MADU HKRAI HTU LA AI NUMSUN HKU

MADU HKRAI HTU LA AI NUMSUN HKU

LAHTAW BRANG JA

Jahpawt manap nsin rim rim naw nga yang, htap manga re wut nta gata kaw mawdaw gaji langai sa jahkring tawn nna, mawdaw dumba dum shangoi dat sai. Nta htap lahkawng kaw yup nga ai Awng Mai mawdaw dumba ngoi ai hpe na dat ai majaw, madu jan a hkum shakrin kaw mara tawn ai hkra lata hpe hpai sharawt la nna wan hpaw dat ai hpang, nayi yu dat yang, jahpawt na hkying sanit du rau sai, nshung ta re majaw shinggan de myi garai nmu shi nga ai. Awng Mai madu jan a lum la ai lahpyen kaw nna pyan pru mat wa let tsun ai: "Lasa mang law, nde gashung ai gaw, nshung ta galoi lai na kun." Madu jan mung Awng Mai e rawt zawzang dat ai majaw, nmai yup mat nu ai. "Ya daini bai tsa chyaru hte dagrawng lu hkawm u yaw, madu a hkum hten wa na gaw ntsang." Madu jan myi da hku yu let tsun u ai. "Dai ngai chye nga nngai, nang laban hkum hkan tsang, ngai nnga ai shaloi nta kaw nchye ai manam hkum jashawn lu, masha ni jaw ai kumhpa ni nmai la ai." Awng Mai grai myit law ai zawn nga hkra madu jan hpe tsun u ai. "Chye sai, chye sai, shani shagu gaw ntsun ra na re." Madu jan grai nri wa sai. Awng Mai daini ginwang de sa yu kawan ra ai majaw grai jau rawt ra ai rai da nu ai. Awng Mai naw gaji yang grai jamjau lai wa yu sai. Awng Mai manga ning sha naw rai yang kanu nnga mat sai, kanau Naw Lum hpe shangai ai shaloi si mat ai re. Kanu nnga mat ai pang, Awng Mai shannau kawa hte sha matsan mayan rai nga kaba lai wa ma ai.

Awng Mai a kawa nta dinghku hta gade ru yak tim, gasha yan hpe jawng dingyang lung shangun u ai. Awng Mai dakkasu jawng sanpoi awng ai shaning, lapran tsang jawng lung taw nga ai kanau Naw Lum kawa hkrai shannau lahkawng hpe jawng nlu htu mat sai re chye nna jawng nlung shakre mat sai. Awng Mai dakkasu jawng lung ngut ai hpang kawa hte kanau hpe yu hkang na matu ginwang daw lapran tsang jawng kaw laika wa sharin u ai. Gade nna yang ginwang daw asuya rung de htawt sai, rung dap chyare shawng galaw ai hpang, ginwang daw up ningtau, ginwang daw up ni matut galaw nga ai. Awng Mai gaw shamyet shanat na shara nnga tim, shi madu a atsam dat nna shakut shaja ai majaw, adu aya nawt hte nawt rawt mat wa sai. Awng Mai ya rung dap langai na ningbaw kaba re. Asak sumshi ning jan mali shi ning hkran kap wa sai Awng Mai gaw hkum galu yang yang rai nhtawm, myi man loi galu nga ai kaw myikaw mun grai chyang hkra tu tsawm nga ai hte rau, ladi gawng gawng re majaw, maigan masha zawn mung she rai nga ai, shi mayu e hkumhkrang shakyang kam ai wa re majaw, hkum pung ni grai htaphtuk ai, shabyi hku nhka mun loi bai madat tawn nna shingkang mu nga ai majaw, shingni grai rawng ai baw masha re. Awng Mai rung dap na ningbaw ningtau naw galaw yang, bungli galaw kangka ai majaw lawu na magam lit gun ai ni shi hpe grai shakawn shagrau nga ma ai. Ga shadawn rung kaw machyi makaw re masha nga yang, Awng Mai sa kawan chyalu sha re, magam lit gun ai ni a dinghku hta maru mayak lam nga yang, shi chye jang grai lawan nna paran ya lu ai, sihkrung sihtan rai wa ai shara hta mung shi hpe shawng mu mada ai.

Rung ningbaw wa mung shi hpe grai kamsham nu ai, hpa sha galaw na raitim Awng Mai hte bawng yu nna she galaw ai. Awng Mai gaw ningbaw wa bungli gara gaw mai galaw ai, gara gaw nmai galaw ai lam ni yawng tsun shadum ai majaw, rung ningbaw wa bungli galaw shut ai lam nnga yu ai. Hpang e ningbaw wa lahta tsang de ningbaw bai matut galaw mat wa ai shaloi, Awng Mai hpe rung na ningbaw gaba sharawt kau da sai. Awng Mai rung na ningbaw gaba rawt mat jang, shi hpe sa tam ai masha mung grai law wa sai. Awng Mai hpe sa tam ai lachyum gaw gasha ni hpe bungli madun shangun mayu ai ni, Awng Mai kaw bungli sa hkam galaw la mayu ai ni rai nga ma ai. Awng Mai gaw masha dai ni hpe koi yan pyi ndang nga ai. Awng Mai shinggan de lahkawng masum ya sa hkawm la nna nta bai nhtang wa yang, chyinghka lam makau kaw masha langai dung du krung taw nga ai. Shi gaw tsa nang mat nna du krung nga ai rai daw ai ngu nna chyinghka lam hpaw dat jang, la dai ngoi rai rawt tsap nna: "Salang wa." nga nna hkan shaga dat sai. Awng Mai gayin yu dat yang, la dai hkum gaw marim mangam rai hkra galu gaba nhtawm, myi man pa nga ai kaw ana mung grai pa da nu ai, myi gaw sumlang si shachyat bang tawn ai zawn rai hkra gaba nna, masha hpe yu dat jang myi man kang ai she na wa nga ai, lagaw mung kaga lai galu jan ai majaw, nam maling gata hkan na tu sawng mat sai hpundu marawng zawn mung she rai nga ai. Awng Mai gaw krit hkrit ngu let: "Hpa re ta?" ngu jang, "La Rawng" dai wa tsun ai: "Salang wa, ngai tsun mayu ai ga shinggan kaw tsun yang manu ai, nhku de she tsun ga. "

