpa ra ai wa, shabrang hte mahkawn gadai pawt na lam n nga ai, nan hpe yu yang lama mi gaw lama mi re law, ngai chye yu ai yaw." Myu Lat hpa n chye tsun mat ai sha zim nga ra mat sanu ai, gaja wa nga yang, Myu Lat mung Ja Seng Ing a ntsa sung htum ai salum gata na tsawra myit ni hte tsawra nga ai, raitim, prat madang a majaw, Myu Lat a tsawra myit ni hpe ip da nga lu ai. Ja Seng Ing ni a nta du ai hte, Myu Lat gaw dawdap na dung lahkum gaba hta nba gaba hpun nna yup nga ai Ja Seng Ing a makau e sa dung let, lata sa la yu nga lu ai. "Tsin Tsin, Seng hkum grai gahtet nga ai le, sara wun n shaga ai i?" "Gaja wa, agu Myu Lat ngai sara wun naw sa shaga la na yaw, Seng hpe naw yu da ya rit." "E, e, lawan sa shaga wa rit." Tsin Tsin pru mat wa ai hkring mi nga ai hte, Ja Seng Ing gaw "Um, um, hum." Nga madai taw nga sai.

"Seng, Seng." "Agu Myu, agu Myu.." Ja Seng Ing ndum ndam rai jawp nga lu ai. "Oi, Seng, agu Myu nga nga ai le." Myu Lat a htan nsen hpe Ja Seng Ing na ai zawn pyi n rai ngu lu ai. Raitim Ja Seng Ing dingyang jawp nga ai. "Tsaw... Tsawra dik ai, agu Myu hpe tsawra dik ai..." Myu Lat myi she tu hkra mau mat salu ai, hpa tsun na pyi n chye hkra mau mat sanu ai. "Seng hpe tsin-yam hkum jaw da yaw, Seng, Seng mana mat na ra ai." "Seng e, Seng hpe agu Myu a prat wa lamu hte aga zawn grai shai hkat nga ai le." Myu Lat gaw Ja Seng Ing a gahtan masawp let, shi hkrai kraw ga shaga nga u ai. Tsin Tsin sara ma langai hte bai shang wa ai majaw, tsun nga ai ga hpe n matut tsun mat nu ai. Tsi sara ma du ai hte sai n-gun, gahtet shadang ni shadawn ya rai u ai. "Shi sai n-gun yawm ai hta n-ga, hkum naw gahtet nna gan malap nga ai, hpa n tsang ra ai, tsi kalang htu da ya na, sha tsi hpe gaw aten tup hkrak jaw sha mu, hpunlum law law lu shangun rai mu. Machyi masha hpe shi yup gawk de woi wa kau, dawdap kaw nbung gatsi lawt ai." Tsin Tsin tsi sara ma a tsi sadek hta hpai ya rai hkan sa dat nu ai. "Agu Myu Lat, Seng hpe shi a yup gawk de naw wa sa ya rit, ngai sara ma hpe naw hkan sa dat na." "Atsin, lau bai wa u yaw, nang n nga yang, an lahkawng hkrai rai jang n htuk ai." Myu Lat gaw tsi sadek hpai nna pru mat wa nga ai Tsin Tsin hpe hkan tsun u ai. Tsin Tsin yan sara ma mawdaw hte pru mat wa ai htawm, Myu Lat gaw grai n wam ai myit hte Ja Seng Ing hpe pawn la rai, shi a yupgawk de pawn bang wa nu ai.

Rai yang, Myu Lat n-gup she mahka myi she tu hkra shang mau mat salu ai. Chyinghka shingdu hta Ja Seng Ing gayat da ai Myu Lat a sumla hpe gaba law nna gashin shakap tawn ai hta lai nna, yup gawk ting she hpring hkra gaja gaba ba re sumla ni shakap da nga ai, Myu Lat a hkrang pan sumla ni mung grai mari bum tawn nga u ai hpe shang mu ai Myu Lat gaw mau nma hkra shang mau tsap nga nu ai. "Ndai laman sumla grai dut gaja nga ai ngu yang, Ja Seng Ing hkrai mari ai she rai nga a hka!" Ngu myit let, Ja Seng Ing hpe yupku de abwi sha pawn galeng tawn rai, makau e dung nga ai shaloi, Tsin Tsin bai nhtang du shang wa ra ai. "Agu Myu Lat!" Tsin Tsin mung Ja Seng Ing a yupgawk de galoi n shang yu nga ai majaw, Myu Lat a sumla hpring ai lam n chye da ai, shing rai, shi mung shang mau nga nu ai. Dai ten hta Ja Seng Ing a gyenan nsen ngoi pru wa nna, Tsin Tsin hta hpaw madat dat ya nu ai. "AWh, nu ba, Tsin Tsin re, Seng i? Hkum nau n hkam ai nga nna yup taw nga ai, e, e, ya i? Nu ba, mai ai." Gyenan shaga ngut ai hte yup ku de yu dat yang, Myu Lat n nga taw salu ai. Tsin Tsin a kraw hta: "Seng e, dai ram du hkra agu Myu Lat hpe tsawra nga ai hka i! Daini gaw na tsawra myit ni hpe agu Mayu Lat chye la na nu ai yaw Seng." Ngu myit let nbungli dabang de Ja Seng Ing a ganu hpe sa tau la na matu rai mat wa salu ai. "Tsin Tsin, nan zeng gaw rai nga mani? Mare hkrai wam ai n rai, yahte Ma Seng hpe yu yang, sumtsaw she nhten lu sam ai, Tsin Tsin nang n chye ya ai i?" "Sumtsaw lu ai nga ai gaw n chye ya ai le, nu ba." Ja Seng Ing a ganu nbungli dabang na wa ai shaloi, mawdaw gata e Tsin Tsin hpe san nga lu ai. Bat mi lai mat wa sai.

"Tsin Tsin nang agu Myu ni hpe n mu ai i?" "N mu ai le Seng, nang asan zeng mai sai i? Mai jang rai sai, daina she hkrum ga, ngai nang kaw sa wa na, nang hpe san mayu ai lam nga ai, e, daina de hkrum ga." Tsin Tsin gat dut sha kyin u ai majaw, Ja Seng Ing hpe atsawm galoi shaga na ten n lu nga ai. Shana maga de Tsin Tsin manang jan Ja Seng Ing kaw sa wa nu ai. "Tsin Tsin shang wa rit." "Tsin Tsin nang ngai hpe san na nga hpa wa ta?" "Nta kaw n kam san ai law, nang shinggan de mai pru wa ai kun?" "Mai ai le." Tsin Tsin hte Ja Seng Ing lu sha seng langai hta sa dung chyai nga masai. "Seng nang teng sha htai u yaw, n mai masu ai re lu." Ja Seng Ing mani sum rai, namsi ntsin lu let, "Tsin Tsin hpa san na, la wa grai ahkyak ai wa zawn nga nna mi." Ngu tsun u ai. Tsin Tsin myijut gabai let, "Seng nang agu Myu Lat hpe gade daram du hkra tsawra ai rai?" Ngu san dat nu ai. "Hpa wa kun she ngu yang wa mi, gaya gahpa nga nna wa mi." "Seng ngai yawng chye da sai." "Ngai machyi taw ai shaloi, yupgawk de shang yu ai n rai?" Tsin Tsin baw gum let agatsi sha dung nga lu ai, Ja Seng Ing mung shan dung nga ai makau na hkalap shinggan de lachyum n nga ai yu nga nu ai. "Tsin Tsin, anhte num sha ni ngu ai gaw tsun mayu shagu tsun na ahkang n lu, tsaw nga ai raitim..." Loi mi na ai hpang, "Ngai gaja wa sha tsun na, tsawra ai ngu, ndai ga si hpe n tsun ga ai zawn, loi loi hte sha mung n tsun hkrup ga ai, byin lai mat wa sai lam, masha shagu hta nga ai raitim, ngai na byin nga ai ya na masa hte du na prat hta gaw agu Myu langai hpe sha madu la mayu ai, agu Myu gaw Seng a shawng ningnan byin pru wa ai sumtsaw hte hpang jahtum na sumtsaw she rai na sai." Ngu galu kalang myiprwi si ni gahte hkra mi n rai tim, myiprwi ing taw nga let shali tsun dan salu ai.

