Naurai Lu gaw ashe nga ai marang yi ya kaw kaka kawkkawk rai mat sai htingba hte labu palawng hpai, bala satik hpe baw kaw magap rai, marang madit let Htingnai ga kawn Miwa mung na Hka shang gat de lagaw lam hku hkawm lung wa nga u ai. Numtawk gadawng lung wa ai lam gasha langai mi kaw na shu nba gaw grai tsit manyen tsawm taw nga ai, gabye dat yang gashawt wa na re hpe dum ai majaw, hkum ting na n-gun hpe lagaw latsa kaw hkrai dat la nna, aga kaw magra gabye let, gadawng kaw wa-hkawm hkawm ai hku lung shaja nga nu ai, marang htu kaba ai re majaw kara mung man hkan ru marang rai abya kap nga nu ai, Naurai Lu gade ku let hkawm tim, shawt pak rai sai, dangkang hkan gaw hka hpunnyi hkrai tsit kap mat sai, labu mung lahprang kaw nan she aju e bai mahkai je kau ya rai, n-gup kaw "Manai wa re law." nga pawt let hkawm nga ai.
Marang htu gama ai majaw labu matu hku gamang kap mat ma nu ai, labu madi mat sai Naurai Lu gaw hkum ting lagyi gashung mat nu ai. Sak shi kru ning sha naw re majaw, shi a myiman na ma ningsam pyi rain galai ma nga nu ai, asit baba re myiman gaw marang hka e madit ya jang grau tsit mang mat nu ai, lahkawng ya ting shat atsawm n sha sai, shingrai n-gup mung hkraw she hkraw, lasi mayawi ai myiman gaw nga-ti si zawn du ntsa kaw noi nga ai. Tsawm mari mara gat kaw du yang bungli wa tam galaw lung wa ai shi gaw, nau lasi ai majaw Miwa lauban ni gadai mung n ra ra rai nna, chyinghka n hpaw ai shan ju seng shinggan kaw shi a bo bo san ai tsupnyi htingba sha wa kabai tawn rai mau dung nga ai. "Ma, nang gadai hpe tam ai rai?" Shan ju seng kaw na lauban jan gaw dai lasi kyi kyi re num sha hpe yu let san dat nu ai. "Gadai hpe n tam ai law, majoi mi wa dung sa ai wa re."
Nbung bung yang gadawng wa na zawn re Naurai Lu gaw, hkum ting hkumpup hkrai rai, shi a kyi kyi san ai lagaw sha shada galep dat rai, shan ju lauban jan hpe ga hang dat nu ai. Lauban jan ma dai hpe yu dat ai hte myit kaw "Ma ndai gaw Myen mung na rai nga ai, ya gadai hpe mung n tam ai nga, marang yi ya wam hkawm ai gaw matsan mayan rai nga ai." Ngu myit la let: "Ma, nang de shang wa rit." Ngu Naurai Lu tsap ai chyinghka hpaw dat let nhku de woi shang wa nu ai. Lauban jan gaw Naurai Lu hpe labu palawng hkraw ai la ya, shat grai mu hkra shan alo alam bang di gangau jaw jang, kawsi dik mat sai Naurai Lu myiprui si hte mya rai hkrap let shat dai hpe n-gup de hte matsut bang dat nu ai. Naurai Lu lauban jan hpe grai chyeju dum ai majaw, laubau jan kaw nchyang shang na hku jahkrup la masai, lauban jan gaw Naurai Lu hpe shan ju seng kaw na seng rapding zawn re galaw tawn ai gawk gasha kaw yup shangun nu ai.
Dai gawk gaw tsap mung n mai gum let sha mai hkawm, nbung nsa n hkrang ai, shan ju seng na sangau bat hkrai ahpu nga ai gawk gasha rai nga lu ai. Shi a hkumhkrang hte myiman grai tsawm ai re majaw, dai shan ju seng kaw na shabrang la gasha Lahpai Naw gaw shi hpe grai yu ra nga ai. "Ganam nang grai tsawm nga ai le. " Myiman hpe Naurai Lu a man kaw she hkra wa hkra hkra shala taw nga nu ai. "Hkum di law." Ma sha naw rai nga ai Naurai Lu gaw hpa n chye ai gaya sha chye nga ai. Lahpai Naw shani shana Naurai Lu hpe shala la rai shan lahkawng sumtsaw tsaw mat wa manu ai. Hpa mung n chye ai Naurai Lu hpe Lahpai Naw e masu nna hkawnji makrung di la kau ya nu ai. Shi a myit hta Lahpai Naw hpe grai tsawra mat rai, myit shingran hta shi hpe hkungran la na shadu taw nga ai, shi a shata la-hka yawng Lahpai Naw hpe ap rai jawm lang nga ma ai. Naurai Lu a num makrung lu di la sai Lahpai Naw gaw lani mi hta agajawng sha mat mat nu ai. Lauban jan san tam pru wa ai shaloi, Naurai Lu hte bungli rau jawm galaw ai num gasha langai mi "Mana wo hkausoi seng na Seng Ra hte mawdaw jawn rai myu lam de yawng mat wa sai." Nga pru ra ai.
Ga dai na gajawng ai Naurai Lu gaw manang ni n ra mat nna, shi hpe jaw kau ai chyenan ningsa hte set yu yang, chyanan n hkrang mat sai. Shi a myit kaw ndang tsun hkra mau mat nu ai, shani shana shi hte she rau nga ai masha manang ni hte prawng mat ai gaw ngu, masha hpe ganawn ai bo re pyi n nawn hkra mau mat nu ai. Lahpai Naw e masu hkalem sha hkrum ai Naurai Lu grai myit n pyaw nga ai ten, shi hte bungli rau galaw ai num gasha nkau mi gaw shi a makau kaw kam mara nga jahpoi sha taw nga ai. "Madat sha u ga, la ni hpe mi dai daram ram kam ai gaw." Loi hpum hpum re num gasha shing ngu u ai. "Ngai Lahpai Naw galoi mung Seng Ra kaw sa sa re mu nngai ngu yang." Loi lasi lasi san ai num gasha mung wan kaw sau jat ai hpa bai tsun jat taw nga ai. Myit machyi mat sai Naurai Lu gaw dai shani kaw na la ni hpe n mai kam ai, masha hpe mung majawi myit kraw sho rai ganawn ai bo n re ngu myit la lu nu ai.
