"Goi i! Ning Lung; kaning di na rai sata? Tsin mau n ma mat ni ai. Manang nkau mi tsun ma ai. 'Tsawra myit ngu ai gaw, jaw mayu ai wa hpe jaw dat, n kam jang bai dawm la. Ya mayu jang ya, la mayu yang la, kanang n da jang kabai kau. Hpa yak ai law. Mak-hkang zawn rai, myiman kaw hkanghkang nan nga ai baw mi n re gaw', nga nna tsun ma ai raitim, Tsin a tsawra myit gaw daizawn n rai nna grai hkamsha yak ai le."
(1) Dakkasu ginra e hpaji sharin nga ai Wunpawng jawngma shayi shadangsha ni hta kadai mung, Tsin San hpe n shakawn ai kadai nan n nga lu ma ai. Buga mare kahtawng du hkra, na chye lu ai jan rai nga ai. Shi gaw lapran tsang jawng, tsang (7) shaning kaw nna Jinghpaw mung laika ram jawngma Ningtawn (vl&nfcsGef) lata hkrum ai gaw daini Dakkasu ginra du hkra, rai nga lu ai. Wunpawng amyusha ni hta daizawn Ningtawn lata hkrum ai jawngma gaw hkun pyi n du madawm nga ai. Anhte kahtawng kaw nga yang, Tsin San hte Seng Nan ngu ai yan chyusha naw lata hkrum la ma ai re. Shy. Tsin San tang (10) du ai shaning, Seng Nan tsang (7) de du nu ai hte dai shaning na jawngma Ningtawn lata ai hta lawm lu nu ai. Dai majaw, Seng Nan hte Tsin San; Rahkaing mungdaw, Ngapali jawngma Ningtawn hpaji tam hkaja sa-ra de rau sha gawan hkawm ang masai. Dai ten kaw nna, Tsin San hte Seng Nan gaw shawng de na hta grau nna, shadada hkauchye wa masai. Nau gaw n kam tsun nngai. Duwau u shaga jang, marit ginhtawng du magang sai hpe chye lu nga ai. Seng Nan hte Tsin San mung, ramma shayi shadangsha ni kadai mung shingtawt lai n lu ai hpe abrut kabai di kau nna lu ai shingra tara a majaw, nampan nep ai sumtsaw hkrunlam de kabye awam shang matwa masai. Shan lahkawng kaning re ai shara de du hkra, awam hkawm na ma ai kun!?
(2) Tsin San gaw daining Tsi Dakkasu kaw hpaji sharin nga ai (5) ning du nga sai. Raitim, Seng Nan daini du hkra Dakkasu lakang garai n mu kabye ai gaw hpa majaw wa rai nga lu ai kun? Dairam hpaji ram ai shadangsha langai, shi hta tsang (3) sha grau ai jan pyi Dakkasu ginra de du ai manga ning du wa tim, garai n du lu taw ai gaw, nlungdi hta shat shadu shaprut sha taw nna gaw n rai nhten!. Tsin San gaw, hpaji ram ai. Gawng shing-yan nga tim mara n rawng hkra, htaphtuk la ai amyu shayisha rai nga ai hte maren, Dakkasu ginra na Wunpawng shadangsha ni sha n rai, maigan la kasha ni mung, hkumbai she kapya hkra yu mangoi hkrum ai jan rai nga ai. Lahput lagrat she grat hkra rai sumtsaw mahtai hpyi laroi ai gaw, n-gup hte nkau mi, laika hte lam mi rai, ru she n rin hkra, rai nga ma ai. Dai ni hta sahti kasha hte arawng aya kaba ai du magam kasha ni grau law nga ma ai. Raitim sari sadang tsup la ai Tsin San gaw sadiga hpe sha madung da let, kadai kaning nga nga Mali Nmai Zup na lunghkrung hpa azimsha nga let, seng ang ai laika hpaji ni hpe shakut tik tik rai let, rau ai ten ni hta Seng Nan hpang de laika shagun gun rai nga wu ai.
(3) Seng Nan gaw, Tsin San dai daram wa mi tsawra nna, myit dum nga let, laika shagun raitim, laika bai htang na ngu ai gaw chyip hte chyap rai mat nga nu ai. Ndai mungkan hta shi tsawra dik ai gaw No.4 kanihpraw sha, rai mat nga sai. Ndai mungkan hta kanihpraw hta lai nna shi myit dum hpa mung, n nga mat nu ai. Tsin San gaw shi a sumtsaw wa kaw na laika n du raitim, tsawra dingngam rai nga ai. Laika hpaji ni hte shinggyim bungsi ni hpe ra n rawng hkra shakut chye ai Seng Nan, bungli n rau nna laika n htang ai rai kun! Shing n rai, kanu gaida jan hpe nau yu matsan dum wa nna, ja gumhpraw tam nga, Lungseng Maw ga de wa mi rawt matwa ai rai kun?, nga Seng Nan kaw na laika n du ai majaw nhti nhtang myit sawn sumru bu nga ai. Shingrai daini du, hpawtni du ngu myit mada let sha, jawng dat kalang mi bai duwa nga sai. Moi gaw Tsin San yan Seng Nan rau mare kaw sha nga ai re majaw, jawng dat shagu hkrum lu nga ai. Raitim ya gaw, Seng Nan hte Tsin San rau mare n rai mat sai majaw, dasang sa yang she, hkrum lu mat nga ma ai. Tsin San gaw jawng dat ai hte rau kanu kawa ni hpang de dingyang n wa ai sha, moi shanhte nga laiwa sai, shi a sumtsaw wa Seng Nan nga ai Bum San buga kaw wa shang wu ai. Wanleng hpang hkrat ai majaw, Bum San mare na kawa ba Zau Tawng ni a nta kaw shana de hkying (5) daram hta she duwa ai. Hka shin la nna, Seng Nan hpang de sa na ngu myit let, hka daru de rai sha majaw hpai rai, sa matwa sai. Hka daru du ai hte n myit mada ai sha, moi rau kaba wa ai manang jan Shai Lung hte sa hkrum wu ai. "He! Ning Tsin! galoi du wa ai law, jawng dat sai i?" "Aw...!Ning Lung kaja bu si nga nni? Ya sha, du lung wa ai. Jawng dat ai hte kalangta lung wa ai re.. Nanhte manang ni hpe grai marit ai le... Nanhte hpe grai hkrum mayu ai majaw, nta de pyi garai n du wa ai sha, nang kaw wa shang ai re." Tsin San ndai zawn tsun dat jang, shan a lam hpe chye ya ai Shai Lung gaw, ndum ai sha, shi a myiman ni hta myit n pyaw ai nsam hte matsan dum ai nsam