MU NINGWA
Shawng de hpaji chye machyang grai pring tsup ai Bunggyi langai gaw, masha law law nga ai shara kaw n nga ai sha, nam mali kaw, nta wang kaba dik ai galaw la nna, shi krai sha nga ai da. Masha law law wa shi kaw na hpaji grai sa sharin la mayu ma ai. Hpaji sharin la ai hpung kaw shayi grai tsawm ai nat shayi sha mung lawm nga ai. Nat shayi sha a mying gaw Mani Myekala nga ma ai, shi gaw hpaji mung grai chye nna, tsawm mung grai tsawm ai. Shi hpe mu yu ai ni gaw yu n law ai zawn nga ai hkrai rai nga ai, kaga hpaji bai sharin jat na matu n lagawn nga lu ai. Shi gaw hka kata e mung nga zawn chye hpung yawt hkawm, lamu ganghkau kaw mung nam u namtsa zawn chye pyen nga ai. Dai majaw, Bunggyi wa nga ai shara de mung pyen sa wa nna, Bunggyi a man kaw hput di tawn, hpyi nyem u ai gaw, sara kaba hpe garum sa hpyi ai law. Sara, na hpaji hpe sharin la mayu ai hte sara a sape tai na nga nna hpyi shawn jang, dai Bunggyi wa mung mai ai le nga nna hkap la mu ai. Dai majaw Mani Myekala grai kabu let pyen mat wa sai hpang, grai matse nhkru dik ai sha lawa la langai mung bai du sa wa ai, Dai sha lawa gaw n-gun grai ja ai majaw, yu dat tim hkrit si na zawn rai nga ai, shi a mying gaw Ram I Su nga ai, shi gaw Bunggyi a makau kaw du ai hpang Bunggyi wa e ngai mung nang kaw hpaji sharin na yaw nga nna, grai ru ai nsam hte sa tsun nga ai.
Shaloi Bunggyi wa gaw, mai sa nang tsun ai hte maren hkap la sai re majaw, nang yaw, ngai jahkrat da ai tara ni yawng hpe hkan shatup ra na re yaw, nga tsun jang, shatup hkra shakut na re nga nna hkam la nu ai. Shaloi, sara Bumgyi gaw, hpawtni kaw na sa sharin manu ngu nna htet nu ai. Sara Bunggyi wa jawng ma langai gaw nat shayi langai gaw sha lawa Balu re ai chye tim shi a myit hta hpa hkrit ai lam n nga lu ai. Dai hpang shani kaw nna, sara Bunggyi wa mung shi a jawngma sa tai ai nat shayi Mani Myekala hte sha lawa nat Balu Ram I Su yan hpe hpaji sharin ya hpang nu ai. Shi sharin ya ai hpaji gaw masha ni hpa machyi makaw ai shamai shatsai ya ai hpaji, masha hpe jam jau jaw ai baw hpaji, masha hpe ga hte gasat hkat ai hpaji, marang jahtu jahpawng ai hpaji, ana zinli shabyin ai hpaji, masha hpe gawut sat ai lawng mandan hpaji, masha hpe hpang hku nna hkan shachyut jahten sharun ai hpaji, lata lahpan kaw na wan gawut shapraw ai hpaji ni hpe sharin ya ngut ai hpang, Ram I Su hte Mani Myekala yan gaw shada da hpaji shingjawng hkat ma ai. Shaloi Ram I Su gaw shi ta lahpan kaw na wan hkut ahpraw hpe wan sumri ahkye nsam shapraw dat nna, Mani Myekala hpe gasat jang, Mani Myekala gaw hpaji chye tim, gumrawng gumtawng ai myit n rawng ai sha, si manyi dik ai hku nna, Ram I Su hpe shi a lata kaw na wan hkut amut nsam hte hkap nhtang gasat kau dat ya nu ai. Ram I Su gaw galoi mung myit masa gumrawng gumtawng ai myit hte marawn nna, shi a wan sumri hpe bai dawm la kau nu ai.
Sara Bunggyi wa gaw, shi a jawngma yan hpaji shingjawng hkat ai mu shagu mani sumsum rai yu nga u ai. Dai hpang shani gaw, sara Bunggyi wa mung, shi a jawngma yan hpe ya gaw nan hpe ngai sharin ya ai hpaji mung hkum sai daram re ai majaw, pawtni gaw sanpoi htai na hku di ga ngu htet dat nu ai. Mani Myekala gaw mai sa, sara nang tsun ai hku rai u ga nga tim, Ram I Su gaw sara Bunggyi wa hpe: " Nang gwi yang san yu u le. Ngu nna marawn jahtau let pru mat wa nu ai. Hpang jahpawt jawngma yan sa wa jang sara Bunggyi wa gaw marai langai hpe gawm kaji langai pra jaw nna: "Ndai gawm hta hpawtde numri ntsin pring hkra hkra la sa wa marit. Shawngdu ai wa gaw nambat langai rai na re majaw, kumhpa mung grau kaja ai lu la na re." ngu htet da nu ai. Ram I Su gaw, gara hku mi rai tim ngai nambat langai lu na re ngu myit da ting da u ai. Dai shana Ram I Su gaw bum de sa nna, jahpawt jau jau sara kaba Bunggyi wa kaw shi shawng du lu hkra ngu myit makun da nna, jahkring mi naw yup la ga ngu galeng dat ai lata jahpawt nhtoi san hkra, di hkawk hkawk ai nsen ni gaw lamu ga pyi she a shun na daram rai nga ai.