Awng Mai gaw la dai hpa tsun hkyem ai re lam chye mat nu ai, hkum tsun sa naw ngu hkyem nga yang, la dai shawng shi a shingdu hku lai rai nhku de shang wa mat sai. Awng Mai ganing nchye di nna kan nang shang wa nu ai. La dai Awng Mai dung ga nnga tim, shi krai lahkum kaw wa dung nga sai. Awng Mai la dai dung ai makau na lahkum kaw sha naw dung bang wa yang, la dai Awng Mai hpe tsun ai: "Salang wa, ngai gaw nta galaw sha hkawm ai wa rai ngai law, ya ndai shara na myu shatsawm na matu nta nkau run kau nna nta ningnan bai galaw hkyem ai da nga ai na nna sa wa yu ai re, nta galaw na rai jang ngai hpe lit shagun marit, ngai galaw ai nta gaw hpa tsun shara nnga ai, madang dep ai krai re......" La dai Awng Mai shaga dat na matu pyi nnga hkra jahta taw nga sai. Jahtum e Awng Mai la dai hpe: "Bungli dai gaw ngai rung na ningtau ni hte naw jawm jahkrup yu nna she lu dawdan ai." ngu jang, la dai bai tsun ai: "Dai rai yang gaw nanhte naw jahkrup yu mu, bungli dai gaw ngai hpe she kam marit, nshut shai hkra galaw ya na." "La Rawng" dai tsawm mari rai mat wa sai. Awng Mai nsa gaba shaw let malut shachyi lu nna dung nga nu ai, shi gaw myu shatsawm na nta galaw mayu ai masha nau law nna mau nga ai.

Awng Mai malut htum wa nna malut daw naw tawn kau hkyem nga yang, "La Rawng" wa dung yu ai lahkum kaw nhpye chyang chyang maw maw re mi taw nga ai, shi gaw la wara nhpye malap da sai rai nga ai ngu hpaw yu ya yang, nhpye kaw gumhpraw tup hkra rawng nga ai. Awng Mai gajawng nna la dai hpe hkan shachyut yu yang nmu mat sai. Shi gaw shani ting manang ni hpe chye-nan gayat nna san yang she tsawm mari la dai a chye-nan nambat lu san la sai. Awng Mai la dai hpe tsun ai: "Nang na nhpye nye nta kaw malap kau da nga ai le. " "Salang wa nang walai shabying si mai mari sha na matu tawn da ai wa re law." "E lawan she sa la kau u. " "Shaloi gaw ma hpe htang mari jaw u." "Ma ni htang nau sha jang htang htawk ana lu wa ai." "Nta kaw tawn da u le, gumhpraw wa mi gaw nang hpe nchye htim kawa wa na re." "Nmai byin na re, lawan she sa la kau u, nang dai hku galaw jang gaw ngai hpe hkwi kau ai hte bung mat sai." La dai ganing nchye ngu mat nna gumhpraw nhpye sa nhtang la kau nu ai. Awng Mai ningbaw gaba galaw ai laning chyen mi dang lại sai, shi galaw tawn ai akyu nsi mu mada wa sai hku re, shani lahta tsang na ningbaw ni shakawn ai majaw, shi myit hta awng awng sha ngu let nta wa sai.