ni dan pru wa nu ai. "Goi i.. Ning Tsin e.. laiwa sai ten na anhte ndai shara hkan pyawchyai hkawm ai lam ni hpe grai dum ai le..." "Ya mung, bai pyawchyai hkawm ga ngu lung wa ai re le, Ning Lung" "Tim ya gaw..dairam pyaw lu na yak mat sai." "Hpa majaw law... Ning Lung na manang wa Tsa Zau Lum gaw hpa wa rai bu nga a ni? Tsirung kaw naw galaw nga a ni? Bai nna Sara Brang Awng hte sarama Hkawn Tsen yan a sumtsaw manghkang wa gara hku run sha sata? Ya, shan lahkawng zeng bai rai masai n rai ni?" "Hkum kazik u, ma langai pyi lu masai she rai yang." "He...Ning Lung.. Seng yahte ri gaw nga a ni? Laika pyi n kam shagun mat sai le. Grai nan hkrum mayu la sai. Nta kaw nga ai n rai?" Shai Lung langai mau mau rai nna, Tsin San a ga hpe angwisha htai wu ai. "Chye!...Ning Tsin e ngai grai n kam tsun la nngai. Tsa Seng Nan tsirung de du sai nga ma ai." "Hpa majaw? machyi ai da i? Ning Lung..?" "Uhmm..." "Grai sawng ai da i?..." "Grai wa sawng hkra gaw n rai na re." "Dai..rai yang hka shin la nna sa gawan ga i? rau ai n rai i?" "Rau gaw rau ai raitim, daina n lu sa na sai, shana de hkying (6) kaw nna, nau n mai hkawm ai nga ma ai." "Re i? Dai rai yang, Seng a kanu kaw sha pyi, sa chyai ga i?" "Kanu mung tsirung de..." "A taw!, kanu gaw kasha hpe sa sin ai i?" "N re, kanu mung tsirung rawng ai, si na hkrung na pyi n chye sai da" "Aga... hpa byin wa ma hka" "Chye..! Ning Tsin e tsun pyi n kam ai yaw.." "N rai law, she tsun dan yu rit le, grai na mayu ai she rai yang mi" "Chye..! Ning Tsin e tsun ga nga yang grai galu ai. Byin wa ai gaw ndai hku re da le..." Shai Lung, Tsin San na mayu la ai Seng Nan a lam hpe npawt kaw nna, ndung hkren azin ayang tsun dan na hkyen wu ai. Tsin San mung, lagaw kashin ai pyi tawn kau hkra rai, Shai Lung tsun ai hpe madat bang wa sai. "Ning Tsin e byin wa ai lam gaw ndai hku, rai nga ai..."
(4) Ginhtawng nbung bungshi ni gaw, dindung dingda sinpraw sinna gayin gawai bung ahpawt nga ai. Marit ginhtawng ladaw a jahpawt manap na pyaw hpa lam ni gaw tsun n ma rai nga ai. Tingsa ajan wa mung, htat la ai wan nshi ni hpe adawt malawk pru wa lu hkra nga, sinpraw hkran Graulang shagawng bum hpe dahpran nna, myin hkyeng tsawm ai sabyin si ni zawn hkyenghtoi pruwa ai. Bum San mare buga masha ni mung, jahpawt manap gat sa na matu mawdaw lam makau hkan mawdaw la dingren tsap ala bu nga ma ai. Dai ni hta hpawmi Pri Nan mung, lawm nga ai. Shi a prat mung ramram wa matsan dum hpa, warai nga lu ai. Gaida prat hte shi a prat hpe shi shakut malan tamsha ra ai jan, rai nga ai. Tsawra la ai kasha shingtai hpe mung masha ni a lahkam dep hkra, buhpun mawn sumli lam ni yawng ra n rawng hkra, bau maka shakut ya nga wu ai. Gaida kasha rai nna, manang zawn n lu buhpun ai nga myit kaji ai lam n nga hkra, shakut ya nga ai. Shi kasha Seng Nan mung, Asak 21 rai nga sai ritim, hpawmi Pri Nan a myit hta gaw, lahpyen kaw naw htapawn mayu nga u ai. Shi a madu wa Zau Seng gaw hpyenla langai rai nga ai raitim, shan dinghku de ai 4 ning sha naw re ai shaloi, shi tsawra la ai madu jan hte kasha hpe ngam kau da nna, Wunpawng mungdan hte amyusha ni a matu asak hpe hkungga shatai kau ai gaw daini nga yang, 20 ning du nga nu ai. Hpawmi Pri Nan gaw madu wa asak sum mat ai ten hta myitru myittsang ngu ai gaw tsun yang, dang na hpa n rai nga lu ai. Madu wa n nga mat ai hpang, shanhte kaning rai nga sha na ngu ai lam ni hpe sumru yu let, hkrap myiprwi hpe manang shatai ra mat nu ai.
Myitru myittsang ngu ai sha gaw dik mat sai raitim, htingbu grupyin e shalan shabran ai hta shi a myit hpe awai la nna shi a myit hpe dating la hkra rai, madu wa lu da ya ai htingra kaw hkai nmai, namsi mansaw, shatmai shatmaw amyu myu hte u, wa yaw rai shakut bangwa wu ai. Shingrai, shi gaw numsha she raitim, hpyen jan re hte maren, num kaja a sari hte tup, kaga la hpe la nna dinghku bai de sha na ngu pyi n myit hkra, kasha a myiman hpe tau nna shannu a prat hpe masha ni hte bung hkra, dakan shakut sa wa nu ai. Kasha hpe mung jawng lung ram wa ai hte rau, mare na jawng kaw n tawn da ai sha, mare kaba de na jawng de manang ma ni hte maren, shalun wu ai. Daizawn shakut sa wa ai gaw daini nga yang kasha Seng Nan pyi tsang shi sanpoi hpe 2,3 ning htai hkra, rai nga sai. Kasha lung ai jawng hte shannu nga ai mare gaw deng 4 daram tsan nga ai. Kasha kaji nga ai ten manang ni hte rau, madaw hku sa shangun wu ai. Kasha hpe mung tsang 8 awng jang, lagaw leng mari jaw na, grai shakut u ngu n-gun jaw nga ai. Kanu a ga hpe hku n hkrat hkra madat mara chye ai Seng Nan mung, kanu tsun ai hte maren shakut u ai majaw shaning shagu madang tsaw ai hku hkrai, awng wu ai. Daizawn kasha hpaji madang tsaw wa ai hte rau, lu sha manu rawtwa ai ten hte wa kadup u ai majaw, hpawmi Pri Nan gaw bungli grau kyin wa nu ai. Gat dut ai lam hta grai shakut bang wa sai. Jahpawt daw sun wang na arai ni tam di la nna sa dut.
