NGA GAM KABA

NGA GAM KABA

HTU LUNG

Naw kaji ai shaloi, lani mi hta, Ba gaw Bawk yan Ji hte ngai, an nau mi masum hpe hkauna pa de shi galaw tawn ai Nga nawng kaw Nga sa hkwi shangun ai rai yang, annau ni Nga rawng dai kaw Lapu kaji langai hte Nga gam kaba langai htawk shapraw ga ai. Ngai gaw dai daram kaba ai Nga gam hpe nambat langai lang mu ai ga re, gaja wa Nga gam dai gaw ya yang na gat hkan dut ai Nga gam ni hte shadawn yang htam shi daram kaba nga ai. Hawzawshe prat hta, yinam ta na lani mi kaw anhte Bumkawng gahtawng ni Gumra wahpung kaba kaw na Gumra wala langai machyi si mat sai. Anhte gahtawng ni Gumra shan kadai nsha ga ai rai yang, Ba gaw nta masha law nna, simaw simai ni mumu mai mai shachyip sha na mung ntai, masha nau law nna, hpa mung nlaw sha ai zawn chyu nga nga ai, dai kaw yinam ta shang wa ai kaw nna, yinam bungli li la ai hta simai n-grung nna hkum n-gun yawm nna, nta masha yawng a man nsam pyi tsit mat ma sai.

Ba gaw ya hte sha shan kut nna garap ntsa kaw mara tawn ai Nga dawnhku katawk daw ju shabawm sha yu tim, ahkum bai wa ai zawn nnga nga yang, ang shaa sha Gumra dai gan machyi gahprup si mat nna, galoi pyi Gumra shan nsha yu ai raitim, shan hkrai she rai yang me, hpa majaw Gumra shan nmai sha na rai yi ngu myit nna, Gumra rem ai Miwa Lau Yang wa hpe Gumra mang dai hpya sha kau na hku sa bawng yu u ai: "Law, an chyau Gumra chyasi dai jawm hpya la ga law, sha naw si ai mi, hpa gaw nra na re. Gumra mang jawm hpya la ga nga jang, shan n-gatut ai grai na mat nna shan kut nga ai Lau Yang wa mung shan sha mayu ai gaw myi she kaba wa nhtawm, mai ai ngu hkraw ya sai hte rau, shan lahkawng Gumra mang dai jawm hpya la kau masai. Ba gaw Gumra shan sumpum mi hpe nta de hpai wa nna, jum sha chya kau di, shat dap garap hte dawdap garap hta wa hte shajoi noi jahkraw tawn nu ai. Anhte gaw kadai mung shan dai ni hpe yu matsat ai hkrai rai nna, garap kata ting aninglsing in di shajoi noi tawn ai Gumra shan dai ni hpe mu dat shagu akraw pyi awn awn nga wa wa rai ga ai. Lani mi na shana de ningrim rim wa ai shaloi, mare masha ni htingbu lam ten hta, mare ka-ang na Labang Tu gaw la manga kru mi hte anhte nta de sa lam chyai ma ai.