"Seng e, nan a prat wa mung ngai pyi n chye na ya wa sai, yahte nang machyi taw nga ai shaloi, nang hpe gawn lajang ai gaw ngai hkrai n re, marai langai naw lawm ai." "Gadai,? Gadai rai? Tsin Tsin?" Ja Seng Ing myiman shai mat salu ai. Tsin Tsin Ja Seng Ing hpe grai n-gwi yu let, "Agu, agu Myu Lat, nang a tsawra myit hpe shi chye kau sai." Ngu tsun dan nu ai. "Tsin Tsin, shi ngai hpe yu kaji kau sai kun i?" "Agu Myu Lat hpe yu yang, na ntsa yu kaji ai myiman nsam gaw n mu ai le, ngai hku na agu Myu Lat hpe maram yu yang, shi mung Seng nang hpe myit shang sha taw sam ai." "Lama na nang shadu ai hku n rai yang, gaya hpa she rai sai." "Tsawra myit ngu ai gaw mai gaja ai hku nhtang wa chye ai, nang a tsawra myit jet yang gaw nan hkrumzup lu na re ngu ngai kam ya ai. " Shan jahta dung nga ai ten hta, Ring Awng hpe mu mada dat nna, Tsin Tsin shinggan de kagat pru wa nu ai. "Aring, Aring chyahkring mi, nang hpe san mayu ai lam nga ai, ndai de naw shang dung rit." Ngu hkan shaga jahkring tawn let, ta hte wak nga ai. Ring Awng mung mau mau rai let, "AWh, Tsin Tsin hpa san na ma? Nhku de i?" Ngu gayin san nga ai. "Ja Seng Ing hkum zeng rai sai i?" "Gaja sai." "Aring nang hpa lu na htet u yaw." "Byiya palin mi rai jang rai sai." Ring Awng byiya n gatut mat ai grai na sai. "Aring, agu Myu nga ai i?" Ja Seng Ing lu nga ai namsi ntsin gawm hpe tawn kau nna san dat sai.

"N nga ai bat mi dang rai sai, shanhte mare de gan wa ai nga gaw tsun da ai. Zau Naw mung nta wa mat sai. Yahte gaw ngai hkrai sha nga garen taw nga nngai." Ring Awng byiya n-gup mi dawng rai lu la nna tsun u ai. "Galoi wa na da i?" Ja Seng Ing grai chye mayu ai nsam hte bai san nga ai. "Galoi pru wa na mung n tsun da ai." Ja Seng Ing myit n pyaw ai zawn rai mat sanu ai. Nta du wa ai hte Ja Seng Ing ku kaw galeng nga let, Mali hka kau e sumla soi dung nga ai Myu Lat a sumla gaba hpe yu azi nga u ai. Agu Myu e, Seng a ntsa yu kaji mat sai kun, masha langai hpe sumru myit dum ai ngu ai gaw, grai hkiba la ai amu langai mi re, raitim, Seng a myit hta kalang mi sha pyi n ba dum ai yaw, hpa majaw ta nga yang, ngai myit sumru myit dum ai gaw Seng grai tsawra ai agu Myu nang rai taw nga ai majaw re yaw. "Hkau Myu nang hpa rai dai hku masu shangun ai, Ja Seng Ing matsan shayan le." "Dingsang sang di ai n re gaw e." "Nang mung shi hpe tsawra ai n re i taw?" "Tsaw gaw she tsawra law, ngai mung mana na daram tsawra ai." Myu Lat chyinghka lam kaw pru wa shang wa rai gahkrang nga ai. "Shi mung nang hpe tsawra nga sayang wa mi, kalang ta sumtsaw ga tsun kau dat sanu le, dai ram wa loi nga yang wa mi."

Ring Awng ta gahpret shangoi la hkra rai tsun nga ai "Ngai tsun dan na Aring, num sha ni a nawng la- ing shagu gumhtawn bang ai baw n re gaw e, nawng mu shagu lagaw shin mayu ai myit jasat gaw la gaja ni a bungli n re, ahkyak ai gaw..." Myu Lat gahtan hpyi shakyip tawn rai tsun ai ga hpe jahkring kau dat nu ai. "Hpa wa mi?" Ring Awng bai san shadut dat sai. "Ahkyak ai gaw ngai shi a prat shawang de shang wa na loi ai, raitim, ja bum na hkawhkam shayi gaw hkumpup nawng de sa wa na yak la na re." "Hkau Myu, nang myit nau hkum kaji, hkawhkam shayi hpe nga rem ma lu la ai maumwi ni grai nga ai le, nang mung chye chyalu, sagu sha rem sha ai Daw-wi wa shi a myit makam a majaw, hkawhkam pyi lu tai nga ai le." Ring Awng myit n-gun grai rawt let tsun nga ai. "Aring, nang ngai hpe tsun ai ga ni hta na, daini na ga gaw teng dik sai yaw." Myu Lat mani sai rai dat sai. Myu Lat hte n hkrum ai bat lahkawng du ai shana, Ja Seng Ing shi hkrai "AWh, agu Myu e, Seng hpang de galoi she pru wa sana ta, agu Myu ndai mare kaw naw nga nga ai hpe Seng a myit hta chye da ai, agu Myu masu ai n rai i?" Ngu anyam nga nu ai. Lana de mi, Ja Seng Ing gaw nta shachyang maga de tingse dum let mahkawn hkawn ai nsen na dat ai majaw, hkuwawt de gat pru wa yang, Myu Lat rai nga ai hpe mu nna, shi mung hkuwawt kawn shingna sa madun dat nu ai. Mahkawn hkawn ngut ai hte Ja Seng Ing chyahkring mi ngu ai lata hte kumla madun nna, maisau pa gaba hta "Hpawt de hkrum ga." Ngu ai laika ka htawng madun dan nga lu ai. Myu Lat hte Ring Awng mung mu sai lam shiga jaw kau da rai wa mat masai.

Myitkyina Bala myinhtin mahkrai gaang masha hkawm lam hta tsap nga ai Ring Awng gaw Tsin Tsin hpe n yu ai sha, Mali hka hpe gum yu let: "Tsin Tsin, Myu Lat hte Ja Seng Ing yan a lapran, an hparan ya yang she mai sai, ndai yan hpe yu yang, hka, Seng mung num sha bai rai taw, Myu Lat hpe yu ga nga yang mung shi hkum shi matsan ai nga nna myit kaji nga, gadai mung gadai myit ru myit yak ai lam hkrai nga nga ai." Ngu tsun nga nu ai. "Aring nang gara hku myit da ai rai?" Tsin Tsin Mali hka hpe shingdu yin rai kau let san u ai. "Nang ngai hpe kam sham yang, ngai ngu ai hku sha hkan galaw u yaw." "Manang yan a matu she nga yang gaw she garum la mayu le, raitim, nang maru mara hkum woi galaw re lu." Tsin Tsin gaw Ring Awng hpa myit da ai lam hpe n chye ai majaw, loi myit tsang nga ai. Ring Awng hte Tsin Tsin manang yan a matu bawngban nga masai. Mali hka wawra hkran na mu n mu re masha hkawm shara gindawt kasha hta Ja Seng Ing hte Myu Lat dung nga ma ai. "Agu Myu, hpa rai Seng hpe pyi n kam tsun dan hkra koi kau da ai rai?" "Seng hpe mung lama mi san na yaw, mai na i?" "Mai ai, san u le." "Kaning rai, agu Myu a hkrang pan sumla ganoi yawng ngu na daram hpa rai Seng a yupgawk hta rawng nga ai rai?" "AWh, dai wa i, agu Myu soi da ai hkrang pan shagu hpe ra nna rai nga ai le." Ja Seng Ing Mali hka de man yawng let rawt tsap wa nna ahpa ala sha ngu htan nga ai. "Hkrang pan hpe sha i?" "N re." Ja Seng Ing baw ganga dat nu ai.