Dut lu ai gumhpraw hte gat na bahkri si, nga chyahkri, naikyi zawn re ni hpe mari la nna shana de mare hkan, gun dut rai, shakut nga ai. Lana de mi na hpawmi Pri Nan a byin wa ai gammaka wa anan hta akan, na-ung hta marang, baw hpye ai kaw majap kailang hte kayat ya ai baw she, rai mat nu ai. "Nawhpu law nawhpu....bahkri si mung lawm ai, nga chyahkri hte banau mung lawm ai, La ga law... mari ga law nawhpu law nawhpu.." "Aru e gumgai wawra laru ru wa ai mung, n dum ai" Mare hkan gat gundut hkawm nga yang, ginhtawng laru akajawngsha, ru wa nna marang htu wa ai majaw, masha ni a nta de mung shang n wam rai, nta wang makau na ma-un pawt kaw gat rai bang ai ka hpe sha raw tawn rai, marang shingbyi nga yang, ang she sha-a rai, ma-un si hkrat wa ai wa gaida jan Pri Nan a baw hku soi, bahkri si ka kaw nan hkrak. Bahkri si mung ayai mat nna hkra. Gaida jan kaning n di ngu mat nu ai. Tim, shi a aw kaw n hkrat ang ai hpe grai naw chyeju dum kau wu ai da. Marang n hpawng hkraw ai majaw ka hpe hta lang nna, nta lam de kayin kangai matwa sai. Nta du ai hte rau, lit hpe shayu tawn nhtawm, bawhkaw hpe raw la nna man hkan madi noikap nga ai marangsi ni hpe katsut kau let, la nga ai chyinghka hpe hpaw dat wu ai. Shi mau mat sai. Nhku ting asin chyat. Galoi mung kanu wa ai nga jang, hkaptau lala re Seng Nan daina de hpa byin mat sai kun? Wan mung n shatu da. Dai majaw shi a kata lawng sumbu kaw bang tawn ai wanhkret hpe shaw la nna, ahkret dat wu ai. Langai hpang langai ahkret yu tim, wan hkret si ma na sha atai, kaning rai tu sana law.
Marang madi bam mat nga sai. Gawk de shang wa nna bawhkum npu e bang da ai wanhkret hpe wa la nna ahkret dat wu ai. Gawk ting sanpra wa ra ai. Wan kawk hta shachyi let, kasha hpe shaga dat wu ai. Raitim n htan ai zim. Tam yu tim n mu. "Ma ndai kanang sa sai i?" ngu n-gup de pru hkra, n dum ai tsun dat wu ai. Kasha hpe tam n mu ai majaw, wan wut nna wan kra let, dut lu ai gumhpraw hte ngam ai gat rai ni hpe maram yu nga ai. Dut lu ai gaw yawng lap 25/. Ngam ai gaw tsawmra mi, arang gaw mali shi jan, dai hpang, shi gaw shi hkrai pru kapya hkrat wa nga ai myiprwisi hpe labu matu hte katsut kau let, "Nye kasha hpaji chye nna, shabrai lawlaw sha jang she, myit ngwi myit pyaw hte nga lu na rai nga ai," nga shi myit masin shi hkrai wa wutik hkra shapyaw la wu ai. Shat sha na matu, kasha hpe la nga tim n pru wa hkraw ai majaw, shi hkrai sha la nna, kasha hpe ala dung wu ai. Galoi mung ntsun da ai n chye hkawm ai Seng Nan ramram laklai wa nga sai. Galaw la tim n pru wa ai majaw kyu hpyi la nna yup-ra de shang matwa sai. Yup-ra ntsa galeng nga tim hpawmi Pri Nan gaw yup mai nga wu ai, n rai. Shi a kasha galoi wa na kun ngu ai hpe sha la madat nga let, laiwa sai ten na shannu a prat hpe langai hpang langai sumru myit dum wa nga wu ai.
(5) Seng Nan gaw, kaji ai ten kaw nna kanu a ga hpe hku n hkrat hkra, madat mara chye hkansa ai kasha langai rai nga ai. Kanu n ra ai lam hpe mung n galaw ai. Nta kaw ra sai bungli hpe mung, kanu pyi tsun n ra ai sha galaw chye ai. Kanu gat dut sa mat jang, nta kata ra ai bungli ni galaw, shat shadu, hka ja, u, wa yaw kau da rai nna jawng sa ai. Htingbu mung n dam hkawm chye ai. Ning-rai, myitsu ai majaw gaw kasha hpe tsawra ai hta grau tsawra, shani shana pyi naw htaba mayu nga wu ai. Seng Nan gaw nta bungli sha kyet ai n rai, jawng laika hta mung ram ai. N-gun ginsup ai lam hta mung, ram ai. Kanawn mazum mung ram ai. Shaning shagu jawng kaw galaw ai hpaji ram ai ni hpe shagrau ai poi hta kumhpa kaja gaw Seng Nan a matu sha, rai nga ai. Daizawn re ai poi de hpawmi Pri Nan myit pyaw kabu let, sa lawm ai shaloi masha ni a man hta myiman pa lu ai gaw myitsu la ai kasha laika ram ai majaw rai nga ai. Seng Nan tsang (7) htai ngut ai shaloi, hpaji ram ai jawngma Ningtawn lata hkrum nna Myen mung shara shagu de du hkawm let, hpaji hkaja hkawm lu hkra re ai wa, rai nga ai. Ndai zawn re ai kasha hpe mu shagu madu wa hpe grau dum wa wa rai nga ai. N-gup de na mung, "Ningwa nga yang gaw kade sha kabu na kun" ngu nna myit dum tsun kau ai mung kade lamg sha, rai sai kun. Ning-rai nna shannu shakut sa wa ai gaw gaida jan Pri Nan pyi asak 40 ning du wa nga sai. Kawa n nga ai raitim, shannu a matu kaga yakhkak myit tsang la na gaw n nga nga malu ai. Myitsu la ai kasha mung, shi a matu kanu shakut nga ai mu nna,"Nu ngai tsang (10) awng jang bungli galaw nna, Dakkasu hpaji hpe shinggan hku sharin la na", nga nna tsun tsun re ai kasha a ga hpe myyit dum dat jang, gaida kasha sa tai ang ai kasha hpe grai matsan dum n wai la let, kasha n mu kaw myiprwisi mayut kabai kaukau re mung, kade lang sha rai sai kun. Jahpawt sawmrawm ninghtoi htoi la wa ai hte rawt nna kasha Seng Nan a gawk de shang yu wu ai .Yupku ntsa yup taw nga ai kasha hpe mu nna kabu wu ai. Matut yu dat yang yupku makau kaw taw nga ai wanhkret hte hkayawm daw