SHARE LAKANG

SHARE LAKANG

HPAN JA

Moi Kumshi du ni nga yu ai Share lakang a hkrang man hpe mu mayu ai myit hte, Ma Kyali lai shang wa ai lam ganing re rai nga ai hpe chye mayu ai hta n ga, labau sawk sagawn tawn na lit lu ai majaw, 2009 ning shata 4 praw 3 ya jahpawt, Tsin yu AWng, Shadan Naw San, Tsin yu Tu Raw, Maji Tawm yan Maji Htu ni hpe saw la rai, jahpawt hkying shi hta Husawng bum sinna maga, moi na hpaga lam kaba hku hkan mat wa saga ai. Shawng shana lam woi masha saw ai shaloi, Tsin yu AWng, Shadan Naw San, Tsin yu Tu Raw ni hpe shaga la nna bawngban ga ai, Tsin yu AWng gaw grai kyin nngai nga, Shadan Naw San gaw num hpyi na matu shaga ma ai da, Tsin yu Taw Raw 80: He, Lagyen byap gaman she re, anhte Wa ndai pan tam hkawm yang, Lagyen gaman, Lagyen gahtam nọi ai lu! Saw ai ni mala la chyip mak nga jang, ngai a masin lagyi wa sai, rai tim galang mi sawn tawn sai bungli re majaw, htingnut nmai, gara hku mi rai tim nsa gaw nmai, nanhte hpe she kam sai ngu dat jang, Tsin yu AWng loi myit yu la let bai tsun ai: Rai jang gaw lung wa ga, moi na hpaga lam hku lung ga nga, Shadan Naw San mung num hpyi ai de nsa sai nga jang she, ngai myit la ngu ni ai. Hpang jahpawt jau jau Manmying gat de lu sha sa mari jahkum la rai, di mala, lusha hpun nba jawm baw gun rai, Husawng gadawng du yang, maling de hkra u ni shaga ai chyi she nga wa nna. Sinna maga de Hkyungdi hkyet kaw nna Ningseng de lai kap mat wa, Namhpai hka hku de rai mat wa jang, bum kaw wa hkrang ai, ndai Dingdawng bum gaw Ningseng bum hte Bumwa bum wa matut ai shara re, Bumwa masha hte Ningseng masha ni nau kunggat ai majaw, nyan hpaji chye ai ni e bum matut ahkyak shara kaw hpri lagu lup kau ya ai kaw nna, Bumwa masha hte Ningseng masha ni n gun kyi mat ai re nga nna tsun dan ma ai. Dingdawng bum kaw lai Nampyik hka kaw du ai shaloi hkying 2 du sai, shani shat sha kam na zawn nnga rai, loi sa la nna kaw si ai shaloi sha ga ngu yang, shawng lam de hka grai tsan mat sai, sha la nna she hkawm ga nga ma ai.

Namhpyik hka ram daw kaba ai, hka ndai kaw Nga shari, Wuhtang, Wutsang, Samyin, Sumrawn, Nga gam re grai rawng ai hka re da. Naw San gaw walai sa tam wa, Tsin yu AWng gaw wan wut, Tu Raw gaw lagoi hpaw htat wa rai, mahkri ntsin sha gan shaprut la, htoi hkye tsawm ai bahkri si hte wa-lai sha manai la rai shani shat sha la nna bai hkawm mat wa saga ai. Waw-hkyung hte Share numshe lai re numshang kaw, nlung langai mi tu nga ai, nlung dai gaw Udi zawn gade nde loi rwi rai masen nna hkinggau nten kaw dung taw nga ai, lam woi ni tsun ai, mare baw de mung langai naw dung ai da, lung wa yu yang, teng sha mare baw e mung langai taw nga ai, nlung dai hpe gaw mawdaw lam htu nna lam hkinggau e htu galau tawn kau manu ai, rai tim shi a hkrang gaw mare htumpa na hte maren sha nan rai nga ai. Mare baw na numshang kaw lagat hpun kaba langai tu ai, anhte dai kaw gan sa dung nga yang, Kukdwi shaga ai na dat jang, masha ni tsun ai, lam hkawm ai hkan Kukdwi shaga ai na yang shaning tup tup lam hkawm ra ai nga ai ga bai dum dat sai. Share gahtawng lai re kaw Sharaw shadawn gadawng du saga ai, lam woi ni tsun dan ai, moi na magrau gang ai shan jaugawng ni Sharaw lu gap jang, gadawng ndai kaw Sharaw mang wa tawn nna gade galu kaba ai shadawn yu nna nung jung da ma ai da, ya yi htu, gadaw htu rai nna nung dai ni magap mat, htu kabai kau rai ma hkra nmu mat sai, rai tim nlung nkau naw jung taw nga ai, moi ndai ga gaw Sharaw grai sawng ai shara rai nga ai.

