DINGHKU HKA BRA SHAT SENG

DINGHKU HKA BRA SHAT SENG

GALE AI: GARENG MUN

Hkawn Nu hte Brang Mai hkungran hkat ai aten 10 jan ning rai sai, ya shan htinggaw gaw mahkawn shabrang prat na zawn gatu garu nga ai myit jasat hte shada nja nhpra nga ai marit shing-ni n nga mat masai hte maren, Brang Mai gaw Hkawn Nu hpe je yu yang je shi a myi sai hte gachyi pyi n htuk dum mat nu ai. Grau nna gaw shanhte rung kaw nnan sha naw shang wa ai hkawn tsawm shayi langai hpe mu ai shani kaw nna, Brang Mai a kraw wang gata hta shi a nambat lahkawng ram rawt prat bai du sai nga myit saku nna, gade nna yang, Brang Mai Hkawn Nu hpe: "An rau sha dinghku naw jawm de sha nga yang lachyum npawk mat sai, she hka hkat mat saga! " Ngu jang, Hkawn Nu gaw hkum shan hpam mat ai zawn, nhpa ga-li ga-law nnga ai gata Brang Mai tsun ai ga hpe yin ya nna, shan lahkawng gaw mung masha gawnhkang rung de dinghku hka bra lakmat la na matu sa wa masai. Lakmat lajang ngut ai hpang kaw nna, shan a lapran shada seng ai bungli hpa n nga sai. Hpa majaw rai kun, lakmat lajang la ngut ai hte Brang Mai a myit kraw gata hta agajawng sha gaman gaman nga mat nna, Hkawn Nu hpe nhtang gayin yu let tsun ai: "Ningsin sin wa sai, shat rau sa sha la ga." Brang Mai shing nga jang Hkawn Nu tsun ai: "Mai ai, masha ni tsun yang nnan sha naw hpaw ai 'Hka hkat shat seng' ngu ai kaw an zawn dinghku hka bra mat ai ni hpe laksan shat ma mi chye galaw jaw ma ai da, sa yu yu na mahkoi re ta?" Hkawn Nu shing nga jang, Brang Mai adu gangat let yin la nna, shan lahkawng ga n shaga hkat ai "Hka hkat shat seng" de hkawm shang wa manu ai.

Brang Mai hte Hkawn Nu shat seng na laksan san da ai gawk kaji kaw sa shang dung dat ai hte, jawjau shayi shang wa nna grai hkungga ai hte: "Myit su yan, nan nhpa sha na?" Nga nna sa san u ai. Brang Mai gaw Hkawn Nu hpe mada yu nna tsun ai; "Nang htet yu u." Hkawn Nu gaw baw gangat let tsun ai: "Ngai mayu e shinggan nau n pru hkawm nna, simai htet na nchye ngai, nang she htet yu u." Jawjau shayi gaw: "Myit su wa, myit- su jan, grai tawngban sai, anhte a shat seng na htunglai gaw myit su jan shawng myit su wa mayu e ra sha- rawng ai simai htet nna, myit su wa bai myit su jan mayu e grau sha mayu la ai simai bai htet rai na hku re, ndai hpe gaw Jahtum na shingran' ngu nna shamying ga ai." "Dai hku rai yang gaw mai sa, ngai chye sai." Hkawn Nu gaw kara hta majaw kau nna tsun ai: "Nga ga- baw, mati gapung, makrat shadu, matsing da u, gaubawng hte hparaw shum bang, nye a tsawra... Ndai myit su wa n sha ra ai." Jawjau shayi bai san ai: "Myit su wa nang hpa baw htet na?" Brang Mai na gajawng mat sai, madu jan hte kun dinghku jawm de ai aten 10 jan ning rai wa tim, shi gaw madu jan nhpa simai ra sha ai pyi n chye nga ai. Brang Mai n-gup mahka let gade n yawng ai zawn nga mut dung nga sai. "Simai ndai hte ram sai, an lahkawng sha ra ai simai hkrai re." Hkawn Nu gaw Brang Mai tauta mat ai hpe mu nna, hkan tau tsun kau u ai.

