U HKU A MARAI

U HKU A MARAI

MARIP HKAWN SHAWNG

Maling gaba langai hta du sat du myeng ni shada da dangrang hkat shagu Uhku a dawdan paran ai hpe hkam la la rai ma ai. Galang mi Magwi gaw Woi hpe ngai gaw hpun ni hpe lu gang daw ai, hpun tawng gaba mung lu dun garawt nngai nga nna, shi a hkum gaba ai lam hpe arawng mala dan nu ai. Woi mung ngai gaw ganing re hpun tsaw hkan raitim lu lung nngai, ngai hkrang gaji nna sam tsang ai re majaw hkum hkrang gaba nna n- gun ja ai wa hta grau akyu rawng ai lam tsun nu ai. Magwi yan Woi shada da kadai mung kadai hpe nkaw, madu law sha gaw kung dum ai hkrai rai jang she, Uhku hpe she hparan shangun saga ngu nna Uhku hpang de kadai mahtang grau kung ai lam san hkrat wa masai. Uhku gaw shi nga ai kaw nna gade n tsan ai kaw na hka langai hpe madun let, nan lahkawng hka rap nna hka kau na hpun e si ai namsi sa di wa marit ngu shangun kau dat nu ai. Shaloi Magwi gaw dai hpun hte anhte a manghkang hpa seng a ta nga nna san jang, Uhku gaw ngai tsun ai hku she sa galaw masu ngu shangun kau dat manu ai.

Magwi yan Woi grai myit nhkawn let hka kau de sa wa masai. Woi gaw hka mung nrap yu, gade sung ai dam ai mung nchye rai n- gwi rap nna mau tsap nga nu ai. Shaloi Magwi gaw ya nang ngai hkum gaba n- gun ja ai lam hpe chye sai nrai i? nang hka n- gwi rap jang gaw nye shingma ntsa de lung u, ngai nang hpe ba rap mat wa na ngu nu ai. Woi grai gaw nrai dum tim hka nlu rap ai majaw, Magwi shingma kaw jawn nna hka hkran de du masai. Hka waw ra hkran kaw tu ai hpun gaw gaba nna malang ai hte tsaw ai hte, namsi mung hpun ndung kaw she si nga ai. Dai majaw Magwi mung namsi di na matu bai ndep, hpun hpe gang daw na matu mung nmai byin, hpun ndung de mung bai nlu lung rai nna mau tsap mat nu ai. Dai ten hta Woi gaw gumrawng gumtawng re nsam hte Magwi hpe: Nang hkum gade gaba n-gun ja ai gaw gaman she re, ndai lam hta nye sam tsang ai sha akyu rawng sai, namsi gaw ngai di na ngu tsun let, hpun de grai lawan ai hku lung nna namsi wa di la rai Uhku kaw bai nhtang wa masai.

Uhku gaw Magwi yan Woi hpe hkap mu ai hte, ya nan lahkawng ta tut nan tam la lu na manit dai nga jang, Woi yan Magwi gaw ganing rai tam sata? nga nna bai san ma ai. Shaloi Uhku gaw n- gun rawng ai Magwi nlawm yang nang hka rap lu na nre, hkum hkrang gaji nna sam tsang ai Woi nlawm yang nang Magwi mung hpun ndung e si ai namsi hpe ganing di nlu di la ai. Du sat du myeng a hkum shagu hta atsam amyu mi lu ai, Dusat myu ni hta langai hte langai a tsam ni gaw shi a shara hta shi a akyu rawng ai hkrai re, langai hta nnga ai atsam hpe langai mi hta nga ai atsam hpe jai lang yang, lam shagu hta awng dang ai hpe hkam sha lu sai nrai i? ngu san dat manu ai.