Sharaw shadawn gadawng kaw nna lai yu wa ai shaloi, yi grai kaba ai mi hkyen da nga ma ai , yi hkyen kau nna anhte lai na lam mung magap mat rai, hpun ndi nda hkyen gashoi tawn ai hku ra mi lai mat wa nna, yi htumpa na lam kaw pru wa saga ai, yi shingnawm kaw nna loi mi hkawm yang asuya maling de shang wa sai, maling kaba de ningsin bat manam wa ai sha nrai, shana hkying 7rai sai majaw, anhte hkring sa na shara a majaw myit pu si wa saga ai. Sharaw gadawng lam lai ai garai nna ai majaw, nam kaw hkring na hku nga yang grai myit yak ai rai tim, mai hkring ai shara yu nna hkring ga ngu ni ai. Shaloi Naw San yan Tsin yu AWng gaw Kumshi bum hkaraw e Maru Naw a Zhaugaw yi wa langai nga ai de she wa hkring ga nga nna, lahpra grai grai htat ai lam hku datmyi nan let ahtu agawng rai hkawm mat wa ai, shana hkying 8 jan hta she yi wa dai kaw du ga ai. Yi wa hpe gata ntsa di galaw tawn ai, raitim manawn masham ai ni e magawn mara run ju kau ya ai re nga, shakum mung nnga mat, nyep da ai chyinghkyen pyi aran ara rai gun marawng kau ma sai, ntsa de gaw shamyen wa magap nna numri sha gaw hkap htang lu nga ai.

Hkying hkum 10 ting hkawm kau nna, ba ai lam gaw shamying pyi nchye mat sai, Tu Raw e tingsan langai ga la nna aga e nyep tawn nna, ngai hpe naw galeng la u nga ai shaloi, ngai grai chyeju dum mat sai, ngai wan makau e agrawp taw nga ai ten, shanhte ntsin ja shadu, lahpaw htat, Naw San gaw Zhaugaw lap hte shan sumbru gayawp nna shan ju, dai manam pyaw dik ai shan ju bat wai nga jang, shabyi lahpyin de hkumbai loi mi gapyun pru wa nna, jahpawt shadu gun ai shat gatsi sha hpyan tawn, shan ju sharun tawn, kawa tinghkyawn kaw tsa sha ru tawn rai lu sha bang wa saga ai. Dai shana maling ting na hkam hkam u ni gaw shata jan mai ai lahpawt kau na tsang ai zawn shaga garu ai kaw, anhte daphpun grup rai yup mat wa sai, Naw San yan Tu Raw gaw anhte gashung na tsang nna wan gade lang she rawt wut ya masai. Hpang jahpawt rawt yu yang she, nahte yup ai makau hkan shabying majoi she samun nna si mai bai di shadu sha rai ga ai. Hpun kaba hkan daphtum ru majoi she gayawp, wa madai pan pu abya tsawm taw nga ai, nhung nsa ni sanseng ai lam hpe ya ram ram marit maroi taw nga sai.

Praw 4 ya jahpawt nam u namji ni gasu ai hte rawt nna shat shadu sha la rai bai matut hkawm mat wa saga ai. Numshe du yang numshe hte num tawk lam gara hku hkawm na bai myit shuk wa nna, lai yu ai hku hkawm ga, gawai tim ra mi rai nu ga ngu nna bai dawdan la rai, moi na hpaga lam nsa hku hkan mat wa saga ai, lam grai dam ai shara langai kaw du ai shaloi, dai shara hpe gaw Kumgyin dut gat re nga nna tsun dan ma ai. Dai shara gaw sa-ra kaba re, myit hta moi na gat wa gat sa ai hpaga masha ni, gumra gau ai ni gau, lit gun ai ni gun rai, Kumgyin dut gat kaw wa sa nna, Jinghpaw mahkawn ni sa gun dut ai Kumgyin mari sha nna hpang gara shamai la rai, Miwa mung sa ai ni sa, Myenmung lai ai ni lai rai, hpaga yumga lam shakut ai ni gamawng ai shingran pra pra mu nga ai. Kumgyin dut sa-ra lai re kaw nna gadawng lam nau nnga sai, nlung nyep, lahpraw lahpra magap, Lagyen htinggrum ai lam hkan nyemtsaw nyembawng rai tim achyan rai hkawm wa saga ai. Lamu de gap bun dat ai wan bawm zawn, lap naw lap ai, lap nkap mat ai, ndung e pu sha pu majaw mat sai Laisi hpun kaba ni majoi she tu gangu nga ai. Wuban ru mung hpun hta grau kaba tim tinang hkrai nkam tu ai, hpun kaw shingrau nna hkrawn tsawm taw nga ai. Hka hpu ru, shabying chyingdaw, Wa-lai palun majoi tu ai, Tsamat majoi sawng ai.

