NUM LAHKAWNG

NUM LAHKAWNG

LABANG ROI BU

Moi shawngde Ja Awng ngu ai hte Lu Ja ngu ai shannau mi nga ma ai da. Ja Awng gaw kanu yan kawa n nga mat ai hpang, dinghku loi nga mai ai la langai kaw wa mat sai. Matut nna gade ning nrai yang kanau mung dinghku bai shang sha sai. Ndum shami naw nga nga yang kanau gaw ma kanu masum a kanu rai mat sai. Rai tim kanau gaw dinghku matsan ai majaw grai jamjau let nga nga u ai. Ndai ten hta kana Ja Awng gaw dinghku sut su nga mai ai majaw, kanau hta pyi grau naw tsawm nga u ai. Ja Awng dinghku nga mai sut su ai zawn tsi mung grai su nga u ai majaw, shi a palawng sumbu kaw nawng e tsigut langai bang gun u ai. Lani mi hta Lu Ja gaw nam de angnam wa lai sa di na matu pru wa yang, kana shawng hte lam kaw hkrum nna, kana Lu Ja hpe kanau gaw gara de sa na wa maw a ta? ngu san dat u ai. Shaloi Lu Ja gaw shawng e nta kaw ma ni hpe woi shadu sha na hpa mung n lu ai majaw, hpak duk, angnam, wa lai sa di nna sha pyi manai jaw na rai sam ai ngu tsun dan nu ai. Shaloi kana jan gaw, e, Lu Ja e, nang nam de sa na malai shawng a baw na tsi chyawm me she yu ya rit, shawng nang hpe tsi yu ngut jang mam raitim, n-gu raitim jaw dat na ngu tsun jang, kanau grai kabu let kana shawng a baw kaw tsi yu ya bang wa nu ai.

Jan shang wa ten hta kanau gaw, shawng e jan mung grai she du mat wa sai gaw ngai hpe wa na ahkang jaw rit law, tsi mung n mu sai daram re ngu tsun jang, kana shawng gaw grai hkum rai, ngai naw gut yu ga ngu tsun let shi galoi mung sumbu kaw gun da ai tsi gut la shapraw dat nna, bai gut dat yang, tsi kanu kaba langai bai di hkrat yu wa ai majaw, kanau hpe: he Lu Ja nang tsun yang nye baw na tsi n mu sai nga ai n rai ni? hpa majaw tsi kanu kaba langai bai di hkrat yu wa a ta? nang gaw ngai hpe masu sha ndai i ? nang masu ai majaw dai hpawt ngai nang hpe jaw na ngu tsun da ai mam hpe mung ngai n jaw lu sai. Nang wa mayu jang mung wa nu ngu tsun dat jang, Lu Ja gaw grai yawn ai myit hte myiprwi si gatsut kau let jahpawt shi raw galeng tawn ai htingga hte n htu sha hta gun rai hpak duk nawng de rai mat wa sai. Hpakduk nawng du yang, angnam, wa lai ni grai tsit lali tsawm nga la nna, grai kabu ai myit hte n ji n gu rep bang wa yang, shi a shawng kaw lapu kaba langai hpum hkawan nga ai mu dat nu ai, jan gaw du wa htingga gaw nhpring hkraw rai nna, hpa mi rai rai, daini na matu gaw ndai lapu hpe mung ye gun ra sai ngu myit daw dan la nhtawm, nta de gun gagat mat wa yang, nta na ma ni gaw shat kawsi nna hkrap garu nga la masai. Lu Ja nhku shang wa ai hte: Nu a kasha ni e hkum hkrap mu, nu sha hpa shan gun wa ra ai law ngu tsun let shatdap de gagat shang wa nu ai.

