YU NI HTE LANYAU A MAUMWI
BUM SHANGHKAWNG
Moi shawngde mare kaba langai mi kaw, grai nhkru ai lanyau langai mi nga ai da Dai lanyau gaw, n gun mung grai ja ai, grai nhkru ai, matse mung grai matse ai. Dai mare kaw shanu nga ai yu amyu nlang hte hpe shani shana rim sha wu ai da! Dai majaw, yu kaji kaba, dinggai dingla, mahkawn shabrang nlata ai sha, shani shagu rim hkrai rim sha hkrum ai majaw, yu amyu ni gaw, grai nga yak mat wa masai da. Yu nli pyi htum na daram rai wa sai, zingri zingrat machyi makaw nni nkri hkrum sha ai lam gaw, tsun nma hpa rai sai da. Dai majaw, lani mi na ninghtoi hta, yu amyu nlang hte gaw, zuphpawng kaba hpawng nna, nhkru dik ai lanyau hpe gasat shamyit na matu, bawngban ma ai da. Yu amyu ni law law gaw, dai lanyau hpe gara ladat hte sat kau lu na lam hpe jawm bawngban ai shaloi, nkau mi gaw: "Ngai gaw lagaw kaw htim na." Bai ngam ai nkau mì rai jang gaw: "Du kaw htim na, hkum ntsa kaw gawa na." Nga nna, langai hpang langai, dai nyau hpe htim na lam tsun ma ai.
Dai shaloi asak kaba nna. hpaji machye machyang nga ai yu dingla langai mi tsun ai gaw: Anhte ndai nhkru la ai lanyau hpe jawm sat na gaw rai sai, raitim dai lanyau gaw, grai nhkru nna, n-gun grai ja ai re majaw, gasat na matu ladat jaw ra na re." Nga bawngban ai. Nkau mi gaw: "Dai rai yang gara ladat hte gasat na rai?" nga san wa ma ai. Hpaji chye ai yu dingla wa tsun ai gaw: "Anhte ni kaw na yu langai ngai gaw, lanyau anhte hpe htim wa jang, dai lanyau a n- gup gata kaw kawa hkam nna asak ap nawng ra na re. Dai zawn yu langai ngai lanyau a n-gup kaw gawa hkrum nga ai shaloi, kaga ngam ai anhte yu ni gaw, du kaw htim gawa na, nkau mi gaw lagaw kaw, nkau mi gaw hkum kaw, nkau mi gaw kan kaw htim gawa na, ndai ladat hte anhte gasat yang gaw, anhte padang dip lu na re." Ngu tsun u ai.
Dai shaloi yu ni gaw: "Dai rai yang hpawt de anhte gasat poi shang hpang wa yang, kadai wa shawng lanyau a n-gup kaw gawa hkam, si hkam na i?" Nga nna, lanyau a n-gup kaw gawa hkam na matu, asak ap nawng gwi ai Yu share shagan langai mi tam ma ai. Hpaji chye ai yu dingla gaw: "Anhte ni kaw na kadai wa madaw yu amyu sha ni yawng a matu asak ap nawng na rai?" Ngu san mu ai da. Dai shaloi gaw kadai mung lanyau a n-gup de shang gawa hkam gwi ai yu langai mung npru wa ai, sha n ga, dai shani kaw nna daini du hkra yu amyu ni hpe lanyau amyu ni gaw, shani shana rim zingri sha mat ai da law.
