SUT SU NNA MATSAN WA HPE N MU AI MYI

SUT SU NNA MATSAN WA HPE N MU AI MYI

LABANG ROI BU

La langai gaw gumhpraw grai lu ai majaw, shani shana shi a gumhpraw sha sin let hti chyai nga nga re da. Lani mi hta gaw, grai htoi kabrim ai nhtoi shi hpe sa htawng hkra ai majaw, shi gaw grai kajawng hkrit ai hte shi a gumhpraw dengga ni hpe ahpum nna, magap kau let chyagrawng grawng taw nga nu ai da. Dai nhtoi kaw na masha langai mi pru wa jang, shi a gumhpraw sa kashun hkyen sam ai ngu nna, la dai wa gaw gumhpraw ahpum tawn krit gari taw nga yang, nhtoi kaw nna pru wa ai masha dai gaw, hpa hkum hkrit, ngai gaw nang hpe garum na matu sa wa ai re, nang hpa ra mayu yang tsun rit ngu jang, la dai gaw tsawm ra na hkra sumru yu nna, ngai ja tachyawp sha ra ai, gumhpraw gaw ngai lu ai pyi hpa ndang di sai ngu tsun ai da.

Shaloi nhtoi kaba kaw nna pru wa ai la wa gaw, mai sa, na ta layung hpe na nta ndaw kaw tu ai namsi hpun kaw sa achyaw dat u ngu tsun ai hpang, mat mat sai da. Shingrai, gumhpraw hti nga ai la wa gaw, dai nhtoi kaw nna pru wa ai masha wa tsun ai ku galaw yu na, teng sha i byin na kun ngu myit let, nta ndaw e tu nga ai sumwum hpun hta shi a ta layung sa achyaw dat yang, ta layung hta tachyawp mung chyawp pru wa ai hta n-ga, dai sumwum hpun mung ja hpun tai mat nna mau nga nu ai da. Dai hpang, grai myit mu myit ngawn ai hte nhku kaw wa rawng nga taw yang, nka lu mayu ai zawn nga in hka gawm sha 10 hta lang dat yang, hka gawm mung ja gawm tai mat nna, kabu sumsai myi man hpaw let, hka bang lu dat hkyem yang mung, hka mung ja tawng tai mat sai majaw, naw mau kabu nga yang, shat bai kaw si wa ai zawn nga nna, shi a salung sala ma ni hpe lu sha hkyem shangun u ai, shat sha na hkyen nna hkawan sha naw hta hpai dat yang, shat mung hkawan hte rau ja tawng bai tai mat nna, nmai sha mat ai majaw, jang yup nga sana ngu in, yup ra kaw wa galeng dat ai shaloi, yup ra hte hpun nba ni yawng gaw ja rai hkrai bai byin tai mat nga sai, shingrai, aten na na wa hpa mung ja rai chyu tai gale mat mat rai nna, la dai wa gaw yup n lu, sha nlu rai nga yak nna, hkum gawng ni bai gawngkya mat wa in myit ru bu wa nu ai da.

Tsahti la wa nga ru taw nga ai ten hta, nhtoi kaba kaw nna pru sa ai masha la wa bai du sa nna, tsahti la wa hpe: ya hpa naw ra nga nta? ngu san ai shaloi, tsahti la wa gaw: yup lu sha lu ai kaw lai nna hpa mung n ra sai nga htan ai majaw, nhtoi masha wa gaw: tsahti wa e, nang lu ai sut gan yawng hpe matsan mayan re ai masha ni hpe garan jaw u, shaloi nang yup pyaw sha pyaw na ra ai ngu matsun kau da ai hpang, me bai rai mat sai da, tsahti la wa gaw nhtoi masha tsun ai hku hkan nna, shi a ja gumbpraw hpe gaida gaina re matsan masha ni hpe ga ang hkup garan jaw kau wu ai hpang gaw, hpa galaw tim ja nbyin wa ai hta n-ga, lani hte lani lu pyaw sha pyaw wa nna, myit simsa lam bai lu la nu ai da.