Dawdap garap kaw noi jawng ai garai nhkraw lu ai shan ni hpe mu jang, Labang Tu gaw hpa shan re ni nga nna san ai majaw, Gumra shan re ngu jang, nau ju nna mare masha ni "Chyaju" ngu ai amying lu ai Labang Tu gaw, ya hte shan kut kut ai jinu pyi gahpret sha na zawn ngu nga nngai nga nna, shan hkyep langai mi abrut di la nhtawm, wanmang kaw kabai bang nna ju sha bang wa sai. Shi mu la ai zawn san nna sha dan ai majaw, shi hte rau sa wa ai kaga la ni mung shan kut ai hkrai re nga yang, sha mayu yu ai mayen she maut mat masai, shing rai, kadai mung kadai ra ai hku ju sha bang wa masai. Annau ni mung masha ni pyi grai mu la ai zawn di ju sha dan nna hkan ju sha yang, shan dai gaw grai mu ai she rai nga hka. Dai kaw nna anhte matsat ngu ai nchye ai Gumra shan dai ni hpe ya n ya wa ju sha nna, gade ya nrai yang ju sha shama kau saga ai. Shan hpya ngut ai shaloi Ba gaw shan grai naw kap ai Gumra nra hpe ra myi kabai tawn yang yat manam taw na tsang nna, shi htu tawn ai Nga nawng kaw sa kabai bang tawn da nu ai. Hkauna ma hkra kaw na hka yu lajang ai Ba gaw bungli sa let Nga nawng grai galaw tawn nu ai. Anhte nta gaw masha jahpan law tim bungli dang ai masha gaw nlaw ai majaw, kungfun naw nna shaning htum jang wa gumhpawn sawn ai shaloi amam hte gumhpraw gachyi chyi sha lu garan la la rai ga ai. Ba a kasha Ma Naw gaw simai lata nna, shat da shagu nawhpu nlawm ai shat nsha hkraw hkraw re hte maren, Ba gaw Tahpying gat na naw hpu hkrai sa mari sha yang gaw dang mari sha nre ai ngu, Prang yang hkauna pa na na-dap matu na lamu ga gachyi mi man ai shara kaw nawhpu yam mi sha mi lu yang lu ngu, lasi sa htu hkai dat jang, hawzawshe kaw zuphpawng hpaw nna Ba hpe arang madu masa lam hkawm ai ngu nna bai daru sharin dat sai.

Daru sharin ai hkrum yu sai Ba gaw nta masha law ai hta n -ga, malu masha gadawn, simai mu la re hpe nri nna, kaning rai yang rai ngu myit shatawng let nga nawng krai tam galaw mat nu ai. Ba Prangyang kauna pa na hka hkawng langai a makau kaw galu de lalam lahkawng jan du, pa de lalam mi jan du ai Nga nawng langai mi htu la nna, Gumra nra dai ni sa htawm bang, kauna pa makau kaw tu ai wagat Kawa ninghkri shabawn masum mali sa gat gahtam shabawn bang rai nna, Nga nawng de hka hkawng na hka loi bai shalwi bang rai, hkum hkra galaw shangut kau da ai hpang Sam kaban sha gup kau rai gabu myit awng awng sha nga let nachye sha hta hpai kau rai nta lam de yawng mat wa sai. Shi a myit hta Nga nawng dai kaw hka hkawng hkan na nga ni nawng na gumra shan shang sha mayu nna, yan shang wa jang Nga law ai hta nga grai kaba lawan na rai nga ai, dai shaloi, galang ta sa htawk jahkyet dat jang gaw, Nga nka she pring hkra lu la na rai nga ai ngu lagu myit let, ba ai pyi nna ai nta kaw hkawm du mat wa nu ai.

Ba gaw shi Nga nawng galaw tawn ai lam kadai hpe pyi ntsun dan ai sha, shani shagu hkauna hka yu let Nga nawng dai hpe mung sa lai yu kawan kau da da rai nga u ai. Aten gaw lani hte lani lai she lai mat wa, ndum shamyi naw nga yang mangai ta de gale mat wa sai, Ba gaw Nga nawng makau na na-kawng kaw sa tsap nna yu yu yang, Nga nawng na Nga ni wa shamu gadap dap ai ahka gabrawng ai she mu mat sai, Ba gabu bu ai mung masin pyi htap lap dukdak ai she na mat nu ai. Dai ten hta Ba gaw Nga nawng dai grai sa htawk mayu ai re she, loi ya mi naw rai u ga, Nga grau kaba jang she sa htawk hkwi la na ngu nna, Sam kaban sha gup kau, nachye sha sharawt hpai kau rai nna bai hkawm mat wa wa di u ai. Loi ya mi bai din ai shaloi, lani mi na shani shingtung hta, Ba gaw dawdap na kauda kaw wa galeng dat let Bawk hpe tsun ai: "Ma Bawk, le Prang yang hkauna pa kaw, Ba Nga nawng langai galaw tawn ai, nan nau ni masum Nga naw sa htawk hkwi la masu. " "Gara yang kaw re rang?" Bawk san ai. " Dai dai Gareng ni a hkauna matu kaw re, nan nau ni dai Kadung hpun singgat hka hkawng hku hkan hkrat wa jang sa mu ai Nga nawng nan re, Nga nawng kaga nnga ai gaw e. " Nga hkwi nga jang, anhte gabu si wa saga ai, grau nna Nga nawng kaw na sha sa htawk na re nga jang grau gabu mat saga ai, shawoi annau ni gaw Nga manaw na hte hka pat kau nna Nga htawk hkwi na hpe kam dik ai ni hkrai rai ga ai. Bawk gaw Ji hpe gumhpan hta lang shangun, ngai hpe gaw Nga nka hta gun shangun, shi gaw nachye hta hpai lang rai, anhte masum hte Prang yang hkauna hpa de gakat ru mat wa saga ai.