"Dai rai yang, agu Myu kaw Seng ra ai hpa naw nga ai rai?" "Agu Myu a tsawra myit..." Ndai ga gaw Ja Seng Ing a kraw gata na ra sharawng dik ai ga si raitim, Myu Lat n na lu nga ai, hpa majaw nga yang, Ja Seng Ing a myit kawn sha tsun gwi nga ai majaw, Mali hka hpe yu let tsap taw nga nu ai. "Seng, agu Myu san nga ai le, na nga ai i?" "Mahkawn hte yu- ngwi ni hpe ma tsawra ai." "Kaga hpa naw nga ai rai?" "She, agu Myu wa mung, Seng ra ai gaw grai law ai, agu Myu jaw lu ai gaw n rai." "She lu jaw le, Seng nye hkau Myu mi gaw Seng nang ra ai she nga yang, shi salum du hkra jaw na jin jin sha re." Ja Seng Ing yan Myu Lat a ga san hpe Ring Awng e wa htan matut dat ya nu ai. "Ah! Ring yaw." Ja Seng Ing hte Myu Lat kalang ta gajawng nga sai. "Hpa gaya nga ai, yahte Seng nang machyi nga yang, nye hkau Myu hpa kun nga tsun dan ai re lu." Ring Awng shi hkrai gaman kaw pau tsun dat sanu ai. "Nang Tsin Tsin hte an pyi sumtsaw byin taw nga sai." Ngu, shakawng lala hku Myu Lat hte Ja Seng Ing a man e nan Tsin Tsin hpe ahpum kau dat ai hpe, "Mawk kat! Ya chyawm Tsin Tsin pawt na sai." Ngu myit let, lata hte n-gup kaw pat di bai sharai la ai shaloi, Tsin Tsin mung gaja wa zawn rai hkra Ring Awng hpe galaw ahpum dat nu ai. "Seng nan hpe ngai grai yu n lu nga ai le, kalang lang yu yak dik wa wa re yaw." "An gaw hpa byin nga a?" "Hkau Myu nang mung grai anya ai, shara pyi galai kau ga ngu mayu sai." "Bai rai sai, mara gaw kaning rai ngai hpang de bai gayin du wa ai rai?" Ja Seng Ing baw gum let Mali hka hpe yu masu su nga ai hpe Myu Lat gaw gahpa lahkawng maga kaw yat sha sa jum la nna, myiman hkrum di dat nu ai. "Seng, nye tsawra myit ni hpe hpa hte mung magap da n lu mat sai, dai majaw Seng hpe agu Myu tsawra ai lam tsun dan mayu ai." Ja Seng Ing a kraw lawang hta gari gawa nga wa ai hte akya nga wa nna, Myu Lat a shingwang de gadawng bang mat wa sanu ai.

Dai shaloi Ring Awng gaw Myu Lat hpe myi maga mi grip di dan nna, shi lata hte mung Ja Seng Ing hpe ahpum dat sanu ngu ai kumla madun dan nga ai hte Myu Lat mung ahpum chyit di da sanu ai. Myu Lat hte Ja Seng Ing chyahkring mi na laman mungkan ting hpe malap kau hkra simsa nga nga yang, "AWngdang sai!" Ngu tsun let Ring Awng lata maga mi hte Tsin Tsin a lata maga mi gaw "Pyek!" Nga she ngoi hkra gayet dat nna mani nga masai. "Hpa wa mi awngdang nga mata?" Tsin Tsin lama mi ip da ai zawn rai nga ai hpe Myu Lat yan Ja Seng Ing myigrip mi na laman htai la lu kau sai majaw, Myu Lat shawng "Mi na zawn rai bai ahpum yu mu taw." Ngu tsun dat nu ai. "She, agu Myu Lat wa wa mung bai rai sai, lahkawng lang lang gaw n ahpum dan ra na re." Tsin Tsin loi gaya let tsun dat sai. "She ahpum ra le taw, tinang sumtsaw tinang she ahpum ai wa mi." Ja Seng Ing bai tsun jat dat sanu ai. Ring Awng gaw ahpum na zawn zawn, n ahpum nga yang mung masu shut kau sai rai, ahpum nga yang mung Tsin Tsin hte gaw hpa n rai taw ai majaw, myit chyat taw nga nu ai. "Atsin, moi nang hpe hpyi da nna, na ahkang n lu mat ai mahtai, ngai hpe ya jaw sanu yaw." Ring Awng grai myit la ai hpang Tsin Tsin hpang de yawng let tsun dat nu ai. "Aring, nang hpa hpyi nna, ngai hpa jaw ra ai rai?" Tsin Tsin n chye masu su let, hpang de loi htingnut hkra rai bai san dat nu ai. "Tsin Tsin a sumtsaw mahtai le." Ja Seng Ing hte Myu Lat rau jahtau tsun dat ya manu ai. Ndai lang gaw Myu Lat manang wa Ring Awng hpe Tsin Tsin e ahpum dat sanu ngu, myi maga myi grip let kumla madun sanu ai hte rau, Ring Awng Tsin Tsin hpe ahpum kau dat sanu ai. Tsin Tsin mung n ningdang ai sha zim rai Ring Awng a dam gaba nga ai gahpa hta shamyet taw nga nu ai.

"Aring, nang Tsin Tsin hpe hpawtni na mungkan ting galaw ai sumtsaw sumra masat masa nhtoi hta hpa kumhpa jaw na myit da ai rai?" "Ngai wa i? Hpa jaw na ta nga yang, numri pan she jaw le, nang gaw taw?" "Ngai gaw mau hpa langai hte mahkawn langai mi hkyem da ai." "Hpa mau hpa langai mi?" Ring Awng baw mahkyit let san u ai. "Hpawtna de du jang chye na rai nga ai le." Mungkan ting galaw ai sumtsaw sumra masat dingsat poi shani du sai majaw, Myu Lat, Rawng AWng, Ja Seng Ing, Tsin Tsin ni mung Mali hka mahkrai de sa chyai na hku gadi da masai. "Tsin Tsin na matu." "Aga, numri pan! Chyeju kaba sai." Tsin Tsin grai gabu ai nsam hte Ring Awng a numri pan kumhpa hpe manam dat let tsun nga u ai. "Hkau Myu, nang Seng hpe jaw na nga ai mau hpa kumhpa, ya gaw chye shangun mai sadawng?" Ring Awng gaw mahkrai makau kaw tsap nga ai Myu Lat hpe praw di yu dat nna tsun nu ai. Dai ten hta, Ja Seng Ing mung hpa jaw na ngu ai kumla hte baw chyen mi hpe sharawt dat let, ta ladawn taw nga sai. Myu Lat zim sha rai, hkring mi ngu ai kumla hte lahkra lata madun nna, shi gabye da ai mahkrai pu na sumri kasha hpe tat dat sanu ai, shaloi mahkrai makau e tsap nga ai Ja Seng Ing a man ang shawng de noikrat shabawng pyen lung wa ra ai, dai noikrat a lawu e gaw Ja Seng Ing hkuwawt e lata madi tawn rai, lama mi hpe ala nga ai hkrang bung sumla rai taw nga ai majaw, Ja Seng Ing sha n rai, Ring Awng yan Tsin Tsin du hkra myi shagan tawn nna n-gup mahka nga masai. "Ah! ..." Ja Seng Ing marawn let dai yat yat sha rai pyen lung wa ai sumla hpe hkap rim la nna, Myu Lat hpe ahpum chyit di ai hte ndum shami apup kau dat sanu ai. "He! He!" Ring Awng mayu sharat dat ai shaloi she, Ja Seng Ing gaya gaya rai, Myu Lat hpe yu let, "Ndai sumla gaw galoi lagu soi la ai rai?" Ngu san dat sai.