Nta kaw hpalap du tawn nna lahkum kaw loi myidi la na rai sam ai ngu yang, madu jan gaw yup jasu shut ai sharaw zawn nga hkra grut bang wa sai: "Ndai ta hka shabrai, wandat shabrai, ma a jawng lung shabrai re ni bang kau nna gumhpraw n lu mat sai, nang nsan ai hte nga nna labu gadun sha pyi nlu mari bu wa nga ai, manang ni zawn rai tsawm tsawm htap htap bu hpun nna mung nlu shakya hkawm yu, ningsha a jawng lung gumhpraw mung laning hte laning tsaw si wa, jawng kaba lung jang ganing di na ngu ai kun? ngai gaw maigan de jawng lu lung mat wa hkra shakut shangun mayu ai, dai kaw mung gumhpraw lang ra nga ai, masha ni ningbaw tai yang gaw lu su wa ai hkrai re, nang gaw galaw magang matsan magang, ya nye nu mung machyi nga ai da, nang myit yu u, loi li sha pyi n garum dat yang yi mai na kun." Awng Mai madu jan matsa ai ga na nna baw machyi mat nu ai, myit yu yang, madu jan tsun ai ga mung jaw ai zawn nga nga ai. Rung na ningtau ni Awng Mai hpe tsun ai, Salang wa e, nang jawn hkawm ai mawdaw nau dingsa mat sai, rung na myi man nnga ai hta n-ga, nang a arawng mung nlu ai. Awng Mai atsawm yu yu yang, shi jawn ai mawdaw dai mala la she rai mat sai. Shing rai, Awng Mai mawdaw langai mi mari jat na hku dawdan sai. Mawdaw dai rung na shi a ningtau langai mi mari ai re, ningtau wa gaw mawdaw manu tsayin ka shajan la nna, la shajan ai gumhpraw nkau Awng Mai hpe wa jaw sai. Awng Mai gaw mawdaw manu n jaw ai re hpe chye nga chyalu raitim, madu jan matsa ai ga hpe shai dat nna agatsi sha la gun kau nu ai.

Gumhpraw dai madu jan hpe wa ya jang, Awng Mai dawdap kaw wa lu myidi dung nga sai. Hpang e Awng Mai rung na mu htam gawk ningsa run kau nna grau tsaw grau tsawm hkra bai galaw kau sai, mu htam gawk ningnan galaw tawn jang, rung gata kaw tsawm daw galaw ra ai hta n-ga, nga chyai shara san tawn ra ai majaw, bawlung pa, tsingdu pa bai galaw tawn sai, dai ni galaw ngut tawn jang, rung na shat gawk mung run kau ra na zawn bai rai wa sai ...... Rung na galaw ra ai bungli law wa jang, Awng Mai a sumbu mung hpring wa sai. Madu jan mung grai kyin mat nu ai, nta na bungli mung nchyang lahkawng saw tawn nna galaw kau shangun nu ai, madu jan gaw shani shana gumhpraw hpaida hkrai da, shing nrai kara magyi, myi man gashin re hkan ten hkrai shama hkawm nu ai, shi rung de bungli nsa tim, kadai hpa nngu lu nga ai. Awng Mai ningbaw gaba tai ai kaw nna nta ga nwa yu ai grai na mat sai. Awng Mai a kanau Naw Lum shi jawng lung ai ten hta gahpu wa hpe gumhpraw tam shagun jaw na matu bum de gat rai wa tam ai shaloi, hpun kaw nna di hkrat ai majaw, lagaw maga mi layawt mat nu ai. Naw Lum lagaw layawt mat nna num la na grai yak mat nu ai, sumshi jan ning du tim num nla ai nga u ai, Awng Mai rung ningbaw ningtau naw galaw ai shaloi, na maga mi layawng ai num langai mi asawng hkungran ya sai.

Nta kaw kumshu hte mam hkai sha ai kaw nna jan ai hpa mung nlu hkai tawn ai, kumshu hte mam sha hkai sha yang gaw shat hkru sha ai chyu sha re, lu su wa na lam hte grai naw tsan nga ai. Gahtawng hkan na manaw manang ni bum de zhaugaw, sha-rin, kyenkaw, hpun re hkai nna gat sa tim sengke hte swi swi rai ma ai. Naw Lum gaw lagaw nkung mat ai majaw bum nlu lung ai, madu jan hkrai she lung share yu ai mi gaw gumhpan nlu kum nna Nga Dumsu e sha kau ya ai kaw ang mat sai. Naw Lum shawng de gaw dusat yamnga chye dawn ai, ya na Wa dut hkawm ai Wa lauban ni Wa dawn kau chyalu hkrai wa dut ya, hkauna hkan kumshu hkrai hkai kau nna Nga Dumsu mung nau nrem mat rai, Naw Lum dusat yamnga sha dawn hkawm nna shat kan nlu bau mat nu ai. Shingrai, Naw Lum gawa sharin ya ai rai marai shachyaw chye ai hpaji hte duu bai shachyaw sha nu ai. Awng Mai ningbaw garai ntai yang gaw kanau wa ganang ningra ai lam nmu mada ai, ningbaw tai jang kanau wa duu shachyaw sha ai bungli hpe grai nkam yu si wa sai, Awng Mai a madu jan grau nna duu shachyaw sha ai Naw Lum hpe grai yu kaji nu ai. Awng Mai hte jawm nga ai kaw nna madu jan nta ga de galang sha naw wa yu ai, shi gaw mare lam hkumpup anyawk ai, namdum tam yak ai nga jahpai masu nna nwa hkraw nu ai. Awng Mai shannau naw kaji yang gaw naisam langai sha ju sha tim, marai mi adaw daw naw garan sha ai, shannau hpa sha mi lu tim shada grai dum hkat ma ai.