hpe mu dat ai majaw, gaida jan mau mahka mat sai. "Nu i! ...nye kasha hpa baw byin sai kun?" ngu n-gup de na tsun let, kasha hpe jasu dat wu ai. "Ma! Seng Nan ....mana nang kanang sa ai. Hpa baw galaw hkawm ai rai? Nu hpe hkrak tsun dan rit. Nu masu ai hpe n ra sharawng ai lam nang chye ai n rai i?" "Mana de manang wa Awng Zau sa shaga ai majaw, hkannang ai, sumlahkrung makau na shat-seng kaji kaw shat mari sha woi nna, sumlahkrung bai woi yu ai. Ngut ai hte wa yup ai re nu" "Dai rai yang , ndai hkayawm gaw gadai lu ai rai?" "Mana Awng Zau ngai hpe shat mari jaw ngut ai hpang hkayawm lu u nga, jaw ai. Ngai grai n dang raitim ngai hte nye nu yan wa hpe chyeju n malap ai rai yang gaw lu u, nga nna ga kaba tsun wa ai majaw lu kau shut sai nu" Aw! ... rai mung, rai nga ai. Awng Zau gaw, jawng raurau lung ai manang rai nga ai hta n-ga, gaida jan yannu jagumhpraw, malu masha ra kadawn wa ia shaloi mung, yu lanu lahku garaum shingtau ai. Gat dut arang n lu wa ai shaloi mung, Awng Zau a kawa kaw she gumhpraw hkoishap lang ai. Kalang jawng hkan gumhpraw ra akyak wa ai shaloi mung, Awng Zau gaw Seng Nan hpe garum chye ai. Daizawn re ai chyeju ni a majaw, Seng Nan n lu ningdang ai mung, rai nga ai. Raitim hpa majaw, Seng Nan n lu hkraw ai hpe dai daram ga kaba dat nna shagwi jaw ai kun, ngu ai hpe gaw gaida jan Pri Nan n lu myit nga wu ai. "Taw! ma.... shawng de Awng Zau hkayawm n lu ai n rai i?" "Re nu, shi mung shawng de n lu ai da. Manang ni tsun nna lu chyam yu ai wa, ya gaw machyim hpe chye nna, shawng de nlu chye ai prat hpe pyi grai lahpawt dum kau sai da. Ngai hpe nang nyanlet pratdep mayu yang gaw lu chyam yu u nga ai majaw lu kau shut sai nu" "Kadai mi gara hku nga nga, galaw ram kaja ai baw rai yang rai, nye kasha hkum lu yaw." Hpawmi Pri Nan gaw kasha hpe atsawmsha, sharin shaga nga wu ai. Dai ga hpe na ai hte Seng Nan mung, kanu myit pyaw u ga nga sadi ga langai jaw dat ni ai. "Nu ngai hpang de galoi mung, salik hkayawm n lu sana. Nu a ga hpe galoi mung, hkansa na ni ai." Kasha a ga na ai majaw kanu grai myit pyaw mat nu ai.
(6) Kade n na yang , Seng Nan a hkawmsa satlawat ni gaw garahku raiwa sai kun? N kaja amu ngu ai gaw, makoi magap da nan n lu nga ai. N kaja ai bungli hpe kalang mi galaw yu sai wa a matu, hpang de bai galaw na gaw myit ung-ang ai lam n nga nga ai. Sani si hpe kalang mi sha yu sai wa gaw, hkri ai hpe chye ai raitim, manang ni sha ai mu jang, n dum ai mayen gahpyaw wa ai gaw shinggyim masha a htung ngu na zawn rai nga ai. Ndai prat na ramma ni mahtang dai lam hpe loi pyi n shingdang lu nga ma ai. Seng Nan mung, daizawn rai nga ai. Kanu a ga hpe hkansa madat mayu ai raitim, hkumhkrang myit masin hta n lu sharang na zawn hkamsha nga ai majaw, "Seng Nan kalangsha pyi, lu yu u. Dai shaloi she, kaja n kaja, mu n mu chye na, rai ndai" nga nna shi a manang wa shi hpe katsan ga de agaw woisa wa ai lam ni hpe dum wa nga wu ai. Daizawn shi a manang wa Awng Zau gaw shi hpe n-gaw nwai hte 4 shagwi jaw ai majaw, kanu a ga hpe kabai kau nna kalang mi bai lu dat nu ai. Dai sha n-ga, hkayawm hta hpa baw byin wa chye ai atsam lawm ai re hpe mung, Seng Nan chye wu ai n rai. Aw!... Satan gaw Seng Nan hpe dang kau sai, rai nga a ni? Dai hpang kaw nna Seng Nan langai salik hkayawm mari lu na myit ni rawng wa nu ai. Mari mung mari lu bang wa sai. Raitim, shi mari lu ai salik hkayawm gaw Awng Zau jaw lu ai sigaret daram n mu nga ai hpe chye lu wu ai. Dai majaw, aten du nna salik lu mayu wa jang Awng Zau hpang de n dum ai lagaw ndung yawng sa matwa sai. Awng Zau kaw du ai hte rau, "He .... manang wa gara de sa na hkyen nga nni?" " Wamhkawm na ngu ai le, sa sa nang mung hkannang rit." " He Awng Zau ....yahte ngai mari lu ai sigaret wa, nang jaw lu ai zawn n nga ai le." "Dai yu u le! Mani ngai tsun sai. Nang gaw grai naw anya ndai she nga yang, dai majaw nye ga madat u, nang gumhpraw lu yang ya raitim, ngai mari de ga, garahku law" "Loi mi gaw lu da we ai. Jawng shabrai hte mawdaw shabrai bang u nga nna nu jaw dat ai lap 31 gaw gun da we ai." "E dai rai yang, rai sai. Dai jawng shabrai hpe naw ngam da nna mawdaw shabrai kaw na 25/- hpe shaw yu. Mawdaw shabrai magaw hkum tsang u. Driver hpe mi gaw, zawn n nga jang shakrip na 4 rai nga ai le." Shan lahkawng Awng Zau ni nta kaw nna rawt matwa masai. Kade nna yang mare jut kaw na nta langai kaw du ai shaloi, Awng Zau gaw nta madu jan hpe "Hkri Htu n nga ai i?" ngu san u ai. Hkawm wa sai nga, htan ma ai. Dai hpang, ramran hkik-hkam ai nta langai mi kaw du jang, Awng Zau gaw wang nhpan kaw na lashawng (bell) hpe dip dat ai hte rau, num kasha langai pruwa ra ai. Awng Zau dai jan hpe san dat u ai. "Nta madu i! Hkri Htu n nga a ni?" "Nga na re, shang wa marit" nga chyinghka hpaw dat ya u ai. Hkri Htu ngu ai gaw shanhte a ga-makoi rai nga ai. Lachyum gaw No.4 ngu ai rai nga ai. Dai nta kaw du ai hte nta