MYIT GAWP AI NAHTU BRANG
ROI BU
Hkaw hkam langai mi gaw shi up ai mungdan gata hta myit su myit gawp ai masha kade daram wa nga ai kun ngu nna chye mayu ai majaw, shi nga ai Hkaw hkam htingnu hte kade ntsan ai Nga law lam hta nlung gaba langai mi galau nna pat da u ai, gata e mung ja sut dek gasha langai lup da u ai. Shata mi daram na wa ai ten hta Nga law gawt ai hpaga la ni lai wa ma ai, dai hpaga la ni gaw, aga, nlung gaba lam e pat taw nga ai law, ganing rai nna lam gaang e nlung gaba taw nga ta? Ndai ga na masha ni gaw grai lagawn ai masha ni she rai nga ma ai, lam gaang e nlung gaba pat taw nga tim kadai sha mung n kam galau kau ma ai, hpyang dik ai masha ni she rai nga ma hka i ? Nga nna pawt anyam lai mat wa ma ai nga yang, law nga langai a garep arut jahpye kau ai. Kade ya n rai jang hpaga la wunawng mi gaw Magwi, Gumra Lauze,Nga wutang ni hta gat rai htaw nna dai lam nmaw kaw na hpun maling ni tsit tsawm ai hpe yu mada chyai let le waw jahta nna hkaw hkam hkaw makau na lam ntsa de du sa wa ma ai. Shanhte gaw lamu ga yaw nrau taw ai re majaw, shawng lam de ndum yu kau dat yang, lam e nlung gaba langai mi pat taw nga ai majaw Magwi, Gumra, Lauze, Wutang ni gaw nlung gaba hpe yen nna lai wa ai shaloi, Nga wutang langai mi htaw ai rai daw hte nawng lam lawu de chyai mat wa ai mu dat nna wa htim dun la timung, hpang hkrat mat sai majaw, jamjau hkrum sha masai.
Dai hpaga la ni mung dai zawn jamjau hkrum tim, lam e pat taw nga ai nlung hpe n kam galau kau da ai sha ndai ga na mung masha ni hpe she pawt nna myit grai npyaw let bai matut hkawm sa wa masai. Shata manga daram na ai hpang e bum mare kaw nga ai yi sun hkauna galaw sha ai nahtu brang langai mi gaw mare gaba de jum majap sau sa mari na matu dai hkaw hkam hkaw makau kaw na lam gaba de du sa wa yang, lam gaang e nlung gaba langai pat dang taw nga ai hpe sa mu nu ai. Shaloi nahtu brang wa gaw, awh, ndai nlung gaba gaw galoi kaw nna wa lam e pat taw nga ai kun? Gumra daw htaw nna lai wa ai ni grai jam jau ai baw she rai nga ai. Ngai she galau kau n-ga ngu myit nna, makau mayang de mada dat yu nhtawm gandang langai tam la rai, nlung gaba dai hpe lam lawu de galau sit kau u ai. Dai nlung gaba galau ai shara kaw sutdek gasha langai mi rawng taw nga ai hpe mu nna, mau ai hte rai atsawm bai galaw ahpre yu yang, laika maisau langai mung bai mu nu ai, dai maisau pa hta gaw, ndai gaw nlung gaba galau kau ai wa a matu kumhpa rai u ga nga nna ka shakap da ai hpe mu jang, sutdek gasha hpe bai hpaw yu yang, ja sumroi, ta chyawp re ni tsawmra rawng nga ai hpe mu jang bai magap kau da nu ai.
Shingrai myit dingman ai nahtu brang wa gaw, bai sumru yu nna ndai lamu ga gaw hkaw hkam wa hte seng ai, Hkaw hkam wa a lamu ga she re majaw, ndai ja rai sutsek gaw hkaw hkam Hkaw de hpai sa wa nna, hkaw hkam wa a man e grai hkrit hkungga let sa sak jaw u ai. Hkaw hkam wa gaw shi a mu bawng salang gaba ni hpe shaga la nna, zuphpawng galaw ai, dai shaloi Hkaw hkam wa; Ngai gaw ngai a mungdan gata hta myit dingman ai masha kade wa nga ai kun? Ngu nna chye mayu ai majaw, ngai nan shana ningsin e bum de lung nna, nlung gaba langai hpe ngai nan galau hkrat wa nna, lam nmaw e pat da ai re. Myit su myit dinghpring ai ni hpe kumhpa shagrau jaw mayu ai majaw dingsa lam gaang e nlung galau pat da ai re. Raitim lam lai ai masha hpung kade she lai wa sai, dai nlung gaba hpe kadai sha pyi n kam galau kau ma ai. Ya daini bum ga kaw nna sa wa ai ndai yi sun hkauna masha nahtu brang gaw nlung gaba hpe galau kau ai sha n-ga,ja sutdek bai lu la timung agatsi tsim sha n la hpai mat wa ai hta n-ga, ngai hkaw hkam wa hpang de bai hpai sa wa ai majaw grai myit ding man ai masha rai nga ai. Dai majaw ndai ja sutdek hte hpawn kaga kumhpa law law hpe naw jaw jat dat na nngai nga tsun nna, nahtu brang hpe kumhpaw kumhpa law law jaw dat nna shabawn sa dat nu ai.