Awng Mai kanau wa dusat yamnga dawn hkawm ai hpe pyi grai n yu lu nga yang, ya duu shachyaw jang shi a mying jahten hkawm ai zawn nawn nga ai. Kanau wa hpe duu hkum shachyaw sa, gumhpraw lang ra jang shi shagun jaw na ngu yang, kanau wa tsun ai gaw: "Ngai madu a ta hpaji hte she kan bau bungli galaw yang me, hpa rai nmai galaw na rai!" nga nna Awng Mai hpe ga htan ai majaw, Awng Mai ganing nchye ngu nna nta nau nwa mat sai. Awng Mai nga ai myu na nta galaw na matu lahta de na ni gumhpraw shayu dat sai majaw, Awng Mai rung na ningbaw ningtau ni hte kadai hpe galaw shangun na lam jawm bawng yu yang, yawng gaw "La Rawng" wa hpe galaw shangun ga nga ai hkrai rai ma ai. Awng Mai tak ai gaw la warawng dai yawng a nta nhpye "Malap" da ang sai ngu nna, ngai naw myit yu n-ga nga nna dup ginrat zuphpawng jahkring kau sai. Shana "La Rawng" wa Awng Mai a nta bai sa wa ra ai. Ndai lang gaw malut htuk lahkawng hte muk bu gaba lahkawng hpai nna sa wa ra ai. Awng Mai a nta mayen hte mang rai hkra sa jahta nga sai, madung gaw shi galaw ai nta nang nawn gaba wa tim ntsang ra, hka mawru wa tim nhkrit ra, latsa ni-tsa ning sha gaw marang nchye gayun ai nga nna jahta abyep taw nga sai.

Awng Mai gaw "La Rawng" malap kau da ai nhpye nhtang ya kau nna shut dum taw nga sai, ya daina nhpye pyi nhpye ai sa wa nna myit hta nau nkaw nkaw ngu da nu ai. La warawng dai grai na hkra jahta wa jang: "Nang galaw mayu ai bungli dai ya anhte naw jawm bawng dup sumru yu nga ga ai. " ngu jang, la dai gaw wa shi mali kra hkra mani let: "Naw dup yu mu, n tin ra ai, ngai mung n tin ai mi, nanhte bawng hkut jang ngai hpe shana marit." Nga nna bai jahta dung nga sai, Awng Mai nayi hkrai yu ai mu jang she wa mat nu ai. La warawng rai mat wa jang, madu jan gaw: "Bungli tam galaw mayu ai gaw nga, kumhpa ndai zawn san ai htang laban sha gun sa ai gaw, ngai yu yang maji ka she rai nga ai, ya na bai sa wa jang hkum hkap shaga sa." Matsat ning du sai gasha htang hpyi nna muk pung langai hpaw dat yu yang, muk nrawng ai, gumhpraw latsa je re hkrai gahtap bang tawn nga ai, langai mi kaw bai hpaw yu yang mung gumhpraw hkrai tup rawng nga ai, malut makai bai hpyan yu yang, dai kaw mung Isawmra mi gazu bang tawn nga ai. Awng Mai a madu jan gumhpraw dai ni hpe mu nna n-gup she mahka nan mat sai, gumhpraw hta hti yu yang, ta gari mat nna ya sha nai yang ga de hkrai tat jahkrat kau kau rai u ai, shaloi she madu jan: "AWh, la gaja gaw she rai nga ai." Nga nna gumhpraw hpe lahput kaw nkau shaw matep tawn hkra rai hti dung nga sai.

Awng Mai gaw madu jan gabu taw lawt ai hpe yu nna, mani sha sum sum rai dung taw nga sai. Awng Mai a ta kaw chyai ai gumhpraw gaw lani mi gadi lam she gazik nga ai. Awng Mai mung lani hte lani grai nrau si wa sai, nta kaw ma yannu hte shat ma mi jawm sha na ten pyi nan nlu mat nu ai, galang mi hkawm mat wa jang shata numra hkawm ra ai, daini ndai kaw zuphpawng hpawng, hpawtni wara kaw sa jep kawan rai, hawtel hkan hkrai yup hkawm nna, nta kaw wa yup ai ten pyi ranrau she re. Madu jan gaw madu wa gumhpraw sha wa jaw jang ganang nga hkawm tim n-gawn mat nu ai, Awng Mai a la-hka kaw nna hkawt gumhpraw yawng shi she manat nga ai re majaw, nta kaw shannu lang na gumhpraw gaw ntaw nma she rai nga ai. Lahkawng ning lai ai hpang na gaw-nyen hta Awng Mai nta ga de yu wa hkyem sai. Awng Mai nta yu wa hkyem ai da nga jang, hkan nang mayu ai masha grai law ma ai, madung gaw nta galaw ai lauban ni, du rawt mayu ai ni, Awng Mai nga ai rung kaw bungli shang mayu re ni hkrai rai nga ai.