madu wa gaw shan hpe No.4 bang da ai 5 masum kap ai sigaret hte hkap hkalum la ma ai. Awng Zau gaw palin kaji masum hte sigaret langai hpe la nna Seng Nan hpe wa ya u ai. Seng Nan gaw Awng Zau ya ai palin hpe yu nna mau mat nu ai. N dum ai sha n-gup de na mung, tsun shapraw kau dat nu ai. "Aga kanihpraw No.4" Seng Nan mau mat nu ai. Jawng kaw sara/ma ni tsun tsun re ai kanihpraw ngu ai gaw masha hpe jahkring sha, jahten kau lu ai, kani amyu re. Moi Miwa ni hpe Englik ni dangsha kau hkra di gasat ai shaloi, lang ai kani laknak hta nna ndai kanihpraw gaw htam latsa hkying grau ai. Ya, anhte mung hpe mung masha amyu ni anhte hpe majan (Katsi majan) gasat nga ai re hpe dum let, kanihpraw ngu ai hpe galoi mung hkum kajam, hkum lu, hkum lang. Masha ni manang ni lu ai mu jang nidik ai Share dap @ myusha Shimlum dap hte, kawngsi, Party de lawan dik ai hku shana ra ai nga nna tsun tsun re ai hpe Seng Nan dum wa nga wu ai. Raitim shi a myit malai gaw hpanghkrat mat sai nhten! Aw.... Seng Nan ....Seng Nan dumladum e hka yawng mat wa sai. Ning-rai, Seng Nan langai nnan e gaw , kanihpraw bang tawn ai re hpe n chye ai majaw Awng Zau jaw ai sigaret hpe majoi mi lu chyam yu ai kaw nna kanihpraw balen jung mat sai. Kanihpraw re hpe dum chye lu ai shani hta, shi hpanghkrat mat sai kun!?
(7) Seng Nan kani chye lu wa ai ten ladaw ni gaw shani kaw nna shana, nhtoi kaw nna shata, shata kaw nna shaning de du matwa nga sai. Shi a satlawat mung, ramram shai mat wa nga sai. Kasha hpe tsawra dik la ai kanu gaw Seng Nan hpe kani dawn tsirung de sa bang da wu ai. Dawn kau lu sai nga bai wa ra ai. Kade n na yang, bai lu sai lam chye nna hkrit kaya pyi n chye hkra, seng-ang ai ni kaw ahkroi anoi hpyinem nna kani dawn tsirung de bai sa dat nu ai. Kade n na yang, bai pruwa ra ai. Manaw manang ni hte hkrum ai hte rau, moi na hte maren sha, bai rai mat sai. Kanu myit htum mat nu ai. Anhte a mungdan kata kanihpraw hpe sha n rai, kani hpe atsai awai shamyit shamat kau lu ai shani sha n rai yang, htawng kade ning bangbang, kani dawn tsirung de kade ning dawndawn, kanihpraw lu chye sai wa, kanihpraw hpe kabai na ngu ai gaw n loi nga ai. Kanihpraw n nga ai shara kaw tawn da ai sha n rai yang, nga ai na, lu ai mu jang, kalang mi lu chye sai wa gaw bai lu na sha, rai nga ai hpe kada ningdang lu nga a ta! Seng-ang ai magam gun ni mung, mungdan a akyu hpe n yu, jagumhpraw hte tinang kanhkru jang, ram sai ngu myit jasat hpe sha, n lu galai kau dingsa gaw anhte a mungdan hta kanihpraw majan gaw ngutkre lu na n rai nga ai. Seng Nan a majaw kanu gaida jan ramram myit law mat nga nu ai. Moi gaw kani hte mahkyin jinghku ni a ga hpe grai madat mara chye ai raitim, ya gaw n shawp ai krang ai kasha tai mat sai. Laiwa sai ten No.4 n chye lu ai ten hta Seng Nan gaw sumnung shingdi ai, laika ram ai nyan san ai majaw, kanu mung masha ni a man e myiman pa laiwa sai. Kasha ra n rawng hkra mung, galaw ya sai. Daizawn kasha hpe ra n rawng hkra, kasha a ra nau hkan kau ya ai majaw daini Seng Nan htenrun matwa ai rai kun? Dai majaw kanu kawa ni kasha ni hpe sharin shaga chye ra ai ten she, rai nga sai. "Ma hkawng gaw dawng ai" nga ai ga-malai gaw teng ang sam nga ai. Ya gaw gaida jan Pri Nan, langai sha lu ai kasha htenbyak mat nna lagu gare, masu lale, rai hkawm ai majaw kaya sha gaw dik mat nu ai. Myit htum sha gaw htum mat nu ai. Jum n hta ju ai sha, ra mat sai. Myit shuk ai lam gaw, ginsaptsip hta grau mat nga sai. Nta kata na rai mung, jahpawt shagu shat shadu sha nga ai shaloi pyi n ngam hkra, rai nga ai. Nta kata nga manga yawng Seng Nan e hkrai masawm dut sha kau nga sai. Nta kata na rai ma ai hpang, lagu gare kashun gashe, masu magaw, makoi rai hkawm ai manang ni mung, ya gaw shi hpe kanawn kam masai n rai nga ai. Mu ai hte rau, naw hprawng yen kau nga ma ai. Gumhpraw n lu raitim, shawoi na aten du jang No.4 kut wa ai gaw mazang n rin, kaning n di nga nga lu ai. Shi a prat hta kanu kawa, makyin jinghku hpe tsawra hkungga ra ai baw re mung n chye mat nga nu ai. Laiwa sai shi a sumtsaw jan hpe mung n dum kau nga nu ai. Ndai mungkan hta shi tsawra dik ai gaw kanihpraw No.4 sha, rai nga sai. Kaning mi rairai shi hta ahkyak dik gaw kanihpraw kaning di, lu lu na ngu ai hte gumhpraw kanang na lu na ngu sha, rai nga ai. Gaida jan Pri Nan machyi let, yupra ntsa amyu myu myit sumru nga yang, kasha Seng Nan shi hpang de shang wa ai mu nna grai kabu nga ai. Kasha grai myit malai wa sam sai. Kanu machyi nga ai hpe pyi wa kawan chye wa ra ai nga grai kabu nga wu ai. Seng Nan shi a makau e wa tsap ai. "Nye a tsawra ai sha, ... Seng Nan myit su la ndai, yu u. Nu mung daini gaw mai wa re sai, .. Ma, ...Seng Nan .. nu ma kawsi nna wa yang sha u ga ngu, hkum gari gawa shakut nna shat mung shadu da sai. Shat wa sha su yaw." Gaida jan Pri Nan myit tawn da ai hte kasha Seng Nan myit tawn da ai lam ni bung na kun.
