LA GAJA NI NUM GAJA LA RA AI
BAWMLI TOI
Moi shawng de Mahkaw wa ngu ai la langai mi nga ai da, dai la wa gaw hpun nba, magwi kawng shing yun hte n-gu ni lajang shachyip gun nna, num yu let pru hkawm mat wa sai da. Shingrai hkawm hkrai hkawm mat wa yang, shana de jan du jang gahtawng gaba langai mi kaw na lam makau hta gaida jan yan nu a n ta kaw wa shang manam nna, n-gai jan hpe shi gun ai magwi kawng shing yun hte n-gu tingsan shaw ya nhtawm, ndai n-gu shaw la nna shat shadu u law ngu tawn da nna, shi gaw mare de bai hkawm mat wa nu ai, shana yup tung tung wa yang pru wa nna, ya shat rai n shadu a ni? ngu wa san jang she, n-gai jan gaw ndai na shat gaw gade shadu tim n hkut hkraw nga ai law, ganing re n-gu wa rai nit dai kun nga tsun jang, Mahkaw wa gaw e ndai gaw magwi kawng shing yun she rai nga ai, n-gu atsawm sha yu nna shadu na nnga ai mi ngu tsun nhtawm, n-gu hte shat bai shadu shangun ai hpang, Mahkaw wa gaw gumgai jan hpe hkyet yu rung nna myit n-pyaw ai majaw, myit hta ndai yan nu hpe gaw yup ai kaw she naw bai yu sana re ngu nna bai yup bang wa jang mung, ganu gaw magyi lapran kaw ata shawn matep tawn nna yup taw nga, gasha jan mung shi a lata hpe abaw kaw makyit mara tawn rai jang she, Mahkaw wa myit hta ndai yan nu gaw shannu lahkawng mana ai hte mala la bawnu chyat ai masha she rai nga ma ai ngu myit la nna, nhtoi htoi ai hte, hpun nba n-gu magwi kawng shing yun ni ma hkra shabawn gun nna hkawm mat wa maw jang, dai gaida gasha mahkawn jan gaw shi wa na lam gaang na nga hkyi bum gaang kaw shi a lata na ja la-chyawp raw la nna kra n kra di sa chyawp tawn nhtawm, lam makau na nam shalawng kaw makoi yu nga nu ai,
Mahkaw wa gaw nga hkyi bum kaw rawng ai ja lachyawp dai hpe sa shaw la jang, mahkawn jan gaw he dai nga hkyi kaw na ja lachyawp hpe hpa rai shaw la da nu ta? ngu san jang, Mahkaw wa gaw e nga hkyi gaw nga hkyi ja gaw ja re majaw shaw la da we ai le ngu nna htan jang she, mahkawn jan gó nu gaw nu ngai gaw ngai re mu e nga jang, Mahkaw wa num ndai gaw ngai hpe nga hkyi, ja lachyawp hte chyam dinglik chye ai, shi gaw ngai hta grau zen ai masha she rai nga ai ngu nna shi kraw gata e myit la nhtawm, dai gaida yan nu a nta de bai nhtang wa nga nga nu ai da. Aten gaw lani hte lani lai mat wa sai hte maren, yu nga ninglen wa, dai mahkawn jan gaw tsun shaga chye, kyang lailen gaja, sari sadang rawng ai, hkum shingyan bawng, ahpraw wunchying rawng ai, amu bungli lam shagu hta rai timung galaw lu galaw sha, shadu lu shadu sha ai lam hta mung tsun n ra ai num mahkawn dai hpe, Mahkaw wa yu myit dik dum mat nu ai da. Mahkaw wa gade mung n sa ai gaida yan nu hte nga nga yang, hpawmi jan gaw gasha jan ala lu sai majaw shi a myit hta myit mu myit hkut mat nna, gasha yan gahkri wa hpe shaga tawn nna, e ma yan e ngai gaw asak u-gut gu, aprat shanut nu mat ni ai, dai re majaw n-gawn shawa lam de naw wundoi mat wa na ni ai yaw, ma yan e, ngu ai hte rau shi a nsa jahti kau jang, gasha jan gaw, nu e nang gaw ngai naw gaja yang wa nnga mat tim, ngai ningsha hpe bau maka gaba tawn sindai, ya gaw ngai nang hpe bai bau na rai nga ai le nga nna mana maka jahtau hkrap jang, Mahkaw wa shannu a majoi shingran mu nna hkrap bang wa yang, madu jan gaw madu wa hpe hkup hkrap sa ngu nna, masha ni hpe shaga tawn nna makoi mayang poi galaw nhtawm ganu hpe lajang lup kau manu ai da.
Shingrai nna jawm nga nga yang, gasha bai lu wa nna, ganu a ningtsang gaw dai ma hpe yu nna gan shaprai kau manu ai da. Dai hpang, ma langai mi bai shangai jat la jang, Mahkaw wa gaw, e nannu ni masum rai sai re majaw hpa myit n gaji ra ai, ngai naw hkawm mat wa yu sana nga nna, lu sha n-gu jum majap ni tam tawn da ya nna hkawm mat wa sai da. Mahkaw wa sumtsan salang hku nna shachyen shaga wa nu ai da, shi tsun shaga wa ai lam hta masha ni madat yu yang jaw ai hkrai na htuk dum ai hkrai re majaw, shara magup hkan e shi a a mying gajai gara mat wa jang, hka panglai din ai de mung lai shaga mat wa nu ai da. Dai majaw Mahkaw wa gaw ma shannu ni kaw bai pru wa nna e nannu ni e, ngai hpe masha ni sumtsan salang tai na matu hka sanghpaw hte panglai din ai shara de sa wa na hku htet ai majaw, sa wa ra mat ni ai, dai majaw nannu ni atsawm sha nga mu ngu da nhtawm, masha ni law law hte hka sanghpaw jawn nna sa wa masai da. Panglai rap nna myu gaba law law hkan du mat wa nna, shanhte mungdan masa ni lam shagu bawng yu tsun yu rai jang, Mahkaw wa tsun shaga ai lam hta grau nna bawngban ai lam yawng hpe Mahkaw wa e tsun paran dawdan kau kau rai ai majaw, masha ni shi hpe grai mau let ndai wa gaw shi a madu jan loi mi kung jaw ai ngu tsun gajai ma ai da.