Madu jan chyu sha nkam yu wa nu ai, madu jan tsun yang nta ga na Wa hkali kawa ai ndang hkam nu ai da, kanu n yu wa jang gasha mung nhkan nang mat sai. Awng Mai nta de yu wa ai shani, shi a hpang kaw mawdaw gaji shi jan ting hkan nang ai, shanhte gaw mawdaw hte si mai si maw kaw nna hkawt htaw yu wa ma ai. Nta de Awng Mai a kawa hte kanau Naw Lum shannu wa ni mung wa langai mi sat hkra rai la nga masai. Shanwa n myit madawm ai gaw masha shade wa yan pru wa na n shadu nga ai, Awng Mai ni du shang wa jang, Canau wa manang she saw la kra shat hkap shadu jaw kyin bang wa sai. Awng Mai kaw hkan nang ai ni mung sha hpa ni htaw yu wa ai hta jan nna, dingla wa hpe tsa gaja, malut gaja re ni wa jaw ma ai. Naw Lum a gasha pe mung labu palawng tsawmra ra ahkyak ai hkrai wa jahpun ma ai. Kawa hte Naw Lum gade ningdang yu tim, shanawng hkrai shanawng nga jang, Awng Mai hpe mada yu yang: "Manang ni a tsawra myit rai nga ai, la tawn da mu le." nga jang she la tawn da sai. Awng Mai nta yu wa tim nta kaw pyi galoi ndung nga nu ai, mare salang ni shi hpe shat sha ga nga nna shaga mat wa nhtawm, mare kaw lam galaw ra, bawlung pa galaw ra re lam jahta dan nna garum hpyi ma ai, mare na gahkau ni, manang ni ru yak ai lam, galaw mayu ai lam ni hta hpaji jaw na hku hpyi ma ai, Awng Mai gaw "Um, galaw na re, galaw na re." nga nna krai wawm ya u ai.

Awng Mai masum ya nga yang, kanau Naw Lum a hkungran poi shani pyi dai daram nhkik ai, hpung mi wa mat jang hpung mi bai shang, nkau mi daw sha ngut jang, nkau mi bai sing dung nga rai, masha hkrai daw nna baw she sin mat sai. Htingbu ni yu manawn nna Awng Mai a kawa hpe: "Nanhte a lupba gaw lup jaw sai ga re, ningsha myu gaba de ningbaw galaw nna nanwa ni arawng lu ai hta n-ga, anhte jinghku jingyu manaw manang ni mung myi man pa sai." Kawa gaw ga dai na jang "He, he....." nga nmai mani tim mani masu nga ai. Kanau Naw Lum hpe bai yu yang mung pawt laput ai lai lang wa sai. Kawa gaw gasha Awng Mai hte atsawm naw jawm dung jahta yu na ngu tim, masha nau mawng ai majaw n mai byin hkraw nga ai. Shaning ningnan shang ai hpang lahkawng ya shani Awng Mai ni ninghpu she dun hkra bai mawng mat wa sai. Awng Mai maigan de tsawmra na hkra sa jep kawan hkawm la nna bai du wa ai hpang, ginwang myu hkan grau nna htap htuk hkra gaw shatsawm na matu, chyingdawng nam hkyen ai zawn rai hkra galaw bang wa sai. Shi bungli galaw hpang wa jang, nta mung galoi nwa, hawtel hkan yup hawtel hkan sha rai, galang lang gaw garen ai zawn mung nga wa sai. Shing rai jang shi gaw dai shara hkan na ningbaw ni hte mahkawn hkawn hkawm, num gasha ni hte jahta abyep hkawm rai ten shama u ai. Awng Mai gaw num ni a bu hkrawng gata hkan sha gaw nau n gadawng bang yu ai ngu tim, ginwang langai mi kaw du ai shaloi num chyinghtep kaw dau mat nu ai. Lana de mi hta, Awng Mai lauban langai shat sha saw nna shat seng kaw sa yang, lauban dai woi sa wa ai num sumpum mi kaw na num gasha langai hpe grai yu tsawm dum taw nga sai.

Num gasha dai hkum gawng shingyan htap htuk taw nga ai hte rau, myi man mung atu asan sha rai nga ai kaw, myi gaw wak wak rai, tsaw tsaw re ladi ndaw gata na sailen nten mung gahtawk mata dat yang dwi la na zawn rai nga ai, loi chya jahkye tawn ai kara gaw gahpa kaw du hkra madat tawn nna, loi nhkring ari dat dat re hpe Awng Mai lagu azi yu taw nga sai, shi a krawn rawn sinda mayen tsawm, shinggan de dawng kra ai myi man hte ta lahpum shan ni gaw nau praw tu mayawn tsawm nna machyi sa dung tim gashawt taw na zawn she rai nga ai. Num gasha dai Awng Mai a man ang de na shat hpun kaw dung nga nna ga mung nau nshaga nu ai, galang lang Awng Mai hpe mani sai rai yu dat nna myi wak wak re bai myi grip dat rai jang, Awng Mai gaw hkum na nra sawng htum mat nna hkum shan gaman rai mat ai zawn nga hkra kya paba si wa nga ai. Awng Mai num gasha dai hte grai shaga hpaw mayu ai raitim, lauban wa shi hpe lungseng gat lawk galaw na shara langai san ya na lam hkrai jahta nna, num gasha dai a mying ganing ngu ai re mung nshachyan dan hkraw nu ai. Awng Mai gaw lauban wa tsun ai ga hpe "Um" ', "E law" ngu nna hkrai htan mat nu ai, shi gaw bungli lam jahta ai kaw myit nlawm mat sai. Num gasha dai shinggan pru na nga nna rawt mat wa ai shaloi, num gasha dai ga-wun lahput lahta kaw sha du ai bu tawn nna mandang shachyai let hkawm mat wa jang, nta na jan a makru lit gun na zawn re labawp hte hkama yi sa ai hpang na lahkap zawn re hpe shai dat nna, ahkup ahka she nga si wa sai.