"Nu.." "Oi ye ma, ..hpa rai ta?" "Ngai hpe gumhpraw lawan jaw rit." "Hpa baw di na law ma.." "No.4 mari na " gaida jan mau mat sai. "Ya mung No.4 naw tsun i, ya tsi mari sha nna dawn kau na nga ngai nnu nye kasha kaja jang rai sai ngu, masha ni kaw hkoi nna jaw dat ai gumhpraw 200 kanang da kau sai i?" "Dai mi gaw moi mi ma sai" " Ataw ma, ngai nnu hpe matsan loi pyi n dum sai i? Na a nnu machyi nna gat mung n-lu dut rai nga ai hpe chye nga da nna....." "He hkum jawp taw nga u, ya hpyi ai gaw lu na matu n re. Sailam kaw htu na matu re majaw lap 10 daram rai jang ram sai" "Seng Nan.... nang hkrai nang htu kam yang htu kabun, lu mayu yang kabun lu, ngai nnu nang No.4 mari lu na matu gumhpraw byek mi pyi n lu jaw ai. Ataw! ma... amyu langai mi htenhtum matwa hkra, majan katsi hte anhte myusha ni hpe gasat ai laknak re ai nga nna nanhte jawng kaw party salang ni sa tsun tsun rai nga nna nang she nu hpe wa tsun tsun re wa mi. Dai majaw nu gaw No.4 lu na matu gumhpraw n jaw lu ai. Jaw na mung n nga ai. Nu tsaw ra ai ma e... No.4 hpe hkum lu sa yaw. Nu a tsawra e, myitsu chye la ndai." Gaida jan Pri Nan ga tsun nga dingngam myiprwisi ni n dum ai sha, shawn kapya hkrat wa nga lu ai. Kanu kaning ngu tim, Seng Nan gaw loi pyi n sawn ya. Sumla hkrung yu ai zawn she shadu sam wu ai. "Hpa wa jawp bu si nga nni? Gumhpraw jaw rit she nga yang, nang tsun ai hpa re mung ngai n chye na ai. Ngai hpe shangai tawn ai pyi chye ai kanu rai yang, ngai hpe gumhpraw lawan jaw rit, Ndai mungkan hta ngai tsawra dik ai nye matu ahkyak dik gaw No.4 sha re, No.4 gaw nye a Karai Kasang, nye a chyeju madu nan rai sai. Gumhpraw lawan jaw rit. N na ai i?" Galu gakang tsun taw nga ai kasha a ga hpe na ai majaw machyi let, gakeng taw nga ai kani gaida jan Seng Nan hpe mau n ma rai mat nu ai. Myit sumru nga ninglen myitru yawnhkyen myiprai ni gaw myi hkyi zahpaw she yan rai lwi hkrat wa nga lu ai. N dum ai sha, n-gup de nna mung nu i.. Wa Karai Kasang wa ngu nna tsun shapraw kau dat nu ai. "He gumgai ndai, nye wa pyi si mat wa ai moi rai sai. Ya mi nnu yan nwa hpe shaga yang htan ya na n rai, hpa baw di na Karai Kasang hpe shaga nga nni? Ndai kyu hpyi shara nawku jawng mung n re ai, hpyi ai gumhpraw she lawan shaw dat u. Jaw na i?, n jaw na i?"
"Jaw nan n jaw lu ai, jaw na mung n nga ai." "E rai sai, ngai na mayu ai dai sha re. Nang gumhpraw n lu jaw yang, na a na kaw na ja lakan raw ya rit. R aw ya na i, N raw ya na i?" N-gup hte tsun nna ta hte gaw ginshang kaw tsat sa wa ai nhkyi masen hpe shaw la nna, kanu hpe galun kau na maw wa wu ai. Aw... No.4 shadut ai majaw, kanu hpe raitim sat gwi wa ai hku, rai nga ai. Aw! ... pawsa maka n htuk la ai ngu na kun? Shingra tara hpe mahtang mara yawng hte hpe kanawng gumhpye bun sana kun? Kasha ni hpe n chye sharin shaga ai mara kun? Kashu kasha ni hpe ra nau hkan ya kau ai mara wa rai Kun? No.4 galaw shapraw chye ai ni hpe mahtang mara shagun na kun? Shing n rai, No.4 dut shabra nna hpaga ga ai ni hpe mahtang mara shagun na kun? Kade a mara wa madaw rai kun? Langai ngai a mara gaw rai nan rai na sai. "Agoi e...ma e nu hpe shangai chyeju htang ai ga wa i?, e..nang hpe ngai nnu sha mayu ai n sha , lu mayu ai n lu, sa mayu ai de n sa hkra, ku hkrai ku nna shangai da ai re le . Nang hpe shangai ai pyi nau n na yang nwa mung si shakram da ai re majaw nang hpe ngai nnu gaw, myiprwisi hte na a jit hkyi ni shat lu sha shatai nna nang hpe ndai ram law hkra, bau maka da ai nnu rai nngai yaw.., ya gaw ..No.4 hpe kanu shadu mat nit dai gaw i? "He, ga hkum law taw u" Seng Nan langai kanu hpe nhkyi hte sinda kaw nan madi wa nu ai. (Yi! ngai gaw yu hkrit ai lu) "Sat na rai yang, lawan sat u. Nu si gwi ai. Nye kasha myit pyaw jang ngai si gwi ai. Raitim, nye kasha hte rau nanhte ramma ni hpe jahten kau lu ai kanihpraw mari lu na matu gumhpraw byek mi pyi, n jaw lu ai. Matsing da u yaw." Kanu gaw ga tsun let, shi hpe nhkyi hte madi da nga ai kasha hpe rawt ahpum nna hkrap nga ai.