Mare na wan jak rung kaw bungli ngut rai, gat de pyaw chyai mat wa hkyem ai Tu Ja gaw grai sagawi let Hkamsha La pe "Wu! Ma La, sa, gat de num saw mat wa saga le, shabrang ni mi nta kaw hkrai nga nga ai gaw." Ngu loi jasum jasum nga bai di rai, loi shatin let, "Sa, sa, lawan shakya la su. " Ngu shadut dat nu ai. "Ngai gumhpraw n lu ai law, ba Awng ngai hpe gumhpraw n jaw da ai." Shi a gahpu wa shi hpe gumhpraw masum tsa sha jaw da ai majaw myit grai n pyaw let, "Jawng mung galawi lung ngut na ngu ai kun, jawng hkrai hkrai lung. " Gahpu ba hpe loi myit n pyaw n pyaw nga tsun taw nga ai. "Grai wa rai re nga ai, mana sha Tu Seng ni hte gat kaw ayai myit dai da le." Tu Ja gaw shi a manang ni tsun ai na sai re majaw Hkamsha La hpe san shati dat nu ai. "Masum tsa sha wa mi, ngai hpa mung n mai di ai." Hkamsha La grai wa n kaw nga nu ai. "La e, ya nang bungli shang jang she gumhpraw ngu ai gaw gade ram tam yak ai re chye na ndai." Tu Ja loi ja ja ngu sharin dat nu ai. Ganau wa myiman nsam galang ta sum re hpe mu ai majaw, mayu bai sharai la nhtawm, "Lawan shakya la su, ngai woi ayai na." Ngu Hkamsha La hpe shatin dat nu ai.
"Lum Tu, ngai hpe chyahkring mi naw la rit." Hkamsha La grai kabu let shanhte mare kaw Marip nta hkum mi rai nga ai gahpu lum Tu Ja hpe grai shapyaw hkra shaga nga ai. Tu Ja hte Hkamsha La gat kaw du yang shana ningrim rim wa sai, shan ju seng hkan na shan ju sangau wa, lai hkawm masha ni a ladi hte n-gup hkan shajut bang wa nga ai. Shan ju wanhkut ni, ahkying aten hpe gang shangui kau ya ai zawn, makau grupyin na hkawm sa masha, arung arai ni wanhkut mawng ai hte maren yat yat sha rai mat wa nga ai, mahkawn shabrang ni mung grau she tsawm htap mat wa manu ai. "Dun! Dun! Dun..." Tu Ja a sengke nsen shan ju seng makau kaw du jang dingsang shangawi shaja dat nga nu ai. "Woi! Ma La mu sai i? Num gintan ai ngu ai gaw, ndai hku di ra ai, ya manang ni anhpu hpe grai yu sai re lu, ngai ya myiman hkum jasum, hkawm yang loi gawng gawng di hkawm ra ai." Tu Ja shi a kara ningchyun hpe ta hte masit dat di shan ju seng de shang wa manu ai. shan ju seng na Naurai Lu ni hpe lagu yu nga nu ai.
"E, Tu Ja, ya daini nang kaw laban ban ten bai ang sai i." Shan ju seng na lauban jan mani sum sum sha rai hkap shaga nga ai. "Lauban jan, ndai ngai na kanau Ma La re, daina gaw nang a mahkawn gasha ni hpe ngainau wa hpe tsa naw woi lu ya na hku hprai u." Lauban jan hpe Tu Ja ma shangun ai hpa she wa hprai taw nga ai. Lauban jan mung Tu Ja ya n-ya shi a seng kaw shan ju wa sha ya ya rai ai majaw, Tu Ja a ga hpe bai n ninghkap kau lu rai, numsha ni hpe: "Gai gai, nanhte marai lahkawng dang, wo, manam ni hpe tsa naw woi lu mu." "Hka, hka, ngai she sa ga." Wan bagan gashin nga ai Naurai Lu gaw grai chyauhkre let, tsa lu bungli hkam la nga nu ai. Hkamsha La gaw ta laseng loi galu galu rai, ta n-ga mi labu sumbu kaw chyawp bang tawn, lagaw n-ga mi gaw loi shatsaw tawn di, myiman gaw kaga de yawn rai tsap nga nu ai. N-gyem maga hku yu dat yang, Hkamsha La a myiman ni grai galu mu, praw mu, ladi mung gawng gawng rai manang wa hpe loi dip lu rai na zawn rai, bai nhka gata na nhka mun mung prut lu n prut lu rai lahkawng masum mi marawng marang rai tu sharin hpang wa nga ai. "Agu, hpa wa mau taw nga a ta? Nang de she wa dung rit le." Naurai Lu gaw shan ju seng kaw hka wan sha gashin ai raitim masha law malo hpe mu yu, masha shinglen mu yu jin sai re majaw, ala ni hpe grai chye asawng shapyaw jaw chye ai jan rai nga ai. Naurai Lu galang ta ata kaw gra di sa jum dat ya jang, Hkamsha La masin kaw gajuk dat ya ai zawn nga hkum ting wandat hte kaba dat hkrum ai zawn nga hkra gari ashun wa nu ai. "Gai, nang de dung ga law, ngainam ni e, agu hpe sha gaw hkum kau da rit le, ngai mung ganam ni a sama bat hpe she marit wa ni ai."
Tu Ja mung sagawi tik rai nga ai, raitim shi a sagawi ai lai kyang ni gaw dai numsha ni mu man jin mat sai re majaw grai wa aye nla ya manu ai. Shan ju ai chyu she nga, pat gawm tek tak shara nga ai wanpu ningja gata e, mahkawn shabrang ni shanhte a ladat hku, shanhte a sak prat ram hpe tsa hte shagrau nga ma ai. "Ma La, nde wa yu rit!" Tu Ja tsa loi ram wa sai majaw, kanau wa hpe shinggan de shaga shapraw la nhtawm, loi bri bri nga ai tsa ga hte, kanau wa hpe matsun ai. "Daina, dai nang hte chyai ai Naurai Lu hpe wa woi yup u yaw. Gawk... Ngai hpaw ya na, hpa n ra yaw, anhpu ni galang lang gaw pyaw ra ai, galang lang sha yaw." "N htuk a dawng?" Hkamsha La mau mau ngu let tsun u ai. "La ngu ai gaw, hpa mung galaw sharin ra ai." Tu Ja mani sai, myi rim rai, nhka ntawt hte Naurai Lu hpang de madun dat nu ai. "Naw lu ga law, agu La, dai yu, ngai pyi ma hkra lu kau sai, nang mung lu kau ra ai, ngai hkrai she lu yang gaw ngai grai sum ai." Naurai Lu gaw shi a myit hta, "Ya ngai numhking sa ngut ai shi jan ya rai sai." Ngu lagu sawn taw nga ai. "Ngai tsa ram re sai, rai n lu sana law." Hkamsha La ningdang kau nu ai. "Nang la yi rai a ta? Ngai num jan pyi yawng ma hkra lu kau sai, nang dai hku n mai ai." Naurai Lu gaw n lu n mai ngu Hkamsha La hpe shakyin dat nu ai.