Shat sha ngut wa jang lauban wa Awng Mai hpe tsa hkungga jaw ai nga nna, num gasha ni hpe shu bun dat nu ai. Num gasha ni gaw langai hte langai rai Awng Mai hpe tsa sa shagwi jaw ma ai, shaloi she lauban wa shachyan dan ai kaw chye ai, num gasha dai hpe Ali ngu ai re da. Awng Mai myit hta nau gabu mat nna tsa mung shawoi na hta tsawmra lai hkra lu kau dat nu ai. Tsa lu ngut ai hpang gaw mahkawn hkawn ginsup ka rai ma ai, shaloi Awng Mai gaw Ali hte krai ka noi mat sai, dai nau nkam shaga ai zawn re Ali gaw shaga wa jang grai myit su myit kawp ai zawn nga kra jahta chye nga ai. Jahta nlaw ai zawn naw nga yang, wa ten du mat nna, Awng Mai Ali hpe gahtap nna bai shakram kram di da nu ai. Hpang shani du yang, Awng Mai Ali hpe shingran krai mu nna yup n hkru sha n mu wa nu ai, shi gaw tsa nang mat nna Ali a yup shara hte chye-nan nambat nsan kau ai hpe grai shut dum nga ai. Ali hpe woi sa wa ai lauban wa a chyenan nambat chyawm chye ai re gaw, num gasha ni a lam san na gaw bai gaya dum rai, shani hte shana galu la ai zawn chyu ngu da nu ai. Lahkawng ya din ai hpang, lauban dai ginsup ka chyai ga nga nna bai saw sai, Awng Mai myit hta awng awng sha ngu let sa wa yu yang, lauban wa Ali hpe woi sa wa nna grai lagu gabu kau sai. Lauban wa gaw lungseng lawk galaw na hte seng nna bai jahta bang wa sai.

Awng Mai lauban wa hpe lawan shabawn kau mayu nna: "Hpawtde ngai kaw sa wa nna sen htu u." ngu dat sai. Lauban wa grai gabu mat nu ai, tsa gawm gaba mi dagrawng lu kau nna, Ali hpe: "Dai ningbaw wa hpe atsawm yu hkang u lu, manghkang pru jang la-hka dawm kau ya na!" Ngu kau da nna pru mat wa sai. Ali hte Awng Mai shan hkrai ngam nga ta sai. Shan gaw ginsup mung n ka mat sai, mungkan masa lam kaw nna nta dinghku kaw du hkra jahta wa masai. Awng Mai gaw Ali jahta dan ai kaw chye lu ai, Ali gaw kaga mungdaw na masha rai nu ai da, nta kaw gahpu langai hte kanau sha nga ai, kanu machyi nna shaning ting ting yupku kaw hkrai galeng nna tsi hte bau ra mat sai, gahpu wa loi manya hpundi ai majaw ya du hkra num garai nla ai. Shi gaw nta masha ni hpe bau ra ai majaw ndai ga de bungli sa tam galaw ai re da. Awng Mai shi naw gaji yang shanwa ni matsan mayan rai nga lai wa ai lam hpe myit dum shingran mu nna, Ali hpe matsan dum ai hte rau grai myit kap mat sai. Dai shana Awng Mai hte Ali gaw hawtel kaw du hkra jahta mat wa sai. Awng Mai a kawa gaw gasha masha sumpum mi woi nna yu wa ai hpang, shani shana myit law taw nga sai. Shi gaw Awng Mai a hkawm sa hkrun lam laklai shai mat wa nga ai hpe mu mada nga ai. Shi myit lu ai gaw: Ngai sha hpe lawan ntsun shadum yang gaw, lani mi na nhtoi gaw hkrap myi prwi hte hka bra ra na re. Kawa myit yu magang nga nzim wa nu ai, nta na bungli gasha ganam ni hpe ap kau da nna, myu gaba de lung wa sai.

Dingla wa myu ga garai ndu yu ai majaw mawdaw yu ai hte wa dam mat sai, Awng Mai myu kaw mying danhkawng nna chyu sha rai sai, jan du hkra dam kau ai hpang hpyen la ni Awng Mai a kawa hpe nta kaw du hkra wa sa da sai. Dingla wa du lung wa yang Awng Mai hte nhkrum hkat nu ai, Chye nan gayat yu yang grai kyin nu ai da. Ganam jan gaw dingla wa lung wa nna mani sum rai na ten pyi n nga mat sai, dingla wa dung yu ai lahkum hkan gatsut hkrai gatsut, ganang du yang ganang sha-ji prat bang na nka hkrai hkan ladawn, dingla wa lang yu ai hka wan mung lahkawng masum lang htu gashin kau nna lang rai chyum taw nga masai, yup shara mung dawdap na lahkum kaw sha dagaw shangun re hta nga, dingla wa hte atsawm nga nna mung nshaga yu nu ai. Dingla wa gasha hpe masum ya la yu yang, ganam jan a myi hpraw myi lau ndang hkam wa nna bai nhtang yu wa mat sai. Awng Mai nta wa yang, kawa hpe n wa mu sai. Madu jan gaw ma ni hpe dingla wa hpun ai hpun nba lawan hkrut kau nga nna pareng rawng nga ai, Awng Mai lahkum kaw sha naw dung bang wa yang, madu jan tsun ai: "Ninghkau La wa jawng kaw nna pru wa sai, sanpoi galang naw san jang she bungli mu tam na re da, ninghkau wa shani shana gasup hkrai she mak nu ai, sanpoi bai san yang gaw awng na nshadu ngai, ninghkau wa hpe nang nga ai rung kaw hprai bang dat u le." Madu jan shi a makau kaw dung nga hkra rai tsun u ai. Awng Mai grai myit yak la ai zawn nga hkra tsun ai: "Sanpoi nshang yang gaw bungli ganing di tam na law." Shaloi madu jan gaw waji she kra hkra pawt wa sai: "La nang hpe gaw hpa nan ndi ai hku re, ninghkau wa hpe bungli sha pyi nlu tam ya ai gaw, ningbaw raitim bawnu gate mi pyi nrawng ai, gumra lawze hpa, majoi mi maidang tu ai chyu sha re."