Jawjau shayi jan mani sum rai let tsun ai: "Hkrak sha tsun ga nga yang, anhte ndai 'Dinghku hka bra shat seng' kaw jahtum na shana shat sa sha ai myit su wa hte myit su jan ni kadai mung shat sha nshang ma ai, dai majaw ndai "Jahtum na shin- gran' ngu ai shat shum sha masa. Anhte shat seng ni dinghku hka bra ai ni hpe hkyem tawn ya ai shana shat—Namsi ntsin mahtang lu mu, ndai gaw kadai mung n-chye ning- dang ai lu sha re." "Dai rai jang namsi ntsin lu na re." Shan lahkawng namsi ntsin lu na hku jawm yin la masai. Loi mi hkring rai jang, jawjau shayi jan namsi ntsin gawm lahkawng hpai nna sa wa ra ai, gawm mi gaw nsam loi tsit nna, hkyen tawng hkrai bang da ai sha mu ai, gawm mi gaw nsam hkye hkye rai nna, salu hte mawng rai nga ai. "Ndai hpe gaw ' Kau chyen mi gaw marit shingni, kau chyen mi gaw dam lada ai myit jasat' ngu ai re, abwi sha lu chyai mu. " Jawjau shayi tsun yan dan ngut ai hte hkawm pru mat wa sai. Shan lahkawng gatsi dung mat sai, kadai mung chyahkring mi na laman e sha nhpa kaw jahpai nna ga tsun hpaw la na n chye mat masai. Kawk kawk kawk! Chyinghka akawk ai nsen na dat ai hte rau, jawjau shayi chyinghka yat sha hpaw shang wa nna, shi gaw bagan kaw hkye tsawm dik ai numri pan mara hpai nna shang wa ra ai, Jaw jau shayi jan tsun ai: "Myit su wa, nang nambat langai lang myit su jan hpe nampan jaw ai shingran yi naw matsing nga nta? ya gaw nan shada nhpa mung nseng hkat mat sai gaw, dinghku rau nlu de sha mat tim, ganawn manang gaw naw rai na re, jahtum lang rai u ga, myit su jan hpe numri pan ndai mari kumhpa jaw u."

Jawjau shayi jan tsun ai ga dai na jang, Hkawn Nu gaw 10 jan ning a shawng e Brang Mai shi hpe nampan kumhpa ai shingran mungkan de shang mat wa nu ai. Dai shaloi, shan gaw ndai jinghku jingyu n nga, manaw manang nlu re myu mare kaw ningnan sa nga shanu hpang wa yang, hkum gaman lik lik kaw nna shakut lai wa yu sai. Kan bau bungli a majaw, shan shani gaw shara magup bungli tam galaw hkawm, shana du jang, matsan ru yak ai nhkun kaw nna lawan lawt lu na matu, Hkawn Nu gaw gat rai sa dut sha, Brang Mai gaw masha ni a shat seng hkan ndi hka-wan sa gashin rai gumhpraw tam ma ai. Yup tung yup hka rai jang she shan shap rawng ai ga gata na mita man 10 sha du ai yup shara kaw wa hkrum hkat ma ai. Dai shaloi shan a nga pra hkrun lam gade ruyak jamjau tim, shan gaw grai ngwi pyaw dum ma ai. Myu mare ndai kaw ningnan du ai shaning na hkawn seng poi hta, Brang Mai gaw Hkawn Nu hpe nambat langai lang hkye tsawm dik ai numri pan mari kumhpa nna, Hkawn Nu gabu myi prwi she n dang gatsut hkra rai u ai. 10 jan ning shakut shaja nna ya dinghku chyip wa jang, bai hka bra ra ai majaw, Hkawn Nu a myi tum gata kaw yawnhkyen myi prwi ing wa sai, shi ta galam let htan ai : "N ra sai. "