Mahkaw wa nta de wa na mung nai mat re majaw, madu jan yan nu ni hpe shi kaw hkan nga nang na matu, shata 7 praw 7 ya shani sanghpaw hte wa woi la na, dai majaw, madu jan hpe shi sanghpaw hte wa jang, manang saw la nna, nta na arai ma hkra sanghpaw kaw sa la bang na hku hkyem da, ngai sanghpaw li kaw la nga na ngu ai laika shagun dat nu ai. Madu jan yan nu ni laika dai lu la hti nna grai gabu ai hte nga nga yang, masha ni gaw Mahkaw jan hpe num ndai gaw loi mi reng ai re majaw shi a madu wa sumtsan ga de sa nga nna yawng a ntsa e myit su du ningbaw ningla rai mat sai re majaw, ndai nta buga de gaw n wa jaw sai nhten ngu nna masha ni myit la ai majaw, Mahkaw jan hpe gahtawng du wa gaw sumtsan ga de hkum sa mat, ngai hte jawm nga mat ga ngu ai laika jaw jang, Mahkaw jan gaw du wa a laika lu la jang laika htang nna du wa hpe ya praw 7 ya shani sa wa rit e ngu dat nu ai da. Agyi wa mung Mahkaw jan hpe tsawra laika shagun jaw nna, Mahkaw jan ya praw 7 ya shani ngai kaw sa wa rit yaw ngu nna laika bai htang dat nna naw nga nga yang, amat wa mung Mahkaw jan hpe laika shagun jaw ai gaw ngai nang hpe grai tsawra ngai, ngai hte nga mat ga ngu tsun u yang, Mahkaw jan gaw ya praw 7 ya shani ngai kaw sa wa rit ngu nna shakram bai htang dat nu ai da. Shingrai nga nga yang praw 7 ya du ai shani gaw, du wa sa wa nna Mahkaw jan hte shaga taw nga yang, agyi wa du sa wa ra ai,
shaloi, Mahkaw jan gaw adu wa hpe hpawmi hpun palawng jahpun, nhkaw jahkaw tawn di nna, gawngri ri shangun nu ai da, shingrai agyi wa gaw Mahkaw jan hpe ndai adu wa gaw ganang na rai nga nna san jang, Mahkaw jan gaw nye a du ni re, na a mung adu ni she nrai na yi nga let naw jahta dung nga yang, amat wa bai sa wa nna, Mahkaw jan agyi wa hpe e nang ndai chyinghka shingjut kaw naw makoi u, hkum shaga lu yaw ngu nna agwi dingsi mung gali tawn ya di nhtawm makoi nga shangun nu ai da. Shingrai amat wa gaw ya dingsi ngoi ai gaw nhpa re ngu yang, Mahkaw jan gaw waw agwi dingsi shangoi dat da nu ai nga nna tsun dan nhtawm, amat wa hte naw jahta nga yang, Mahkaw wa gaw shi a madu jan yan nu ni hpe laika kaw tsun dat ai hte maren, sanghpaw hte du wa nna madu jan yan nu ni hpe shana ai nsen htawn jak dum shangoi dat jang, Mahkaw jan gaw madu wa nsen htawn jak dum dat ai na ai hte rau, dai amat wa hpe nang le shinggan kaw naw sa dung nga su ngu tsun nhtawm, n-gai tai nna gawngri ri ai wa hpe mung raw la, chyinghka shingjut kaw makoi tawn ai wa a agwi dingsi mung raw la rai nna, du wa, agyi wa, amat wa shanhte masum hpe Mahkaw jan tsun ai gaw, e ya anhte gaw sanghpaw de masha ni hpe ndai arung arai ni naw sa hpai sa ya saga ngu nna shanhte hpe magup sumhpa hta jahpai nna shi mung ma yan nau hpe woi lang rai sanghpaw de sa du jang, ma yan hte dai arung arai ni hpe madu wa hpe sa ap masu nna, dai adu wa, agyi wa, amat wa la masum hpe, sa ya anhte mali gaw nta de nhtang mat saga yi, ngu nna, shanhte marai mali hte sanghpaw shinggan de byawn re hte, Mahkaw jan gaw sanghpaw gata de bai nhtang shang mat wa jang, dai adu wa, agyi, amat wa la masum hte gaw hkarang kaw Mahkaw jan galoi wa pru wa wa ngu, u hku a masa si mada rai nna la mahka nga ta masai da. Mahkaw jan gaw la masum dai ni hpe masu hkalem sha kau ai hpe mani mayu let, madu wa yan wa ni hte alum ala rai nna sanghpaw kaw jawn mat wa masai da. Num ngu ai ni gaw sari sadang rawng hpaji zai byeng ya grai rawng ra nga ai law.