Awng Mai gaw she ma a mat nu ai, ganing nchye di nna: "San poi shawng shang shangun nna, hpaji bai daw yu na re." "Nye tsaba a gasha mung hpaga ga mayu nu ai da, arang gumhpraw nlu nna aput hkawm nga ai. " Lama mi tsun ngut sai ngu jang, lama mi bai kra wa wa rai Awng Mai masin pawt wa sai, "Gumhpraw nang she manat nna mi, ningtsa she re gaw, hkoi ya u le. " "Shi hkoi mayu ai gaw gachyi gapu sha nre ai, nang a ta kaw na gumhpraw naw gan hkoi ya u. " Madu jan n yak n hkak sha nga nna tsun dat sai. "Nye ta na gaw asuya gumhpraw she re, ganang mai shamawt na, gumhpraw dum de sa hkoi lang mai nga yang mi." Awng Mai tsawmra na gajawng kau sai. "Shi hpa pyi nlu nga yang gumhpraw dum ni hpa rai hkoi ya na, lahkawng masum ya sha gan hkoi lang ai da, gumhpraw awng jang an hpe nta gaba langai mari ya na nga ai. Yak ai kaw shada gan garum hkat ai masha hpe she jinghku nga ai, nang myit yu u. " Awng Mai gaw gani jan gade daram matse ai lam ni du hkra bai myit dum, shi a ganam ni hpe n garum la jang, Awng Mai shi hpe mahtang myit nrawng ai ngu nna, nju ndawng taw nga na hpe myit du nhtawm: "pawtni ngai kaw sa wa yu ngu. " Ngu jang she madu jan ga shaga tim kya mat wa sai. Dai hpang, madu jan tsayin buk la tawn hkra rai, kadai dai kumhpa sa jaw nna bungli jahkrup ya nga ai lam ni tsun dan, jinghku ni gumhpraw hkoi ya marit nga nna hpyi shawn ai lam hkrai hkap ahpu dan nna, Awng Mai baw she na machyi mat sai. Ndai wa gaw shat seng hpaw na nga, wara jan gaw buhpun palawng dut na nga, arang gaw nlu ai, Awng Mai hpe kam sai ga re nga ai hkrai rai ma ai.

Awng Mai nkam madat si wa nna, "Yawng hpe hpawtni ngai kaw sa wa yu na da ngu u." Ngu dat jang, madu jan mani sum rai, matsing buk gahtap tawn kau nna, Awng Mai a du kaw nawn taw nga sai. Loi mi hkring rai jang, madu jan tsun ai : "Anhte a nta ndai nau gaji la ai hta nga, htingbu ni pe ku laja ai, nta kaga galaw rawng ga. " Awng Mai madat yu yang madu jan tsun ai ga jaw ai zawn nga nna, nta galaw na lam bai jawm bawng hkut tawn sai. Awng Mai manu mana hkik ai nta htap masum re galaw ngut tawn sai, manu gade daram htat ai gaw shanla chyu sha chye na sai. Dingshawn poi shani nta buga na ni manu mana yan lung wa ai hta nga, myu gaba hkan na nshaga dum ai ni du hkra sa wa ma ai, madung gaw madu rung dap na ni, shi kaw garum hpyi ai rung dap gasa ni, hpaga lauban ni rai nga ai, dingshawn lai mat tim hpung hte hpung rai nna naw sa wa ai majaw, daw jaw daw ya ai ni pyi myi man she tsit mat sai. Dai shara kaw gumhpraw tsayin hkap matsing ai ni mung ta layung she bum hkra ka matsing nga ma ai. Gumhpraw gaw nhpye kaw tup mat nna nhku de wa htawk makoi kau tim, ya sha nrai yang bai pring mat mat rai, shat gan sha la na ten pyi nu nga ai. Jahtum e, matsing buk kaw n ka matsing lawm ai ni du kra hti yu yang, shan nta galaw ai manu hta sha gaw jan hkra lu la sai. Awng Mai nta nga yang, madu jan a jinghku ni shani shana nta kaw krai sa majaw rawng nga na, gumhpraw lang ra ai lam krai tsun jang, laban du jang bungli kaw jahpai masu nna Ali kaw prawng yu wa mat sai.