"Mana law, ngai hpe dai hku hkum jasum sha law, ngai made magrau grang ai la shabrang wa hpe mi, nanhte e sha jahkrit ai bo re ni." Hkamsha La yawng a ta hpawk nsen kaw tsa gawm dawng she rai lu shingjawng nga ai. Dai tsa ni gaw manu n jaw ra ai hka laban zawn, du makau hku she gaprat pru wa hkra lu nga ai. Shan ju seng na mahkawn shabrang ni a garu nsen ni shana yuptung tung wa ai hte gaungui zim mat wa sai. Hkamsha La hte Naurai Lu gaw yupgawk de gumpye gumpa she rai hkra shang mat wa manu ai. Tu Ja mung tsa grai bri mat sai re majaw yupgawk langai tam la rai yup mat nu ai. Dai shana gaw shanhte myit ai lam ni yawng, myit ai kaw hkrak sha rai sai. Hkamsha La a hkai li mung Naurai Lu a hkum yinwa kaw makrung prut wa sai. Dai hpang kaw nna, Naurai Lu hpe Hkamsha La dingyang yang wa gawan wan rai nga ai. Naurai Lu gaw Hkamsha La hpe grai chye shingnyeng sha nga ai, abum hkan lunghtawn hkan woi dung yang, "Lunghtawn lungma ja ai law, ahpum rit law." Nga, shata jan gata woi hkawm yang, "Gatsi bungli ahpawt ai law, ahpum rit law." Nga, maling gata hkan woi hkawm yang "Kinsa ju ju la ai law, ba rit law." Ngau ai. Shing rai, Hkamsha La gaw Naurai Lu a hkai makrung kaw namhpun gade she dat kau nu ai.
Naurai Lu a kraw gata na ma gaw lani hte lani kaba wa nga ai, shingdang kau lu n mai rai, ganu a kan hpe ganawng shabawng wa sai. "Ma Lu, dai nang a kan bawng wa ai zawn rai nga ai le." Shan ju seng kaw na lauban jan shan ju gadoi let Naurai Lu a kan zoi yu nna san dat nu ai. "Yahte shan nau sha jahkru kau ai majaw, hpum wa ai rai nga ai." Naurai Lu myiman sum rai, loi gaya gaya rai ga htan htan dat nu ai. "Nang yahte Hkamsha La hte nau wa ni gahtep sai lu, hpang de ningnu ningwa ni ngai kaw mara tam wa na ra ai, dai Hkamsha La gaw ganu gawa mung jau kaw nna n lu mat sai re, gahpu wa gaw jawng naw lung rai, nta kaw gadai n gawn ai majaw wam hkawm hkawm rai nga ai. Nang ning re dinghku kaw shang wa na ngu myit da nu ni?" Lauban jan loi san numti dat nu ai. "Oh!" Naurai Lu gaw shi a numhking n sa ai shata mali jan rai mat sai re hpe madu chye nga ai re majaw, lauban jan shing ngu san dat jang, grai gajawng kau nu ai. Shi a myit kaw lunglung yuyu nga mat nu ai, "Ma gun la nna she Miwa mung kaw nga na lakmat hpyi la na ngu ai wa, ya dinghku shade yak ai kaw hkrum ai gaw, ganing wa di sana rai." "Nang gaw ngai hpe nan jahka mayu ai zawn nawn na lu, ngai ningnu ningwa ni hpe hkrit ai majaw she tsun shadum ai lu, raitim anhte shing wu-ring nga timung, tinang a dinghku tinang she lata la ai re, madu myit dik jang chyawm gaw rai sai, nanhte ma ni gaw sak naw ram ai, lam naw galu ai, ganing mung chye rai wa ai, ya na yak hkak nga ai hpe sha n mai yu ai." Lauban jan ta na shan mung "Shet!" she nga mot nga nu ai.
Naurai Lu lauban jan shing nga jang, shi a shingran kaw shingran ninglen mu len mat wa ai gaw, Na-ru bum kaw na lam ni hpe bai dum dat nu ai. Shanwa ni mare kaw masha ni e masha pyi n shadu ai nga lai wa, gaji hte bum hkaraw hkan de shata hku sa nga nga rai, nta de gaw hpang num ganu a gasha ni nga, shi gaw nta wa yang mung n mai, gaji hte yi wa hkan sha gaw n kam nga hkawm rai, sak shi kru ning du ai hte Miwa mung hkran de shang mat wa ai rai nga ai. Shi gaw myit gata kaw sha shi hkrai "Gara hku mi raitim, Miwa mung kaw na na nga ta na hku sha ladat sho ra sai" Ngu daini na zawn re ladat sho nu ai. "E law, e law, chye sai yaw lauban jan." Loi wa mai mai bai nga hkra shingran kaw na prang pru wa let ga htan nga nu ai. Myit kaw hpa mung dodan kau ngut sai Naurai Lu gaw shana Hkamsha La bai lung wa jang, shan ju seng kaw manam law nna, grai kyin nga tim, Hkamsha La a sengke kaw ra rai hkan nang mat wa nu ai. "Ngai ma gun sai." Naurai Lu gaw Hkamsha La hpe tsun dan dat nu ai. "Hpa oh!" Hkamsha La gaw majawi sumtsaw sumra lam naw hkam sha taw nga yang, Naurai Lu shing nga jang gajawng mat nu ai.
"Nang ngai hpe lama n hkam tim, ningsha hpe hkam ra ai, nang a gasha ndai nye a kan kaw rawng taw nga sai le." Shi akan kaw ta madi nna Hkamsha La hpe numti nga nu ai. "Gadai wa nang hpe n hkam na ngu ai wa, ngai she hkam le, Lu, n tsang ra ai yaw, nang hpe ngai tsaw nga tik tik ya re." Hkamsha La gaw hpa mi n chye tim wom ya gaw wom nga tik rai nga ai. "Rai jang ngai nang hte nta wa na, ngai hpe agu yan amoi kaw woi wa rit." Naurai Lu chye nga ninglen dingsang Hkamsha La hpe chyam dat nu ai. "E, Lu e, ngai gaw jahkrai mat sai wa re, ya nta kaw ba annau sha nga ai. Ba she ganu gawa rai na wa, yahte jawng lung mat wa sai." Hkamsha La shing ngu tsun dat sai. "Hpa mi nga nga ngai hpe nang a nta de woi wa ra ai, ninghpu ba nta n nga tim lawu lahta ganu gawa jinghku jingyu nga na re, she woi wa yu rit." Ngu shakyin shadut taw nga ai. Dai shana jang Hkamsha La gaw Naurai Lu hpe nta de woi wa sai. Yi-nam marang ashe nga ai kaw Hkamsha La yan Naurai Lu gaw nta kaw shinggan pyi n pru hkra shat sha shadu sha rawng nga nga rai ma ai. Dai htingbu kaw sha nga ai ganu ba yan gawa ba gaw mau let yu nga ma ai.