Shaloi, Brang Mai gaw Hkawn Nu hpe manga kru ning numri pan n mari ya yu sai lam dum dat nna, ta galam let: "Ngai mari na." Nga sai, shaloi jawjau shayi gaw numri pan hpe lahkawng brang di gang ga garan la nna, shan lahkawng a namsi ntsin gawm kaw bang dat jang, numri pan dai namsi ntsin tai mat sai. "Ndai gaw anhte shat seng ni nbaw n-gu hte laksan galaw ai numri pan re, nan hpe kumhpa ai nambat masum ngu na simai rai nga ai, mying gaw "Tsawm htap ai shingran' ngu ai re. Nan abwi sha lu nga mu, hpa ra jang ngai hpe htet marit. " Jawjau shayi tsun yan dan ngut ai hte yin rai pru mat wa nu ai. "Hkawn Nu, ngai..." Brang Mai gaw Hkawn Nu a ta kaw chyit rai manat taw nga sai, shi tsun mayu ai ga gaw shinglet ja mat nna n mai tsun shapraw lu nga nu ai. Puk! Agajawng sha wanpu si mat sai, nhku gata e asin chyip nga mat sai, matut nna shinggan de wan je dingsi ngoi gadu pru wa ai hte rau, wan nhkut bat manam wa ra ai. "Shat seng kaw wan tat sai, ndai shara kaw dung nga ai ni hkrit maja koi lam hku lawan hprawng pru wa mu! Lawan mu!" Shinggan na ni jahtau kyek marawn bu si masai.

Shaloi, Hkawn Nu gaw " Ningwa!" Nga nna shaga let Brang Mai a gah- pa kaw kap rai sa noi nga nna: "Ngai hkrit ai!" Nga gari taw nga jang, Brang Mai gaw: "Shum hkrit!" Ngu let Hkawn Nu hpe chyit rai hkap ah- pum pawn la nna;"Tsawra nja e, ngai hte rau rai nga yang mi hpa nhkrit ra ai. Sa sa le shinggan de lawan abraw pru wa saga!" Brang Mai gaw Hkawn Nu hpe dun nna shinggan de kagat pru wa yang, wan pu tu gabrim nga ai sha mu nhtawm, wan hkru chyi wa ai shingran pyi n ran nga ai. Jawjau shayi jan shan hpang de sa wa nna tsun ai: "Myit su wa, myit su jan, nan grai gajawng kau na masai. Shat seng kaw wan ntat ga ai, nhku gata de mawng shang wa ai wan hkut gaw anhte dingsang shamu bang dat ai re, ndai gaw anhte a nambat mali ngu na simai ' Kraw wang myit gata na ra lata' ngu ai re. Gawk de lau shang wa manu." Brang Mai gaw Hkawn Nu hpe gang shatsap la nna: "Nja jan e, jawjau shayi jan tsun ai ga jaw dik sai, ngai mi na manghkang kaw lu ai mahtai gaw, an a lapran shada tsawra masin machyi hkat ai lam garai n hten run mat nga ai, an lahkawng lagaw ndung hpe hkrun lam maga mi jawm shayawn ra nga ga ai. Hkrak tsun ga nga yang, an gaw shada nhka hkat lu nga ga ai, hpawtni njang dinghku nhtang shang lakmat bai sa lajang la saga yi?" Brang Mai shing nga jang, Hkawn Nu nten maka let san ai: "Nang myit hkawn sa ni?" "Myit hkawn sangai, ya ngai an a lapran manghkang hpe san san pra pra myit htai chye la sai, hpawtde manap njang dinghku nhtang shang lakmat bai sa lajang la saga. Jawjau shayi ni e, lu sha manu sa sawn la marit."