"Dai ramram jum mayu la ai gumgai, nang n jaw tim, ngai gaw la na" nga tsun let, kanu a na maga mi na na lakan hpe abrut raw la nhtawm, kanu hpe kanawng kadawng kau da nna gat pru mat wa sai. Kasha Seng Nan e kanawng kadawng kau da ai majaw gaida jan Pri Nan gaw galau agrwp kadang mat wa sai. Yupku lagaw hte baw wa adawt hkrup la ai majaw ramram wa machyi hkrum mat sam sai.
Malap taw mat nu ai. Bai gaw i dum na sai kun! Htingbu ni gaw i na nga ma ai kun?. (8) Ulat hpunggam goi nna sawmrawn ninghtoi htoi la wa ra ai. Gaida jan Pri Nan mung dumhprang wa ra ai. Shi a makau hkan bawhkaw hpraw chyawp da ai saranum 2 dung nga ai hpe mu ai majaw, shi tsirung de du sa wa ai lam hpe tsi saranum ni tsun dan ai majaw, kasha hte shannu ga ja shaga hkat nga yang, garap di hkrat wa ai zawn nga na ai hte Seng Nan rai jang, tintin rai shinggan de gat pru matwa ai hpe mu ai majaw, hkingbu ni sa yu yang yupku makau kaw malap taw nga ai hpe mu nna tsirung de sa ai re lam chye nu ai. Shaloi she, gaida jan gaw byin laiwa sai lam ni hpe dum wa nga sai. Ladi na nyepsan hte myijut na myiprwisi ni gaw gaida jan hpe matsan pyi n dum sam ma i, majoi mi rai she gumhtan hkrat nga ma ai . Ninghtoi htoi nna sarama ni bungli galai ten du wa ai hte gaida jan Pri Nan shi a myit hpe amyu mi dawdan shangut lu nu ai. Dai majaw, saranum langai mi hpe lata dingsi shaga dat u ai. "Hpa baw tsun mayu ai law Ning." "Sarama e, .. Ning hpe naw garum la rit law..." "She garum law... ra ai lam nga yang she tsun rit." "Chyeju hte Ning hpe anhte lawk na mare salang ni hpe alu sha naw shaga ya rit yaw." "E, e, ..hpa hkumtsang atawmsha wa sagawn tsun ya na" nga tsun da let, sarama jan pru matwa sai. (9) Gaida jan Pri Nan langai tsirung na yupku ntsa e amyu myu myit sawn sumru nga u ai gaw, shani hkying 13 pyi rai mat nga sai. Shagrai shi mau nga yang, shanhte a lawk na mare kawngsi ningbaw wa hte tsi jauya (sarawun) wa dushang wa ra ai. " Aw, salang wa pyi du sai gaw i?, grai kabu sai." "Anhte mung, bungli nau law taw ai majaw ya she du ai. Hpawmi jan nang hkrum mayu ai nga ai majaw du sa ai, rai nga ai." " Grai kabu sai. Ndai hku rai nga ai, ya myitsu ni hpe shaga ai lam gaw, ya ngai mung ndai mungkan hta asak hkrung nna, nana nga lu na zawn n ngu sai. Raitim, ndai mungkan hta kanu kawa n lu, makyin jinghku n chye mu rai jahkrai ngam nga mat na rai nga ai, nye kasha hpe grai gaw n kam tawn da ai.
Tim, masha myit, chye rawng na zawn n nawn sai. Amyusha ni yawng hpe akyu n jaw ai hta n-ga, amyu pyi htum matwa chye ai baw re nga ai kanihpraw hpe loi pyi n ju nngai. Tim, daini nye a kasha kani-ya kaba tai mat sai. Ya, ngai tsirung du ai mung, nye a kasha a majaw re, nye kasha hpe myit malai lu hkra, kani dawn kau lu hkra, byin mai ai lammasa hte gram lajang ya mi ngu ap da mayu ai majaw mung, rai nga ai" Gaida jan ram ram ba mat sai. She kalawp wa sai. "Angwisha tsun u. Nang byin shangun mayu ai lam ni yawng byin hkra, anhte lit la shakut ya na. Nang ya mai na sha, rai nga ai." "Salang ni e ngai gaw n hkrung na rai re sai. Dai majaw, ndai nye a na kaw naw noi ngam ai lakan shingtai hpe kani ahpraw achyang hte nanghpam lu sha kasat shamat kau sa wa ai bungli lam hta lang na matu, myitsu yan hpe ap ya nngai. Bai nna nye a nta htingra hpe mung..." nga nna gaida jan tsun nga yang sarama langai mi gaw shanhte shaga ai gawk de tintin rai, gat shangwa nna sarawun (tsi jauya) wa hpe "Sara, .. ahkyak masha du ai. Kanihpraw htu shut nna malap mat ai re nga ya sha sa sa ma ai.." Sarawun wa alawan rai pru matwa sai. Gaida jan Pri Nan gaw loisha mi mau mau rai nna ... goiye, .. nye kasha wa mi rai kun! nga tsun let, myiprawisi ni hkratwa nga lu ai. Mare kawngsi ningbaw wa hte manang wa mung, gangwi gapyaw hte shalan ga tsun nna ra ai lam tsun jahkrum nga ma ai. Shanhte naw shaga dung nga yang sarawun wa bai shangwa ra ai. Myit kahtet la ai gaida jan sarawun hpe san dat wu ai. "Sarawun kadai ni rai ma ta?.. gara hku rai ni?' "Hpa n ra ai. Awng Zau ngu ai wa hpe gaw asak n dep kau sai." "Awng Zau da aw.. sarawun." Gaida jan kalang mi bai myit kahpra mat sai. Sarawun wa gaw tsun dat yang, jaw n jaw naw myit yu nga yang "Sarawun kadai kaning ngu ai wa re ni? Seng Nan ngu ai wa n re ni?" Sarawun wa, baw ngum di dat wu ai hte