Ya num dai gasha wa hte nta kaw tsawmra na hkra nga yang, manam re mung n nga, ganam wa tai ai re mung n nga rai, Ma La hpe mung mau, num dai hpe mung mau rai nga ai. Ndai hku sha yu yu nga gaw n mai sai ngu, ganu ba da-sang Ma La hpe wa tam masu let: "Ma La, lawan rawt yu, nu ba hpe wa lawng kaw na wa gasha naw sa rim ya rit, wa gasha dut sha na ngu ai wa, ata machyi nna n mai rim nga ai." Ganu ba gaw nna n-gau kaw wa tsap let shaga nga ai. Loi hkring mi la yu tim hpa mung n nga jang, ganu ba da- sang chyinghka wa ganawng hpaw yu yang, Hkamsha La gaw nbang dun kaw yup, Naurai Lu gaw chyahpung dun kaw nba htinggrum hprui rai yup taw nga ai hpe wa mu nna dingsang, "Ya du hkra hkra yup ai gaw." Ngu masu rai nba gang gun galang dat yu yang, Naurai Lu hpe mu ai hte, "Ya ndai gaw gadai gasha re?" Ngu san dat yang, nbang dun kaw yup taw nga ai Ma La rawt ngawi rai pru rawt mat wa nu ai. "Ma La a manang re." Machyi jigrawng ngawi ai nsen zawn nga ai hte sha Naurai Lu htan dat nu ai. "E, ya, gara kaw na hpa bo gasha rai?" Naurai Lu hpe Hkamsha La a ganu ba myiman nsam lai kau nna san shaga sai. "Na-ru na, Naurai gasha re." Nga nna shaga hpaw la masai. Ganu ba myit kaw lagu mani let, gawa ba hpe wa hkrum mat wa nu ai.
Dai kaw na ganu ba yan gawa ba gaw shat rau jawm sha ga ngu shaga gahkyin la rai jawm woi nga sai. "Ya ngainam Lu ma hkum hkum ai zawn re ai gaw?" Hkamsha La a ganu ba kan de yu let san dat nu ai. "Re law." Naurai Lu gui n gui nga ai nsen hte sha wom dat nga ai. "Ya dan nga ai gaw, shata gade wa rai sa?" Hkamsha la ganu ba myit kaw hpra nga tim, hpa mung mu yu jin sai re nga yang myiman nsam n galai nga ai. "Shata mali rai sai." Naurai Lu gaw gumgai jan a man kaw loi hkrit taw nga ai. "Ya shade na sai wa, nan lahkawng anhte gagu gamoi ni hpe mung hpa n nga ai gaw, tsirung sa yu ra ai she rai yang, nanhte hpa n chye ai nga yang hkrit mung n chye ai wa she rai nga myit dai, ma hkum rai jang, lusha sadi ra, bungli galaw yang sadi ra, lam shagu sadi ra ai re le. Nan lahkawng tsirung de lawan she sa yu na di mu." Hkamsha La a ganu ba loi shara shara ngu tsun matsun dat nu ai. "El Ningsha woi wa ai num gasha jan ma hkum shata mali rai sai da, hpa nga tim jawng de Ma Awng hpe she naw shana ra sai rai nga ai." Gumgai jan gaw nta de dingla wa hpe wa tsun dan nu ai.
Jawng kaw jawng lung nga ai Maumat Awng gaw dai lam ni n chye ai re majaw, ganu ba shi hpe shana dat nu ai. "Ma Awng, ningnau Ma La num wa mi woi tawn nga ai law." "E ya! Ya dan nga ai gaw, gara kaw na wa rai a ta?" Maumat Awng loi mau mau nga san dat nu ai. "Na-ru na re da." "Ya dai Myen mung de na she rai re nga ai le, Myen mung num n ra ai ngu yang, ya!" Gahpu ba Maumat Awng grai n na ra taw nga ai, shi a myit kaw gaw kanau wa htaning shi matsat ning du jang, hpyenla la mat wa shangun na ngu sawn taw nga ai. "Ma Awng e, daini pyi hpang lam she rai sai, ya ningnam tai na jan kun n tai na kun, ma hkum pyi shata mali rai mat sai." Ganu ba myit mi apu nga tsun dat nu ai. "Ya! dai daram lawan wa ai bo i!" Maumat Awng agajawng nga ga htan dat sai. "Dai ni rai hkum tsun sa, ya nang ningnau Ma La hpe chyenan naw gayat yu u." "E rang." Maumat Awng myit kaw grai lawan hkra bungli hpe sumru nga ai, kanau wa galaw dat ai bungli shi myit da ai lam yawng shabya kau ya nu ai. Shi hkrai sha myit kaw "Ya Ma La mung sak naw gaji ai wa, ya kaw nna num ma hte nga mat jang, shi a prat gaw nta buga kaw nga nga ra mat sai rai nga ai.
Gara hku tim ya dinghku rai n mai de na re." Ngu myit la nu ai. "Ma La, ya nang masha ni a gasha e kan shabawng kau ya ai da oh." Gahpu wa loi shara shara ngu san dat jang, kanau wa gaw shut dum sai re nga yang agatsi nga mat sai. "Koi! La nang e, ngai shawoi ganing ngu sharin rin rai." Gahpu ba loi hkring la nna: "Ya nang gara hku myit sawn ai rai?" "Ya, la tim la na ngu nga ai le." Hkamsha La loi hkyum hkyum nga ga htang dat nga ai. "Gara hku la na rai, nang manang ni a ganu gawa gadai re yi chye, manang ni hpa bo gasha re yi chye?" Ganau wa ga n shaga mat ai majaw, dai lam ni n chye nga ai re hpe chye nna: "Dai yu yu u. Nang hpa mung n chye, ma gyin chyai sha chye, Ma La e, nang gaw ngai gahpu hpe gachyi mung myit n chye tau ya ai, ngai nang hpe tsun ai, sak shi matsat ning du jang hpyenla sa la na hku she ngu yang, ya nang dinghku de sha na she ahkyak shatai i!" "Ya ganing di na rang ba?" Gahpu Awng pawt shara wa jang, loi hkrit mat nu ai. "Ganing di? Nang galaw ai bungli gaw nang myit yu u le." Maumat Awng grai pawt let kanau wa hpe sharin nga ai. "Ma rai hkum lu, naw sa la kau mu! Nan lahkawng hpa chye ai nrai, tinang a hkum pyi tinang rai n lu gawnhkang la nga yang, ma bai bau ra na hku gaw n mai na re.