"Ngai Seng hpe n tsun ai sha hkawm kau da ai shaloi soi da ai re. Agu Myu, Seng a makau na galoi mung n kau da yu ai." Myu Lat gaw Ja Seng Ing a gahpa kaw sa jum da let tsun nga ai. Ja Seng Ing loi shalu ai hkrang hte n-gup pawng di, ma kasha langai zawn rai, "N kau da ai nga na gaw, hpa rai bat lahkawng ting ting Seng hpe yen tawn ai rai?" Nga bai san dat nu ai. "Dai wa i? Agu Myu, Seng hpe gaja wa nan tsaw ai i? N tsaw ai i? Tinang hkum tinang nan shawng jep yu ai lachyum le." "Ya gaw taw? Jet sai i? Rai n jet shi ai i?" "Ndai mungkan ntsa hta jet dik ai tsawra myit hte Seng hpe tsawra nga na yaw." "Nang tsun da ai dai sha n re, mahkawn ma naw hkawn dan ra ai le, hehe..." Ring Awng gaw Myu Lat hpe tingse hta ya let tsun u ai. "Hkum mai malap u ga le.' " Myu Lat tingse hkap la nna, sumri dum jahtuk la nhtawm, Ja Seng Ing hpang de gayin yu la rai, mani sum rai, "Karai hta ga sadi tawn, nang hpe tsawra ai..." Nga shapyaw bang wa nu ai Ja Seng Ing hte Tsin Tsin mung jahkrup tawn ai mu lama mi nga nga ai. "Agu Myu, Seng hpe tsawra ai i?" "She tsawra le, Seng n kam ai i?" Ring Awng hte Tsin Tsin zim sha rai, mahkrai ntsa kaw ta hkindun kau let tsap madat nga ma ai. "Agu Myu, Seng hpe i myit pyaw shangun mayu?" "Seng le, tinang a sumtsaw hpe she myit pyaw shangun mayu law, mai byin yang pyi naw ma-um da mayu ai, n-gup n shang na she re." Myu Lat shatu shakra ai zawn nga tsun ai raitim, Ja Seng Ing a myiman hta n chye tsun dan ai lachyum pru nga lu ai.

"Rai yang, Aring jaw ai hpe Tsin Tsin hkap la ya ai zawn, agu Myu jaw ai kumhpa hpe mung Seng hkap la ya sai, dai re majaw, Seng hte Tsin Tsin mung agu Myu yan hpe lama mi jaw mayu ai, chyeju hte hkap la ya marit yaw." "Hpa kumhpa wa ta? Dai ram ram she shanyam hkra hkra wa." Ring Awng a ga htum ai hte Tsin Tsin gaw Ja Seng Ing shan bawng da ai lam tsun dan nu ai. "Seng an jaw mayu ai kumhpa gaw, agu Myu Lat yan hpe mahkawn lahkaw lit la nna htuk shapraw ya mayu ai." Tsin Tsin a ga ndai gaw Myu Lat hte Ring Awng a yupmang rai nga lu ai. Shan yan prat ting jamjau hkam let shakut nga ai yupmang rai nga malu ai, raitim, Myu Lat gaw ningdang kau sanu ai. "Seng e, dai gaw an n-gwi hkap la ga ai law." Myu Lat tsun let myiman hkrum rai nga ai kaw na maga mi de gayin yawng mat salu ai. Dai hpe Ja Seng Ing gaw Myu Lat a lata hpe galaw gang gayin la dat nu ai. "Seng hpe myit pyaw shangun mayu ai nga mi?" "Seng e, agu Myu a ntsa chye na ya rit, ya Seng tsun ai hpe an hkap la dat yang, an lahkawng hpe masha ni hpa tsun kau na?" Ja Seng Ing a ga hpe n hkap la ya ai majaw, Myu Lat a man e Tsin Tsin yan gaw myiprwi si hte pya rai hputdi hkra hpyi nyem bang wa masai. "Seng hpe tsawra dik ai nga?" "Dai hku hkum rai law, Seng e, Seng yan Tsin Tsin tsun ai hpe hkap la ya na saga ai." Myu Lat hte Ring Awng gaw gadai mung gadai a sumtsaw jan hpe gang sharawt la nna ahpum chyit chyit di da nga masai. Dai shani kawn Ring Awng ka tawn ai mahkawn ni hpe Myu Lat hkawn shaman hpang nga sanu ai.

Ja Seng Ing hte Tsin Tsin gaw mahkawn htuk lu na matu kyin hkawm nga masai. Laning mi ngu na hta, shanhte marai mali jawm shakut ai yu- ngwi lahkaw gaw mying grai gaba gumhkawng wa nga sai. Myu Lat yu-ngwi shadang gaba byin hpang wa ai kawn masha ni chye ai mung law wa ai kaw hkan nna, Ja Seng Ing hte Myu Lat a shiga gaw Ja Seng Ing a ganu a ana kaw nbung zawn bung shang wa sai. "Ma Seng, nang kaw naw she wa dung yu u, ya nang hte ganawn hkawm nga ai Myu Lat nga ai wa gaw kaning re masha re, nang chye ai i?" Ja Seng Ing gum tarung nga let ganu tsun ai ga ni hpe madat dung nga nu ai. "Hkrup mara masha, lu sha seng hkan mahkawn hkawn nna she shat tam sha nga ai, gara kaw na kaning re masha re pyi n chye ai, nang rai nna she woi hkawm gwi ai." "Nu e, masha langai hpe ntsa lam sha praw di yu nna gaw, masha ni tsun ai ga hpe sha kam let shi hpe hkum mai yu kaji u ga le." "Ma Seng! Nang ngai ganu hpe galoi ga htan ga ai, masha hpawdam hpawwam ni hte ganawn hkawm nna, ngai ganu hpe pyi ga htan chye wa sai i?" Ja Seng Ing a ganu rawt tsap hkra rai kasha hpe ta yungdi di tawn hkra hta bang wa sai. "Daini kawn gara de mung n sa lu ai, gadai hte mung n shaga lu ai, hka! Mawdaw zawsi hte gyenan la dat u." Ja Seng Ing kaning n chye ngu mat sai majaw, mawdaw zawsi hte gyenan hpe dawdap na saboi ntsa kaw mara tawn da nhtawm, hkrap let gawk de kagat shang mat wa nu ai. "Ya na wa hte na shawng hpe mung htet da sai, nang hpe gaw Amerigan de nan sa kau ra sai." Ja Seng Ing a ganu gaw kasha hpe myijut hku hkan yu let tsun nga ai. Wang chyinghka, nta chyinghka, gawk chyinghka ni htemhtem chyipchyip la kau ai hkrum sai.