Maling grau shim ai de shang wa yang, bum pawlaw langai mi gaw hkra maga de laksan mi rai sa majawm dung nga, pai maga de gaw bum kaba rai nna, lam dai bum gake hku rai mat wa nga ai. Tsin yu AWng hkra maga de woi hkrat wa nna, ndai gaw moi Gala ni ja htu ai shara re nga tsun dan ai. Bum pawlaw ntsa grup yin nlung hte shakum kum tawn ai, chyinghka lam ngu na kaw pai maga de maumwi hpun marun masha langai ahpum npawt re tu mat sai. Wang gata e tsap nna grup yin mada yu yang, hkaraw nhkap rai nna, hpun hkrai rai, ja htu ai shara ngu na zawn nrai mat, hpyen ni nga ai shara re nga nna, ngai gaw hpyen ni a chyu pala zawn re mi she taw nga, tam yu ga ngu, kremra hpai shada nna naw Isap nga yang, Tu Raw nlung loi mi majaw taw ai kaw ta hte krawk yu u ai, loi mi krawk bang wa jang lung pa langai pat rai rawng nga ai, shi nlung ntsa e ahkawk yu ai shaloi gata de hpungkraw ai zawn nga nna, lama mi gaw rawng na sai nga, lung pye daw mi gang galap dat nu ai, lung pa daw kaw laika kap nna, ga ahkrai gashin kau hkra di yu yang, lup man na nlung she rai nga ai, lung pa gaang kaw nna daw mat ai majaw, kadai a lup, kadai jung ya ai mahkra nmu mat sai, daw mi lup gata de naw rawng ai rai tim, anhte lup krawk hkawm ai ni nre ai majaw, lung dai galaw ahpre bang kau da nna bai rai mat wa saga ai.

Ndai daram kaba ai maling gata hkan moi masha hkrai hkrai re, grau nna maigan masha ni wa nga kajang ai shara re ngu yang, kadai kam na zawn nrai nga ai, rai tim, tsam yat nchye ai nlung gaw sakse tai nga sai. Ja htu kawng kaw nna pai maga de rai mat wa jang, lam dung lawu lahta lung pa grai galau taw nga ai, nung dai ni gaw Gala ni a nawku jawng kaw na mala ayai tawn ai re nga ma ai, Hpara jawng lai re hte, dam kaba ra tsawm ai shara langai bai nga nga la sai, dai gaw Gala dabang re da. moi ndai layang hkan masha gade sawng yu, gade pyaw lai wa yu sai hpe myit dat tim aloi sha rai nga ai. Gala dabang lai re hte, Maru hkrangkum ngu ai gahtawng dingsa hku lai hkra ai, dai shara mung ram ram dam kaba ai shara re hta n ga, shabying hkahpu ru majoi she sawng ai. Bawk Tawng shabying di wa, Hkunmin ga e wa shadu sha ga nga nna htet ai rai tim, shabying latup mi gun jat yang lam nlu hkawm na tsang nna ndi gun sai. Lusha hpun nba gun nna, hpana manat ai, gahpa hte machyang ndum she machyi mat ai rai nna, shingnoi e lahpra pa mi jat bang na pyi she hkrit mat saga ai. Maru hkrangkum kaw nna lai re hte lam htum sai, Tsin yu AWng yan Naw San Share bum de shading nna hkyen mat wa ai hku hkan nang mat wa ai, kindit langai mi hta byawn rai sai. Kindit lawu maga Lahkra hpun langai tu ai, dai Lahkra hpun kaw hku hku nga ai.