Brang Mai madu jan hte nta lawan nhtang wa mat mayu nu ai. Chyahkring mi rai jang, jawjau shayi jan grai hkye tsawm ai maisau pa lahkawng lang nna shan hpe sa tsun ai: "Myit su yan e, ndai gaw nan a lu sha jahpu jahpan matsing maisau pa re, anhte shat seng ni jahtum e kumhpa ai ' Prat dingsa na jahpan matsing buk' ngu ai re, nan marai mi pa langai ngai la tawn nna, prat dingsa makoi hting tawn mu." Jawjau shayi jan gaw ga kya kya sha nga nna sa shaga u ai. Brang Mai jahpan matsing buk hpe yu azi nga ninglen, shi a myi jut hku myi prwi si pya pya rai hkrat yu wa nu al. "Hpa wa byin wa sa ta?" Hkawn Nu gaw Brang Mai a myi jut hku myi prwi lwi yu wa ai mu nna san gajawng dat nu ai. Brang Mai gaw jahpan matsing buk hpe Hkawn Nu hpang de ladawn nna tsun ai: " Ngai shut sangai, ngai nang hpe lai wa sai ten hta grai n hkungga ai hku galaw kau nga nngai." Brang Mai a ta na jahpan matsing buk hpaw hti yu yang, dai jahpan buk kaw ka da ai gaw: Alum ahkum re kun dinghku byin tai wa ai gaw, hpraw tu hkalung la ai ta la- yung hte dinghku gata na bungli masawp kau nna, shana yup tung lai tim, nang wa gabye na lakang kaw wan nan ya, shaning ladaw shagu nang a wunli wun - gau lam hpe hkan myit tsang, kagu kamoi hpe alawm akawp ahku ara rai hkang lah- ku, ningsin manap hkawn nna nan a sai daw sai chyen hpe sharin matsun, hpawng shingra shagu na a hpung shingkang hpe makawp maga ya, shat ma shagu nang ra sharawng ai simaw simai hpe she mahta nna shadu jaw shadu ya, 10 jan ning na a sak prat nang a matu ap nawng sai... Ndai gaw na a ningrum ning- tau jan nan rai nga ai.

"Ningwa e, nang grai pu ba jamjau sai, ndai tsawmra ning laman hta ngai nang hpe tsang lahku ai lam galaw ndu nga nngai." Madu jan shing nga let, shi hpe kumhpa ai jahpan matsing buk Brang Mai hpe bai jaw yu u ai, dai jahpan buk kaw bai ka da ai gaw: Dinghku la ngu ai ni a lit gaw, gade li ai lit hpe rai- tim gahpa kaw ra di hta hpai let, shani hte shana n masat ai pu ba hkawm, dinghku gata na mu lam magup myit tsang ra, myit ru myit yak lam kadai hpe n chye tsun dan, pu ba shoi chyum ai lam gaw tinang hkrai hkam sha, lawu lahta jinghku jing-yu ni a matu mung myit pu ra, hkawm sa hkawm wa lam hta yakhkak manghkang mung hk- rum gatut, madu a kun dinghku hte nta masha hpe mung masin machyi ra... Ndai gaw na madu wa nan rai nga ai. Shan lahkawng jahpan matsing buk jaw yu hkat ngut ai htawm, shada ahpum chyit rai jawm hkrap shayu nga masai. Lu sha jahpu sawn jaw ngut ai htawm, shan gaw shat seng na lauban wa hpe chyeju dum ga tsun da nna, ta sha jawm hkindun kau rai, shan a salu salat hte jawm gaw de da ai kahkru tsip hte bung ai dum nta de nhtang wa masai. Shat seng lauban wa gaw, rau sha run rai hkawm mat wa ai Hkawn Nu yan Brang Mai hpe hkan mada yu nna mani sum sum rai let tsun ai; Grai ngwi pyaw mat masai wa rai nga ai, anhte 'Hka bra shat seng' ni ding- hku langai hpe bai hkye hkrang tawn saga ai!"