Na manang jan hpe san yu u, manang jan a ga mung madat ra ai, majawi mi manang jan n hkraw ai kaw mung n mai shagui ai." Maumat Awng ma la kau shangun na hku myit taw nga ai, "Ya tsi rung de i sa yu sa?" "Rai n sa yu ai." Hkamsha La mayu laraw laraw nga nna tsun nga ai. "Lawan, hpawtni tsirung de shawng naw sa yu masu, ngai hpe lawan bai shana dat, gumhpraw yi lu ai rai?" Maumat Awng kanau wa hpe grai pawt mayu tim masin gaw machyi nga ai. "N lu ai." Pra n pra nga ai nsen hte gahpu wa hpe tsun dan nga ai. "Ngai hkying manga shagun dat na, nang gumhpraw hpe ra ai kaw sha lang, majawi hkum lang kau." Maumat Awng madu a sumbu kaw gumhpraw n rawng tim, kanau wa dai daram gaw lang ra na re ngu rai, jinghku jingyu manaw manang ni kaw gumhpraw hkawi shagun dat nu ai. Hkamsha La yan Naurai Lu mare buga kaw nna mado daru de mawdaw sa jawn la rai, Yinkyang ginwang myu de sa wa nga masai. Naurai Lu gaw mawdaw na mat ai majaw Hkamsha La a gahpa kaw shamyet nga ai. Makau kaw dung ai shabrang la langai, shan hpe yu nna kraw kaw: "Aga, ndai yan htinggaw chyawm grai tsawra hkat nga ai, ngai a gui ganu jan gaw Miwa la ni hte hprawng mat." Ngu myit la nga u ai. Modo myu kaw du ai shaloi she Naurai Lu dum pru wa ai. "Wora hpa bo re ta?" Galoi mung myu kaba de n sa yu ai Naurai Lu ma gasha ni gasup ai bo mado hpe mu ai hte grai mau nga u ai. "Ama ni hpe asawng shalet ai bo shara re." Hkamsha La grai si mani hku tsun dan sai. "Ya an a gasha hpe mung ndai kaw sa woi gasup na re, labu palawng mung grai tsawm ai mari shabu jahpun na re." Naurai Lu mani sum sum sha rai gasha hte ndai shara hkan e gasup chyai na shingran mu nga ai.
Naurai Lu shing nga jang Hkamsha La hpa n chye ngu mat nu ai, gahpu wa shi hpe ma sa la kau nga ai gaw, ganing wa di na rai kun ngu myit ru mat nu ai. Shi a myit kaw rai n pra ai ma hpe matsan dum mat nu ai. "Naurai Lu." Tsi sara mying shaga dat sai. "E, ndai kaw rai nga ai." Naurai Lu Miwa ga n chye madat ai re majaw, Hkamsha La wom ya nga ai. "E, ya ma gawa mung wa madat yu u. Ma hte ganu grai hkamja ai, ma gaw anhte yu ai hku nga yang shata manga daram rai sai, ya ngai ma hkamja wa ai bo tsi la ya na, dai hpe matsun ai hku hkan nna wa sha jang mai sai." Tsi sara ma shi mu lu ai hpe tsun nga ai. "Sara, ya ma n mai jahkrat kau sadawng?" Hkamsha La tsi sara ma hpe san dat sai. "E, ma grai kaba mat sai, ya la jang gaw ganu kaw machyi hkra wa na tai sai. Shabrang wa e, ma n sho kau yang she grau gaja na re, ningsha ganu mung nambat langai lang ma hkum tai ai re, ndai lang jahkrat kau jang, hpang de ma bai ra mayu ai shaloi yak na ra ai, hkum sho kau, ma shangai tawn mu." Tsi sara ma n magap hkra tsun dan taw nga ai. "E, e, mai sa sara ma." Hkamsha La myit kaw na lungbau kaba hkrat mat sai zawn nga myit mi atsang nga dum mat nu ai. Naurai Lu hpe sha jasat la rai gawk hpaw da ai de wa mat masai.
Yinkyang pa na bungli hpui hpui sha nga bung pyaw nga ai, Hkamsha La a myiman kaw na ndang makawi ai kabu myit wa manang ni e pra pra mu lu nga ai. Shi a myit hta nambat langai lang gawa tai ai ngu arawng lu taw nga ai, gahpu ba hpe n masu ra ai sha, shi myit ai kaw raw rai sai re majaw kabu nga ai. "Ba, ma grai kaba mat sai da, la kau na hku n mai sai da law, tsi sara ni tsun ai." Gawk kaw du ai hte shinggan de yin rai pru wa nhtawm, loi kabu kabu nga ai nsen hte gahpu ba hpe tsun dan nga ai. "E, ya dan nga ai gaw." Maumat Awng kanau wa a ga nsen hpe madat ai hte kanau wa hpa myit nga ai ngu yawng chye kau ya nu ai, ga manawng sha ngaw ngu htan dat nu ai. "Ba e, annau a gam maka rai nga ai, ya ngai chye ai hku gumhpraw tam shakut na re law, nang myit hkum htum yaw." Hkamsha La gahpu ba hpe myit shapyaw ya nga ai. "Shing nga jang rai sai." Maumat Awng gaw kanau wa shi hpe majoi mi myit shapyaw ai re, kanau wa ma bau na atsam rai n lu ai hpe chye nga ai. Dai shani kaw nna Maumat Awng jawng kaw nan jawng n lung ra ai shaloi gumhpraw sa tam rai, kanau wa a ma Iu ai kaw lang na matu gumhpraw hkyem taw nga ai.