Raitim, Ja Seng Ing a masin salum chyinghka hpe gaw ganu pat kau ya n lu nga ai. "Tsin Tsin, Seng gara de sa mat ai wa mi re, nang n mu hkrup ai i? Ngai hpe mung hpa n tsun da ai le." Masum ya ngu na shani Myu Lat gaw mau mau rai let, Tsin Tsin a seng de du pru wa ra ai. "Mani shanhte nta de sa yang, gadai mung n nga ai, zaw gaba la da ai hta n-ga, gyenan mung n hkrang ai, lama mi gaw lama mi rai sai." Ja Seng Ing hte n hkrum ai laban bat mi na mat sai majaw, Myu Lat hte manang yan mung grai tsang lawm nga ma ai. Lana mi hta Myu Lat gaw shi hkrai sha Ja Seng Ing ni a nta wang shinggan makau hkan gayin hkawm nga nu ai. Wang shinggan na hpun maling hta "Sawk, sawk..." Nga hkawm sharat ai na dat ai hte, shingna asin re sha naw yu shapraw nga yang, "Myu Lat n rai i?" Nga san pru ai masha nga ra ai. "Re." Myu Lat gajawng gaja hte htan dat nu ai. "Maw, maw, ndai la nna lawan wa mat su." Ngu tsun let, Myu Lat hpe rai majaw mi sa ya da nhtawm, ningsin gata de hkawm shang mat wa nu ai. "Ndai laika she hti yu mu, ngai nnan kawn shadu gaw shadu sai." "Hpa laika wa ta? Hka, hka." Tsin Tsin lawan ladan rai Myu Lat a lata na laika gare la dat nu ai. "Agu Myu, Seng hpe gaja sha tsawra ai rai yang, hpawtna Seng hpe sa hprawn la rit yaw, shing nrai yang, agu Myu hte Seng gaw prat ting tsan gang mat wa na ra ai, ndai lahkawng masum ya hta, Seng hpe Amerigan de sa kau na da." "Agu Myu Lat, ya gara hku di na?" Tsin Tsin laika hpai ari let mau nga ai. "Gara hku chye di na, Seng tsun ai hku she sa woi hprawn la ra le." Ring Awng mung n-gun jaw nga ai "Re, ngai Seng hte n kam hka ai, lu ma n lu hka ai." "Rai Yang, htung nga ai hte maren, anhte gasa woi, ja ka baw rai Jinghpaw htung hku galaw na tai ai."

Ring Awng myit sa myit wa rai ai hpang Myu Lat hpe bai shadum dat sai. "Ten n nga sai, htung shatup chyai nga yang, Seng hpe n hkan mu kau dat sai, shawng sa hprawn wa ntawm, hpang e bai tsun ga." Myu Lat gaw Ring Awng yan Tsin Tsin hte mu bawng ngut rai bra wa masai. Dai shana Myu Lat aloi hte sha n mai yup hkraw nga ai, Ja Seng Ing shalai ya ai laika pa hpe sinda ntsa kaw mara tawn rai galeng nga u ai. "AWh, Seng e, nang hpe ngai madu na ahkang n nga ai hpe ngai chye ai, prat madang n bung ai re hpe mung ngai chye ai, nang hpe ngai n tsaw ging ai re hpe mung chye ai, nang hpe ngai n tsawra hkrup hkra ngai grai sadi yu ai, raitim, nang hpe grai tsawra mat ni ai, dai majaw, ngai Seng hpe n lu yang lu hkra, ngai sa prawn la na." Hpang shana, Myu Lat gaw shi hkrai hkum sumgu hte Ja Seng Ing hpe sa hprawn na matu rawt sa wa sai. Tsin Tsin hte Ring Awng gaw hpang shani gaang du wa tim, num hprawn sa mat wa ai Myu Lat n pru wa ai hta n-ga, shiga mung n matut pru wa ai majaw, mau mau nga let shinggan de ya sha sha sa pru mada da rai gahkrang nga ma ai. "Aga, Aring ndai yan gaw grai na mat nga ai le, hpa manghkang byin ai kun? Shing n rai..." Ja Seng Ing ga pyi rai n tsun htum yang, shi a gyenan ngoi pru wa ra ai. "Halaw, re re, hpa da aw? Ya gara kaw rai? E, e, chye sai." Tsin Tsin gyenan madat nga ninglen man hten mat wa nu ai. "Hpa da i? Tsin Tsin." "Agu Myu Lat tsirung kaw re da, tsirung na sara ni shana wa ai re. Ring Awng kalang ta Tsin Tsin a lata magra la nna, Myitkyina tsirung de kagat mat wa sai.

Myu Lat a myi hta Ja Seng Ing samwi lapran kaw tsap nga ai hpe mu nna, ga shaga dat ai hte Ja Seng Ing myiprwi si ni pya rai ga n shaga ai shingdu yawn rai hkawm mat wa ai hpe mu nga u ai. "Seng... Seng..." "Hkau Myu dum wa sai i, hkum rawt, hkum rawt, na baw ningma hte re." Ku makau e dung nga ai Ring Awng gaw hprang wa ai Myu Lat hpe galaw galeng nga shangun nu ai. "Seng gaw? Seng gaw taw?" Myu Lat aba ama hte san wa sai. "Agu Myu Lat, Seng hpe n mu ai, an mung nang tsirung kaw du ai shiga na nna sa wa ai, nang malap taw nga ai daini bat mi rai sai." "Bat mi da aw?" Myu Lat gaw Ja Seng Ing hpe sa hprawn ngu sa wa ai sha dum ai kaw lai nna, kaga hpa hpe mung n dum nga lu ai. "Ya ngai hpa byin nga sata?" Myu Lat mahtai tam n mu hkraw nga lu ai, myit magang baw tum machyi magang rai nga salu ai. "Ah, chyuk, chyuk.." "Hkau Myu ya aten hpa hkum myit shi, ya hkring ngai hkan sagawn hkawm yu na, nang baw tum machyi yang, yup tsi htu la rai, chyahkring mi yup la u, Tsin Tsin tsi sara naw sa shaga la su." Tsi sara ni Myu Lat hpe yup pyaw tsi wa htu ya ai htawm, yup pyaw mat wa nu ai.

Myu Lat a myit shingran hta Ja Seng Ing nga ai nta makau na shara mi e, Myu Lat a makau kaw madaw langai sa jahkring ai hpe na nna gayin yu dat nu ai. "Buk! Duk! Duk!" "Ah..." Mawdaw na masha ni madaw de lawan wan lung nna gawt hprawng mat wa ai hkring mi nga ai hte, Myu Lat a na hta mawdaw adawt ai nsen bai na dat nu ai. "Seng... Seng..." Salat hte grit rai Myu Lat shingran na bai hprang wa sanu ai. "Hkau Myu, dum sai i?" "Agu Myu Lat, prang sai kun, maw maw, ntsin lu dat u." Jahpawt manap jau jau Myu Lat hpe Ring Awng yan Tsin Tsin shat bawt nga yang shang wa ai num sha pe mu nna, mau mat masai. Dai num sha gaw kaga n rai, Ja Seng Ing rai nga ai, kara kadun dawk daw tawn, palawng lawngta kadun achyang hpun da, labu buhkra chyang bu nna, lu hpa sha hpa hpai rai shang wa ra ai. "Kaning naw nga ai rai? Agu Myu." "Nang, nang Ja Seng Ing re i?" Myu Lat a ga san hpe Ja Seng Ing rai n lu htai shi yang, Tsin Tsin rawt tsap let ga shaga bang wa sai. "Aga, Seng, nang gara de sa mat ai? Anhte gaw nang hpe tam ai mungkan pyi chyam na daram, nang le dik hkra lu nga hkawm ai i?" Ja Seng Ing gaw Myu Lat a makau e sa dung nga u ai. "Ngai shinggan de n mai gale ai gaw, ya pyi ngai agu Myu hpe nau hkrum mayu nna, nu yan wa a ga madat na ngu ga sadi jaw da nhtawm she lu pru wa ai re." "Nu yan wa a ga madat na nga ai gaw, hpa lachyum ta?" "Yahte nanhte hte hkrum ai shani kawn shinggan de n lu pru sai, hpang shani Seng a wa Amerigan nna du wa ai, nta na gaba ai ni agu Myu hte an hpe myit n hkrum ai, Seng hpe maigan ga na Jinghpaw la langai hte hkungran ya mayu nna, ngai hpe gawk kaw rawng da ma ai, maigan de sa wa ra sai, ndai lapran gaw nu yan wa a ga madat ya masu su let nga ra ai, gaba ai ni myit mu myit kam sai nga ai hte kalang bai hprawng ga le i, agu Myu." "Seng nang gaja wa tsun ai i?"