Tu Raw sa nna, Gatmai rawng nga ai nga, nhtu bai wa shaw la rai, hpun hku kaw sa gahtam dat u ai, Gatmai ni shi a magyi magaw re kara de krai htim kap wa jang , Gatmai ni gawa gaw nchye re, kara hkan shang nna Gatmai lep hte achya ya chye ma ai nga, gupban bai la gup rai, hpun shingdu hku gahtam waw dat jang, Naw San chyaba lap hpaw htat la nna, Gatmai jahku manaw shapraw la nna ngai hpang de hpai wa u ai. hpunlap lahkyawn la nna shagawt lu dat yang , Gatmai jahku gaw gattsa lawm nna hkri dwi nga grai mu ai. Lam hkawm tsu machyi ai ahkup ahka nga ai kaw, Gatmai jahku lu lu dat nna ba mai mat wa ai tawm she nga wa sai, shanhte la ni gaw kadai mung nsha lawm ma ai, anhte nlaw sha na tsang nna jaw kau ai she rai ang sai. Hkri dwi nga ai Gatmai jahku lu let, Share lakang bum de mada dat tim n gun lu sai, lagat jahku atsai awai sha la nna bai rawt hkawm mat wa ai lam hta, Jangbawng hpun, Dumbau hpun grai tu ai, nsa pyi htum htum nga hkra hkawm kau yang she, Share lakang nhpang kaw du saga ai. Jahpawt hkying 10 kaw nna hkawm ai, lakang pawt kaw du yang hkying 1 jan sai, shingnoi nhpye ni raw kau nna gan sa nga ai laman, Tu Raw nlung lakang hkan na namlaw namlap ahpre kau rai lakang htik shi re nga tsun u ai.

Moi Kumshi du wa Galang Ja ngu ai wa kaw lamu ga sa hpyi yang, Galang Ja gaw Kumshi wa hpe ndai lakang pawt kaw woi sa nna tsun ai: An lahkawng gumra jawn nna ndai nlung lakang kaw lu lai mat wa ai wa gaw ndai ga adu sha na re ngu jawm dumlawng hkat ma ai, dumlawng ga tsun ngut ai hte, Galang Ja shawng kagat lai na matu gumia gayat dat nu ai, rai tim shi a gumra hpang lam de she nhtang marawng wa sai da, Share du wa gaw lamu ga ra malu myidi shim di gumra gayat gajawng dat nna gahkan lat mat wa lu sai. Nlung lakang kaw lu lai mat wa ai Kumshi wa hpe hkan yu mau mat ai Galang Ja gaw hpa ga nisun ai, gumra jawn nna hpang lam de nhtang mat wa nu ai. Dai shani kaw nna Lakang bum kaw nna sinna dingda maga ma hkra gaw Nhkum ni up sha ai shara rai mat ai sha nrai, "Nhkum krung" ngu shamying kau sai. Share lakang hku maidang pyi kyawmkyawm nga hkra lai lung wa ai, hkra maga de gaw lama chyaileng mat wa yang Dumbung krung kaw she sa kring lu na zawn re nhkap nchyap rai nga ai, pai maga gaw lung htawn lungma, dai lunghkap hkan Lungbra shanam gahtap gala rai tu kap nga ai, jan nau mahtan ai majaw rai ang ai, Lungbra shanam dai ni grai wa n kaba tsawm ai.

Hkinggau nten hku lai mat wa ai, gumra du zawn re gade nde nhkap nchyap rai mat ai bumdu kaw numla wa shading la nna, shingnoi nhpye ni raw kau da rai, pai maga na lunghtawn de bai lung wa saga ai. Lunghtawn nisa e wa tsap dat yang, grup yin na bun ma hkra gaw anhte a lagaw gata de hkrai rai mat sai, nlung ndung ngu na kaw gumra hkyi an zawn wak re, datbung sa dem ai shaloi, Tsin yu AWng gaw nhkap de lanyau mat wa sai ngu jang, Pantsun daw lang nna pru wa ra ai, shi pan tsun sa lu daw la ai kaw nna, nlung de nsa hkraw mat sai, anhte hpe bum matu de hkum sa mu lu, ngai yu hkrit ngai lu nga nna tsun gari nga ai, shi tsun ai shi gaw nlu sa ai, baw sin lahkap she gari wa u ai da, shaloi ngai gaw dahpawt anhte hkumbawp ru shadu lu yang nang nlu lawm nna, tsaw ai de du jang jan ja sai tsaw wa re rai nga ai ngu jang, shi mung rai ang sai, masin grai gahpra wa ai nga, anhte datbung dem tim shi gaw nlung ntsa de hkum wa dem manu law nga hkan jep si u ai. Nung lakang hta gaw moi na hpaga lam numtawk rai nna, hpyen magam hku nga jang sin loi nna sa gasat la na ram ram yak ai shara rai nga ai, moi, Yawng Li hkawmhkam hpe Chyu Yanchyang e shachyut kau dat ai shaloi ndai lam hku Myen mung de hprawng sa mat wa ai, Myen mung kaw sa si nna, shi a hkrang hpe Nmawk mare kaw nlung hte tawk shadun tawn ya ma ai, ya daini du hkra Miwa ni dai nlung sumla kaw sa naw ku ku rai ma ai nga nna bai hkai dan ma ai. Nung ntsa kaw nna grup yin yu dat yang, dingda maga de gaw Dumbung krung, dingda sinna maga de gaw Alaw bum, sinna maga de gaw Laiza rai nga ai.