hpawmi Pri Nan gaw "Nu kasha Seng Nan e" ngu nna sha, tsun lu mat nu ai. A goi law! ... amyu hte mungdan a magam lit hpe abawng alang zetzet tsangtsang, kabu gara rai nna gunhpai sawa na malai, masha wa a hpaji mahkam de chye nga ninglen kagat bang nna si du a lahpyen de dumladum shangbang matwa nga ai ramma ni a prat wa, lahpawt lama sha gaw dik la mat nga ai. "Nu wa myitsu ni e, ... manaw manang rauram manang ni e, Miwa mung hpe laiwa sai ban prat hta Englik ni kani hte ka-up sha laiwa masai da. Amerikan ni Vietnem majan hta sum galau matwa ai gaw, No.4 ngu ai kanihpraw a majaw re da" nga nna tsun chyai nga ai baw sha, n rai sai. Anhte a Wunpawng mungdan kata, anhte amyusha ni hta du taw nga sai hpe myit dum chye ra nga saga ai yaw. Mungkan ntsa hpawmi Pri Nan tsawra dik ai kasha Seng Nan, kanu tsawra ai hte maren, shi mung kanu hpe tsawra hkungga chye lai matwa sai. Tsin San hpe mung, shi a masin salum kata e tut gumgoi rawng nga ai zawn, ngu nna nan tsawra ai rai nga lu ai. Tim, daini shi No.4 lu chye wa ai shani kaw nna gaw dai lam ni yawng, shi a myitmasin hta n rawng mat nga nu ai. Shi a myit masin hpe No.4 e gare shaw sha kau ya sai majaw wa n rai nga a ni? Ya mung, kanu tsawra myit hpe chye myit nna myit malai wa chye lu na kun? Tim, hpanghkrat mat sai. Mali hkanu kaw hkrat mat ai myiprwisi kahte mi hpe bai sai la lu yang, sai la lu na. Tim, Seng Nan myit malai lu nna sumnung shingdi madat mara chye ai masha langai bai byin wa na ngu ai gaw loi nan, n loi ai lam rai nga ai.
(10) Shai Lung gaw, Tsin San na mayu la nga ai Seng Nan a lam hpe ndai zawn azin ayang tsun dan ai hpe Tsin San gaw, lahpawt dum ai myit, maroi n ni ai myit, Ka-un ai myit, n-gaw nwai mai myit ni hte seng-ang ai ni hpe baw pungding kaw nan mara la hkra si manat ginchyup anin matsut kau na zawn ngu let, shi hkrai shi hkrai lwi yu wa nga ai myiprwisi hi hpe katsut kaukau rai nna madat mau dung nga ai. "Goi...Ning Lung kaning di na rai sata?" Tsin mau n ma mat ni ai. Manang nkau mi gaw tsun ma ai, 'tsawra myit ngu ai gaw jaw mayu ai wa hpe jaw dat, n jaw kam jang bai dawm la, ya mayu yang ya, la mayu yang la, kanang n da jang kabai kau, hpa yak ai law? Mak hkang zawn rai, myiman kaw hkanghkang nan taw nga ai baw mi n re gaw, nga tsun ma ai. Tim, Tsin a tsawra myit gaw dai zawn, n rai nna grai hkamsha yak ai le. Myitru la ai yaw. Grai myitru ai. Chye!..hka shin pyi n kam sai wa saga i, Ning Lung?" "E, e! Ning Tsin e hpa wa myit hkumru wu, hka sha gaw naw shin la ga le e" Shan lahkawng hka pyi grai lawan ai hku shin la nna wa matwa masai. Nta du wa ai hte kawaba ni hpe pyi, atsawm n shaga ai sha yupgawk de shang mat wa sai. Yupku ntsa shana tup n yup ai sha, sumru mungkan de she, lenhkawm matwa nu ai. Myit kata e hkamsha yak let, tsun mayu ai lam ni gaw, Goi! .. ngai e. Tsin tsaw dik ai Seng e, moimoi an rau ta gindun let, Njang Zup makau na shingnip npu e tsun da ai, ginseng sadi ni yawng gaw, Mali Hkanu hpungla kaw hkrat bang mat ai myiprwisi kahte mi zawn she, arai mat na sai i? Htaw.., Aw.., Le! Tsin tsaw dik ai Seng hte myutsaw Wunpawng shadangsha ni e, nanhte zawn rai masha wa e manawn masham myit hte jahten sharun mayu ai ni a ga hpe madat nna tinang hkum hpe tinang hkrai sat si ma matwa yang, anhte myu shayi ni kaning rai nga na. Tinang amyu hte mungdan galu kaba madang dep wa lu hkra, labau lit hpe kadai gunhpai na. Tinang amyu hte htunghkring hpe kadai gawsharawt na rai nga a ni? Sungsung she naw myit yu mu yaw. Nanhte myu shadang pratlawn Brang ni kani-ya hkrai rai mat ma jang, anhte myu shayi ni gaw maigan la ni a hpang de sha, n hkan gumgoi nang yang shingra tara hpe kaning di hkanshatup lu na rai ni? Bai nna seng-ang ai nu wa ni e..., nanhte mung 'nye kasha n lawm jang, n lu chye jang, n sha chye jang, ram sai. Kadai hpa mi galaw yang galaw, kani sha n-ga, hpa mi dut sha yang dut sha, hkum daw mi dut sha yang dut sha mu ga' ngu nna naw yu nga na myit ni? Lawan she myit yu mu. Hta lang tawn ai shat hpe n-gup de garai n bang ai sha, yaya nan myit yu mu, ngai kaning ndi nan she ngu sai yaw. Dut ai mu nna n rim, lu sha nga ai chye nna n tsun ra ai salang ni hpe mu jang, wan-up da ai wan nhtaw nan shaw abraw dagawt mala bun dat na zawn, ngu nngai yaw" da.
Bum Shanghkawng
