SAM TSANG MAGRAU GRANG
MARU GAWNG
Moi Prangwai Shari gahtawng kaw Manam Tu nga ai la langai nga ai da, dai Manam Tu gaw hkumngau galu kaba tsawtsaw rap rap rai nna, asam tsang, lapyin grai rawng ai wa re da. Shi gaw kaji kaw nna Nga sha hkrai rem, Nga rem ai hkan Nga kasha hkrai jawn gagat, Nga shingma hku hkrai gan tawt rai, kaba wa magang lagaw lata laram magang, myi na zen kung magang rai sai. Lani mi Sharaw rawngha langai gaw shi rem ai Nga kasha langai hpe htim hkyem ai mu dat nna, hpun htingkan lahkam mi galu ai gan daw la nna, Sharaw Nga kasha kaw htim hkrat wa ai hte, shi mung lawan ladan hte hpun htingkan hpe Sharaw n gup e chya di sa shachyat bang kau ya nna, du kaw hprut di bai gahtam sat kau nu ai. Manam Tu a hkum hta dat nma hkraw ai n-gun chyu rawng nna, shi hpang de nna manang ni hpe gamu hkat, htwi hkat, man- ai hkat shingtawt tawt shingjawng re hkrai saw u ai, raiyang manang ni shi hpe galoi gaw ndang yu ma ai. Masha ni nta galaw, shangu galup re hkan mung manang ni hpe nta htingkan shingtawt yu ga nga nna saw, manang ni shade tsaw ai htingkan hpe ganing di shingtawt na nga jang, shi e aloi sha bai tawt lai kau dan di nu ai. Dai kaw nna shara shagu tsun gari ai, Sam pa hkan mung chyam ma sai.
Lani mi shi pa de yu sa yang, bum lagaw hkan Nga rem ai Sam dingla ni hte sa hkrum shaga nu ai. Sam ni shi hpe san ai, nang Nga lu gan tawt ai nga ai nre ni nga nna san jang, shi bai tsun ai: Nga sha wa, nta pyi lu gan tawt nga yang ngu nu ai. Shaloi Sam ni gaw shi hpe adum wa gan tawt shingjawng ga, nang lu shingtawt jang ngai nang hpe mung ting tsun shabra ya nna arawng kaba jaw na ngu, nta de saw wa nna wa jawm shingjawng yang, Manam Tu adum kaw aloi sha lu shingtawt kau nna, Sam dingla gaw shi tsun ai hte maren, ga- nang du ganang tsun shabra ya nna, masha ni gaw Prangwai ga Jinghpaw Alawng paw sai, hkrit hpa she rai sai nga nna tsun garu ai hta n-ga, Manam Tu mung gat pyi nmai sa mat sai. Rai tim lani mi gaw shi nhtu nhpye sha hpye kau rai Chyinghkan gat sa yang, Sam ni wa likdik likdak kaw gajawng kaja rai kan- dang hpai ai Samla tsawmra mi shi hpe hkap shachyut adup wa masai. Shaloi she Manam Tu mung si ntsang Samla marai mali manga a kandang numrat di kau ya nna gat kinsum mung manga kru kaw gan tawt lai nna gat baw na Lagat hpun kaba kaw nhtu wa gahtam jung kau da nna nta lam de n-ga gaman sha hpye nna prawng mat wa sai. Shi hpe shachyut ai ni gaw shi gahtam jung kau da ai nhtu hpe marai masum mali jawm gang baw yang pyi ganoi nlu gang baw ma ai.
Dai shani kaw nna je gaw Sam da Miwa da tsun hkrit gari masai da. Shing rai ndai zawn re Alawng paw ai Jinghpaw hpe gaw nmai nga shangun ai, kadai mu tim sat kau ga nga nna tsun shabra masai. Lani mi shi Na seng gat sa yang, My- enmung Kawnglawt na Miwa la marai manga shi pe sa gyam sai, raitim gat e ta nlu jahkrat ma ai majaw, shi mung shana de jan du jang she nta wa na ngu sawn nga yang, Na seng gahtawng na Sam jinghku langai mi shi hpe: Ma Tu e, nang daina nta hkum wa sa, lam de nang hpe gyam ai masha nga ai, daina ngai kaw wa yup nna hpawtni she wa nu nga nna akroi anoi saw ai majaw hkan nang mat wa sai. Shana shi Sam nta kaw yup nga yang, Miwa la marai manga gaw nhku de hkre hkre shang wanna shi hpe gahtam sat bang wa masai. Shaloi shi mung si ntsang rawt gahtam wa ai, shi hpe sat sa ai ni hpe mahtang Sam nta kaw mahkra gahtam sat kau da nna nta de prawng mat wa sai. Shi hkrit maja let nta ga wa nga nga yang, Kawnglawt na Miwa ni gaw Prangwai na Manam Tu masha sat kau ya ai ngu nna, Nshawn Htusi ni pe mung sa tsun, Ura bum Inglik rung de mung sa shawk rai, laning mi pyi ganoi du sayang she, Ura bum e nga ai Inglik rung ni htet dat sai. Masha ni htet da ai ten gaw du wa, gahtawng na masha ni hpe saw yang kadai mung nkam hkan nang ya ai, lawu gahtawng na Brang Shawng dingla pe sha lu saw nna, Ura bum de lung wa masai.
Shi myit ai, daini gaw hyen la ni e sat kau ai hkrum sai ga re ngu myit law let, Ura bum kaw du yang, Inglik du ni gaw shat jaw sha, nga chyu hpalap mung jaw lu di grai hkungga ai hkrum nna, sat na hkyem nna jaw jahtum sai ga re ngu myit law let sha kau sai. Chyahkring mi rai jang Kanglawt Miwa ni gaw gumhpraw htingba gun nna kan du nang masai. Dai ni du ai hte rung hpaw mara jep bang wa masai. Shawng nnan e saboi kaw hpri saidawng lakhtek kaba shawng kabai tawn nna, gumhpraw tingsan mung rung rung kabai tawn rai, Manam Tu hpe shawng shaga la nna, hpa rai masha sat ai re ngu aja ja san dat manu ai. Shaloi Manam Tu gaw re, ngai masha sat ai re, shanhte she ngai jing- hku ni a nta e wa manam yup nga ai kaw ngai hpe shawng sa sat ai, ngai mahtang shanhte hpe nhtang sat kau ai re ngu nu ai. Shaloi tara rung na Inglik du wa ta yungnu sharawt nna: Nang hpa mara nlu ai, arawng satang she lu sai ngu shakawn dat nna, Miwa ni gun sa ai gumhpraw tingsan hta ya nna, ndai gumhpraw tingsan gaw nang hpe jaw sai, hta hpai nna nta wa manu ngu u ai. Manam Tu gaw grai nla gwi nna, Brang Shawng hpe she hta hpai shangun nu ai. Brang Shawng dingla gumhpraw tingsan hta gun ai pyi ram sayang, jum joi joi mung bai hkan shagun rai, shan lahkawng gaw hkrit hkrit nga tim grai awng sha mat wa masai rai.