Dai shaloi she Myu Lat machyi nga ai baw na ningma ni pyi mai mat ai zawn nga sanu ai. "Seng hte n hkrum ai ten hta agu Myu mana na daram Seng hpe dum ai le." "Seng mung agu Myu hte maren sha gaw." "Ahum! Ahem! Tsin Tsin an naw gan yen ya ga, hkau Myu yan Seng an gat naw sa na yaw." Ring Awng mayu sharat let tsun dat ai. "Seng, agu Myu Lat hpe atsawm sha naw sin da u yaw, ya hkring an pyi n chye hkra bai lagu hprawng mat wa na lu." Tsin Tsin shinggan pru wa let mani sum rai tsun kau da ai. "Tsin Tsin nang Ja Seng Ing hpe gara hku mu ai rai?" "Ataw, ngai gaw Seng hpe gara hku mu na rai? Anhte a manang hku she mu le taw." "N re le, Seng a tsun shaga ai sat lawat masa ni hpe ngai nau n tsen ai lama mi byin taw nga ai." Ring Awng a ga na ai Tsin Tsin gaw hkawm nga ai lagaw lahkam hkring mat nu ai. "Ngai mung myit hta lama mi lama mi nga hkam sha taw nga ai, raitim agu Myu Lat hpe gaw rai n mai tsun dan na re." Myu Lat tsirung pru sai. "Agu Myu, nang tsirung pru ai shaloi, ngai n lu sa tau ai majaw, tawngban ai yaw, ya gaw kaning naw nga ai rai?" Ja Seng Ing Myu Lat hpe sa gawan let myit sa shalan ya nga ai. "Seng nang hpa rai kara daw kadun kau ai rai?" Tsin Tsin ndum shami ga san ai majaw, Ja Seng Ing a myiman nsam loi hten nga ai hpe Ring Awng ni mu nga masai. "AWh, ndai wa i, kalang numrang hkrang galai chyai mayu nna gaw e."

Ja Seng Ing kara masawp let htan u ai. Jahta shaga chyai ngut ai htawm, shinggan de pru mat wa ai Ja Seng Ing gaw Myu Lat hpe gayin yu nna: "Agu Myu, hpawtna pyaw chyai ginra KTV de sa chyai ga i?" Nga saw dat nu ai. "Seng e, hkau Myu hkum zeng pyi nrai shi ai wa mi, ya hkum tsepkawp mai gaja jang sa ga le i." Ring Awng myit n hkrum lawm ya nga ai. "Gaja wa i, tsirung sha naw pru ai hpe gan malap kau nna gaw e, ngai naw wa sana yaw." Jahpawt mi, Ja Seng Ing mawdaw hte Myu Lat ni nga ai nta wang chyinghka lam e sa jahkring da nhtawm, tsap let, "Agu Myu, Aring.." Nga sa shaga nga u ai. "Oi, Seng, shade jau wa mi, hpa ahkyak ai rai, nhku de shang dung u le, hkau Myu gaw nang chye ai hte maren naw yup nga ai." Ring Awng myi ganun kau rai pru wa u ai. "N shang wa sai, agu Myu hpe naw jasu ya rit, jahpawt jau jau lam hkawm shalan shabran ga ngu ai le, la nga ai ngu tsun ya rit." Ring Awng baw mahkyit let nhku de bai shang wa sanu ai. "Hkau Ring, Seng hpa sa tsun ai rai?" "Nang hte jahpawt lam arau hkawm mayu ai da, la nga ai, lawan rawt u." Jahpawt manap Myu Lat yan Ja Seng Ing gaw Myitkyina Shata pru manau wang makau na Mali hka hka kau zaibru jang hkan gatsi bungli marawp let hkawm chyai nga ma ai. "Agu Myu, nang tsawra myit hpe gara hku hkam sha ai rai?" "Seng e, tsawra myit a lam gaw lachyum nau sung nna, ngai n chye tsun dan ai, raitim, ngai hkam la ai hku tsun yu na yaw, tsawra myit ngu ai ahkyak dik htum gaw, shada da chye na hkat ra ai, hkam sharang ai he madat mara hkat ra ai, bai nna shada da sadi dung hkat ra ai, um, kaga lachyum ni mung grai naw nga ai le i."

"Rai yang, masha ngu ai hpe nang gara hku hkam sha ai rai" Ja Seng Ing ta kalang kau rai bai san dat nga ai. "Ngai hkam la ai hpe tsun na yaw, masha ni a hkam sha lam chyawm n chye ai, masha ngu ai gaw my lahkawng tu ai re majaw, hpan lahkawng hku mu chye ra ai, bai nna na lahkawng kap ai re majaw, hpan lahkawng hku madat chye ra ai, hpang jahtum na gaw masha hta n-gup langai sha re majaw, ga hpan mi hku sha tsun ra ai." "Agu Myu nang tsun ai ngai nau n chye na ai le." "Myi lahkawng re majaw hpan lahkawng hku yu ra ai ngu ai gaw, tinang hkum hpe ma yu ra ai, manang wa a matu mung yu ya chye ra ai, ga shadawn, tinang a jinghku jingyu, gahpu ganau, manaw manang ni matsan mayan rai jamjau taw nga yang, garum shingtau ra ai, nkau kau gaw manang ni gara hku byin yang byin, ngai lu su jang rai sai, ngai lu sha jang rai sai nga, jaw ai n jaw ai hpe chye yu ginhka la ra ai. Bai langai mi gaw, hpan lahkawng hku na chye ra ai ngu gaw, shakawn ga hte shatan ga dai hpe mung chye madat ginhka la ra ai. N-gup langai sha re majaw, wawra zawn zawn ndai zawn zawn kalang mi myu mi, kalang mi gaw lama mi nga nna wawra tsun, ndai tsun n mai ai, ga sadi jaw da jang, grin hkra galaw ra ai, masha wa a ntsa n gaja ai n galaw na, shagrit shanyem ai hte madat mara chye yang gaw masha ngu ai mai sawn sai ga rai nga ai, ngai chye ai gaw dai ram sha re law." "Rai yang, langai naw san na yaw." "Daihpawt gaw Seng ga san grai san nga ai le, shawoi pyi dai hku n san ga ai wa mi." "Um law, shawoi n san ai majaw she, ya san mayu taw nga ai." "Hpa san na mi? Ngai myit hpaji sara wun gaba n re majaw, ngai chye ai hku sha htai ya na yaw."