Mani Myekala gaw hpaji grai rawng ai jan re majaw, dai shana hkyen bum de sa wa nna, mahkawn hte rung nga tsingdu pa hta sumpan langai nyep da nna, shi mung dai ntsa e galeng yup nga ai. Hpang jahpawt nhtoi san wa ai hte rawt nna, shi nyep da ai sumpan hpe shup dat yang numri hka rawng nga sai majaw gawm hta pring hkra shup bang la nna, sara ngai du sai law nga nna, hkungga lara let shaga dat jang, sara Bunggyi wa mung, nang nambat langai lu sai ngu nna, lung seng hte galaw da ai din din grai tu kala tsawm ai lungseng langai jaw dat sai. Ndai lungseng gaw, manu grai dan nna, hpung shingkang rawng dik ai re majaw, atsawm sha lanu lahku nna, tsing da u yaw, nga nna mung naw htet dat wu ai. Mani Myekala mung, grai kabu gara ai hte sara Bunggyi wa hpe grai chyeju dum ai lam, kawa langai zawn, hpaji sharin ya ai sara langai hku nna mung, jinghku langai hku mung kam hpa ai lam hpe tsun da ngut jang, Bunggyi wa hpe masum lang naw kau da nna, pyen mat wa nu ai. Dai hpang gade nna yang, Ram 1 Su bai hkan du nang nna, shi gaw grai jau dum sai ngai nan nam bat 1 lu na re ngu nna marawn let gagat sa wa ai majaw, lam hkan e shi hte hkrum ai du sat du myeng ni pyi she hprawng htaw mat hkra kyin kadau sa wa ai.
Raitim hpang hkrat mat sai. shi gaw shana tup yup pyaw mat ai majaw, jahpawt shi rawt wa yang, jan pyi kanoi pru wa sai, shi yup ai makau na magyeng hpun lap hkan na numri ni sha hkan ashun la nu ai, gawm kaji hta hpring na grai yak la nna, myit grai ngut bu nga ai. Sara Bunggyi kaw du ai hte ngai nambat 1 rai sai law ngu nna, marawn shabam let gagat bang wa ai majaw, Bunggyi wa gaw nang hpe mung kumhpa jaw na ngu tsun let ja ningwa hpe hkap jaw nna, nang gaw nambat 2 she ang sai, Mani Myelaka nambat 1 kumhpa hpe sa la mat wa sai ngu jang, Ram I Su sara wa hpe chyeju dum ga pyi nkam tsun hkra, shi hpe jaw ai ja ningwa hpe mung gabu nga ai raitim, Mani Myelaka lu la ai gaw hpa baw kumhpa rai nga san dat jang, sara Bunggyi wa gaw: "Shi lu ai gaw namdat 1 kumhpa re ai majaw grai manu dan ai lungseng kumhpa hpe lu la mat wa sai." ngu tsun dan jang, Ram I Su gaw, sara Bunggyi hpe n gayin yu hkra sinpawt la htet jinghkyen pru mat wa sai. Mani Myekala gaw grai hkikhkam ai htingnu kata e baren mahkawn ni shinggrup da ai gaang e dung nga ai. Hpang e Ram I Su gaw grai rai si manyi la ai nsen hte Mani Myelaka nang lu la ai kumhpa ngai hpe madun yu rit ngu tsun wa ai. Mani Myelaka mung bawnu hpaji grai reng ai re majaw, Ram I Su a myit masa lam hpe chye nna, grai nkam ai myit hte baren mahkawm ni a gaang e dung nga ai kaw na rawt nhtawm, shingdu de lalam ni daram htingnut nna, Bunggyi wa jaw ai lungseng kumhpa hpe shi a baw ntsa e lata lahkawng hte jum da tawn, lahput hput di nna, shi lu la ai lungseng kumhpa hpe madun dan wu ai.
Shaloi Ram I Su gaw ngai lu gashun la hkra di na nga myit daw dan ai hpe Mani Myekala chye da chyalu re majaw, Ram I Su ngai kachyi sha pyi jum yu ga, nga jang, Mani Myekala gaw n mai na re ngu pyen pru mat wa jang, Raml Su mung nang hpe sha gaw ngai dep hkra, hkan shachyut na nga pru mat wa sai. Raitim mung Mani Myekala gaw samwi gata de pyen shang mat wa jang, Ram I Su mung hkan pyen nang nna, ganoi noi n mu jang, masin pawt nna, shi hpai da ai ja ningwa hte kabai dat jang, Mani Myekala hpe samwi gata kaw kachyi mi hkan mu dat ai hte, hpang kaw na hkan shachyut nang nga ai majaw, Mani Myekala mung shi sharin da sai hpaji hte lata lahpan kaw na wan shinglet gawut shaprang dat nna, Ram I Su a ja ningwa hpe bai nhtang shinggan gasat kau dat ai majaw, ja ningwa ga de di hkrat mat wa ai hte marang kaba mung htu hkrat wa, myihprap mung galam nna, dai ja ningwa gaw mu ningwa tai mat sai re. Dai majaw, ya daini ndai prat du hkra lamu mung nna, myi hprap gala jang gaw Ram I Su ngu ai sha lawa hte Mani Myekala ngu ai nat shayi sha yan bai ga law gasat hkat nga masai ngu ai lam hpe chye lu nga ga ai law.
Labang Roi Bu Gambaw diya mungdan na laika buk kaw na shaw ka gale da ai re.