Ali gaw Awng Mai du yu jang labu palawng hkrut kau ya, shat si mai mu mu mai mai shadu jaw re majaw, Awng Mai gaw lamu hpatwat kaw singgoi goi ai zawn she nawn nga ai. Awng Mai gaw Myen mung hkran de hpaida da ai da nga jang, nhpye kaw gumhpraw hte matsut gun nna Ali hte sa wa masai. Shana nsin rim nga wa kaw nna, hpakkale hpaida byep kaw dung bang wa ai rai yang, saboi na gumpraw gaw galang gaw ndai de majaw wa, loi mi kring jang wara maga bai bum taw mat rai, masin hte lawk nga kra gasup taw nga masai. Jahpawt de samram ninghtoi htoi wa ai hte Awng Mai a nhpye kaw tup hkra bang tawn ai gumbpraw ma mat masai. Shan shada yu yu yang myi man she mut hkra gasup kau sai. Awng Mai gaw Ali hte ganawn na wa jang, Ali hte ndi nhka rai hkra ra machyi mat nu ai, shan rau sha pani panyen rai nna krai hkawm jang, Awng Mai Ali hpe kam sham nga ai majaw, shi a gumpraw mahkawng lakmat Ali hpe makoi tawn shangun nna lang ra jang Ali pe sa shaw shangun rai u ai. Ali gaw Awng Mai a gumhpraw lap mi pyi nshamawt ya yu ai. Shing rai, Awng Mai gaw manang ni mayun kumhpa ai gumhpraw re mung Ali kaw krai tawn da u ai. Lana mi Awng Mai nta du wa yang, madu jan myi man grai ntsawm hkra rai shi hpe hkap yu u ai. "Hpa wa byin wa sa ta?" sha naw ngu dat yang, madu jan a ta layung shi a ladi kaw ganoi hkra hkra madi tawn let matsa dat sai:

"Lasa si na la nang gaw, bungli ra ai nga masu nna na lashi latung jan kaw sa wa mat i! Daini ngai hpe manang ni ntsun dan yang gaw, ngai hpe galoi du hkra yip tawn na ngu ai re ta? Ngai nang hte shi jahku ning kaw nna ra hkat sai, na nta kaw dung na lahkum pyi ntaw ai kaw ngai shang wa ai re, matsan mayan rai nde nlaw ning jawm nga lai wa yang, ya daini lu su wa jang ngai hpe gabai kau mayu i! Ngai ningbaw ni hpe sa shawk na." Awng Mai grai rai dum ai lai hte tsun ai: "Sa shawk yu su le, ngai gadawng mat jang, ya na zawn rai nga pyaw na hkum shadu, nang mawn sumli hkawm na gumhpraw kadai jaw na, hpaida da hkawm na gumhpraw kadai nkumhpa ai, nan nu hkrai mau rawng nga na chyu sha re." Madu jan gaw ganing n chye ngu mat nna hkrap ashut taw nga nu ai. Awng Mai gaw madu jan hpe bai nyem bang wa nu ai: "Hkum hkrap sa, ngai nang hte hka na ngu nna galoi tsun yu ai rai, nang she nta na dinghku kanu, daw hpum daw nu rai nga yang me, le de na jan gaw nta tsan, kanu kawa hte tsan re ngu nna woi yup ai she re, rai sai, rai sai hkum hkrap sa." Madu jan hkrap jin nna wa yup mat nu ai. Ndum shami nga yang, Awng Mai salang galaw ai ten manga ning hpring mat wa sai. Rung ningbaw galang bai lata na ten du sai majaw, ningbaw tai nga ai ni yawng gaw madu kaw bai ang hkra nga nna shara magup naw du krung hkawm ma ai. Awng Mai mayu e lawu lahta du ni hpe "Hkungga daw jau" tawn dum ai majaw, ndai lang bai lata tim shi kaw ang na re ngu nna, ningbaw lahkum kaw nna di hkrat mat na hpe nhkrit nga ai.

Nmyit du ai lam gaw Awng Mai jahtum e adu aya hkrat mat sai. Awng Mai gajawng mat nu ai, lawu lahta grai gahkrang yu tim, nlung lapran kaw shachyat tawn ai mailak zawn, baw kau na yak mat sai. Awng Mai adu aya hkrat mat ai hte rau, shi hpe shawk ai laika gaw mangai ta na hpun lap run hkrat ai zawn rai hkra mawng pru wa ra ai. Lahta de na ni sa jep yu yang, Awng Mai manat ai kaw na gumhpraw wan lam ganang lang kau ai re n chye mat nga ai. Awng Mai gaw jinghku ni hpe gumhpraw lawan wa kau ngu nna shadut dat jang, jinghku ni ahkup ahka re myi man madun let, hpaga ga ai kaw lang kau nna jahkring sha nlu gahkyin la mat sai nga ma ai, bai shadut jang makoi mat masai. Awng Mai gaw Ali kaw makoi tawn ai gumhpraw hte chyen kau sha pyi gapa kau na rai daw ai ngu nna Ali hpe tam yu yang, dai mung shingran gatsi mat sai. Awng Mai lahkawng masum ya laman e sha kara she hpraw hkra myit law mat nu ai. Shi naw myit law taw nga yang, lahta tsang de na ni shi gumhpraw mayun lang kau ai sakse mu tam sai majaw sa rim la kau sai. Madu jan hpe bai jep wa jang, tsing sat tsi lu la nna atsu ga de shawng hkawm mat wa sai. Awng Mai gaw htawng gata kaw myiprwi si mayut let rawng nga sai.