Maumat Awng jawng kaw jawng dat nta yu wa ai ten hta, ma shangai wa na sha rai sai, raitim kanau yan hpe rai n hkungran ai re majaw, htunghking hte sha tim labau shawng naw matut ya na re ngu dumsa ni hpe shaga la rai, wa ganu mi sat di kumba nhpang kaw woi shalai la sai. "Ya daini kawn ngainau ngainam yan ya dinghku ngawn nan nga re sai, akun dinghku lum nan nga re sai, myit mung su, sut mung su wa mu ga, nan she hpushawng hpuba tai, akun dinghku gunhpai masit re lu, ba ai hkum nga, jin ai hkum nga, hkup ai hkum la, hka ai hkum dep, sau ai she sha na, dui ai she lu masit e." Maumat Awng grai kabu hkra hkaw let Naurai Lu yan Hkamsha La a nbo shat sha ya nu ai. "Aka law, moi, nshang machyi wa re ai law." Dawdap kaw yawng hkum hkum rai hkungran jaiwa naw wa ai laman, hkawdap kaw na ganam jan Naurai Lu gaw ma shangai machyi bang wa sai. "Ma Awng, ningnam Lu ma shangai wa hkyem nga ai. Modo she lawan tam yu u." Ganu ba gaw Maumat Awng hpe tsun nga ai. Hpuntai ya gat kaw du yang, gat na tsi sara ni n gui shangai lom ai, tsirung kaba de she lawan yu mu nga nna, tsirung kaba de sa wa masai.
Maumat Awng yan Hkamsha La yannau gaw myit kaw Naurai Lu hpe tsang ai majaw, dai shana na mawdaw gaungui la ai zawn nga, ya nai yang mawdaw la wa hpé"Loi gawt shachyang u." Ngu hkrai shadut nna, mawdaw la wa pyi shannau hpe n kam shaga mat sai. Shana hkying shi langai jan e tsirung kaw du sai. Tsi sara ni hkap jep yu nna, shangai ten n du ai, yup gawk de wa la nga mu nga, gawk hprai ya sai. Tsirung kaw tsi sa tsi ai masha ni hkrai rai nga ai, chyahkring hkring rai jang, kaga htap hkan na machyi masha ni madai pru wa wa rai nga ai. Maumat Awng shi hkrai sha tsirung na ntawt kaw sa tsap nga ai. Shi hkrai daina na nbung nde jan lagyi ai gaw ngu palawng kaba hpe galaw gang gahtep la rai, ganu yan gawa shannau grai naw gaji yang jahkrai kau da sai, ganu n nga mat wa na shawng e, kanau la gasha langai bai shangai ai, dai shani ganu n nga mat sai, dai kaw na shi a myit kaw "Ma shangai yang gaw ganu a sak sumri hkra ya wa chye nga ai. " Ngu myit pu let tsap nga ai. Dai majaw ma shangai wa ai bai mu jang myit kaw grai hkrit nga nu ai. Tsi sara langai mi pru wa nna "Nta masha ni asen htu mu." Nga let laika pa langai sa ya dat nu ai. Tsi sara ma gaw yu yang sak loi kaba na zawn rai sai, Maumat Awng hpe she laika pa man kaw di di sa ya dat sai. "Sara ma, ndai she ma gawa re." Hkamsha La hpe madi madun let tsun u ai. Hkamsha La "E, myit kaga de rai mat nga ai." Nga rai asen htu nu ai. "Aka lu, bai machyi wa re nga ai Io." Naurai Lu madai let tsun ai. "Hka hka ngai tsi sara hpe naw sa tam n-ga." Hkamsha La madu jan hpe masin yu machyi ai majaw tsi sara ni hpe bai tam mat wa nu ai.
"Ya rai gaw rai wa sai, chyahkring mi naw la mu." Tsi sara ma jan loi nji let tsun kau da nna tsi gawk de bai nhtang shang wa mat sai. "Tsi sara ndai ni, manang jan machyi ai ngu yang, hpa mung n chye di ya ai kun e." Hkamsha La pawt mayu wa ai myit rawng wa nu ai. Maumat Awng hte Hkamsha La shannau gaw, Naurai Lu hpe grai matsan dum tim ganing n chye di ya ai re majaw, yu let sha shalai nga ma ai. Loi mi hkring re hte aku kaw sai myang rai wa jang, gajawng jahtau marawn dat manu ai, tsi sara ni dai shaloi she aku ganawng lang rai ma shangai dap de ganawng bang mat wa manu ai. Shinggan kaw la nga ai Maumat Awng gaw myit nshu nshang ngu taw nga ai, "Ya manang ni a gasha hpe, ngainau e kan shabawng kau ya nna hkungran la ai, ma shangai ai kaw ganing nhten rai yang, ganu gawa ni hpe ganing ngu tsun dan na rai kun?" Myit wamwam damdam nga mat nu ai. Shana hkying lahkawng jan e ma la gasha shangai dat sai. Shanhte nlang a myit kaw n chye tsun hkra kabu mat manu ai. Tsirung kaw na nta wa ai shata mi tup ai hte, Maumat Awng gaw kanau wa hpe chyahpung de shaga la nna "Ya, ma mung lu sai, nang dinghku la rai sai, gawa tai ai lit n kam tim gun ra sai, lawu lahta ganu gawa nga ai nga tim nang hpe ma bau ya na ni n rai nga ai, ma chyahkring sha hkum lu jat sa lu, ma nau law yang nang n dang bau ai, ja gumhpraw hkrai lang ra wa na rai nga ai." Maumat Awng shing ngu kanau wa hpe gumhpraw hkying lahkawng ya da rai, jawng de lung mat wa sai.
Naurai Lu yannu wa ni gaw dai ma dinghku kaw dinghku bai de ai re nga yang, gumhpraw mung n chye tam rai, kagu wa Maumat Awng e shagun jaw jaw re gumhpraw hte sha shalai nga ma ai. Dai hta n-ga, laning mi a hpang ma mung langai bai lu jat rai, dinghku lit gaw lani hte lani li wa dangam rai nga ma ai. "Ma La, nang shinggan de gumhpraw tam mat wa na hku di yu, ya ma yan mung kaba wa rai yang, hpa hte bau na ngu nu ta?" Madu jan Naurai Lu gaw Hkamsha La hpe shing ngu tsun nga ai. "Ma yan naw gaji ai, nannu ni hpe hkrai tawn da n mai na re law, ya ngai hpawtni kawn mare hkan tim, kuli hkan shang na rai nga ai." Hkamsha La madu jan a ga hpe shing ngu htan nga u ai. Hkamsha La mare hkan nchyang shang rai, madu jan yannu ni hpe nta kaw sha nga shangun rai shakut nga nu ai. Lado ya sha n rai yang galai lai rai nga ai hte maren, ma yan mung mali manga ning du wa masai, jawng lung na sak gaw ram wa rai, Hkamsha La mare na gahkau wa hte Miwa ga de bungli tam galaw mat wa sai. Nta kaw nga ai Naurai Lu gaw madu wa Miwa ga rai mat wa ai hpang, nta kaw shannu ni hkrai loi nga lagawn dum rai gat de sa sa rai nga ai. Myit kaw na mahkawn myit wa, ma ganu raitim n dang gang sazim nga nu ai.
