PU GANG SIN MACHYI NGA GA

Shawng de Sam Mung, Mungmyit Kudawng Kahtawng langai hta nga kaba wa ai numsha langai mi hte lasha langai mi a mabyin langai mi gaw, shan lahkawng yan kahtawng langai mi kaw sha kaji nga ai kaw nna nga kaba wa ai. Shan lahkawng jawng rau lung nga ai shaloi, jawng laika ni pawng lang rai nna nga kaba wa ai yan rai ma ai. Dai zawn tsawra hkat let jawng lung hpaji sharin la rai, laning hte laning gaw tsang mung tsaw wa, myit mung su wa sai majaw, shabrang wa gaw laika tsang sanit awng la nna Wunpawng mungdan Shanglawt Hpyenla galaw shakut sa wa ai.

Shi a tsawra dik ai kanawn manang mahkawn jan hpe numhtet ga sadi tsun hkat ai gaw, “Ahkawn, nang sadi dung let brang hpe la nga yaw, Ahkawn. Shanglawt lu jang, Ahkawn hte rau bai nga ga i.” “She mai law, Abrang myu a matu, mungdan a matu, sadi dung let hkawm sa u lu yaw, Abrang. Ahkawn mung la nga na nngai,” nga nna gasadi tawn da ai. Brang gaw 1962 ning hta Jinghpaw mung de myu a matu, mungdan a matu, rawt mat wa sai. Dai kaw nna gaw lani hte lani shata hte shata gaw lai lai rai, n ja la ai Ahkawn gaw, aten ladaw ni na mat wa nga sai. Asak aprat ni mung ram wa rai, dinghku de na manang mung lu wa, Ahkawn mung myit yu rai wa nu ai. Dinghku de mat sai majaw, kashu kasha mung lu mat wa rai nu ai. Manang ni Jinghpaw mung de n-gaw htawt lung wa na nga na ai majaw, annu wa ni mung myit jahkut da let, 1972 ning hta kanu mungdan rai nga ai Jinghpaw mung de n-gaw htawt lung mat wa manu ai. Jinghpaw mung kaw nnan naw du ai majaw, manam zawn myit kaji let naw nga nga yang, manang jan langai mi gaw “Ning e… gumhpraw yak la ai wa manang ni kaw na mam la htu nna gat de n-gu gun dut ga le… n kam ai i?” “She kam le… galaw ga le…” nga tsun nna lani mi hta n-gu htu gun nna gat de sa mat wa masai.

Gat n du ai lam e jan shang mat ai majaw mare langai mi kaw shang manam yup na matu, shang wa nga yang, shanglawt hpyenla ni nga nga mala ai. Shan gaw kaya kaya sha mi nga rai, n-gu lit gaw grai li ai hte lai wa yang hpyenla ni grai law hkra dung taw nga ai kaw, moi na Ahkawn a tsawra la ai Abrang mung lawm taw nga ai hpe wa mu hkrup dat nu ai. Kaya kaya nga nga yang she, Abrang mung “Ahkawn gara hku law, Brang ni gaw ndai hku sha re yaw Ahkawn” nga tsun dat ai hte, shi a myit hta nchye nkaw nga hkam sha bang mat wa nu ai. Shanhte wa yup na nta du shang mat wa sai. Nta madu ni mung “shang wa marit” nga hkap tau la ma ai. Manang ni gaw n-gu lit ni shayu kau rai, shi a n-gu lit mung hpai shayu ya nna nta madu ni hte jahta chyai nga masai. Manang ni kade shaga chyai timung shi gaw ga mung n shaga ai mau mau rai dung nga ai. Manang jan gaw “Ning hkum n pyaw ai i? Baw machyi ai i? ngu san yang, “n machyi ai law” nga sha htan tsun ai. Manang ni shat sha timung n sha, manang ni yup mat wa timung n yup ai shana tup myit n pyaw let nga shalai kau nu ai.

Nhtoi htoi wa sai majaw, n-gu sharawt gun let gat de bai sa mat wa masai. Gat kaw du ai shaloi, shi a n-gu mung manang ni dut ya nna, gat kaw na bai wa na hkyen masai. Manang jan langai mi gaw “e Ning ni ba nna hkring jang sha chyai na matu tsapa loi mi la gun ga le i?,” “she mai law la gun ga ngai mung gumhpraw bang lawm na” nga na wa mat masai. Lam kaw wa dung nga ai shaloi, “mi la gun ai tsapa sha ga i!” “sha mu, sha mu, ngai gaw n sha na nngai” nga ai. Manang ni sha ngut ai hte bai wa mat masai. Nta du na mahka kaw she “mi na tsapa n nga sai i?” nga na san pru wa ai.

Manang ni gaw “nang n sha na nga na anhte mahkra sha kau sai gaw” “ma jang, rai sai law” nga tsun let shi a myit hta sumru yu ai lam ni gaw, “ngai wa ngai she sadi n dung ai wa she rai nga nngai. Ya kaning di sana law, nye a masin ni wa kapaw ga na zawn hkamsha nga sai le, si mat na ngu yang mung ma bai lu da, nye a hkum e, Abrang gaw sadi dung nga ai wa nye a myit hta n dik la nngai law. Nta du wa nna ma ni gaw grai kabu let “Nu wa ra ai, Nu wa ra ai” nga nna ma ni gaw kanu a shingnoi shayu la ma ai. “Anu muk grai gun wa nga ai” “sha mu, nan nau ni a matu nu muk grai law hkra, la wa ya ai yaw” ngu tsun let shi gaw mau mau rai nga ai. Ma ni hpe “muk sha mu, Nu grai ba ai yaw ngu bai tsun dat ai. Ma kaba ai wa gaw Nu hpa rai ai rai? Hpa byin ai rai?” “Nu hpa n byin ai law ma ni gaw myit su ai gaw yup nga mu yaw” ngu nga nga yang, madu wa hkauna pa de na bai du wa ai. Shaloi, shi gaw “Oh ngai wa ndai hku gaw n mai sai, n byin sai lam wa, gammaka a majaw she, rai sai wa” ngu myit malai lu let n-gun awai la lu nu ai.

Ndai mabyin ni hpe bai myit dat yu yang, oh mungshawa hte hpyenla, pu gang sin machyi hkat nga ra nga a hka!, mungshawa kaw mung nye a nja hkawn nga, myutsaw brang ni kaw mung nye a nja brang nga, dai majaw ndai zawn re mabyin ni nang ngai kadai kaw mung nga na ga ai law. Dai majaw, mungshawa hte hpyenla gaw galoi mung, “pu gang sin machyi” hkat nga ga law. Ndai mabyin ni gaw kaja wa byin ai mabyin ni re ai law. “Du Kaba hpa mau nga nta?” “Sam mung ga na nye salum chyen pyen lung wa ai majaw mau nga nngai law…”

Sam Zet