"Anhte num sha ni hta, ahkyak dik htum hpa baw atsam ni rawng ra ai rai?" "Dai chyawm loi yak na zawn nga ai, raitim, ngai na ga ai hku tsun dan na yaw, kam hpa na masha nga ai mi rai rai, tinang hkum tinang kam hpa ging dum chye ra ai, tinang langai hkrai sha raitim, prat hta mai gaja ai hte tinang lagaw tinang tsap gwi ra ai, ninghkaw jan hpe yu yu u, shi langai hkrai sha raitim, mungkan ting hpe shi nhtoi jaw ya lu ai, num sha langai mi mung tinang hkrai sha raitim, tinang a atsam ningja ni hte tinang a prat hpe shatsawm jahtap la chye ra ai." Ja Seng Ing gaw ma kasha langai muk hpyi nna muk lu ai hpa myiman hpraw nsam hte "Aga, dai hpawt chyawm agu Myu hte rau hkawm chyai ai majaw, manu dan ai ga na la sai, daina myit shalan mahkawn sa hkawn ga i?" "Gara kaw sa hkawn na mi?" "KTV kaw le, Tsin Tsin yan Ring Awng hpe hkum woi sa, an lahkawng hkrai sa ga ngu ai." Ja Seng Ing grai n wam tsun dat ai zawn re nsam hte Myu Lat hpe yu let tsun dat nga ai. "Seng, Aring hte Tsin Tsin hpe n woi sa yang gaw htuk na i? Shan lahkawng hte rai jang she alum ala rai na rai nga ai le." Myu Lat labu sumbu kaw lup tawn ai ta lahkawng hpe shaw la hkra rai tsun shadum u ai. "N kam ai, n kam ai, an yan hkrai sha sa ga." Ja Seng Ing baw pyi gayin ari hkra bai rai wa sai. "Um naw ngu da yu ga le." Nta du wa ai hpang, Myu Lat tsun ai ga hpe na ai Tsin Tsin hte Ring Awng gaw mau n ma nga masai. "Hpa daw aw? Nan hkrai sa na hku tsun ai da aw? Hkau Myu ngai Seng hpe grau n tsen wa sai." "Re, agu Myu Lat, yahte tsirung kawn ngai mung Seng hpe n tsen nga sai." "Ngai mung n tsen ai law, shawoi sha ai baw n sha, shawoi n ra sha ai malu masha ni hpe rai yang gaw sha, kara galu ai hpe ra ai, num ni a tsawm ningja gaw kara re nga nna, ya rai yang gaw kara bai zen kau, lama ma gaw nan shai nga sai."

Dai yang, Tsin Tsin lama mi hpe myit la lu ai zawn rai hkra tsun u ai. "Ngai lama mi myit lu sai." "Daina hpa mi rai rai, Seng shi tsun ai hku nan lahkawng hkrai sa masu, an gaw nan lahkawng a hpang kaw agatsi sha hkan nang na, dai shaloi she hpa re chye na rai nga ai." "Dai mung jaw nga ai." Ring Awng myit hkrum lawm nga ai. Ningrim rim wa yang, Ja Seng Ing mawdaw hte Myu Lat hpe sa htaw mat wa sai. "Seng, mawdaw gawt ai nau chyang nga ai le, loi shayawm na gawt yang n mai ai i." "Chyang mat sai i, ndai hku sha gawt man ai, loi shayawm kau na yaw." Ja Seng Ing mawdaw jahkring nna mawdaw gata kawn pru wa ai hte, Myu Lat gaw Ja Seng Ing hpe grai yu mau mat nga sanu ai, hpa majaw nga yang, anhte Jinghpaw num sha ni buhpun n ging ai labu palawng ni hpun da nga ai, gaya magap na daram sha galu ai labu hte sinda kra kra re palawng ni hpe hpun tawn u ai. Myu Lat madu a hkum hpe bai mada dat ai shaloi, Hka hku dangpai hte lawnghpraw rai taw nga ai, gara hku yu tim, madu a bu hpun palawng Ja Seng Ing hte n htuk taw nga sai. "Agu Myu, hkring mi naw yaw, lu sha sha hpa naw sa htet la na."

KTV gawk gata e Myu Lat hpe shawng shang dung nga shangun sai. "Agu Myu gaw yu-ngwi shadang re majaw, agu Myu mahkawn ai hpe ngai madat na yaw, htet da ai lu sha du wa jang she lu dat, sha dat, ka dat di ga le i." Ja Seng Ing gaw Myu Lat hpe nsen htawn jat hta ya let tsun u ai. Ring Awng yan Tsin Tsin gaw kaga gawk kaw nna mabyin masa hpe lagu yu nga masai. Shana hkying shi lahkawng dang htu wa ai hte, Ja Seng Ing ndum ndam rai hkra tsa nang nna pru wa ai hpe Tsin Tsin yan Ring Awng mu nga ma ai. "Agu Myu, n dang hkawm sai, ngai hpe naw ba rit yaw." Ja Seng Ing gaw Myu Lat a shingma de gadang mara bang wa sanu ai. "Hpa rai dai ram nang hkra lu ai rai?" "Hkam sha lam nga ai majaw le e." Ba lakrang tawn ai Ja Seng Ing a lagaw lahkawng gaw Myu Lat a nshang kaw alang rai hkan kalang nang taw nga ai. Myu Lat gaw Tsin Tsin hte Ring Awng hpe mu nna, lata kumla hte hpa n ra ai, shan kaw hkan nang na hku htet kau da nu ai. "Seng, nang gara hku nta wa na? Mawdaw mung lu gawt na n re?" "Agu Myu, dai lam hpa hkum tsang, hkum tsang, yahte ngai mari da ai nta kasha de sa yup na rai nga ai le. Mawdaw agu Myu nang naw gawt ya rit, ngai ngai lam matsun na." Ja Seng Ing Myu Lat a shingma kaw ba let, labu sumbu kaw na mawdaw zawsi hpe manaw shaw ya nu ai. Ja Seng Ing matsun ai nta kaw du sai. Nhkyeng nhkang rai Myu Lat a du kaw noi let nhpye kasha na zaw bai shaw ya nna, Myu Lat hpe nta chyinghka hpaw shangun nga sai, nhku shang wa ai hte yup gawk de ndi nda rai, shakum hkan jum let yup gawk de htim gadang bang wa sanu ai. "Agu Myu, ndai nta gaw ngai moi ya mari da ai re, agu Myu hte rau nga yang rawng na matu la da ai re, daina gaw nta nnan hpaw poi di ga le i."

Myu Lat, Ja Seng Ing hpe ku ntsa de pawn garawt mara ai ngu yang, n-gun naw shaja shalai kau dat ai majaw, Ja Seng Ing a hkum ntsa kaw tim mara dat nga sai, Myu Lat kalang ta hkum hkrang sharai la nhtawm, dawdap de pru mat wa nu ai. kring re hte Ja Seng Ing bai hkan gadang pru nang wa u ai. "Agu Myu, hpa rai ngai hpe hprawng kau da ai, ya an arau nga jang mung dai hku sha byin wa na sha n re i?" "Ram sai, Seng nang hpe ngai yu gaba da ai ni yawng gaw, hkyet rung hpa she rai mat sai, Seng nang gaw ngai hpe kaning re la shadu ai rai?" "Gara hku shadu na, sai hte shan masin salum ni hte gaw de da ai la she shadu le." Ja Seng Ing dawdap shingjut kaw dung gazut nga nu ai. "E, nang chye ai la chyawm gaw re, raitim, nang hte ngai gaw pyi n hkungran da ai wa mi, ngai hpe kaga la ni hte hkum shabung." Wang shinggan de mawdaw langai wa hkring ai nsen na nna, hkalap hpaw yu yang, Tsin Tsin hte Ring Awng rai taw ai majaw, hkring mi naw ngu ai lata kumla madun dan nhtawm, Ja Seng Ing hpang de gayin wa let, "Gai gai, Seng nang grai nang sai, yup gawk de wa yup taw sanu yaw, ngai wa pawn sa na." Ngu yup ku de wa pawn sa da ai hkring re hte yup pyaw mat wa sanu ai. Dai shana, shanhte masum mung Ja Seng Ing hpe yu sin let, shara mi kaw nga nga masai. Hpang jahpawt jau jau Ring Awng hte Tsin Tsin yan lu sha sha hpa sa mari ai laman, Ja Seng ling rawt sanu ai. "Agu Myu, rawt sai i, ngai mana grai nang mat sam ai, KTV kawn gara hku wa ai pyi she n dum ai le." "Seng nang gaja wa n dum ai i? N dum masu su ai i? Ndai nta du hkra Seng she lam matsun nna wa mi."