Ma yan hpe hkrai nta kaw tawn kau da nna, manang ni hte chyai hkawm mat mat rai nu ai, ma yan gaw matsan mayan rai htingbu ni a nta hkan nga hkawm rai nga ma ai. Lani mi, shiga amyu myu nga na ai gamoi jan gaw da-sang mawdaw lam kaw Naurai Lu la langai hte nta de wa sai hpe mu ai majaw, nta de hkan nang lung wa yu nu ai, dai la wa hte sun ginwang kaw bungli jawm galaw nga ai hpe wa mu nna, "Ngainam, dai gaw gadai wa re, ya ngaisha Ma La n nga ai hte rai nga ai kaw, nta de kaga la ni hpe woi wa ai n htuk na re." Ngu sa daru dat sai. "Ngai a manang she re, ya ndai hkaimu bungli kaw na hpaji sara tai ya ai re, gaiwang na hkai nmai n tsawm hkraw ai majaw shi hpe naw sa yu shangun ai wa re moi." Gamoi hpe majawi ngu masu nga ai. "Oh, sara she rai a hka, rai nga ai, rai nga ai, simai lau she hkai shakut mu, ya ngai mung di sha lom na rai nga ai." Gamoi jan gaw myit kaw la gasha dai hpe naw chyam yu ra ai ngu, "E, ma, nang lama rau yang, hkai a sun na simai kaw shingtai lahka sha sha rai nga ai, she naw wa yu ya rit law." Ngu ga wo wo dat nu ai. "E, moi e, daini gaw shi htaw, Wuhpai gahtawng de manang ni kaw bungli hkam kau sai da, ya na lang wa jang she mai sai." Ganam jan she grai lawan hkra ga gashun htang kau ya nu ai. "Chyahkring mi sha wa yu da ya marit le, chye ai ni yu yang gaw chyihkring mi she re." Gamoi jan mung da-sang shadut let tsun nga ai. "Ya na lang, wa yu ya na rai nga ai le, ya ngai ya gaiwang kaw na pyi, grai naw yu ra ai law, ya na lang, ya na lang." Naurai Lu gaw dai shi a sumtsaw la wa hpa hkai mu hpaji n chye nga ai majaw, masu ningdang kau ya tik tik rai nga ai. "Rai jang gaw ya na lang wa yu ya mi rang." Gamoi jan myit gata kaw ntsa lam gaw chye mat sai re majaw, n san shadut mat sai. Dai shiga ni hpe gamoi jan Miwa ga bungli galaw ai gasha Ma La hpe shana dat nu ai. "Nang nta kaw ngai hpe myiman ka ya ai, n hkungga ai lam gaw hkum galaw re lu, ya ngai sumtsan de rai ai nga rai, myit shut myit hten na lu." Hkamsha La shing nga ai shiga na la lu ai majaw, myit grai ga-un let gasha ganu ni hpe chyenan matut shaga dat sai. "Ngai wa hpa shut na law e, ame nta kaw sha nga nga ai, nang gumhpraw atsawm tam shakut u, ngai n sha tim ningsha yan sha ra nga ai." Naurai Lu gaw madu wa gasha yan hpe masin grai machyi ai re chye nna, gumhpraw bai hpyi aput dat nu ai.
"Ya ngai gumhpraw dum de gumhpraw hkawi ai ahka pyi rai n wa ma nga ai, ndai ta nannu ni kaw shagun kau ai pyi mun mi du mat sai le, bum ga she nga ai wa mi gumhpraw shade de lang ai gaw." Ngu nhtang shara dat nu ai. "Ningsha yan kaw hkrai hkrai lang kau ai re le, labu palawng mari ya ra, tsirung sa ra, u shat wa shat mari ra, ningsha yan yahte ahpum asau rai wa sai." Naurai Lu shi a gasha yan palawng shi shi rai, awo wo ai majaw, lasi kyip kyip rai nna, nyep gaw sho sho re ma yan hpe yu let tsun nga u ai. "Awa! Awa! Nang galawi wa na rai?" Makau kaw myi atu tu rai tsap nga ai gasha yan ganu hte chyenan shaga ai gawa re chye ai hte, jahtau she jahtau kabu nga ma ai. Hkamsha La gasha yan a nsen na jang grai kabu mat nu ai, madu jan hpe gumhpraw hkying lahkawng bai shalai ya sai. Gumhpraw lu sai madu jan Naurai Lu gaw gasha yan hpe nta kaw tawn kau da rai, mali manga ya nta pyi n pru wa ai, shi a shinggan la wa hte bai brak mat wa sai. Lahpawt mi, gahkai gashu yan pe wa krum ngu lung wa ai, gashu yan hkrai shat gatsi shalau sha taw nga ai hpe wa mu sai. "Ba gashung ai." Ganau wa gaw marang htu yu ai lanam ta jahpawt re majaw grai gashung dum nga nu ai, hkumbai hkrai kaka kawkkawk re lawngta gadun palawng sha hpun rai, shat saboi makau kaw dep n dep rai man let gashung gari shaga nga ai. "Hka, hka, ba kaw wa rit, ba ahpum na."
Gahpu wa kanau hpe ahpum chyit rai, "Ya yi naw gashung rang? Naunau." Hpa mung n chye ai ma yannau gaw shannau hkrai ahpum hkat nga ma ai. "Naw gashung ai ba." Gashung dik dum ai majaw shing nga u ai. "Azi zi, naunau hpe ahpum yang, ngai mung gashung wa re nga ai law." Gahpu wa kanau a lagyi laga nga ai hkum ahpum nna gari taw nga nu ai. "Shat kawsi ai ba." Ganau wa shat bai hpyi nga u ai. "Hka, ba naw yu yu ga, shat i naw nga ai kun." Gahpu wa gaw dai saboi kaw na shat di de man yu nna: "Naw rawng nga ai, e, ya, shat mun tu wa sai rai nga ai, lawan sha kau ra sai." Nga rai kanau wa hpe nshu lamu tu mat sai shat shatsu bot nga ai. "Ma, nhpa sha ai rai?" Gahkai n-gup hku shat hkyep hkrai hkrai re gashu yan hpe wa san nga ai. "Ashat sha le." Gashu grau gaji ai wa gahkai hpe tsun dan nga ai. Gahkai gaw dai gashu yan matsan mayan rai shat gatsi chyayat sha nga ai hpe wa mu ai majaw, hkrap ai hte rai ma yan hpe nta de woi yu wa nna shat shadu jaw, palawng tam jahpun rai nu ai. Gashu yan gahkai hkrap jang gahkai hpe: "Hkai, nang machyi ai i? Nhpa rai hkrap ai rang?" Nga bai san rai, gahkai grau hkrap kau nu ai. Hkamsha La gasha yan a shiga bai na la ai majaw, hpang shani njang nbung li jawn nna, nta buga de wa sai. Shi nta yu wa ai lam gadai hpe n tsun dan ai, nta kaw hprawt rai, gasha yan ninggau kaw tsap nga mala ai. Gawa hpe mu dat ai ma yan gaw: "Awa, awa." Nga marawn let gawa hpang de kagat htim bang wa manu ai. "Ya ningnu gaw?" Hkamsha La gasha yan hpe hkap san ai. "Nu htaw manang ni kaw sa mat wa sai da. Grai na hkra nta n wa sai."
