BUNGLI GALAW YANG MAJU JUNG RA AI

BUNGLI GALAW YANG MAJU JUNG RA AI

Moi shawng de masha la langai wa gaw, amu bungli hkum sumhpa hte galaw hpang shajawng tawn nna, amu nau law ai majaw, gara bungli hpe mung atsawm nlu lajang jang rai, ba ba ai gaw grai ba lu gaw nlu sha re majaw mau jin nna, Hpunggyi wa kaw ta sara naw sa yu na re, ganing nga nna tsun ya na kun nga myit let sa wa sai da. Hpunggyi wa kaw sa du yang, shi Hpunggyi wa hpe e sara e ngai gaw nia kaw bungli galaw sha yang kade gaiaw tim niu sha hkraw ai majaw, nang sara wa ganing nga tsun sharin dat na kun ngu nna sa wa nga nngai law ngu sa tsun dan nu ai, shaloi Hpunggyi wa gaw hpa ga mung ntsun ai agatsi sha wa yup mat nhtawm, lahkawng masum ya din ai shaloi she, jahpawt e rawt wa nna, dai la wa hpe shaga la nna shi a ndaw kaw tu ai hpa-lap hpun kaba hta na hpa-lap naw di jaw rit nga shangun u ai, dai la wa gaw nyem ai kaw na hpa-lap gang di ya maw nga yang, Hpunggyi wa gaw dai kaw na hkum di, wa hkyi manam ai, htaw tsaw ai kaw na she di u nga nna loi mi tsaw ai kaw na bai di jang mung, dai kaw na mung wa hkyi naw manam ai, htaw grau tsaw ai kaw na she di ya rit nga sai, la dai wa gaw hpa-lap hpun de lung wa nna tsaw ai de na hpa-lap chyan di jang, punggyi wa hpa-lap hpun bai gang ashun dat nu ai, shaloi, dai la wa gaw dai hpun hpa rai ashun dat nu ta? Ngai ganoi sha di hkrat angai le ngu dal jang.

Hpunggyi wa gaw hpa rai nna aja ja n-gang noi nu ta? Ngu nna bai hta dat sai. Shingrai, la dai hpa-lap chyan di wa jang, punggyi wa hpalap hpun bai gang ashun dat dat rai, hpa-lap gaw gachyi mi sha naw lu di yang, Hpunggyi wa e ashun shatsang ai majaw, tsam mari gang noi nna yu wa mat ai shaloi, hpa-lap mung gachyi sha lu di yu wa u ai. Shaloi punggyi wa gaw dai la wa hpe nang hpa-lap hpun kaw ganoi noi di hkrat wa ai, hpa majaw nang dai hpun hta aja wa gang jum manat yang ndi hkrat wa ai hte maren, hpa amu galaw tim, maju jung ai hte galaw hkrat wa ra ai, daihpawt ngai nang hpe sara yu ya ai gaw ndai rai sai, hpa amu galaw tim, lu sha daw shakut shaja yang she hpang jahtum myit mada ai lam awngdang na re ngu nna shabawn dat nu ai. La dai wa Hpunggyi wa hpe: e ya gumhpraw gaw kade dang hpyi mayu nga nta? ngu san jang, Hpunggyi wa gumhpraw njaw ra ia, gaungwi sha wa nu, ya hpang de nang galaw tawn ai malu masha namsi namsaw pa raitim sa jaw jang rai sai ngu matsun kau dat nu ai. Dai kaw nna la dai wa gaw shi a bungli hpe hpa sha galaw tim maju jung ai hku galaw nna, kade ning nrai yang grai lu su nga pyaw mat nu ai da.

(Maumwi ka ai: BAWMLI TOI)