Jahpawt shi dun kau da ai di na hpunlum pyi ganoi hkyet mat nga la sai, Lu Ja di kaw lapu kaba wa ru bang dat sai. Kasha ni gaw: Nu e kawsi ai law, kawsi ai law nga hpyi hkrap jang, kasha ni hpe: Ya jahkring sha rai sai, annu ni lapu shan lu sha na rai sai ngu asawng abawk nga yang, lapu dai gaw hpunlum gahtet wa nna gadap gadau wa ai majaw, hpunlum ni ga de kanawng hkaw pru wa sai. Mauhpa lam langai gaw dai hpunlum kanang hkaw hkra yang, kanang kaw ja hkyep ja tawng ni hkrat taw nga ai. Lu Ja shannu ni gaw mau ai hte kabu ai hte rai ja hpe hkan hta la masai. Dai lapu shan hpe sha nna nam bai sa yang mung, namdum hta ja tawng hkrai byin mat nna, Lu Ja hkannu ni gaw dai ja ni hpe dut sha nna lani hte lani nga pyaw mat wa masai da. Lu Ja gaw kana hte nhkrum ai shaning hku she na mat wa sai. Dai ten hta kana Ja Awng gaw shi a mara hpe dum nna, lani mi kanau Lu Ja a nta de sa wa nu ai. He, Lu Ja nannu ni gaw ngai kaw mung n pru hkra hpa wa mi galaw sha kyin nga mata? hpa baw sha nna gaw nga nga mit ta? ngư sa san jang, kanau gaw: Shawng e na baw kaw ngai tsi yu n tsai ai majaw, shawng nang ngai hpe mam n jaw nna hpak duk nawng de angnam wa lai ni sa rep ai shaloi, nawng kaw lapu langai hpum hkawan nga la ai hpe ye gun wa nhtawm, ma ni hpe wa shadu jaw ai kaw nna ganing rai lapu dai ja hkyep ja tawng tai wa in... shanu ni lusu nga mai mat ai lam ni tsun dan dat ai shaloi, kana gaw: Yi! ngai mung naw sa yu na, ngai mung grai ra mayu ai ngu tsun hpu kau da nna nta de bai gagat mat wa nu ai.

Hpang shani Ja Awng hpak duk nawng nga ai de sa nna, hpak duk angnam wa lai sa dan gun nga yang, teng sha nan lapu langai mung dai hpyin yang laing kaw hpum hkawan taw nga ai da. Shaloi, Ja Awng mung: Ara rai sai, ngai mung nye a kanau Lu Ja zawn ja grai law lu na sai ngu myit kraw gata e grai kabu let, lapu hpe bai ye gun nna nta de gagat te mat wa nu ai. Ja Awng nta du wa yang, shat kaw si ai majaw, shat naw gan shadu sha la na rai daw ai ngu shat shadu sha hkyem bang wa yang, n -gu n nga mat, myit htum nna mam she naw gan htu la n ga ngu myit du nna, lapu hpe gaw htingga kaw bang shadun da nna mam htu taw nga sai. Ja Awng a ma manga hta na grau kaji ai ma gaw lahkawng ning rai wa sai tim, ga naw rai nbrat nga ai. Ja Awng ma hpe nhku kaw shalam tawn nna mam htu nga yang, dai htingga na lapu gaw gumtsun pru wa nna ma hpe mata taw nga ai majaw, ma gaw kanu hpe: Nu, pu ta, pu ta ngu tsun ai ga hpe kanu gaw kasha lapu a ta mu nna tsun sam ai ngu shadu kau, lapu gaw shat kawsi ai majaw, ma dai hpe mayu na matu mata nga ai, ma galang bai: Nu pu ta, pu ta nga tsun jang, e law, e law, ma e tsaba wa jang pu ta daw ya na, yaw ngu tsun nna: Yoi sa yoi, yoi sa sa yoi tsaba wa jang pu ta daw ya na yoi sa yoi ngu nna man htu yoilu lu nga nu ai da.

Ja Awng mam htu ngut nna pru wa yang, ma hpe wa tam shamat kau nu ai, lapu mung ma hpe mayu hkru la nna pru hkawm mat wa sai. Ja Awng ya she ma a ga hpe nchye madat la nna byin ai lam dum dat nhtawm, ma a ga hpe shingran mu magang yawn myiprwi si gahte magang rai nga sai. Dai hpang Ja Awng gaw kanau Lu Ja hpe manawn ai, law hpa myit ni a majaw krup sha ai tsin yam rai na sai ngu myit malai lu nga nu ai. Maumwi ndai hta tsun shadan mayu ai lachyum gaw, shinggyim masha ni tinang hkrai sha, lu lu lu sha mayu, yak hkak ai jinghku jingyu ni hpe garum shingtau la na myit nrawng ai zawn re, tingkyang akyu sha myit nna, gahpu kanau kajan ni hpang gara kawsi hkrum yang n kam garum shingtau la ai ni gaw, lamu gade mung tim marang si nawm ai laru le bung ai. Mam hpun gade grung tim man nsi n ja ai hte mung bung nga ai hpe tsun mayu nga ai. Shingrai ndai laika hpe hkap hti n gun jaw la nga ai hta na nu wa myit su kanau kana kajan ni yawng mung, lahta de na maumwi kaw lawm ai Ja Awng a myit masa zawn n rai hkra sadi ga ngu shadum jahprang dat ai law.