Hpu Ba a Nga nawng kaw sa du yang, masa nau nhtuk mat ai lam sa mu saga ai: Nga nawng dai ningnan sha htawk kau yu sai ahka hka nga la nga ai. Rai tim, anhte gaw hka pat kau nna kawa ninghkri shabawn shaw kau, nra hta shaw kau rai, hka htawk bang wa saga ai, ngai hta grau kaba nna n-gun ja ai Bawk yan Ji gaw ngai hpe Nga nawng makau na hkarang ntsa kaw shatsap tawn nna, shan gaw sa hka she gama hkra hkra gahti galai rai ahka htawk shakut taw nga masai. Hka htawk kau ma nna nga manaw bang wa yang, hkumpup hkan manaw she manaw tim hpa nmu manaw sai, Ji chyawm me gaw Lapu ka ka san ai langai manaw gajawng shapraw dat sai, dai shaloi, Bawk gaw: "E Ji Bu rang, Nga riawng ndai kaw na Nga ni hpe gaw lapu dai e sha kau ma sai wa rai kun yi?" "Masha ni e sa lagu htawk sha kau sai rai nga ai mu, Lapu dai mate sha law ai wa nga gade lu sha na rai?" Shan naw shaga nga yang, Bawk a ta kata hku "Hpruk hpruk hpruk" nga nna ga hkumpup pyi shan a man hkan sinda hkan she gamang bun hkra ngoi pru wa ra ai. Hpa Nga re nchye nna, Atsawm yu yu yang hkumpup Nga Nga gam kaba langai mi she rai nga ai, ngai gaw Nga gam dai nau kaba nna gabu marawn dat se ai: "Wwi, Nga kaba dai anhte ada mi law sha sai law!" Bawk ngai hpe matsa dat ai: "Na abaw mi nai yang gaw, dan nga ai baw nre ai, aga nat ai re le , nam pum shang wa ai!" Ngai gaja shut dum rai let hkrit hkrit san nna Nga nka hta shan e gumhpan kaw jawm hkrau bang la ai Nga Gam dai hkap ja bang la nna, aga lahkun mi pyi nshaga gwi ai tsap taw nga ni ai.

Dai shani annau ni Nga gam dai langai sha lu hkwi la ai kaw lai nna, Zaibru htu zawn san ai nga kaji langai sha pyi nlu hkwi la ga ai. Rai tim, Nga gam kaba ba ai, dai daram law ai Nga gam gaw ngai mung nmu yu nna, Bawk yan Ji mung garai nmu yu ma ai da. Nga kaga nlu hkwi la tim, Nga nka kaw ganoi zut rai hkra kaba ai Nga gam langai lu hkwi wa ai majaw, myit hta gabu nma ai hta n-ga, Nga nawng sa lagu htawk sha kau ya ai kadai sa-wa re mung nchye, gade de law ai Nga hte lagu hkwi mat wa sai mi re ngu, Ba hpe wa tsun dan jang, Ba gaw hkawng tin tin kau sai rai nga ai, Nga shingnoi gade mi hkwi gun sha mat wa masa nga nna grai pawt mat nu ai. Shana de na shat da hta, Nga gam kaba dai hpe simai madung shatai nna shadu sha kau saga ai, yawng yawng gaw Nga shan mu nna baw pyi nsharawt ga ai. Dai shaloi na daram kaba ai Nga gam hpe ngai ya du hkra shingran naw a mu nga nngai.