Alaw bum hkran de Wan hkat bum ngu ai bum kaba mu mada ai, bum kaba mi hta sharaw wan hkru ai zawn hkat chyang ai mu ai, dai hpe moi na ni gaw nat ni yi galaw sha ai re ngu tsun gajai ma ai. Moi Htang Sin Sunwu Hkung ni maigan de hpara hpaji sa hpyi yang lai hkra ai wan nsi bum gaw dai re nga nna tsun ma ai. Sunwu Hkung Hteshan shayi kaw langa layit shap la nna wan yit lai ai lam mung teng na zawn re, hpa majaw nga yang, dai bum gata hkan langa maling rai nga ai. Nat ni a hkama yi dai gaw ya hte ta wan hkat hkat nna, yinam ta du jang tsit lali tsawm wa, ginhtawng htawng jang mam myin ai zawn bai htoi wa rai nga ai, dai hkama yi zawn hkat chyang ai gaw nlung bum hta, yahte ten gaw hkun hkraw ai majaw namlap si hkraw mat nna nlung chyang ai majaw hkama yi nat tawn ai zawn rai, yinam ta nlung lapran hkan nam tu jang bai tsit lali wa, ginhtawng ta nam ni hkraw si wa jang htoi ai bai mu mada re rai nga ai. Dai hpe nat yi shadu ai rai nga ai. Nlung lakang kaw nna gumra du zawn re hku hkawm mat wa ai rai yang, tsawmra tsan ai shara kaw na gaw lam dawga mung masha hta grau tsaw hkra sung wa sai, dawga hkan hpun lap hkrat bum ai hku rai mat wa ai, maling grai dam kaba ai shara kaw du sai, ndai gaw moi na Kumshi du ni nnan sa de ai shara re da, dai maling gaw ram ram layang ai shara rai nga ai. lalam mi daram tsaw ai Kumshi du ni a manau wang kum ai nlung shakum gaw lawu maga hku ayan akan rai naw dung nga ai.

Kumshi gahtawng kaw nna gaw gadawng lam nnga sai majaw hkawm pyaw ai, lam makau hkan nbu hpun mung kaba ba law ai naw tu kajang nga ai. Shana de jan du mahka e ya na Share ga e wa du nna, Share du ni a htingra de sa yu hkawm ga ai, Share du ni a htingra gaw manu mana kaba ai htingra rai nga ai, htingra shachyang maga shanhte a gashu gasha ni nta ram gaw re lahkawng galaw tawn ma ai rai tim, htingra dai hte shadawn dat yang gaw hpun kaba kaw sanyen ba ai daram sha rai nga ai, thingra dai hpe grup yin nlung shakum kum da ma ai, nlung shakum kum tawn ai kaw nta de shang wa ai lam mung nlung nyep da nga ai. Nta htingra npan nbang hkan moi na dawhpum shadung ai nlung shadaw lahkum ni balam made de law nna naw dung kajang nga ai, nta htingnu dai hpe Share majan hta nat kau ya ai re nga ma ai, ndai zawn dawhpum shadaw hpe nlung lahkum kaw shadung, nta wang hpe nlung hte kum shatsawm re lam hpe mu jang she, masha myu ni Jinghpaw ni hpe nhprang prat kaw nna shehwi chyuyi mungdan de galang ta lai di bang wa ai re nga ai ga hpe gaja nkam madat mat nga ai.