Ja Seng Ing man myit la rai, Myu Lat a makau kaw sa dung nang nga nu ai. "Agu Myu, ngai lama mi naw san mayu ai, dai ga san gaw ngai a matu grai ahkyak ai re." "San u le, Seng hpe ngai chye ai daram tsun dan na." "Agu Myu, Seng hpe gaja sha nan tsawra ai i?" Ja Seng Ing Myu Lat hpe yu taw nga nna san u ai. Myu Lat Ja Seng Ing a gahpa lahkawng maga hpe jum let, "Gara hku san dat ai Seng, ndai mungkan hta ngai Myu Lat tsawra dik ai gaw Seng hpe sha re, Seng hpe ma grai manu shadan ai." Ngu ga hkum langai hte langai ngu tsun dan nga sanu ai. "Lama na, Seng a hkumhkrang langai ngai daw hten mat ai rai yang, agu Myu a tsawra myit yawm mat na, htet mat na hpe Seng grai tsang ai." "Seng, hpa ni san nga ai ma? Lamyi kumla n nga ai ga n tsun ma ai." "Agu Myu, ngai san ai hpe sha agu Myu myit kaw rawng ai hku htai ya rit yaw." "Seng e, nang hpe tsaw ai nye tsawra myit gaw galoi mung gring nga na sha re, Seng hpa mi byin yang byin, lu su tim, matsan tim, ruyak jamjau hkrum wa tim, lata hkindun let yak hkak lam ni hpe lai di na rai nga ai le." "Rai yang, Seng a nta de i gwi hkan wa na rai? Myu Lat loi mi myit la nna: "Seng she myit pyaw na rai yang, gara de tim gwi gwi sha re, Seng." Ngu tsun dawdan dat nu ai. Ja Seng Ing mani sai sai rai, Myu Lat a lata sa hkindun la let, mawdaw hte nta de woi wa mat sanu ai. "Agu Myu hkring mi naw yaw, nu yan wa hpe shawng wa shana dat na." Ja Seng Ing Myu Lat hpe nta wang shinggan e shatsap kau da nna, shi hkrai nhku de kagat shang mat wa nu ai. Tsin Tsin hte Ring Awng mung bai hkan du nang pru wa mara ai.

"Seng gaw taw? Hpa rai dai kaw sa tsap nga ai rai?" "Hkring mi naw nga ai, nhku de shang mat wa sai." Hkring re hte Ja Seng Ing nta ntawt kawn shang wa marit nga ai kumla hte shanhte hpe ta wak nga sai. "Nu yan wa, Myu Lat gaw nan nu yan wa san ai sanpoi hpe awngdang sai." Ja Seng Ing tsun ai ga hpe Myu Lat, Ring Awng, Tsin Tsin ni n chye na nga ma ai. "Seng, Nang tsun ai ga n chye na nga ga ai le, hpa baw sanpoi mi?" Ja Seng Ing a ganu mani sum rai, "Ndai hku gaw e, gai gai, dung mu dung mu, angwi tsun dan na." Nga dung lahkum madun u ai. "Hkring mi naw yaw." Ganu Ja Seng Ing hpe: "Ma Seng, na ganau hpe woi la su." Ngu tsun ai hte rau, dawdap makau yup gawk gata de nna, leng kap ai dung lahkum hta num sha langai hpe htu sa wa ra ai, yup gawk gaw Myu Lat ni a shingdu maga rai nga ai. "Myu Lat, nang de gayin yu dat u, gadai rai kun?" N myit mada ai sha Myu Lat a n-gup kawn: "Seng..." Nga rawt tsap let, "Gara hku byin wa sata? Shi gaw gadai ta?" Nga mau taw nga sai. "Ngai gaw Ja Seng Ing a gana Ja Seng Lung she re, an gaw ma marun rai ga ai, bai nna ngai gaw wa hte maigan de nga ai ten law ai." "Seng, gara hku byin ai ma ngai n chye na mat sai le?" Myu Lat gaw dung leng lahkum hta dung nga ai Ja Seng Ing a lagaw hpe sa ahpum nga let san u ai. "Agu Myu e, byin na aten du nna byin mat ai ngu sha hkam la ra sai ga re." Dai shaloi shingdu maga de nna Ja Seng Ing gawa a nsen gaw: "Byin mat wa ai lam gaw ndai hku rai nga ai." Ngu tsun hpang wa sanu ai.

Ja Seng Ing a gawa tsun ai hta, Ja Seng Ing hte Myu Lat hpe myit n hkrum ai lam, Ja Seng Ing hpe wa lagu hprawn shangun ai laika sa jaw ai lam ni hpe chye kau nna, gawa gaw masha shap nhtawm, Myu Lat hpe hkap adup shangun ai lam ni, n myit mada ai Myu Lat hpe adup nna hprawng nhtang wa ai mawdaw hte nta nna pru wa ai Ja Seng Ing hpe adawt hkrup ai majaw, Ja Seng Ing lagaw hten mat ai lam, bai nna, maigan kawn du wa ai gana shawng Ja Seng Lung maroi nni masin nsi nga ai, ganau hpe jahten ai gaw Myu Lat a majaw re ngu matai htang na hku myit ai, lam mi gaw, Ja Seng Ing hte bung dik ai Ja Seng Lung hpe shara galai shang nna Myu Lat a myit masa hte nga sat nga sa hpe naw jep yu na lam, gana shawng hte ganu gawa jahkrup la nna Ja Seng Ing a myit hpe hkai jahpring ya na matu, Ja Seng Ing hpe yu matsan dum nna Ja Seng Ing a ga hpe madat ya ai lam ni azin ayang tsun dan nu ai. "Ya byin mat wa ai lam gaw, ngai gawa kasha hpe nau tsawra nna byin mat wa ai lam ni re." Ja Seng Ing a gawa nsa gaba shaw let tsun dan nga sai. Myu Lat zim rai mau dung mat nu ai. "Agu Myu, Seng hpe shawoi na zawn naw tsawra lu na rai?" Ja Seng Ing myiprwi si gapya let, shi a makau e mau dung nga ai Myu Lat hpe san nga ai. "Seng e, agu Myu Seng hpe tsawra ai ngu gaw myiman hpraw nsam hkumgawng shingyan hpe sha tsawra ai n re, Seng a prat hpa mi byin byin she tsawra le, ya pyi grau nna matsan dum ai, tsawra myit pyi grau grau jat wa sai." Myu Lat myiprwi si ni hte pya rai shi a sung htum ai salum ga si ni hte Ja Seng Ing hpe ahpum da nga sanu ai. Myu Lat hte Ja Seng Ing hpe yu nga ai Ring Awng yan Tsin Tsin mung ndum ai ta hkindun kau rai rau tsap nga ai hta n-ga, dawdap ting gabu myiprwi, mani nsen ni garu gachyi nga sai.