Gasha Ma Gam tsun dan nu ai. Hkamsha La a myit kaw kam hte n kam naw gayau taw nga ai re, ya tinang myi hta nan gasha yan palawng je je rai, hka mali manga ya n shin sai re hpe mu ai hte gasha yan hpe ahpum let hkrap nga nu ai. "Ya nang gara kaw nga nga a?" Hkamsha La madu jan hpe chyenan kaw san dat nu ai. "Annu ni nta kaw rai nga ai le." Naurai Lu gaw madu wa nta kaw du nga sai hpe n chye ai majaw, grai naw masu nga ai. "Ya ngai nta kaw rai nga ai le, ganing rai na nang hpe n mu ai rai!" Hkamsha La madu jan hpe agaya ngu san numti dat nu ai. "Ngai gat de chyahkring mi sa mat ai wa re, chyahkring re hte yu wa sai." Madu wa n chye na re ngu dingyang naw masu tik rai nga ai. Hkamsha La myit kaw "Num ndai hpe gaw atawk mani kau na." Ngu grai pawt mat nu ai. Naurai Lu myit kaw loi hkrit tim, hpa n ra ai zawn rai, hkausoi sha mari lang rai nta de yu wa nu ai. "Anu nang gade sa mat ai rai, nta n wa ai." Gasha Ma Gam gaw ganu Naurai Lu hpe mu ai hte san dat nu ai. "Nang gaw ganing rai ai myit rawng ai rai, nang hpa bungli galaw ai lam ngai yawng chye sai. Nang wa gat lung mat i? Dai ningsha tsun ai madat yu u, mana nta n nga ai da le." Hkamsha La gaw madu jan hpa rai ai lam hpe manang ni kaw san la sai re majaw, soisam na chye mat sai. "Nang ngai hpe n kam ai, ya agatsi nga nna nta de hprawt rai ai hpa di ai ga rai? Ngai hpe n kam ai mi, nye madu wa re nga ai gaw." Naurai Lu gui lagut share hku gaya pawt pawt wa nu ai.
"Nang hpe she kam yang ngaisha yan, shat chyayat sha, nta kaw gashung si rawng nga na pyi n chye na rai nga ai." Hkamsha La pawt ai hte rau madu jan hpe shabyi "Pyek!" nga hkra bye dat ya nu ai. Naurai Lu hkrap let nta kawn pru mat wa na nga, arung arai ni hta lang rai, pru mat wa nu ai. Naurai Lu pru mat wa ai hpang, jinghku jingyu ni hte Maumat Awng gaw "Gara hku raitim, ma yan ganu lu ra na re." Ngu kanau yan ganam hpe dodap kaw bai shaga shadun tawn sai. N ju hkat mat sai yan gaw u la yan htim hkat ai zawn yawng a man kaw pawt hkat wa masai. "Nang zawn re gui ganu, ngai hpe gumhpraw tam sa nga, nang rang nta kaw la tam i! Gui she re, wo ningsha yan myi le le rai yu nga ai le!" Hkamsha La nta ting a man kaw madu jan hpe ta hte shon rai matsa taw nga ai. "Ngai i la tam hkawm? Nang sakse la shapraw u! Ngai la tam i! Ngai wa la tam i!" Madu jan Naurai Lu mung sa hka she gama hkra pawt taw nga nu ai. Kagu Maumat Awng: "Nan shade de nga hkra hkum ga-law mu, myit hpe naw shagrit shanyem shazim mu, hpa mi nga nga ama lahkawng a ganu gawa rai masit dai. Shawa dotsa a myiman hpe yu ra ai, ma yan hpe matsan dum ra ai." "Re law, nan lahkawng a myit hkrai shadang machyu yang ganang mai na, ma yan a matu sharang kau ra ai, anum ala ngu ai gaw gadai mung chye shut chye hpyit ai, shada da hkyem sa hkat ra ai." Mare salang wa mung shing ngu tsun dat jang she zim mat wa manu ai.
Hkamsha La yan Naurai Lu gaw ma dinghku bai de ai majaw, daini na zawn re bungli pru ai rai nga ai. Hkamsha La gaw Miwa mung na rai, Naurai Lu gaw munghpawm Myen mung na rai, shan lahkawng ramma prat e chye hkat la ai shaloi sak shi matsat ning rai n hpring ai dinghku de mat manu ai. Hkamsha La yan Maumat Awng shannau gaw, ma gaji ten kaw na jahkrai mat wa ai yannau rai nga ai, sak matsat jahku ning sha naw rai yang ganu yan gawa shawng hpang rai machyi si mat ai majaw, gahkai hte sha nga kaba wa ai rai nga ai. Gahkai mung Maumat Awng sak shi sanit ning sha naw rai yang bai machyi si mat manu ai, dai kawn gahpu gaw ganu gawa mung tai gahpu mung tai rai, kanau hpe woi kaba wa nu ai. Ganau Hkamsha La gaji ai kaw nna ganu gawa ni e n lu sharin mat ai majaw, loi malat mat u ai, myit nsu nsu rai ai lai kyang hte kaba wa nu ai. Naurai Lu mung gaji ai shaloi ganu machyi si kau da rai, hpang num ganu e atsawm n chye woi nga, gaji hte sha bum na yi wa hkan nga kaba wa ai rai nga ai. Yawng yawng e daru sharin jang, shan lahkawng n ga-law ai loi mi na hkra hkring mat manu ai, wanmang kaw ju tawn ai hpun ni sha "Hpre, hpre." nga gahpre taw nga sai. "Hpa mi nga tim, ma yan a majaw rau naw nga mu." Maumat Awng shing ngu myit su ga hte shan hpe asawng nga ma ai. Loi mi hkring tim, kanau yanla htinggaw hpa n nga jang she "Ngainam wo ma yan hpe wa woi yup su." Ngu ganam jan hpe yupgawk de shang wa shangun sai. Maumat Awng gaw rung de bai lung wa ra sai majaw, dai hku sha galaw kau da ya rai, rung de bai nhtang wa mat sai.
Kumba Awng
